Numeri
in een
Stellingwarver vertaeling
Et boek Numeri het zien titel kregen van de Vulgata, een oolde Latijnse biebelvertaeling. Et woord numeri betekent "getallen". Disse naeme dudet op iene van de thema's van et boek: et registreren, tellen en orgeniseren van de Israëlieten tiedens heur verblief in de woestijn op weg naor et deur God beloofde laand. De titel in de Hebreeuwse biebel is Bemidbar, "In de woestijn", naor iene van de eerste woorden van et boek. Numeri is et vierde boek van de Pentateuch, de verzaemeling van vuuf boeken die in de Joodse tredisie de Tora nuumd wodt. Vanof de tied van Ezra en Nehemia (rond 450 v.Chr.) wodden disse boeken an Mozes toeschreven. Daorom praot et volk ok wel van "de vuuf boeken van Mozes". Numeri is saemen mit de verhaelende stokken in Genesis, Exodus, Leviticus, Deuteronomium, Jozua, Rechters, Samuël en Keunings een min of meer deurlopende geschiedenis. Tegenswoordig nemen pattie an dat disse boeken in heur vorm vandaege-de-dag et risseltaot binnen van een langdurig perces van overleveren en redigeren. Et redaksieperces is al in de tied van de keunings van Israël en Juda begonnen (ongeveer 1000-586 v.Chr.) en wodde eerst ofsleuten nao de Babylonische ballingschop, in de Joodse gemienschop in de tied van de twiede tempel (nao 515 v.Chr.).
De veurschriften en leefriegels in et boek Numeri bevatten een protte parallellen mit aandere boeken in de Pentateuch. Een belangriek thema in et boek is heilighied. De anwezigens van de heilige God midden tussen zien volk is een belangriek gegeven, en pattietoeren holen de motieven in de tekst op positieve of negatieve wieze verbaand mit heilighied. Et is de bedoeling van Numeri om de lezers te deurdringen van de noodzaeke om et heilige te respekteren en heur te huden veur poeterighied. Alliend dan kan God midden tussen zien volk wonen. In et boek Numeri kommen verschillende genres veur, zoas verhaelen, profetieën, wetten, liturgische veurschriften en liesten. De uutvoerige, seins wat ientonige liesten en verslaegen nemen een belangriek plak in et boek in, wiels de verhaelende stokken over et algemien vri'j kot binnen. Een uutzundering hierop is et verhael over Bileam (22-24), een hiel percies uutwarkt gehiel waorin onder aandere gebruuk maekt wodt van ironie (in de stokkien over de sprekende ezelin) en waorin ok profetische oraokelspreuken in dichtvorm verwarkt binnen. Disse poëtische passages en de priesterzegen in 6:24-26 bin in een meer verheven stiel steld.
In et boek Numeri bin op grond van de geografische situering drie patten te onderscheiden, die heur aachterienvolgens ofspeulen in de Sinaiwoestijn (1:1-10:10), onderwegens van de Sinai naor de vlakte van Moab (10:11-22:1) en in de vlakte van Moab (22:2-36:13). Et eerste pat prissenteert him as een direkte overloop van Exodus en Leviticus. Et begint mit de telling en de orgenisaosie van et volk. Daornao kommen de wetten, regels en kultische veurschriften die et volk veurbereiden op de reize deur de woestijn. Et twiede pat gaot over de stroeve tocht deur de woestijn van Sinai naor Moab. Hier wodden verschillende motieven uut et boek Exodus herhaeld: de moedelooshied onder et volk, geklaeg en verzet tegen et gezag van Mozes. Ok dit gedielte het veurschriften en regels, veur onderwegens en veur in de toekomst in et beloofde laand. In et dadde pat wodt Israël veerder veurbereided op de innaome van Kanaän, waorop deur Bileam zinspeuld wodt. D'r vint opni'j een volkstelling plak, d'r wodt een opvolger van Mozes anwezen en d'r wodden veurschriften veur offers en feesten geven.
Vertaeling van de Biebel (NBV 2004)
deur Piet Bult uut Ni’jberkoop
Numeri 1
Telling van de
Israëlieten
01 Op de eerste dag van de twiede maond, in et twiede jaor nao et vertrek van de Israëlieten uut Iegypte, keerde de Heer him in de Sinaiwoestijn naor Mozes. Hi'j praotte tegen him in de ontmoetingstente en zee:
02-03 "Hool onder hiel Israël een telling van alle weerbere manluden van twintig jaor en oolder. Tel heur heufdelik en schrief heur mit naeme en toenaeme in, op volgodder van geslacht en femilie en indield naor de legerofdielings waortoe zi'j beheuren. Doe dit tegere mit Aäron.
04 Uut iedere stamme moet iene die an et heufd van een femilie staot jim daorbi'j behulpzem wezen.
05 Dit bin degenen die jim helpen zullen: uut de stamme Ruben Elisur, de zeune van Sedeür;
06 uut Simeon Selumiël, de zeune van Surisaddai;
07 uut Juda Nachson, de zeune van Amminadab;
08 uut Issachar Netanel, de zeune van Suar;
09 uut Zebulon Eliab, de zeune van Chelon;
10 wat de naokommelingen van Jozef angaot: uut Efraïm Elisama, de zeune van Ammihud, en uut Manasse Gamliël, de zeune van Pedasur;
11 uut Benjamin Abidan, de zeune van Gidoni;
12 uut Dan Achiëzer, de zeune van Ammisaddai;
13 uut Aser Pagiël, de zeune van Ochran;
14 uut Gad Eljasaf, de zeune van Deüel;
15 uut Naftali Achira, de zeune van Enan.
16 Dit bin de Israëlieten die et meerste anzien hebben; ieder van heur komt an et heufd van een stamme te staon en krigt et bevel over de legerienheden van die stamme."
17 Mozes en Aäron reupen de manluden die heur nuumd weren bi'j heur,
18 en nog diezelde dag, de eerste dag van de twiede maond, leuten zi'j de de hiele gemienschop bi'jenneer kommen. Alle manluden van twintig jaor en oolder wodden mit naeme en toenaeme riggestreerd, op volgodder van geslacht en femilie,
19 zoas de Heer et Mozes opdreugen hadde. Hi'j stelde in de Sinaiwoestijn disse tallen vaaste:
20 Ofstammelingen van Ruben, Israël zien eerstgeborene, alle weerbere manluden van twintig jaor en oolder, heufdelik teld en mit naeme en toenaeme riggestreerd, op volgodder van geslacht en femilie –
21 tal ingeschrevenen veur de stamme Ruben: 46.500.
22 Ofstammelingen van Simeon, alle weerbere manluden van twintig jaor en oolder, heufdelik teld en mit naeme en toenaeme riggestreerd, op volgodder van geslacht en femilie –
23 tal ingeschrevenen veur de stamme Simeon: 59.300.
24 Ofstammelingen van Gad, alle weerbere manluden van twintig jaor en oolder, mit naeme en toenaeme, op volgodder van slaacht en femilie –
25 tal ingeschrevenen veur de stamme Gad: 45.650.
26 Ofstammelingen van Juda, alle weerbere manluden van twintig jaor en oolder, mit naeme en toenaeme, op volgodder van geslacht en femilie –
27 tal ingeschrevenen veur de stamme Juda: 74.600.
28 Ofstammelingen van Issachar, alle weerbere manluden van twintig jaor en oolder, mit naeme en toenaeme, op volgodder van geslacht en femilie –
29 tal ingeschrevenen veur de stamme Issachar: 54.400.
30 Ofstammelingen van Zebulon, alle weerbere manluden van twintig jaor en oolder, mit naeme en toenaeme, op volgodder van geslacht en femilie –
31 tal ingeschrevenen veur de stamme Zebulon: 57.400.
32 Naokommelingen van Jozef: ofstammelingen van Efraïm, alle weerbere manluden van twintig jaor en oolder, mit naeme en toenaeme, op volgodder van geslacht en femilie –
33 tal ingeschrevenen veur de stamme Efraïm: 40.500;
34 ofstammelingen van Manasse, alle weerbere manluden van twintig jaor en oolder, mit naeme en toenaeme, op volgodder van geslacht en femilie –
35 tal ingeschrevenen veur de stamme Manasse: 32.200.
36 Ofstammelingen van Benjamin, alle weerbere manluden van twintig jaor en oolder, mit naeme en toenaeme, op volgodder van geslacht en femilie –
37 tal ingeschrevenen veur de stamme Benjamin: 35.400.
38 Ofstammelingen van Dan, alle weerbere manluden van twintig jaor en oolder, mit naeme en toenaeme, op volgodder van geslacht en femilie –
39 tal ingeschrevenen veur de stamme Dan: 62.700.
40 Ofstammelingen van Aser, alle weerbere manluden van twintig jaor en oolder, mit naeme en toenaeme, op volgodder van geslacht en femilie –
41 tal ingeschrevenen veur de stamme Aser: 41.500.
42 Ofstammelingen van Naftali, alle weerbere manluden van twintig jaor en oolder, mit naeme en toenaeme, op volgodder van geslacht en femilie –
43 tal ingeschrevenen veur de stamme Naftali: 53.400.
44 Dit weren de tallen die Mozes noteerde, saemen mit Aäron en de twaelf leiders van de Israëlieten, die ieder an et heufd van een femilie stonnen.
45 Et tal weerbere Israëlieten van twintig jaor en oolder dat inschreven wodde, op volgodder van femilies,
46 bedreug in tetaol 603.550.
47 Degenen die tot de stamme Levi heurden wodden niet inschreven.
48 De Heer hadde jommes tegen Mozes zegd:
49 "De stamme Levi meuj' niet inschrieven, ie meugen heur niet mit de aandere Israëlieten mittellen.
50 Stelle de Levieten an over de tabbernakel, waorin de verbondstekst beweerd wodt, en over alle bi'jheurende veurwarpen. Zi'j moe'n de tabbernakel en alles wat d'r bi'j heurt dregen, zi'j bin veur de tabbernakel verantwoordelik en moe'n heur tenten d'r ommehenne opslaon.
51 As de tabbernakel verplaetst wodden moet, moeten de Levieten him of breken, en as hi'j weer daelezet wodt, is et heur opdracht om him weer op te bouwen. Iedere onbevoegde die te dichte bi'j et heiligdom komt zal ommebrocht wodden.
52 As de Israëlieten heur kaamp opslaon, iederiene bi'j zien eigen ofdieling en bi'j zien eigen vaandel,
53 moe'n de Levieten heur tenten opslaon rond de tabbernakel mit de verbondstekst, om te veurkommen dat et volk deur mien argernis troffen wodt. De Levieten moe'n zorg dregen veur de tabbernakel."
54 De Israëlieten deden alles wat de Heer Mozes opdreugen hadde.
Numeri 2
Legering van de Israëlieten
01 De Heer zee tegen Mozes en Aäron:
02 "As de Israëlieten heur tenten opslaon, moe'n ze dat doen rond de ontmoetingstente, wel op een betien ofstaand d'r van, iederiene bi'j zien eigen vaandel en bi'j de herkenningstekens van zien femilie.
03 An de oostkaante, waor de zunne opkomt, moe'n de ofdielings van Juda heur bi'j heur vaandel legeren. Anvoerder van de Judeeërs is Nachson, de zeune van Amminadab.
04 Zien leger is neffens de telling 74.600 man stark.
05 An dezelde kaante slat de stamme Issachar zien tenten op. Heur anvoerder is Netanel, de zeune van Suar.
06 Zien leger telt 54.400 man.
07 Ok de stamme Zebulon komt daor. Heur anvoerder is Eliab, de zeune van Chelon.
08 Zien leger telt 57.400 man.
09 In tetaol tellen de legerofdielings van Juda 186.400 man. Zi'j moe'n de hieltied et eerste opbreken.
10 An de zuudkaante moe'n de ofdielings van Ruben heur bi'j heur vaandel legeren. Anvoerder van de Rubenieten is Elisur, de zeune van Sedeür.
11 Zien leger is neffens de telling 46.500 man stark.
12 An dezelde kaante slat de stamme Simeon zien tenten op. Heur anvoerder is Selumiël, de zeune van Surisaddai.
13 Zien leger telt 59.300 man.
14 Ok de stamme Gad komt daor. Heur anvoerder is Eljasaf, de zeune van Deüel.
15 Zien leger telt 45.650 man.
16 In tetaol tellen de legerofdielings van Ruben 151.450 man. Zi'j breken as twiede op.
17 Et leger van de Levieten, mit de ontmoetingstente, is midden tussen de aandere legerofdielings as et kaamp opbreuken wodt. Zoas de Israëlieten legerd binnen, zo moe'n ze ok veerder trekken, iederiene op et veur him bepaolde plak, bi'j zien eigen vaandel.
18 An de westkaante moe'n de ofdielings van Efraïm heur bi'j heur vaandel legeren. Anvoerder van de Efraïmieten is Elisama, de zeune van Ammihud.
19 Zien leger is neffens de telling 40.500 man stark.
20 An dezelde kaante komt de stamme Manasse. Heur anvoerder is Gamliël, de zeune van Pedasur.
21 Zien leger telt 32.200 man.
22 Ok de stamme Benjamin komt daor. Heur anvoerder is Abidan, de zeune van Gidoni.
23 Zien leger telt 35.400 man.
24 In tetaol tellen de legerofdielings van Efraïm 108.100 man. Zi'j breken as dadde op.
25 An de noordkaante moe'n de ofdielings van Dan heur bi'j heur vaandel legeren. Anvoerder van de Danieten is Achiëzer, de zeune van Ammisaddai.
26 Zien leger is neffens de telling 62.700 man stark.
27 An dezelde kaante slat de stamme Aser zien tenten op. Heur anvoerder is Pagiël, de zeune van Ochran.
28 Zien leger telt 41.500 man.
29 Ok de stamme Naftali komt daor. Heur anvoerder is Achira, de zeune van Enan.
30 Zien leger telt 53.400 man.
31 In tetaol tellen de legerofdielings van Dan 157.600 man. Zi'j breken et laest op, iedere ofdieling bi'j zien eigen vaandel."
32 Et tal Israëlieten dat inschreven was, op volgodder van femilies, bedreug veur et hiele leger, veur alle ofdielings bi'jenneer, 603.550.
33 De Levieten weren niet mit de aandere Israëlieten mitteld; zo hadde de Heer et Mozes opdreugen.
34 De Israëlieten deden alles wat de Heer Mozes opdreugen hadde: alleman legerde him bi'j zien eigen vaandel, en zo trokken ze ok weer wieder, indield naor geslacht en femilie.
Numeri 3
Telling van de Levieten; heur
taeken
01 Dit weren de naokommelingen van Aäron en Mozes in de tied dat de Heer op de Sinai mit Mozes praotte.
02 Dit bin de naemen van Aäron zien zeunen: Nadab – de ooldste –, Abihu, Eleazar en Itamar.
03 Dit weren de naemen van Aäron zien zeunen; zi'j weren tot priester zalfd, zi'j weren ansteld om et priesterambt te bekleden.
04 Nadab en Abihu weren bi'j et heiligdom wegraekt doe ze de Heer in de Sinaiwoestijn vuur anbeuden hadden dat niet voldee an de veurschriften. Ze hadden gien zeunen, zodat alliend Eleazar en Itamar overbleven om tiedens et leven van heur heit Aäron et priesterambt te bekleden.
05 De Heer zee tegen Mozes:
06 "Laot de stamme Levi kommen om heur in dienst te stellen van Aäron: zi'j moe'n him, de priester, behulpzem wezen.
07 Zi'j moe'n zien taeken en die van de hiele gemienschop op heur nemen deur in de ruumte veur de ontmoetingstente dienst te doen en wark bi'j de tabbernakel te doen.
08 Zi'j dregen zorg veur alle veurwarpen die bi'j de ontmoetingstente heuren en doen naemens de Israëlieten wark bi'j de tabbernakel.
09 Stelle de Levieten hielendal tot beschikking van Aäron en zien zeunen, zi'j moe'n him naemens alle Israëlieten helpen.
10 Aäron en zien zeunen zels moej' opdregen om et priesterschop uut te oefenen. Iedere onbevoegde die te dichte bi'j et heiligdom komt zal ommebrocht wodden."
11 De Heer zee tegen Mozes:
12 "Ik maek de Levieten tot mien eigendom. Zi'j zullen mi'j toeheuren in plak van alle eerstgeboren Israëlieten, allemaole die as eerste de moekeschoot verlaoten.
13 Iedere eerstgeborene komt mi'j ommes toe: op de dag dat ik de eerstgeborenen in Iegypte ommebrocht, he'k alle eerstgeborenen van Israël, liekegoed van de meensken as van de dieren, veur mi'jzels bestemd. Mi'j beheuren ze toe. Ik bin de Heer."
14 Ok zee de Heer in de Sinaiwoestijn tegen Mozes:
15 "Schrief de Levieten in, op volgodder van femilie en slaacht. Alle mannelike personen van iene maond en oolder moe'n inschreven wodden."
16 Hierop schreef Mozes heur in, zoas de Heer him beveulen hadde.
17 Dit bin de naemen van de zeunen van Levi: Gerson, Kehat en Merari.
18-20 De zeunen van Gerson hietten Libni en Simi. De zeunen van Kehat: Amram, Jishar, Chebron en Uzziël. De zeunen van Merari: Machli en Musi. Naor heur wodden de verschillende geslachten nuumd. Dit weren de geslachten van de Levieten, die ieder weer onderverdield weren in femilies.
21 Van Gerson stamden de Libnieten en de Simieten of; dit weren de geslachten van de Gersonieten.
22 Et tal mannelike personen van iene maond en oolder dat inschreven wodde, bedreug 7500.
23 De Gersonieten sleugen heur kaamp op aachter de tabbernakel, an de westkaante.
24 Heur leider was Eljasaf, de zeune van Laël.
25 De Gersonieten hadden wat de ontmoetingstente angaot de zorg veur de tabbernakel, de tente daoroverhenne en de dekklieden, et gedien veur de ingang van de ontmoetingstente,
26 de doeken waormit de ruumte rond de tabbernakel en et alter ofscharmd was, et gedien veur de ingang van de ofscharmde ruumte, en de touwen. Alles wat hiermit te maeken hadde, was heur wark.
27 Van Kehat stamden de Amramieten, Jisharieten, Chebronieten en Uzziëlieten of; dat weren de geslachten van de Kehatieten.
28 Et tal mannelike personen van iene maond en oolder bedreug 8600. Zi'j hadden de zorg veur de heilige ruumte.
29 De Kehatieten sleugen heur kaamp op an iene van de lange ziede van de tabbernakel, en wel an de zuudkaante.
30 Heur leider was Elisafan, de zeune van Uzziël.
31 Zi'j hadden de zorg veur de ark, de taofel, de laampestander, de alters, de heilige veurwarpen die bi'j de dienst bruukt wodden en et veurhangsel. Alles wat hiermit te maeken hadde, was heur wark.
32 An et heufd van de leiders van de Levieten ston Eleazar, de zeune van de priester Aäron. Hi'j hul toezicht op degenen die de zorg veur de heilige ruumte hadden.
33 Van Merari stamden de Machlieten en de Musieten of; dat weren de geslachten van de Merarieten.
34 Et tal mannelike personen van iene maond en oolder dat inschreven wodde, bedreug 6200.
35 Heur leider was Suriël, de zeune van Abichaïl. Zi'j sleugen heur kaamp op an de aandere lange ziede van de tabbernakel, an de noordkaante.
36 De Merarieten weren belast mit de zorg veur de plaanken van de tabbernakel, de dwasbalken, paolen en voetstokken en wat daorbi'j heurde. Alles wat hiermit te maeken hadde, was heur wark.
37 Ok dreugen zi'j de zorg veur de paolen van de ofscharmde ruumte, veur de voetstokken, de pinnen en de touwen.
38 An de veurkaante van de tabbernakel, an de oostkaante, waor de zunne opkomt, sleugen Mozes en Aäron en zien zeunen heur tenten op. Zi'j verzorgden naemens de Israëlieten de dienst in et heiligdom. Iedere onbevoegde die te dichte bi'j et heiligdom kwam, wodde ommebrocht.
39 Et tetaole tal mannelike Levieten van iene maond en oolder dat Mozes tegere mit Aäron in kommedaosie van de Heer inschreef, op volgodder van geslacht, bedreug 22.000.
40 De Heer zee tegen Mozes: "Leg een liest an van alle mannelike eerstgeboren Israëlieten van iene maond en oolder en stel heur tal vaaste.
41 In et plak van de eerstgeboren Israëlieten moej' de Levieten veur mi'j ofzunderen, en in et plak van et eerstgeboren vee van de Israëlieten moej' et vee van de Levieten ofzunderen. Ik bin de Heer."
42 Mozes telde de eerstgeboren Israëlieten, zoas de Heer him opdreugen hadde.
43 Et tetaole tal mannelike eerstgeborenen van iene maond en oolder bedreug 22.273.
44 De Heer zee tegen Mozes:
45 "Zunder de Levieten veur mi'j of in et plak van de eerstgeboren Israëlieten, en et vee van de Levieten in et plak van et vee van de Israëlieten. De Levieten heuren mi'j toe. Ik bin de Heer.
46-47 Veur ieder van de twiehonderddrienenzeuventig eerstgeboren Israëlieten die et tal Levieten te boven gaon, moej' as losgeld vuuf sjekel innen, neffens et iekergewicht van et heiligdom, twintig gera de sjekel.
48 Dreeg dat geld of an Aäron en zien zeunen, as lospries veur heur die overblieven."
49-50 Mozes inde et losgeld veur de eerstgeboren Israëlieten die et tal dat deur de Levieten vri'jkocht was te boven gongen; hi'j nam dattienhonderdvuvenzestig sjekel in ontvangst, neffens et iekergewicht van et heiligdom.
51 Hi'j gaf dit losgeld an Aäron en zien zeunen, zoas de Heer him beveulen hadde.
Numeri 4
01 De Heer zee tegen Mozes en Aäron:
02-03 "Hool onder de Levieten een telling van de Kehatieten die tussen de dattig en vuuftig jaor oold binnen en verplicht binnen om wark bi'j de ontmoetingstente te doen. Tel heur per geslacht en per femilie.
04 De Kehatieten hebben as opdracht om zorg te dregen veur et alderheiligste in de ontmoetingstente.
05 As et kaamp opbreuken wodt, moe'n Aäron en zien zeunen et veurhangsel losmaeken en d'r de ark mit de verbondstekst mit bedekken.
06 Ze leggen d'r een klied van zeekoevellen overhenne, spreiden daorover een gehiel blauwpurperen klied en brengen de dreegbomen an.
07 Ok over de taofel veur de toonbroden moe'n ze een blauwpurperen klied spreiden; daor moet et altied anwezige brood op liggen. De schottels, schaolen en koemen en de kannen veur de wienoffers zetten ze op et klied.
08 Daoroverhenne spreiden ze een karmozijnrood klied en een klied van zeekoevellen, en ze brengen de dreegbomen an.
09 Mit een blauwpurperen klied moe'n ze de laampestander bedekken, de bi'jheurende laampen, snuters en bakkies en alle eulievatties die d'r bi'j bruukt wodden.
10 Dan zetten ze de standerd en alles wat d'r bi'j heurt op een dreegbaore waorover een klied van zeekoevellen ligt.
11 Over et goolden alter spreiden ze een blauwpurperen klied. Dit bedekken ze mit een klied van zeekoevellen, en ze brengen de dreegbomen an.
12 Alle veurwarpen die ze bi'j de dienst in et heiligdom bruken, moe'n ze op een blauwpurperen klied leggen, mit een klied van zeekoevellen bedekken en op een dreegbaore leggen.
13 Ze haelen de aske van et braandofferalter weg, spreiden d'r een roodpurperen klied over,
14 leggen daornao alle veurwarpen die d'r bi'j bruukt wodden – de vuurbakken, vörken, scheppen en offerschaolen, kotomme, al et altergerei –, spreiden daor een klied van zeekoevellen over en brengen de dreegbomen an.
15 Eerst as Aäron en zien zeunen bi'j et opbreken van et kaamp klaor binnen mit et bedekken van et heiligdom en alle heilige veurwarpen, meugen de Kehatieten kommen om ze te dregen. Zi'j meugen et heiligdom niet anraeken, aanders raeken ze weg. Dat bin de veurwarpen uut de ontmoetingstente die de Kehatieten dregen moeten.
16 Eleazar, de zeune van de priester Aäron, het et toezicht op de eulie veur et locht, op et lekkere roekersgoed, et daegelikse graonoffer en de zalveëulie. Hi'j het et toezicht op de tabbernakel en alles wat daorin is, op et hiele heiligdom en alle bi'jheurende veurwarpen."
17 De Heer zee tegen Mozes en Aäron:
18 "Zorge d'r veur dat de Kehatitische takke van de Levieten niet uutroeid wodt.
19 Om te veurkommen dat zi'j te dichte bi'j et alderheiligste kommen en wegraeken, moej'm dit doen: Aäron en zien zeunen kommen bi'j heur en wiezen ieder van heur toe wat hi'j dregen moet.
20 Zels meugen zi'j et heilige niet binnengaon, want as ze d'r ok mar iene glimp van opvangen zollen, zollen ze wegraeken."
