Openbaring 01.
01 Openbaring van Jezus Christus, die hi'j van God kreeg om an de knechten van God zien te laoten wat d'r inkotten gebeuren moet. Hi'j het deur zien engel disse openbaring weten laoten an zien knecht Johannes.
02 Johannes maekt bekend wat God zegd het en waorvan Jezus Christus getuugd het; dit het hi'j allemaole zien.
03 Gelokkig is hi'j wie dit veurleest, en gelokkig bin zi'j die disse profetie anheuren en heur holen an wat hier zegd wodt. Want et is haost zoveer.
An de zeuven gemienten.
04 Van Johannes, an de zeuven gemienten in Asia. Genaode en vrede veur jim, van him die is, die was en die komt, en van de zeuven geesten veur zien troon,
05 en van Jezus Christus, de betrouwbere getuge, de eerste overledene die opni'j tot leven kwam, de heerser over de vosten van de eerde. An him die oons liefhet en oons van oonze zunden bevri'jd het deur zien bloed,
06 die een keuninkriek uut oons vormd het en oons maekt het tot priesters veur God, zien Heit – an him komt de roem toe en de macht, tot in iewighied. Amen.
07 Hi'j komt te midden van de wolken, en dan zal iederiene him zien, ok degenen die him ommebrocht hebben. Alle volken op eerde zullen over him weeklaegen. Ja, amen.
08 "Ik bin de alfa en de omega," zegt God de Heer, "ik bin et die is, die was en die komt, de Almachtige."
09 Ik, Johannes, jim breur, die krek as jim in ellende verkere, mar ok deur Jezus mit jim pat in et keuninkriek en in staandvaastighied – ik was op et eilaand Patmos omreden ik over God praot had en van Jezus getuugd had.
10 Op de dag van de Heer raekte ik buten mi’jzels. Ik heurde aachter mi'j een lude stemme, die klonk as een trompette.
11 en die tegen mi'j zee: 'schrief alles waj' zien in een boek op en stuur dat naor de zeuven gemienten, naor Efeze, Smyrna, Pergamum, Tyatira, Sardes, Filadelfia en Laodicea."
12 Ik dri'jde me omme, om de stemme te zien die tegen mi'j praotte. Doe zag ik zeuven goolden keerzehoolders,
13 en daortussen iene die d'r uutzag as een meenske. Hi'j had kleren an die haost an de grond toe kwammen en had een goolden baand om zien bost.
14 Zien heufd en zien haoren weren wit as witte wolle, ja as sni'j, en zien ogen weren as een vlammend vuur.
15 Zien voeten gloeiden as broons in een ovend. Zien stemme klonk as et geluud van een geweldige waetermassa.
16 In zien rechterhaand had hi'j zeuven steerns en uut zien mond kwam een an twie kaanten sniedend, scharp zwaord. Zien gezichte schitterde as de foeleinige zunne.
17 Doe ik him zag vul ik as dood veur zien voeten daele. Mar hi'j legde zien rechterhaand op mi'j en zee: "Wees mar niet bange. Ik bin de eerste en de laeste.
18 Ik bin degene die leeft; ik was dood, mar ik leef, now en veur altied. Ik hebbe de sleutels van de dood en van et doderiek.
19 Schrief daorom op waj' zien hebben, wat d'r now is en wat hiernao nog gebeuren zal.
20 En dit is de betekenisse van de zeuven steerns diej' in mien rechterhaand zaggen en van de zeuven goolden keerzestaanders: de zeuven steerns bin de engels van de zeuven gemienten, en de zeuven keerzestaanders bin de zeuven gemienten zels.
 
 
Openbaring 02.
01 Schrief an de engel van de gemiente in Efeze: "Dit zegt hi'j die de zeuven steerns in zien rechterhaand hoolt en tussen de zeuven goolden keerzehoolders verblift:
02 Ik weet wat jow doen, hoe jow je inzetten en jow staonde holen, en dat jow kwaod volk niet verdregen. Zo hebben jow meensken die beweren dat zi'j apostels binnen, op de proef steld en as liegebulen ontmaskerd.
03 Jow bin staandvaastig en hebben een protte verdreugen omwille van mien naeme, zonder te versloppen.
04 Mar dit he'k tegen jow: jow hebben de liefde van vroeger opgeven.
05 Bedaenk es van welke hoogte jow valen binnen. Breek es mit et leven dat jow now leiden en doe weer as eerst. Aanders kom ik naor jow toe en neem ik, as jow gien berouw tonen, de keerzehoolder van zien plak.
06 Et pleit trouwes veur jow dat jow krek as ik, et wark van de Nikolaïeten slim minaachten.
07 Wie oren het, moet heuren wat de Geest tegen de gemienten zegt. Wie overwint za'k eten laoten van de levensboom die in God zien parredies staot."
08 Schrief an de engel van de gemiente in Smyrna: "Dit zegt hi'j die de eerste en de laeste is, die dood was en now leeft:
09 Ik weet van de ellende en de aarmoede waorin jow verkeren, hoewel jow riek binnen. Ik weet hoe jow belasterd wodden deur meensken die heur te onrechte Joden numen, wiels zi'j bi'j de Saotan heuren.
10 Wees niet bange veur wat jow nog te waachten staot. Goenend van jim zullen in de gevangenis gooid wodden deur de duvel, en zo op de proef steld wodden; tien daegen laank zullen jow et zwaor te verduren hebben. Wees trouw tot in de dood, dan zal ik jow as lauwerkraans et leven geven.
11 Wie oren het, moet heuren wat de Geest tegen de gemienten zegt. Wie overwint zal van de twiede dood gien schae ondervienen."
12 Schrief an de engel van de gemiente in Pergamum: "Dit zegt hi'j die et an twie kaanten sniedende, scharpe zwaord het:
13 Ik weet waor jow wonen, naemelik waor Saotan zien troon staot. Jow bin mien naeme trouw bleven en hebben jow geleuf in mi'j niet verloochend, ok niet doe Antipas, mien betrouwbere getuge, ommebrocht wodde in jow stad, waor ok Saotan woont.
14 Mar inkelde dingen he'k tegen jim: goenend holen vaaste an de leer van Bileam, die Balak weten leut hoe hi'j veur de Israëlieten een valle opzetten mos, waordeur zi'j ofgode-offers eten gaon zollen en ontucht plegen zollen.
15 Zo is et ok bi'j jim: goenend holen op dezelde meniere vaaste an de leer van de Nikolaïeten.
16 Breek toch mit et leven dat jim now leiden. Aanders kom ik inkotten naor jim toe en dan za'k jim mit et zwaord uut mien mond bestrieden.
17 Wie oren het, moet heuren wat de Geest tegen de gemienten zegt. Wie overwint za'k van et wegstopte manna geven, en ok een wit stientien waorop een ni'je naeme staot die gieniene kent, behalven degene die et krigt."
18 Schrief an de engel van de gemiente in Tyatira: "Dit zegt de Zeune van God, die ogen het as vlammend vuur en voeten as broons:
19 Ik weet wat jow doen, hoe liefdevol, geleuvig, behulpzem en staandvaastig jow binnen; jow doen now alderdeegst meer dan vroeger.
20 Mar dit he'k tegen jow: jow laoten die Izebel, die heurzels profete nuumt, heur gaank gaon wiels zi'j mien knechten mit heur uutspraoken tot ontucht en et eten van ofgode-offers verleided.
21 En hoewel ik heur de tied geven hebbe om te breken mit et leven dat zi'j leided, weigert ze heur ontuchtige gedregings op te geven.
22 Ik zal heur ziek maeken en heur die overspel mit heur plegen in diepe ellende stotten, of ze moe'n mit heur breken;
23 heur kiender za'k doodgaon laoten an een dodelike ziekte. Laot elke gemiente begriepen dat ik et bin die hatte en ziel van de meenske deurgrondt en dat ik elk van jim, loon naor warken geven zal.
24 Tegen de rest van jim in Tyatira, al degenen die heur leer niet anhangen en die heur niet verdiept hebben in de zonuumde verburgenheden van Saotan, zeg ik: "Ik leg mar iene last op:
25 blief trouw an wat jim hebben, totdat ik komme."
26 Wie overwint en mit mi'j mitgaot tot et aende, zal ik macht geven over alle volken.
27 Mit een iezeren hedderstaf zal hi'j heur huden, as diggelgoed wodden ze stokkensmeten.
28 Ik geef him macht, zoas mien Heit die an mi'j geven het. En ik zal him ok de morgensteern geven.
29 Wie oren het, moet heuren wat de Geest tegen de gemienten zegt."
 
