Ankem zaoterdag 26 juni wodt in de karke van Berkoop et startschot geven veur et maeken van de Biebel in et Stellingwarfs. Van 11:00 tot 12:00 ure wodt daor een bi’jienkomst holen waor elk welkom is die d’r belangstelling veur het. In dat ure zal et eerste biebelboek, Genesis, in een Stellingwarver vertaeling as boekien in een proefuutgifte uutriekt wodden an domenee Dr. Rienk Klooster van Jorwerd. Perfester Dr. Anne van der Meiden uut Nijverdal zal een inleidend verhael vertellen over zien ondervienings mit et vertaelen van de Biebel in et Twents.

Nao meer as een jaor van veurbereidings is Piet Bult van Ni’jberkoop begonnen mit wat vingeroefenings in et vertaelen van de Biebel. Veur him weren o.e. Hendrik Bergveld, Rienk Klooster en Oene Bult d’r ok al es mit doende west mar dat gong meerstal over kleine stokkies en vaeks over een speciaol onderwarp. Dit jaor op 27 oktober komt d’r van et Nederlaans Biebelgenootschop een hiele ni’je Nederlaanse vertaeling (NBV) uut. En kotleden is et laeste diel van et Stellingwarfs Woordeboek van Dr. H. Bloemhoff uutbrocht zodat an beide kaanten de goeie woorden now roem veurhanen binnen. Et is now dus een goed mement om d’r an te beginnen en et boek dan in ien keer hielendal te vertaelen.

Tegere mit Frank de Vries van Blesdieke is d’r een meerjaoren plan veur opsteld. D’r zal hadde an warkt wodden om et hiele projekt veur 2010 klaor te kriegen. Dat dit gien warkien is veur een peer regenachtige middaegen, daor bin ze onderhaand wel aachterkommen. En as et in de ankem zes jaor niet hielendal lokt dan is ‘t nog gien schaande want de snelhied mag niet te koste gaon van de kwaliteit.

Elk biebelboek zal eerst in een ienvooldige proefuutgifte verschienen. An et aende van die riegel van ongeveer vuuftig boekies zal ‘De Stellingwarver Biebel’ in zien gehiel uutgeven wodden as een boek in een zwatleren baand mit gooldopdrok. Over et tal van die Biebels breken ze heur de kop now nog niet. Et kun wel een peer honderd wodden mar altemet ok wel minder as tiene.

(Tied veur de fotograaf omdebi’j 11:30)

Ni’jberkoop, 9 juni 2004,