Nehemia
in een
Nehemia
is tegere mit Ezra eins ien boek dat in biebeluutgiften de hieltied in twienen
splitst is. Et boek het zien naeme kregen van Nehemia, die omdebi'j 445 v.Chr.
deur de Perzische keuning Artaxerxes as laandvoogd van Juda ansteld wodde en onder
wie zien leiding de herbouw van Jeruzalem zien mure tot staand kommen is. In de
Hebreeuwse biebel wodt Nehemia mit Ezra tot de Ketoeviem, de Geschriften,
rekend, en et is dan et laeste of et veurlaeste boek. In een protte
biebeluutgiften geft et volk Ezra en Nehemia zien de inhoold meerstal een plak
onder de historische boeken, nao 2 Kronieken. Opvalend is dat de beginvassen
van Ezra en de slotvassen van 2 Kronieken haost etzelde binnen. Op grond
daorvan en op grond van inhoold en stiel wodt pattietoeren verondersteld dat de
boeken Ezra en Nehemia ofkomstig binnen van de schriever die 1 en 2 Kronieken
ok schreven het. Meugelik wol hi'j, of een geestverwaant, ien groot
geschiedeniswark saemenstellen, dat begon mit de schepping van de wereld en
ophoolt mit de herbouw van de tempel (515 v.Chr.) en et herstel van de muren
van de stad Jeruzalem (omdebi'j 443 v.Chr.). De boeken wodden in et algemien
niet veur et aende van de vuufde ieuw dateerd.
De
boeken Ezra en Nehemia geven een selektief verslag van gebeurtenissen uut de
geschiedenis van Israël in de ieuw nao de Babylonische ballingschop. Et is een
min of meer deurlopend verhael waorin teksten uut verschillende bronnen
verzaemeld binnen en zovule meugelik as ien gehiel prissenteerd binnen. D'r bin
brieven en keuninklike besluten, liesten mit naemen en geslachtsregisters,
archiefstokken, memoires en gebeden. Opvalend is dat pattie teksten niet in et
Hebreeuws, mar in et Aramees schreven binnen (Ezra 4:8-6:18; 7:12-26). Et
Aramees was de officiële bestuurstael in et Perzische riek. De schriever van
Ezra en Nehemia hoolt zien lezers veur dat de gemienschop van de weerommekommen
ballings die leven neffens de wet van Mozes, een vervolg is van et volk van
Israël uut de tied van de keunings. Belangrieke onderwarpen bin de herbouw van
de tempel in Jeruzalem en van de muren van de stad, et daorbi'j ondervunnen
verzet, de naoleving van de wet van Mozes en et herstel van de Joodse
gemienschop as et volk van God.
In
et boek Nehemia bin drie patten te onderscheiden. In et eerste pat (1-7) staon
de eerste warkzemheden van Nehemia as laandvoogd centraol. Hi'j krigt
toestemming van Artaxerxes om naor Jeruzalem te gaon en et welwezen van de
Joodse volksgenoten te behattigen. Onder zien leiding wodt de mure van de stad
herbouwd. Nehemia nemt ok maotregels tegen opkommend sociaol onrecht. Et twiede
pat (8-10) is wi'jded an de verni'jing van et godsdienstig leven. Een
belangriek hoogtepunt is de veurlezing van de wet van Mozes deur de priester
Ezra tegenover alle Israëlieten. Et hiele volk verklaort plechtig dat ze in et
vervolg leven zullen neffens de wetten van God. Et dadde pat (11-13) het
liesten van bewoners van Jeruzalem, een verslag van de inwi'jding van de
herbouwde stadsmure en van een tal hervormingsmaotregels van Nehemia.
Nehemia 1
Nehemia
01 Verslag van Nehemia, de zeune van Chachalja.
In
de maond kislew van et twintigste jaor, doe ik in de burcht van Susa was,
02 kwam iene van mien breurs, Chanani, mit een tal
manluden vanuut Juda naor mi'j toe. Ik vreug heur hoe et de Joden vergong die
overbleven weren en de ballingschop overleefd hadden, en infermeerde naor de
toestaand in Jeruzalem.
03 Zi'j vertelden mi'j dit: "Et gaot hiel min mit
de meensken die de ballingschop overleefd hebben en die now in de perveensie
Juda wonen. Ze bin daor et mikpunt van spot, want de mure van Jeruzalem is
ofbreuken en de poorten bin in vlammen opgaon."
04 Doe ik disse woorden heurde, gong ik goelend op de
grond zitten. Ik rouwde daegenlange, ik vaastte en reup de God van de hemel an.