21 De Heer zee tegen Mozes:
22 "Telle de Gersonieten ok, per femilie en per geslacht.
23 Schrief alleman in die tussen de dattig en vuuftig jaor oold binnen en verplicht binnen om wark bi'j de ontmoetingstente te doen.
24 De Gersonieten hebben bi'j et vervoer disse opdracht:
25 zi'j dregen de klieden van de tabbernakel en van de tente daoroverhenne, et dekklied en et klied van zeekoevellen dat daoroverhenne ligt, et gedien veur de ingang van de ontmoetingstente,
26 de doeken van de ruumte die rond de tabbernakel en et alter ofscharmd is en et gedien veur de ingang van de ofscharmde ruumte, mit de touwen en alles wat d'r veerder bi'j heurt. Alle warkzemheden die hiermit verbaand holen, maeken diel uut van heur opdracht.
27 Alle taeken die de Gersonieten bi'j et vervoer hebben, moeten daon wodden neffens de anwiezings van Aäron en zien zeunen, en iezels moe'n hiel precies angeven wat ze dregen moeten.
28 Dit is de opdracht die de Gersonieten bi'j et vervoer van de ontmoetingstente hebben. Zi'j moeten heur wark doen onder leiding van Itamar, de zeune van de priester Aäron.
29 Wat de Merarieten angaot, ok heur moej' odderd naor geslaacht en femilie inschrieven,
30 en wel alleman die tussen de dattig en vuuftig jaor oold binnen en verplicht binnen om wark bi'j de ontmoetingstente te doen.
31 De opdracht die zi'j bi'j et vervoer van de ontmoetingstente hebben, is et dregen van de plaanken van de tabbernakel, de dwasbalken, de paolen en voetstokken,
32 en de paolen van de ofstekking, mit de pinnen en de touwen en wat d'r veerder bi'j heurt. Alles wat hiermit te maeken het, is heur wark. Leg een liest an van alle veurwarpen waorveur zi'j bi'j et vervoer zorg dregen moeten.
33 Dit is de opdracht die de Merarieten bi'j et vervoer van de ontmoetingstente hebben. Zi'j moe'n die doen onder leiding van Itamar, de zeune van de priester Aäron."
34 Mozes, Aäron en de leiders van de gemienschop schreven, odderd naor geslaacht en femilie, alle Kehatieten in
35 die tussen de dattig en vuuftig jaor oold weren en verplicht weren om wark bi'j de ontmoetingstente te doen.
36 Et tal ingeschrevenen, odderd naor geslaacht, bedreug 2750.
37 Dit was et tal Kehatieten dat warkzem was bi'j de ontmoetingstente en dat deur Mozes en Aäron inschreven wodde, zoas de Heer et Mozes beveulen hadde.
38 Et tal Gersonieten dat, odderd naor geslaacht en femilie, inschreven wodde,
39 alleman die tussen de dattig en vuuftig jaor oold weren en verplicht weren om wark bi'j de ontmoetingstente te doen,
40 dit tal inschrevenen, odderd naor geslaacht en femilie, bedreug 2630.
41 Dit was et tal Gersonieten dat warkzem was bi'j de ontmoetingstente en dat deur Mozes en Aäron inschreven wodde, zoas de Heer beveulen hadde.
42 Et tal Merarieten dat, odderd naor geslaacht en femilie, inschreven wodde,
43 alleman die tussen de dattig en vuuftig jaor oold weren en verplicht weren om wark bi'j de ontmoetingstente te doen,
44 dit tal inschrevenen, odderd naor geslaacht, bedreug 3200.
45 Dit was et tal Merarieten dat deur Mozes en Aäron inschreven wodde, zoas de Heer et Mozes beveulen hadde.
46 Et tetaole tal Levieten dat deur Mozes, Aäron en de leiders van de Israëlieten inschreven wodde, odderd naor geslaacht en femilie,
47 alleman die tussen de dattig en vuuftig jaor oold weren en verplicht weren om wark bi'j de ontmoetingstente te doen en te helpen bi'j et dregen d'r van,
48 dit tal bedreug 8580.
49 Zoas de Heer beveulen hadde, wodden zi'j onder leiding van Mozes inschreven overienkomstig de opdracht die iederiene van heur bi'j et vervoer hadde. Zo hadde de Heer et Mozes opdreugen.
Numeri 5
Veurschriften bi'j poeterighied en ontrouw
01 De Heer zee tegen Mozes:
02 "Geef de Israëlieten kommedaosie om alleman die an een huudziekte lidt of poeterig vocht verlöst en alleman die poeterig is deurdat hi'j mit een liek in anraeking west is, et kaamp uut te sturen.
03 Dit gelt liekegoed veur manluden as vrouwluden. Stuur heur vot, want aanders maeken zi'j et kaamp poeterig, waorin ik midden tussen et volk wone."
04 De Israëlieten deden wat de Heer tegen Mozes zegd hadde en stuurden heur et kaamp uut.
05 De Heer zee tegen Mozes:
06 "Zegge tegen de Israëlieten: “as een man of vrouw een aander wat misdaon het en daormit ontrouw wodden is an de Heer en schuld op him laeded het,
07 moet zoe'niene eupenlik zeggen wat hi'j misdaon het en een hiele schaevergoeding, vermeerderd mit een vuufde, betaelen an degene die hi'j benaodield het.
08 Is d'r gieniene an wie de schuld vergoed wodden kan, dan vaalt wat hi'j verschuldigd is toe an de Heer en is et veur de priester, krek as de ram waormit hi'j de verzoeningsrite veur de schuldige uutvoert.
09 Ok krigt de priester van de heilige giften van de Israëlieten et pat dat zi'j an him ofstaon.
10 De heilige giften blieven et eigendom van wie ze anbödt, mar geft iene d'r wat van an de priester, dan is dat veur him.”"
11 De Heer zee tegen Mozes:
12 "Zegge tegen de Israëlieten: “stel dat iene zien vrouw him ontrouw west is deur overspeulig te wezen,
13 dat een aander gemienschop mit heur had het; heur man wet d'r niet van, et is niet an et locht kommen dat ze him poeterig maekt het, omreden zi'j niet trappeerd is en deur gieniene anklaegd is.
14 As zoe'n man zien vrouw, die him poeterig maekt het, in een vlaege van ofgeunst wantrouwt, of as iene uut ofgeunst zien vrouw wantrouwt zonder dat zi'j him poeterig maekt het,
15 dan moet die man mit zien vrouw naor de priester gaon en as offergaove veur heur een tiende efa gaastemael mitnemen. Hi'j mag d'r gien olijfeulie overhenne gieten en d'r gien wierook op leggen, want et is een graonoffer dat uut ofgeunst votkomt, een graonoffer dat een zunde in heugenschop brengt.
16 De priester lat de vrouw naor veuren kommen en brengt heur veur de Heer.
17 Hi'j dot een koeme vol mit heilig waeter en vermengt dat mit stof dat op de vloer van de tabbernakel ligt.
18 Naodat de priester de vrouw veur de Heer brocht het, maekt hi'j heur heufdhaor los en legt hi'j et heugenschopsoffer, et graonoffer van de ofgeunst, op heur haandpalms. Zels het hi'j et bittere, vluukbrengende waeter in zien haand.
19 Dan zegt de priester disse bezwering over de vrouw: "As gieniene aanders as jow eigen man gemienschop mit jow had het, as jow him as trouwde vrouw niet poeterig maekt hebben deur overspeulig te wezen, dan zal dit bittere, vluukbrengende waeter jow niet deren.
20 Mar as jow him as trouwde vrouw poeterig maekt hebben deur overspeulig te wezen, as een aander as jow eigen man gemienschop mit jow had het, dan"
21 – zo zegt de priester de bezwering en vervluking over de vrouw uut – "zal de Heer maeken dat jow naeme nuumd wodt in de vervlukings die d'r bi'j jow volk uutspreuken wodden: hi'j zal jow schoot verschrompelen laoten en jow boek opzwöllen laoten.
22 As dit vluukbrengende waeter in jow ingewanen komt, zwölt jow boek op en verschrompelt jow schoot." De vrouw zegt hierop: "Amen, amen."
23 Dan schrift de priester disse vervluking op een blad en lost hi'j et opschrevene op in et bittere waeter.
24 Dat bittere, vluukbrengende waeter moet hi'j de vrouw te drinken geven, zodat et in heur lichem komt en zien bittere uutwarking het.
25 De priester nemt et graonoffer van de ofgeunst van heur hanen, bödt et de Heer as offergaove an en brengt et naor et alter.
26 Hi'j nemt d'r een haandvol van of en verbraandt dat as teken van de hiele offergaove op et alter. Dan geft hi'j de vrouw et waeter te drinken.
27 As zi'j him poeterig maekt het en ontrouw west is an heur man, zal et vluukbrengende waeter dat hi'j heur te drinken geft in heur lichem zien bittere uutwarking hebben. Heur boek zal opzwöllen en heur schoot verschrompelen, en de naeme van die vrouw zal bi'j heur volk nuumd wodden as et volk iene vervluukt.
28 Mar as de vrouw him niet poeterig maekt het, as zi'j rein is, raekt ze niet schenneseerd en kan ze nog een poppien kriegen.
29 Dit is et veurschrift veur gevallen van ofgeunst, as een trouwde vrouw heur poeterig maekt deur overspeulig te wezen,
30 of as een man zien vrouw in een vlaege van ofgeunst wantrouwt. De man moet de vrouw veur de Heer brengen en de priester moet dit veurschrift hiel percies volgen.
31 De man gaot vri'juut, de vrouw moet boeten veur wat ze misdaon het.”"
Numeri 6
Veurschriften veur nazireeërs
01 De Heer zee tegen Mozes:
02 "Zegge tegen de Israëlieten: “as een man of vrouw een biezundere gelofte oflegt om him as nazireeër an de Heer te wi'jden,
03 moet zoe'niene him ontholen van wien en aandere draank. Hi'j mag ok gien verzoerde wien drinken, gien aandere verzoerde draank en gien droevesap, en hi'j mag gien vasse of dreugde droeven eten.
04 Zolange zien nazireeërschap duurt, mag hi'j niks eten dat van de wienstok ofkomstig is, alderdeegst niet wat dat van de pitten en vellegies maekt wodt.
05 Ok mag, zolange zien nazireeërgelofte gelt, zien heufd niet deur een scheermes anraekt wodden; durende de hiele tied dat hi'j an de Heer wi'jded is, is hi'j heilig en moet hi'j zien heufdhaor gruuien laoten.
06 En zolange hi'j an de Heer wi'jded is, mag hi'j niet in de buurt van een wegraekte kommen.
07 Alderdeegst as zien heit of moeke of zien breur of zuster wegraekt, mag hi'j him niet poeterig maeken deur bi'j heur te kommen, want op zien heufd dreegt hi'j et teken dat hi'j an God wi'jded is.
08 Zolange zien nazireeërschap duurt, is hi'j an de Heer wi'jded.
09 Mar as zien heufdhaor poeterig maekt wodt deurdat d'r hielendal onverwaachs vlakbi'j him iene wegraekt, moet hi'j him op de zeuvende dag wasken deur zien heufdhaor of te scheren.
10 Op de achtste dag moet hi'j de priester, bi'j de ingang van de ontmoetingstente, twie totteldoeven of twie jonge gewone doeven brengen.
11 De priester moet dan de iene doeve as reinigingsoffer opdregen en de aandere as braandoffer en zo verzoening veur him bewarken, omreden hi'j schuld op him laeded het deur vlakbi'j iene te kommen die wegraekt is. Diezelde dag moet hi'j zien heufd weer heiligen,
12 him opni'j veur eenzelde poze as nazireeër an de Heer wi'jden, en een ienjaorige ram as verbeteringsoffer anbieden. De veurige tied telt niet meer, vanwegens de ontwi'jding van zien nazireeërschop.
13 As de tied van et nazireeërschop veurbi'j is, gellen disse veurschriften: De nazireeër moet naor de ingang van de ontmoetingstente brocht wodden,
14 en daor moet hi'j de Heer een offergaove anbieden: een ienjaorige ram zonder ienigst gebrek as braandoffer, een ienjaorige ooi zonder ienigst gebrek as reinigingsoffer en een volwassen ram zonder ienigst gebrek as vredeoffer,
15 veerder een körf mit ongezoerd tarwebrood, dikke broden, mit olijfeulie klaormaekt, en twiehaans ongezoerde broden, mit olijfeulie bestreken, en de bi'jheurende graon- en wienoffers.
16 De priester bödt dit an de Heer an en dreegt et reinigingsoffer en et braandoffer veur de nazireeër op.
17 De volgruuide ramme maekt hi'j klaor as vredeoffer as ere veur de Heer en hi'j bödt daorbi'j de körf mit ongezoerd brood en et bi'jheurende graonoffer en wienoffer an.
18 De nazireeër scheert veur de ingang van de ontmoetingstente zien heufdhaor of, et teken van zien nazireeërschop, en gooit dat in et vuur onder et vredeoffer.
19 Naodat de nazireeër zien heur ofscheerd het, nemt de priester een kookt schoolderstok van de ramme en een dikke en een twiehaans ongezoerd brood uut de körf, en legt dit allemaole op de haandpalms van de nazireeër.
20 De priester bödt et de Heer as offergaove an. Et is heilig en bestemd veur de priester, krek as et boststok en de rechteraachterboolte. Daornao mag de nazireeër weer wien drinken.
21 Dit bin de veurschriften veur de nazireeër, die op grond van zien wi'jding de Heer een offergaove schuldig is. Neffens de veurschriften mit betrekking tot et nazireeërschop moet hi'j de toezegging die hi'j daon het hiel precies naokommen. As hi'j et him veroorloven kan, mag hi'j nog meer geven.”"
De priesterzegen
22 De Heer zee tegen Mozes:
23 "Zegge tegen Aäron en zien zeunen dat zi'j de Israëlieten mit disse woorden zegenen moeten:
24 “mag de Heer jim zegenen en jim huden,
25 mag de Heer et locht van zien gezicht over jim schienen laoten en jim genaodig wezen,
26 mag de Heer jim zien gezicht toekeren en jim vrede geven.”
27 As zi'j mien naeme over et volk uutspreken, za'k de Israëlieten zegenen."
Numeri 7
De inwijdingsgeschenken
01 Op de dag waorop Mozes de laeste haand legde an et opbouwen van de tabbernakel, zalfde hi'j die, mit alle toeheuren, en ok et alter en et altergerei; zo heiligde hi'j alles.
02 Daornao brochten de leiders van de Israëlieten, de femilie-ooldsten die an et heufd van de stammen stonnen en de leiding hadden bi'j de inschrijving,
03 de Heer kedo's: zes waegens mit een huif en twaelf ossen – ieder twietal leiders gaf gezaemelik een waegen en iederiene van heur ofzunderlik gaf een os. Doe ze die veur de tabbernakel zet hadden,
04 zee de Heer tegen Mozes:
05 "Neem disse kedo's van heur an en bruuk ze veur de ontmoetingstente. Laot de Levieten ze bruken, ofhaankelik van de opdracht die iederiene het."
06 Doe gaf Mozes de waegens en de ossen an de Levieten.
07 An de Gersonieten gaf hi'j twie waegens en vier ossen, rekening hooldende mit heur taeken,
08 en an de Merarieten gaf hi'j vier waegens en acht ossen, in overienstemming mit de taeken die zi'j onder leiding van Itamar, de zeune van de priester Aäron, doen zollen.
09 An de Kehatieten gaf hi'j niks, omreden zi'j de zorg kregen hadden veur de heiligste veurwarpen, die op de schoolders dreugen wodden mossen.
10 De leiders van Israël brochten ok kedo's veur de inwijding van et alter. Doe ze op de dag waorop et zalfd wodde mit heur kedo's bi'j et alter kwammen,
11 zee de Heer tegen Mozes: "Laot iedere dag iene van heur zien kedo's veur de inwijding van et alter anbieden."
12 Degene die op de eerste dag zien kedo's anbeud was Nachson, de zeune van Amminadab, uut de stamme Juda.
13 Zien gaove beston uut een zulveren schottel die honderddattig sjekel weug, neffens et iekergewicht van et heiligdom, en een zulveren offerschaole van zeuventig sjekel, beide vol mit weitenbloem mingd mit olijfeulie, bestemd veur een graonoffer;
14 een goolden schaole van tien sjekel, vol mit roekersgoed;
15 een jonge bolle, een volwassen ramme en een ienjaorige ram as braandoffer;
16 een bok as reinigingsoffer,
17 en twie runder, vuuf volwassen rammen, vuuf bokken en vuuf ienjaorige rammen as vredeoffer. Dat was et kedo van Nachson, de zeune van Amminadab.
18 De twiede dag beud Netanel, de zeune van Suar, et heufd van de stamme Issachar, zien kedo's an.
19 Hi'j gaf een zulveren schottel die honderddattig sjekel weug, neffens et iekergewicht van et heiligdom, en een zulveren offerschaole van zeuventig sjekel, beide vol mit weitenbloem mingd mit olijfeulie, bestemd veur een graonoffer;
20 een goolden schaole van tien sjekel, vol mit roekersgoed;
21 een jonge bolle, een volwassen ramme en een ienjaorige ram as braandoffer;
22 een bok as reinigingsoffer,
23 en twie runder, vuuf volwassen rammen, vuuf bokken en vuuf ienjaorige rammen as vredeoffer. Dat was et kedo van Netanel, de zeune van Suar.
24 De dadde dag kwam et heufd van de Zebulonieten, Eliab, de zeune van Chelon.
25 Zien gaove beston uut een zulveren schottel die honderddattig sjekel weug, neffens et iekergewicht van et heiligdom, en een zulveren offerschaole van zeuventig sjekel, beidend vol mit weitenbloem mingd mit olijfeulie, bestemd veur een graonoffer;
26 een goolden schaole van tien sjekel, vol mit roekersgoed;
27 een jonge bolle, een volwassen ramme en een ienjaorige ram as braandoffer;
28 een bok as reinigingsoffer,
29 en twie runder, vuuf volwassen rammen, vuuf bokken en vuuf ienjaorige rammen as vredeoffer. Dat was et kedo van Eliab, de zeune van Chelon.
30 De vierde dag kwam et heufd van de Rubenieten, Elisur, de zeune van Sedeür.
31 Zien gaove beston uut een zulveren schottel die honderddattig sjekel weug, neffens et iekergewicht van et heiligdom, en een zulveren offerschaole van zeuventig sjekel, beidend vol mit weitenbloem mingd mit olijfeulie, bestemd veur een graonoffer;
32 een goolden schaole van tien sjekel, vol mit roekersgoed;
33 een jonge bolle, een volwassen ramme en een ienjaorige ram as braandoffer;
34 een bok as reinigingsoffer,
35 en twie runder, vuuf volwassen rammen, vuuf bokken en vuuf ienjaorige rammen as vredeoffer. Dat was et kedo van Elisur, de zeune van Sedeür.
36 De vuufde dag kwam et heufd van de Simeonieten, Selumiël, de zeune van Surisaddai.
37 Zien gaove beston uut een zulveren schottel die honderddattig sjekel weug, neffens et iekergewicht van et heiligdom, en een zulveren offerschaole van zeuventig sjekel, beidend vol mit weitenbloem mingd mit olijfeulie, bestemd veur een graonoffer;
38 een goolden schaole van tien sjekel, vol mit roekersgoed;
39 een jonge bolle, een volwassen ramme en een ienjaorige ram as braandoffer;
40 een bok as reinigingsoffer,
41 en twie runder, vuuf volwassen rammen, vuuf bokken en vuuf ienjaorige rammen as vredeoffer. Dat was et kedo van Selumiël, de zeune van Surisaddai.
42 De zesde dag kwam et heufd van de Gadieten, Eljasaf, de zeune van Deüel.
43 Zien gaove beston uut een zulveren schottel die honderddattig sjekel weug, neffens et iekergewicht van et heiligdom, en een zulveren offerschaole van zeuventig sjekel, beidend vol mit weitenbloem mingd mit olijfeulie, bestemd veur een graonoffer;
44 een goolden schaole van tien sjekel, vol mit roekersgoed;
45 een jonge bolle, een volwassen ramme en een ienjaorige ram as braandoffer;
46 een bok as reinigingsoffer,
47 en twie runder, vuuf volwassen rammen, vuuf bokken en vuuf ienjaorige rammen as vredeoffer. Dat was et kedo van Eljasaf, de zeune van Deüel.
48 De zeuvende dag kwam et heufd van de Efraïmieten, Elisama, de zeune van Ammihud.
49 Zien gaove beston uut een zulveren schottel die honderddattig sjekel weug, neffens et iekergewicht van et heiligdom, en een zulveren offerschaole van zeuventig sjekel, beidend vol mit weitenbloem mingd mit olijfeulie, bestemd veur een graonoffer;
50 een goolden schaole van tien sjekel, vol mit roekersgoed;
51 een jonge bolle, een volwassen ramme en een ienjaorige ram as braandoffer;
52 een bok as reinigingsoffer,
53 en twie runder, vuuf volwassen rammen, vuuf bokken en vuuf ienjaorige rammen as vredeoffer. Dat was et kedo van Elisama, de zeune van Ammihud.
54 De achtste dag kwam et heufd van de Manassieten, Gamliël, de zeune van Pedasur.
55 Zien gaove beston uut een zulveren schottel die honderddattig sjekel weug, neffens et iekergewicht van et heiligdom, en een zulveren offerschaole van zeuventig sjekel, beidend vol mit weitenbloem mingd mit olijfeulie, bestemd veur een graonoffer;
56 een goolden schaole van tien sjekel, vol mit roekersgoed;
57 een jonge bolle, een volwassen ramme en een ienjaorige ram as braandoffer;
58 een bok as reinigingsoffer,
59 en twie runder, vuuf volwassen rammen, vuuf bokken en vuuf ienjaorige rammen as vredeoffer. Dat was et kedo van Gamliël, de zeune van Pedasur.
60 De negende dag kwam et heufd van de Benjaminieten, Abidan, de zeune van Gidoni.
61 Zien gaove beston uut een zulveren schottel die honderddattig sjekel weug, neffens et iekergewicht van et heiligdom, en een zulveren offerschaole van zeuventig sjekel, beidend vol mit weitenbloem mingd mit olijfeulie, bestemd veur een graonoffer;
62 een goolden schaole van tien sjekel, vol mit roekersgoed;
63 een jonge bolle, een volwassen ramme en een ienjaorige ram as braandoffer;
64 een bok as reinigingsoffer,
65 en twie runder, vuuf volwassen rammen, vuuf bokken en vuuf ienjaorige rammen as vredeoffer. Dat was et kedo van Abidan, de zeune van Gidoni.
66 De tiende dag kwam et heufd van de Danieten, Achiëzer, de zeune van Ammisaddai.
67 Zien gaove beston uut een zulveren schottel die honderddattig sjekel weug, neffens et iekergewicht van et heiligdom, en een zulveren offerschaole van zeuventig sjekel, beidend vol mit weitenbloem mingd mit olijfeulie, bestemd veur een graonoffer;
68 een goolden schaole van tien sjekel, vol mit roekersgoed;
69 een jonge bolle, een volwassen ramme en een ienjaorige ram as braandoffer;
70 een bok as reinigingsoffer,
71 en twie runder, vuuf volwassen rammen, vuuf bokken en vuuf ienjaorige rammen as vredeoffer. Dat was et kedo van Achiëzer, de zeune van Ammisaddai.
72 De elfde dag kwam et heufd van de Aserieten, Pagiël, de zeune van Ochran.
73 Zien gaove beston uut een zulveren schottel die honderddattig sjekel weug, neffens et iekergewicht van et heiligdom, en een zulveren offerschaole van zeuventig sjekel, beidend vol mit weitenbloem mingd mit olijfeulie, bestemd veur een graonoffer;
74 een goolden schaole van tien sjekel, vol mit roekersgoed;
75 een jonge bolle, een volwassen ramme en een ienjaorige ram as braandoffer;
76 een bok as reinigingsoffer,
77 en twie runder, vuuf volwassen rammen, vuuf bokken en vuuf ienjaorige rammen as vredeoffer. Dat was et kedo van Pagiël, de zeune van Ochran.
78 De twaelfde dag kwam et heufd van de Naftalieten, Achira, de zeune van Enan.
79 Zien gaove beston uut een zulveren schottel die honderddattig sjekel weug, neffens et iekergewicht van et heiligdom, en een zulveren offerschaole van zeuventig sjekel, beidend vol mit weitenbloem mingd mit olijfeulie, bestemd veur een graonoffer;
80 een goolden schaole van tien sjekel, vol mit roekersgoed;
81 een jonge bolle, een volwassen ramme en een ienjaorige ram as braandoffer;
82 een bok as reinigingsoffer,
83 en twie runder, vuuf volwassen rammen, vuuf bokken en vuuf ienjaorige rammen as vredeoffer. Dat was et kedo van Achira, de zeune van Enan.
84 Dit weren de kedo's die de leiders van de Israëlieten veur de inwijding van et alter anbeuden op de dag dat et zalfd wodde: aldereerst twaelf zulveren schottels, twaelf zulveren offerschaolen en twaelf goolden schaolen.
85 Gewicht van iedere zulveren schottel: honderddattig sjekel; gewicht van een offerschaole: zeuventig; in tetaol weugen disse zulveren veurwarpen vierentwintighonderd sjekel, neffens et iekergewicht van et heiligdom.
