Titus
in een
Stellingwarver vertaeling
De eerste en twiede brief an Timoteüs en de brief an Titus staon ok wel bekend as de "pastorale brieven". In alle drie de brieven wodden anwiezings geven veur de hedderlike zorg binnen de gemiente; alle naodrok ligt daorbi'j op een vroom en ingetogen leven. Timoteüs en Titus bin uut de korrespondeensie van Paulus bekend as mitwarkers van Paulus (zie bi'jglieks 1 Tessalonicenzen 1:1 en Galaten 2:1). De brieven kun kerakteriseerd wodden as retorische teksten die een protte lange zinnen bevatten; d'r wodden regelmaotig theologische termen bruukt. Neffens goenend bin de brieven deur Paulus zels schreven an et aende van zien leven. Aanderen mienen op grond van de stijl en de inhoold dat de brieven niet van Paulus zien haand binnen, mar dat ze eerst an et aende van de eerste of et begin van de twiede ieuw schreven binnen deur een auteur die oons veerder onbekend bleven is en mit de naeme van Paulus zien brieven gezag verlienen wol.
1 Timoteüs geft richtlijnen veur et gedrag van degenen die leiding geven in de kristelike gemienten. In et eerste heufdstok wodt de opdracht die Timoteüs opdreugen is opni'j formeleerd: hi'j dient him te holen an de him overleverde leer en him vere te holen van meensken die him op een giebe brengen willen. Dit gedielte wodt ofsleuten mit de opdracht an Timoteüs om veur alle meensken te bidden. Dan volgen in heufdstok 2 en 3 anwiezings veur gemienteleden en ambtsdregers. Vanof heufdstok 4:11 wodt Timoteüs zels weer anspreuken; hi'j wodt opreupen om dwaellerers te bestrieden. In heufdstok 5 wodt him verteld wat de taeken binnen van wedevrouwen, ambtsdregers en knechten in de kristelike gemiente. In et laeste heufdstok wodt nog es onderstreept wat et verschil is tussen de waore godsdienst die Timoteüs uutdreegt en de dwaelleer.
Vertaeling van de Biebel (NBG 2004)
deur Piet Bult uut Ni’jberkoop
Titus 1.
De brief an Titus.
01 Van Paulus, knecht van God, apostel van Jezus Christus, mit de opdracht om God zien uutverkorenen tot geleuf te brengen en tot de kennis van de waore vroomhied,
02 die hope geft op et iewige leven dat God, die niet liegt, veur alle tieden beloofd het.
03 Hi'j het de tied bepaold waorop zien woord deur de verkondiging bekendmaekt wodde, en disse verkondiging is mi'j now in opdracht van God, oonze redder, toevertrouwd.
04 An Titus, mien werachtig kiend in oons gemienschoppelik geleuf. Genaode en vrede van God, de Heit, en van Christus Jezus, oonze redder!
Titus zien opdracht op Kreta.
05 Ik hebbe je op Kreta aachterlaoten om, neffens mien richtlijnen, de resterende zaeken te regelen en in iedere stad ooldsten an te stellen:
06 onberispelike manluden, die mar iene vrouw hebben, en geleuvige kiender die niet beschuldigd wodden kunnen van schaandelik gedrag en ongeheurzemhied.
07 Een opzichter moet as beheerder van God zien huus onberispelik wezen: hi'j mag niet eigenzinnig optreden, niet driftig wezen, niet te vule drinken, niet gewelddaodig en niet hebzuchtig wezen;
08 hi'j moet juust gaastvri'j wezen, goedwillend, bezunnen, rechtveerdig, toewijded en beheerst.
09 En hi'j moet him holen an de betrouwbere bosschop die in overienstemming is mit de leer, zodat hi'j in staot is om aanderen mit heilzem lesgeven te bemoedigen en dwasbongels terechte te wiezen.
10 Want d'r bin een protte ongeheurzeme meensken, praotiesmaekers en bedriegers, veural onder Joodse geleuvigen.
11 Heur moet de mond snoerd wodden; zi'j richten hiele femilies te gronde deur uut schaandelik weenstbejag de verkeerde dingen te onderwiezen.
12 Iene van heur eigen profeten, zels een Kretenzer, het zegd: "Kretenzers bin onverbeterlike liegebulen, gemiene beesten, vadsige vreters."
13 Dát is pas een waor woord! Wies heur daorom streng terechte, zodat zi'j een heilzem geleuf kriegen,
14 heur niet langer interesseren veur Joodse verzinsels en heur gien regels opleggen laoten deur meensken die heur van de waorhied ofkeerd hebben.
15 Veur wie rein binnen, is alles rein; mar veur wie bezoedeld en ongeleuvig binnen, is niks rein, want liekegoed heur verstaand as heur geweten is bezoedeld.