05 Ik biddede: "Ach Heer, God van de hemel,
machtige en ontzagwekkende God, jow die jow toezeggings naokommen en trouw
binnen an iederiene die jow liefhet en dot wat jow zeggen,
06 luuster andachtig en kiek hoe jow knecht dag en
naacht tot jow biddet veur jow knechten, de Israëlieten. Ik beliede de zunden
die wi'j, Israëlieten, tegenover jow begaon hebben, ik en mien femilie ok.
07 Wi'j hebben jow een protte kwaod daon; wi'j hebben
oons niet hullen an de geboden, veurschriften en rechtsregels die jow an Mozes,
jow knecht, geven hebben.
08 Daenk toch an wat jow Mozes veurhullen hebben: “as
jim ontrouw binnen, za'k je onder alle volken verstri'jen,
09 mar aj'm naor mi'j weerommekommen, en jim holen an
mien geboden en die naoleven, za'k jim, ok al zollen jim uutstoten wezen naor
et aende van de hemel, terogge en bi'jenneer brengen op et plak dat ik
uutkeuzen hebbe om d'r mien naeme wonen te laoten.”
10 De Israëlieten bin jow knechten, zi'j bin jow volk;
jow hebben heur deur jow grote macht en mit jow starke haand vri'jmaekt.
11 Ach mien Heer, luuster toch andachtig naor et gebed
van jow knecht en naor dat van al jow knechten die jow naeme respekteren
willen. Laot mi'j vandaege toch slaegen en laot de keuning mi'j goedgeunstig
wezen." In die tied wa'k schinker an et hof van de keuning.
Nehemia 2
Nehemia gaot
naor Jeruzalem
01 Et was in de maond nisan, in et twintigste
regeringsjaor van Artaxerxes. De wien ston op taofel. Ik nam de wien en beud
die de keuning an. Gienertied hadde hi'j wat op mi'j an te marken had,
02 mar now zee hi'j: "Waoromme kiek ie zo somber,
ie bin toch niet ziek? D'r is vaaste wat dat je dwaszit." Ik schrok slim
03 en zee: "Majesteit, leef in iewighied! Hoe zol
ik niet somber wezen as de stad waor mien veuroolden begreuven binnen, verwoest
is en heur poorten in vlammen opgaon binnen?"
04 "Wat is dan je weens?" vreug de keuning.
Ik biddede tot de God van de hemel,
05 en zee doe tegen de keuning: "As et de keuning
goeddonkt, en as jow et mi'j, jow knecht, toestaon, stuur mi'j dan naor Juda,
om de stad waor mien veuroolden begreuven liggen opni'j op te bouwen."
06 De keuning – mit zien lievelingsvrouw an zien ziede
– wol weten hoe lange mien reize duren zol en a'k weeromme kommen zol. Naodat
ik de keuning een tiedstip nuumd hadde, willigde hi'j mien vraoge om vot te
gaon in.
07 "En as et de keuning goeddonkt," zo zee
ik, "laot et volk mi'j dan brieven mitgeven veur de gouverneurs van de
perveensie Trans-Eufraat, zodat zi'j mi'j deurgang verlienen tot an Juda."
08 Ok vraog ik om een brief veur Asaf, et heufd van de
keuninklike hooltvesteri'jen, om mi'j hoolt te leveren veur de balkens van de
poorten van de tempelburcht, veur de stadsmure en veur et huus waor ik mien
intrek in nemen zol. Omreden mien God mi'j bescharming beud, gaf de keuning
mi'j de langde brieven.
09 Doe 'k bi'j de gouverneurs van de perveensie
Trans-Eufraat ankwam, gaf ik heur de brieven van de keuning. De keuning hadde
mi'j een begeleiding van officieren en ruters mitgeven.
10 Doe Sanballat uut Bet-Choron en Tobia, zien
Ammonitische knecht, heurden dat d'r iene kommen was die et welwezen van de
Israëlieten bevodderen wol, weren ze hierover slim kwaod.
Nehemia krigt
mitstaanders in Jeruzalem
11 Zo kwam ik in Jeruzalem an. Nao drie daegen
12 trok ik d'r mit een peer manluden in de naacht op
uut. Ik hadde gieniene verteld wat plannen mien God mi'j veur Jeruzalem ingeven
hadde, en et ienigste dier da'k bi'j mi'j hadde, was et dier waorop ik ree.
13 Die naacht gong ik deur de Dalpoort en langs de
Drakenbron naor de Mestpoort, om de daelehaelde stadsmuren en de deur vuur
verteerde poorten te bekieken.
14 Ik gong deur naor de Bronpoort en naor de
Koningsviever, waor et beest waor ik op zat niet veerder kon.
15 Daorom klom ik die naacht deur et Kidrondal
omhogens om de mure te inspekteren, en deur de Dalpoort gong ik weeromme.