Numeri 8
De laampestaander
01 De Heer zee tegen Mozes:
02 "Zegge tegen Aäron dat hi'j de laampen zo op de staander zet dat et locht van alle zeuven laampen naor veuren vaalt."
03 Aäron dee dit; hi'j zette de laampen zo op de staander dat et locht naor veuren vul, zoas de Heer Mozes opdreugen hadde.
04 De hiele laampestaander, van de voete tot an de bloemeversiering bovenan, was uut iene stok goold dreven. Hi'j was maekt neffens et veurbeeld dat de Heer an Mozes zien laoten hadde.
Wi'jding van de Levieten
05 De Heer zee tegen Mozes:
06 "Zonder de Levieten van de overige Israëlieten of en waske heur.
07 Ie moe'n heur besprinkelen mit schoonmaekwaeter, en dan moe'n zi'j heur hiele lichem scheren en heur kleraosie wasken. Daornao bin ze rein.
08 Dan moe'n ze een jonge bolle brengen mit et bi'jheurende graonoffer van weitenbloem mingd mit olijfeulie. Laot zels een twiede jonge bolle brengen veur een reinigingsoffer.
09 Dreeg de Levieten op om naor de ruumte veur de ontmoetingstente te gaon en roepe de voltallige gemienschop van Israël bi'jenneer.
10 Aj' de Levieten zo veur de Heer brocht hebben, moe'n de Israëlieten heur de haand opleggen
11 en moet Aäron heur naemens de Israëlieten as offergaove an de Heer anbieden; zi'j bin bestemd veur de dienst van de Heer.
12 Laot de Levieten heur haand op de kop van de jonge bollen leggen, en dreeg daornao de iene bolle as reinigingsoffer en de aandere as braandoffer an de Heer op om verzoening veur de Levieten te bewarken.
13 Stelle de Levieten te beschikking van Aäron en zien zeunen en biede heur as offergaove an de Heer an.
14 Zo zonder ie heur van de overige Israëlieten of en wodden zi'j mien eigendom.
15 Naodat ie de Levieten schonemaekt hebben en heur as offergaove anbeuden hebben, meugen zi'j bi'j de ontmoetingstente dienst doen.
16 Zi'j bin bestemd om hielendal an mi'j ofstaon te wodden. Ik hebbe heur veur mi'jzels uutkeuzen in et plak van alle eerstgeborenen onder de Israëlieten, iederiene die as eerste de moekeschoot verlaot.
17 Alle eerstgeborenen van Israël, liekegoed van de meensken as van de dieren, beheuren mi'j ommes toe: op de dag da'k de eerstgeborenen in Iegypte ommebrocht, he'k heur veur mi'jzels bestemd,
18 en in et plak van de eerstgeboren Israëlieten he'k de Levieten uutkeuzen.
19 Ik hebbe heur hielendal te beschikking van Aäron en zien zeunen steld. De Levieten moe'n as vertegenwoordigers van de Israëlieten wark bi'j de ontmoetingstente doen en verzoening veur de Israëlieten bewarken. Zo veurkommen zi'j dat de Israëlieten, as iene te dichte bi'j et heiligdom komt, deur een plaoge troffen wodden."
20 Mozes en Aäron en hiel Israël deden alles wat de Heer Mozes mit betrekking tot de Levieten opdreugen hadde.
21 De Levieten reinigden heur en wasten heur kleraosie, en Aäron beud heur as offergaove an de Heer an en voltrok de verzoeningsrite an heur. Zo reinigde hi'j heur.
22 Daornao konnen de Levieten heur wark bi'j de ontmoetingstente doen, onder toezicht van Aäron en zien zeunen. Alles wat de Heer Mozes mit betrekking tot de Levieten opdreugen hadde, wodde daon.
23 De Heer zee tegen Mozes:
24 "Veur de Levieten gelt dit veurschrift: iederiene van vuventwintig jaor of oolder moet wark bi'j de ontmoetingstente doen.
25 Wie vuuftig jaor is, is van die verplichting ontsleugen en hoeft niet langer dienst te doen.
26 Wel mag hi'j zien femilie nog behulpzem wezen bi'j et doen van heur wark bi'j de ontmoetingstente. Zo moej' et wark van de Levieten regelen."
Numeri 9
Pesachviering
01 In de eerste maond van et twiede jaor nao de uuttocht uut Iegypte keerde de Heer him in de Sinaiwoestijn naor Mozes. Hi'j zee:
02 "De Israëlieten moe'n op de daorveur vaastestelde tied et pesachoffer klaormaeken.
03 Dat moet gebeuren op de veertiende dag van disse maond, in de aovendschiemer, op de vaastestelde tied, mit inachtneming van alle veurschriften en regels die d'r veur gellen."
04 Mozes dreug de Israëlieten op om et pesachoffer klaor te maeken,
05 en zo vierden ze op de veertiende dag van de eerste maond, in de aovendschiemer, in de Sinaiwoestijn et pesachfeest; ze vierden et krek zoas de Heer et Mozes zegd hadde.
06 Now weren goenend poeterig deurdat ze mit een liek in anraeking west weren, zodat ze die dag gien Pesach vieren konnen. Zi'j gongen heur nog dezelde daegs naor Mozes en Aäron.
07 "Wi'j bin poeterig deurdat we mit een liek in anraeking west binnen," zeden ze. "Moet dat echt een beletsel wezen om saemen mit de aandere Israëlieten op de vaastestelde tied oons offer an de Heer te brengen?"
08 "Waacht hiere," zee Mozes doe, "dan gao 'k vraogen wat de Heer van jim verlangt."
09 Doe zee de Heer tegen Mozes:
10 "Zegge tegen de Israëlieten: “as iene van jim of van jim naokommelingen poeterig is deurdat hi'j mit een liek in anraeking west is of as iene een vere reize maekt, en hi'j wil toch as ere veur de Heer et pesachoffer klaormaeken,
11 dan moet hi'j dat doen in de twiede maond, op de veertiende dag, in de aovendschiemer. Hi'j moet d'r ongezoerd brood en bittere kruden bi'j eten.
12 D'r mag van et offerdier niks overblieven tot de aanderemorgen, en de bonken meugen niet breuken wodden. Alle veurschriften veur et pesachfeest moe'n hiel precies in acht neumen wodden.
13 Mar wie rein is en niet op reize en desondaanks naolat om et pesachoffer klaor te maeken, moet uut de gemienschop stoten wodden omreden hi'j de Heer niet op de vaastestelde tied zien offer brocht het. Zoe'niene moet de gevolgen van zien zunde dregen.
14 Wil een vremde die bi'j jim woont as ere veur de Heer een pesachoffer klaormaeken, dan moet hi'j dat doen mit inachtneming van de veurschriften en regels die veur Pesach gellen. Veur vremden en veur geboren Israëlieten gelt iene en dezelde wet.”"
De wolke
15 Op de dag waorop de tabbernakel mit de verbondstekst opbouwd was, wodde hi'j overdekt deur een wolke. Die aovend was de wolke as een lochtend vuur boven de tabbernakel te zien, en dat bleef zo tot de aanderemorgens.
16 Zo was et de hieltied: de wolke overdekte de tabbernakel en was naachs te zien as een vuur.
17 Iederkeer as de wolke boven de tente vottrok trokken de Israëlieten veerder, en op et plak waor de wolke stille staon bleef sleugen zi'j heur kaamp op.
18 Op kommedaosie van de Heer trokken de Israëlieten veerder, en op kommedaosie van de Heer sleugen ze heur kaamp op. Zolange de wolke op de tabbernakel liggen bleef, bleven ze op et plak waor ze weren.
19 Bleef de wolke een hiele poze boven de tabbernakel hangen, dan brakken de Israëlieten al die tied niet op; ze hullen heur an de anwiezings van de Heer.
20 Seins bleef de wolke mar een peer daegen boven de tabbernakel hangen. Ok dan sleugen zi'j heur kaamp op as de Heer daortoe kommedaosie gaf en trokken ze weer veerder as de Heer et heur opdreug.
21 Seins bleef de wolke ok alliend mar van de aovend tot de morgen. As hi'j dan morgens vottrok, trokken zi'j veerder. Zogauw de wolke vottrok, of dat now daegs gebeurde of naachs, trokken ze veerder.
22 Bleef de wolke langere tied boven de tabbernakel hangen – een peer daegen of een maond of nog langer – dan bleven de Israëlieten al die tied op et plak waor ze weren; eerst as hi'j vottrok trokken zi'j weer veerder.
23 Op kommedaosie van de Heer sleugen ze heur kaamp op, en op kommedaosie van de Heer trokken ze veerder. Ze hullen heur an de anwiezings van de Heer, die de Heer heur deur de mond van Mozes geven hadde.
Numeri 10
De trompetten
01 De Heer zee tegen Mozes:
02 "Maek van dreven zulver twie trompetten om de gemienschop bi'jenneer te roepen en om et sein tot opbreken van et legerkaamp te geven.
03 Wodt d'r op beide trompetten blaozen, dan moet de hiele gemienschop him bi'j je verzaemelen, bi'j de ingang van de ontmoetingstente.
04 As op iene d'r van blaozen wodt, verzaemelen de leiders van Israël, de anvoerders van de legerienheden, heur bi'j je.
05 Wodt d'r een luud signaol blaozen, dan breken de ofdielings op die an de oostkaante legerd binnen;
06 op een twiede luud signaol breken de ofdielings op die an de zuudkaante legerd binnen. Iederkeer as et kaamp opbreuken wodden moet, moet d'r een luud signaol geven wodden.
07 Veur et bi'jenneer roepen van de gemienschop gebeurt dat niet: dan wodt d'r gien luud signaol blaozen, mar een gewone trompetstoot geven.
08 Et blaozen op de trompetten is de taeke van Aäron zien naokommelingen, de priesters. Disse bepaoling blift veur altied van kracht, veur alle kommende generaosies.
09 Aj'm in je eigen laand deur vi'janen belaogd wodden en de stried angaon, blaoze dan een alaarmsignaal om de Heer, jim God, an jim te heugen; dan zuj' van je vi'janen verlost wodden.
10 Ok aj'm feestvieren, op de vaaste feesten en bi'j ni'jemaone, en braandoffers en vredeoffers brengen, moet d'r op de trompetten blaosd wodden om jim in heugenschop te brengen bi'j jim God. Ik bin de Heer, jim God."
Vertrek uut de Sinaiwoestijn
11 Op de twintigste dag van de twiede maond in et twiede jaor kwam de wolke omhogens van de tabbernakel mit de verbondstekst
12 en trokken de Israëlieten in de veurschreven volgodder vot uut de Sinaiwoestijn. De wolke bleef rusten in de woestijn van Paran.
13 Dit was de eerste keer dat ze opbrakken zoas de Heer heur deur Mozes opdreugen hadde.
14 Et eerst brakken de ofdielings op die bi'j et vaandel van de Judeeërs legerd weren. Anvoerder van et leger van Juda was Nachson, de zeune van Amminadab,
15 anvoerder van et leger van de stamme Issachar was Netanel, de zeune van Suar,
16 anvoerder van et leger van de stamme Zebulon was Eliab, de zeune van Chelon.
17 Daornao wodde de tabbernakel ofbreuken en brakken de Gersonieten en de Merarieten op, die him vervoerden.
18 Dan brakken de ofdielings op die bi'j et vaandel van Ruben legerd weren. Anvoerder van et leger van Ruben was Elisur, de zeune van Sedeür,
19 anvoerder van et leger van de stamme Simeon was Selumiël, de zeune van Surisaddai,
20 anvoerder van et leger van de stamme Gad was Eljasaf, de zeune van Deüel.
21 Nao heur brakken de Kehatieten op, die de heilige veurwarpen dreugen; veurdat zi'j ankwammen, was de tabbernakel al weer opbouwd.
22 Daornao brakken de ofdielings op die bi'j et vaandel van de Efraïmieten legerd weren. Anvoerder van et leger van Efraïm was Elisama, de zeune van Ammihud,
23 anvoerder van et leger van de stamme Manasse was Gamliël, de zeune van Pedasur,
24 anvoerder van et leger van de stamme Benjamin was Abidan, de zeune van Gidoni.
25 Bi'j slot van zaeke brakken de ofdielings op die bi'j et vaandel van de Danieten legerd weren; zi'j vormden de achterhoede. Anvoerder van et leger van Dan was Achiëzer, de zeune van Ammisaddai,
26 anvoerder van et leger van de stamme Aser was Pagiël, de zeune van Ochran,
27 anvoerder van et leger van de stamme Naftali was Achira, de zeune van Enan.
28 Dit was de volgodder waorin de legerofdielings van de Israëlieten opbrakken, en in die volgodder trokken ze ok veerder.
29 Mozes zee tegen Chobab, de zeune van de Midjaniet Reüel, Mozes zien schoonheit: "Wi'j vertrekken now naor et gebied dat de Heer oons toezegd het. Gao mit oons mit; ie zullen et goed bi'j oons hebben, want de Heer het Israël veurspoed toezegd."
30 Mar hi'j zee doe dat hi'j liever naor zien geboortelaand weerommegong.
31 "Gao asjeblief niet bi'j oons weg," zee Mozes. "Ie weten ommes waor wi'j in de woestijn et beste oonze tenten opslaon kunnen, ie kunnen oonze gids wezen.
32 Aj' mit oons mitgaon, zuwwe je patten laoten in de veurspoed die de Heer oons geven zal."
33 Naodat ze bi'j de barg van de Heer weg gaon weren, trokken ze drie daegen veerder. De ark van et verbond mit de Heer gong veur heur uut om een rustplak veur heur te zuken.
34 As ze veerder trokken, hong daegs de wolke van de Heer boven heur.
35 De hieltied as de ark veerder trekken zol zee Mozes:
"Stao op, Heer, en jow vi'janen stoeven uutmekere,
jow tegenstaanders vlochten veur jow!"
36 En de hieltied as de ark stille staon bleef zee hi'j:
"Keer weeromme, Heer, naor Israël,
keer weeromme naor de tienduzend maol duzenden!"
Numeri 11
Et volk klaegt
01 Et volk begon de Heer zien nood te klaegen. Doe de Heer dat heurde wodde hi'j poer lelk, en et vuur van de Heer laaide op en greep om him henne an de raand van et kaamp.
02 Et volk reup Mozes luud om hulpe en Mozes biddede tot de Heer. Doe gong et vuur uut.
03 Ze nuumden dat plak Tabera, omreden daor et vuur van de Heer bi'j heur oplaaid was.
04 Et riprap van vremden dat mit heur mittrok, was niet zae te kriegen, en de Israëlieten begonnen ok weer te krimmeneren. "Hawwe mar vleis om te eten!" zeden ze.
05 "We gunteren weeromme naor de vis die we in Iegypte volop te eten hadden, naor de komkommers en waetermeloenen, de prei, siepels en knoflook.
06 We drugen uut, we zien gienertied wat aanders as dat manna."
07 (et manna leek op korianderzaod mar hadde de kleur van balsemhas.
08 Ze verzaemelden et rondomme, maelden et mit een haandmeule of stampten et fien in een tonmeule, kookten et in een pot en maekten d'r koeken van. Die smaekten krek as ze in eulie bakt weren.
09 As et kaamp naachs deur de dauw bedekt wodde, daelde ok et manna d'r op daele.)
10 Mozes heurde hoe alle femilies bi'j de ingang van heur tente zatten te klaegen. Doe de Heer hatstikke lelk wodde, maekte Mozes him kwaod.
11 Hi'j vreug de Heer: "Waoromme doen jow jow knecht dit an? Bin jow mi'j zo minnig genegen, dat jow mi'j de last van hiel dit volk te dregen geven?
12 Bin ik seins zwanger west van dit volk, hebbe ikke et op de wereld zet? En dan willen jow mi'j opdregen om et in mien aarms te dregen, zoas een voedster een klein kiend dreegt, en et zo naor et laand te brengen dat jow zien veuroolden onder ede toezegd hebben?
13 Ze kommen bi'j mi'j te krimmeneren dat ze vleis hebben willen. Mar waor hael ik veur dit hiele volk vleis weg?
14 Ik alliend kan de last van dit hiele volk niet dregen, dat is te zwaor veur mi'j.
15 As jow mi'j dit warkelik andoen willen, maek mi'j dan liever drekt van kaant. Dan blift veerdere ellende mi'j temeensen bespeerd."
16 De Heer zee doe tegen Mozes: "Breng zeuventig van de ooldsten van Israël bi'jenneer van wie ie weten dat ze heur taeke as opzichter van et volk goed uutvoeren, en laot heur naor de ontmoetingstente kommen om daor bi'j jow te kommen.
17 Ik zal daelekommen om daor mit jow te praoten, en een pat van de geest die op jow rust za'k op heur overdregen. Dan kun zi'j saemen mit jow de last van et volk dregen en hoef ie dat niet langer alliend te doen.
18 En tegen et volk moej' zeggen: “zorge d'r veur daj'm morgen rein binnen, dan kriej'm vleis te eten. Jim hebben ommes bi'j de Heer klaegd daj'm gien vleis hebben en daj'm et in Iegypte zo goed hadden? Now dan, de Heer zal jim vleis geven – en vleis zuj'm eten!
19 Niet zomar iene dag, gien twie daegen, gien vieve of tiene of twintig daegen,
20 mar een volle maond, tot et jim de neuze uut komt en jim d'r misselik van wodden. Want jim hebben de Heer, die midden tussen jim is, minacht deur d'r over te krimmeneren daj'm uut Iegypte votgaon binnen.”"
21 Mozes zee: "Ik hebbe hier een volk van zeshonderdduzend meensken bi'j me, en jow zeggen daj' heur vleis geven zullen en dat ze daor een volle maond van eten zullen?
22 Hoe zollen d'r iens genoeg schaopen, geiten en runder veur heur slaacht wodden kunnen? Alderdeegst as alle visken van de zee vongen wodden, zollen ze daor niet genoeg an hebben."
23 Mar de Heer zee doe: "Schöt de macht van de Heer seins tekot? Ie zullen gauw zien as ik mien toezegging naokomme."
24 Mozes gong naor buten en brocht de woorden van de Heer an et volk over. Daornao brocht hi'j zeuventig ooldsten van et volk bi'jenneer en stelde heur rond de tente op.
25 Doe daelde de Heer of, in de wolke. Hi'j praotte tegen Mozes en dreug een pat van de geest die op him rustte, op de zeuventig ooldsten over. Zogauw de geest op heur daelekwam begonnen zi'j te profeteren. Dat is daornao niet opni'j gebeurd.
26 Twie manluden, van wie de iene Eldad hiette en de aander Medad, weren in et kaamp bleven; zi'j stonnen wel op de liest van zeuventig mar weren niet naor de tente gaon. Zogauw de geest op heur daelekwam begonnen zi'j ok te profeteren, in et kaamp.
27 Een jongvent leup hadde naor Mozes toe en zee: "Eldad en Medad bin in et kaamp an et profeteren!"
28 "Zegge dat ze daormit opholen, heer!" zee Jozua, de zeune van Nun, die van jongs of an Mozes zien rechterhaand west was.
29 Mar Mozes zee: "Daenk ie seins daj' veur mien belangen opkommen moeten? Legde de Heer zien geest mar op hiel et volk! Profeteerde iederiene mar!"
30 Daornao gongen Mozes en de ooldsten van Israël naor et kaamp weeromme.
31 Doe leut de Heer een wiend antrekken, die vanof de zee kwattels anvoerde en ze boven et kaamp daeleflappen leut. Ze laggen rondomme rond et kaamp, tot op een ofstaand van een dagreize, in een laoge van wel twie el dikke.
32 Et volk zocht de kwattels op en was daor de hiele dag en de hiele naacht mit in de weer, en ok de hiele aanderedaegs. Gieniene gadderde minder as wat tien ezels dregen konnen. Ze legden ze rondomme rond et kaamp te drugen.
33 Mar ze hadden et vleis nog niet fienkauwd of de Heer wodde poer lelk tegen et volk en brocht et een grote slag toe.
34 Dat plak kreeg de naeme Kibrot-Hattaäwa, naor et volk dat niet zae te kriegen was en dat daor begreven wodde.
35 Van Kibrot-Hattaäwa trok et volk veerder naor Chaserot, en daor bleven ze een tiedlaank.
Numeri 12
Mozes zien gezag
betwist
01 Mirjam en Aäron maekten anmarkings op Mozes vanwegens zien huwelik mit een Nubische vrouw: "Hi'j is mit een Nubische trouwd!"
02 Ok zeden ze: "Het de Heer seins alliend deur de mond van Mozes praot en niet ok deur oonze mond?" De Heer heurde dit.
03 Now was Mozes een slim bescheiden man – gieniene op de hiele wereld was zo bescheiden as hi'j.
04 Vot-en-daolik leut de Heer Mozes, Aäron en Mirjam bi'j him kommen: "Gao alle drieje naor de ontmoetingstente." Dat deden ze.
05 Doe kwam de Heer daele in de wolkekelom, gong bi'j de ingang van de tente staon en reup Aäron en Mirjam. Naodat zi'j beiden naor veuren kommen weren,
06 zee hi'j: "Luuster goed. As d'r bi'j jim een profeet van de Heer is, maek ik mi'j in visioenen an him bekend en praot ik mit him in dromen.
07 Mar mit mien knecht Mozes, op wie ik hielendal vertrouwen kan, gao ik aanders omme:
08 mit him praot ik rechtstreeks, dudelik, niet in raodsels, en hi'j zicht mien postuur. Hoe durven jim dan anmarkings op mien knecht Mozes te maeken?"
09 De Heer wodde poerlelk tegen heur en gong vot.
10 Amper hadde de wolke de tente verlaoten of Mirjam wodde troffen deur een huudziekte, heur huud was wit as sni'j. Doe Aäron him naor Mirjam ommedri'jde en zag dat ze deur een huudziekte troffen was,
11 zee hi'j tegen Mozes: "Ik smeek je, reken oons de zunde die wi'j in oonze dwaeshied begaon hebben niet an.
12 Laot Mirjam niet as een doodgeboren kiend blieven, waorvan et lichem al half vergaon is as et uut de moekeschoot komt!"
13 Doe reup Mozes luud naor de Heer: "Ik smeke jow, God, genees heur!"
14 De Heer zee doe tegen Mozes: "As heur heit heur eupenlik in heur gezichte spi'jd hadde, zol zi'j die schaande zeuven daegen dregen moeten. Daorom moet ze zeuven daegen buten et kaamp hullen wodden, daornao mag zi'j weerommekommen."
15 Zo wodde Mirjam zeuven daegen buten et kaamp hullen, en et volk breuk niet op zolange zi'j niet weerommekommen was.
16 Nao heur weerommekommen trokken ze vot uut Chaserot en sleugen ze heur kaamp op in de woestijn van Paran.
Numeri 13
Verkenning van Kanaän
01 De Heer zee tegen Mozes:
02 "Stuur d'r een tal manluden op uut om Kanaän, et laand dat ik de Israëlieten geven zal, te verkennen. Kies daortoe uut iedere stamme iene man, een femilieheufd."
03 Mozes dee waor de Heer kommedaosie toe gaf en stuurde d'r vanuut de woestijn van Paran manluden op uut, die allemaole tot de leiders van de Israëlieten heurden.
04 Dit bin heur naemen: uut de stamme Ruben Sammua, de zeune van Zakkur;
05 uut de stamme Simeon Safat, de zeune van Chori;
06 uut de stamme Juda Kaleb, de zeune van Jefunne;
07 uut de stamme Issachar Jigal, de zeune van Josef;
08 uut de stamme Efraïm Hosea, de zeune van Nun;
09 uut de stamme Benjamin Palti, de zeune van Rafu;
10 uut de stamme Zebulon Gaddiël, de zeune van Sodi;
11 van de ofstammelingen van Jozef uut de stamme Manasse Gaddi, de zeune van Susi;
12 uut de stamme Dan Ammiël, de zeune van Gemalli;
13 uut de stamme Aser Setur, de zeune van Michaël;
14 uut de stamme Naftali Nachbi, de zeune van Wofsi;
15 uut de stamme Gad Geüel, de zeune van Machi.
16 Zo hietten de manluden die Mozes d'r op uutstuurde om et laand te verkennen. Hosea, de zeune van Nun, nuumde hi'j Jozua.
17 Doe Mozes heur votstuurde om Kanaän te verkennen, dreug hi'j heur dit op: "Gao eerst deur de Negev en dan de bargen in,
18 en kiek hoe et laand is, of de bevolking stark is of zwak en of d'r een protte of weinig meensken wonen.
19 Kiek of et laand bewoonber is of onherbargzem en hoe de bevolking woont, in gewone dörpen of in vestingsteden,
20 en kiek of de grond vet is of schraol, en of d'r bomen gruuien of niet. En perbeer veural ok om vruchten uut et laand mit te nemen." Et was krek de tied van de eerste droeven.
21 Ze gongen vot en verkenden et laand van de woestijn van Sin tot an Rechob, bi'j Lebo-Hamat.
22 Ze trokken deur de Negev en kwammen daornao in de streek van Hebron, waor de Enakieten Achiman, Sesai en Talmai woonden. (Hebron is zeuven jaor eerder bouwd as Soan in Iegypte.)
