in een

Vertaeling van de Biebel (NBV 2004)

Zacharia 01.

Oproep tot bekering.

01 In de achtste maond van et twiede regeringsjaor van Darius kwam de Heer bi’j de profeet Zacharia, de zeune van Berekja, de zeune van Iddo:
02 "De argernis van de Heer het jim veuroolden troffen.
03 Zeg now tegen et volk: "Dit zegt de Heer van de hemelse machten: Keer weeromme naor mi'j, dan zal ik naor jim weerommekeren – zegt de Heer van de hemelse machten.
04 Wees niet as jim veuroolden. Doe de vroegere profeten heur in mien naeme opreupen om weeromme te kommen op heur misstappen en dwaelings, luusterden ze niet en gavven ze an mien woorden gien geheur – zee de Heer.
05 Waor bin ze now, jim veuroolden? En de profeten, zullen die iewig leven?
06 Toch hebben mien woorden en de bepaolings die ik mien dieners de profeten opdreugen had te verkondigen, jim veuroolden troffen."" Doe kwam et volk tot inkeer en erkende: "De Heer van de hemelse machten het vanwegens oonze haandel en wandel mit oons daon wat hi'j him veurneumen had."

Visioenen.

07 Op de vierentwintigste dag van de elfde maond, de maond sebat, in et twiede regeringsjaor van Darius, kwam de Heer bi’j de profeet Zacharia, de zeune van Berekja, de zeune van Iddo. Dit is zien verhael.
08 Vannaacht had ik een dreum. Ik zag een man op een voskleurig peerd. Hi'j ston tussen de mirtestruken an de kaante van et diepe waeter, en even wiederop stonnen nog meer peerden: roodvossen, gooldvossen en schimmels.
09 "Wat betekent dat, mien heer?" vreug ik, en de engel die mit mi'j praotte zee doe: "Ik zal je zien laoten wat dit betekent."
10 De man die tussen de mirtestruken ston zee: "Dit bin de ruters die de Heer stuurd het om de hiele eerde over te gaon."
11 De ruters zeden tegen de engel van de Heer, die tussen de mirtestruken ston: "Wi'j hebben de hiele eerde over west. Rondomme is et vredig en stille."
12 Doe reup de engel van de Heer uut: "Heer van de hemelse machten, hoe laank zal et nog duren veur jow medelieden tonen mit Jeruzalem en de steden van Juda, waorop jow now al zeuventig jaor kwaod binnen?"
13 Doe zee de Heer de engel die mit mi'j sprak mit troostende en bemoedigende woorden,
14 en de engel dreug mi'j op te verkondigen: "Dit zegt de Heer van de hemelse machten: Branend van liefde kom ik op veur Jeruzalem en Sion,
15 en ziedend van woede bin ik op de zelfgenoegzeme volken. Ik had mien argernis ommes al vlogge weer veren laoten, mar zi'j hebben mien volk de hieltied hadder anpakt.
16 Daorom, zegt de Heer, keer ik vol medelieden weeromme naor Jeruzalem. Mien huus zal d'r opni’j bouwd wodden – zee de Heer van de hemelse machten – en mit et meetlint in de haand zal een begin maekt wodden mit et opni’j opbouwen van de stad."
17 En veerder mos ik verkondigen: "Dit zegt de Heer van de hemelse machten: Opni'j zullen mien steden overlopen van veurspoed, opni'j zal de Heer Sion troosten, opni'j zal hi'j Jeruzalem uutkiezen."

Zacharia 02.

01 Opni'j sleug ik mien ogen op, en daor zag ik vier horens.
02 "Wat betekent dat?" vreug ik de engel die mit mi'j praotte, en hi'j zee doe: "Dat bin de horens die et volk van Juda, Israël en Jeruzalem uutmekeer dreven hebben."
03 Doe leut de Heer mi'j vier smeden zien.
04 "Wat kommen die doen?" vreug ik, en hi'j zee doe: "Mit die horens hebben vremde volken Juda uutmekeer dreven en heur verzet breuken, en now bin de smeden kommen om die volken op te schrikken en de horens daele te slaon die ze heven hadden om Juda mit uutmekeer te drieven."
05 En opni'j sleug ik mien ogen op, en daor zag ik een man mit een meetlint in zien haand.
06 "Waor gaon jow henne?" vreug ik, en hi'j zee: "Ik gao opmeten hoe groot Jeruzalem wodden moet."
07 Doe was daor weer de engel die mit mi'j praotte, en een aandere engel kwam him integen
08 en zee: "Vlogge, zeg tegen die jonge dat Jeruzalem een eupen stad blieven zal, d’r zal gien mure om henne bouwd wodden, vanwegens et grote tal meensken en dieren dat d'r wonen zal.
09 Ik zal zels rondom de stad een mure van vuur wezen – zee de Heer – en heur mit mien luuster vullen."
10 "Kom! Vlocht weg uut et Noorderlaand! – zee de Heer. As de vier wienen van de hemel heb ik jim verspreided – zee de Heer.
11 Kom now Sion, jim die in et aorige Babel wonen, breng je in veilighied."
12 Want de Heer van de hemelse machten, die mi'j zien groothied eupenbaord het en die mi'j stuurd het, zegt over de volken deur wie jim plunderd binnen: "Wie an mien volk komt, komt an mien oogappel!
13 Ik zal mien haand driegend naor heur uutstikken, zodat zi'j op heur beurt plunderd wodden deur degenen die zi'j knecht hadden." Dan zullen jim erkennen dat de Heer van de hemelse machten mi'j stuurd het.
14 "Jubel, mien oarig Sion, en verheuge je, want ik kom in jow midden wonen – zo zee de Heer.
15 D'r komt een tied dat een protte volken heur bi'j mi'j, de Heer, ansluten en heur an mi'j toewijden, mar bi'j jow zal ik wonen, Sion." Dan zullen jim erkennen dat de Heer van de hemelse machten mi'j naor jim toestuurd het.
16 Op heilige grond zal de Heer et volk van Juda veurgoed in bezit nemen en opni'j zal hi'j Jeruzalem uutkiezen.
17 Wees stille veur de Heer, al wat leeft, want hi'j komt uut zien heilig huus naor buten.