16 De stadsbestuurders wussen niet wao'k henne gaon
was en wa'k an 't doen was, want de Joden, of ze now priester weren, blispoter,
bestuurder of ambtener, ha'k nog niks verteld.
17 Mar now zee 'k tegen heur: "Jim zien in wat
veur ellende wi'j verkeren: Jeruzalem ligt in puun en de poorten bin in vlammen
opgaon. Lao'we de stadsmure weer opbouwen, zodat we niet langer et mikpunt van
spot binnen."
18 Ik vertelde heur dat mien God mi'j bescharming
beuden hadde, en ok brocht ik de woorden van de keuning over. "Lao'we dan
drekt mit de herbouw uut aende zetten," zeden ze, en ze pakten et wark mit
vaosie an.
19 Doe Sanballat uut Bet-Choron, Tobia, zien
Ammonitische knecht, en de Arabier Gesem dit heurden, begonnen zi'j oons uut te
lachen en te beschimpen: "Wat bin jim hier an et doen? Kommen jim seins
tegen de keuning in opstaand?"
20 Dit was mien bescheid: "Et is de God van de
hemel die oons slaegen laoten zal. Wi'j, zien knechten, zetten uut aende mit de
herbouw. Jim heuren niet in Jeruzalem, jim kun d'r gien rechten gellen laoten,
hier is niks dat an jim herinnert."
Nehemia 3
Herbouw van
de stadsmure
01 Eljasib, de hogepriester, begon saemen mit zien
medepriesters an de herbouw van de Schaapspoort. Naodat ze die inwi'jded
hadden, plaetsten ze de deuren en wi'jdden ze et gedielte van de Honderdtoren
tot de Chananeltoren in.
02 Naost him warkten de manluden van Jericho, en
daornaost Zakkur, de zeune van Imri.
03 De Vispoort wodde deur de zeunen van Senaä
herbouwd. Zi'j legden de balkens en plaetsten de deuren, kompleet mit
sluutbalken en grundels.
04 Naost heur voerde Meremot, de zeune van Uria, de
zeune van Hakkos, de herstelwarkzemheden uut, en daornaost Mesullam, de zeune
van Berechja, de zeune van Mesezabel, en wat wiederop Sadok, de zeune van
Baäna.
05 Daor weer naost warkten de inwoners van Tekoa, mar
de anzienliken van die stad deden niet mit mit et wark van heur heer.
06 De Oolde Poort wodde hersteld deur Jojada, de zeune
van Paseach, en deur Mesullam, de zeune van Besodja. Zi'j legden de balken en
plaetsten de deuren, kompleet mit sluutbalken en grundels.
07 Naost heur warkten Melatja uut Gibeon en Jadon uut
Meronot mit de manluden uut Gibeon en Mispa, waor de residentie van de
gouverneur van de perveensie Trans-Eufraat was.
08 Weer veerder wodde Jeruzalem tot an de Briede Mure
herbouwd deur de gooldsmid Uzziël, de zeune van Charhaja, en deur Chananja, een
zalvemaeker.
09 Refaja, de zeune van Chur en et heufd van de iene
helte van et distrikt Jeruzalem, warkte daor weer naost.
10 Jedaja, de zeune van Charumaf, rippereerde et
gedielte tegenover zien huus, en Chattus, de zeune van Chasabneja, warkte naost
him.
11 Een volgend gedielte, mit de Bakoventoren, wodde
rippereerd deur Malkia, de zeune van Charim, en deur Chassub, de zeune van
Pachat-Moab.
12 Sallum, de zeune van Halloches en et heufd van de
aandere helte van et distrikt Jeruzalem, warkte naost heur, saemen mit zien
dochters.
13 Chanun en de inwoners van Zanoach rippereerden de
Dalpoort: ze bouwden him op, plaetsten de deuren, kompleet mit sluutbalken en
grundels, en rippereerden de mure over een lengte van duzend el, tot an de
Mestpoort.
14 De Mestpoort zels wodde rippereerd deur Malkia, de
zeune van Rechab, et heufd van et distrikt Bet-Hakkerem. Hi'j bouwde him op en
plaetste de deuren, kompleet mit sluutbalken en grundels.
15 Sallun, de zeune van Kolchoze en et heufd van et
distrikt Mispa, rippereerde de Bronpoort. Hi'j bouwde him op, legde et dak en
plaetste de deuren, kompleet mit sluutbalken en grundels, en hi'j rippereerde
de mure die van et waeterbekken van et kenaol naor de peleistuun lopt tot an de
trappen die naor de Davidsburcht leiden.