23 In et Eskoldal ankommen sneden ze een rank mit iene tros droeven of, die ze mit zien twienen an een stok dregen mossen, en ok wat grenaatappels en viegen.
24 An de droevetrosse die de Israëlieten daor ofsneden, het et Eskoldal zien naeme te daanken.
25 Naodat ze et laand veertig daegen lange verkend hadden, gongen ze weeromme
26 naor Kades in de woestijn van Paran, naor Mozes, Aäron en de aandere Israëlieten. Ze brochten an et hiele volk verslag uut en leuten de vruchten uut et laand zien.
27 "Wi'j bin in et laand west waoj'm oons henne stuurd hebben," vertelden ze an Mozes. "Warkelik, et stroomt over van melk en hunning, en disse vruchten gruuien d'r.
28 Mar daor staot tegenover dat de bevolking van dat laand stark is. De steden bin verstarkt en hiel groot, en ok hebben we d'r Enakieten zien.
29 In de Negev wonen Amalekieten, in et barglaand Hethieten, Jebusieten en Amorieten, en an de kust en bi'j de Jordaan langes wonen Kanaänieten."
30 Kaleb, die veurwezen wol dat et volk him tegen Mozes verzetten zol, zee: "We kun zonder perbleem optrekken en et laand in bezit nemen. We kun dat volk makkelik an."
31 Mar de manluden die mit him mit west weren zeden: "We kun dat volk niet anvalen, et is te stark veur oons."
32 En ze vertelden de Israëlieten verschillende ongeunstige zaeken over et laand dat ze verkend hadden. "Et laand dawwe op oonze verkenningstocht deurkruust hebben," zeden ze, "verslient zien inwoners, en alle meensken die we d'r zien hebben weren uutzunderlik lange.
33 We hebben daor alderdeegst reuzen zien, de Enakieten. Vergeleken bi'j dat volk van reuzen vuulden wi'j oons mar weerdeloze gröshippers, en een protte meer zuwwe in heur ogen ok niet west wezen."
Numeri 14
01 Hierop begon et hiele volk te goelen, hiel de naacht deur klonk heur gejammer.
02 Ze begonnen heur allemaole te beklaegen. "Weren we mar in Iegypte wegraekt," zeden ze tegen Mozes en Aäron, "of hier in de woestijn.
03 Waoromme brengt de Heer oons naor dat laand? Om deur et zweerd omme te kommen, en om oonze vrouwluden en kiender buitmaeken te laoten? We kun beter weerommegaon naor Iegypte."
04 En tegen mekeer zeden ze: "Lao'we een leider kiezen en weerommegaon naor Iegypte."
05 Doe leuten Mozes en Aäron heur op é grond valen, tegenover de hiele gemienschop van Israël.
06 Jozua, de zeune van Nun, en Kaleb, de zeune van Jefunne, twie van degenen die et laand verkend hadden, scheurden heur kleren
07 en zeden tegen de Israëlieten: "Et laand dawwe op oonze verkenningstocht deurkruust hebben is een butengewoon goed laand,
08 een laand dat overlopt van melk en hunning. As de Heer oons goedgeunstig is, zal hi'j oons daorhenne brengen en et oons geven.
09 Mar verzet jim dan niet tegen de Heer en wees niet bange veur de bevolking van et laand: die hakken we mit gemak in de panne. Zi'j hebben gieniene die heur bescharmt en wi'j wodden hulpen deur de Heer. Wees dus niet bange veur heur."
10 Et volk driegde heur te stienigen, mar doe verscheen de majesteit van de Heer in de ontmoetingstente an de Israëlieten.
11 De Heer zee tegen Mozes: "Hoe lange zal dit volk mi'j nog ofwiezen? Hoe lange nog zal et weigeren om op mi'j te vertrouwen ondaanks alle wonderen die ik daon hebbe?
12 Ik zal et mit de pest treffen en et verhinderen et laand in bezit te nemen, en uut jow za'k een volk votkommen laoten dat groter en starker is as dit."
13 Mar Mozes zee tegen de Heer: "As de Iegypteners, bi'j wie jow dit volk mit starke aarm wegleided hebben, dat te weten kommen,
14 zullen zi'j et vertellen an de inwoners van dit laand. Die hebben heurd dat jow, Heer, midden tussen dit volk wonen en dat jow persoonlik an heur verschenen binnen, dat jow wolke boven heur hangt en dat jow daegs in een wolkekelom veur heur uut gaon en naachs in een vuurkelom.
15 As jow now iederiene van dit volk ommebrengen, zullen alle volken die over jow daoden heurd hebben, zeggen:
16 “de Heer was grif niet in staot om dat volk naor et laand te brengen dat hi'j heur onder ede toezegd hadde. Daorom het hi'j heur in de woestijn ofslacht.”
17 Laot daoromme zien hoe groot jow verdreegzemhied is, Heer. Jow hebben ommes zels zegd:
18 “de Heer is geduldig en trouw, schuld en misdaod vergeft hi'j, al lat hi'j niet alles ongestraft en al lat hi'j veur de schuld van de oolden de kiender boeten, en ok et dadde geslacht en et vierde.”
19 Ik smeke jow, toon jow grote trouw en vergeef dit volk zien schuld, zoas jow et algedurig vergiffenis geven hebben, van Iegypte of tot hier an toe."
20 De Heer zee doe: "Ik zal vergeving geven, zoas ie vraogen.
21 Mar zo waor ik leef en de hiele eerde vol is van de majesteit van de Heer,
22 gieniene van degenen die mien majesteit zien hebben en de wonderen die ik in Iegypte en in de woestijn daon hebbe, en die mi'j now al tien keer op de proef steld hebben deur mi'j niet te geheurzemen,
23 zal et laand zien dat ik heur veuroolden onder ede toezegd hebbe. Gieniene van heur die mi'j ofwezen hebben kriegen et te zien.
24 Mar mien knecht Kaleb, die deur een aandere geest bezield was en mi'j hielemaole trouw west is, him za'k naor et laand brengen waor hi'j west is, en zien naokommelingen zullen et in bezit hebben.
25 Now wonen daor de Amalekieten en Kanaänieten nog in de valleien. Keer morgen omme en trekke de woestijn weer in, in de richting van de Rooie Zee."
26 De Heer zee tegen Mozes en Aäron:
27 "Hoe lange blift dit verdurven volk heur nog tegenover mi'j beklaegen? Ik hebbe heur iewige geklaeg lange genoeg anheurd.
28 Zegge heur dit: “zo waor ik leef – zegt de Heer –, ik zal grif mit jim doen wat ik jim zeggen heurd hebbe.
29 Hier in de woestijn zullen jim lieken liggen, de lieken van alleman die inschreven binnen, iederiene van twintig jaor en oolder, gieniene uutzunderd, omreden jim jim tegenover mi'j beklaagd hebben.
30 Jim zullen et laand waorvan ik zweerd hebbe daj'm d'r wonen zollen, niet binnengaon, behalven Kaleb, de zeune van Jefunne, en Jozua, de zeune van Nun.
31 Jim kiender, die neffens jim ofpakt wodden zollen, za'k d'r wel brengen. Zi'j zullen et laand dat jim mit minachtinge ofwezen hebben, kennen leren.
32 Mar wat jim anbelangt, jim lieken zullen hier in de woestijn kommen te liggen,
33 en jim kiender zullen veertig jaor lange deur de woestijn ommezwarven om te boeten veur jim ontrouw, tot jim lieken hier in de woestijn vergaon binnen.
34 Veertig daegen hej'm et laand verkend, veertig jaor zuj'm veur jim schuld boete doen, ien jaor veur iedere dag. Dan zuj'm ondervienen wat et betekent as ik mien hanen van jim oftrekke.”
35 Ik, de Heer, zwere da'k zo te wark gaon zal mit dit hiele verdurven volk, dat tegen mi'j het saemenspand. Hier in de woestijn zal heur leven een aende vienen, hier zullen ze wegraeken."
36 De manluden die Mozes d'r op uutstuurd hadde om et laand te verkennen en die nao heur weerommekommen et volk tot geklaeg anzet hadden deur verschillende ongeunstige verhaelen over dat laand te vertellen,
37 die manluden raekten weg in de buurt van et heiligdom as gevolge van een plaoge, omreden zi'j et laand in een kwaod daglocht steld hadden.
38 Mar twie van de verkenners van et laand, Jozua, de zeune van Nun, en Kaleb, de zeune van Jefunne, bleven in leven.
39 Doe Mozes de woorden van de Heer an de Israëlieten overbrocht, raekte et volk slim in de riebeles.
40 De aanderemorgens vroeg wollen ze de bargen in trekken. "We bin asnog klaor om op te trekken naor et plak waorover de Heer praot het," zeden ze, "we hebben zundigd."
41 Mar Mozes zee: "Waoromme gaon jim in tegen de kommedaosie van de Heer? Zoe'n onderneming is gedoemd om te mislokken.
42 Gao de stried niet an, want de Heer staot niet an jim kaante. Doen jim et toch, dan zuj'm deur jim vi'janen versleugen wodden,
43 want jim kommen daor tegenover de Amalekieten en de Kanaänieten te staon, en jim zullen in de stried ommekommen omreden jim jim van de Heer ofkeerd hebben. De Heer zal jim niet helpen."
44 Toch weren ze zo driest om de bargen in te trekken, hoewel Mozes en de ark van et verbond mit de Heer in et kaamp bleven.
45 De Amalekieten en Kanaänieten die daor in et barglaand woonden, kwammen heur integen, brochten heur een allemachtige nederlaoge toe en dreven heur weeromme tot Chorma.
Numeri 15
Regels en veurschriften
01 De Heer zee tegen Mozes:
02 "Zegge tegen de Israëlieten: “aj'm ienkeer in et laand binnen dat ik jim geven zal om d'r te wonen,
03 en jim brengen de Heer een braandoffer of een vrede-offer van jim runder of van jim schaopen en geiten, om him mit die roekende gaove te behaegen – aj'm now een offer brengen om een gelofte nao te kommen of as vri'jwillige gaove of omreden et een feestdag is –,
04-05 dan moet degene die de Heer een braandoffer of een vrede-offer brengt daor aandere offers an toehaoken. Biede bi'j ieder schaop een graonoffer an van een tiende efa weitenbloem mingd mit een vorrels hin olijfeulie, en een wienoffer van een vorrels hin wien.
06 Bi'j een ram moej' een graonoffer van twie tiende efa weitenbloem mingd mit een dadde hin olijfeulie anbieden,
07 en een wienoffer van een dadde hin wien. Ie moe'n de Heer een roekend offer brengen, om him daormit te behaegen.
08 Aj' de Heer as braandoffer of vredeoffer een rund anbieden om een gelofte nao te kommen,
09 biede dan bi'j dat rund een graonoffer an van drie tiende efa weitenbloem mingd mit een halve hin olijfeulie,
10 en een wienoffer van een halve hin wien; zo is et een roekende gaove die de Heer goeddonkt.
11 Hool disse hoeveulheden an veur iedere bolle, iedere ram, ieder schaop en iedere geit.
12 Hoevule dieren aj' ok offeren, hool bi'j ieder dier disse hoeveulheden an.
13 Dit gelt veur iedere geboren Israëliet die de Heer een offer brengen wil, een roekende gaove die him goeddonkt.
14 En etzelde gelt veur vremden die in de toekomst tiedelik of blievende bi'j jim wonen en die de Heer een offer brengen willen, een roekende gaove die him goeddonkt.
15 Veur de hiele gemienschop gelt iene en dezelde wet, veur jim zels en veur de vremden die bi'j jim wonen, veur alle kommende generaosies. D'r bestaot veur de Heer gien onderscheid tussen jim en vremden.
16 Veur jim en veur de vremden die bi'j jim wonen gelt iene en etzelde veurschrift en iene en dezelde riegel.”"
17 De Heer zee tegen Mozes:
18 "Zegge tegen de Israëlieten: “aj'm ienkeer in et laand binnen wao'k jim hennebreng,
19 en van de opbrengst van de akkers eten, geef dan een pat d'r van an de Heer.
20 Maek van et eerste deeg een brood en geef dat weg, zoaj' ok nao et dösken een pat van je graon weggeven.
21 Van je eerste deeg moej' wat an de Heer geven, jim en alle kommende generaosies.
22 Et kan him veurdoen daj'm per ongelok iene van de geboden verkroepen die de Heer an Mozes geven het om nao te leven –
23 welke van de geboden dan ok, die de Heer jim deur de mond van Mozes oplegd het op die eerste dag dat hi'j zien geboden gaf, of op ienigst mement daornao.
24 Maekt de hiele gemienschop him hieran schuldig, per ongelok en zonder et te beseffen, dan moet ze de Heer een bolle as braandoffer anbieden, een roekende gaove die him goeddonkt, mit et bi'jheurende graon- en wienoffer, zoas veurschreven. Ok moet een bok anbeuden wodden as reinigingsoffer.
25 De priester moet veur de hiele gemienschop van Israël de verzoeningsrite uutvoeren, en dan zal heur vergeving geven wodden, omreden et een onopzettelike misstap was en omreden ze de Heer daorveur een braandoffer en een reinigingsoffer brocht hebben.
26 De hiele gemienschop van Israël zal vergeving kriegen, krek as de vremden die bi'j jim wonen, omreden et een onopzettelike misstap was.
27 Zundigt ien meensken per ongelok, dan moet hi'j een ienjaorige geit as reinigingsoffer anbieden.
28 De priester moet veur zoe'niene, die onbedoeld zundigd het, verzoening bi'j de Heer bewarkstelligen deur de verzoeningsrite veur him te uutvoeren. Dan krigt hi'j vergeving.
29 As iene per ongelok wat misdot, gelt veur geboren Israëlieten en veur vremden die bi'j jim wonen iene en dezelde wet.
30 Mar as iene willens en wetens wat misdot, as et now een geboren Israëliet is of een vremde, spot hi'j mit de Heer. Zoe'niene moet uut de gemienschop stoten wodden,
31 omreden hi'j gien ontzag toond het veur de woorden van de Heer en zien geboden schunnen het. Zoe'niene moet uutstoten wodden, hi'j moet de gevolgen van zien zunde dregen.”"
32 Tiedens heur verblief in de woestijn troffen de Israëlieten es een man an die op sabbat hoolt an et sprokkelen was.
33 Degenen die him antroffen hadden, brochten him veur Mozes en Aäron en veur de hiele gemienschop.
34 Hi'j wodde in bewering steld, omreden nog niet bepaold was wat d'r mit zoe'niene gebeuren mos.
35 De Heer zee tegen Mozes: "Die man moet van kaant maekt wodden. De hiele gemienschop moet him buten et kaamp stienigen."
36 Doe brochten ze him mit zien allen buten et kaamp, en daor brochten ze him omme deur him te stienigen, zoas de Heer Mozes opdreugen hadde.
37 De Heer zee tegen Mozes:
38 "Zegge tegen de Israëlieten dat zi'j en al heur naokommelingen an de zeum van heur kleraosie kwassies vaastemaeken moeten waorin een blauwpurperen draod verwarkt is.
39 Bi'j et zien van die kwassies zuj'm herinnerd wodden an alle geboden van de Heer, zodat jim die naoleven en mi'j niet ontrouw wodden deur de gunteringen van je hatte en je ogen te volgen.
40 Ze zullen jim helpen om an al mien geboden te daenken en die nao te leven en jim God toewi'jded te blieven.
41 Ik bin de Heer, jim God, die jim uut Iegypte wegleided het om jim God te wezen. Ik bin de Heer, jim God."
Numeri 16
Et gezag van Mozes en Aäron betwist
01-02 De Leviet Korach, de zeune van Jishar, de zeune van Kehat, en de Rubenieten Datan en Abiram, de zeunen van Eliab, en On, de zeune van Pelet, kwammen tegen Mozes in 't geweer. Ze wodden steund deur twiehonderdvuuftig leiders van de Israëlieten, achtensweerdige manluden, de anzienliksten van de gemienschop.
03 Ze stelden heur tegenover Mozes en Aäron op en zeden tegen heur: "Jim maotigen jim te vule an. Alle leden van de gemienschop bin heilig, en de Heer is midden tussen heur in. Waoromme vulen jim jim dan boven de gemienschop van de Heer verheven?"
04 Bi'j et heuren van disse woorden leut Mozes him op 'e grond valen.
05 Daornao zee hi'j tegen Korach en zien anhang: "Morgen zal de Heer bekendmaeken wie him toeheurt, wie heilig is en vlakbi'j him kommen meugen. Wie hi'j uutkiezen zal, mag in zien naobi'jhied kommen.
06 Luuster wat jim doen moeten, Korach, en jim, zien anhangers, ok: neem morgen allemaole een vuurbak,
07 doe d'r gloeiende kolen in en legge daor roekersgoed op veur de Heer. Degene die dan deur de Heer uutkeuzen wodt, die is heilig. Jim maotigen jim te vule an, Levieten."
08 Mozes zee veerder tegen Korach: "Luuster goed, Levieten.
09 Is et jow niet genoeg daj' deur de God van Israël van de aandere Israëlieten ofzunderd binnen om vlakbi'j him te wezen, om wark bi'j de tabbernakel van de Heer te doen en om de hiele gemienschop te dienste te staon en die te vertegenwoordigen?
10 Is et jow niet genoeg dat hi'j jow en jow stamgenoten, de Levieten, in zien naobi'jhied toelaoten het? Eisen jow now ok nog et priesterschop op?
11 Jow en al die anhangers van jow spannen tegen de Heer zels saemen, want wie is Aäron dat jow jow bi'j him beklaegen zollen?"
12 Mozes leut Datan en Abiram roepen, de zeunen van Eliab. Mar zi'j zeden: "We kommen niet.
13 Is et niet genoeg dat jow oons uut een laand dat overlopt van melk en hunning weghaeld hebben om oons in de woestijn wegraeken te laoten? Moeten jow jow ok nog as heer en meester over oons opsmieten?
14 Jow hebben oons bepaold niet naor een laand brocht dat overlopt van melk en hunning, en oons ok gien akkers en droevetunen geven. Daenken jow dat jow manluden as oons een rad veur d' ogen dri'jen kunnen? We kommen niet."
15 Doe wodde Mozes poer. "Geef gien ommedaenken an heur offer," zee hi'j tegen de Heer. "Gieniene van heur he'k ok mar een ezel ofneumen, gieniene van heur he'k kwaod daon."
16 Tegen Korach zee Mozes: "Morgen moe'n jow en al jow anhangers veur de Heer verschienen – jow en zi'j, en Aäron.
17 Iederiene moet dan een vuurbak nemen en d'r roekersgoed in leggen, en alle twiehonderdvuuftig vuurbakken moe'n vlakbi'j de Heer brocht wodden, ok die van jowzels en Aäron."
18 Iederiene nam een vuurbak, dee d'r gloeiende kolen in, legde daor roekersgoed op en stelde him bi'j de ingang van de ontmoetingstente op, krek as Mozes en Aäron.
19 Doe Korach al zien anhangers heur bi'j de ingang van de ontmoetingstente verzaemeld hadden en ze daor bi'j Mozes en Aäron stonnen, verscheen de majesteit van de Heer an et hiele volk.
20 De Heer zee tegen Mozes en Aäron:
21 "Zunder je van disse meensken of, dan za'k die in een oogwink verdistreweren."
22 Hierop leuten ze heur op 'e grond valen en zeden: "God, jow die al wat leeft de levensaosem geft, as ien meenske zundigt, laoten jow jow argernis dan op et hiele volk daelekommen?"
23 De Heer zee doe tegen Mozes:
24 "Dreeg iederiene op om bi'j de tenten van Korach, Datan en Abiram weg te gaon."
25 Volgd deur de ooldsten van Israël gong Mozes naor Datan en Abiram.
26 "Gao bi'j de tenten van die goddeloze manluden weg," zee hi'j tegen et volk, "en raek niks an dat van heur is, aanders kommen jim omme vanwegens heur zunden."
27 Iederiene gong bi'j de tenten van Korach, Datan en Abiram weg. Datan en Abiram kwammen naor buten en bleven bi'j de ingang van heur tente staon, saemen mit heur vrouwluden en kiender.
28 Mozes zee: "Now zuj'm inzien dat et de Heer is die mi'j stuurd het om alles te doen wat ik daon hebbe, en dat et niet uut mi'jzels kommen is.
29 Raeken disse meensken op de meniere weg waorop iederiene wegraekt, treft heur etzelde lot as ieder aander, dan het de Heer mi'j niet stuurd.
30 Mar as de Heer wat gebeuren lat dat nog gienertied gebeurd is, as de eerde heur mond waegenwied eupendot, heur mit al heur bezittings opslokt en ze levend in et doderiek ofdaelen lat, dan zuj'm inzien dat die manluden de Heer ofwezen hebben."
31 Amper was hi'j uutpraot of de grond onder heur voeten spleet eupen,
32 de eerde eupende heur mond en slokte heur op, mit heur femilies, alle meensken van Korach en alles wat ze bezatten.
33 Zo daelden zi'j mit iederiene die bi'j heur heurde levend in et doderiek of. De eerde sleut him boven heur, en zi'j weren uut de gemienschop verdwenen.
34 Alle Israëlieten die d'r ommehenne stonnen vlochtten weg doe ze heur raozen heurden, uut aangst dat de eerde heur ok opslokken zol.
35 Doe kwam d'r een felle vlamme uut et heiligdom, die de twiehonderdvuuftig manluden die et roekersgoed offerd hadden, dodelik trof.
Numeri 17
01 De Heer zee tegen Mozes:
02 "Geef Eleazar, de zeune van de priester Aäron, kommedaosie om de vuurbakken uut de aske te haelen, en gooi de gloeiende kolen d'r uut, veer vot, want ze bin heilig.
03 De vuurbakken van de manluden die heur zunde mit de dood bekopen hebben moeten bin de Heer anbeuden, en daoromme bin ze heilig. Slao d'r plaeten van en bekliede daor et alter mit. Zo zullen ze de Israëlieten as waorschouwing dienen."
04-05 De priester Eleazar pakte de broonzen vuurbakken waormit deur heur die deur de vlamme ommebrocht weren een offer brocht was; ze wodden platsleugen en mit de plaeten wodde et alter beklieded; zo hadde de Heer et deur de mond van Mozes an Eleazar opdreugen. Disse plaeten moe'n de Israëlieten d'r an heugen dat een onbevoegde, iene die niet van Aäron ofstamt, niet in de naobi'jhied van de Heer kommen mag om him een reukoffer te brengen; zoe'niene zal et vergaon as Korach en zien anhangers.
06 Mar de aanderedaegs beklaegden alle Israëlieten heur bi'j Mozes en Aäron. "Jim hebben et volk van de Heer ommebrocht," zeden ze.
07 Doe ze tegen Mozes en Aäron te hope leupen en naor de ontmoetingstente keken, zaggen ze hoe die overdekt wodde deur de wolke en hoe de majesteit van de Heer verscheen.
08 Naodat Mozes en Aäron naor de ontmoetingstente gaon weren,
09 zee de Heer tegen Mozes:
10 "Gao weg bi'j dit volk, dan za'k et in een oogwink verdistreweren." Doe leuten zi'j heur op de eerde valen,
11 en Mozes zee tegen Aäron: "Neem een vuurbak, doe d'r gloeiende kolen van et alter in, legge daor roekersgoed op en gao zo vlogge meugelik naor et volk. Bewark verzoening veur heur, want de argernis van de Heer is ontbraand, de plaoge is al begonnen."
12 Aäron dee wat Mozes zegd hadde en gong in zeuven haosten naor et volk. De plaoge was al onder heur uutbreuken. Hi'j legde roekersgoed op de gloeiende kolen en bewarkte zo verzoening veur et volk.
13 Hi'j gong tussen et volk dat al wegraekt was zi'j die nog leefden staon, en de plaoge hul op.
14 An veertienduzend zeuvenhonderd meensken hadde de plaoge et leven kost, nog ofzien van degenen die deur et veurval mit Korach ommekommen weren.
15 Naodat de plaoge uutraosd was, gong Aäron weeromme naor Mozes, die bi'j de ingang van de ontmoetingstente was.
16 De Heer zee tegen Mozes:
17-18 "Vraog an et heufd van ieder van de Israëlitische stammen om je een staf te geven, twaelf staeven bi'j mekeer: veur ieder stamheufd moet d'r een staf wezen. Schrief iederiene zien naeme op zien staf. Op die van Levi moej' Aäron zien naeme schrieven.
19 Leg alle staeven in de ontmoetingstente, veur de verbondstekst, wao'k de hieltied bi'j jim komme.
20 De staf van de man die ik uutkieze, zal bluuien gaon. Zo za'k dat iewige geklaeg van de Israëlieten tegen jim verstommen laoten."
21 Naodat Mozes dit an de Israëlieten overbrocht hadde, gaf ieder van de stamooldsten him een staf, twaelf bi'j mekeer; daoronder was ok iene veur Aäron. 22 Mozes legde de staeven veur de Heer, in de tente mit de verbondstekst.
23 Doe hi'j de aanderedaegs de verbondstente ingong, zag hi'j dat de staf van Aäron, de staf van de stamme Levi, in bluui ston. D'r weren knoppen an ontspreuten en bloemen eupengaon, en de staf dreug riepe amandels.
