Romeinen 1.

De brief an de Romeinen.

01 Van Paulus, knecht van Christus Jezus, reupen tot apostel en uutkeuzen om et evangelie van God uut te dregen,

02 dat al deur de mond van zien profeten in de heilige geschriften beloofd is:

03 et evangelie over zien Zeune, een meenske votkommen uut et naogeslaacht van David,

04 anwezen as Zeune van God en deur de heilige Geest klieded mit macht doe hi'j, Jezus Christus, oonze Heer, uut de dood overaende kwam.

05 Hi'j het mi'j de genaode geven om apostel te wezen, zodat ik omwille van him an alle volken geheurzemhied en geleuf uutdregen zol –

06 ok an jim, die reupen binnen deur Jezus Christus.

07 An iederiene in Rome, geliefden van God, reupen om zien heiligen te wezen. Genaode is mit jim en vrede van God, oonze Heit, en van de Heer Jezus Christus.

08 Aldereerst daank ik deur Jezus Christus mien God veur jim allemaole, omreden d'r in de hiele wereld over jim geleuf praot wodt.

09 God, die ik deur de verkondiging van et evangelie over zien Zeune vol overgaove dien, is mien getuge dat ik jim onophooldelik in mien gebeden nume.

10 En de hieltied vraog ik dan as God mi'j de gelegenhied geven wil om aendelik naor jim toe te kommen.

11 Want ik gunter d'r naor om jim te treffen en jim patten te laoten in een geestelike gaove, om jim te starken,

12 of liever, om deur mekeer bemoedigd te wodden: ikke deur jim geleuf en jim deur et mientes.

13 Jim mossen es weten, breurs en zusters, hoe pattietoeren ik mi'j veurneumen hebbe om naor jim toe te kommen, om krek as bi'j de aandere volken ok bi'j jim vruchtber wark te doen. Mar ik was an now toe de hieltied verhinderd.

14 Ik stao in dienste van alle volken: van beschaefde en niet beschaefde, letterde en ongeletterde,

15 en daoromme is et mien weens om et evangelie ok an jim in Rome uut te dregen.

God veroordeelt kwaod en onrecht.

16 Veur dit evangelie schaem ik mi'j niet, want et is God zien reddende kracht veur alleman die geleuven, veur Joden in et eerste plak, mar ok veur aandere volken.

17 In et evangelie eupenbaort him dat God inkeld en allienig wie geleuft as rechtveerdige annemt, zoas ok schreven stiet: "De rechtveerdige zal leven deur geleuf."

18 En vanuut de hemel eupenbaort God zien argernis him over al et kwaod en onrecht van heur die mit heur onrechtveerdighied de waorhied geweld andoen.

19 Want wat een meenske over God weten kan is heur bekend omreden God et an heur kenber maekt het.

20 Zien onzichtbere eigenschoppen bin vanof de schepping van de wereld zichtber in zien warken, zien iewige kracht en goddelikhied bin veur et verstaand waorneember. D'r is niks waordeur zi'j te verontschuldigen binnen,

21 want hoewel zi'j God kennen, hebben ze him niet de ere en daank brocht die him toekommen. Heur overdaenkings bin hielendal onnut en heur onverstanig hatte is verduusterd.

22 Wiels zi'j beweren wies te wezen, bin ze dwaes

23 en hebben ze de majesteit van de onvergaankelike God inwisseld veur beelden van vergaankelike meensken, voegels, lopende en kroepende dieren.

24 Daorom het God heur in heur lege begeerten uutleverd an zedelooshied, waormit zi'j heur lichem onteren.

25 Ze hebben de waorhied over God inwisseld veur de leugen; ze vereren en anbidden et schaopene in plak van de maeker, die prezen wodden moet tot in iewighied. Amen.

26 Daorom het God heur uutleverd an onterende verlangsten. De vrouwluden hebben de netuurlike ommegaank verruild veur de tegennetuurlike,

27 en ok de manluden hebben de netuurlike ommegaank mit vrouwluden loslaoten en bin in hatstocht veur mekeer ontbraand. Manluden plegen ontucht mit manluden; zo wodden zi'j d'r veur straft dat ze van God ofdwaeld binnen.

28 Omreden zi'j et beneden heur weerdighied achtten om God te erkennen, het God heur overleverd an heur eigen onbetrouwberhied en doen ze wat slecht is.

29 Ze bin deur en deur onrechtveerdig en gemeen, hebzuchtig en slecht. Ze bin deur en deur ofgeunstig, moordzuchtig en twistziek, deurtrapt en kwaodaorig. Ze teuten

30 en praoten kwaod, hebben een hekel an God, bin eigenwies, groots en mit heurzels inneumen. Ze bin viendingriek in et kwaod, tonen gien ontzag veur heur oolden,

31 bin kotzichtig en trouweloos, zonder liefde en ze bin onbaarmhattig.

32 En hoewel zi'j et vonnis van God kennen en weten dat meensken die zoksoorte dingen doen de dood verdienen, doen ze dit alles toch. Starker nog, ze juichen et alderdeegst toe dat aanderen et ok doen.

Romeinen 2.

01 Netuurlik, jim veroordielen dit alles. Mar jim bin liekemin te verontschuldigen. Et oordiel dat jim over aanderen vellen, vellen jim over jimzels, want de dingen die jim veroordielen doen jimzels ok.

02 Wi'j weten dat God heur die zoksoorte dingen doen terechte veroordielt.

03 Of daenken jim seins dat jim, die zels doen waj'm in aanderen veroordielen, de straf van God ontlopen kunnen?

04 Verachten jim dan zien onbegreensde goedhied, geduld en verdreegzemhied, en weten jim niet dat zien goedhied jim tot inkeer brengen wil?

05 Deurdat jim zo hadleers binnen en niet tot inkeer kommen willen, maeken jim dat de straf waortoe God jim veroordielt op de dag dat hi'j zien rechtveerdig vonnis uutsprekt en uutvoert, allienig mar zwaorder wodt.

06 God beloont ieder meenske naor zien daoden.

07 An wie et goeie dot en daorin volhaddet, an wie glorie, ere en onstarfelikhied zuukt, geft hi'j et iewige leven.

08 Mar wie haandelt uut geldingsdrang, de waorhied niet eerbiedigt en him leiden lat deur onrecht, straft hi'j mit zien argernis en lelkens.

09 Iederiene die et minne dot waacht leed en ellende, de Joden in et eerste plak, mar ok de aandere volken.

10 Iederiene die et goeie dot waacht glorie, ere en vrede, de Joden in et eerste plak, mar ok de aandere volken.

11 God maekt gien onderscheid.

12 Iederiene die zundigd hebben zonder de wet te kennen, zullen ok zonder de wet verleuren gaon; en iederiene die zundigd hebben wiels zi'j de wet wel kennen, zullen deur de wet veroordield wodden.

13 Niet wie de wet allienig mar anheuren zal veur God rechtveerdig wezen, mar wie de wet naoleven.

14 As jommes heidenen, die de wet niet hebben, de wet van neture naoleven, dan bin ze heurzels tot wet, ok al hebben zi'j him niet.

15 Ze bewiezen deur heur daoden dat wat de wet eist in heur hatte schreven stiet; en heur geweten bevestigt dit, omreden zi'j heurzels mit heur gedaachten beschuldigen of vri'jpleiten.

16 Dit alles zal blieken op de dag waorop, neffens et evangelie dat ik zeg, God deur Christus Jezus oordielen over wat d'r in de meenske verburgen is.

De Joden en de wet.

17 En jim die jimzels een Jood numen, op de wet vertrouwen en jim op God veurstaon laoten;

18 jim die zien wil kennen en zo hiel best weten waor et op ankomt, omreden jim onderwezen wodden deur de wet;

19 jim die d'r van overtuugd binnen daj'm zels een leidsman van blienen binnen, een locht veur heur die in et duuster binnen,

20 een opvoeder van onverstanigen, een lerer van onwetenden, omreden jim in de wet de belicheming van de kennis en de waorhied hebben –

21 jim die aanderen onderwiezen, onderwiezen jim jimzels eins wel? Jim zeggen dat et volk niet stelen mag, mar stelen jimzels niet?

22 Jim zeggen dat et volk gien overspel plegen mag, mar begaon jimzels gien overspel? Jim minachten ofgodsbeelden, mar begaon jimzels gien heiligschennis?

23 Jim laoten jim veurstaon op de wet, mar onteren God deur de wet te overtreden,

24 want d'r stiet schreven: "Deur jim toedoen wodt de naeme van God onder de volken lasterd."