Zacharia 03.

01 Doe leut hi'j mi'j de hogepriester Jozua zien. Disse ston veur de engel van de Heer, mit an zien rechterhaand de tegenstaander die tegen him pleitte.
02 De engel van de Heer zee tegen de tegenstaander: "De Heer zal je et zwiegen opleggen. De Heer, die Jeruzalem uutkeuzen het, zal jow et zwiegen opleggen. Is disse Jozua niet een stok zwatblaekerd hoolt, dat redded is uut et vuur?"
03 Now was Jozua in smerige kleren veur de engel verschenen.
04 Disse zee tegen degenen die veur him stonnen: "Trek him die smerige kleren uut." En tegen Jozua zee hi'j: "Hierbi'j waske ik je van alle smerigens en zal je feestelik in de kleren helpen."
05 Ik zee: "Ze zollen him een ni'je bofferd opzetten moeten." Ze zetten him een ni'je bofferd op en trokken him kleren an in et bi'jwezen van de engel van de Heer.
06 De engel verzekerde Jozua:
07 "Dit zegt de Heer van de hemelse machten: Aj’ mi'j geheurzaemen en mien veurschriften in acht nemen, as ie mien tempel beheren zullen en mien veurtunen huden zullen, zal ik je opnemen in disse ronte.
08 Luuster, hogepriester Jozua, ie en je priesters die veur je zitten en die in staot binnen om tekens uut te leggen. Ik zal mien diener sturen, een telg an de stamme van David.
09 Ik leg een stien veur je daele, Jozua, iene inkelde stien waorop zeuven ogen rusten. Ikzels zal daorin een inscriptie graveren – zo zee de Heer van de hemelse machten – en in iene inkelde dag zal ik dit laand wasken van alle smerigens.
10 Op die dag – zo zee de Heer van de hemelse machten – zullen jim mekeer nugen onder de wingerd en onder de viegeboom."

Zacharia 04.

01 De engel die mit mi'j praotte kwam weeromme en maekte mi'j wakker zoaj' iene wakker maeken uut een diepe slaop.
02 "Wat zie ie?" vreug hi'j, en ik zee doe: "Ik zie een laampestander die hielendal van goold is, mit een schaole d'r op, en op die schaole bin zeuven laampen vaastemaekt, zeuven laampen mit elk zeuven tuties.
03 Daornaost staon twie olijfbomen, iene rechts en iene links van de schaole.
04 Wat betekent dat, mien heer?"
05 "Weet ie niet wat dat betekent?" vreug de engel die mit mi'j praotte, en ik zee doe: "Nee heer."
06 Doe zee hi'j: "Luuster, dit zegt de Heer over Zerubbabel: Niet deur eigen kracht of macht zal hi'j slaegen – zegt de Heer van de hemelse machten – mar mit de hulpe van mien geest.
07 Veur Zerubbabel veraandert alderdeegst de hoogste barg in een vlakte; onder luud gejuich zal hi'j de eerste stien andregen."
08 Doe keek de Heer mi’j an en gaf mi’j de verzekering:
09 "Zerubbabel zal disse tempel eigenhaandig ofbouwen, zoas hi'j ok zels de fonnementen legd het." Dan zullen jim erkennen dat de Heer van de hemelse machten mi'j naor jim toestuurd het.
10 Ok al hadden jim in et begin gien fedusie in et wark, de ogen van de Heer zullen mit goeddonken rusten op de graveerde stien in de hanen van Zerubbabel. Die zeuven laampen bin de ogen van de Heer, die over de hiele eerde rondgaon.
11 Doe vreug ik an de engel: "En die twie olijfbomen links en rechts van de laampestander, wat betekenen die?"
12 En ik voegde d'r an toe: "Wat betekenen die twie olijftakken waoruut via twie goolden buisjes de goolden eulie stroomt?"
13 "Weet ie dat niet?" vreug hi'j. "Nee heer," zee ik,
14 en hi'j zee: "Dat bin de twie zalfden, die naost de Here van de hiele eerde staon."