16 Veerderop warkte Nechemja, de zeune van Azbuk en et
heufd van de iene helte van et distrikt Bet-Sur, tot tegenover de greven van
David, en veerder tot an et aangelegde waeterbekken en et Huus van de Helden.
17 Daornaost warkten de Levieten Rechum, de zeune van
Bani, en Chasabja, et heufd van de iene helte van et distrikt Keïla, naemens
dat distrikt.
18 Een volgend pat wodde rippereerd deur verwaanten
van heur. Binnuï, de zeune van Chenadad en et heufd van de aandere helte van et
distrikt Keïla,
19 en Ezer, de zeune van Jesua en et heufd van Mispa,
rippereerden et gedielte bi'j de helling naor et waopenopslagplak en de Punt.
20 Mit grote iever rippereerde Baruch, de zeune van
Zabbai, een volgend pat, van de Punt tot de ingang van et huus van Eljasib, de
hogepriester.
21 Meremot, de zeune van Uria, de zeune van Hakkos,
rippereerde nog een stok, en wel dat van de ingang van et huus van Eljasib tot
an et aende daorvan.
22 Daornaost warkten de priesters uut de dichtbi'j
gelegen omkrieten,
23 en wiederop rippereerden Benjamin en Chassub et
gedielte tegenover heur huus, en daor weer naost rippereerde Azarja, de zeune
van Maäseja, de zeune van Ananja, et gedielte naost zien huus.
24 Binnuï, de zeune van Chenadad, rippereerde nog een
pat, van et huus van Azarja tot de Punt en tot de Hoek.
25 Palal, de zeune van Uzai, warkte tegenover de Punt
en de hoge uutspringende toren van et keuninklik peleis, bi'j et plein van de
peleiswaacht. Daornaost warkten Pedaja, de zeune van Paros,
26 en de tempelknechten die op de Ofel woonden, an et
gedielte tot an de Waterpoort in et oosten en de paleistoren.
27 Ok de Tekoïeten rippereerden nog een pat, et pat
dat begint bi'j de grote uutspringende toren en lopt tot an de mure van de
Ofel.
28 De priesters weren an et wark in et gedielte boven
de Paardenpoort, iederiene tegenover zien eigen huus.
29 Wiederop rippereerde Sadok, de zeune van Immer, de
mure tegenover zien huus, en naost him warkte Semaja, de zeune van Sechanja en
de bewaeker van de Oostpoort.
30 Chananja, de zeune van Selemja, en Chanun, de zesde
zeune van Salaf, rippeerden weer een aander gedielte van de mure, en Mesullam,
de zeune van Berechja, warkte tegenover zien eigen kaemer.
31 Malkia, een gooldsmid, rippereerde de mure tot et
huus van de tempelknechten en de haandelers, tegenover de Wachtpoort en tot de
bovenzael van de Hoek.
32 En tussen de bovenzael op de Hoek en de
Schaapspoort warkten de gooldsmeden en de haandelers.
Tegenwarking
bi'j et rippereren van de mure
33 Doe Sanballat heurde dat de mure deur oons herbouwd
wodde, wodde hi'j poer, en in zien argernis bespotte hi'j de Joden.
34 In tegenwoordighied van zien ambtgenoten en van et
leger van Samaria zee hi'j: Wat doen die zielige Joden toch? Daenken zi'j de
mure zels rippereren te kunnen? Willen zi'j echt offeren gaon? Daenken ze dat
wark vandaege nog of te kriegen? Bin ze serieus van doel om de stienen uut die
tetaol verbraande puunhopen opni'j te bruken?
35 En Tobia uut Ammon, die naost him ston, zee: Hoe ze
heur best ok doen bi'j et bouwen, d'r hoeft mar een vos op die stienen mure van
heur te klimmen of hi'j vaalt al omme.
36 Heur, oonze God, hoe wi'j veracht wodden! Laot heur
schimpen op heur eigen heufd daelekommen. Voere heur weg in ballingschop, geef
heur pries an uutroepelders.
37 Dek heur misdaoden niet toe, kiek heur zunden niet
deur de vingers, want ze hebben degenen die de mure rippereerden zwaor
beledigd.
38 Zo bouwden wi'j de mure weer op. De hiele mure
wodde klaor tot op halve hoogte, et hiele volk was vaastebesleuten om deur te
gaon.
Nehemia 4
01 Doe Sanballat en Tobia, en de Arabieren, de
Ammonieten en de Asdodieten heurden dat et rippereren van de muren van Jeruzalem
aorig opscheut en dat de gatten langzem mar zeker dichte maekt wodden, wodden
zi'j poer.
02 Ze spanden saemen om iendrachtig Jeruzalem an te
valen en d'r alderaosie te stichten.
03 Wi'j biddeden tot oonze God, en mit et oge op heur
plannen zetten we waachten uut om heur dag en naacht in de gatten te holen.