25 Dat jim besneden binnen strekt jim weliswaor tot veurdiel as jim de wet naoleven, mar as jim de wet overtreden bin jim toch in wezen onbesneden.

26 En as iene die niet besneden is de veurschriften van de wet in acht nemt, zal hi'j dan deur God niet as besneden beschouwd wodden?

27 Wie onbesneden bleven is mar him an de wet hoolt, zal zien oordiel vellen over jim die, ok al hebben jim de wet op schrift en bin jim besneden, de wet overtredet.

28 Jood is een meenske niet deur zien uterlik, en de besniedenis is gien lichamelike besniedenis.

29 Jood is een meenske deur zien innerlik, en de besniedenis is een innerlike besniedenis. Et is et wark van de Geest, niet een veurschrift uut de wet, dus wie innerlik een Jood is, krigt gien lof van meensken mar van God.

Romeinen 3.

01 Wat hebben de Joden dan nog veur op aanderen? Het et ienig nut dat et volk besneden is?

02 Grif wel, en in ieder opzicht. In et eerste plak bin et de Joden an wie God zien woord toevertrouwd het.

03 Mar wat hat dat veur nocht? As goenend van heur God ontrouw wodden binnen, zal dat dan gien aende maeken an God zien trouw?

04 Netuurlik niet. Ieder meenske is onbetrouwber, mar God is betrouwber, zoas ok schreven stiet: "Jim blieken rechtveerdig aj'm rechtspraoke doen, jim overwinnen aj'm vonnissen."

05 Mar as et onrecht dat wi'j doen bewist dat God rechtveerdig is, is et dan niet zo – ik risseneer now zoas aanderen doen zollen – dat God onrechtveerdig is as hi'j oons toch nog veroordielt?

06 Dat in gien geval. Hoe kan God aanders rechter van de wereld wezen?

07 Mar as deur mien onbetrouwberhied God zien trouw allienig mar toenemt en daordeur ok zien roem, waorom wodde ik dan toch nog as een zundig persoon veroordield?

08 Kuwwe niet beter et kwaode doen, zodat et goeie d'r uut votkomt? D'r wodt zegd dawwe dat beweren, mar wie oons zo belastert zal zien gerechte straf niet ontlopen.

09 Wat betekent dit alles? Biwwe as Joden now beveurdield? Niet in alle opzichten, want ik hebbe ommes al hiel dudelik maekt dat iederiene, liekegoed de Joden as de aandere volken, in de macht van de zunde binnen.

10 Zo stiet d'r ok schreven:

"D'r is gien meenske rechtveerdig, alderdeegst niet iene,

11 d'r is gien meenske verstaandig,

d'r is gien meenske die God zuukt.

12 Allemaole hebben ze heur ofwended,

hiel et meensdom is verdurven.

D'r is gien meenske die nog et goeie dot,

d'r is d'r alderdeegst niet iene.

13 Heur keel is een eupen graf,

heur tonge is bedrieglik,

aachter heur lippen schoelt et venien van een adder,

14 heur mond is vol vervluking en venien.

15 Zi'j haosten heur om bloed te vergieten,

16 brengen ellende en vernietiging.

17 De weg van de vrede kennen ze niet,

18 aangst veur God kennen ze niet."

19 Wi'j weten dat de wet in alles wat hi'j zegt allienig tegen degenen praot die an de wet onderwurpen binnen. Mar uutaendelik wodt ieder meenske et zwiegen oplegd en stiet de hiele wereld schuldig veur God.

20 Daorom is veur him gien starveling onschuldig omreden hi'j de wet naoleeft, want krek de wet leert oons de zunde kennen.

Rechtveerdig veur God deur et geleuf in Jezus Christus.

21 God zien gerechtighied, waorvan de Wet en de Profeten al getugen, wodt now ok buten de wet zichtber:

22 God schinkt vri'jspraoke an iederiene die in Jezus Christus geleuven. En d'r is gien onderscheid.

23 Iederiene het zundigd en mist de naobi'jhied van God;

24 en iederiene wodt uut genaode, die niks kost, deur God as een rechtveerdige anneumen omreden hi'j oons deur Christus Jezus verlost het.

25-26 Hi'j is deur God anwezen om deur zien dood et middel tot verzoening te wezen veur wie geleuft. Hiermit bewist God dat hi'j rechtveerdig is, want in zien verdreegzemhied giet hi'j veurbi'j an de zunden die in et verleden begaon binnen. Hi'j wil oons now, in disse tied, zien gerechtighied bewiezen: hi'j lat oons zien dat hi'j rechtveerdig is deur iederiene vri'j te spreken die in Jezus geleuft.

27 Kun wi'j oons dan nog argens op veurstaon laoten? Dat is uutsleuten. En deur welke wet komt dat? Deur de wet die eist dat jim him naoleven? Nee, deur de wet die eist dat jim geleuven.

28 Ik hebbe jim d'r ommes op wezen dat een meenske vri'jspreuken wodt deur te geleuven, en niet deur de wet nao te leven.

29 Is God seins allienig de God van de Joden en niet die van de heidenen? Grif ok die van de heidenen,

30 want d'r is mar iene God, en hi'j zal liekegoed besnedenen as onbesnedenen op grond van heur geleuf as rechtveerdigen annemen.

31 Stellen wi'j deur et geleuf de wet buten warking? Nee, 't ligt krek even aanders, wi'j bevestigen de wet krek.

Romeinen 4.

Abraham.

01 Wat moe'we now zeggen over oonze stamheit Abraham?

02 As hi'j as een rechtveerdige anneumen wezen zol op grond van zien daoden, dan had hi'j him doe veurstaon laoten kund. Mar niet tegenover God,

03 want wat zegt de Schrift? "Abraham vertrouwde op God, en dat wodde him as een daod van gerechtighied toerekend."

04 Iene die zien loon verdient, krigt et niet as een geunst mar as een recht.

05 Mar iene zonder verdienste, die mar vertrouwt op him die de schuldige vri'jpraot, wodt vanwegens zien vertrouwen rechtveerdig verklaord.

06 Zo priest ok David de meenske gelokkig die deur God rechtveerdig verklaord wodt zonder dat hi'j ok mar een peer verdienste het:

07 "Gelokkig is de meenske wie zien onrecht vergeven is, wie zien zunden bedekt binnen;

08 gelokkig is de meenske wie zien zunden de Heer niet telt."

09 Priezen disse woorden een besneden of een onbesneden meenske gelokkig? We zaggen al dat Abraham zien vertrouwen him toerekend wodde as een daod van gerechtighied.

10 Mar wanneer gebeurde dat? Doe hi'j al besneden was of daorveur? Et laeste, doe hi'j nog niet besneden was.

11 De besniedenis kreeg hi'j naotied as een bezegeling en teken dat hi'j as onbesnedene rechtveerdig was, omreden hi'j op God vertrouwde. Zo wodde hi'j de heit van alle onbesnedenen die geleuven, zodat ok zi'j as rechtveerdigen anneumen wodden konnen.

12 En hi'j wodde ok de heit van heur die besneden binnen, temeenste van heur die him niet allienig besnieden laoten hebben mar ok oonze heit Abraham volgen in et geleuf dat hi'j as onbesnedene hadde.

13 Ommes, niet deur de wet kregen Abraham en zien naogeslaacht de belofte dat zi'j de wereld in bezit kriegen zollen, mar deur de gerechtighied die et geleuf geft.

14 As de meensken op grond van de wet arfgenaem wezen zollen, zol et geleuf zien betekenisse verleuren hebben en de belofte ontkracht wezen.

15 De wet maekt jommes allienig dat God straft, want zonder wet is d'r ok gien overtreding.

16 Mar de belofte had alles te maeken mit vertrouwen omreden zi'j een gaove van God wezen mos, want allienig zo kon zi'j veur hiel et naogeslaacht gellen blieven. Niet allienig veur wie de wet het, mar ok veur wie op God vertrouwt zoas Abraham, die de heit van oons allemaole is.

17 D'r stiet ommes schreven: "Ik hebbe je een heit van een protte volken maekt." En hi'j is dit tegenover God, op wie hi'j vertrouwde, die de dooien levend maekt en in et leven ropt wat niet bestiet.

18 Hoewel et eins niet kon, bleef Abraham hopen en geleuven dat hi'j de heit van een protte volken wodden zol, zoas him beloofd was: "Zo talriek zullen je naokommelingen wezen."