 
Openbaring 03.
01 Schrief an de engel van de gemiente in Sardes: "Dit zegt hi'j die de zeuven geesten van God en de zeuven steerns het: Ik weet wat jow doen, hoe rondomme beweerd wodt dat jow et leven hebben, wiels jow dood binnen.
02 Eupen jow ogen, verstark jow laeste krachten: jow bin op starven nao dood. Want ik marke dat jow gedregings tekotschieten in God zien ogen.
03 Herinnere jow dat jow de bosschop kregen en begrepen hebben. Hool d'r an vaaste en breek mit et leven dat jow now leiden. Mar as jow dreumen blieven, kom ik onverwaachs as een dief, op een tied die jow niet verwaachten.
04 D'r bin mar weinig meensken in Sardes die heur kleren hemmel hullen hebben. Zi'j zullen bi'j mi'j in witte kleren wezen, want dat verdienen ze.
05 Wie overwint zal him ok in et wit klieden. Ik zal zien naeme niet uut et boek van et leven schrabben, mar juust veur him getugen te overstaon van mien Heit en zien engels.
06 Wie oren het, moet heuren wat de Geest tegen de gemienten zegt."
07 Schrief an de engel van de gemiente in Filadelfia: "Dit zegt hi'j die heilig en betrouwber is, die de sleutel van David het - wat hi'j eupen dot, kan gieniene dichtedoen, wat hi'j dichte dot, kan gieniene eupenmaeken:
08 Ik weet wat jow doen. Ik hebbe d'r veur zorgd dat de deure veur jow eupen staot, zonder dat iene die dichte doen kan. Want ok al hebben jow weinig invloed, jow bin trouw bleven an wat ik zegd hebbe en hebben mien naeme niet ontkend.
09 Ik zal meensken bi'j de Saotan weg kommen laoten, die heur te onrechte Joden numen (liegebulen bin et!), en zi'j zullen heur eerbiedig an jow voeten daeleleggen en erkennen dat ik jow liefhad hebbe.
10 Omreden jow trouw bleven binnen an mien gebod om staand te holen, zal ik jow ok trouw wezen as inkotten de tied van bepruving komt, as hiel de eerde en heur bewoners op de proef steld wodden.
11 Ik komme al gauw. Hool vaaste an wat jow hebben, dan zal gieniene jow de lauwerkraans ofnemen kunnen.
12 Wie overwint maek ik tot een pilaor in de tempel van mien God. Daor zal hi'j veur altied staon blieven. Ik zal op him de naeme schrieven van mien God en van de stad van mien God, et ni'je Jeruzalem dat bi'j mien God weg uut de hemel daelekommen zal, en ok mien eigen ni'je naeme.
13 Wie oren het, moet heuren wat de Geest tegen de gemienten zegt."
14 Schrief an de engel van de gemiente in Laodicea: "Dit zegt Amen, de trouwe en
betrouwbere getuge, et begin van God zien schepping:
15 Ik weet wat jow doen, hoe jow niet koold en niet waarm binnen. Weren jow mar koold of waarm!
16 Mar now jow li'j binnen in plak van waarm of koold, zal ik jow uutspi'jen.
17 Jow zeggen dat jow riek binnen, dat jow alles hebben wat jow willen en niks meer vanneuden hebben. Jow beseffen niet hoe ongelokkig jow binnen, hoe aarmzalig, berooid, bliend en naekend.
18 Daorom raode ik jow an: koop van mi'j goold dat in et vuur louterd is, en jow zullen riek wezen; witte kleren, om jow te klieden en jow blote huud te bedekken, zodat jow jow niet meer schaemen hoeven; zalve veur jow ogen, zodat jow weer zien kunnen.
19 Iederiene waor ik wies mit bin wies ik terechte en bestraf ik. Zet jow dus volledig in en breek mit et leven dat jow now leiden.
20 Ik stao veur de deure en klop an. As iene mien stemme heurt en de deure eupendot, zal ik d'r in kommen, en we zullen een vriendemaol holen.
21 Wie overwint zal tegere mit mi'j op mien troon zitten, krek zoa’k zels overwunnen hebbe en tegere mit mien Heit op zien troon zit.
22 Wie oren het, moet heuren wat de Geest tegen de gemienten zegt."
 
 
Openbaring 04.
Anbidding van God en van et laom.
01 Hiernao had ik een dreum. D'r ston een deure eupen in de hemel. De stemme die mi'j eerder toespreuken had mit et geluud van een trompette, zee now: "Kom hierboven, dan laot ik je zien wat d'r hiernao gebeuren moet."
02 Op dat stuit raekte ik in buten mi’jzels. D'r ston een troon in de hemel en daor zat iene op.
03 Degene die daor zat had een uterlik as dat van jaspis en sarder, en om de troon henne was een regenboge die d'r uutzag as smaragd.
04 Om de troon henne stonnen vierentwintig aandere tronen, waorop vierentwintig ooldsten zatten. Zi'j hadden witte kleren an en hadden een goolden kraanze op heur heufd.
05 Van de troon gongen bliksemschichten uut en donderslaegen en een protte kebaol. Veur de troon braanden zeuven vurige fakkels; dat bin de zeuven geesten van God.
06 Ok lag d'r wat veur de troon dat leek op een zee van glas, van kristal. Midden veur de troon en d'r omhenne weren vier vremde wezens, die van veuren en van aachteren ien en al oge weren.
07 Et eerste wezen zag d'r uut as een leeuw en et twiede as een jonge bolle; et dadde had een gezichte as een meenske en et vierde leek wel een vliegende aorend.
08 Elk van de vier wezens had zes vleugels, mit rondomme ogen an de randen en an de binnerkaante. Dag en naacht bleven zi'j mar herhaelen: "Heilig, heilig, heilig is God de Heer, de Almachtige, die was, die is en die komt."
09 Iederkeer as die wezens lof, ere en daank brengen an degene die op de troon zit en tot in iewighied leeft,
10 bugen de vierentwintig ooldsten heur daele veur him die op de troon zit, en anbidden him die leeft tot in iewighied, en leggen heur kraanzen veur zien troon, mit de woorden:
11 "Alle lof, ere en macht kommen jow toe, Heer oonze God, want jow hebben alles maekt: jow wil is de oorsprong van alles wat d'r is."
 
 
Openbaring 05.
01 Doe zag ik dit: degene die op de troon zat had in zien rechterhaand een boekerolle die an beide kaanten beschreven was en mit zeuven zegels verzegeld was.
02 Ik zag een machtige engel die mit lude stemme zee: "Wie komt et toe om de zegels te verbreken en om de boekerolle eupen te slaon?"
03 Mar d'r was gieniene in de hemel of op eerde of onder de eerde die de boekerolle eupenslaon en inkieken kon.
04 Et dee mi'j zeer dat bliekber gieniene et verdiende om de boekerolle eupen te slaon en heur in te zien.
05 Doe zee iene van de ooldsten tegen mi'j: "Wees mar niet verdrietig. Want de leeuw uut de stamme van Juda, de telg van David, het de overwinning haeld, en daorom mag hi'j de boekerolle mit de zeuven zegels eupenmaeken."
06 Midden veur de troon, tussen de vier wezens en de ooldsten, zag ik een laom staon. Et zag d'r uut asof et slaacht was en et had zeuven hoorns en zeuven ogen; dat bin de zeuven geesten van God die over de hiele wereld uutstuurd binnen.
07 Et laom gong naor degene die op de troon zat en kreeg de boekerolle uut zien rechterhaand.
08 Op etzelde mement gooiden de vier wezens en de vierentwintig ooldsten heur veur et laom op de grond. Elk van heur had een liere en een goolden schaole vol wierook; dat bin de gebeden van de heiligen.
09 En ze begonnen een ni'j vassien te zingen: Jow verdienen et om de boekerolle te kriegen en heur zegels te verbreken. Want jow bin slaacht en mit jow bloed hebben jow veur God meensken kocht uut alle lanen en volken, van elke stamme en tael.
10 Jow hebben veur oonze God uut heur een keuninkriek vormd en heur tot priesters maekt. Zi'j zullen as keunings heersen op eerde.
11 Doe heurde ik et geluud van een groot tal engels rondom de troon, de wezens en de ooldsten; et weren d'r oneindig veule, duzend- en tienduzendtallen.
12 Mit lude stemme reupen zi'j: "Et laom dat slaacht is, komt alle macht, riekdom en wieshied toe, en alle kracht, roem, lof en daank."
13 Elk schepsel in de hemel, op eerde, onder de eerde en in de zee, alles en iederiene heurde ik zeggen: "An him die op de troon zit en an et laom komt de daank, de roem, de lof en de macht toe, tot in de iewighied."
14 De vier wezens zeden doe: "Amen," en de ooldsten gooiden heur in anbidding op de grond.
 