04 Juda klaegde:
"De
sjouwers bin verdoffeld,
et
puun is te zwaor.
Gienertied
zal et oons lokken
om
de mure te rippereren."
05 Oonze tegenstaanders dochten oons onverwaachs an te
valen en omme te brengen, en zo et wark opholen te laoten.
06 De Joden die in de streek van oonze vi'janen
woonden kwammen rondomme weg naor oons toe en drongen d'r wel tien keer op an
dat wi'j mit heur mit weeromme gaon zollen.
07 Mar ik stelde et volk, femilie bi'j femilie,
bewaopend mit zweerden, speren en bogen, bi'j de eupen plakken aachter de mure
op, daor waor de mure nog lege was.
08 Nao een inspektie drokte ik de blispoters, de
bestuurders en de rest van et volk dit op et hatte: "Wees niet bange veur
heur, daenk an de grote en geduchte Heer en vecht veur jim volksgenoten, veur
jim zeunen, dochters en vrouwluden, en veur jim huzen."
09 Doe oonze vi'janen vernammen dawwe van heur plannen
op de hoogte weren en dat God ze verhinderd hadde, kowwe mit oons wark an de
mure deurgaon.
10 Vanof die dag voerde de iene helte van mien
manluden et wark uut, wiels de aandere helte uutrust wodde mit schilden,
speren, bogen en bostkurassen. De officieren stonnen opsteld aachter de
Judeeërs
11 die de mure an et bouwen weren. De sjouwers deden
et wark mit de iene haand en hullen een gooispeer in de aandere,
12 en de bouwers warkten mit et zweerd op de heupe
bunnen. Naost mi'j ston een ramshoornblaozer.
13 Ik zee tegen de blispoters, de bestuurders en de
rest van et volk: "D'r is een protte wark te doen an hiel verschillende
stokken van de mure, we warken op grote ofstaand van mekeer en hebben amper
kontakt.
14 Aj'm de ramshoorn schallen heuren, dan moej'm
allemaole naor oons toe kommen. Oonze God zal veur oons vechten."
15 Zo warkten wi'j, wiels de helte van mien manluden
klaorston mit de speer in de haand, van et morgenlocht tot an et opkommen van
de steerns.
16 Doe he'k et warkvolk ok opdreugen om in Jeruzalem
slaopen te blieven, saemen mit heur knechten. Zo hullen ze naachs veur oons de waacht,
en daegs warkten ze.
17 Gien mement weren we uut de kleren, ik niet, en
mien verwaanten, mien manluden en mien liefwaacht ok niet; alleman hadde zien
gooispeer de hieltied bi'j de haand.
Nehemia 5
Et goeie
bestuur van Nehemia
01 De bevolking, en veural de vrouwluden, beklaegde
heur luud over een tal van heur Joodse volksgenoten.
02 Goenend zeden: "We hebben een protte zeunen en
dochters, en daorom wiwwe graon! We moe'n eten, aanders gao'we dood!"
03 Aanderen zeden: "We hebben oonze akkers, droevetunen
en huzen in onderpaand geven om graon kopen te kunnen now d'r honger is."
04 Weer aanderen zeden: "We hebben oonze akkers
en droevetunen belienen moeten om de belasting an de keuning betaelen te
kunnen.
05 En now oonze akkers en droevetunen in bezit van
aanderen binnen, moe'we oonze zeunen en dochters as knecht verkopen. Pattie van
oonze dochters bin al meid. Wi'j staon machteloos! Mar we bin toch van etzelde
vleis en bloed as oonze volksgenoten, oonze kiender bin toch niet minder as die
van heur!"
06 Ik wodde poer doe ik heur klachten en de andreugen
feiten heurde.
07 Ik gong bi'j mezels te raode en besleut om de
veuranstaonde burgers en de bestuurders veur rekenschop bi'j mi'j te roepen. Ik
verweet heur dat zi'j rente van heur volksgenoten vreugen. In een grote
vergeerdering die ik mit et oge op heur gedregings bi'jenneer reupen hadde,
08 zee ik tegen heur: "Veurzoveer et oons
meugelik was hewwe de Joodse volksgenoten die heur an vremden verkopen moeten
hadden, weerommekocht. En now moe'we alderdeegst volksgenoten vri'jkopen die
deur jim verkocht wodden!" Ze zwegen, ze wussen niet wat ze zeggen mossen.
09 Ik gong deur: "Wat jim doen, is niet goed.
Hebbe toch, bi'j alles waj'm doen, ontzag veur oonze God, aanders haelen jim
jim de schimpen van de vi'jaandelike volken op de hals!
