Wie biwwe en wat doe’we

De stichting ‘Stellingwerfs Eigen’ is op 27 juli 2004 opricht deur Piet Bult van Ni’jberkoop en Frank de Vries van Blesdieke om et projekt ‘De Stellingwarver Biebel’ een degelik follement te geven. Et doel van de stichting is, om te kommen tot et maeken en uutgeven van een mooie en veural ok een goeie Stellingwarver Biebel.

Veur een wat brieder dreegvlak zuken we nog (meer) bestuursleden, lezers en/of adviseurs die mitdoen willen in dit stichtingsverbaand om van de Stellingwarver Biebel een mooi en bovenal een goed boek te maeken. Anmelden kan deur een aemel naor: info@stellingwerfs-eigen.nl

Naodat et pattekeliere initiatief van Piet en Frank in positieve zin wat uut de haand leup, wodde et hoog tied om de zaeken degelik an te pakken want et leup veur wat de centeraosie angaot al aorig uut de haand. Iedere keer 100 boekies maeken (laoten), daor een peer van verkopen mar meer as de helte ommenocht ronddielen, dat lopt vanzels aorig in de pepieren.

Iene van de eerste akties was dan ok et warven van wat foonsen bi’j o.e. de Perveensie Fryslân en de beide Stellingwarver Gemienten, Oost- en Westaende. Dissen hebben onderhaand alledrie oonze eerste anvraoge (2005) om een bi’jdrege ofwezen. De Gemienten Westerveld in Drenthe en Stienwiekerlaand in Overijsel kwammen -donkt oons- ok in anmarking om financieel mit te doen. Jammer, ze hebben zegd dat ze eins gien ‘affiniteit’ hebben mit et Stellingwerfs en daoromme niet mitdoen wollen.

We zuken vanzels ok nog de hieltied om donateurs. Niet allienig om de centen mar ok om zo wat een bried dreegvlak te kriegen veur oons wark. Awwe d’r ok mar een hiel klein betien an verdienen kunnen wiwwe ok nog wel es een boek of zokswat uutgeven.

Nog een meugelikhied om wat centen bi’jmekeer te kriegen, hewwe bedocht, is et maeken en verkopen van een jaorboek. D’r bin vaaste wel meensken die es een gedichien of een kot verhaeltien of zoks-zo-wat schreven hebben mar daor veerder nooit wat mit daon hebben. Die meensken vraogen wi’j om dat wark naor oons toe te sturen mit et doel om daor dan mitmekeer een mooi boek van te maeken en dat dan te verkopen. As ’t een betien mitzit kuwwe daor misschien wel een jaorliks evenement van maeken.


Naor de thuusbladziede