Zacharia 05.

01 Opni'j sleug ik mien ogen op, en daor zag ik een vliegende boekerolle.
02 "Wat zie ie?" vreug hi'j mi'j, en ik zee doe: "Ik zie een vliegende boekerolle van twintig elle laank en tien elle bried."
03 Doe zee hi'j: "Dat is de vluuk die ommedwaelt deur et hiele laand. An de iene kaante staot schreven dat iederiene die steelt straft wodden zal, an de aandere kaante dat ok iederiene die mieneed pleegt zien straf niet ontlopen zal.
04 Ik heb die uutveerdigd – zo zee de Heer van de hemelse machten. Die vluuk zal et huus van de dief bezuken en et huus van iederiene die in mien naeme een valse verklaoring oflegt. Hi'j zal op zien huzen rusten en ze verwoesten, zodat d'r gien balke of stien hiel van blift."
05 En weer was daor de engel die mit mi'j praotte. Hi'j zee tegen mi'j: "Slao je ogen op, en kiek es wat daor now ankomt."
06 "Wat is dat?" vreug ik, en hi'j zee doe: "Dat is een maeltonne; daorop hoolt et hiele laand zien ogen richt."
07 En kiek, daor gong et loden lit eupen en in de tonne zat een vrommes.
08 "Dit is de goddelooshied," zee hi'j, en hi'j drokte heur weeromme op de bojem van de tonne en sleug et loden lit dichte.
09 Opni'j sleug ik mien ogen op, en daor zag ik twie vrouwluden an kommen zweven mit de wiend in heur vleugels, want zi'j hadden vleugels as die van een sturke. Ze pakten et vat op en neumen et mit, hoge de locht in.
10 Ik vreug an de engel die mit mi'j praotte: "Waor brengen zi'j die tonne henne?"
11 en hi'j zee doe: "Ze gaon d’r een tempel veur bouwen in Sinear, en as die klaor is, zal et daor op een voetstok daelezet wodden."

Zacharia 06.

01 Opni'j sleug ik mien ogen op, en daor zag ik vier waegens tussen twie bargen weg kommen. Die bargen weren van keuper.
02 Veur de eerste waegen weren voskleurige peerden spannen, veur de twiede zwatte,
03 veur de dadde witte en veur de vierde bont vlekte. Et weren starke peerden.
04 Ik vreug an de engel die mit mi'j praotte: "Wat betekent dat, mien heer?"
05 en hi'j zee doe: "Dat bin de vier wienen van de hemel, die uutrieden naodat zi'j heur opwaachting maekt hebben bi'j de Heer van de hiele eerde.
06 De waegen mit de zwatte peerden ridt uut naor et noorden, de witte peerden gaon naor et westen en de bont vlekte naor et zuden."
07 De peerden stonnen te trappelen om uut te rieden en de eerde over te gaon. Zogauw et bevel daortoe geven wodde, steuven ze d'r vandeur, de hiele eerde over.
08 Luud reup de engel mi'j toe: "Let op, de peerden die uutrieden naor et Noorderlaand zullen d'r veur zorgen dat de woede van de Heer daor tot bedaoren komt."
09 Doe keek de Heer naor mi’j en zee:
10 "Ie moe'n de goold en zulver van de ballings Cheldai, Tobia en Jedaja in ontvangst nemen. Gao daorom naor et huus van Josia, de zeune van Sefanja, waor zi'j nao heur ankomst uut Babel heur intrek neumen hebben.
11 Laot van et goold en zulver een kroon maeken en zet die op et heufd van hogepriester Jozua, de zeune van Josadak.
12 Zeg tegen him: "Dit zegt de Heer van de hemelse machten: Let op, een man mit de naeme Telg, die an de stamme uitbotten zal, zal de tempel van de Heer opni'j bouwen.
13 Hi'j is et die de tempel van de Heer opni'j bouwen zal; hi'j is et die de keuninklike weerdighied dregen zal en heersen zal vanof zien troon. D'r zal ok een priester wezen op een eigen troon, en tegere zullen zi'j et laand in goeie vrede besturen.
14 De kroon zal in de tempel van de Heer beweerd wodden tot heugenschop an Cheldai, Tobia en Jedaja, en tot heugenschop an de gaastvri'jhied van de zeune van Sefanja.
15 Uut vere lanen zullen meensken hierhenne kommen om mit te warken an de bouw van de tempel van de Heer."" Dan zullen jim erkennen dat de Heer van de hemelse machten mi'j naor jim toestuurd het. Dit alles zal gebeuren aj’m luusteren naor de Heer, jim God.

Zacharia 07.