 
Openbaring 06.
De eerste zes zegels.
01 Doe zag ik dit: et laom verbrak iene van de zeuven zegels en ik heurde iene van de vier wezens roepen mit een geluud as een donderslag: "Kom!"
02 Ik zag dit: een wit peerd mit een ruter, die een boge dreug. Hi'j kreeg een zegekraans en trok op as een overwinner, de overwinning integen.
03 Doe et laom et twiede zegel verbrak, heurde ik et twiede wezen zeggen: "Kom!"
04 D'r verscheen een aander, vuurrood peerd. De ruter kreeg de opdracht om de vrede uut de wereld te verdrieven, zodat de meensken mekeer ofslaachten zollen. Hi'j kreeg een groot zwaord.
05 Doe et dadde zegel verbreuken wodde, heurde ik et dadde wezen zeggen: "Kom!" Ik zag dit: een zwat peerd mit een ruter, die een weegschaole in zien haand hul.
06 Te midden van de vier wezens heurde ik zoks as een stemme zeggen: "Een dagloon veur een paantien tarwe en etzelde bedrag veur drie paanties gaste. Mar laot wien en olijfeulie ongemuuid."
07 Doe et vierde zegel verbreuken wodde, heurde ik et vierde wezen zeggen: "Kom!"
08 Doe zag ik een vaelgeel peerd. De ruter hiette Dood, en Doderiek vergezelde him. Zi'j kregen verlof om op een vierde pat van de eerde dood en verdarf te zi'jen, deur middel van et zwaord, hongersnood, dodelike ziekten en wilde dieren.
09 Doe et laom et vuufde zegel verbrak, zag ik an de voete van et alter de zielen van al degenen die slaacht weren omreden zi'j over God praot hadden en vanwegens heur getugenis.
10 Zi'j reupen luud: "Oe heilige en betrouwbere Heer, wanneer zullen jow de meensken op eerde aendelik es straffen en oons bloed op heur wreken?"
11 Ieder van heur kreeg witte kleren. Veerder wodde heur zegd nog een posien geduld te hebben, totdat ok de aandere knechten, heur breurs en zusters die krek as zi'j ommebrocht wodden zollen, heur bi'j heur ansleuten zollen hebben.
12 Ik zag, doe et zesde zegel verbreuken wodde, hoe d'r een zwaore eerdbeving opkwam. De zunne wodde zwat as een rouwklied en de maone wodde bloedrood.
13 De steerns vullen op de eerde, zoas laete viegen die deur een stormwiend van de boom rokt wodden.
14 De hemel scheurde los en ruulde heur as een boekerolle op. Gien barge of eilaand bleef op zien plak.
15 Keunings, machthebbers, legeranvoerders, rieken, blispoters, slaven en vri'je meensken, iederiene perbeerde him te verbargen in grotten en tussen de rotsen in de bargen.
16 Ze reupen de bargen en de rotsen toe: "Val daele op oons! Verschoel oons veur et oge van him die op de troon zit en veur de argernis van et laom!
17 Want now is de grote dag van heur argernis anbreuken, en wie kan die deurstaon?"
 
 
Openbaring 07.
De honderdvierenveertigduizend veur de troon.
01 En doe zag ik vier engels bi'j de vier hoeken van de eerde staon. Zi'j hullen de vier wiendrichtings van de eerde in bedwang, om et veur te wezen, dat d'r een wiend over laand of op zee of deur de bomen wi'jen zol.
02 Ik zag in et oosten een aandere engel opkommen, die et zegel van de levendige God had. De vier engels die de opdracht kregen hadden om schae toe te brengen an et laand en de zee reup hi'j mit lude stemme toe:
03 "Laot et laand en de zee en ok de bomen nog ongemuuid! Eerst moe'n wi'j et zegel van oonze God op et veurheufd van zien knechten zetten."
04 Doe heurde ik een et van heur die et zegel dreugen: honderdvierenveertigduizend in tetaol, ofkomstig uut elke stamme van Israël.
05 Twaelfduzend verzegelden uut de stamme Juda, twaelfduzend uut de stamme Ruben, twaelfduzend uut de stamme Gad,
06 twaelfduzend uut de stamme Aser, twaelfduzend uut de stamme Naftali, twaelfduzend uut de stamme Manasse,
07 twaelfduzend uut de stamme Simeon, twaelfduzend uut de stamme Levi, twaelfduzend uut de stamme Issakar,
08 twaelfduzend uut de stamme Zebulon, twaelfduzend uut de stamme Jozef en te slotte twaelfduzend verzegelden uut de stamme Benjamin.
09 En doe zag ik dit: een hiele grote mennigte, die niet te tellen was, uut alle lanen en volken, van elke stamme en tael. Mit witte kleren an en mit palmtakken in heur haand stonnen ze veur de troon en veur et laom.
10 Ze reupen luud: "De redding komt van oonze God die op de troon zit en van et laom!"
11 Alle engels stonnen om de troon en de ooldsten en de vier wezens henne. Ze beugen heur diepe veur de troon en anbaden God
12 mit de woorden: "Amen! Lof, majesteit en wieshied, daank en eer en macht en kracht kommen oonze God toe, tot in iewighied. Amen."
13 Iene van de ooldsten sprak mi'j an en zee: "Wie bin dat daor in et wit, en waor kommen ze weg?"
14 Ik zee doe: "Jow weten et zels, heer." Hi'j zee tegen mi'j: "Dat bin degenen die uut de grote verschrikkingen kommen binnen. Zi'j hebben heur kleren wit wusken mit et bloed van et laom.
15 Daorom staon ze veur God zien troon en bin ze dag en naacht in zien tempel om him te vereren. En hi'j die op de troon zit zal bi'j heur wonen.
16 Dan zullen ze gien honger en dust meer hebben, de zunne zal heur niet meer stikken, en ze zullen niet bevangen wodden deur de hitte.
17 Want et laom midden veur de troon zal heur huden, heur naor de waeterbronnen van et leven brengen. En God zal al heur traonen dreugen."
 
 
Openbaring 08.
Et zeuvende zegel.
01 Doe et laom et zeuvende zegel verbrak, vul d'r een stilte in de hemel, gedurende omdebi'j een half ure.
02 Ik zag de zeuven engels die veur God zien troon staon. Zi'j kregen alle zeuven een trompette.
03 Doe kwam d'r een aandere engel, die mit een goolden wierookschaole bi'j et alter staon gong. Hi'j kreeg een hiele protte wierook om dat op et goolden alter veur de troon te offeren, tegere mit de gebeden van alle heiligen.
04 De rook van de wierook steeg mit de gebeden van de heiligen uut de haand van de engel op naor God.
05 Doe nam de engel de wierookschaole, dee d'r vuur in van et alter en smeet dat op de eerde. D'r volgden donderslaegen, groot geraos, bliksemschichten en een eerdbeving.
De eerste zes trompetten.
06 De zeuven engels, elk mit een trompette, maekten anstalten om d'r op te blaozen.
07 Doe blaosde de eerste engel op zien trompette. D'r kwam haegel en vuur, mingd mit bloed, en dat wodde op de eerde smeten. Een dadde pat van de eerde braande of, krek as een dadde pat van de bomen en al et gruun.
08 De twiede engel blaosde op zien trompette. En zoks, dat d'r uutzag as een grote barge, waor de vlammen uutsleugen, wodde in zee smeten. Een dadde pat van et waeter wodde bloed,
09 een dadde pat van alle in zee levendige wezens gong dood en een dadde pat van de schippen vergong.
10 De dadde engel blaosde op zien trompette. Uut de hemel vul een grote steern, die zo foel braande as een fakkel. Zi'j vul op een dadde pat van de revieren en op de waeterbronnen.
11 De naeme van die steern was Alsem. Dat dadde pat van et waeter wodde alsem. Een protte meensken overleden deur et waeter dat bitter wodden was.
12 De vierde engel blaosde op zien trompette. Een dadde pat van de zunne, van de maone en van de steerns wodde troffen, waordeur dat pat verduusterd wodde. Een dadde pat van de dag en ok van de naacht was d'r dus gien locht.
13 In mien dreum heurde ik de lude roep van een aorend die hoge in de locht vleug: "Wee! Wee! Wee degenen die op eerde leven! Want doukies klinken de trompetten van de drie engels die nog niet blaozen hebben."
 