10 Ok ik, mien breurs en mien manluden hebben geld en
graon uutliend. Lao'we now disse schuld kwietschellen!
11 Geef heur daoromme vandaege nog heur akkers
weeromme, heur droevetunen, olijfbomen en huzen, en schel heur de rente kwiet
van et geld en et graon, de wien en de eulie die jim an heur liend
hebben."
12 Doe zeden zi'j: "We zullen alles weerommegeven
en niks vodderen. We zullen doen wat jow zeggen," en in anwezigens van de
priesters die ik kommen laoten hadde, leut ik heur zweren dat ze heur woord
holen zollen.
13 Doe schuddede ik de plooie van mien maantel uut en
zee: "Zo zal God iederiene uutschudden die him niet an disse ofspraoke
hoolt. Uutschudded en berooid zal hi'j wezen, zonder huus of have." Alle
anwezigen reupen "Amen," en ze loofden de Heer. Alleman kwam zien
toezegging nao.
14 Trouwens, ik hebbe in de twaelf jaor dat ik deur de
keuning as gouverneur van Juda ansteld was, vanof et twintigste tot et twienendattigste
regeringsjaor van Artaxerxes, gienertied een vergoeding verlangd veur de kosten
die een gouverneur veur zien onderhoold maeken moet, en mien breurs liekemin.
15 De gouverneurs veur mi'j daorentegen hadden et volk
zwaore lasten oplegd en vodderden van heur niet alliend eten en wien, mar ok
nog es veertig sjekel zulver, en heur manschoppen terroriseerden et volk. Mar
ik dee et aanders, uut ontzag veur God.
16 Ik hebbe zels mitdaon an et rippereren van de mure,
grond hewwe oons niet toeëigend, en al mien manluden weren alsmar bi'j de
herstelwarkzemheden anwezig.
17 En wat de Joden angaot, thuus ha'k de hieltied
honderdvuuftig bestuurders die mitaten, plus degenen die uut de omringende
volken naor oons toe kwammen.
18 Daegeliks wodde d'r op mien kosten van alles
klaormaekt: een rund, zesse van de mooiste schaopen, voegels, en om de tien
daegen leut ik verschillende wienen in grote hoeveulheden kommen. Toch he'k
gienertied een vergoeding eist veur de kosten die een gouverneur veur zien
onderhoold maeken moet, want et volk was al zwaor genoeg belast.
19 Mien God, reken mi'j as goed an wat ik veur dit
volk daon hebbe.
Nehemia 6
Meer
tegenwarking
01 Sanballat, Tobia, de Arabier Gesem en alle aanderen
die oons vi'janig zind weren, heurden dat ik de mure opbouwd hadde en dat d'r
gien gatten meer in zatten – de deuren ha'k trouwens nog niet in de poorten
zetten laoten.
02 Daorom stelden Sanballat en Gesem mi'j veur om
overleg te plegen in Kefirim, in et Onodal. Mar zi'j hadden weinig goeds mit me
veur.
03 Ik stuurde heur disse bosschop: "Ik hebbe
belangriek wark te doen en kan daorom onmeugelik kommen. Et wark zol stille
kommen te liggen a'k et in de steek leut en naor jim toe kwam."
04 Vier keer deden ze mi'j dit veurstel, en de
hieltied gaf ik heur etzelde bescheid.
05 Bi'j slot van zaeke stuurde Sanballat veur de
vuufde keer iene van zien manluden, mit etzelde doel. Disse man brocht een
niet-verzegelde brief
06 mit disse inhoold:
"Onder
de bevolking gaot et verhael – en Gesem bevestigt et – dat jow mit de Joden een
opstaand veurbereiden en dat jow daoromme de mure opbouwen. Neffens dezelde
bron zollen jow heur keuning wodden willen
07 en laoten jow alderdeegst profeten optreden die,
mit een verwiezing naor jow, in Jeruzalem uutdregen dat Juda een keuning het!
Now dan, zoks zal ok de keuning ok wel te heuren kriegen. Lao'we daoromme toch
es overleggen."
08 Ik stuurde him dit bescheid: "Wat jow beweren
is verkeerd. Jow bedaenken et allemaole zels!"
09 Zi'j weren d'r allemaole op uut om oons bange te
maeken, zodat we et wark opgeven zollen en d'r niks meer gebeuren zol. Mar ik
pakte et wark krek mit vaosie an.
10 Doe ’k op bezuuk was bi'j Semaja, de zeune van
Delaja, de zeune van Mehetabel, dee hi'j slim bezorgd en zee:
"Wi'j
moe'n naor et huus van God gaon,
mekeer
treffen in et hatte van de tempel;
we
moe'n de tempeldeuren dichte doen,
ze
kommen om jow omme te brengen,
ze
kommen jow van kaant maeken in de naacht."