Bemoediging.

01 In et vierde jaor van keuning Darius kwam de Heer bi’j Zacharia. Et was op de vierde dag van de negende maond, de maond kislew.
02 De stad Betel had Sareser en Regem-Melek mit zien manluden ofveerdigd om de geunst van de Heer of te smeken
03 en om an de priesters in de tempel van de Heer van de hemelse machten en an de profeten de volgende vraoge veur te leggen: "Al jaoren laank wodt d'r bi'j oons in de vuufde maond treurd en vast. Is et warkelik neudig dawwe dat doen blieven?"
04 Doe keek de Heer van de hemelse machten naor mi'j en zee:
05 "Zeg tegen de bevolking van dit laand en tegen de priesters: "As jim in de vuufde en de zeuvende maond rouwen en vaasten, now al zeuventig jaor laank, doe ie dat dan warkelik veur mi'j?
06 Ok aj'm eten en drinken, doe ie dat toch omdat ie et zels willen?""
07 Jim weten toch wat de Heer bi'j monde van de vroegere profeten zegd het, doe Jeruzalem en de omliggende steden nog bewoond en vredig weren, en d'r ok meensken woonden in de Negeb en de Sefela.
08 En now zegt de Heer et opni'j, bi'j monde van mi'j, Zacharia:
09 "Dit zegt de Heer van de hemelse machten: Praot eerlik en recht, wees goed en zorgzem veur mekeer;
10 onderdrok gien weduwen en wezen en ok gien vremden en aarme meensken, en wees d'r niet op uut om iene kwaod te doen."
11 Mar jim veuroolden weigerden stiefkoppig om te luusteren; zi'j stopten heur oren dichte om et mar niet heuren te hoeven.
12 Zi'j leuten de woorden en vermanings die de Heer van de hemelse machten heur deur zien geest bi'j monde van de vroegere profeten veurhul niet tot heur deurdringen, mar sleuten heur d'r veur of. Daorom wodden zi'j troffen deur de argernis van de Heer van de hemelse machten.
13 Zi'j luusterden niet doe hi'j heur reup. "Daorom" – zee de Heer van de hemelse machten – "zal ik niet luusteren as zi'j mi'j roepen.
14 As een stormwiend zal ik heur uutmekeer jaegen naor onbekende volken." Et laand bleef ontvolkt aachter; gieniene trok d'r deur henne en gieniene keerde d'r naor weeromme. Zo is dit mooie laand deur heur toedoen een woesteni'je wodden.

Zacharia 08.

01 Mar now lödt et woord van de Heer van de hemelse machten:
02 "Dit zegt de Heer van de hemelse machten: Ik brane van liefde veur Sion; mit vurige liefde neem ik et veur Jeruzalem op.
03 Dit zegt de Heer: Ik keer weeromme naor de Sion en kom in Jeruzalem wonen. Stad van trouw zal Jeruzalem hieten, en de barg van de Heer van de hemelse machten Heilige barg.
04 Dit zegt de Heer van de hemelse machten: Opni'j zullen d'r op de pleinen van Jeruzalem oolden van daegen zitten, steunend op heur stok vanwegens heur hoge leeftied,
05 en de straoten zullen krioelen van de speulende kiender.
06 Dit zegt de Heer van de hemelse machten: Ok al liekt et jim now nog onmeugelik, nao alles wat ie in je ballingschop deurmaekt hebben, waorom zol et veur mi'j onmeugelik wezen? – zo zee de Heer van de hemelse machten.
07 Dit zegt de Heer van de hemelse machten: Ik zal mien volk bevri'jden uut et laand van de zunneopkomst en et laand van de zunneondergaank,
08 en heur naor Jeruzalem brengen. Daor zullen ze wonen. Zi'j zullen mien volk wezen en ik heur God, in onwankelbere trouw.
09 Dit zegt de Heer van de hemelse machten: Now jim disse woorden uut de mond van de profeten heurd hebben, moej'm volholen. Et huus van de Heer van de hemelse machten is now in gaank zet; de herbouw van de tempel is begonnen.
10 Veur die tied brocht et wark van meenske en dier niks op, en wie mar een bien buten de deure zette, wodde lastigvalen, omdat ik iederiene tegen iederiene opzet had.
11 Mar now behaandel ik jim niet meer as vroeger – zo zee de Heer van de hemelse machten.
12 Now is et zaod zegend: de wienstok zal vrucht dregen, de eerde zal heur opbrengst geven, de hemel zal zien dauw ofstaon. Dit alles zal ik schinken an jim die de ballingschop overleefd hebben.
13 Vroeger gullen jim bi'j de aandere volken as vervluukt, Juda en Israël, mar now ik jim te hulpe komme, zullen zi'j jim as zegend beschouwen. Geef dus de moed niet op en hool vol!
14 Want dit zegt de Heer van de hemelse machten: Doe jim veuroolden mien woede opwekten, nam ik mi'j veur dit volk kwaod te doen – zo zegt de Heer van de hemelse machten – en dat heb ik ok daon, zonder d'r op weeromme te kommen.
15 Mar now he'k mi'j veurneumen om et volk van Jeruzalem en Juda goed te doen. Geef dus de moed niet op.
16 Hier moe'n jim je an holen: praot de waorhied tegen mekeer, beweer de vrede deur eerlik en rechtveerdig te praoten;
17 wees d'r niet op uut om iene kwaod te doen en laot je niet verleiden tot mieneed, want daor he'k een hekel an – zo zegt de Heer."
18 En de Heer van de hemelse machten keek mi'j an en zee:
19 "Dit zegt de Heer van de hemelse machten: De daegen van vaasten in de vierde en de vuufde maond en de vaastendaegen in de zeuvende en de tiende maond zullen veur Juda veraanderen in feestdaegen vol wille en vrolikhied. Mar daenk d’r omme: hool de vrede en waorhied in ere!
20 Dit zegt de Heer van de hemelse machten: D'r zullen opni'j meensken kommen uut verschillende lanen en steden.
21 De inwoners van de iene stad zullen naor de volgende stad gaon en zeggen: Gao mit oons mit. Wi'j bin op weg om ere te bewiezen an de Heer van de hemelse machten en zien geunst of te smeken.
22 Grote en machtige volken zullen naor Jeruzalem kommen om daor de Heer van de hemelse machten te vereren en zien geunst of te smeken.
23 En dit zegt de Heer van de hemelse machten: As die tied kommen is, zullen tien manluden uut volken mit verschillende taelen een Joodse man anklaampen mit de woorden: Wi'j willen oons bi'j jim ansluten, want we hebben heurd dat God bi'j jim is."