 
Openbaring 09.
01 Doe blaosde de vuufde engel op zien trompette. Ik zag een steern die uut de hemel op de eerde valen was. Zi'j kreeg de sleutel van de putte naor de ondereerdse diepte.
02 Zi'j eupende die putte, waoruut rook opsteeg as uut een grote ovend. De zunne en de hemel wodden verduusterd deur de rook uut de putte.
03 Uut de rook kwammen sprinkhaenen daele op de eerde. Zi'j kregen de beschikking over dezelde vermogens as schorpioenen op eerde.
04 Mar, wodde d'r bi'j zegd, ze mossen de plaanten, struken en bomen ongemuuid laoten. Allienig de meensken die niet et zegel van God op heur veurheufd hadden, mochten ze kwaod doen.
05 Ze mochten heur niet ommebrengen, allienig zeer doen, vuuf maonden laank; die meensken zollen piene lieden moeten asof ze deur een schorpioen steuken weren.
06 Dan zullen de meensken de dood zuken, mar him niet vienen. Ze zullen naor de dood langeren, mar de dood vlocht van heur weg.
07 Zo zaggen die sprinkhaenen d'r uut: ze leken op peerden die uutrust weren veur de stried, mit op heur heufd een soort gooldachtige kraanze en mit een gezichte as dat van een meenske.
08 Heur haor was laank as et haor van een vrouw, heur tanen weren as leeuwetanen.
09 Heur bost leek wel een paanser van iezer. Heur vleugels maekten een geluud as et raetelen van talloze waegens op weg naor de stried.
10 Veerder hadden zi'j een stat mit een angel, krek as schorpioenen. Mit die stat konnen ze de meensken kwaod andoen, vuuf maonden laank.
11 Heur keuning is de engel van de ondereerdse diepte; zien naeme is Abaddon in et Hebreeuws, in et Grieks Apollyon, "Vernietiger".
12 Et eerste wee is veurbi'j, mar d'r kommen d'r nog twie!
13 Doe blaosde de zesde engel op zien trompette. Uut de vier hoorns van et goolden alter dat veur God staot, heurde ik een stemme
14 die tegen de zesde engel mit de trompette zee: "Maek de vier engels los die bi'j de grote revier de Eufraat gevangenzitten."
15 De vier engels wodden losmaekt. Zi'j weren klaor om krek op dit ure van disse dag, in disse maond van dit jaor, een dadde pat van de meensken omme te brengen.
16 Et tal bereden troepen – ik heurde hoevule et d'r weren – was tienduzend keer tienduzend.
17 Zo zaggen de peerden en de ruters in et visioen d'r uut: heur bostpaansers weren vuurrood, violet en zwaovelgeel; de peerdeheufden weren as leeuwekoppen, en uut heur bek kwammen vuur, rook en zwaovel.
18 Een dadde pat van de meensken wodde ommebrocht deur disse drie plaogen, et vuur, de rook en de zwaovel die uut heur bek kwammen.
19 Want de kracht van de peerden lag in heur bek en in heur stat. Die statten hadden koppen en leken krek slangen; daormit richtten ze onheil an.
20 Mar de aandere meensken, die disse plaogen overleefden, keerden heur niet of van heur zelsmaekte goden. Ze bleven heur goden anbidden en de bielden van goold, zulver, broons, stien en hoolt, die niet heuren of zien kunnen en heur niet bewegen kunnen.
21 Liekemin brakken zi'j mit heur leven van moord en toverderi'je, van ontucht en diefstal.
 
 
Openbaring 10.
De eupenmaekte boekerolle.
01 Ik zag een aandere machtige engel uut de hemel daelekommen. Een wolke omhulde him en de regenboge was op zien heufd. Zien gezichte was as de zunne en zien bienen weren as pilaren van vuur.
02 Hi'j hul een kleine boekerolle eupensleugen in zien haand. Hi'j zette zien rechtervoete op de zee en zien linker op et laand.
03 Hi'j reup mit een lude stemme, zoas een leeuw brult, en daornao leuten de zeuven donderslaegen heur stemme heuren.
04 Ik wol opschrieven wat zi'j zegd hadden, mar een stemme uut de hemel zee tegen mi'j: "Wat de zeuven donderslaegen zegd hebben, moej' geheimholen. Schrief et niet op."
05 Doe sleug de engel die ik op de zee en op et laand staon zag, zien rechterhaand op naor de hemel.
06 Hi'j zweerde: "Zo waor de Maeker van de hemel en alles wat daorin is, en van de eerde en de zee mit alles wat daor is, tot in iewighied leeft: et is de hoogste tied!
07 Op et stuit dat de zeuvende engel zien trompette klinken laoten zal, zal God zien geheim warkelikhied wodden, zoas hi'j zien knechten, de profeten, beloofd het."
08 Doe heurde ik opni'j die stemme uut de hemel. Hi'j zee tegen mi'j: "Hael de eupenmaekte boekerolle die de engel die op de zee en op et laand staot in zien haand het."
09 Ik gong naor de engel toe en vreug om et boekien. Hi'j riekte et mi'j an en zee: "Eet et op. Et zal branen in je maege, mar in je mond zo zute wezen as hunning."
10 Ik pakte et an en at et op. Et smaekte zute as hunning, mar doe 'k et opeten had, braande et in mien maege.
11 Doe kreeg ik te heuren: "Ie moe'n opni'j over een protte lanen en volken en keunings profeteren."
 
 
Openbaring 11.
De twie getugen.
01 Doe kreeg ik een rietstengel as meetstok, mit de opdracht: "Neem de maoten op van God zien tempel en van et alter, en van goenend die God daor anbidden.
02 Et buterhof van de tempel moej' buten beschouwing laoten. Mete dat niet op, want et is bestemd veur de heidenen, die de heilige stad twieënveertig maonden laank vertrappen zullen.
03 Ik zal mien twie getugen opdracht geven om te profeteren. Ze zullen dat twaelfhonderdzestig daegen doen, mit een boetekleed an.
04 Zi'j bin de twie olijfbomen en de twie keerzehoolders die veur de Heer van de wereld staon.
05 As iene heur kwaod doen wil, komt d'r vuur uut heur mond, dat heur vi'janen verteert; op die meniere zal iederiene die heur schaeden wil, starven moeten.
06 Zi'j hebben de macht om de hemel te sluten, zodat d'r gien regen vaalt zo laank zi'j profeteren. Ok hebben zi'j de macht om waeter in bloed te veraanderen. Veerder kunnen zi'j de eerde treffen mit alle meugelike plaogen, zo vaeke as ze mar willen.
07 As zi'j heur getugenis oflegd hebben, zal et dier dat uut de ondereerdse diepte naor boven komt, de stried mit heur angaon, heur overwinnen en heur ommebrengen.
08 Dan liggen heur lieken op et plein van de grote stad die in figuurlike zin Sodom of Iegypte hiet, de stad waor ok heur Heer krusigd is.
09 Gedurende drieënhalve dag kommen d'r meensken uut alle lanen en volken, van elke stamme en tael, om heur lieken te zien, en zi'j zullen verhinderd wodden om ze te begreven.
10 De meensken op eerde bin bliede om de dood van de twie profeten en slim bliede sturen zi'j mekeer kedo's, want die profeten weren een grote kwelling veur heur west."
11 Mar doe de drieënhalve dag veurbi'j weren, voer een levensgeest uut God in heur en zi'j kwammen weer overaende. Iederiene die heur zag wodde doodsbenauwd.
12 D'r klonk een lude stem uut de hemel, die tegen heur zee: "Kom hierboven." Doe stegen zi'j in de wolken op naor de hemel, veur et oge van heur vi'janen.
13 Op dat stuit kwam d'r een grote eerdbeving, die een tiende pat van de stad verwoestte. Zeuvenduzend meensken kwammen deur de eerdbeving omme, en de rest wodde bange en begon de God van de hemel ere te bewiezen.
14 Et twiede wee is veurbi'j, mar et dadde komt inkotten!
De zeuvende trompette.
15 Doe blaosde de zeuvende engel op zien trompette. In de hemel klonken lude stemmen, die zeden: "Now begint de heerschoppi'je van oonze Heer over de wereld, en die van zien messias. Hi'j zal heersen tot in iewighied."
16 De vierentwintig ooldsten op heur tronen bi'j God beugen heur diepe daele en anbaden God
17 mit de woorden: "Wi'j daanken jow, Heer oonze God, Almachtige, die is en die was, want almachtig in macht nemen jow now et keuningschop op jow.
18 De volken raosden in woede, mar now laoten jow jow woede raozen. De tied is kommen om een oordiel te vellen over de dojen; en om jow knechten, de profeten, te belonen, krek as de heiligen en degenen die, jong en oold, eerbied tonen veur jow naeme; en ok om heur die doende binnen mit de vernietiging van de eerde, now zels te vernietigen."
19 Doe gong God zien tempel in de hemel eupen en wodde de ark van et verbond daor zichtber. D'r kwammen bliksemschichten, groot geraos, donderslaegen, een eerdbeving en zwaore haegel.
 