24 Mozes nam de staeven uut et heiligdom van de Heer en gong d'r mit naor buten. Naodat de Israëlieten zien hadden wat d'r gebeurd was, nam iederiene zien eigen staf weeromme.
25 "De staf van Aäron moej' veur de verbondstekst weerommeleggen," zee de Heer tegen Mozes. "Die moet beweerd wodden as waorschouwing veur dat opsternaote volk. D'r moet een aende kommen an heur geklaeg tegen mi'j, aanders zullen ze wegraeken."
26 Mozes dee wat de Heer him opdreugen hadde.
27 De Israëlieten zeden tegen Mozes: "We kommen omme, et is mit oons daon, et is mit oons allemaole daon.
28 Iederiene die in de buurt van de tabbernakel van de Heer komt, raekt weg. Moe'we dan allemaole verdistreweren?"
Numeri 18
Taeken en inkomsten van priesters en
Levieten
01 De Heer zee tegen Aäron: "Ie en je zeunen en je hiele femilie zullen verantwoordelik steld wodden veur overtredings die in et heiligdom begaon wodden, en ie en je zeunen alliend wodden verantwoordelik steld veur overtredings die jim bi'j et uutoefenen van et priesterschop begaon.
02 Laot je verwaanten, de stamme Levi, de stamme van je veurvader, saemen mit jow naor et heiligdom kommen; zi'j moe'n heur bi'j je ansluten en jow en je zeunen behulpzem wezen aj'm veur de tente mit de verbondstekst dienst doen.
03 Zi'j moe'n de taeken doen die ie heur geven en zorg dregen veur de tente zels. Mar ze meugen niet in de buurt van de heilige veurwarpen of et alter kommen, aanders zullen ze wegraeken, en jim ok.
04 Ze moe'n heur bi'j je ansluten en zorg dregen veur de ontmoetingstente, veur alle warkzemheden die daor daon wodden. Onbevoegden meugen niet vlakbi'j jim kommen
05 aj'm de heilige veurwarpen en et alter verzorgen. Zo kuj'm et veur wezen dat de Israëlieten deur mien argernis troffen wodden.
06 Hierbi'j zonder ik jim verwaanten, de Levieten, van de aandere Israëlieten of, en ik wies heur an jim toe. Zi'j bin ofstaon an de Heer en moe'n wark bi'j de ontmoetingstente doen.
07 Mar ie en je zeunen doen alle priesterlike taeken bi'j et alter en in de ruumte aachter et veurhangsel. Dat is jim wark. Ik geve jim et priesterschop as een kedo. Iedere onbevoegde daorentegen die te dichte bi'j et heiligdom komt zal ommebrocht wodden."
08 De Heer zee veerder tegen Aäron: "Hierbi'j vertrouw ik de kedo's die mi'j brocht wodden an jow toe. Alle heilige giften die de Israëlieten mi'j brengen, geef ik an jow en je zeunen. Ze bin veur jim bestemd, jim hebben daor veur altied recht op.
09 Wat van de alderheiligste giften niet verbraand wodt, komt jow toe. Dit gelt veur alle giften die de Israëlieten mi'j brengen bi'j heur graonoffers, heur reinigingsoffers en heur verbeteringsoffers. De alderheiligste giften kommen jow en je zeunen toe.
10 Eet ze op et alderheiligste plak. Al je mannelike naokommelingen meugen d'r van eten. Respektere de heilighied d'r van.
11 Ok komt jow een vaast pat toe van alle offergaoven van de Israëlieten die optild wodden. Dit geef ik veur altied an jow, je zeunen en je dochters. Iederiene in je femilie die rein is mag d'r van eten.
12 Ik geef je et beste van de olijfeulie en et beste van de wien en et graon, de aldereerste opbrengst, die de Israëlieten an de Heer ofstaon.
13 De eerste opbrengst van heur laand, die ze an de Heer geven, is veur jow. Iederiene in je femilie die rein is mag d'r van eten.
14 Alles in Israël waorop mien ban rust, is veur jow.
15 Alles wat et eerst de moekeschoot verlat en an de Heer anbeuden wodt, of meenske of dier, is veur jow, mar de eerstgeborenen van de meensken moej' vri'jkopen laoten, en ok de eerstgeboren poeterige dieren.
16 Zogauw een eerstgeborene een maond oold is, moej' him vri'jkopen laoten veur een vaast bedrag van vuuf sjekel zulver, neffens et iekergewicht van et heiligdom, twintig gera veur iedere sjekel.
17 Mar et eerstgeboren jong van een rund of et eerste jong van een schaop of geit mag niet vri'jkocht wodden, want die bin heilig. Heur bloed moej' tegen et alter gieten en heur vet op et alter verbranen, as een roekende gaove die de Heer goeddonkt.
18 Mar heur vleis komt jow toe, liekegoed et boststok as de rechteraachterboolte.
19 Van alle heilige giften die de Israëlieten an de Heer brengen, geef ik jow, je zeunen en je dochters veur altied een vaast pat. Veur de Heer gelt dit as een ieuwigdurend, mit zoolt bekrachtigd verbond mit jow en je naokommelingen."
20 De Heer zee ok tegen Aäron: "Ie kriegen gien eigen grondgebied en gien aandere bezittings zoas de aandere Israëlieten. Ik bin je bezit en je grondgebied.
21 Wat de Levieten angaot, heur geef ik alle tienden van de Israëlieten in bezit, as vergoeding veur et wark dat ze bi'j de ontmoetingstente doen.
22 De Israëlieten meugen niet langer in de buurt van de ontmoetingstente kommen, ze zollen daormit schuld op heur laeden en wegraeken.
23 Et wark bi'j de ontmoetingstente wodt deur de Levieten daon, en zi'j wodden verantwoordelik steld veur overtredings. Dit veurschrift blift veur altied van kracht, veur alle kommende generaosies. De Levieten kriegen gien grondbezit zoas de aandere Israëlieten;
24 heur geef ik de tienden in eigendom die de Israëlieten an de Heer ofdregen. Daorom he'k bepaold dat zi'j gien grondbezit kriegen zoas de aandere Israëlieten."
25 De Heer zee tegen Mozes:
26 "Zegge tegen de Levieten: “aj'm van de Israëlieten de tienden in ontvangst nemen, die ik jim in eigendom geve, moej'm van die tienden een tiende an de Heer ofdregen.
27 Dat wodt dan beschouwd as jim bi'jdrege, asof et graon was van jim döskvloer en wien en olijfeulie uut jim passetonne.
28 Jim moe'n dus ok van alle tienden die jim van de Israëlieten kriegen, een vaast pat an de Heer ofstaon en an de priester Aäron geven.
29 Hool van alles waj' geven wodt een pat appat as bi'jdrege veur de Heer, et beste pat, as een heilige gaove.”
30 Zegge heur ok: “as jim, Levieten, et beste pat ofstaon, wodt dat beschouwd as de opbrengst van jim döskvloer en passetonne.
31 Jim meugen mit jim femilieleden op iedere willekeurige plak van de tienden eten, want et is jim loon, et is een vergoeding veur jim warkzemheden bi'j de ontmoetingstente.
32 Aj' et beste pat ofdregen, laede ie gien schuld op je en ontwi'jde ie de heilige giften van de Israëlieten niet, mar aanders zuj'm wegraeken.”"
Numeri 19
Et schoonmaekwaeter
01 De Heer zee tegen Mozes en Aäron:
02 "Dit is een wet die de Heer insteld het: Zegge tegen de Israëlieten dat zi'j je een koe brengen, een geve rooie koe zonder ienigst gebrek, die nog gienertied een jok vuuld het.
03 Geef die an de priester Eleazar. Zi'j moet buten et kaamp brocht wodden en daor in zien anwezigens slaacht wodden.
04 De priester Eleazar moet zien vinger in et bloed stikken en et zeuvenmaol in de richting van de veurkaante van de ontmoetingstente sprinkelen.
05 De koe moet veur zien ogen verbraand wodden: de huud, et vleis, et bloed en de inhoold van de ingewanen.
06 De priester nemt cederhoolt, majoraan en karmozijn, en gooit dat midden in et vuur waorin de koe verbraand wodt.
07 Dan moet hi'j zien kleraosie en zien lichem mit waeter wasken. Daornao mag hi'j et kaamp weer binnen, mar hi'j blift tot de aovend poeterig.
08 Ok degene die de koe verbraand het moet zien kleraosie en zien lichem mit waeter wasken. Ok hi'j blift tot de aovend poeterig.
09 Iene die rein is, moet de aske van de koe verzaemelen en op een rein plak buten et kaamp leggen. Daor moet de aske beweerd wodden, omreden d'r schoonmaekwaeter mit maekt wodden moet dat de Israëlieten van zunde reinigt.
10 De man die de aske van de koe verzaemeld het moet zien kleraosie wasken. Hi'j blift tot de aovend poeterig. Disse wet blift veur altied van kracht, liekegoed veur de Israëlieten as veur de vremden die bi'j jim wonen.
11 Wie et liek van een meenske anraekt is zeuven daegen poeterig.
12 Zoe'niene moet him op de dadde en op de zeuvende dag mit et waeter wasken laoten, dan is hi'j weer rein. As hi'j him niet reiningen lat op liekegoed de dadde as de zeuvende dag, blift hi'j poeterig.
13 Iederiene die een liek anraekt, et liek van een meenske, en him niet wasken lat, verontreinigt de tabbernakel van de Heer en moet uut de gemienschop van Israël stoten wodden. Omreden hi'j niet mit et schoonmaekwaeter besprenkeld is blift hi'j poeterig; zien poeterighied blift him ankleven.
14 As iene wegraekt is in een tente gelt disse regel: iederiene die de tente binnengaot en alles wat in de tente is, is zeuven daegen poeterig;
15 alle tonnen die niet stevig mit een lit ofsleuten binnen, gellen as poeterig.
16 Iederiene die in et eupen veld et liek anraekt van iene die deur een aander ommebrocht is of as netuurlik wegraekt is, of et bonkerak van een meenske, of een graf, is ok zeuven daegen poeterig.
17 As iene hierdeur poeterig wodden is, moet et volk aske pakken van et dier dat verbraand is om heur die poeterig wodden binnen te wasken, de aske in een tonne doen en d'r waeter uut een bron op gieten.
18 Iene die rein is moet dan een majoraantak pakken, die in et waeter stippen en daormit de tente, alle tonnen en de meensken die in de tente west binnen besprinkelen. Etzelde moet gebeuren mit degene die et bonkerak, et liek van iene die ommebrocht of wegraekt is, of een graf anraekt het.
19 De reine persoon moet de poeterige op de dadde en op de zeuvende dag besprinkelen. Naodat hi'j de poeterige op de zeuvende dag schonemaekt het, moet disse zien kleraosie en zien lichem mit waeter wasken. Aovens is hi'j dan weer rein.
20 Mar wie poeterig is en him niet wasken lat, moet uut de gemienschop stoten wodden, omreden hi'j et heiligdom van de Heer poeterig maekt het. Omreden hi'j him niet mit schoonmaekwaeter besprinkelen laoten het, blift hi'j poeterig.
21 Disse wet blift veur altied van kracht. Wie et schoonmaekwaeter sprinkelt, moet zien kleraosie wasken; wie et schoonmaekwaeter anraekt, blift tot de aovend poeterig.
22 Alles wat iene die poeterig is anraekt, wodt poeterig, en wie zoe'niene anraekt blift tot de aovend poeterig."
Numeri 20
Mirjam heur dood;
et waeter van Meriba
01 In de eerste maond kwammen de Israëlieten, et hiele volk, in de woestijn van Sin, en ze bleven lange in Kades. Mirjam raekte daor weg en wodde d'r begreuven.
02 Doe d'r gien waeter meer was, leup et volk tegen Mozes en Aäron te hoop.
03 Ze maekten Mozes verwieten. "Weren wi'j ok mar ommekommen doe een pat van oons volk deur et ingriepen van de Heer wegraekte," zeden ze.
04 "Waoromme hebben jim et volk van de Heer naor disse woestijn toe brocht? Om oons hier, mit oons vee wegraeken te laoten?
05 Waoromme hebben jim oons weghaeld uut Iegypte en oons naor dit vreselike oord toe brocht? D'r is hier gien koren, d'r bin hier gien viegebomen, gien droevestokken en gien granaatappelbomen. En drinkwaeter is d'r ok niet."
06 Mozes en Aäron gongen bi'j de gemienschop weg en gongen naor de ingang van de ontmoetingstente. Daor leuten zi'j heur op de eerde valen. Doe verscheen de majesteit van de Heer.
07 De Heer zee tegen Mozes:
08 "Neem de staf en roep mit je breur Aäron de Israëlieten bi'jenneer. In heur bi'jwezen moej'm de rots daor kommederen om waeter te geven. Jim zullen waeter veur heur uut de rots kommen laoten, en meensken en vee te drinken geven."
09 Mozes nam de staf uut et heiligdom, zoas de Heer him opdreugen hadde.
10 Hi'j en Aäron leuten alleman bi'j de rots saemenkommen. "Luuster, opstanig volk," zee Mozes, "zuwwe veur jim uut disse rots waeter stromen laoten?"
11 Hi'j tilde zien haand op, sleug twiekeer mit zien staf op de rots, en et waeter stroomde d'r uut, zodat iederiene te drinken hadde, en et vee ok.
12 De Heer zee tegen Mozes en Aäron: "Omreden jim niet op mi'j vertrouwd hebben, en in et bi'jwezen van de Israëlieten gien ontzag toond hebben veur mien heilighied, zuj'm dit volk niet in et laand brengen dat ik et geve."
13 Dit was et waeter van Meriba, waor de Israëlieten de Heer verwieten maekten en hi'j heur zien heilighied toonde.
Edom weigert Israël de deurtocht
14 Vanuut Kades stuurde Mozes gezaanten naor de keuning van Edom mit disse bosschop: "Jow breur Israël bericht jow dit: Et is jow bekend mit wat zwaorigheden wi'j te kaampen had hebben.
15 Jow weten dat oonze veuroolden naor Iegypte trokken binnen, dat wi'j daor lange woond hebben en dat de Iegypteners oons en oonze veuroolden min behaandeld hebben.
16 Wi'j reupen de Heer an en hi'j heurde oons hulpgeroep; hi'j het oons een engel stuurd en oons uut Iegypte wegleided. Now biwwe in Kades, een stad an de greens van jow riek.
17 Stao oons toe om deur jow laand te trekken. We zullen niet deur akkers en droevetunen gaon en we zullen gien waeter uut bronnen drinken. Zolange we in jow gebied binnen, zuwwe de keuninklike heufdstraote volgen en daor niet van ofwieken, niet naor links en niet naor rechts."
18 De Edomieten zeden doe: "Jim meugen niet deur oons gebied trekken; doen jim dat wel, dan kowwe jim mit waopens integen."
19 De Israëlieten zeden: "We zullen de baenemaekte weg volgen, en as wi'j en oons vee van jim waeter drinken, zuwwe daorveur betaelen waj'm willen. We vraogen alliend toestemming om lopende deur jim laand trekken te meugen, meer niet."
20 Mar de Edomieten weigerden heur de deurtocht en kwammen heur mit een groot, stark leger integen.
21 Omreden de Edomieten heur gien deurtocht gavven, neumen de Israëlieten een omweg.
Aäron zien dood
22 Naodat ze Kades verlaoten hadden, kwammen de Israëlieten, et hiele volk, bi'j de Hor,
23 een barg an de greens van Edom. Daor zee de Heer tegen Mozes en Aäron:
24 "Aäron zal now mit zien veuroolden verienigd wodden. Hi'j zal et laand da'k de Israëlieten geef niet binnengaon, omreden jim bi'j et waeter van Meriba tegen mien bevel ingaon binnen.
25 Ie, Mozes, moe'n Aäron en zien zeune Eleazar mit naor boven nemen, de barg op.
26 Laot Aäron zien priesterkleren uutstrupen en laot zien zeune Eleazar die anstrupen. Aäron zal daor wegraeken en mit zien veuroolden verienigd wodden."
27 Ze gongen veur de ogen van et hiele volk de barg op, zoas de Heer Mozes opdreugen hadde.
28 Mozes leut Aäron zien priesterkleren uutstrupen en dreug Aäron zien zeune Eleazar op die an te strupen. Daor, op de toppe van de barg, raekte Aäron weg. Daornao gong Mozes mit Eleazar weer naor beneden.
29 Doe de Israëlieten vernammen dat Aäron wegraekt was, goelde de gemienschop dattig daegen lange om him.
Numeri 21
De keuning van Arad versleugen
01 De Kanaänitische keuning van Arad in de Negev vernam dat de Israëlieten in antocht weren en dat ze via Atarim kwammen. Hi'j vul heur an en maekte een tal van heur kriegsgevangen.
02 Doe deden de Israëlieten de Heer disse gelofte: "As jow dit volk an oons uutleveren, zuwwe heur steden hielendal verdistreweren."
03 De Heer kwam Israël te hulpe, hi'j leverde de Kanaänieten an heur uut. De Israëlieten brochten heur allemaol omme en verdistreweerden heur steden. Dit plak kreeg de naeme Chorma.
De keuperen slange
04 Van de Hor trokken ze wieder in de richting van de Rooie Zee; ze mossen ommes om Edom henne trekken. Mar onderwegens wodde et volk ongeduldig.
05 "Waoromme hebben jim oons weghaeld uut Iegypte?" verweten ze God en Mozes. "Om oons in de woestijn wegraeken te laoten? We hebben gien brood en gien waeter, en we kun dit ellendige eten niet meer zien."
06 Doe stuurde de Heer giftige slangen op de Israëlieten of, die heur beten, zodat pattie van heur wegraekten.
07 Doe gong et volk naor Mozes. "We hebben zundigd," zeden ze, "want we hebben de Heer en jow verwieten maekt. Bidde tot de Heer dat hi'j oons van die slangen verlost." Mozes biddede veur et volk,
08 en de Heer zee tegen him: "Laot een slange maeken en bevestig die op een stok. Iederiene die beten is en daornaor kikt, blift in leven."
09 Mozes leut een keuperen slange maeken en maekte die vaaste an een stok. En iederiene die deur een slange beten was en opkeek naor de keuperen slange, bleef in leven.
Van Obot naor de Pisga
10 De Israëlieten trokken wieder en sleugen heur kaamp op in Obot.
11 Naodat zi'j uut Obot wegtrokken weren, sleugen ze heur kaamp op bi'j Ijje-Haäbarim, in de woestijn dat an de oostkaante van Moab ligt.
12 Van daor trokken ze veerder, en ze sleugen heur kaamp op in et dal waor de Zered deur lopt.
13 Weer trokken ze wieder, en ze sleugen heur kaamp op an de ginne kaante van de Arnon, en wel in de woestijn die an et gebied van de Amorieten greenst; de Arnon dient as greens tussen Moab en et gebied van de Amorieten.
14 Daorom wodt d'r in et Boek van de oorlogen van de Heer praot over "Waheb in Sufa en de beken die de Arnon maeken,
15 en et stroomgebied van die beken, dat him uutstrekt tot waor Arre ligt en dat an et gebied van Moab greenst".
16 Van daor gong et wieder naor Beër, de bron waor de Heer tegen Mozes zegd hadde: "Roep et volk bi'jenneer, dan za'k et waeter geven."
17 Israël zong doe dit lied:
"Wel op, bron!
Zinge veur de bron,
18 ontsleuten deur vosten,
eupenmaekt deur de hoogsten,
mit rieksstaf en heersersstaf!"
Vanuut de woestijn gong et wieder naor Mattana,
19 van Mattana naor Nachaliël, van Nachaliël naor Bamot,
20 en van Bamot naor de vallei in Moab, en dan veerder naor de Pisga. Vanof de toppe van die barg kikt et volk uut over de Jesimon.
Sichon en Og versleugen
21 Israël stuurde gezaanten naor keuning Sichon van de Amorieten mit disse bosschop:
22 "Stao oons toe om deur jow laand te trekken. We zullen niet deur akkers en droevetunen gaon en we zullen gien waeter uut bronnen drinken. Zolange we in jow gebied binnen, zuwwe de keuninklike heufdstraote volgen."
23 Mar Sichon weigerde Israël deurtocht te verlienen, hi'j verzaemelde zien troepen en trok de woestijn in, Israël integen. Bi'j Jahas vul hi'j heur an.
24 Mar de Israëlieten versleugen him en veroverden zien laand, van de Arnon tot an de Jabbok, die de greens vormde mit de Ammonieten en waorlanges verstarkings laggen.
25 Israël nam alle steden van de Amorieten in en gong d'r wonen, ok in Chesbon en de omliggende dörpen.
26 Chesbon was de heufdstad van de Amoritische keuning Sichon. Hi'j hadde oorlog voerd tegen de veurige keuning van Moab en him zien hiele laand ofneumen, tot an de Arnon.
27 Vandaor dat de dichters zeggen:
"Komme naor Chesbon en herbouw de stad,
verstark de stad van Sichon.
28 Vanuut Chesbon verspreidde him vuur,
een vlamme kwam uut Sichon zien woonstee.
Et vuur verteerde Ar-Moab,
de heersers over de hoogten,
de heuvels langs de Arnon.
29 Wee Moab!
Ie gongen onder, volk van Kemos.
De zeunen van Kemos mossen vlochten,
zien dochters wodden ofpakt
deur Sichon, keuning van de Amorieten.
30 Wi'j bestookten heur mit pielken
en heur laand gong d'r an kepot,
van Chesbon of tot an Dibon toe.
Wi'j verwoestten Nofach, bi'j Medeba."
31 Israël vestigde him dus in et gebied van de Amorieten.
32 Naodat Mozes Jazer verkennen laoten hadde, wodden de dörpen rond die stad inneumen. De Amorieten die d'r woonden, wodden verdreven.
33 Daornao trokken ze veerder in de richting van Basan, en keuning Og van Basan trok tegen heur te striede. Hi'j rokte mit zien hiele leger op naor Edreï.
34 Mar de Heer zee tegen Mozes: "Ie hoeven niet bange veur him te wezen, want ik lever him an je uut, mit hiel zien leger en zien laand. Doe mit him etzelde as waj' mit Sichon, de keuning van de Amorieten daon hebben, die in Chesbon zetelde."
35 De Israëlieten versleugen him en zien zeunen en ok zien hiele leger, tot de laeste man, en neumen zien laand in bezit.
Numeri 22
01 Daornao trokken ze veerder en sleugen heur kaamp op in de vlakte van Moab, an de ginne kaante van de Jordaan, op 'e hoogte van Jericho.
Bileam en Balak
02-04 Balak, de zeune van Sippor, die in die tied keuning van Moab was, heurde wat Israël de Amorieten andaon hadde. De Moabieten weren butengewoon bange veur et volk van Israël, omreden et zo talriek was. Ze raekten in paniek en zeden tegen de ooldsten van Midjan: "Die horde vret hier de hiele streek nog kael, as een rund dat een veld ofweided."
05 Balak stuurde gezaanten naor Bileam, de zeune van Beor, die in Petor an de Eufraat, in zien geboortestreek was. Ze mossen him kommenlaoten mit disse woorden: "D'r is een volk uut Iegypte kommen, dat rondomme in mien laand daelestreken is. Ze bin hier vlakbi'j legerd.
06 Dat volk is te stark veur mi'j. Kom daorom hierhenne om et veur mi'j te vervluken. Misschien kan ik et dan verslaon en et uut mien laand verjaegen. Ommes, wie deur jow zegend wodt is zegend, en wie deur jow vervluukt wodt is vervluukt."
07 De ooldsten van Moab en de ooldsten van Midjan gongen op weg. Ze hadden een beloning veur de waorzegger bi'j heur. Bi'j Bileam kommen, brochten ze him Balak zien woorden over.
08 "Blief vannaacht hier," zee hi'j, "dan zal 'k jow daornao bescheid doen van wat de Heer mi'j ingeven zal." Dus bleven de Moabitische leiders bi'j Bileam.
09 God verscheen an Bileam en vreug: "Wie bin die manluden hier bi'j jow?"
10 Bileam zee doe tegen God: "Die bin naor mi'j toe stuurd deur keuning Balak van Moab, de zeune van Sippor, mit disse bosschop:
11 “d'r is een volk uut Iegypte kommen, dat rondomme in mien laand daelestreken is. Kom hierhenne en roep d'r een vluuk over uut. Misschien kan ik et dan anvalen en verjaegen.”"
12 God zee tegen Bileam: "Gao niet mit heur mit en vervluuk dat volk niet, want et is zegend."
13 De aanderemorgen zee Bileam tegen Balak zien gezaanten: "Gao naor jim laand weeromme. De Heer geft mi'j gien toestemming om mit jim mit te gaon."
14 De Moabitische leiders vertrokken, en doe ze weer bi'j Balak weeromme weren, meldden zi'j him dat Bileam weigerd hadde mit heur mit te kommen.
15 Opni'j stuurde Balak gezaanten, meer as de eerste keer en mit groter anzien. 16 Bi'j Bileam kommen zeden ze: "Dit zegt Balak, de zeune van Sippor: “laot niks jow d'r van weerholen om naor mi'j toe te kommen.