19 En zien geleuf verzwakte niet doe hi'j, omdebi'j honderd jaor oold, besefte dat zien krachten him verlaoten hadden en Sara niet langer vruchtber was.

20 Hi'j twiefelde niet an God zien belofte; zien geleuf verleur hi'j niet, starker nog, hi'j wodde d'r in starkt en bewees zo ere an God.

21 Hi'j was d'r van overtuugd dat God bi'j machte was te doen wat hi'j beloofd hadde,

22 en dat wodde him as een daod van gerechtighied toerekend.

23 En dit is niet allienig veur him schreven,

24 mar ok veur oons, want wi'j zullen ok as rechtveerdigen anneumen wodden omreden we geleuven in him die Jezus, oonze Heer, uut de dood opwekt het:

25 hi'j die priesgeven wodde om oonze zunden en opwekt wodde omwille van oonze rechtveerdiging.

Romeinen 5.

Leven in vrede mit God.

01 Wi'j bin dus as rechtveerdigen anneumen op grond van oons geleuf en leven in vrede mit God, deur oonze Heer Jezus Christus.

02 Deur toedoen van him hewwe deur et geleuf toegang kregen tot God zien genaode, die oons follement is, en in de hope patten te meugen in zien luuster priezen we oons gelokkig.

03 En dat niet allienig, we priezen oons alderdeegst gelokkig onder alle ellende, omreden we weten dat ellende tot volhadding leidet,

04 volhadding tot betrouwberhied, en betrouwberhied tot hope.

05 Disse hope zal niet beschaemd wodden, omreden God zien liefde in oons hatte uutgeuten is deur de heilige Geest, die oons geven is.

06 Doewe nog hulpeloos weren is Christus ommes veur oons, die op dat stuit nog schuldig weren, wegraekt.

07 D'r is haost gieniene die veur een rechtveerdig meenske starven wil; allienig een inkeling durft veur een goed meenske zien leven te geven.

08 Mar God bewees oons zien liefde deurdat Christus veur oons wegraekt is doe'we nog zundige meensken weren.

09 Des te zekerder is et dus dat wi'j, now we deur zien dood vri'jspreuken binnen, deur toedoen van him redded wodden zullen en niet veroordield.

10 Wodden we in de tied dawwe nog God zien vi'janen weren al mit him verzoend deur de dood van zien Zeune, des te zekerder is et dawwe, now we mit him verzoend binnen, redded wodden deur zien leven.

11 En meer nog, dawwe God priezen daanken we an oonze Heer Jezus Christus, deur wie we now al mit God verzoend binnen.

12 Deur iene meenske is de zunde in de wereld kommen en deur de zunde de dood, en zo is de dood veur ieder meenske kommen, want ieder meenske het zundigd.

13 D'r was al zunde in de wereld veurdat de wet d'r was; allienig, zonder wet wodt d'r van de zunde gien rekening bi'jhullen.

14 Toch was de dood in de tied van Adam tot an Mozes over alle meensken, ok al begingen zi'j mit heur zunden niet dezelde overtreding as Adam. Now is Adam de veurofbelinge van him die kommen zollen.

15 Mar de genaode giet zien overtreding vere te boven. Deur de overtreding van iene meenske mossen alle meensken starven, mar de genaode die God an alle meensken geft deur die iene meenske, Jezus Christus, is vule overvloediger.

16 Dit kedo giet et gevolg van de zunde van iene meenske vere te boven, want die iene overtreding het tot veroordieling leided, mar de genaode die nao een protte overtredings schonken wodde, het tot vri'jspraoke leided.

17 As de dood heerst het deur de overtreding van iene meenske, is et des te wisser dat iederiene die de genaode en de vri'jspraoke in zoe'n overvloed kregen hebben, heersen zullen in et iewige leven, deur toedoen van die iene meenske, Jezus Christus.

18 Kotomme, zoas de overtreding van ien inkeld meenske d'r toe leided het dat iederiene veroordield wodt, zo zal de rechtveerdighied van ien inkeld meenske d'r toe leiden dat iederiene vri'jspreuken wodt en daordeur leven zullen.

19 Zoas deur de ongeheurzemhied van ien meenske alle meensken zundige meensken wodden, zo zullen deur de geheurzemhied van ien meenske alle meensken rechtveerdigen wodden.

20 En naotied is de wet d'r bi'j kommen, zodat de overtredings toenammen; mar waor de zunde toenam, wodde ok de genaode de hieltied overvloediger.

21 Zoas de zunde heerst het en tot de dood leided het, zo mos deur de vri'jspraoke de genaode heersen en tot et iewige leven leiden, deur toedoen van Jezus Christus, oonze Heer.

Romeinen 6.

Mit Christus wegraekt, dood veur de zunde.

01 Betekent dit now dat we zundigen blieven moeten om de genaode toenemen te laoten?

02 Dat in gien geval. Hoe zollen wi'j, die dood binnen veur de zunde, nog in zunde leven kunnen?

03 Weten jim niet dat wi'j die deupt binnen in Christus Jezus, deupt binnen in zien dood?

04 We bin deur de deup in zien dood mit him begreuven om, zoas Christus deur de macht van de Heit uut de dood opwekt is, een ni'j leven te leiden.

05 Awwee patten in zien dood, zuwwe ok patten in zien opstaanding.

06 We we weten ommes dat oons oolde bestaon mit him krusegd is omreden d'r een aende kommen mos an oons zundige leven: we mochten niet langer knechten van de zunde wezen.

07 Wie wegraekt is, is rechtens vri'j van de zunde.

08 Awwe mit Christus wegraekt binnen, geleuven we dawwe ok mit him leven zullen,

09 omreden we weten dat hi'j, die uut de dood opwekt is, niet meer starft. De dood het gien macht meer over him.

10 Hi'j is wegraekt om een aende te maeken an de zunde, veur iens en altied; en now hi'j leeft, leeft hi'j veur God.

11 Zo moe'n jim ok jimzels zien: dood veur de zunde, mar in Christus Jezus levend veur God.

12 Laot de zunde dus niet heersen over jim starfelike bestaon, geve niet toe an jim begeerten.

13 Stelle jimzels niet langer in dienst van de zunde as een warktuug veur et onrecht, mar stelle jimzels in dienst van God. Daenk an jowzels as levenden die uut de dood opwekt binnen en stelle jimzels in dienst van God as een warktuug veur de gerechtighied.

14 De zunde mag niet langer over jim heersen, want jim staon niet onder de wet, mar leven onder de genaode.

15 Betekent dit now dawwe vri'juut zundigen meugen omreden we niet onder de wet staon, mar onder de genaode leven? Abseluut niet.

16 Aj'm jim as knecht in iene zien dienst stellen, weten jim toch daj'm him geheurzemen moeten? Aj'm de zunde dienen, leidet dat tot de dood; aj'm God geheurzaemen, leidet dat tot vri'jspraoke.

17 Mar God zi'j daank: jim weren knechten van de zunde, mar now geheurzaemen jim van ganser hatte de leer waoran jim jim toevertrouwd hebben,

18 en bevri'jd van de zunde hebben jim jim in dienst steld van de gerechtighied.

19 Ik drok mi'j zo alledaegs meugelik uut, omreden et aanders jim benul te boven giet. Zoas jim jim ooit in dienst stelden van zedelooshied en onrecht om een wetteloos leven te leiden, zo stellen jim jim now in dienst van de gerechtighied om heilig te leven.

20 Doe jim nog knechten van de zunde weren, weren jim niet bunnen an de gerechtighied.

21 Wat hebben jim daormit binnenhaeld? Dingen waorveur jim jim now schaemen, want ze leiden tot de dood.

22 Mar now, bevri'jd van de zunde en in dienst van God, oogsten jim toewijding an him en alderdeegst et iewige leven.

23 Et loon van de zunde is de dood, mar de gift van God is et iewige leven in Christus Jezus, oonze Heer.

Romeinen 7.

01 Weten jim dan niet, breurs en zusters – ik praot ommes tegen meensken die de wet kennen –, dat de wet allienig gezag over een meenske het zolange as hi'j leeft?

02 Een trouwde vrouw is deur de wet bunnen an heur man zolange as hi'j leeft, mar as hi'j wegraekt is zi'j van disse verplichting ontsleugen.

03 As zi'j heur zolange as heur man in leven is mit een aander inlat, nuumt et volk heur overspeulig. Mar raekt heur man weg, dan is zi'j niet langer an de wet bunnen, dan begiet ze gien overspel as ze de vrouw van een aandere man wodt.