 
Openbaring 12.
De vrouw, de draek en de twie beesten.
01 D'r was in de hemel een indrokwekkend teken te zien: een vrouw, klieded in de zunne, mit de maone onder heur voeten en een kraanze van twaelf steerns op heur heufd.
02 Zi'j was zwanger en raosde de et uut van piene tiedens de wenen.
03 D'r was een twiede teken te zien in de hemel: een grote, vuurrooie draek, mit zeuven koppen en tien hoorns, en op elke kop een diadeem.
04 Mit zien stat sleepte hi'j een dadde van de steerns an de hemel mit en smeet die op de eerde. De draek gong veur de vrouw staon die op et punt ston om heur kiend te kriegen, om et op te vreten zogauw zi'j bevalen was.
05 Mar doe ze et kiend kregen had – een zeune, die alle volken mit een iezeren hedderstaf huden zol – wodde et votdaolik wegvoerd naor God en zien troon.
06 De vrouw zels vlochtte de woestijn in. God had daor een plak veur heur in odder brocht, waor twaelfhonderdzestig daegen laank veur heur zorgd wodden zol.
07 Doe brak d'r oorlog uut in de hemel. Michaël en zien engels bunnen de stried an mit de draek. De draek en zien engels beuden tegenstand
08 mar wodden versleugen; sund die tied is d'r veur heur in de hemel gien plak meer.
09 De grote draek wodde op de eerde gooid. Hi'j is de slange van vroeger, die Duvel of Saotan nuumd wodt en die de hiele wereld misleided. Tegere mit zien engels wodde hi'j op de eerde gooid.
10 Doe heurde ik een lude stemme in de hemel zeggen: "Now bin de redding, de macht en et keuningschop van oonze God warkelikhied wodden, now het zien messias heerschoppi'je. Want de anklaeger van oonze breurs en zusters, die heur dag en naacht bi'j oonze God anklaegde, is te val brocht.
11 Zi'j hebben him daankzi'j et bloed van et laom en daankzi'j heur getugenis overwunnen. Zi'j weren niet an et leven hecht en hebben heur dood anveerd.
12 Daorom: juich, hemel, en iederiene die daor woont! Mar wee de eerde en de zee: de duvel is naor jim toekommen! Hi'j is poer lelk want hi'j wet dat hi'j gien tied te verliezen het."
13 Doe de draek zag dat hi'j op de eerde smeten was, aachtervolgde hi'j de vrouw die een zeune kregen had.
14 Mar de vrouw kreeg de twie vleugels van de grote aorend om naor heur plak in de woestijn te vliegen, waor gedurende een tied en twie tieden en de helte van een tied veur heur zorgd wodden zol, buten et beriek van de slange.
15 Doe spi'jde de slange een stroom waeter as een revier aachter de vrouw an om heur daorin mit te slepen.
16 Mar de eerde scheut heur te hulpe: de eerde dee heur mond wied eupen en dronk de revier die de draek uutspi'jd had op.
17 Poer op de vrouw gong de draek vot om stried te leveren mit de rest van heur naogeslaacht, mit elkeniene die him an God zien geboden holen hadde en bi'j de getugenis van Jezus bleven was.
18 Hi'j gong op et straand bi'j de zee staon.
 
 
Openbaring 13.
01 Doe zag ik een beest uut de zee kommen. Et had tien hoorns en zeuven koppen; et had een diadeem op elke hoorn en d'r stonnen godslasterlike naemen op zien koppen.
02 Et beest dat ik zag leek op een paanter, mit poten as die van een beer en een bek as de bek van een leeuw. De draek dreug zien kracht en heerschoppi'je en gezag an et beest over.
03 Iene van de koppen van et beest zag d'r uut krek asof hi'j slaacht was; et was een dodelike verwonding, mar de wonde genas. Vol bewondering gong de hiele wereld aachter et beest an.
04 Iederiene anbad de draek, omreden hi'j et beest gezag geven had. Ok et beest zels anbaden ze, mit de woorden: "Wie is d'r an et beest geliek? Wie kan et tegen him opnemen?"
05 Et beest kon zien bek bruken veur grootspraoke en godslasteringen, en dat twieënveertig maonden laank.
06 Et dee zien bek eupen en lasterde God, zien naeme en zien woning en zi'j die in de hemel wonen.
07 Et moch de stried mit de heiligen anbienen en heur overwinnen. Ok kreeg et macht over alle lanen en volken, over meensken van elke stamme en elke tael.
08 Iederiene op eerde zol et beest anbidden, iederiene van wie de naeme niet vanof et begin van de wereld in et boek van et leven staot, et boek van et slaachte laom.
09 Wie oren het, moet heuren.
10 Wie gevangenschop verduren moet, zal in gevangenschop gaon. En wie deur et zwaord starven moet, zal deur et zwaord ommekommen. Hier komt et an op de staandvaastighied en trouw van de heiligen.
11 Doe zag ik een twiede beest, dat omhogens kwam uut de eerde. Et had twie hoorns krek as een laom, en et praotte as een draek.
12 Veur de ogen van et eerste beest oefende et hiel zien macht uut. Et leut de eerde en iederiene die d'r op woonde et eerste beest, dat van zien dodelike verwonding genezen was, anbidden.
13 Et dee indrokwekkende tekens, et leut veur de ogen van de meensken alderdeegst vuur uut de hemel daelekommen op de eerde.
14 Et wus de meensken op eerde te misleiden deur de tekens die et veur de ogen van et eerste beest doen kon. Et dreug heur op een bield te maeken veur et beest dat ondaanks zien stikwonde toch leefde.
15 Et kreeg de macht om dat bield leven in te blaozen, zodat et bield van et beest ok praoten kon en d'r veur zorgen kon dat iederiene die et bield niet anbad, ommebrocht wodden zol.
16 Veerder leut et bi'j alle meensken, jong en oold, riek en aarm, slaaf en vri'je, een markteken zetten op heur rechterhaand of op heur veurheufd.
17 Allienig meensken mit dat teken – dat wil zeggen de naeme van et beest, of et getal van die naeme – konnen wat kopen of verkopen.
18 Hier komt et an op wieshied. Laot elk die inzicht het et getal van et beest ontcijferen; d'r wodt een meenske mit anduded. Et getal is zeshonderdzesenzestig.
 
 
Openbaring 14.
Et laom en de zienen. Et oordiel.
01 Doe zag ik dit: et laom ston op de Sion, en bi'j et laom weren honderdvierenveertigduzend meensken die zien naeme en die van zien Heit op heur veurheufd hadden.
02 Ik heurde uut de hemel een geluud kommen dat klonk as et geluud van geweldige waetermassa's, van zwaore donderslaegen; et klonk as et geluud dat muzikaanten maeken die op de liere speulen.
03 D'r wodde veur de troon en veur de vier wezens en de ooldsten wat zongen dat leek op een ni'j vassien. Gieniene kon et vassien begriepen, behalven de honderdvierenveertigduzend meensken die van de eerde loskocht weren.
04 Dat bin degenen die heur niet mit vrouwluden ofgeven hebben mar maegdelik bleven binnen. Zi'j volgen et laom waor et mar henne gaot. Zi'j bin uut et meensdom loskocht om as een eerste opbrengst anbeuden te wodden an God en an et laom.
05 Gien leugen komt over heur lippen, d'r vaalt niks op heur an te marken.
06 Doe zag ik opni'j een engel, die hoge in de locht vleug. Hi'j had een iewig evangelie, dat hi'j bekend maeken mos an de meensken op eerde, uut alle lanen en volken, van elke stamme en tael.
07 Luud reup hi'j: "Hebbe ontzag veur God en geve him roem, want now is de tied kommen dat hi'j zien oordiel vellen zal. Anbidde him die hemel en eerde, zee en waeterbronnen maekt het."
08 Hi'j wodde volgd deur een twiede engel, die reup: "Valen, valen is Babylon, die grote stad, die deur heur ontucht alle volken de wien van heur wellust drinken laoten het."
09 Zi'j wodden volgd deur een dadde engel, die mit lude stemme reup: "As iene et beest en zien bield anbidt en et markteken op zien veurheufd of zien haand krigt,
10 zal hi'j de wien van God zien woede drinken moeten, die niet verdund in de beker van zien argernis inschonken is. Hi'j zal in vuur en zwaovel zeer daon wodden, onder de ogen van de heilige engels en van et laom.
11 De rook van die piene zal opstiegen tot in iewighied. Wie et beest en zien bield anbidden, of wie et markteken van zien naeme dreegt, zi'j kriegen gien rust, daegs niet en naachs niet."
12 Hier komt et an op de staandvaastighied van de heiligen, die heur holen an God zien geboden en an de trouw van Jezus.
13 Ik heurde een stemme uut de hemel zeggen: schrief op: "Gelokkig bin zi'j die vanof now in verbunnenhied mit de Heer starven." En de Geest zegde toe: "Zi'j meugen rusten van heur inspannings. Want heur daoden bin mit heur."
14 Doe zag ik dit: een witte wolke, en daor zat iene op die d'r uutzag as een meenske. Hi'j had een goolden kraanze op zien heufd en een scharpe sikkel in zien haand.
15 Uut de tempel kwam een aandere engel die him, die op de wolke zat mit lude stemme toereup: "Laot jow sikkel kommen om te oogsten. Want de tied om te oogsten is kommen; de eerde is meer dan riepe veur de oogst."
16 Doe gooide degene die op de wolke zat zien sikkel op de eerde, en de eerde wodde oogst.
17 D'r kwam een aandere engel uut de hemelse tempel, die ok zoe'n scharpe sikkel had.
18 Bi'j et alter weg kwam weer een aandere engel, degene die zeggenschop het over et vuur. Hi'j reup de engel mit de scharpe sikkel luud toe: "Laot je scharpe sikkel kommen om de droeven te oogsten in de wiengaorde op de eerde, want de droeven bin riepe."
19 Doe gooide de engel zien sikkel op de eerde, en hi'j oogstte de droeven in de wiengaorde op de eerde en gooide ze in de grote passetonne van God zien woede.
20 De wienpasse wodde buten de stad brocht. D'r kwam een grote stroom bloed uut, zestienhonderd staodies laank en zo hoge as et bit bi'j een peerd.
 