11 Mar ik zee: "Zol iene in mien pesisie de
bienen nemen? Waoromme zol iene as ikke zien leven redden deur de tempel binnen
te gaon? Nee, ik gao niet."
12 Ik hadde jommes verneumen dat et niet God was die
him kommedaosie geven hadde om disse profetie tegen mi'j te zeggen, mar dat
Tobia en Sanballat him d'r veur betaeld hadden.
13 Hi'j was betaeld om mi'j bange te maeken, zodat ik
op zien veurstel ingaon zol en heiligschennis plegen zol. Dan hadden zi'j wat
om mi'j zwat te maeken en mi'j in opspraoke te brengen.
14 Mien God, daenke an alles wat Tobia en Sanballat
daon hebben, en ok an de profete Noadja en de aandere profeten die d'r op uut
weren om mi'j bange te maeken.
15 Nao twienenvuuftig daegen was de mure klaor, op 25
elul.
16 Doe de volken rondom oons toe, oonze vi'janen, dat
heurden, wodden zi'j bange en vuulden ze heur klein, omreden zi'j begrepen dat
dit wark deur oonze God tot staand brocht was.
17 In die tied onderhul een tal veuranstaonde Judeeërs
een intensieve briefwisseling mit Tobia.
18 Pattie in Juda weren deur een eed mit him
verbunnen, omreden hi'j de schoonzeune van Sechanja was, de zeune van Arach, en
zien zeune Jochanan trouwd mit de dochter van Mesullam was, de zeune van
Berechja.
19 In mien anwezigens gavven zi'j alderdeegst hoge van
him op, en ze vertelden alles wat ik zee an him deur. Daornao stuurde Tobia
mi'j dan weer brieven om mi'j bange te maeken.
Nehemia 7
01 Doe de mure opbouwd was leut ik de deuren in de
poorten zetten. D'r wodden poortwaachters ansteld en de tempelzangers en de
Levieten kregen heur taeken toewezen.
02 De verdediging van Jeruzalem dreug ik op an mien
breur Chanani, en ok an Chananja, de kommedaant van de burcht, want hi'j was
meer as wie ok een betrouwber en godvrezend man.
03 Ik zee tegen heur: "Op et hietste van de dag
meugen de poorten van Jeruzalem niet eupendaon wodden, en nog tiedens heur
dienst moe'n de poortwaachters de deuren dichtedoen. Doe de grundel d'r dan op,
en laot de inwoners van Jeruzalem waachtlopen, iederiene op zien post,
iederiene bi'j zien eigen huus."
04 De stad was dan wel slim uutgestrekt, mar d'r weren
mar weinig inwoners en ok weren d'r nog amper huzen herbouwd.
05 Mien God gaf mi'j in om de veuranstaonde burgers,
et stadsbestuur en et volk bi'jenneer te roepen om in de registers inschreven
te wodden, en doe ontdekte ik et register van heur die destieds uut Babel
wegtrokken weren. Dit was daorin optekend:
Liest van
weerommekommen ballings
06-07 Hier volgt een liest van inwoners van de
perveensie Juda die weerommekommen binnen uut de ballingschop in Babylonië,
waorhenne zi'j eerder wegvoerd weren deur keuning Nebukadnessar. Zi'j bin
weerommekommen mit Zerubbabel, Jesua, Nechemja, Azarja, Raämja, Nachamani,
Mordechai, Bilsan, Misperet, Bigwai, Nechum en Baäna, en vestigden heur in
Jeruzalem en Juda, in heur eigen steden.
De
ciefers:
Israëlitische
manluden:
08 2172 ofstammelingen van Paros
09 372 ofstammelingen van Sefatja
10 652 ofstammelingen van Arach
11 2818 ofstammelingen van Pachat-Moab, en wel de
naokommelingen van Jesua en Joab
12 1254 ofstammelingen van Elam
13 845 ofstammelingen van Zattu
14 760 ofstammelingen van Zakkai
15 648 ofstammelingen van Binnuï
16 628 ofstammelingen van Bebai
17 2322 ofstammelingen van Azgad
18 667 ofstammelingen van Adonikam
19 2067 ofstammelingen van Bigwai
20 655 ofstammelingen van Adin
21 98 ofstammelingen van Ater, en wel de
naokommelingen van Chizkia
22 328 ofstammelingen van Chasum
23 324 ofstammelingen van Besai
24 112 ofstammelingen van Charif
25 95 ofstammelingen van Gibeon
26 188 inwoners van Betlehem en Netofa
27 128 inwoners van Anatot
28 42 inwoners van Bet-Azmawet
29 743 inwoners van Kirjat-Jearim, Kefira en Beërot
30 621 inwoners van Rama en Geba
31 122 inwoners van Michmas
32 123 inwoners van Betel en Ai
33 52 inwoners van et aandere Nebo
34 1254 inwoners van et aandere Elam
35 320 inwoners van Charim
36 345 inwoners van Jericho
37 721 inwoners van Lod, Chadid en Ono
38 3930 inwoners van Senaä.