 
Zacharia 09.

Aandere profetieën.

01 Profetie. Et woord van de Heer het Chadrak beriekt, en et rust op Damascus. Naor de Heer ommes zal et hiele meensdom heur richten, krek as de stammen van Israël.
02 Ok op et angreenzende Hamat rust et woord van de Heer, en op Tyrus en Sidon, ondaanks al heur vernuft.
03 Tyrus bouwde veur heurzels een bolwark, et hoopte zulver op as stof en goold as modder in de straoten,
04 mar de Heer zal de stad in bezit nemen, heur riekdom in de zee smieten, en de stad zels gaot in vlammen op.
05 As Askelon dat zicht, zal et schrikken, en Gaza zal beven van aangst. Zo ok Ekron, dat zien hope in rook opgaon zicht. Uut Gaza verdwient de keuning, Askelon raekt ontvolkt,
06 en in Asdod woont allienig nog een onzuver volk. Zo zal ik de hoogmoed van de Filistijnen breken.
07 Vleis waor nog bloed in zit za’k heur uut de mond roppen, en ok et ere eten daor ik niks van hebben moet. Mar een pat van heur zal speerd wodden en ok dat zal toebeheuren an oonze God. Zi'j zullen in Juda opneumen wodden, en Ekron zal mit oons verbunnen wezen zoas ooit de Jebusieten mit oons verbunnen weren.
08 Ik zal de waacht betrekken, en mien laand huden tegen deurtrekkende legers. Gien tiran zal et nog binnenvalen, want now hool ik d'r zels oge op.
09 Juich, lieflik Sion, Jeruzalem, raos et uut van vreugde. Je keuning is in antocht, bekleed mit gerechtighied en zege. Nederig komt hi'j anrieden op een ezel, op een hengsteveulen, geboren uut een ezelin.
10 Ik zal de striedwaegens uut Efraïm verjaegen en de peerden uut Jeruzalem; de bogen wodden breuken. Hi'j zal vrede stichten tussen de volken. Zien heerschoppi'je strekt heur uut van zee tot an zee, van de Revier tot an de aenden van de eerde.
11 Want, Sion, omwille van mien verbond mit jow, mit offerbloed bekrachtigd, zal ik de gevangenen vri'jlaoten uut de putte zonder waeter.
12 Keer weeromme naor de burcht, gevangenen. Jim hope is niet ommenocht west, want ok now gelt de toezegging an Sion: ik zal je dubbelt weeromme betaelen.
13 Juda span ik as mien boge, Efraïm richt ik as mien pielke, en jow zeunen, Sion, hef ik as een heldenzwaord tegen de Grieken.
14 De Heer zal boven heur verschienen: zien pielken flitsend as bliksemschichten, zien ramshoorn grommend as de donder trekt God, de Heer, op in een zuderstorm.
15 De Heer van de hemelse machten is heur schild. Ze zullen de vi'jaand verslinden en zien slingerstienen verbriezelen, ze zullen zien bloed drinken tot ze d'r dronkend van binnen, tot ze d'r van overlopen as een plengschaole en mit bloed besmeurd wezen as de hoeken van een alter.
16 Op die dag zal God, de Heer, zien volk as een kudde in veilighied brengen. As edelstienen in een kroon zullen ze fonkelen op zien laand.
17 Wat schitterend! Wat mooi! Jonge manluden en maegies bluuien op, starkt deur most en koren.