 
Openbaring 15.
De zeuven offerschaolen.
01 Ik zag in de hemel opni'j een indrokwekkend, wonderbaorlik teken: et weren zeuven engels mit de zeuven laeste plaogen, waormit an God zien woede een aende komt.
02 Doe zag ik wat as een zee van glas, mingd mit vuur. Op de glaezen zee stonnen zi'j die et beest, zien bield en zien naeme in ciefers overwunnen hadden. Ze hadden lieren om daorop veur God te speulen.
03 Ze zetten et vassien van God zien knecht Mozes en et vassien van et laom in: Groot en wonderbaorlik bin jow daoden, Heer oonze God, Almachtige, rechtveerdig en betrouwber is jow bestuur, vost van de volken.
04 Wie zol jow, Heer, niet vereren, jow naeme niet loven? Wie is heilig dan jow allienig? Alle volken zullen kommen en heur in anbidding veur jow daeleleggen, want jow rechtveerdige daoden bin eupenbaord.
05 Doe zag ik de hemelse tempel, de verbondstente, eupengaon.
06 De zeuven engels mit de zeuven plaogen kwammen naor buten, in straolende kleren van zuver linnen en mit een goolden baand om heur bost.
07 Doe gaf iene van de vier wezens an alle zeuven engels een goolden offerschaole, vol mit de woede van de God die leeft tot in iewighied.
08 God zien anwezigens en kracht vulden de tempel mit rook. Gieniene kon de tempel binnengaon veurdat an de zeuven plaogen van de zeuven engels een aende kommen was.
 
 
Openbaring 16.
01 Doe heurde ik een lude stemme uut de tempel kommen die tegen de zeuven engels zee: "Gao now! Giete de zeuven offerschaolen mit God zien woede leeg op de eerde!"
02 De eerste engel gong vot en geut zien offerschaole over de eerde leeg. Alle meensken die et markteken van et beest dreugen en zien bield anbaden, kregen kwaodaorige en pienlike zwulderi'je.
03 De twiede engel geut zien offerschaole over de zee leeg. Et waeter wodde bloed, as et bloed van een dooie, en alle wezens die in zee leefden kwammen om.
04 De dadde engel geut zien offerschaole leeg over revieren en waeterbronnen, en et waeter wodde bloed.
05 Ik heurde de engel van al et waeter zeggen: "Rechtveerdig bin jow, de heilige, die is en die was, omreden jow op disse meniere straffen.
06 Bloed van heiligen en profeten hebben zi'j vergeuten, en bloed laoten jow heur drinken. Zi'j hebben et verdiend."
07 Ik heurde et alter doe zeggen: "Ja, Heer oonze God, Almachtige, jow oordielen bin betrouwber en rechtveerdig."
08 De vierde engel geut zien offerschaole leeg over de zunne, waordeur zi'j de meensken kon verbranen mit heur vuur.
09 De grote hitte verzengde de meensken en ze lasterden de naeme van God, die macht het over disse plaogen. Zi'j toonden gien berouw en bewezen him gien ere.
10 De vuufde engel geut zien offerschaole leeg over de troon van et beest. Zien riek wodde in duusternis zet. De meensken beten op heur tonge van de piene.
11 Zi'j lasterden de God van de hemel, vanwegens heur piene en heur zwölderi'je, en ze brakken niet mit et leven dat ze leidden.
12 De zesde engel geut zien offerschaole leeg over de grote revier de Eufraat. De revier vul dreuge en maekte de weg vri'j veur de keunings uut et oosten.
13 Doe zag ik dat uut de bek van de draek, uut de bek van et beest en uut de mond van de leugenprofeet drie onzuvere geesten teveurschien kwammen in de vorm van kikkers.
14 Dat bin duvelse geesten die meneuvels maeken en op struun gaon om alle keunings op eerde bi'jmekeer te brengen veur de stried op de grote dag van de almachtige God.
15 "Ik kom onverwaachs, as een dief!" Gelokkig is wie zien ogen eupenhoolt en zien kleren in odder het: hi'j hoeft niet naekend rond te lopen en him veur iederiene te schaemen.
16 Ze brochten heur bi'jmekeer op et plak dat in et Hebreeuws Harmagedon hiet.
17 De zeuvende engel geut zien offerschaole leeg over de locht. Doe klonk d'r uut de tempel een lude stemme van de troon die uutreup: "Et is veurbi'j!"
18 D'r volgden bliksemschichten en groot geraos en donderslaegen. D'r kwam een zwaore eerdbeving, zo zwaor as nog niet eerder veurkommen was zolange as d'r meensken op eerde leefden; verschrikkelik was die eerdbeving.
19 De grote stad vul in drie stokken uutmekere en de steden van alle volken wodden verwoest. Et grote Babylon mos et ontgellen: God gaf et de beker mit de wien van zien hevige woede.
20 Alle eilanen verdwenen in et niks en van de bargen was gien spoor meer te vienen.
21 Uut de hemel haegelde et loodzwaore iesklompen op de meensken, en de meensken lasterden God vanwegens de plaoge van die haegel, want et was een vreselike plaoge.
 
 
Openbaring 17.
Et oordiel over Babylon.
01 Iene van de zeuven engels mit de offerschaolen kwam op mi'j toe en zee: "Ik wil je zien laoten hoe de grote hoer die an een protte waeterstromen zit, veroordield wodt.
02 De keunings op eerde hebben ontucht mit heur pleegd, en de meensken op eerde hebben heur bedronken an de wien van heur ontucht."
03 Hi'j nam mi'j in vervoering mit naor de woestijn. Ik zag een vrouw zitten op een scharlaekenrood beest vol godslasterlike naemen, mit zeuven koppen en tien hoorns.
04 Zi'j dreug purperen en scharlaekenrooie kleren en goolden sieraoden, edelstienen en parels. In heur haand had ze een goolden beker vol gruwelikheden, al heur liederlike wandaoden,
05 en op heur veurheufd ston een naeme mit een geheime betekenisse: "Et grote Babylon, moeke van alle hoeren en van alle gruwelikheden van de wereld."
06 Ik zag dat de vrouw dronkend was van et bloed van de heiligen en et bloed van heur die van Jezus getuugd hadden. Ik was veraldereerd doe ik heur zag.
07 Doe zee de engel: "Waorom bi'j' zo veraldereerd? Ik za’j’ de betekenis zeggen van die vrouw en et beest waor ze op zit, mit zien zeuven koppen en tien hoorns.
08 Et beest daj' zaggen, was, en is niet; et stiegt bi'jkotten op uut de ondereerdse diepte, en zal vernietigd wodden. Iederiene op eerde van wie de naeme niet vanof et begin van de wereld in et boek van et leven staot, zal vol bewondering wezen bi'j et zien van et beest, omreden et was, niet is, en toch ok weer wezen zal."
09 Hier komt et an op wieshied en inzicht. "De zeuven koppen bin zeuven heuvels waorop de vrouw zit, en et bin zeuven keunings.
10 Vuuf van heur bin ommekommen, iene is d'r now, en de laeste moet nog kommen en zal dan mar kot blieven.
11 Et beest dat was, en niet is, is zels de achtste keuning, al is et iene van de zeuven, en et zal vernietigd wodden.
12 De tien hoorns die aj' zaggen bin tien keunings die now nog gien keuning binnen, mar dommiet tegere mit et beest veur ien ure keuninklike macht kriegen zullen.
13 Zi'j hebben allemaole etzelde doel veur ogen en dregen heur macht en gezag over an et beest.
14 Zi'j bienen de stried an mit et laom, mar et laom zal heur overwinnen. Want et laom is de hoogste heer en keuning, en wie him toebeheuren, wie reupen binnen en uutkeuzen, die bin trouw.
15 De waeterstromen die aj' zaggen," zee de engel, "waor de hoer an zit, bin een protte lanen, volken en stammen.
16 De tien hoorns die aj' zaggen en et beest zels zullen een hekel an de hoer kriegen en ze zullen heur naor de barrebiesies helpen. Ze zullen heur uut de kleren helpen, heur vleis eten en heur in braand stikken.
17 Want God het heur d'r toe aangezet om zien plan uut te voeren, zodat ze allemaole mit etzelde doel veur ogen heur macht an et beest overdregen, tot wat God zegd het warkelikhied wodt.
18 De vrouw die aj' zaggen is de grote stad, die heerst over de keunings op eerde."
 