04 Zo bin jim ok, breurs en zusters, dood veur de wet deur toedoen van de dood van Christus en beheuren jim now een aander toe: him die uut de dood opwekt is. Oons leven moet vrucht dregen veur God.

05 Doe we oons nog leiden leuten deur oonze eigen wil, wodde oons bestaon beheerst deur zundige hatstochten die de wet in oons opreup en dreug et allienig vrucht veur de dood.

06 We weren an de wet vaastebunnen, mar now biwwe bevri'jd; we bin dood veur de wet, zodawwe niet meer de oolde odder van de wet dienen, mar de ni'je odder van de Geest.

De wet en de zunde.

07 Moe'we now vaastestellen dat de wet etzelde is as de zunde? Abseluut niet. Mar ik bin mi'j eerst deur de wet bewust wodden van de zunde. Ik zol ommes niet weten wat begeerte was as de wet niet zee: "Zet jow zinnen niet op wat dat van een aander is."

08 Mar de zunde het van et gebod gebruuk maekt om begeerten in mi'j wakker te maeken, want zonder de wet is de zunde krachteloos.

09 Iens leefde ik zonder de wet, mar deur de komst van et gebod kwam de zunde tot leven

10 en daordeur raekte ik weg. Et gebod, dat tot leven leiden moeten hadde, bleek krek tot mien dood te leiden.

11 De zunde het gebruuk maekt van et gebod: zi'j het mi'j misleided en mi'j deur et gebod ommebrocht.

12 Kotomme, de wet zels is heilig en de geboden bin heilig, rechtveerdig en goed.

13 Is et dan et goeie dat mi'j ommebrocht het? Netuurlik niet, et is de zunde. Mar om mi'j omme te brengen het ze van et goeie gebruuk maekt; allienig zo kon dudelik wodden wat de zunde is. Deur et gebod te bruken lat de zunde zien hoe verdarfelik zi'j is.

14 Wi'j weten dat de wet et wark van de Geest is, mar deur mien netuur bin ik uutleverd an de zunde.

15 Wat ik doe, deurzie ik niet, want ik doe niet wat ik wil, ik doe krek waor ik een hekel an hebbe.

16 Mar as mien daoden in stried binnen mit mien wil, dan erken ik dat de wet goed is.

17 Dan bin ik et niet die haandelt, mar de zunde die in mi'j heerst.

18 Ik beseffe ommes dat in mi'j, in mien eigen netuur, et goeie niet anwezig is. Ik wíl et goeie wel, mar et goeie doen kan ik niet.

19 Wat ik guntere te doen, et goeie, laot ik nao; wat ik uut de weg gaon wil, et kwaode, dat doe ik.

20 Mar as mien daoden in stried binnen mit mien wil, bin ik daor niet zels de oorzaeke van, mar de zunde die in mi'j heerst.

21 Ik ontdekke in mi'j de wetmaotighied dat et kwaode him an mi'j opdringt, ok al wil ik et goeie doen.

22 Innerlik stem ik vol bliedschop in mit de wet van God,

23 mar in alles wat ik doe zie ik die aandere wet. Hi'j vecht tegen de wet waormit ik mit mien verstaand instem en maekt van mi'j een gevangene van de wet van de zunde, die in mi'j leeft.

24 Wie zal mi'j, ongelokkig meenske, redden uut dit bestaon dat beheerst wodt deur de dood?

25 God zi'j daank, deur Jezus Christus, oonze Heer. Mit mien verstaand onderwarp ik mi'j an de wet van God, mar deur mien netuur onderwarp ik mi'j an de wet van de zunde.

Romeinen 8.

Leven deur de Geest.

01 Dus wie in Christus Jezus binnen, wodden niet meer veroordield.

02 De wet van de Geest die in Christus Jezus leven brengt, het jim vri'j maekt van de wet van de zunde en de dood.

03 Waortoe de wet niet in staot was, machteloos as hi'j was deur de meenselike netuur, dat het God tot staand brocht. Vanwegens de zunde het hi'j zien eigen Zeune as meenske in dit zundige bestaon stuurd; zo het hi'j in dit bestaon mit de zunde ofrekend,

04 zodat in oons volbrocht wodt, dat wat de wet van oons vragt. Oons leven wodt ommes niet langer beheerst deur oonze eigen netuur, mar deur de Geest.

05 Wie him deur zien eigen neture leiden lat is richt op dat wat hi'j zels wil, mar wie him leiden lat deur de Geest is richt op dat wat de Geest wil.

06 Wat oonze eigen netuur wil brengt de dood, mar wat de Geest wil brengt leven en vrede.

07 Oonze eigen wil stiet vi'janig tegenover God, want hi'j onderwarpt him niet an zien wet en is daor ok niet toe in staot.

08 Wie him deur zien eigen wil leiden lat, kan God niet behaegen.

09 Mar jim leven niet zo. Jim laoten jim leiden deur de Geest, want de Geest van God woont in jim. Iene die him niet leiden lat deur de Geest van Christus beheurt Christus dan ok niet toe.

10 Mar as Christus in jim leeft, bin jim deur de zunde weliswaor starfelik, mar de Geest geft jim leven, omreden jim deur God as rechtveerdigen anneumen binnen.

11 Want as de Geest van him die Jezus uut de dood opwekt het in jim woont, zal hi'j die Christus opwekt het ok jim die starfelik binnen, levend maeken deur zien Geest, die in jim leeft.

12 Breurs en zusters, we hoeven oons niet langer leiden te laoten deur oonze eigen wil.

13 As jim dat wel doen, zuj'm grif wegraeken. Mar aj'm jim zundige wil doden deur de Geest, zuj'm leven.

14 Iederiene die deur de Geest van God leided wodt, bin kiender van God.

15 Jim hebben de Geest niet kregen om opni'j as knechten in aangst te leven, jim hebben de Geest kregen om God zien kiender te wezen, en om him anroepen te kunnen mit "Abba, Heit".

16 De Geest zels verzekert oonze geest dat wi'j God zien kiender binnen.

17 En now we zien kiender binnen, biwwe ok zien arfgenaemen, arfgenaemen van God. Tegere mit Christus biwwe arfgenaemen: wi'j moe'n patten in zien lieden om mit him patten te kunnen in God zien luuster.

18 Ik bin d'r wis van dat et lieden van disse tied in gien verholing stiet tot de luuster die oons in de toekomst eupenbaord wodden zal.

19 De schepping zicht d'r reikhalzend naor uut dat eupenbaor wodt wie God zien kiender binnen.

20 Want de schepping is te prooi valen an zinlooshied, niet uut eigen wil, mar deur him die heur daoran onderwurpen het. Mar zi'j het hope kregen,

21 omreden ok de schepping zels bevri'jd wodden zal uut de slavernij van de vergaankelikhied en patten zal in de vri'jhied en luuster die God zien kiender geven wodt.

22 Wi'j weten dat de hiele schepping nog de hieltied as in baorenswenen zucht en lidt.

23 En dat niet allienig, ok wi'jzels, die as veurschot de Geest kregen hebben, ok wi'j zuchten in oonszels in ofwaachting van de eupenbaoring dat we kiender van God binnen, de verlossing van oons starfelik bestaon.

24 In disse hope biwwe redded. Mar awwe now al zien zollen waorop we hopen, zol et gien hope meer wezen. Wie hoopt d'r nog op wat hi'j al zien kan?

25 Mar as wi'j hopen op wat nog niet zichtber is, blieven we in ofwaachting daorvan volhadden.

26 De Geest helpt oons in oonze zwakhied; wi'j weten ommes niet wawwe in oons gebed tegen God zeggen moeten, mar de Geest zels pleit veur oons mit woordloze zuchten.

27 God, die oons begript, wet wat de Geest zeggen wil. Hi'j wet dat de Geest neffens zien wil pleit veur iederiene die him toebeheuren.

28 En wi'j weten dat veur wie God liefhet, veur wie neffens zien veurnemen reupen binnen, alles bi'jdregen an et goeie.

29 Wie hi'j al van teveuren uutkeuzen het, het hi'j d'r ok van teveuren toe bestemd om de weerscheide te wodden van zien Zeune, die de eerstgeborene wezen mos van een protte breurs en zusters.

30 Wie hi'j hiertoe bestemd het, het hi'j ok reupen; en wie hi'j reupen het, het hi'j ok vri'jspreuken; en wie hi'j vri'jspreuken het, het hi'j now al patten laoten in zien luuster.