Zacharia 10.

01 As et veurjaor wodt, vraog dan de Heer om regen. Hi'j is et die onweerswolken maekt. Hi'j schinkt de meensken stotregens en et gewas op et veld.
02 Mar orakels bin bedrog en waorzeggers vertellen leugens: heur dreumen kommen niet uut, heur troost bestaot uut holle woorden. De meensken dolen rond as ontredderde schaopen, want een hedder is d'r niet.
03 Poer bin ik op de hedders, en de bokken za'k weten te vienen. De Heer van de hemelse machten zal him ontfermen over et volk van Juda, zien kudde, en et tot zien prachtig striedpeerd maeken.
04 Uut dit volk komt de hoekstien, de tentpinne en de oorlogsboge, uut dit volk kommen alle overwinners.
05 Kriegshaftig zullen zi'j in de stried de vi'jaand in de modder vertrappen. Ze zullen overwinnen, want de Heer staot heur bi'j, mar zi'j die hoge op 't peerd zitten gaon roemloos te onder.
06 Ik zal et volk van Juda onoverwinnelik maeken en de naokommelingen van Jozef zegevieren laoten. Ik bin vol zorg veur heur en zal heur veilig thuusbrengen. Dan zal et weer wezen as veurhenne, asof ik heur nooit verstoten hadde, want ik bin de Heer, heur God, en ik zal heur gebeden verheuren.
07 Et kriegshaftige Efraïm zal dronkend wezen van vreugde, en as heur kiender dat zien, zullen ok die heur verheugen en de Heer toejuichen in volle overgaove.
08 Ik zal heur bi'j mi'j fluiten en bi'jmekeer roepen, want ik heb heur vri'jkocht. D’r zullen weer lieke vule kommen as vroeger.
09 In de vremte zal ik heur vrucht dregen laoten, in vere streken zullen ze mi'j gedaenken en heur kiender grootbrengen, en dan zullen ze teroggekeren.
10 Ik zal heur teroggebrengen uut Iegypte en Assur, en heur bi'jmekeer brengen in Gilead en de Libanon, mar daor zal niet genoeg ruumte wezen veur heur.
11 As zi'j deur de zee trekken, die heur dan hielendal ommespuult, zal de Heer de golven bedwingen en de beddingen van de Nijl zullen druge valen. Zo wodt de hoogmoed van Assur an ’t aende brocht, en de scepter van Iegypte breuken.
12 Mit mien hulpe zullen ze onoverwinnelik wezen, en zi'j zullen optrekken in mien naeme – zo zegt de Heer.

Zacharia 11.

01 Eupen je poorten, Libanon! Vuur zal je ceders verteren.
02 Klaeg, cipres, want valen is de ceder: de machtigen bin veld. Goel, iekebomen van Basan, want valen is et ondeurdringbere woold.
03 Heur de hedders jammeren, want verwoest is heur lustoord. Heur de leeuwen brullen want verwoest is de trots van de Jordaan.
04 Dit het de Heer, mien God, zegd: "Weid de schaopen die veur de slaacht bestemd binnen.
05 Heur kopers kunnen heur zonder wroeging slaachten, de verkopers daanken de Heer dat zi'j d'r riek van wodden, en de hedders speren et vee niet.
06 Ik zal ommes de bevolking van dit laand niet langer speren – zo zegt de Heer. Ik lever de meensken an mekeer en an heur keunings uut; ze zullen et laand vernielen zonder dat ik ingriep."
07 Dus weidde ik et slachtvee dat an de veekoopluden toebeheurde. Ik nam twie stokken – de iene nuumde ik Vrundelikhied en de aandere Ienhied – en daormit weidde ik et vee.
08 In iene maond ontdeed ik mi'j van drie hedders. Ik verleur mien geduld tegenover et vee, dat een hekel an mi'j kreeg,
09 en zee: "Ik weid jim niet langer. Laot mar doodgaon wie doodgaon moet, laot mar verdwienen wie verdwaelt, en laot de overblievenden mekeer mar opvreten."
10 Doe nam ik mien staf Vrundelikhied en sleug die an stokken om et verbond te verbreken dat ik sleuten had mit alle volken,
11 en daormit was et verbreuken. De veekoopluden, De veekoopluden die goed op mi'j letten, begrepen dat ik dit dee in opdracht van de Heer.
12 Ik zee tegen heur: "As jim tevreden binnen, keer mi'j dan mien loon uut; zo niet, laot et dan mar." En zi'j betaelden mi'j mien loon, dattig sjekel zulver.
13 Doe zee de Heer tegen mi'j: "Breng et mar naor de smulter, dat vostelike loon dat zi'j me weerd vienen." Dus smeet ik dat zulver bi'j de smulter in de tempel daele,
14 en ik sleug ok mien aandere staf, Ienhied, in stokken, om de breurschop tussen Juda en Israël te verbreken.
15 Doe zee de Heer tegen mi'j: "Rust je opni'j toe as een hedder, as iene die niet deugt.
16 Ik zal ommes in dit laand een hedder optreden laoten die him om et verdoolde schaop niet bekommert en et ofdwaelde niet zuukt, die et bezeerde niet geneest en et gezonde niet verzorgt, mar die et vleis van de vette dieren opeet en ofkluuft tot op 'e bonke."
17 Wee de niksnut van een hedder! Wee wie de kudde in de steek lat! Mag et zwaord zien rechteraarm treffen en zien rechteroge uutstikken. Mag zien aarm verschrompelen en et locht in zien oge uutdoven.

