20 feberwaori 2007:
Op 12 feberwaori
hewwe oonze aendejaorsvergeerdering holen.
Lees hier et beknopte jaorverslag over et
jaor 2006.
17 juni 2006:
Vandaege hewwe in restaurant ‘t Witte Huis in Donkerbroek et boek ‘Gedane
arbeid’ (Herinneringen van een Stellingwerver autoverkoper) prissenteerd van de
schriever Henk de Vries uut Noordwoolde. Lees hier et NL-passebericht.
3 meie 2006:
Vandaege is zonder veerder ommedaenken et proefboekien mit de biebelboeken
1 en 2 Korintiers verschenen.
31 december 2005:
Op 23 december hewwe oonze aendejaorsvergeerdering holen.
Lees hier et beknopte jaorverslag van
oprichting van de sSe tot an ultimo 2005.
15 november 2005:
Vandaege is Jan Veldhuizen uut
Apeldoorn zomar wegraekt. Jan het meer as een halfjaor drok mithulpen om de
Stellingwarver Biebel mooier en beter te maeken. Lees hiere een 'In Memoriam'.
5 november 2005:
De veurzitter en de siktaoris van
stichting Stellingwerfs-Eigen weren d’r -krek as veurig jaor- weer bi’j, op de biebelvertaelersdag
op 5 november op Erve Kots in Lievelde. Disse vertaelersdag is ieder jaor op
uutneudiging van SONT-warkgroep "Dialekt en Religie" van et Staring
Instituut, dit jaor mit et thema de vertaeling van Hooglied, heufdstok 7. De inleiders,
da. Adrie Drint en domenee Klaas Pieterman beten de spits of mit uutleg over et
Hooglied. De Grunninger vertaelers begonnen alderdeegst te zingen. De
vertegenwoordiging van Drente hadden de hiele dag al stief veur et eupen vuur
zitten om heur op te waarmen en begonnen op een gegeven mement ok al te zingen
mit een gitaor as begeleiding. Perfester dr. Anne van der Meiden nuumde een
peer passages in et Hooglied poere porno. Al mit al toch weer een leerzeme dag.
29 oktober 2005:
In et raemwark van de ‘bijbel10daagse’
die deur et NBG en KBS deur et hiele laand hullen wodt, holen wi’j morgens van
10:00 – 12:00 ure een veurlees- en signeersessie bi’j boekhaandel Bahnmüller in
Oosterwoolde. Middags van 14:00 – 16:00 ure doe’we etzelde bi’j boekhaandel
Zwikstra in Wolvege. Lees hier et hiele passebericht
(nl). Van Anne Bult uut Utrecht hewwe van ’t jaor ok drie ni’je boeken
uutgeven. Hi’j zal ok uut zien boeken veurlezen en signeren.
24 september 2005:
Vandaege -rond een ure of halfelf- is
bi’j et arkje van Rink van der Velde op ‘e Veenhoop et buseboekien
"Wieshied uut de Biebel in et Stellingwarfs" uutgeven. Et eerste
boekien mit al disse wieshied uut Prediker, Job en Spreuken, is an Uiltsje
Hosper van et Fryske Gea overhaandigd.
D’r bin veural Friese- en aandere streektael- en dialekt schrievers (m/v) bi’j
uutneudigd om op dit gaedelik plakkien hier en daor eventies bi’j stille te
staon of om mekeer zomar es (weer) te treffen. Lees hier de teksten van de verschillende
sprekers.
19 meie 2005:
Vandaege is zonder verder ommedaenken een proefuutgifte van et biebelboek
Handelingen verschenen.
15 december 2004:
Vandaege is in et kesteel van Blesdieke et dadde boekien uut e riegel
‘Biebel in et Stellingwarfs’ anbeuden an de Kastman en Kesteelheer Gregorius.
Dit dadde boekien is et evangelie van Lucas mit o.e. et geboorteverhael van
Jezus. Lees hier et passebericht in et Stellingwarfs.
6 september 2004:
Vandeweke wodt - veerder zonder ommedaenken - onder et motto ‘Drie maegies
in ién boekien’, et twiede boekien uutgeven in de riegel Biebel in et
Stellingwarfs. Lees hier et passebericht in et Stellingwarfs
of in et Nederlaans.
1 augustus 2004:
Vandaege is de webstee www.stellingwerfs-eigen.nl ‘de locht’ in gaon mit et algemien aemel-adres: info@stellingwerfs-eigen.nl.
28 juli 2004:
Vandaege is de stichting inschreven
in et Register bi’j de KvK in Liwwadden onder nommer: 01104714. D’r is ok een
postbaank-rekeningnommer eupend: 4908902.
27 juli 2004:
Vandaege is ‘ten kantore van’ de
Stellingwerver Netwerk Netaorissen de ‘Stichting Stellingwerfs Eigen’ opricht.
De stichting het tot doel: Et uutdregen van et Stellingwarfs-eigen kultuurgoed
in de roemste zin diej’ daor an geven kunnen. Ze perbeert dat doel te berieken
deur o.e. et ontwikkelen en et uutgeven van kreatief wark in en op alderhaande
media.
26 juni 2004:
Vandaege is et eerste biebelboek Genesis in een drokte vorm uutbrocht. Et
boekien is vandemorgen tussen elf en twaelf ure in de karke van Berkoop
uutriekt an domenee dr. Rienk Klooster. Et passebericht kuj’ lezen in et Stellingwarfs of in et Nederlaans.
12 juni 2004:
Vandaege is een passebericht uutgaon
mit de ankondiging van de uutriekinge van et eerste biebelboek as proefuutgifte
in de riegel: Biebel in et Stellingwarfs. Et passebericht kuj’ lezen in et Stellingwarfs of in et Nederlaans.
9 september 2003:
Vandaege bin d’r deur Piet Bult uut
Ni’jeberkoop twie boekies mit elk zeuventienduzend Stellingwarver woorden
uutbrocht. Disse woordeliesten hebben - veur een groot pat - et follement legd
veur et vertaelen van de Biebel in et Stellingwarfs. De volledige woordeliesten
kuj’ hier vienen: Stellingwarfs – Nederlaans of Nederlaans - Stellingwarfs