31 Wat moe'we hier nog meer over zeggen? As God veur oons is, wie kan dan tegen oons wezen?

32 Zal hi'j, die zien eigen Zeune niet speerd het, mar him omwille van oons allemaole priesgeven het, oons mit him niet alles geven?

33 Wie zal God zien uutverkorenen anklaegen? God zels praot heur vri'j.

34 Wie zal heur veroordielen? Christus Jezus, die wegraekt is, meer nog, die opwekt is en an de rechterhaand van God zit, pleit veur oons.

35 Wat zal oons scheiden van de liefde van Christus? Tegenspoed, ellende of vervolging, honger of aarmoede, geveer of et zweerd?

36 D'r stiet schreven: "Om jow wodden wi'j dag nao dag ommebrocht en ofvoerd as schaopen veur de slaacht."

37 Mar wi'j zegevieren in dit alles glaansriek deur toedoen van him die oons liefhad het.

38 Ik bin d'r wis van dat dood noch leven, engels noch machten noch krachten, now noch toekomst,

39 hoogte noch diepte, of wat d'r ok mar in de schepping is, oons scheiden kunnen zal van de liefde van God, die hi'j oons geven het in Christus Jezus, oonze Heer.

Romeinen 9.

De trouw en de baarmhattighied van God.

01 Omreden ik iene bin mit Christus zeg ik de waorhied, en mien geweten, leided deur de heilige Geest, is mien getuge dat ik niet lieg:

02 ik bin slim raekt en wodde alsmar deur verdriet kweld.

03 Omwille van mien volksgenoten, de breurs en zusters mit wie ik mien ofkomst pat, zol ik haost bidden om zels vervluukt te wodden en van Christus scheiden te wezen;

04 omwille van heur, de Israëlieten, die God as zien kiender anneumen het en an wie hi'j zien naobi'jhied, de verbunnen, de wet, de tempeldienst en de beloften geven het;

05 omwille van et volk dat van de aartsvaders ofstamt en waoruut Christus votkommen is. God, die boven alles verheven is, is prezen tot in iewighied. Amen.

06 God het zien belofte niet breuken. Want niet alle Israëlieten beheuren warkelik tot Israël,

07 niet alle naokommelingen van Abraham bin ok warkelik zien kiender. D'r stiet ommes schreven: "Allienig de naokommelingen van Isaak zullen gellen as jow naogeslaacht."

08 Dat wil zeggen: ze bin niet deur heur netuurlike ofstamming kiender van God, mar gellen as naogeslaacht van Abraham op grond van God zien belofte.

09 As wát een belofte is dan bin et disse woorden: "Over een jaor kom ik weeromme en dan het Sara een zeune."

10 Starker nog, Rebekka was van oonze heit Isaak zwanger van een twieling,

11-12 en al veur ze geboren weren en nog niks goeds of verkeerds daon hadden, wodde heur zegd: "De ooldste zal de jongste dienen." God zien besluut blift jommes van kracht: God köst een meenske niet uut op grond van zien daoden, mar omreden hi'j him ropt.

13 Zo stiet d'r ok schreven: "Jakob hebbe ik liefhad, Esau he'k mit de nekke ankeken."

14 Moe'we dan zeggen dat God onrechtveerdig is? Netuurlik niet.

15 Hi'j zegt ommes tegen Mozes: "Ik bin baarmhattig veur wie ik baarmhattig wezen wil, ik geef genaode an wie ik genaode geven wil."

16 Alles hangt dus of van God en zien baarmhattighied, niet van de wil of de inspanning van de meenske.

17 Zo zegt hi'j neffens de Schrift tegen de farao: "Ik hebbe jow allienig in leven laoten om jow mien macht te tonen en om iederiene op eerde weten te laoten wie ik bin."

18 Dus God is baarmhattig veur wie hi'j wil en maekt hi'j stiems wie hi'j wil.

19 Mar now zuj'm vraogen: "Waoromme ropt God oons dan nog te verantwoording? Gieniene giet toch in tegen zien wil?"

20 Wie bin jim eins daj'm, as een meenske, wat tegen God inbrengen zollen? Vragt et diggelgoed seins an de pottebakker: "Waorom hebben jow mi'j maekt zoas ik d'r uut zie?"

21 Het de pottebakker niet de vri'jhied om van dezelde klompe klei liekegoed een kostbere vaas as een alledaegse pot te maeken?

22 God het degenen die et veurwarp van zien argernis binnen en die hi'j veur de ondergang bestemd het, mit een protte geduld verdreugen omreden hi'j zien argernis ok tonen wil en zien macht kenber maeken wil.

23 En omreden hi'j zien overweldigende majesteit tonen wil, het hi'j degenen die et veurwarp binnen van zien baarmhattighied d'r toe veurbestemd om in zien majesteit te patten.

24 Heur het hi'j ok reupen: oons, die niet allienig uut et Joodse volk ofkomstig binnen, mar uut alle volken,

25 zoas ok bi'j Hosea schreven stiet: "Wat mien volk niet was, zal ik mien volk numen; wie mien geliefde niet was, zal ik mien geliefde numen.

26 En waor tegen heur zegd is: "jim bin mien volk niet," zullen zi'j kiender van de levendige God nuumd wodden."

27 En Jesaja ropt over Israël uut: "Al zol et volk van Israël zo talriek wezen as zaandkorrels an de zee, allienig een klein pat zal mar redded wodden.

28 Want de Heer zal zien woord op eerde gestaand doen, onveurweerdelik en onverkot."

29 En zoas Jesaja al zegd het: "Had de Heer van de hemelse machten oons gien naogeslaacht laoten, et zol oons as Sodom en Gomorra vergaon wezen."

Onbegrip bi'j Israël.

30 Wat kuwwe hier now uut opmaeken? Hoewel zi'j d'r niet naor streefd hebben, bin heidenen as rechtveerdigen anneumen, op grond van heur geleuf.

31 Mar Israël, dat d'r naor streefde deur de wet rechtveerdig te wodden, het dat niet beriekt.

32 Wat is daorvan de oorzaeke? Zi'j haandelden asof et van heur daoden ofhong, en niet van geleuf. Zi'j bin over de stien stroffeld

33 waorover schreven stiet: "In Sion leg ik een stien daele waorover et volk stroffelt, een rotsblok waoran et volk him stot. Mar wie in him geleuft, komt niet bedreugen uut."

Romeinen 10.

01 Breurs en zusters, ik weens uut de grond van mien hatte en bidde tot God dat ze redded wodden zullen.

02 Ik kan van heur getugen dat ze God vol toewijding dienen, mar et ontbrekt heur an inzicht.

03 Omreden zi'j God zien gerechtighied niet kennen, perberen ze heur eigen gerechtighied gellen te laoten en verlaoten ze heur niet op God zien vri'jspraoke.

04 De wet vint zien doel in Christus, zodat iederiene die geleuft rechtveerdig verklaord wodden zal.

05 Wisse, Mozes zegt over de rechtveerdighied die op grond van de wet verkregen wodt: "Wie dot wat de wet veurschrift, zal leven."

06 En over de rechtveerdighied die op grond van geleuf geven wodt stiet schreven: "Zegge niet bi'j jowzels: Wie zal opstiegen naor de hemel?" – en dat betekent: wie zal Christus naor beneden brengen?

07 Of: "Wie zal ofdaelen naor de onderwereld?" – en dat betekent: Christus bi'j de dooien weg naor boven brengen.

08 Mar veerder zegt Mozes: "Et woord is dichte bi'j jow, in jow mond en in jow hatte" – en dat betekent: de bosschop van et geleuf die wi'j uutdregen, is dichte bi'j jow.

09 As jim mond belidt dat Jezus de Heer is en jim hatte geleuft dat God him uut de dood opwekt het, zullen jim redded wodden.

10 As jim hatte geleuft, zullen jim rechtveerdig verklaord wodden; as jim mond belidt, zullen jim redded wodden.

11 Want de Schrift zegt: "Wie in him geleuft, komt niet bedreugen uut."

12 En d'r is gien onderscheid tussen Joden en aandere volken, want ze hebben allemaole dezelde Heer. Hi'j geft zien rieke giften an iederiene die him anroepen,

13 want d'r stiet: "Iederiene die de naeme van de Heer anropt, zal redded wodden."

14 Mar hoe kun ze him anroepen as ze niet in him geleuven? En hoe kun ze in him geleuven as ze niet over him heurd hebben? En hoe kun ze over him heuren as hi'j niet uutdreugen wodt?