 
Zacharia 12.

01 Profetie. De woorden van de Heer over Israël. Zo zegt de Heer, die de hemel en de eerde maekt het, en de meenske et leven geven het:
02 Ik zal van Jeruzalem een beker wien maeken die de omringende volken bedwelmt. As Jeruzalem belegerd wodt, zal Juda ok onder de voet lopen wodden.
03 Op de dag dat alle volken op eerde tegen Jeruzalem oprukken, zal ik van de stad een zwaore stien maeken waoran heur belaogers heur vertillen.
04 Op die dag – zo zegt de Heer – maek ik de peerden schoftig en zi'j ik paniek onder heur berieders. Over Juda echter zal ik een waekend oge holen, wiels ik de peerden van de vi'jaand verbliene.
05 Dan zullen de stamooldsten van Juda bi'j heurzels zeggen: Oonze kracht ligt bi'j de inwoners van Jeruzalem, daankzi'j de Heer van de hemelse machten, heur God.
06 Op die dag maek ik de stamooldsten van Juda tot een fakkel in een takkebos, tot een vonk in een korengarve, zodat de vlammen om heur henne griepen en de omringende volken verschruuien. Jeruzalem zal staon blieven waor et staot.
07 Eerst zal de Heer de dörpen van Juda de overwinning geven, zodat de roem van et huus van David en van de inwoners van Jeruzalem niet groter wezen zal as die van de Judeeërs.
08 Mar de Heer zal toegeliekertied de inwoners van Jeruzalem steunen: de zwakste onder heur zal op die dag zo stark wezen as David en et huus van David zal heur leiden asof God zels heur leidde, asof d'r een engel van de Heer veur heur uut gong.
09 Op die dag za'k alles in et wark stellen om de volken uut te roeien die Jeruzalem belagen.
10 Et huus van David en de inwoners van Jeruzalem echter za'k mit mededogen vervullen en heur tot inkeer kommen laoten. Ze zullen heur weer naor mi'j keren, en over degene die ze dood maekt hebben zullen ze weeklaegen as bi'j de rouw om een ienig kiend; heur verdriet zal zo bitter wezen as et verdriet om een ooldste zeune.
11 Op die dag zullen de meensken in Jeruzalem zo luud weeklaegen as d'r in de vlakte van Megiddo weeklaegd wodt om Hadad-Rimmon.
12 Et hiele laand zal rouwen: de ofstammelingen van David en de afstammelingen van Natan,
13 de afstammelingen van Levi en de afstammelingen van Simi,
14 en alle overige femilies, elke femilie ofzunderlik en de vrouwluden de hieltied ofzunderlik van de manluden.

 
Zacharia 13.

01 Op die dag zal d'r een bron ontspringen waorin de naokommelingen van David en de inwoners van Jeruzalem heur zunde en innerlike smerigte ofwasken kunnen.
02 As die tied komt – zegt de Heer van de hemelse machten – dan zal ik alle ofgoden uut et laand verdwienen laoten; heur naemen zullen niet meer nuumd wodden. Ik zal de profeten ok uitbannen, en mit heur de geest van innerlike smerigte die et laand bezoedelt.
03 As d'r dan nog iene een profetie doet, zullen zien eigen heit en moeke, die himzels grootbrocht hebben, tegen him zeggen: "Ie meugen niet langer leven, want ie vertellen leugens in de naeme van de Here." Ze zullen him ommebrengen, zien eigen heit en moeke, die himzels grootbrocht hebben, as hi'j een profetie doet.
04 Dan zullen zi'j alderdeegst niet meer veur heur visioenen uutkommen durven, die profeten. Ze zullen de profetemaantel niet meer anstrupen om de meensken te bedriegen.
05 Ze zullen zeggen: "Ik bin hielendal gien profeet; al van jongs of an bewark ik et laand as slaaf."
06 En as zo iene vraogd wodt: "Hoe kom ie dan an die striemen op je rogge?", dan zal hi'j zeggen: "Die heb ik oplopen in et huus van mien meesters."
07 Zwaord, wodt wakker! Verhef je tegen mien hedder, tegen de man mit wie ik mi'j verbunnen hebbe – zegt de Heer van de hemelse machten. Dood de hedder, zodat de schaopen verdwelen. Weerloos as ze binnen za'k ze treffen.
08 In et hiele laand – zegt de Heer van de hemelse machten – zal twie dadde pat uutroeid wodden en versmoren; amper een dadde pat zal speerd wodden.
09 Dat pat za'k louteren in et vuur: ik zal heur smulten as zulver en zuveren as goold. Zi'j zullen mien naeme anroepen en ik zal dan zeggen: "Dit is mien volk," en zi'j zullen zeggen: "De Heer is oonze God."