17 Ik zal jow riek belonen en ik zal alles doen wat jow zeggen. Kom toch en roep een vluuk over dat volk uut.”"
18 Bileam zee doe tegen Balak zien knechten: "Ok al gaf Balak mi'j al et zulver en goold uut zien peleis, dan nog zo'k niks mar dan ok niks doen kunnen dat ingaot tegen et bevel van de Heer, mien God.
19 Mar blieven jow ok een naacht hier, dan kan 'k heuren wat de Heer mi'j disse keer zeggen zal."
20 Naachs verscheen God an Bileam en zee: "As die manluden kommen binnen om je ophaelen te laoten, gao dan mar mit heur mit. Mar ie meugen alliend doen wat ik je opdreeg."
21 De aanderemorgen maekte Bileam him klaor, zadelde zien ezelin en gong mit de Moabitische leiders mit.
22 Mar amperan was hi'j op weg, riedende op zien ezelin en vergezeld deur twie van zien knechten, of God wodde poer lelk, en een engel van de Heer gong op de weg staon om Bileam tegen te holen.
23 De ezelin zag de engel van de Heer op de weg staon, mit een trokken zweerd in de haand, en ze gong an 'e kaant, van de weg of et veld in. Bileam sleug de ezelin om heur weer naor de weg te drieven.
24 Hierop gong de engel van de Heer op een smalle weg tussen de droevetunen staon. An weerskaanten was een mure.
25 Doe de ezelin de engel van de Heer zag, drokte ze heur tegen de mure, zodat Bileam zien voete bekneld raekte. Weer sleug hi'j heur.
26 De engel van de Heer gong opni'j een stok wiederop staon, in een nauwe deurgang, waor gien ruumte was om naor links of rechts uut te wieken.
27 Doe de ezelin de engel van de Heer zag gong ze liggen, mit Bileam nog op de rogge. Bileam wodde poer en sleug de ezelin mit een stok.
28 Doe leut de Heer de ezelin praoten. Ze vreug Bileam: "Wat he'k jow misdaon, dat jow mi'j now al drie keer sleugen hebben?"
29 "Ie drieven de spot mit mi'j," zee Bileam. "A'k een zweerd bi'j me hadde, dan ha'k je allange doodmaekt."
30 De ezelin vreug Bileam: "Bin ik niet de ezelin waorop jow al jow hiele leven rieden? He'k mi'j seins iens eerder zo gedreugen?" "Nee," zee hi'j doe.
31 Doe eupende de Heer Bileam de ogen, zodat hi'j de engel van de Heer op de weg staon zag, mit et trokken zweerd in de haand. Hi'j gong deur de kni'jen en beug diepe veurover.
32 De engel van de Heer vreug him: "Waoromme hej' je ezelin now al drie keer sleugen? Ik bin hier kommen om je tegen te holen, want disse reize is tegen mien wil onderneumen, disse weg gaot naor de ofgrond.
33 Driemaol zag je ezelin mi'j, en driemaol is ze veur me an 'e kaante gaon. Hadde ze dat niet daon, dan ha'k jow ommebrocht mar heur in leven laoten."
34 Bileam zee tegen de engel van de Heer: "Ik hebbe zundigd, want ik wus niet dat jow mi'j de weg versperden. Mar as wat ik doe min is in jow ogen, gao 'k weeromme naor huus."
35 De engel van de Heer zee tegen Bileam: "Gao mar mit die manluden mit. Mar ie meugen alliend zeggen wat ik je opdreeg." Dus gong Bileam mit Balak zien gezaanten mit.
36 Doe Balak heurde dat Bileam d'r an kwam, gong hi'j him integen tot an de Moabitische stad die hielendal an de raand van et stroomgebied van de Arnon ligt.
37 "Ik hadde jow toch dringend vraogd om te kommen?" zee Balak tegen Bileam. "Waoromme bin jow niet eerder kommen? Dochten jow seins dat ik niet in staot wezen zol om jow te belonen?"
38 "Ik bin d'r now toch?" zee Bileam doe tegen him. "Mar of ik wat zeggen kunnen zal? Alliend wat God mi'j in de mond legt kan 'k zeggen."
39 Bileam gong mit Balak mit naor Kirjat-Chusot.
40 Balak offerde runder, geiten en schaopen en leut stokken daorvan naor Bileam brengen en naor de gezaanten die him vergezelden.
41 De aanderemorgen nam Balak Bileam mit naor Bamot-Baäl, een hoge-legen plak, vanwaor hi'j een klein pat van de Israëlieten zien kon.
Numeri 23
01 Bileam dreug Balak op om daor zeuven alters te bouwen, en zeuven bollen en zeuven rammen klaor te maeken veur een offer.
02 Balak dee wat Bileam zegd hadde. Tegere mit Bileam offerde hi'j op ieder alter een bolle en een ram.
03 Daornao zee Bileam tegen Balak: "Blieven jow hiere bi'j jow braandoffers waachten, wiels ik wat wiederop gao. Misschien dat de Heer naor mi'j toe kommen wil. Alles wat hi'j mi'j zien lat za'k jow wetenlaoten." Hi'j gong een kaele heuvel op,
04 waor God bi'j him kwam. "Ik hebbe zeuven alters daelezetten laoten," zee Bileam, "en op ieder alter he'k een bolle en een ram offeren laoten."
05 De Heer dreug Bileam op naor Balak weeromme te gaon en legde him in de mond wat hi'j zeggen mos.
06 Doe Bileam weerommekwam, ston Balak nog bi'j zien braandoffers, saemen mit de Moabitische leiders.
07 Bileam begon een orakelspreuk op te zeggen en zee:
"Balak leut mi'j uut Aram kommen,
uut et barglaand in et oosten reup Moab zien keuning mi'j.
“kom Jakob veur mi'j vervluken,
kom Israël verweensken!”
08 Hoe kan ik vervluken wie deur God niet vervluukt is?
Hoe kan ik verweensken wie deur de Heer niet verweenst is?
09 Ik zie heur vanof de top van de rotsen,
ik neem heur waor vanof de heuvels,
een volk dat ofzunderd leeft,
him niet verbient mit aandere naosies.
10 Wie kan Jakob tellen, wie telt Israël?
Wie stelt de grootte van die stofwolke vaaste?
Mag ik wegraeken as die rechtveerdigen,
mag ik hennegaon zoas zi'j."
11 Balak zee tegen Bileam: "Wat hebben jow now daon! Ik hebbe jow hierhenne haelen laoten om mien vi'janen te vervluken, en now zegenen jow ze."
12 Bileam zee doe: "Ik zegge niks aanders as wat de Heer mi'j in de mond legt."
13 "Kommen jow mit naor een aandere plak vanwaor jow heur zien kunnen," zee Balak, "niet et hiele volk, mar wel een pat d'r van. Roep vanof daor veur mi'j een vluuk over heur uut."
14 En hi'j nam him mit naor de toppe van de Pisga, in de Sofimvlakte, bouwde zeuven alters en offerde op ieder d'r van een bolle en een ram.
15 Bileam zee tegen Balak: "Blieven jow hiere bi'j jow braandoffers, ik zal daorginderd waachten tot de Heer naor mi'j toe komt."
16 De Heer kwam bi'j Bileam, hi'j dreug him op om naor Balak weeromme te gaon en legde him in de mond wat hi'j zeggen mos.
17 Doe Bileam weerommekwam, ston Balak nog bi'j zien braandoffers, saemen mit de Moabitische leiders. "Wat het de Heer zegd?" vreug Balak.
18 Doe begon Bileam disse orakelspreuk:
"Pas goed op, Balak, en luuster,
zeune van Sippor, lien mi'j jow oor.
19 God is gien meenske, dat hi'j zien woord breken zol
of weeromme kommen zol op zien besluut.
Zol hi'j beloven en niet doen,
zien woord geven en et niet gestaand doen?
20 Hi'j dreug mi'j op te zegenen.
Hi'j het zegend – kan ik dat keren?
21 Veur Jakob lat him gien onheil schouwen,
veur Israël lat him gien rampspoed zien.
De Heer, heur God, is midden tussen heur,
gejubel klinkt op rond heur keuning.
22 God, die heur uut Iegypte leidde,
is veur heur as de horens van een wilde bolle.
23 Veurtekens lezen is Jakob vremd,
van waorzeggeri'je hoolt Israël him veer;
God zels praot tot Jakob, op zien eigen tied,
God zels zegt tegen Israël wat hi'j bewarken zal.
24 Kiek, een volk richt him op as een leeuw.
Vol majesteit verheft et him.
Et rust eerst as et zien prooi opeten het
en et bloed van zien buit dronken het."
25 Balak zee tegen Bileam: "As jow dan weigeren blieven om heur te vervluken, zegen heur dan temeensen niet."
26 Bileam zee doe tegen him: "Ik hebbe jow toch zegd dat ik alliend doe wat de Heer mi'j opdreegt?"
27 Doe zee Balak: "Kom mit mi'j mit, ik zal jow argens aanders hennebrengen. Misschien dat et in God zien ogen goed is as jow vanof daor veur mi'j een vluuk over heur uutroepen."
28 En hi'j nam him mit naor de toppe van de Peor; van daor kikt et volk uut over de Jesimon.
29 Bileam dreug Balak op om d'r zeuven alters te bouwen en zeuven bollen en zeuven rammen klaor te maeken veur een offer.
30 Balak dee wat Bileam zegd hadde. Op ieder alter offerde hi'j een bolle en een ram.
Numeri 24
01 Bileam begreep dat et in de ogen van de Heer goed was as hi'j Israël zegenen zol. Daorom gong hi'j niet, zoas de keren daorveur, op zuuk naor veurtekens, mar dri'jde hi'j zien gezichte naor de woestijn.
02 Doe hi'j zien ogen rondgaon leut en Israël daor legerd zag, stamme bi'j stamme, wodde hi'j deur de geest van God grepen
03 en begon hi'j disse orakelspreuk:
"Zo zegt Bileam, de zeune van Beor,
zo zegt de man wie zien oge eupendaon is,
04 zo zegt hi'j die God zien woorden heurt
en zicht wat de Ontzagwekkende zien lat,
in vervoering, mit ontsleuten ogen:
05 Hoe mooi bin jow tenten, Jakob,
hoe mooi jow huzen, Israël,
06 as palmbomen, rondomme verspreided,
as tunen langs een revier,
as aloë's deur de Heer plaant,
as ceders langs et waeter.
07 Israël zien emmers lopen over,
zien zaod krigt waeter in overdaod.
Zien keuning wodt groter as Agag,
slim machtig zien keuningschop.
08 God, die him uut Iegypte leidde,
is veur him as de horens van een wilde bolle.
Vi'jaandige volken verslient hi'j,
heur bonken verbriezelt hi'j,
hi'j vaalt an en vermorzelt heur.
09 Hi'j gaot liggen as een leeuw,
majesteitelik geft hi'j him daele –
wie zol him wakker maeken durven?
Zegend wie jow zegent, vervluukt wie jow vervluukt!"
10 Doe wodde Balak poer op Bileam. Hi'j balde zien voesten en zee: "Ik hebbe jow roepen laoten om een vluuk over mien vi'janen uut te roepen, mar jow hebben heur now al drie keer zegend.
11 Verdwien, gao weeromme naor waor jow weg kommen. Ik hadde toezegd da'k jow riek belonen zol, mar jow lopen die beloning mis – deur toedoen van de Heer."
12 Bileam zee doe: "Ik hebbe al tegen jow gezaanten zegd:
13 “ok al gaf Balak mi'j al et zulver en goold uut zien peleis, dan nog zo'k niks doen kunnen dat ok mar een betien ingaot tegen et bevel van de Heer. Uut mezels ka'k niks ondernemen; alliend wat de Heer zegt, zal ik zeggen.”
14 Goed, ik gao weeromme naor mien eigen laand. Mar eerst za'k jow weten laoten wat dit volk jow volk in de toekomst andoen zal."
15 Doe begon hi'j disse orakelspreuk:
"Zo zegt Bileam, de zeune van Beor,
zo zegt de man wie zien oge eupendaon is,
16 zo zegt hi'j die God zien woorden heurt,
die wet wat de Allerhoogste wet
en zicht wat de Ontzagwekkende zien lat,
in vervoering, mit eupen ogen:
17 Wat ik zie is niet in et now,
wat ik waorneem is niet vlakbi'j.
Een ster komt op uut Jakob,
een rieksstaf uut Israël.
Hi'j verbriezelt Moab de slaopen,
de kiender van Set slat hi'j daele.
18 Et laand van zien vi'jaand verovert hi'j,
et laand van Edom en Seïr.
Israël wodt machtig en stark,
19 uut Jakob staot een heerser op.
Wie uut de stad ontkomt brengt hi'j omme."
20 Doe zag Bileam Amalek en begon hi'j disse orakelspreuk:
"Amalek, veuranstaond onder de volken,
zal bi'j slot van zaeke hielendal verdistreweren."
21 Doe zag hi'j de Kenieten en begon hi'j disse orakelspreuk:
"Vaaste staot jow huus, Kaïn,
op een rots is jow nust bouwd.
22 Toch zullen jow wegvaegd wodden,
binnenkot voert Assur jow vot."
23 Ok begon hi'j disse orakelspreuk:
"Wee! Wie blift in leven as God dit alles dot?
24 Van de kust van de Kittiërs kommen schippen.
Assur en Eber onderdrokken zi'j,
mar iens gaon ok zi'j ok kepot."
25 Hiernao gong Bileam naor zien woonstee weeromme, en Balak gong ok naor huus toe.
Numeri 25
Israël vereert de Baäl van de Peor
01 Doe de Israëlieten in Sittim verbleven, begonnen ze heur in te laoten mit Moabitische vrouwluden.
02 Disse vrouwluden neudigden heur uut veur de offerplechtigheden as ere veur heur goden, en et volk at van de offers en beug heur veur die goden daele.
03 Zo gaf Israël him of mit de Baäl van de Peor. Daorom ontsteuk de Heer in lelkens tegen Israël.
04 "Laot alle femilie-ooldsten van et volk in et eupenbaor terechte stellen en ophangen, tegenover de Heer," zee hi'j tegen Mozes. "Dan zal de Heer zien branende argernis tegen Israël veren laoten."
05 Hierop dreug Mozes de rechters van Israël op om alleman die onder heur bevoegdhied vul en him ofgeven hadde mit de Baäl van de Peor omme te brengen.
06 Wiels Mozes en hiel Israël bi'j de ingang van de ontmoetingstente an et jammeren weren, brocht iene van de Israëlitische manluden veur heur ogen toch nog een Midjanitische vrouw naor zien tente.
07 Doe Pinechas, de zeune van Eleazar, de zeune van de priester Aäron, dat zag, kwam hi'j overaende, greep een speer,
08 volgde de Israëliet tot in zien slaopkaemer en deurstak him en de vrouw, dwas deur heur onderboek. Op etzelde mement wodden de Israëlieten van de plaoge verlost.
09 An vierentwintigduzend meensken hadde de plaoge et leven kost.
10 De Heer zee tegen Mozes:
11 "Deur toedoen van Pinechas, de zeune van Eleazar, de zeune van de priester Aäron, he'k mien lelkens tegen de Israëlieten veren laoten. Omreden hi'j bi'j de Israëlieten veur mi'j opkommen is, he'k heur niet allemaole in mien ofgeunst om et leven brocht.
12 Maek daorom bekend da'k een vrundschopsverbond mit him sluute:
13 ik beloof dat hi'j en zien naokommelingen veur altied et priesterschop beklieden zullen, omreden hi'j veur zien God opkommen is en verzoening veur de Israëlieten bewarkt het."
14 De Israëliet die tegere mit de Midjanitische vrouw ommebrocht was, hiette Zimri. Hi'j was een zeune van Salu, die an et heufd van een Simeonitische femilie ston. 15 De Midjanitische vrouw die ommebrocht was, hiette Kozbi. Zi'j was een dochter van Sur, een Midjanitisch stamheufd.
16 De Heer zee tegen Mozes:
17 "Behaandel de Midjanieten as jim vi'janen en maek heur van kaant,
18 want zi'j hebben jim as heur vi'janen behaandeld deur liepe plannen tegen jim te smeden; dat is bleken uut de gebeurtenissen bi'j de Peor en ok uut wat d'r veurvalen is mit Kozbi, de dochter van een Midjanitische leider, iene van heur eigen volk, die ommebrocht wodde tiedens de plaoge die op de gebeurtenissen bi'j de Peor volgde."
De Israëlieten opni'j teld
19 Nao de plaoge
Numeri 26
01 zee de Heer tegen Mozes en Eleazar, de zeune van de priester Aäron:
02 "Hool onder hiel Israël een telling van alle weerbere manluden van twintig jaor en oolder. Telle heur per femilie."
03-04 Mozes en de priester Eleazar reupen alle manluden van twintig jaor en oolder bi'jenneer, in de vlakte van Moab, an de Jordaan, op de hoogte van Jericho, zoas de Heer Mozes opdreugen hadde.
Dit weren de naokommelingen van de Israëlieten die wegtrokken weren uut Iegypte:
05 De stamme Ruben, Israël zien eerstgeborene. Ofstammelingen van Ruben: van Chanoch stamde et geslacht van de Chanochieten of, van Pallu et geslacht van de Palluïeten,
06 van Chesron et geslacht van de Chesronieten, van Karmi et geslacht van de Karmieten.
07 Dit weren de geslachten van de Rubenieten; et tal ingeschrevenen bedreug 43.730.
08 Pallu hadde iene zeune, Eliab,
09 en de zeunen van Eliab weren Nemuël, Datan en Abiram. Disse Datan en Abiram, slim anzienlike Israëlieten, weren et die heur mit de anhang van Korach tegen Mozes en Aäron verzet hadden en in opstaand kommen weren tegen de Heer.
10 De eerde hadde heur mond eupendaon en heur mit Korach opslokt, wiels zien twiehonderdvuuftig anhangers ommekwammen deur een verterend vuur. Zo weren zi'j een ofschrikwekkend veurbeeld wodden.
11 Mar Korach zien zeunen weren niet ommekommen.
12 Ofstammelingen van Simeon, op 'e riegel naor geslacht: van Nemuël stamde et geslacht van de Nemuëlieten of, van Jamin et slaacht van de Jaminieten, van Jachin et geslacht van de Jachinieten,
13 van Zerach et geslacht van de Zarchieten, van Saül et geslacht van de Saülieten.
14 Dit weren de geslachten van de Simeonieten – 22.200.
15 Ofstammelingen van Gad, op 'e riegel naor slaacht: van Sefon stamde et geslacht van de Sefonieten of, van Chaggi et geslacht van de Chaggieten, van Suni et geslacht van de Sunieten,
16 van Ozni et geslacht van de Oznieten, van Eri et geslacht van de Erieten,
17 van Arod et geslacht van de Arodieten, van Areli et geslacht van de Arelieten.
18 Dit weren de geslachten van de Gadieten – 40.500 ingeschrevenen.
19 Zeunen van Juda: Er en Onan. Liekegoed Er as Onan was in Kanaän wegraekt.
20 Ofstammelingen van Juda, op 'e riegel naor geslacht: van Sela stamde et geslacht van de Selanieten of, van Peres et geslacht van de Parsieten, van Zerach et geslacht van de Zarchieten.
21 Ofstammelingen van Peres: van Chesron stamde et geslacht van de Chesronieten of, van Chamul et geslacht van de Chamulieten.
22 Dit weren de geslachten van Juda – 76.500 ingeschrevenen.
23 Ofstammelingen van Issachar, op 'e riegel naor geslacht: van Tola stamde et geslacht van de Tolaïeten of, van Puwwa et geslacht van de Punieten,
24 van Jasub et geslacht van de Jasubieten, van Simron et geslacht van de Simronieten.
25 Dit weren de geslachten van Issachar – 64.300 ingeschrevenen.
26 Ofstammelingen van Zebulon, op 'e riegel naor geslacht: van Sered stamde et geslacht van de Sardieten of, van Elon et geslacht van de Elonieten, van Jachleël et geslacht van de Jachleëlieten.
27 Dit weren de geslachten van de Zebulonieten – 60.500 ingeschrevenen.
28 Zeunen van Jozef: Manasse en Efraïm. Van beiden stamden verschillende geslachten of.
29 Ofstammelingen van Manasse: van Machir stamde et geslacht van de Machirieten of, Machir verwekte Gilead, en van Gilead stamde et geslacht van de Gileadieten of.
30 Dit weren de ofstammelingen van Gilead: van Iëzer stamde et geslacht van de Iëzrieten of, van Chelek et geslacht van de Chelkieten,
31 van Asriël et geslacht van de Asriëlieten, van Sechem et geslacht van de Sichmieten,
32 van Semida et geslacht van de Semidaïeten, van Chefer et geslacht van de Chefrieten.
33 Chefers zeune Selofchad hadde gien zeunen mar wel dochters. De naemen van de dochters van Selofchad weren Machla, Noa, Chogla, Milka en Tirsa.
34 Dit weren de geslachten van Manasse; et tal ingeschrevenen bedreug 52.700.
35 Ofstammelingen van Efraïm, op 'e riegel naor geslacht: van Sutelach stamde et geslacht van de Sutalchieten of, van Becher et geslacht van de Bachrieten, van Tachan et geslacht van de Tachanieten.
36 Ofstammelingen van Sutelach: van Eran stamde et geslacht van de Eranieten of.
37 Dit weren de geslachten van de Efraïmieten – 32.500 ingeschrevenen. Dit weren de naokommelingen van Jozef, op 'e riegel naor geslacht.
38 Ofstammelingen van Benjamin, op 'e riegel naor geslacht: van Bela stamde et geslacht van de Balieten of, van Asbel et geslacht van de Asbelieten, van Achiram et geslacht van de Achiramieten,
39 van Sefufam et geslacht van de Sufamieten, van Chufam et geslacht van de Chufamieten.
40 De zeunen van Bela weren Ard en Naäman. Van Ard stamde et geslacht van de Ardieten of, van Naäman et geslacht van de Naämieten.
41 Dit weren de ofstammelingen van Benjamin, op 'e riegel naor geslacht; et tal ingeschrevenen bedreug 45.600.
42 Ofstammelingen van Dan, op 'e riegel naor geslacht: van Sucham stamde et geslacht van de Suchamieten of. Dit weren de geslachten van Dan.
43 Veur de geslachten van de Suchamieten bedreug et tal ingeschrevenen 64.400.
44 Ofstammelingen van Aser, op 'e riegel naor geslacht: van Jimna stamde et geslacht Jimna of, van Jiswi et geslacht van de Jiswieten, van Beria et geslacht van de Beriïeten.
45 Wat de ofstammelingen van Beria angaot: van Cheber stamde et geslacht van de Chebrieten of, van Malkiël et geslacht van de Malkiëlieten.
46 De naeme van de dochter van Aser was Serach.
47 Dit weren de geslachten van de Aserieten – 53.400 ingeschrevenen.
48 Ofstammelingen van Naftali, op 'e riegel naor geslacht: van Jachseël stamde et geslacht van de Jachseëlieten of, van Guni et geslacht van de Gunieten,
49 van Jeser et geslacht van de Jisrieten, van Sillem et geslacht van de Sillemieten.
50 Dit weren de Naftalieten, op 'e riegel naor geslacht; et tal ingeschrevenen bedreug 45.400.
51 Et tal inschreven Israëlieten bedreug 601.730.
52 De Heer zee tegen Mozes:
53-54 "Et laand moet onder disse stammen verpat wodden overienkomstig et tal ingeschrevenen: geef een grote stamme een groot gebied as arfelik bezit, een kleine stamme een klein gebied.
55 Et lot zal beslissen hoe et laand verpat wodden moet en wat gebied iedere stamme, overienkomstig et tal ingeschrevenen, toewezen krigt;
56 et lot beslist over de toewiezing van liekegoed de grote as de kleine stamgebieden."
57 Dit weren de ingeschrevenen van de Levieten, op 'e riegel naor geslacht: afstammend van Gerson et geslacht van de Gersonieten, van Kehat et geslacht van de Kehatieten, van Merari et geslacht van de Merarieten.
58 Dit weren de geslachten van Levi: et geslacht van de Libnieten, et geslacht van de Chebronieten, et geslacht van de Machlieten, et geslacht van de Musieten, et geslacht van de Korchieten. Kehat verwekte Amram.
59 De naeme van de vrouw van Amram was Jochebed. Zi'j was een dochter van Levi, wie zien vrouw heur in Iegypte brocht hadde, en zi'j kreeg van Amram Aäron, Mozes en heur zuster Mirjam.
60 Aäron kreeg disse zeunen: Nadab en Abihu, Eleazar en Itamar.
61 Nadab en Abihu raekten weg doe zi'j de Heer vuur anbeuden hadden dat niet an de veurschriften voldee.
62 Et tal inschreven Levieten, te weten alle mannelike personen van iene maond en oolder, bedreug 23.000. Zi'j wodden appat van de aandere Israëlieten inschreven, omreden an heur gien grondgebied toewezen wodde, zoas an de aanderen.
63 Dit weren de Israëlieten die deur Mozes en de priester Eleazar in de vlakte van Moab inschreven wodden, an de Jordaan, op de hoogte van Jericho.