15 En hoe kan iene uutdregen as hi'j niet uutzunnen is? Et is zoas schreven stiet: "Welkom bin zi'j die goed ni'js uutdregen."

16 Toch hebben mar weinigen an et evangelie geheur geven, want Jesaja vragt: "Heer, het iene geleufd wat wi'j zegd hebben?"

17 Dus deur te luusteren komt et volk tot geleuf, en wat et volk heurt is de verkondiging van Christus.

18 Mar dan is mien vraoge: hebben zi'j de bosschop seins niet heurd? Netuurlik wel, want d'r stiet: "Heur roep klinkt over de hiele eerde, heur woorden tot de uutaenden van de wereld."

19 Mar dan vraog ik weer: het Israël de bosschop niet begrepen? Now dan, Mozes zegt al: "Ik zal jim ofgeunstig maeken op een volk dat gien volk is, ik daeg jim uut mit een volk zonder verstaand."

20 En bi'j Jesaja stiet alderdeegst: "Ik hebbe mi'j vienen laoten deur wie mi'j niet zochten, ik hebbe mi'j bekend maekt an wie niet naor mi'j vraogd hebben."

21 Mar bi'j Jesaja stiet over Israël: "De hiele dag he'k mien hanen uutsteuken naor mien ongeheurzem en opsternaot volk."

Romeinen 11.

Israël zien redding, bescheidenhied veur de heidenen.

01 Dan is now mien vraoge: het God zien volk seins verstoten? Beslist niet. Ik bin ommes zels een Israëliet, een naokommeling van Abraham, ofkomstig uut de stamme van Benjamin.

02 God het zien volk, dat hi'j al van teveuren uutkeuzen het, niet verstoten. Of weten jim niet wat de Schrift over Elia zegt, hoe hi'j Israël bi'j God anklaegt?

03 "Heer, jow profeten hebben ze ommebrocht, jow alters verwoest. Ik bin as ienige overbleven, en now hebben ze et ok op mien leven veurzien."

04 Mar hoe lödt et bescheid van God an him? "Ik hebbe zeuvenduzend meensken veur mi'jzels in leven laoten; die bin niet veur Baäl deur de kni'jen gaon."

05 Zo is ok now een klein pat over, dat God uut genaode uutkeuzen het.

06 Mar as zi'j uut genaode uutkeuzen binnen, dan is dat niet omreden ze de wet naoleven, want in dat geval zol de genaode gien genaode meer wezen.

07 Wat betekent dit allemaole? Wat Israël naostreefd het, het et niet beriekt; allienig zi'j die uutkeuzen binnen hebben et beriekt. De overigen wodden onbuugzem,

08 zoas ok schreven stiet: "God het heur geest verdoofd, heur ogen bliend maekt en heur oren doof, tot op de dag van vandaege."

09 En David zegt: "Laot heur taofel een valstrik wodden, een strik, een valkoele en een straf.

10 Laot et locht uut heur ogen wegraeken, kroem heur rogge veurgoed."

11 Mar now vraoge ik weer: zi'j bin toch niet stroffeld om te val te kommen? Dat in gien geval, mar deur heur overtreding konnen de heidenen redded wodden en doe mossen zi'j ofgeunstig wodden.

12 Mar as heur overtreding al een rieke gaove veur de wereld is en heur falen een rieke gaove veur de heidenen, hoevule rieker zal dan de gaove wezen as zi'j heur allemaole bekeerd hebben.

13 Ik praot now tegen degenen onder jim die uut heidense volken kommen. Wisse, ik bin een apostel veur de heidenen, mar ik schat mien opdracht krek daoromme zo hoge

14 omreden ik hope om falegrein bi'j mien volksgenoten op te wekken en een pat van heur te redden.

15 As God him mit de wereld verzoend het doe hi'j heur verwurp, wat zal hi'j dan, as hi'j heur opni'j anveerdt, aanders teweegbrengen as heur opstaanding uut de dood?

16 As een klein pat van et deeg an God wijded is, is al et aandere deeg et ok; as de wottel an God wijded is, bin de takken et ok.

17 En as now pattie takken van de edele olijfboom ofbreuken binnen en jim, lotten van een wilde olijfboom, tussen de overbleven takken entet binnen en patten mag in de vruchtberhied van de wottel,

18 dan moeten jim heur niet boven de takken verheffen. Aj'm dat doen, moej'm goed bedaenken dat niet jim de wottel dregen, mar de wottel jim.

19 Mar now zullen jim daor tegen inbrengen: "Die takken bin toch ofbreuken zodat ik entet wodden kon?"

20 Wisse, zi'j bin ofbreuken vanwegens heur ongeleuf en jim daanken jim plak an jim geleuf. Wees daorom mar niet eigenwies, mar hebbe ontzag veur God:

21 as hi'j de oorspronkelike takken al niet speerd het, zol hi'j jim dan wel speren?

22 Hool daorom veur ogen dat God niet allienig goed is, mar ok streng. Hi'j is streng veur wie valen binnen, mar goed veur jim – aj'm temeensen trouw blieven an zien goedhied, want aanders wodden jim ok ofkapt.

23 En as de Israëlieten niet volhadden in heur ongeleuf, zullen zi'j ok entet wodden, want God is bi'j machte om heur opni'j te enten.

24 Ommes, as jim die van neture een takke van de wilde olijfboom binnen, tegen de netuur in op de edele olijfboom entet binnen, hoevule eerder zullen zi'j dan die d'r van neture bi'j heuren, op die boom entet wodden!

25 D'r is, breurs en zusters, een goddelijk geheim dat ik jim niet ontholen wil, omreden ik veurkommen wil dat jim op jim eigen inzicht ofgaon. Mar een pat van Israël wodde onbuugzem, en dat allienig tot et mement dat alle heidenen toetreden binnen.

26 Dan zal hiel Israël redded wodden, zoas ok schreven stiet: "De redder zal uut Sion kommen, en wentelt dan de schuld of van Jakob zien naogeslaacht.

27 Dit is mien verbond mit heur, as ik heur zunden wegneem."

28 Zi'j bin God zien vi'janen wodden zodat et evangelie an jim verkondigd wodden kon, mar God blift heur liefhebben omreden hi'j de aartsvaders uutkeuzen het.

29 De genaode die God geft nemt hi'j in gienertied weeromme, as hi'j iene ropt maekt hi'j dat niet ongedaon.

30 Zoas jim God es ongeheurzem weren, mar deur jim ongeheurzemhied God zien baarmhattighied ondervunnen hebben,

31 zo bin zi'j now ongeheurzem om deur de baarmhattighied die jim ondervunnen hebben, ok zels baarmhattighied te ondervienen.

32 Want God het ieder meenske uutleverd an de ongeheurzemhied, zodat hi'j veur ieder meenske baarmhattig wezen kan.

33 Hoe onuutputtelik bin God zien riekdom, zien wieshied en zien kennis, hoe onbegriepelik zien oordielen en zien wegen.

34 "Wie kent de gedaachten van de Heer, wie was ooit zien raodsman?

35 Wie het him wat geven dat deur him weeromme betaeld wodden mos?"

36 Alles is uut him ontstaon, alles is deur him maekt, alles het in him zien doel. Him komt de ere toe tot in iewighied. Amen.

Romeinen 12.

Leef neffens de wil van God.

01 Breurs en zusters, mit een beroep op God zien baarmhattighied vraoge ik jim om jimzels as een levend, heilig en God welgevallig offer in zien dienst te stellen, want dat is de waore eredienst veur jim.

02 Jim moe'n jimzels niet anpassen an disse wereld, mar veraanderen deur jim gezindhied te verni'jen, om zo te ontdekken wat God van jim wil en wat goed, volmaekt en him welgevallig is.

03 Mit een beroep op de genaode die mi'j geven is, zegge ik jim allemaole dat jim jimzels niet hoger anslaon moeten asj'm verantwoorden kunnen, mar verstaandig over jimzels daenken moeten. Daenk overienkomstig et geleuf, dat is de maote die God jim geven het.

04 Zoas oons iene lichem een protte patten het en die patten niet allemaole dezelde funktie hebben,

05 zo biwwe saemen ien lichem in Christus en biwwe, ieder appat, mekeers lichemsdelen.

06 We hebben verschillende gaoven, onderscheiden naor de genaode die oons geven is. Wie de gaove het om te profeteren, moet die in overienstemming mit et geleuf bruken.