Zacharia 14.

01 D'r komt een dag dat de Heer ingriepen zal, Jeruzalem, dat ze de buit binnen je muren verpatten.
02 Ik zal alle volken bi'jmekeer brengen, zegt de Heer, om tegen Jeruzalem te striede te trekken. De stad zal inneumen wodden, de huzen plunderd en de vrouwluden verkracht. De helte van de inwoners wodt in ballingschop ofvoerd, mar et pat dat overblift zal niet uutroeid wodden.
03 Daornao zal de Heer d'r op uuttrekken en de stried tegen die volken anbienen, krek zoas vroeger.
04 Die dag zal hi'j zien bienen op de Olijfberg plaanten, an de oostkaante van Jeruzalem. De Olijfberg zal in twiejen deeld wodden: de iene helte glidt naor et noorden en de aandere naor et zuden, zodat d'r een bried dal ontstaot van oost naor west.
05 Jim zullen votvlochten et dal in, tussen die twie bargkettens die tot an Asel lopen zullen, zoas jim ok vlocht binne bi'j de eerdbeving in de tied dat keuning Uzzia regeerde over Juda. En de Heer, mien God, zal verschienen an et heufd van zien hemelse machten.
06 Op die dag zal d'r gien locht wezen; de zunne, maone en de steerns verliezen heur glaans.
07 Op die iene dag, die allienig de Heer kent, zal d'r gien onderscheid wezen tussen de dag en de naacht. Pas tegen et valen van de aovend zal d'r weer locht gloren.
08 As die tied komt, zal d'r in Jeruzalem zuver waeter ontspringen: de iene helte zal in et oosten in zee uutmonden en de aandere helte in et westen, liekegoed bi'j de zoemer as bi'j de winter.
09 En de Heer zal keuning wodden over de hiele eerde. Dan zal de Heer de ienige God wezen en zien naeme de ienige naeme.
10 Et hiele laand wodt zo vlak as de Jordaanvallei, van Geba in et noorden tot an Rimmon in et zuden. Mar Jeruzalem zal zien hoogverheven plak beholen. Van de Benjaminpoort tot an de oolde poort, de Hoekpoort, en van de Chananeltoren tot an de keuninklike passetonnen
11 zal de stad bewoond wezen. Jeruzalem zal weer een veilige woonstee wezen, want d'r zal nooit meer een vernietiging over ofroepen wodden.
12 De volken die tegen Jeruzalem te striede trokken, zullen deur de Heer troffen wodden mit een ofgrieselike plaoge: wiels ze nog levend rondlopen zal hi'j heur vleis wegteren laoten van heur bonken, heur ogen wegrotten laoten in heur oogkassen en heur tonge wegrotten laoten in heur mond.
13 De Heer zal op die dag zoe'n paniek onder heur zi'jen dat ze mekeer beetpakken en beginnen te vechten.
14 Juda zal him ok waogen in de slag om Jeruzalem. De riekdommen van de belaogers zullen as buit bi'jmekeer brocht wodden: een protte goold, zulver en dure kleren.
15 En alle dieren in et vi'jaandelike kaamp, peerden, muildieren, kemelen en ezels, zullen troffen wodden deur dezelde plaoge as de meensken.
16 De overlevenden van de volken die Jeruzalem belaogd hebben, zullen dan jaorliks naor de stad kommen om de Heer van de hemelse machten as keuning te vereren en et Loofhuttenfeest te vieren.
17 En is d'r op eerde een volk dat niet naor Jeruzalem komt om de Heer van de hemelse machten as keuning te vereren, dan zal d'r in dat laand gien regen valen.
18 Ok Iegypte zal, as zien volk niet naor Jeruzalem komt, stellig troffen wodden deur disse plaoge, waormit de Heer de volken straft die et Loofhuttenfeest niet vieren kommen.
19 Dat zal de straf wezen veur Iegypte en de aandere volken die niet dielnemen an et Loofhuttenfeest.
20 As die tied komt, zal alderdeegst op de bellen van de peerden graveerd staon: "Wijded an de Heer." De kookpotten in de tempel zullen dienen as offerschaolen veur et alter.
21 Alle kookpotten in Jeruzalem en Juda zullen an de Heer van de hemelse machten wijded wezen; elk die offeren wil, kan ze bruken om d'r zien offer in klaor te maeken. As die tied komt, zullen d'r nooit meer handelaars in de tempel van de Heer van de hemelse machten zitten.