16 Zi'j belieden dat ze God kennen, mar heur daoden weerleggen dat. Weerzinwekkend bin ze, onwillig en niet in staot tot ok mar wat goeds.
Titus 2.
Praktische anwiezings.
01 Mar ie moe'n uutdregen wat akkedeert mit de heilzeme leer.
02 Ooldere manluden moe'n sober, weerdig en bezunnen wezen, en gezond in et geleuf, de liefde en de volhadding.
03 Ok ooldere vrouwluden moe'n heur ingetogen gedregen, zi'j meugen niet kwaodspreken of verslaafd wezen an wien. Zi'j moe'n goeie raod weten te geven,
04 en de jonge vrouwluden veurholen dat zi'j heur man en kiender liefhebben moeten,
05 dat ze ingetogen, kuis, zorgzem in et huusholen en vrundelik wezen moeten, en dat ze et gezag van heur man erkennen moeten. Dan wodt et woord van God in ere hullen.
06 Roep ok jonge manluden op om in alles ingetogen te wezen.
07 Geef zels mit goeie daoden et veurbeeld, laot je leer zuver en weerdig wezen,
08 en verkondig de heilzeme, onbetwistbere bosschop, zodat oonze tegenstaanders beschaemzem staon en niks kwaods over oons zeggen kunnen.
09 Knechten moe'n in alles et gezag van heur meester erkennen en et him naor 't zin maeken. Zi'j meugen him niet tegenspreken
10 of van him stelen, mar moe'n zien laoten dat ze hielemaole betrouwber binnen. Dan verhogen zi'j in alles wat ze doen et anzien van de leer van God, oonze redder.
11 God zien genaode is eupenbaor wodden tot redding van alle meensken.
12 Zi'j leert oons dawwe goddeloze en wereldse begeerten ofwiezen moeten en bezunnen, rechtveerdig en vroom in disse wereld leven moeten,
13 in ofwaachting van et gelok waorop wi'j hopen: de verschiening van de majesteit van de grote God en van oonze redder Jezus Christus.
14 Hi'j het himzels veur oons geven om oons van alle zunde vri'j te kopen, oons te wasken en oons tot zien volk te maeken, dat vol iever is om et goeie te doen.
15 Bruke je gezag om dit uut te dregen, moedig an en wies terechte. Laot gieniene op je daelekieken.
Titus 3.
01 Herinnere iederiene d'r an dat ze overhied en gezag erkennen moeten en geheurzem wezen moeten, klaor om altied et goeie te doen,
02 dat ze van gieniene kwaodspreken meugen, vredelievend en vrundelik wezen moeten en heur tegenover iederiene zaachtmoedig gedregen moeten.
03 Ok wi'j weren iens onverstanig, ongeheurzem, op de verkeerde weg, knecht van verschillende begeerten en lusten. Oons leven ston in et teken van beusaorighied en falegrein, we hadden een hekel, alderdeegst haatten mekeer.
04 Mar doe is de goedhied en meenseliefde van God, oonze redder, eupenbaor wodden
05 en het hi'j oons redded, niet vanwegens oonze rechtveerdige daoden, mar uut baarmhattighied. Hi'j het oons redded deur et bad van de wedergeboorte en de verni'jende kracht van de heilige Geest,
06 die hi'j deur Jezus Christus, oonze redder, riekelik over oons uutgeuten het.
07 Zo bin wi'j deur zien genaode as rechtveerdigen anneumen en kriegen we pat an et iewige leven waorop we hopen.
08 Disse bosschop is betrouwber. Ik wil daj' hierover mit overtuging praoten, zodat zi'j die op God vertrouwen heur d'r op toeleggen om et goeie te doen. Daor het iederiene baot bi'j.
09 Mar hool je vere van dwaeze spekelaosies en geslachtsregisters en dat gehaspel en geredetwist over de wet, want dat is allemaole van onnut en dwaes.
10 Wie naodat hi'j twie keer terechte wezen is nog de hieltied verdieldhied zi'jt, moej' uut de gemiente weghaelen;
11 ie weten dat zoe'niene et spoor hielendal biester is en deur te zundigen himzels veroordielt.
12 Zogauw ik Artemas of Tychikus naor je toe stuurd hebbe, moej' bi'j mi'j in Nikopolis kommen. Ik hebbe besleuten daor de winter deur te brengen.
13 Rust Zenas, de rechtsgeleerde, en Apollos goed toe veur heur reize, zodat et heur an niks ontbrekt.
14 Laoten ok oonze meensken leren om heur in te spannen om et goeie te doen waor dat dringend neudig is. Zo maeken ze heur nuttig.
15 Allemaole die bi'j mi'j binnen, groeten je. Groet al oonze vrunden in et geleuf.
Genaode is mit jim allemaole.