07 Wie de gaove het om bi'jstaand te geven, moet bi'jstaand geven. Wie de gaove het om te onderwiezen, moet onderwiezen.

08 Wie de gaove het om te troosten, moet troosten. Wie wat votgeft, moet dat zonder bi'jbedoeling doen. Wie leiding geft, moet dat doen mit volle inzet. Wie baarmhattig veur een aander is, moet daorin opgewekt wezen.

09 Laot jim liefde oprecht wezen. Hebbe de schurft an et kwaod en wees et goeie toegedaon.

10 Hebbe mekeer lief mit de innige liefde van breurs en zusters en acht de aander hoger as jowzels.

11 Laot jim enthousiasme niet bekoelen, mar laot je anvieteren deur de Geest en dien de Heer.

12 Wees verhoopt deur de hope die jim hebben, wees staandvaastig aj'm tegenspoed ondervienen, en bidde zonder opholen.

13 Bekommer jim om de noden van de heiligen en wees gaastvri'j.

14 Zegen jim vervolgers; zegen heur, vervluuk heur niet.

15 Wees bliede mit wie him die bliedemaekt, hebbe verdriet mit wie verdriet het.

16 Wees iensgezind; wees niet eigenwies, mar zet jezels an tot bescheidenhied. Gao niet of op je eigen inzicht.

17 Vergelle gien kwaod mit kwaod, mar perbeer veur alle meensken et goeie te doen.

18 Stel, veurzoveer et in je macht ligt, alles in 't wark om mit alle meensken in vrede te leven.

19 Neem gien wraoke, geliefde breurs en zusters, mar laot God jim wreker wezen, want d'r stiet schreven dat de Heer zegt: "Et is an mi'j om wraoke te nemen, ik zal vergellen."

20 Mar "as jim vi'jaand honger het, geef him dan te eten, as hi'j dust het, geef him dan te drinken. Dan staepelen jim gloeiende kolen op zien heufd".

21 Laot jim niet overwinnen deur et kwaode, mar overwin et kwaode deur et goeie.

Romeinen 13.

01 Iederiene moet et gezag van de overhied erkennen, want d'r is gien gezag dat niet van God komt; ok et gezag van vandaege-de-dag is deur God insteld.

02 Wie him tegen dit gezag verzet, verzet him dus tegen een instelling van God, en wie dat dot ropt over himzels zien veroordieling of.

03 Wie dot wat goed is, hoeft niet bange te wezen veur de gezagsdregers, dat is allienig veur wie slecht dot. Jim willen niks van de overhied te vrezen hebben? Doe dan wat goed is en zi'j zal jim priezen,

04 want zi'j stiet in dienst van God en is d'r veur jim welbevienen. Mar aj'm doen wat slecht is, kuj'm beter bange veur heur wezen: zi'j voert et zweerd niet veur niks, want ze stiet in dienst van God, en deur him die et slechte dot zien verdiende straf te geven, toont zi'j God zien argernis.

05 Jim moe'n heur gezag dus erkennen, en niet allienig uut aangst veur God zien argernis, mar ok omwille van jim geweten.

06 Daorom betaelen jim ok belasting en stiet wie belasting int in dienst van God.

07 Geef iederiene wat him toekomt: belasting an wie jim belasting verschuldigd binnen, aksiens an wie jim aksiens verschuldigd binnen, ontzag an wie ontzag toekomt, eerbied an wie eerbied toekomt.

08 Wees mekeer niks schuldig, behalven liefde, want wie de aander liefhet, het de hiele wet vervuld.

09 Want: "Begao gien overspel, begao gien moord, steel niet, zet je zinnen niet op wat van een aander is" – disse en alle aandere geboden wodden saemenvat in disse iene uutspraoke: "Hebbe je jow naoste lief as jezels."

10 De liefde berokkent jim naoste gien kwaod, dus de wet vint zien vervulling in de liefde.

11 Jim kennen de tied vandaege-de-dag: et mement is kommen waorop jim uut de slaop wakker wodden moeten, want de redding is oons dichterbi'j as doe we tot et geleuf kwammen.

12 De naacht lopt an 't aende, de dag naodert al. Lao'we oons daorom ontdoen van de praktieken van de duusternis en oons behangen mit de waopens van et locht.

13 Lao'we daorom zo eerzem leven as past bi'j de dag en oons ontholen van bras- en slempparti'jen, ontucht en losbaandighied, twiespalt en jaloezie.

14 Trek de kleren an van de Heer Jezus Christus en geef niet toe an jim eigen wil, die begeerten in jim opwekt.

Romeinen 14.

Anvere mekeer, zoas Christus jim anveerd het.

01 Anvere meensken mit een zwak geleuf zonder heur overtuging te bestrieden.

02 De iene geleuft dat hi'j alles eten mag, mar iene die een zwak geleuf het et allienig gruunten.

03 Wie alles et mag niet daele kieken op iene die dat niet dot, en wie niet alles et mag gien oordiel vellen over iene die dat wel dot, want God het him anveerd.

04 Wie bin jim daj'm een oordiel vellen over de knecht van een aander? Of hi'j wel of niet volhaddet in et geleuf giet allienig zien eigen meester an – en hi'j zal volhadden, want de Heer het de macht om him dat doen te laoten.

05 De iene beschouwt bepaolde daegen as een feestdag, veur de aander bin alle daegen geliek. Laot iederiene zien eigen overtuging volgen.

06 Wie een feestdag viert, dot dat om de Heer te eren; wie alles et, dot dat om de Heer te eren, en hi'j daankt God veur zien eten. Wie wat niet eten wil, laot et staon om de Heer te eren, en hi'j daankt God ok.

07 Gieniene van oons leeft veur himzels, en gieniene van oons raekt weg veur himzels.

08 Zolange wi'j leven, leven we veur de Heer; en awwe wegraeken, raeken we weg veur de Heer. Dus awwe now leven of wegraeken, we bin altied van de Heer.

09 Want Christus is wegraekt en weer tot leven kommen om te heersen over de dooien en de levenden.

10 Wie bin jim daj'm een oordiel vellen over jim breur of zuster? Wie bin jim daj'm daelekieken op jim breur of zuster? Wi'j zullen allemaole veur God zien rechterstoel kommen te staon,

11 want d'r stiet schreven: "Zo waor ik leef – zegt de Heer –, veur mi'j zal iedere kni'je him bugen, en iedere tonge zal God loven."

12 Iederiene van oons zal him dus tegenover God verantwoorden moeten.

13 Lao'we mekeer daorom niet langer veroordielen, mar neme jim veur, om jim breur en zuster gien anstoot te geven en heur niet te argeren.

14 Omreden ik iene bin mit de Heer Jezus weet ik, en bin ik d'r wis van, dat niks op himzels onrein is, mar dat wat onrein is veur wie et as onrein beschouwt.

15 Aj'm dus jim breur of zuster kwetsen deur waj'm eten, haandelen jim niet langer overienkomstig de liefde. Laot heur veur wie Christus wegraekt is niet verleuren gaon deur et eten daj'm eten.

16 Breng et goeie dat God jim geft gien schae toe,

17 want et keuninkriek van God is gien zaeke van eten en drinken, mar van gerechtighied, vrede en wille deur de heilige Geest.

18 Wie Christus zo dient, dot wat God wil en wodt deur de meensken respekteerd.

19 Lao'we daorom streven naor wat de vrede bevordert en naor wat opbouwend is veur mekeer.

20 Breek et wark van God niet of omwille van waj'm eten. Weliswaor is alle eten rein, mar et is verkeerd om wat te eten dat iene anstoot geft.

21 Vleis, wien of wat aanders waoran jim breur of zuster anstoot nemt, kuj'm beter staon laoten.

22 Jim overtuging is een angelegenhied tussen jim en God. Gelokkig is wie him niet schuldig vuult over zien overtuging,

23 mar wie twiefelt of hi'j alles wel eten mag, is op et mement dat hi'j alles et al veroordield. Want et komt niet vot uut et geleuf, en alles wat niet uut et geleuf votkomt is zundig.

Romeinen 15.

01 Wi'j, de starken, moe'n de zwakken in heur kwetsberhied helpen en niet oons eigen belang dienen.

02 Laot iederiene van oons him richten op et belang van de aander, op wat goed en opbouwend veur him is.

03 Ok Christus zocht niet zien eigen belang; starker nog, d'r stiet schreven: "De belediging van wie jow smadet, is op mi'j daelekommen."

04 Alles wat vroeger schreven is, is schreven om oons te onderwiezen, zodat wi'j deur te volhadden en deur troost te putten uut de Schriften hopen blieven zollen.