64 Onder heur was gieniene van degenen die deur Mozes en de priester Aäron inschreven weren in de Sinaiwoestijn,
65 want de Heer hadde zegd dat ze allemaole in de woestijn wegraeken zollen. D'r was gieniene van heur overbleven, behalven Kaleb, de zeune van Jefunne, en Jozua, de zeune van Nun.
Numeri 27
Arfrecht van vrouwluden
01-02 De dochters van Selofchad, die tot een geslacht heurden dat van Jozef zien zeune Manasse ofstamde – Selofchad was een zeune van Chefer, de zeune van Gilead, de zeune van Machir, de zeune van Manasse – kwammen naor de ingang van de ontmoetingstente en gongen naor Mozes, de priester Eleazar, de leiders en et hiele volk. Disse vrouwluden mit de naemen Machla, Noa, Chogla, Milka en Tirsa legden heur dit veur:
03 "Oons heit is in de woestijn wegraekt. Hi'j heurde niet tot de anhangers van Korach, die tegen de Heer in opstaand kwammen, mar is om zien eigen zunden wegraekt. Hi'j hadde gien zeunen.
04 Moet de naeme van oons heit now uut de femilie wegraeken omreden hi'j gien zeune vermaekt het? Wiezen jim oons, krek as de breurs van oonze heit, een stok grond toe."
05 Mozes legde heur zaeke an de Heer veur,
06 en de Heer zee tegen Mozes:
07 "Selofchad zien dochters hebben geliek. Ie moe'n heur inderdaod een stok grond in bezit geven, krek as de breurs van heur heit. Wat heur heit toekwam moet op heur overgaon.
08 En zegge tegen de Israëlieten: “as iene wegraekt zonder een zeune nao te laoten, moet zien bezit overgaon op zien dochter.
09 Het hi'j gien dochter, dan moet zien bezit an zien breurs geven wodden.
10 Het hi'j gien breurs, dan moet zien bezit an de breurs van zien heit geven wodden.
11 Het zien heit gien breurs, dan moet zien bezit an zien naoste bloedverwaant geven wodden; dat is dan zien arfgenaem. Dit is een wettelike bepaoling veur alle Israëlieten, deur de Heer an Mozes geven.”"
Mozes dreegt de leiding over an Jozua
12 De Heer zee tegen Mozes: "Beklim et Abarimgebergte, zodat ie uutkieken kunnen over et laand dat ik de Israëlieten geve.
13 Aj' et zien hebben, zuj' mit je veuroolden verienigd wodden, krek as je breur Aäron.
14 Dat is omreden jim in de woestijn van Sin, doe de Israëlieten mit verwieten kwammen over waeter, tegen mien bevel ingaon binnen en in heur bi'jwezen gien ontzag toond hebben veur mien heilighied." (dat was et waeter van Meribat-Kades in de woestijn van Sin.)
15 Mozes zee doe tegen de Heer:
16 "Mag de Heer, de God die an al wat leeft de levensaosem geft, dan iene over et volk anstellen
17 die et leiden kan en de troepen anvoeren kan, zodat et volk van de Heer niet wodt as een kudde schaopen zonder hedder."
18 De Heer zee tegen Mozes: "Laot Jozua, de zeune van Nun, bi'j je kommen; hi'j is een man die geestkracht het. Legge him de haand op
19 en laot him zittengaon veur de priester Eleazar en veur de hiele gemienschop. Dreeg in ieder zien anwezigens de leiding an him over
20 en laot him patten in et anzien dat ie genieten. Dan zal hiel Israël him van now of an geheurzem wezen.
21 As d'r een beslissing neumen wodden moet, moet hi'j naor de priester Eleazar toe gaon, en die vragt dan tegenover de Heer de oraokelstienen. Zien uutspraoke bepaolt of Jozua mit de aandere Israëlieten een veldtocht ondernemen moet of niet."
22 Mozes dee wat de Heer him opdreugen hadde: hi'j leut Jozua bi'j him kommen, leut him zitten gaon veur de priester Eleazar en veur de hiele gemienschop,
23 legde him de hanen op en dreug de leiding an him over. Zo hadde de Heer et deur de mond van Mozes beveulen.
Numeri 28
Daegelikse offers en offers op belangrieke
feestdaegen
01 De Heer zee tegen Mozes:
02 "Laot de Israëlieten d'r veur zorgen dat ze mi'j op de vaastestelde tieden mien offers brengen, et eten dat mi'j anbeuden wodt as een roekende gaove die mi'j goeddonkt.
03 Zegge tegen heur: “iedere dag moej'm de Heer een offergaove anbieden. Dreeg him daegeliks twie ienjaorige rammen zonder ienigst gebrek as braandoffer op,
04 de iene ram morgens, de aandere tegen et valen van de aovend,
05 mit een graonoffer van een tiende efa weitenbloem mingd mit een vorrels hin zuvere olijfeulie.
06 Dit is een braandoffer daj'm daegeliks brengen moeten en dat op de Sinai insteld is; et is een roekende gaove die de Heer goeddonkt.
07 Bi'j de eerste ram heurt een wienoffer van een vorrels hin wien. De wien die de Heer offerd wodt, moet in et heiligdom uutgeuten wodden.
08 De twiede ram offeren jim tegen et valen van de aovend, mit eenzelde graonoffer en eenzelde wienoffer as morgens, een roekende gaove die de Heer goeddonkt.
09 Op sabbat bieden jim twie ienjaorige rammen zonder ienigst gebrek an, mit een graonoffer van twie tiende efa weitenbloem mingd mit olijfeulie, en et bi'jheurende wienoffer.
10 Dit braandoffer moet iedere sabbat brocht wodden, naost et daegelikse braandoffer en et daorbi'j heurende wienoffer.
11 Bi'j iedere ni'jemaone moej'm de Heer as braandoffer twie bollen, een volwassen ram en zeuven ienjaorige rammen zonder ienigst gebrek opdregen.
12 Bi'j iedere bolle komt een graonoffer van drie tiende efa weitenbloem mingd mit olijfeulie, bi'j de volwassen ram een graonoffer van twie tiende efa weitenbloem mingd mit olijfeulie,
13 en bi'j iedere jonge ram een graonoffer van iene tiende efa weitenbloem mingd mit olijfeulie. Dit alles is bestemd as braandoffer, as een roekende gaove die de Heer goeddonkt.
14 De bi'jheurende wienoffers bin een halve hin wien bi'j iedere bolle, een dadde hin bi'j de volwassen ram en een vorrels hin bi'j iedere jonge ram. Dit is et maondelikse braandoffer; et moet iedere maond van et jaor brocht wodden.
15 Ok moet as reinigingsoffer een bok an de Heer opdreugen wodden, naost et daegelikse braandoffer en et daorbi'j heurende wienoffer.
16 Op de veertiende dag van de eerste maond wodt as ere veur de Heer et pesachoffer klaormaekt.
17 En op de vuuftiende dag van die maond begint et feest waorop d'r zeuven daegen lange ongezoerd brood eten wodt.
18 De eerste dag moej'm as heilige dag saemen vieren; jim meugen dan niet warken.
19 Dreeg de Heer as braandoffer twie bollen, een volwassen ram en zeuven ienjaorige rammen op; ze meugen gien inkeld gebrek hebben.
20 Biede daorbi'j een graonoffer an van weitenbloem mingd mit olijfeulie: drie tiende efa bi'j iedere bolle, twie tiende efa bi'j de volwassen ram
21 en iene tiende efa bi'j ieder van de zeuven jonge rammen.
22 Ok moej'm, as reinigingsoffer, een bok anbieden, om verzoening veur jim zunden te bewarken.
23 Disse offers kommen niet in mindering op et braandoffer dat iedere morgen brocht wodt.
24 Ieder van de zeuven daegen moej'm dit eten as offergaove anbieden, een roekende gaove die de Heer goeddonkt. Mit et bi'jheurende wienoffer moet et naost et daegelikse braandoffer anbeuden wodden.
25 De zeuvende dag moej'm as heilige dag saemen vieren; jim meugen dan niet warken.
26 Ok de dag van de eerste opbrengst, de dag van et Wekenfeest, waorop jim de Heer een graonoffer uut de ni'je oogst anbieden, moej'm as heilige dag saemen vieren; jim meugen dan niet warken.
27 Biede die dag as braandoffer, as een roekende gaove die de Heer goeddonkt, twie bollen an, een volwassen ram en zeuven ienjaorige rammen,
28 mit et bi'jheurende graonoffer van weitenbloem mingd mit olijfeulie: drie tiende efa bi'j iedere bolle, twie tiende efa bi'j de volwassen ram,
29 en iene tiende efa bi'j ieder van de zeuven jonge rammen.
30 Biede ok een bok an, om verzoening veur jim te bewarken.
31 De dieren meugen gien inkeld gebrek hebben. Disse offers, mit de bi'jheurende wienoffers, kommen niet in mindering op et daegelikse braandoffer en et daorbi'j heurende graonoffer.
Numeri 29
01 De eerste dag van de zeuvende maond zullen de hoorns schallen. Vier die dag gezaemelik as heilige dag; jim meugen dan niet warken.
02 Jim moe'n de Heer die dag as braandoffer, as een roekende gaove die de Heer goeddonkt, een bolle opdregen, een volwassen ram en zeuven ienjaorige rammen zonder ienigst gebrek,
03 mit et bi'jheurende graonoffer van weitenbloem mingd mit olijfeulie: drie tiende efa bi'j de bolle, twie tiende efa bi'j de volwassen ram
04 en ien tiende efa bi'j ieder van de zeuven jonge rammen.
05 Biede ok een bok an, as reinigingsoffer, om verzoening veur jim te bewarken.
06 Disse offers kommen niet in mindering op et maondelikse braandoffer en et daorbi'j heurende graonoffer en ok niet op et daegelikse braandoffer en de veurschreven graon- en wienoffers die daorbi'j heuren. Dit is een roekende offergaove die de Heer goeddonkt.
07 Ok de tiende dag van de zeuvende maond moej'm as heilige dag saemen vieren. Jim moe'n die dag in ontholing deurbrengen en meugen niks doen.
08 Biede de Heer die dag as braandoffer, as een roekende gaove, een bolle an, een volwassen ram en zeuven ienjaorige rammen, allemaole zonder ienigst gebrek,
09 mit et bi'jheurende graonoffer van weitenbloem mingd mit olijfeulie: drie tiende efa bi'j de bolle, twie tiende efa bi'j de volwassen ram
10 en ien tiende efa bi'j ieder van de zeuven jonge rammen.
11 As reinigingsoffer moej'm een bok anbieden. Disse offers kommen niet in mindering op et reinigingsoffer waormit de verzoeningsrite uutvoerd wodt, en ok niet op et daegelikse braandoffer en de daorbi'j heurende graon- en wienoffers.
12 De vuuftiende dag van de zeuvende maond moej'm ok as heilige dag saemen vieren; jim meugen dan niet warken. Viere as ere veur de Heer zeuven daegen lange feest.
13 Biede as braandoffer, as een roekende offergaove die de Heer goeddonkt, dattien bollen an, twie volwassen rammen en veertien ienjaorige rammen, dieren zonder ienigst gebrek,
14 mit et bi'jheurende graonoffer van weitenbloem mingd mit olijfeulie: drie tiende efa bi'j ieder van de dattien bollen, twie tiende efa bi'j ieder van de twie volwassen rammen,
15 en ien tiende efa bi'j ieder van de veertien jonge rammen.
16 Biede as reinigingsoffer een bok an. Disse offers kommen niet in mindering op et daegelikse braandoffer en et daorbi'j heurende graon- en wienoffer.
17 Op de twiede dag bieden jim twaelf bollen an, twie volwassen rammen en veertien ienjaorige rammen zonder ienigst gebrek,
18 en bi'j ieder van de bollen en bi'j ieder van de volwassen en jonge rammen de bi'jheurende graon- en wienoffers, zoas veurschreven.
19 Veerder as reinigingsoffer een bok. Disse offers kommen niet in mindering op et daegelikse braandoffer en et daorbi'j heurende graon- en wienoffer.
20 Op de dadde dag elf bollen, twie volwassen rammen en veertien ienjaorige rammen zonder ienigst gebrek,
21 en bi'j ieder van de bollen en bi'j ieder van de volwassen en jonge rammen de bi'jheurende graon- en wienoffers, zoas veurschreven.
22 Veerder as reinigingsoffer een bok. Disse offers kommen niet in mindering op et daegelikse braandoffer en et daorbi'j heurende graon- en wienoffer.
23 Op de vierde dag tien bollen, twie volwassen rammen en veertien ienjaorige rammen zonder ienigst gebrek,
24 en bi'j ieder van de bollen en bi'j ieder van de volwassen en jonge rammen de bi'jheurende graon- en wienoffers, zoas veurschreven.
25 Veerder as reinigingsoffer een bok. Disse offers kommen niet in mindering op et daegelikse braandoffer en et daorbi'j heurende graon- en wienoffer.
26 Op de vuufde dag negen bollen, twie volwassen rammen en veertien ienjaorige rammen zonder ienigst gebrek,
27 en bi'j ieder van de bollen en bi'j ieder van de volwassen en jonge rammen de bi'jheurende graon- en wienoffers, zoas veurschreven.
28 Veerder as reinigingsoffer een bok. Disse offers kommen niet in mindering op et daegelikse braandoffer en et daorbi'j heurende graon- en wienoffer.
29 Op de zesde dag acht bollen, twie volwassen rammen en veertien ienjaorige rammen zonder ienigst gebrek,
30 en bi'j ieder van de bollen en bi'j ieder van de volwassen en jonge rammen de bi'jheurende graon- en wienoffers, zoas veurschreven.
31 Veerder as reinigingsoffer een bok. Disse offers kommen niet in mindering op et daegelikse braandoffer en et daorbi'j heurende graon- en wienoffer.
32 Op de zeuvende dag zeuven bollen, twie volwassen rammen en veertien ienjaorige rammen zonder ienigst gebrek,
33 en bi'j ieder van de bollen en bi'j ieder van de volwassen en jonge rammen de bi'jheurende graon- en wienoffers, zoas veurschreven.
34 Veerder as reinigingsoffer een bok. Disse offers kommen niet in mindering op et daegelikse braandoffer en et daorbi'j heurende graon- en wienoffer.
35 De achtste dag moet d'r een feestelike saemenkomst wezen; jim meugen dan niet warken.
36 Biede dan as braandoffer, as een roekende offergaove die de Heer goeddonkt, een bolle an, een volwassen ram en zeuven ienjaorige rammen zonder ienigst gebrek,
37 en biede bi'j de bolle, bi'j de volwassen ram en bi'j ieder van de jonge rammen et bi'jheurende graon- en wienoffer an, zoas veurschreven.
38 Veerder as reinigingsoffer een bok. Disse offers kommen niet in mindering op et daegelikse braandoffer en et daorbi'j heurende graon- en wienoffer.
39 Dit bin de braandoffers, graonoffers, wienoffers en vredeoffers die jim de Heer op jim belangrieke feestdaegen opdregen moeten. Ze valen buten jim gelofte-offers en jim vri'jwillige giften.”"
Numeri 30
01 Mozes brocht alles wat de Heer him opdreugen hadde an de Israëlieten over.
Geloften van vrouwluden
02 Mozes zee tegen de stamooldsten van de Israëlieten: "De Heer het dit bepaold:
03 As een man de Heer belooft wat doen te zullen of onder ede de verplichting op him nemt om him van wat te ontholen, mag hi'j zien woord niet breken; an alles wat hi'j mit zovule woorden zegt, moet hi'j him holen.
04 As een vrouw de Heer belooft wat doen te zullen of de verplichting angaot heur van wat te ontholen wiels ze nog as maegien bi'j heur heit woont,
05 en heur heit zegt d'r niks van as hi'j heurt van heur gelofte of van de verplichting die ze op heur neumen het, dan blieven al heur geloften en alle verplichtings die ze op heur neumen het geldig.
06 Mar as heur heit bezwaor maekt zogauw hi'j d'r van heurt, verliezen al heur geloften en alle verplichtings die ze op heur neumen het heur geldighied. De Heer stelt heur d'r vri'j van omreden heur heit bezwaor maekt het.
07 Is ze bi'j heur trouwen nog bunnen deur geloften die ze daon het of deur een onbezunnen toezegging,
08 en zegt heur man d'r niks van zogauw hi'j d'r van heurt, dan blieven heur geloften en de verplichtings die ze op heur neumen het geldig.
09 Mar as heur man bezwaor maekt zogauw hi'j d'r van heurt, dot hi'j de gelofte waordeur ze bunnen is of de onbezunnen toezegging die ze daon het teniet, en de Heer stelt heur d'r vri'j van.
10 Wat de geloften van wedevrouwen en verstoten vrouwluden angaot: alles waortoe zi'j heur verplicht hebben, moe'n ze naokommen.
11 As een vrouw trouwd is en ze dot een gelofte of nemt onder ede een verplichting op heur,
12 en heur man zegt d'r niks van en maekt gien bezwaor as hi'j d'r van heurt, dan blieven al heur geloften en alle verplichtings die ze angaon is geldig.
13 Mar as heur man ze naodrokkelik ongeldig verklaort zogauw hi'j d'r van heurt, verlöst alles wat ze toezegd het zien geldighied, iedere gelofte en iedere verplichting. Heur man dot alles teniet, en de Heer stelt heur d'r vri'j van.
14 Iedere gelofte en iedere verplichting tot ontholing die ze onder ede angaot, kan heur man liekegoed bekrachtigen as ongeldig verklaoren.
15 Het heur man d'r binnen vierentwintig ure niks van zegd, dan bekrachtigt hi'j al heur geloften en alle verplichtings die ze heurzels oplegd het; deur d'r niks van te zeggen zogauw hi'j d'r van heurt, bekrachtigt hi'j ze.
16 Mar verklaort hi'j ze naodrokkelik ongeldig as hi'j d'r van heurt, dan dreegt hi'j de volle verantwoordelikhied."
17 Dit bin de wetten die de Heer Mozes oplegd het mit betrekking tot een man en zien vrouw en mit betrekking tot een heit en een dochter die nog as maegien bi'j him woont.
Numeri 31
Wraoke op de Midjanieten en verdieling van
de buit
01 De Heer zee tegen Mozes:
02 "Spoor de Israëlieten d'r toe an om wraoke te nemen op de Midjanieten, daornao zuj' mit je veuroolden verienigd wodden."
03 Hierop zee Mozes tegen et volk: "Een pat van de manluden moet him klaormaeken om te vechten. Ze moe'n de Midjanieten anvalen om de wraoke van de Heer an Midjan uut te voeren.
04 Iedere stamme van Israël moet duzend man in et veld brengen."
05 Zo wodden d'r twaelfduzend weerbere manluden opreupen, duzend man uut iedere stamme van Israël.
06 Mozes leut disse manluden, duzend uut iedere stamme, uutrokken saemen mit Pinechas, de zeune van de priester Eleazar, die de heilige veurwarpen en de trompetten bi'j him dreug.
07 Ze trokken tegen de Midjanieten op, zoas de Heer Mozes beveulen hadde, en maekten alle manluden van kaant,
08 onder wie de keunings van Midjan: Ewi, Rekem, Sur, Chur en Reba. En naost de vuuf Midjanitische keunings brochten ze Bileam, de zeune van Beor ok omme.
09 De Israëlieten neumen de Midjanitische vrouwluden en kiender gevangen, maekten heur meester van de runder en et overige vee van de Midjanieten en van al heur bezittings,
10 en legden de steden waorin ze woonden en heur tentekaampen in de aske.
11 De geroofde bezittings en de hiele buit an meensken en dieren neumen ze mit,
12 en ze brochten liekegoed de gevangenen as et buitmaekte spul naor Mozes, de priester Eleazar en et volk van Israël, naor et kaamp in de vlakte van Moab, an de Jordaan, op de hoogte van Jericho.
13 Mozes, de priester Eleazar en de leiders van de gemienschop gongen et kaamp uut, heur integen.
14 Doe wodde Mozes poer op de bevelhebbers, de anvoerders van duzend en de anvoerders van honderd man, die daor uut de stried weerommekwammen.
15 "Jim hebben de vrouwluden in leven laoten?!" zee hi'j.
16 "Krek zi'j weren et die de Israëlieten, op anraoden van Bileam, doedertieden bi'j de Peor verleided hebben tot ontrouw an de Heer, en dat veroorzaekte de plaoge die de gemienschop van de Heer troffen het.
17 Maek daoromme alle kiender van et manlik geslacht en alle vrouwluden die mit een man slaopen hebben van kaant,
18 mar laot maegies die nog gienertied mit een man slaopen hebben in leven.
19 Zels moej'm zeuven daegen buten et kaamp blieven. Iederiene die iene ommebrocht het en iederiene die een sneuvelde anraekt het, moet him op de dadde en op de zeuvende dag wasken laoten. Dit gelt niet alliend veur jowzels mar ok veur de gevangenen.
20 Ok alle kleraosie moet schonemaekt wodden, en alle veurwarpen die maekt binnen van leer, geitehaor of hoolt."
21 De priester Eleazar zee tegen de manluden die an de stried mitdaon hadden: "Dit is een wet die de Heer insteld het en die hi'j an Mozes bekend maekt het:
22 Alles van goold of zulver, van keuper, iezer, tin of lood,
23 alles wat vuurvaaste is, moet deur et vuur haeld wodden om weer rein te wodden, en et moet butendat mit schoonmaekwaeter schonemaekt wodden. Alles wat niet tegen vuur bestaand is, moet deur et waeter haeld wodden.
24 Was op de zeuvende dag jim kleraosie, dan bi'j'm weer rein en meuj'm weer in et kaamp kommen."
25 De Heer zee tegen Mozes:
26 "Gao saemen mit de priester Eleazar en de femilie-ooldsten van de gemienschop nao hoe groot de buit an meensken en dieren is;
27 geef de iene helte an de manluden die an de stried mitdaon hebben en de aandere helte an de rest van de gemienschop.
28 Legge degenen die an de stried mitdaon hebben een heffing op van iene op de vuufhonderd meensken, runder, ezels, schaopen en geiten; dit moe'n ze an de Heer ofstaon.
29 Hool dit op heur andiel in en geef et an de priester Eleazar, as een kedo veur de Heer.
30 Op et andiel van de aandere Israëlieten moej' iene op de vuuftig meensken, runder, ezels, schaopen, geiten en aandere dieren inholen. Geef ze an de Levieten die zorg dregen veur de tabbernakel van de Heer."
31 Mozes en de priester Eleazar deden wat de Heer Mozes opdreugen hadde.
32 Ofzien van et buitmaekte spul die de troepen al verbruukt hadden, was de buit 675.000 schaopen en geiten,
33 72.000 runder
34 en 61.000 ezels,
35 en veerder meensken, 32.000 vrouwluden jommes die nog gienertied mit een man slaopen hadden.
36 De helte, et andiel van heur die an de stried mitdaon hadden, bedreug dan ok 337.500 schaopen en geiten,
37 waorvan d'r 675 an de Heer ofstaon wodden mossen,
38 36.000 runder, waorvan d'r 72 an de Heer ofstaon wodden,
39 30.500 ezels, waorvan d'r 61 an de Heer ofstaon wodden,
40 en 16.000 meensken, van wie d'r 32 an de Heer ofstaon wodden.
41 Mozes dreug alles wat as kedo an de Heer ofstaon wodden mos, over an de priester Eleazar, zoas de Heer him opdreugen hadde.
42 Op et andiel dat Mozes appat hullen hadde veur de Israëlieten die niet an de stried mitdaon hadden
43 – de veur heur bestemde helte besleug 337.500 schaopen en geiten,
44 36.000 runder,
45 30.500 ezels
46 en 16.000 meensken –
47 op dat pat van de Israëlieten hul Mozes iene op de vuuftig meensken en dieren in, en hi'j gaf die an de Levieten die zorg dreugen veur de tabbernakel van de Heer, zoas de Heer him opdreugen hadde.
48-49 De bevelhebbers van et leger, de anvoerders van duzend man en die van honderd, kwammen Mozes zeggen: "We hebben de manschoppen die onder oons bevel stonnen teld, heer, en d'r mist gieniene.
50 Wat wi'jzels an goolden veurwarpen antroffen hebben, bieden we de Heer as offergaove an: enkelkettinkies, aarmbanen, vingerringen, oorringen en halssieraoden. Hiermit wiwwe bi'j de Heer verzoening veur oonszels bewarken."
51 Mozes en de priester Eleazar neumen de goolden sieraoden van heur an.
52 Et goold dat ze as kedo veur de Heer in ontvangst neumen van de anvoerders van duzend man en die van honderd, weug 16.750 sjekel.
53 De manschoppen hullen de buit die ze veroverd hadden zels.
54 Mozes en de priester Eleazar brochten et goold dat ze van de anvoerders van duzend en van honderd man in ontvangst neumen hadden naor de ontmoetingstente, zodat de Heer an de Israëlieten daenken blieven zol.
Numeri 32
Toewiezing van grondbezit an de oostkaante
van de Jordaan
01 De Rubenieten en de Gadieten bezatten een biezunder protte vee. Doe zi'j zaggen dat et gebied van Jazer en Gilead bi'j uutstek geschikt was om d'r vee te holen,
02 gongen ze naor Mozes en de priester Eleazar en de leiders van de gemienschop en zeden:
03 "Et gebied van Atarot, Dibon, Jazer, Nimra, Chesbon, Elale, Sebam, Nebo en Beon,
04 dat de Heer veur et volk van Israël veroverd het, dat gebied is slim geschikt veur vee. En wi'j hebben een protte vee."