 
Openbaring 18.
01 Hiernao zag ik een aandere engel uut de hemel daelekommen. Hi'j had groot gezag en zien luuster verlochtte de eerde.
02 Mit een krachtige stemme reup hi'j: "Valen, valen is Babylon, die grote stad! Zi'j is een woonstee veur duvels wodden, zi'j geft onderdak an elke onzuvere geest, elke onzuvere voegel en elk onzuver, verschrikkelik dier.
03 Alle volken hebben deur heur ontucht de wien van heur wellust dronken, de keunings op eerde hebben ontucht mit heur pleegd en de haandelers op eerde bin van heur overvloedige weelde riek wodden."
04 Doe heurde ik een aandere stemme uut de hemel zeggen: "Gao weg uut die stad, mien volk, zodaj' gien pat hebben an heur zunden en ontkom an de plaogen die heur treffen zullen.
05 Want heur zunden rieken tot an de hemel en God zal heur onrecht vergellen.
06 Doe mit heur wat zi'j mit aanderen dee, ja laot heur dubbel boeten. Laot heur et dubbele drinken uut de beker waoruut zi'j aanderen te drinken gaf.
07 Geef heur krek zo vule piene en leed te dregen as zi'j heur luuster en overvloed gund het. Zi'j zegt bi'j heurzels: "Ik zitte hier as een keuninginne, niet as een aarme wedevrouw. Mi'j zal niks overkommen!"
08 Daorom zullen alle plaogen heur op iene dag treffen: dodelike ziekte, leed en hongersnood, en ze zal in braand steuken wodden. Want God de Heer, die dat vonnis veld het, is machtig.
09 De keunings op eerde, die ontucht mit heur pleegd hebben en in weelde leefd hebben, zullen om heur jammeren en treuren as ze de rook boven heur opstiegen zien.
10 Zi'j blieven op een ofstaand, ontzet deur de straf die zi'j krigt, en zeggen: "Wee! Wee Babylon, grote, starke stad! In iene ure tied is je vonnis voltrokken!"
11 De haandelers op eerde treuren en rouwen om heur, want d'r is gieniene die heur haandel nog kopen wil:
12 goold en zulver, edelstienen en parels, linnen, purperen stoffen, ziede, scharlaeken stoffen, cipressehoolt, verschillende veurwarpen van ivoor en van dure hooltsoorten, van broons, iezer en marmer,
13 keneel en kardemom, roekersgoed en balsem, wierook, wien en olijfeulie, mael en tarwe, runder en schaopen, peerden en waegens, slaven en knechten.
14 Verleuren bin de vruchten waor je hatte naor uutgong, verdwenen al je riekdom, alle weelde – dat alles is veurgoed veurbi'j.
15 De meensken die hierin haandelden en die heur riekdom an heur te daanken hebben, blieven op een ofstaand, veraldereerd deur de straf die zi'j krigt. Ze treuren en rouwen om heur
16 en zeggen: "Wee! Wee grote stad! Ie dreugen linnen, purperen en scharlaekenrooie kleren, en goolden sieraoden, edelstienen en parels.
17 Mar in ién ure tied is hiel je grote riekdom om ziepe hulpen." Alle stuurlu, iederiene die op Babylon vaort, et schippersvolk en alle aanderen die op zee warken, bleven op een ofstaand
18 en reupen doe zi'j de rook boven heur opstiegen zaggen: "Welke stad is d'r an die grote stad geliek?"
19 Ze stri'jden stof op heur heufd, treurden en rouwden, en reupen: "Wee! Wee grote stad! Iederiene die schippen op zee had, daankte zien riekdom an heur schatten. Mar in ién ure tied is zi'j hielendal kepot maekt."
20 Juich om heur, hemel, juich heiligen, apostels en profeten! Et vonnis dat zi'j jim toebedacht had, het God an heur voltrokken."
21 Doe tilde een starke engel een stien zo groot as een meulestien op en gooide die in de zee mit de woorden: "Mit krek zoe'n zwieper zal Babylon, de grote stad wegsmeten wodden; ze zal veurgoed verdwienen.
22 Et geluud van liere en zang, trompette en fluite zal in jow veurgoed verstommen, de bedrievighied van elk ambacht zal in jow veurgoed stillevalen. Et geluud van de meule zal nooit meer in je klinken,
23 et locht van de laampe nooit meer in je schienen. Et feestkebaol rond bruid en bruidegom zal in jow nooit meer te heuren wezen. Iens weren je haandelers de groten van de eerde, alle volken bezweken veur je verleidende toverderi'je.
24 Mar ok vloeide in disse stad et bloed van profeten en heiligen, van al degenen die op eerde slaacht wodden."
 
 
Openbaring 19.
01 Hiernao heurde ik in de hemel een geweldige stemme as van een grote mennigte zeggen: "Halleluja! De redding, de ere en de macht bin van oonze God,
02 want zien vonnis is betrouwber en rechtveerdig. Hi'j het ommes de grote hoer, die deur heur ontucht de wereld in et verdarf stot het, veroordield en et bloed van zien knechten op heur wreuken."
03 Opni'j zeden ze: "Halleluja! Heur rook stiegt op tot in iewighied."
04 De vierentwintig ooldsten en de vier wezens gongen deur de kni’jen veur God, die op de troon zit, en anbaden him mit de woorden: "Amen! Halleluja!"
05 Vanof de troon klonk een stemme, die zee: "Eer oonze God! Laot al zien knechten die ontzag veur him hebben, jong en oold, him loven!"
06 Doe heurde ik wat as een stemme van een grote mennigte, van geweldige waetermassa's en van krachtige donderslaegen zeggen:
"Halleluja! De Heer oonze God, de Almachtige, het et keuningschop op him neumen.
07 Lao’we bliede wezen en jubelen, lao’we him de ere geven! Want de brulloft van et laom is kommen en zien bruid staot klaor.
08 Zi'j mag heur klieden in zuver, straolend linnen." Want dit linnen staot veur al et goeie dat deur de heiligen daon is.
09 Doe zee hi'j tegen mi'j: schrief op: "Gelokkig bin zi'j die op et brulloftsmaol van et laom nuugd binnen." En hi'j gong wieder: "Wat God hier zegt, is betrouwber."
10 Ik gooide mi'j an zien voeten om him te anbidden, mar hi'j zee: "Niet doen! Ik bin een knecht krek zoas ieje en zoas je breurs en zusters die van Jezus getugen. God moej' anbidden." Want getugen van Jezus is profeteren.
Et beest en zien profeet versleugen.
11 Ik zag dat de hemel eupen daon was, en dit zag ik: een wit peerd mit een ruter, die Trouw en Betrouwber hiet, die een rechtveerdig vonnis velt en een rechtveerdige stried voert.
12 Zien ogen weren as een vlammend vuur en op zien heufd had hi'j een protte diademen. D'r ston een naeme op him schreven die gieniene kende, allienig hi'jzels.
13 Hi'j dreug mit bloed deurdrenkte kleren. Hi'j hiette Woord van God.
14 De hemelse legermacht, in kleren van zuver, wit linnen, volgde him op witte peerden.
15 Uut zien mond komt een scharp zwaord waor hi'j de volken mit houwen zal, en hi'j zal heur mit een iezeren hedderstaf huden. Hi'j zal de wienpasse van de hevige woede van de almachtige God treden.
16 Op zien kleren en op zien di'je staot de naeme Hoogste heer en keuning.
17 Doe zag ik een engel midden in de zunne staon. Luud reup hi'j tegen de voegels die hoge in de locht vleugen: "Kom naor God zien grote maoltied.
18 Dan kriej' et vleis te eten van keunings, legeranvoerders en machthebbers, et vleis van peerden en heur ruters, van slaven en van vri'je meensken, et vleis van jong en oold."
19 Ik zag dat et beest en de keunings op eerde mit heur troepen klaor stonnen om oorlog te voeren mit de ruter op et peerd en mit zien legermacht.
20 Et beest wodde gevangenneumen, tegere mit de leugenprofeet die in zien bi'jwezen tekens daon had, waordeur hi'j iederiene die et markteken van et beest dreug en zien bield anbad, had misleided. Levend wodden zi'j in de vuurpoele mit branende zwaovel gooid.
21 De rest wodde ommebrocht deur et zwaord dat uut de mond van de ruter op et peerd kwam, en alle voegels atten heur vol an heur vleis.
 
 
Openbaring 20.
De eerste opstaanding en de twiede dood.
01 Ik zag een engel uut de hemel daelekommen mit de sleutel van de ondereerdse diepte en zwaore kettens in zien haand.
02 Hi'j greep de draek, de slange van vroeger, die ok Duvel of Saotan nuumd wodde, en maekte himzels veur duzend jaor vaaste an dat ketten.
03 Hi'j gooide himzels in een diepe putte, dee de putte mit een deksel dichte en verzegelde die, zodat de volken niet meer deur him misleided wodden zollen tot de duzend jaor veurbi'j weren; daornao moet hi'j een posien loslaoten wodden.
04 Ok zag ik tronen, en an heur die d'r op zatten wodde recht daon. Et bin de zielen van heur die ontheufd weren omreden zi'j van Jezus getuugd hadden en over God praot hadden; zi'j hadden et beest en zien bield niet anbeden en ok zien markteken niet op heur veurheufd of heur haand kregen. Zi'j weren tot leven kommen en heersten duzend jaor laank tegere mit de messias.
05 Aander dood volk bleef dood tot de duzend jaor veurbi'j weren. Dit is de eerste opstaanding.
06 Gelokkig en heilig is degene die diel het an de eerste opstaanding. De twiede dood het gien macht over heur. Zi'j zullen priester van God en van de messias wezen en duzend jaor laank tegere mit him heersen.
07 As de duzend jaor veurbi'j binnen, zal Saotan uut zien gevangenis loslaoten wodden.
08 Dan gaot hi'j op struun om de volken an de vier hoeken van de eerde, Gog en Magog, te misleiden. Hi'j brengt heur veur de stried bi'jmekeer, een mennigte zo talriek as et zaand van de zee.
09 Zi'j trekken op, over de hiele brette van de eerde, en omsingelen et kaamp van de heiligen en de geliefde stad. Mar vuur daelt omlegens uut de hemel en verteert heur.
10 En de duvel, die heur misleidde, wodt in de poele van vuur en zwaovel gooid, bi'j et beest en de leugenprofeet. Daor zullen ze dag en naacht zeer daon wodden, tot in iewighied.
11 Doe zag ik een grote witte troon en him die daornop zat. De eerde en de hemel vlochtten van him weg en verdwenen in et niks.
12 Ik zag de dojen, jong en oold, veur de troon staon. D'r wodden boeken eupend. Doe wodde d'r nog iene eupend: et boek van et leven. De dojen wodden op grond van wat in de boeken ston oordield naor heur daoden.
13 De zee ston de dojen die ze in heur had of, en ok de dood en et doderiek stonnen heur dojen of. D'r wodde over iederiene een oordiel veld naor zien daoden.
14 Doe wodden de dood en et doderiek in de vuurpoele gooid. Dit is de twiede dood: de vuurpoele.
15 Wie niet in et boek van et leven bleek te staon wodde in de vuurpoele gooid.
 