05 Mag God, die oons volhadden dot en oons troost geft, jim de iensgezindhied geven die Christus Jezus van oons vragt.

06 Dan zullen jim iendrachtig en ienstemmig lof brengen an de God en Heit van oonze Heer Jezus Christus.

07 Anvere mekeer daorom tot ere van God, zoas Christus jim anveerd het.

08 Ik bedoele dit: Christus is een knecht van de Joden wodden om heur te tonen dat God trouw is en om de beloften an de aartsvaders te vervullen,

09 mar hi'j is ok kommen om de heidenen in staot te stellen om God te loven om zien baarmhattighied, zoas schreven stiet: "Daorom zal ik jim priezen onder de heidenen, psalmzingen tot ere van jow naeme."

10 En veerder stiet d'r: "Verheuge jim, heidenen, saemen mit zien volk."

11 En d'r stiet ok: "Eer de Heer, alle heidenen; pries him, alle volken."

12 En veerder zegt Jesaja: "Isaï zal een telg votbrengen: hi'j die komt om over de heidenen te heersen; op him zullen zi'j heur hope vestigen."

13 Mag God, die oons hope geft, jim in et geleuf gehiel en al vervullen mit vreugde en vrede, zodat jim hope overvloedig wezen zal deur de kracht van de heilige Geest.

Reisplannen en groetnis.

14 Breurs en zusters, ikzels bin d'r wis van dat jim inderdaod niks as et goeie willen en dat et jim niet an kennis ontbrekt, zodat jim ok in staot binnen om mekeer terechte te wiezen.

15 Ik hebbe jim hier en daor nogal vri'jmoedig schreven, mar allienig om jim te heugen an wat jim al weten. Ik doe dat vanwegens de genaode die God mi'j geven het:

16 ik moet in volledige toewijding an zien evangelie een knecht van Christus Jezus veur de heidenen wezen, zodat zi'j een God welgevallig offer wodden kunnen, heiligd deur de heilige Geest.

17 Dat ik groots wezen kan op mien wark veur God, daank ik an Christus Jezus.

18 Ik zal over niks aanders praoten as wat Christus deur mi'j tot staand brengt om de heidenen tot geheurzemhied te brengen: deur wat ik zegge en doe,

19 deur zien macht waormit ik tekens en wonderen doe deur de macht van God zien Geest. Zo he'k vanuut Jeruzalem en hielendal tot an Illyrië toe, et evangelie van Christus verspreided,

20 mar ik hebbe d'r een ere in steld om et niet op plakken uut te dregen waor Christus al bekend was. Ik wol niet op et follement van een aander bouwen,

21 want d'r stiet schreven: "Zi'j, an wie hi'j niet verkondigd is, zullen kieken; zi'j die niet over him heurd hebben, zullen tot inzicht kommen."

22 Et is dan ok om disse reden dat et mi'j nog niet lokt is om jim te bezuken.

23 Mar ik hebbe mien opdracht in disse streken now beaendigd; en omreden ik d'r zo naor guntere om nao al die jaoren naor jim toe te kommen,

24 hoop ik dat te doen as ik naor Spanje gao. Ik hope jim op weg daorhenne te treffen om mien reize daornao mit jim hulpe vot te zetten, mar niet veurdat ik een posien van jim gezelschop geneuten hebbe.

25 Mar now stao ik op et punt om naor Jeruzalem te gaon om de heiligen daor bi'jstaand te verlienen,

26 want Macedonië en Achaje hebben veur de aarme meensken onder heur een kollekte hullen.

27 Zi'j hebben daortoe vri'jwillig besleuten, mar ze staon dan ok bi'j heur in de schuld. Ommes, omreden de heidenen pat kregen hebben an wat de heiligen in Jeruzalem in geestelik opzicht geven hebben, bin zi'j d'r toe verplicht heur te helpen in materiële zaeken.

28 Naodat ik mi'j van disse opdracht kweten hebbe, en de opbrengst van de kollekte officieel an heur overhaandigd hebbe, zal ik jim op deurreize naor Spanje bezuken.

29 En ik weet dat as ik komme, ik mit de volle zegen van Christus komme.

30 Breurs en zusters, in de naeme van oonze Heer Jezus Christus en mit een beroep op de liefde van de Geest, vraog ik jim dringend om saemen mit mi'j vurig tot God te bidden.

31 Bidde veur mi'j dat ik redded wodden zal van de ongeleuvigen in Judea en dat mien hulpe deur de heiligen in Jeruzalem wardeerd wodden zal.

32 Dan kan ik, as God et wil, vol bliedschop naor jim toe kommen om in jim gezelschop ni'je kracht op te doen.

33 De God van de vrede is mit jim allemaole. Amen.

Romeinen 16.

01 Ik beveel oonze zuster Febe bi'j jim an, die in dienst stiet van de gemiente in Kenchreeën.

02 Ontvang heur in de naeme van de Heer, op een wieze die bi'j de heiligen past. En help heur as zi'j jim hulpe argens veur neudig het, want zi'j is pattie tot steun west, mi'j ok.

03 Groet Prisca en Aquila, mien mitwarkers in de dienst an Christus Jezus,

04 die veur mi'j heur leven op et spel zet hebben. Niet allienig bin ik heur daankber, mar alle gemienten van de heidenen ok.

05 Groet ok de gemiente die bi'j heur in huus saemenkommen. Groet mien geliefde Epenetus, die as eerste in Asia tot et geleuf in Christus kommen is.

06 Groet Maria, die een protte muuite veur jim daon het.

07 Groet Andronikus en Junia, mien volksgenoten die mit mi'j in de gevangenis zeten hebben, die as apostels een protte anzien genieten en die eerder as ik, iene mit Christus wodden binnen.

08 Groet mien geliefde Ampliatus, die in de Heer geleuft.

09 Groet Urbanus, oonze mitwarker in de dienst an Christus, en groet mien geliefde Stachys.

10 Groet Apelles, wie zien trouw an Christus uutperbeerd is. Groet de huusgenoten van Aristobulus.

11 Groet Herodion, mien volksgenoot. Groet de huusgenoten van Narcissus die in de Heer geleuven.

12 Groet Tryfena en Tryfosa, die heur inspand hebben veur de dienst an de Heer. Groet oonze geliefde Persis, ok zi'j het heur inspand veur de dienst an de Heer.

13 Groet Rufus, die deur de Heer uutkeuzen is, en zien moeke, die ok veur mi'j een moeke is.

14 Groet Asynkritus, Flegon, Hermes, Patrobas, Hermas en de breurs en zusters die bi'j heur saemenkommen.

15 Groet Filologus en Julia, Nereus en zien zuster, en Olympas en alle heiligen die bi'j heur saemenkommen.

16 Groet mekeer mit een heilige tuut. Alle gemienten van Christus laoten jim groeten.

17 Ik vieter jim an, breurs en zusters, om op te passen veur degenen die twiedracht zi'jen en aanderen in de weg staon, en die daormit ingaon tegen alles wat jim leerd hebben. Gao heur uut de weg,

18 want zokke meensken dienen Christus, oonze Heer niet, mar allienig heur eigen lusten, en deur fraaie en welludende woorden misleiden zi'j argeloze meensken.

19 Jim geheurzemhied is rondomme bekend wodden; ik bin dus vol bliedschop over jim en zol graeg zien daj'm de wieshied hebben om et goeie te doen en daj'm staandholen tegen et kwaod.

20 De God van de vrede zal Saotan now gauw vertrappen en an jim onderwarpen. De genaode van oonze Heer Jezus is mit jim.

21 Timoteüs, mien mitwarker, lat jim groeten, krek as Lucius, Jason en Sosipatrus, mien volksgenoten.

22 En ok ik, Tertius, die disse brief opschreven hebbe, groet jim as iene die in de Heer mit jim verbunnen is.

23 Gajus, die mien gastheer is en die zien huus veur de hiele gemiente eupenstelt, lat jim groeten. Erastus, die de centen van de stad beheert, en mien breur Quartus laoten jim groeten.

25 An him die bi'j machte is om jim kracht te geven, overienkomstig et evangelie van Jezus Christus dat ik zeg, overienkomstig de onthulling van et geheim waorover ieuwenlaank zwegen is,

26 mar dat now eupenbaord is en op bevel van de iewige God deur de geschriften van de profeten bi'j alle volken bekend wodden is om ze tot geheurzemhied en geleuf te brengen –

27 an him, de ienige, alwieze God, komt de ere toe, deur Jezus Christus, tot in iewighied. Amen.