05 En ze gongen deur en zeden: "Wees zo goed om jim knechten dit gebied in bezit te geven, laot oons de Jordaan niet overgaon."
06 Mozes zee doe tegen de Gadieten en Rubenieten: "Jim willen hier blieven wiels jim breurs de stried angaon?
07 Willen jim de Israëlieten de moed ontnemen om naor de ginnekaante te gaon, naor et laand dat de Heer heur geven het?
08 Dat hebben jim veuroolden ok daon, doe ik heur d'r vanuut Kades-Barnea op uutstuurde om kieken te gaon hoe et laand was.
09 Zi'j verkenden et laand tot an et Eskoldal en ontnammen de Israëlieten de moed om et laand dat de Heer heur geven hadde binnen te trekken.
10 Doe wodde de Heer poer lelk, en hi'j zweerde:
11 “omreden zi'j niet hielendal op mi'j vertrouwd hebben, zal gienend van de manluden van twintig jaor en oolder die uut Iegypte wegtrokken binnen, et laand zien dat ik Abraham, Isaak en Jakob onder ede toezegd hebbe,
12 mit uutzundering van de Kenizziet Kaleb, de zeune van Jefunne, en Jozua, de zeune van Nun, die wel hielendal op de Heer vertrouwd hebben.”
13 De lelkens van de Heer was zo slim dat hi'j de Israëlieten veertig jaor in de woestijn ommezwarven leut, tot die hiele generaosie, die daon hadde wat min is in de ogen van de Heer, wegraekt was.
14 En now willen jim krek etzelde doen as jim zundige veuroolden en zo de lelkens van de Heer tegen de Israëlieten nog anhissen!
15 Aj'm jim van him ofkeren, zal hi'j heur nog langer in de woestijn laoten en zullen jim dit hiele volk in et verdarf stotten."
16 Mar zi'j zeden doe, dichterbi'j kommende: "We willen hier schaopskooien bouwen veur oons vee en steden veur oonze kiender.
17 Dan kun oonze kiender in de vestingsteden wonen, veilig veur de inwoners van et laand, en dan zuwwe oonszels waopenen en veur de aandere Israëlieten uut trekken, tot we heur op et plak van heur bestemming brocht hebben.
18 Wi'j gaon niet naor huus veurdat iederiene van de Israëlieten een eigen stok grond kregen het.
19 Mar awwe an de oostkaante van de Jordaan oons pat kriegen, hoeven wi'j niet krek as zi'j grond te hebben an de ginnekaante van de Jordaan of nog wieder vot."
20 Hierop zee Mozes tegen heur: "Aj'm dat doen, aj'm heur tegenover de Heer opmaeken veur de stried,
21-22 en as al jim weerbere manluden veur de Heer de Jordaan overtrekken en niet weerommekommen veurdat de Heer zien vi'janen verdreven het en et laand an him onderwurpen is, dan zuj'm jim hielendal van jim plicht tegenover de Heer en Israël kweten hebben en wodt dit gebied mit goedvienen van de Heer jim eigendom.
23 Mar doej'm dit niet, dan zundigen jim tegen de Heer en zuj'm de gevolgen van jim zunde ondervienen.
24 Bouwe steden veur jim kiender en bouwe schaopskooien, en doe waj'm toezegd hebben."
25 De Gadieten en de Rubenieten zeden doe tegen Mozes: "We zullen doen waj' van oons vraogen, heer.
26 Oonze vrouwluden en kiender, oons vee, al oonze dieren, zullen in de steden van Gilead blieven,
27 mar alle weerbere manluden zullen doen wat jow zeggen, heer: wi'j zullen veur de Heer naor de ginne kaante gaon om daor stried te leveren."
28 Daornao gaf Mozes kommedaosie an de priester Eleazar, an Jozua, de zeune van Nun, en an de stamooldsten van Israël.
29 Hi'j zee tegen heur: "As de weerbere manluden van de Gadieten en de Rubenieten saemen mit jim de Jordaan overstikken om onder bevel van de Heer te vechten, dan moej'm heur, as et laand an jim onderwurpen is, Gilead in eigendom geven.
30 Mar waopenen zi'j heur niet en stikken ze niet saemen mit jim over, dan moe'n ze krek as jim laand in Kanaän kriegen."
31 De Gadieten en de Rubenieten beloofden te doen wat de Heer heur opdreugen hadde:
32 "We zullen onder bevel van de Heer waopend naor Kanaän overstikken, mar we zullen grondbezit kriegen an disse kaante van de Jordaan."
33 Doe gaf Mozes an de Gadieten en de Rubenieten en an de helte van de stamme Manasse, de zeune van Jozef, et riek van keuning Sichon van de Amorieten en et riek van keuning Og van Basan – alle steden binnen de laansgreenzen en al et gebied rondom die steden.
34-36 De Gadieten herbouwden de vestingsteden Dibon, Atarot, Aroër, Atrot-Sofan, Jazer, Jogbeha, Bet-Nimra en Bet-Haran, en rippereerden de schaopskooien.
37 De Rubenieten herbouwden Chesbon, Elale, Kirjataïm
38 en de plakken die veurdat heur naeme veraanderd wodde Nebo en Baäl-Meon hietten, en Sibma, en ze gavven alle herbouwde steden een ni'je naeme.
39 De zeunen van Machir, de zeune van Manasse, gongen naor Gilead en neumen et in. De Amorieten die d'r woonden wodden verdreven.
40 Mozes gaf Gilead an Machir, de zeune van Manasse, en disse vestigde him daore.
41 Jaïr, ok een zeune van Manasse, trok d'r op uut, nam een tal dörpen van de Amorieten in en nuumde die de Dörpen van Jaïr.
42 Ok Nobach trok d'r op uut, nam Kenat mit de omliggende dörpen in en nuumde et naor himzels, Nobach.
Numeri 33
Liest van pleisterplakken
01 Dit bin de pleisterplakken die de Israëlieten andeden, naodat ze onder leiding van Mozes en Aäron, op 'e riegel odderd naor legerofdielings, wegtrokken weren uut Iegypte.
02 Op bevel van de Heer het Mozes de plakken waor ze heur kaamp opsleugen hadden opschreven. Ze trokken as volgt van et iene pleisterplak naor de aandere:
03 Op de vuuftiende dag van de eerste maond gongen de Israëlieten uut Rameses weg; veur de ogen van de Iegypteners trokken ze de dag nao et paoskemaol zonder bange te wezen vot.
04 De Iegypteners weren doe heur eerstgeborenen, die de Heer ommebrocht hadde, an et begreven; heur goden weren deur de Heer van heur voetstok stoten.
05 Naodat de Israëlieten Rameses uutgaon weren, sleugen ze heur kaamp op in Sukkot.
06 Naodat ze Sukkot verlaoten hadden, sleugen ze heur kaamp op in Etam, an de raand van de woestijn.
07 Naodat ze Etam verlaoten hadden, gongen ze weeromme naor Pi-Hachirot, tegenover Baäl-Sefon, en sleugen ze heur kaamp op veur Migdol.
08 Naodat ze Pi-Hachirot verlaoten hadden, trokken ze dwas deur de zee naor de woestijn. ze trokken drie dagreizen veer de woestijn van Etam in en sleugen heur kaamp op in Mara.
09 Naodat ze Mara verlaoten hadden, kwammen ze in Elim. In Elim weren twaelf waeterbronnen en zeuventig daodelpalms; daor sleugen ze heur kaamp op.
10 Naodat ze Elim verlaoten hadden, sleugen ze heur kaamp op an de Rooie Zee.
11 Naodat ze de Rooie Zee verlaoten hadden, sleugen ze heur kaamp op in de woestijn van Sin.
12 Naodat ze de woestijn van Sin verlaoten hadden, sleugen ze heur kaamp op in Dofka.
13 Naodat ze Dofka verlaoten hadden, sleugen ze heur kaamp op in Alus.
14 Naodat ze Alus verlaoten hadden, sleugen ze heur kaamp op in Refidim; daor was gien drinkwaeter veur et volk.
15 Naodat ze Refidim verlaoten hadden, sleugen ze heur kaamp op in de Sinaiwoestijn.
16 Naodat ze de Sinaiwoestijn verlaoten hadden, sleugen ze heur kaamp op in Kibrot-Hattaäwa.
17 Naodat ze Kibrot-Hattaäwa verlaoten hadden, sleugen ze heur kaamp op in Chaserot.
18 Naodat ze Chaserot verlaoten hadden, sleugen ze heur kaamp op in Ritma.
19 Naodat ze Ritma verlaoten hadden, sleugen ze heur kaamp op in Rimmon-Peres.
20 Naodat ze Rimmon-Peres verlaoten hadden, sleugen ze heur kaamp op in Libna.
21 Naodat ze Libna verlaoten hadden, sleugen ze heur kaamp op in Rissa.
22 Naodat ze Rissa verlaoten hadden, sleugen ze heur kaamp op in Kehelata.
23 Naodat ze Kehelata verlaoten hadden, sleugen ze heur kaamp op bi'j de Seferberg.
24 Naodat ze de Seferberg verlaoten hadden, sleugen ze heur kaamp op in Charada.
25 Naodat ze Charada verlaoten hadden, sleugen ze heur kaamp op in Makhelot.
26 Naodat ze Makhelot verlaoten hadden, sleugen ze heur kaamp op in Tachat.
27 Naodat ze Tachat verlaoten hadden, sleugen ze heur kaamp op in Terach.
28 Naodat ze Terach verlaoten hadden, sleugen ze heur kaamp op in Mitka.
29 Naodat ze Mitka verlaoten hadden, sleugen ze heur kaamp op in Chasmona.
30 Naodat ze Chasmona verlaoten hadden, sleugen ze heur kaamp op in Moserot.
31 Naodat ze Moserot verlaoten hadden, sleugen ze heur kaamp op in Bene-Jaäkan.
32 Naodat ze Bene-Jaäkan verlaoten hadden, sleugen ze heur kaamp op in Chor-Haggidgad.
33 Naodat ze Chor-Haggidgad verlaoten hadden, sleugen ze heur kaamp op in Jotbata.
34 Naodat ze Jotbata verlaoten hadden, sleugen ze heur kaamp op in Abrona.
35 Naodat ze Abrona verlaoten hadden, sleugen ze heur kaamp op in Esjon-Geber.
36 Naodat ze Esjon-Geber verlaoten hadden, sleugen ze heur kaamp op in de woestijn van Sin, en wel in Kades.
37 Naodat ze Kades verlaoten hadden, sleugen ze heur kaamp op bi'j de Hor, een barg an de greens van Edom.
38 Doe gong de priester Aäron op bevel van de Heer de barg op, en hi'j raekte daor weg, op de Hor, in et veertigste jaor nao de uuttocht van de Israëlieten uut Iegypte, op de eerste dag van de vuufde maond.
39 Aäron was honderddrienentwintig jaor doe hi'j op de Hor wegraekte.
40 De Kanaänitische keuning van Arad, die in de Negev in Kanaän woonde, vernam dat de Israëlieten in antocht weren.
41 Naodat ze de Hor verlaoten hadden, sleugen ze heur kaamp op in Salmona.
42 Naodat ze Salmona verlaoten hadden, sleugen ze heur kaamp op in Punon.
43 Naodat ze Punon verlaoten hadden, sleugen ze heur kaamp op in Obot.
44 Naodat ze Obot verlaoten hadden, sleugen ze heur kaamp op bi'j Ijje-Haäbarim an de greens van Moab.
45 Naodat ze Ijje-Haäbarim verlaoten hadden, sleugen ze heur kaamp op in Dibon-Gad.
46 Naodat ze Dibon-Gad verlaoten hadden, sleugen ze heur kaamp op in Almon-Diblataïm.
47 Naodat ze Almon-Diblataïm verlaoten hadden, sleugen ze heur kaamp op in et Abarimgebergte, bi'j de Nebo.
48 Naodat ze et Abarimgebergte verlaoten hadden, sleugen ze heur kaamp op in de vlakte van Moab, bi'j de Jordaan, tegenover Jericho;
49 ze sleugen heur tenten op langs de Jordaan, van Bet-Hajjesimot tot an Abel-Hassittim, in de vlakte van Moab.
Verdieling van Kanaän
50 In de vlakte van Moab, an de Jordaan op de hoogte van Jericho, zee de Heer tegen Mozes:
51 "Zegge tegen de Israëlieten: “aj'm de Jordaan overstikken naor Kanaän,
52 moej'm de bewoners van dat laand verdrieven. Verdistreweer al heur stienen mit ofbelings en al heur geuten beelden, en verwoest de offerplakken.
53 Neem et laand in bezit en gao d'r wonen, ik geve jim dit laand in eigendom.
54 Jim moe'n et laand deur middel van lotting onder de verschillende geslachten verpatten. Geef een groot geslacht een groot stok grond in bezit, een klein geslacht een klein stok. Et lot bepaolt wat ieder geslacht krigt. Zo moej'm et laand onder de verschillende stammen verpatten.
55 Mar aj'm de bewoners d'r van niet verdrieven, zullen degenen die ie van heur overlaoten heur vi'janig tegenover jim opstellen aj'm ienkeer in et laand wonen; ze zullen tot stiekels in je ziede en tot stiekels in je ogen wodden.
56 En dan za'k mit jim doen wat ik van doel was mit heur te doen.”"
Numeri 34
01 De Heer zee tegen Mozes:
02 "Zegge dit tegen de Israëlieten: “aj'm in Kanaän ankommen binnen, zullen dit de greenzen wezen van et grondgebied dat jim toevaalt:
03 Jim zuudgreens lopt vanof de woestijn van Sin langs et gebied van Edom, en begint dus bi'j et uterste zuudoostpunt van de Zooltene-Zee.
04 Hi'j lopt in een bocht zudelik om de Schorpioenenpas henne, gaot dan veerder naor Sin, lopt dan rechtstreeks naor een punt an de zuudkaante van Kades-Barnea, en gaot over Chasar-Addar veerder naor Asmon.
05 Bi'j Asmon buugt de greens of naor de wadi die de greens mit Iegypte is, en van daor lopt hi'j rechtstreeks naor de zee.
06 De westgreens wodt vormd deur de Grote Zee; hool dat as westgreens an.
07 Jim noordgreens lopt zo: Trekke een streep van de Grote Zee naor de Hor,
08 en trek van disse barg een streep naor Lebo-Hamat. De greens lopt daornao rechtstreeks naor Sedad,
09 dan naor Zifron, en aendigt bi'j Chasar-Enan. Hool dit as noordgreens an.
10 Veur de greens in et oosten moej'm een streep trekken van Chasar-Enan naor Sefam.
11 Van Sefam lopt de greens naor beneden, naor Haribla, an de oostkaante van Aïn, dan gaot hi'j veerder omlegens en lopt vlak langs de bargketten an de oostkaante van et meer van Kinneret.
12 Daornao lopt hi'j nog veerder omlegens, volgt de Jordaan en komt uut bi'j de Zooltene-Zee. Dat bin de greenzen van et laand dat veur jim bestemd is.”"
13 Mozes zee tegen de Israëlieten: "Dit is et laand dat jim deur middel van lotting onder mekeer verpatten moeten en dat an negeneneenhalve stamme geven wodden moet, zoas de Heer opdreugen het.
14 De femilies van de stamme Ruben en van de stamme Gad, en ok de helte van de stamme Manasse, hebben ommes et grondgebied dat heur toekomt al kregen;
15 twienenhalve stamme hebben grondbezit kregen an disse kaante van de Jordaan, op de hoogte van Jericho, an de oostkaante, waor de zunne opkomt."
16 De Heer zee tegen Mozes:
17 "Degenen die et laand onder jim verpatten moeten, bin de priester Eleazar en Jozua, de zeune van Nun.
18 Wies in iedere stamme iene an die de leiding het bi'j de verdieling van et laand.
19 Dit bin heur naemen: veur de stamme Juda Kaleb, de zeune van Jefunne;
20 veur de stamme Simeon Semuël, de zeune van Ammihud;
21 veur de stamme Benjamin Elidad, de zeune van Kislon;
22 veur de stamme Dan et femilieheufd Bukki, de zeune van Jogli;
23 wat de naokommelingen van Jozef angaot: veur de stamme Manasse et femilieheufd Channiël, de zeune van Efod,
24 en veur de stamme Efraïm et femilieheufd Kemuël, de zeune van Siftan;
25 veur de stamme Zebulon et femilieheufd Elisafan, de zeune van Parnach;
26 veur de stamme Issachar et femilieheufd Paltiël, de zeune van Azzan;
27 veur de stamme Aser et femilieheufd Achihud, de zeune van Selomi;
28 veur de stamme Naftali et femilieheufd Pedaël, de zeune van Ammihud."
29 Dit weren degenen an wie de Heer opdreug om Kanaän onder de Israëlieten te verpatten.
Numeri 35
Steden veur de Levieten en ontwiekplakken
01 De Heer zee tegen Mozes, in de vlakte van Moab, an de Jordaan, op de hoogte van Jericho:
02 "Geef de Israëlieten kommedaosie om van et gebied dat ze as eigendom kriegen een tal steden of te staon an de Levieten, zodat die daorin wonen kunnen. Ok de weidegronden rond die steden moej'm an de Levieten geven.
03 Zi'j kun in de steden wonen, de omliggende weidegronden bin veur heur vee, veur al heur dieren.
04 De weidegronden bi'j de steden die jim an de Levieten ofstaon, moe'n heur vanof de stadsmure naor alle kaanten duzend el uutstrekken.
05 Meet vanuut et midden van de stad an de oostkaante twieduzend el of, an de zuudkaante twieduzend el, an de westkaante twieduzend el en an de noordkaante twieduzend el. Dat gebied heurt as weidegrond bi'j heur steden.
06 Wat de steden die jim an de Levieten ofstaon moeten angaot: zesse daorvan dienen as ontwiekplakken waorhenne iene die een aander ommebrocht het uutwieken kan, en daornaost moej'm nog twienenveertig steden ofstaon.
07 In tetaol moej' de Levieten achtenveertig steden mit de omliggende weidegronden ofstaon.
08 Bi'j et toewiezen van disse steden moet rekenschop hullen wodden mit et tal steden dat de Israëlieten hebben. Van degenen die een protte hebben, moe'n d'r meer neumen wodden as van heur die weinig hebben; et tal steden dat an de Levieten ofstaon wodden moet, wodt bepaold deur de grootte van et gebied dat iedere stamme as zien eigendom kregen het."
09 De Heer zee tegen Mozes:
10 "Zegge tegen de Israëlieten: “aj'm de Jordaan overstikken naor Kanaän,
11 moej'm een tal steden uutkiezen die as ontwiek dienen kunnen; dan kan iene die zonder opzet een aander ommebrocht het daorhenne uutwieken.
12 Die steden dienen as ontwiek tegen bloedwrekers, zodat veurkommen wodt dat iene die een aander ommebrocht het, wegraekt veurdat hi'j veur de gemienschop terechtestaon het.
13 Van de steden die jim ofstaon, moe'n d'r zesse een ontwiek wezen:
14-15 drie steden an de ginne kaante van de Jordaan en drieje in Kanaän. Disse zes steden moe'n een ontwiek wezen veur liekegoed de Israëlieten as de vremden die bi'j jim wonen of tiedelik bi'j jim wonen, zodat iederiene die zonder opzet een aander ommebrocht het, daorhenne vlochten kan.
16 Mar wie een aander mit een iezeren veurwarp zo hadde slat dat disse wegraekt, is een moordener en moet ommebrocht wodden.
17 Ok wie een aander mit een stien waormit ie iene doodmaeken kunnen zo hadde slat dat disse wegraekt, is een moordener en moet ommebrocht wodden.
18 En ok wie een aander mit een hoolten veurwarp waormit ie iene doodmaeken kunnen zo hadde slat dat disse wegraekt, is een moordener en moet ommebrocht wodden.
19 De bloedwreker moet him van kaant maeken zogauw hi'j him antreft.
20 As iene een aander uut haat een drokkerd geft of mit opzet wat naor him toe gooit en de aander komt daordeur omme,
21 of as iene een aander uut vi'jaandschop zoe'n voestslag geft dat hi'j wegraekt, dan moet de daoder ommebrocht wodden. Hi'j is een moordener en de bloedwreker moet him van kaant maeken zogauw hi'j him vint.
22 Mar as iene een aander per ongelok een drokkerd geft zonder dat d'r van vi'jaandschop spraoke is, of per ongelok een veurwarp naor him toe gooit,
23 of uut onopletzemhied een stien die de dood veroorzaeken kan op him valen lat, en de aander wegraekt zonder dat hi'j him vi'janig zind was of d'r op uut was om him kwaod te doen,
24 dan moet de gemienschop mit hulpe van disse regels rechtspreken over de daoder en de bloedwreker.
25 De gemienschop moet de daoder tegen de bloedwreker huden en him weerommegaon laoten naor de ontwiek waor hi'j zien toevlocht zocht hadde. Daor moet hi'j blieven tot de dood van de hogepriester, die mit de heilige eulie zalfd is.
26 Mar begeft de daoder him ok mar even buten de greenzen van de ontwiek waor hi'j henne uutweken is
27 en treft de bloedwreker him dan buten die ontwiek an en maekt hi'j him van kaant, dan laedet de bloedwreker daormit gien bloedschuld op him.
28 De daoder is verplicht in de ontwiek te blieven tot de dood van de hogepriester en mag eerst nao zien wegraeken naor zien eigen gebied weerommekommen.
29 Dit bin wettelike bepaolings die veur jim en veur alle kommende generaosies gellen, waoj'm ok wonen.
30 As iene een aander ommebrocht het, mag hi'j alliend op grond van getugeverklaorings van kaant maekt wodden, mar de verklaoring van iene getuge is niet genoeg om iene tot de dood te veroordielen.
31 Ie meugen gien lospries annemen veur et leven van een moordener die schuldig bevunnen en tot de dood veroordield is; zoe'niene moet ommebrocht wodden.
32 Ie meugen ok gien losgeld annemen van iene die naor een ontwiek uutweken is en nog veur de dood van de priester weerommekommen wil naor zien eigen woonstee.
33 Jim meugen et laand waorin jim wonen niet ontwi'jden. Bloed ontwi'jdt et laand, en as d'r bloed vergeuten is, kan d'r alliend verzoening veur et laand bewarkt wodden deur et bloed van degene die bloed vergeuten het.
34 Jim meugen et laand waoj'm in wonen en waor ik in woon, niet verontreinigen, want ik, de Heer, wone midden tussen de Israëlieten.”"
Numeri 36
Arfelik bezit en huwelik
01 De femilie-ooldsten van et geslacht dat ofstamde van Gilead, de zeune van Machir, de zeune van Manasse, iene van de geslachten die van Jozef ofstamden, kwammen naor Mozes en legden him en de leiders en femilie-ooldsten van de Israëlieten dit:
02 "De Heer het jim opdreugen, heer, om et laand deur middel van lotting onder de Israëlieten te verpatten en om dat wat oonze stamgenoot Selofchad toekwam, an zien dochters te geven.
03 Mar stel now dat zi'j trouwen mit een Israëliet uut een aandere stamme, dan zol heur eigendom onttrokken wodden an et bezit van oonze veuroolden en toevoegd wodden an et bezit van de stamme waortoe zi'j dan beheuren zollen; et zol ofneumen wodden van dat wat oons deur lotting toewezen is.
04 En as de Israëlieten dan een jubeljaor vieren, zol heur bezit veurgoed toevoegd wodden an et bezit van de stamme waortoe zi'j dan beheuren zollen en an et bezit van oonze eigen stamme onttrokken wodden."
05 Op bevel van de Heer dee Mozes doe disse uutspraoke. "De naokommelingen van Jozef hebben geliek," zee hi'j tegen de Israëlieten.
06 "De Heer het vanwegens Selofchad zien dochters dit bepaold: zi'j meugen trouwen mit wie ze willen, as et mar iene uut een geslacht van heur eigen stamme is.
07 Want arfelik bezit van de Israëlieten mag niet van de iene stamme overgaon op de aandere; iedere Israëliet moet d'r veur zorgen dat arfelik bezit binnen de eigen stamme blift.
08 Daorom moet ieder maegien dat in iene van de stammen van Israël bezit krigt, trouwen mit iene uut een geslacht van heur eigen stamme. Zo kan iedere Israëliet arven wat zien veuroolden toewezen is.
09 Arfelik bezit mag niet van de iene stamme op de aandere overgaon; iedere Israëliet moet d'r veur zorgen dat arfelik bezit binnen de eigen stamme blift."
10 De dochters van Selofchad deden wat de Heer Mozes opdreugen hadde:
11 Machla, Tirsa, Chogla, Milka en Noa trouwden mit zeunen van heur omkes,
12 manluden uut geslachten die ofstamden van Manasse, de zeune van Jozef. Zo bleef heur bezit binnen de stamme waortoe et geslacht van heur heit heurde.
13 Tot zoveer de geboden en regels die de Heer de Israëlieten deur de mond van Mozes oplegd het in de vlakte van Moab, an de Jordaan, op de hoogte van Jericho.