 
Openbaring 21.
Een ni'je hemel en een ni'je eerde.
01 Ik zag een ni'je hemel en een ni'je eerde. Want de eerste hemel en de eerste eerde bin veurbi'j, en de zee is d'r niet meer.
02 Doe zag ik de heilige stad, et ni'je Jeruzalem, uut de hemel daelekommen, bi'j God weg. Zi'j was as een bruid die heur mooi maekt het veur heur man en him opwaacht.
03 Ik heurde een lude stemme vanof de troon die uutreup: "Gods woonstee is onder de meensken, hi'j zal bi'j heur wonen. Zi'j zullen zien volken wezen en God zels zal as heur God bi'j heur wezen.
04 Hi'j zal al heur traonen dreugen. D'r zal gien dood en leed meer wezen, gien jammerklacht, gien piene, want wat d'r eerst was is veurbi'j."
05 Hi'j die op de troon zat zee: "Alles maek ik ni'j!" – Ik heurde zeggen: "schrief et op, want wat hier zegd wodt is betrouwber en waor." –
06 Doe zee hi'j tegen mi'j: "Et is daon wark! Ik bin de alfa en de omega, et begin en et aende. Wie dust het geef ik vri'j te drinken uut de bron van leven.
07 Wie overwint kommen al disse dingen toe. Ik zal zien God en hi'j zal mien kiend wezen.
08 Mar veur heur die laf en trouweloos west binnen, die heur inlaoten hebben mit gruwelike dingen, mit moord, ontucht, toverderi'je of ofgodedienst, veur iederiene die de leugen diend het: veur heur waacht de vuurpoele mit branende zwaovel, dat is de twiede dood."
09 Iene van de zeuven engels mit de offerschaolen die vuld weren mit de laeste zeuven plaogen kwam op mi'j of en zee: "Ik wil je de bruid zien laoten, de vrouw van et laom."
10 Hi'j nam mi'j in zien geestdrift mit naor een hiel hoge barge en leut me de heilige stad Jeruzalem zien, die uut de hemel daele kwam, bi'j God weg.
11 De stad schitterde deur Gods luuster, mit een schittering as van een edelstien, as een kristalheldere jaspis.
12 Zi'j had een grote, hoge mure mit twaelf poorten en bi'j elke poort ston een engel. Op de poorten weren naemen schreven: de naemen van de twaelf stammen van Israël zien zeunen.
13 Uut et oosten weg zien weren d'r drie poorten, uut et noorden drieje, uut et zuden drieje en uut et westen drieje.
14 De stadsmure had twaelf grondstiender, mit daorop de naemen van de twaelf apostels van et laom.
15 Degene die mit mi'j praotte had een goolden meetstok om daor de stad, de poorten en de mure mit op te meten.
16 De stad was vierkaant, lieke laank as bried. Hi'j mat de stad mit zien meetstok: twaelfduzend stadiën, liekegoed in de lengte as in de brette en in de hoogte.
17 Hi'j mat de stadsmure: honderdvierenveertig elle, in gewone meenskemaote, die ok de engelmaote is.
18 De mure was maekt van jaspis, en de stad zels was van zuver goold, helder as glas.
19 De grondstiender van de stadsmure weren versierd mit verschillende edelstienen. De eerste was van jaspis, de twiede van lazuurstien, de dadde kornalijn, de vierde smaragd,
20 de vuufde sardonyx, de zesde sarder, de zeuvende olivijn, de achtste aquamarijn, de negende topaas, de tiende turkoois, de elfde grenaot en de twaelfde amethist.
21 De twaelf stadspoorten weren twaelf parels, elke poorte iene parel op him. De straoten van de stad weren van zuver goold en schitterden as glas.
22 Mar een tempel zag ik niet in de stad, want God de Heer, de Almachtige, is heur tempel, mit et laom.
23 De stad het et locht van de zunne en de maone niet neudig: over heur schient God zien luuster, en et laom geft heur locht.
24 De volken zullen in heur locht leven en de keunings op eerde betugen daor heur lof.
25 De poorten zullen overdag nooit sleuten wodden, en naacht is et daor niet meer.
26 De volken zullen in heur heur lof en ere betugen.
27 Mar alles wat verwarpelik is en iederiene die him mit gruwelike dingen en leugens inlat, komt de stad niet in, allienig zi'j die in et boek van et leven staon, et boek van et laom.
 
 
Openbaring 22.
01 Hi'j leut mi'j een revier mit levenswaeter zien. De revier was helder as kristal en ontsprong an de troon van God en van et laom.
02 In et midden van de straoten van de stad en de revier ston, an weerskaanten, een levensboom, die twaelf vruchten gaf, elke maond zien eigen vrucht. De blaederen van de boom brochten de volken genezing.
03 D'r zal niks meer wezen waorop nog een vluuk rust. De troon van God en et laom zal daor in de stad staon. Zien knechten zullen him vereren
04 en him mit eigen ogen zien, en zien naeme staot op heur veurheufd.
05 Et zal d'r gien naacht meer wezen en et locht van een laampe of et locht van de zunne hebben ze daor niet neudig, want God de Heer zal heur locht geven. En zi'j zullen as keunings heersen tot in iewighied.
Aende.
06 Doe zee hi'j tegen mi'j: "Wat hier zegd is, is betrouwber en waor. De Heer, de God die profeten bezielt, het zien engel stuurd om an zien knechten zien te laoten wat d'r inkotten gebeuren moet."
07 "Ik komme gauw!" Gelokkig is hi’j wie him hoolt an de profetie van dit boek.
08 Ik, Johannes, was et die disse dingen heurde en zag. En doe ik alles heurd en zien had, gooide ik mi'j an de voeten van de engel die me disse dingen zien leut, om him te anbidden.
09 Mar hi'j zee: "Niet doen! Ik bin een knecht zoas ieje en je medeprofeten, en zoas al degenen die heur holen an wat d'r in dit boek staot. God moej' anbidden."
10 Veerder zee hi'j tegen mi'j: "Hool de profetie van dit boek niet geheim, want de tied is dichtebi'j.
11 Wie onheil anricht, zal nog meer onheil anrichten en wie onzuver is, zal nog veerder onzuver wodden. Wie goed dot, zal nog meer goed doen en wie an God wijded is, zal him nog veerder toewijden."
12 "Ik komme gauw en bi'j mien komst zal ik iederiene loon naor warken geven.
13 Ik bin de alfa en de omega, de eerste en de laeste, et begin en et aende."
14 Gelokkig bin zi'j die heur kleren wasken: zi'j kun over de levensboom beschikken en zullen de stad deur de poorten binnengaon.
15 Buten is et plak veur de honnen die heur bezigholen mit toverderi'je en ontucht, mit moord en ofgodedienst, veur iederiene die de leugen koestert en d'r naor haandelt.
16 "Ik, Jezus, hebbe mien engel stuurd om jim disse dingen bekend te maeken veur de gemienten. Ik bin de telg van David, zien naokommeling, de straolende morgensteern."
17 De Geest en de bruid zeggen: "Komme!" Laot wie luustert "Komme!" zeggen. Laot wie dust het kommen; laot wie dat wil vri'j drinken van al et levenswaeter.
18 Ik verklaor tegenover iederiene die de profetie van dit boek heurt: as iene d'r wat an toevoegt, zal God over him de plaogen kommen laoten die in dit boek beschreven binnen;
19 en as iene wat ofnemt van wat in et boek van disse profetie staot, zal God him zien pat ofnemen van de levensboom en van de heilige stad, zoas die in dit boek beschreven binnen.
20 Hi'j die van disse dingen getuugt, zegt: "Ja, ik komme gauw!" Amen. Komme, Heer Jezus!
21 De genaode van oonze Heer Jezus is mit jim allemaole.