39 Priesters:
973 ofstammelingen van Jedaja, en wel et geslaacht van
Jesua
40 1052 ofstammelingen van Immer
41 1247 ofstammelingen van Paschur
42 1017 ofstammelingen van Charim.
43 Levieten:
74 ofstammelingen van Jesua, van Kadmiël jommes, en
wel van de naokommelingen van Hodewa.
44 Tempelzangers:
148 ofstammelingen van Asaf.
45 Poortwaachters:
138 ofstammelingen van Sallum, Ater, Talmon, Akkub,
Chatita en Sobai.
46 Tempelknechten:
ofstammelingen
van Sicha, Chasufa, Tabbaot,
47 Keros, Sia, Padon,
48 Lebana, Chagaba, Salmai,
49 Chanan, Giddel, Gachar,
50 Reaja, Resin, Nekoda,
51 Gazzam, Uzza, Paseach,
52 Besai, Meünim, Nefusim,
53 Bakbuk, Chakufa, Charchur,
54 Baslit, Mechida, Charsa,
55 Barkos, Sisera, Temach,
56 Nesiach en Chatifa.
57 Ofstammelingen van de knechten van Salomo:
ofstammelingen
van Sotai, Soferet, Perida,
58 Jaäla, Darkon, Giddel,
59 Sefatja, Chattil, Pocheret-Hassebaïm en Amon,
60 in tetaol 392 tempelknechten en ofstammelingen van
de knechten van Salomo.
61-62 Veerder nog zi'j die kwammen uut Tel-Melach,
Tel-Charsa, Kerub, Addon en Immer, 642 ofstammelingen van Delaja, Tobia en
Nekoda. Mar zi'j konnen niet antonen dat de femilies waortoe zi'j heurden
Israëlitisch weren.
63 Dat gul ok veur de priesterfemilies Chobaja, Hakkos
en Barzillai (zi'j hietten zo sund heur stamheit iene van de dochters van de
Gileadiet Barzillai tot vrouw neumen hadde).
64 Zi'j zochten naor et schriftelike bewies dat zi'j
in de geslachtsregisters inschreven weren, mar ze vunnen et niet. Op grond
daorvan wodden ze poeterig verklaord en van et priesterschop uutsleuten.
65 De laandvoogd leut heur weten dat ze niet van de
alderheiligste offergaoven eten mochten tot d'r een priester was die mit hulpe
van de oraokelstienen uutspraoke doen kon.
66 De hiele gemienschop telde in tetaol 42.360
meensken.
67 Daorbi'j kwammen nog 7337 knechten en meiden, 245
zangers en zangeressen,
68 435 kemelen en 6720 ezels.
69 Een tal femilie-ooldsten ston een bi'jdrege of veur
de tempeldienst, en de laandvoogd gaf 1000 goolden drachmen, 50 offerschaolen,
30 priesterklieden en 500 zulveren minen veur de tempelschat.
70 Een peer femilie-ooldsten brochten veur de
tempeldienst 20.000 goolden drachmen en 2200 zulveren minen bi'jenneer,
71 en de overige weerommekeerde ballings gavven 20.000
goolden drachmen, 2000 zulveren minen en 67 priesterklieden.
72 De priesters, de Levieten, de poortwaachters, de
tempelzangers, een pat van et volk, de tempelknechten en alle aandere
Israëlieten vestigden heur in heur steden.
Veurlezing
uut de wet
An
et begin van de zeuvende maond, doe de Israëlieten heur in heur steden vestigd
hadden,
Nehemia 8
01 verzaemelde et voltallige volk heur op et plein
veur de Waterpoort. Et volk vreug Ezra, de schriever, et boek te haelen mit de
wet van Mozes, de wet die de Heer an Israël oplegd hadde.
02 Ezra, de priester, haelde et wetboek en leut et an
de anwezige manluden en vrouwluden zien, en an alleman die in staot was et te
begriepen. Dit gebeurde op de eerste dag van de zeuvende maond.
03 Op et plein veur de Waterpoort leesde Ezra de
manluden en de vrouwluden en alleman die et begriepen kon hadde-op uut et boek
veur, vanof et mement dat et locht wodde tot de middag. Alleman luusterde
andachtig naor et boek van de wet.
04 Ezra, de schriever, ston op een hoolten verhoging
die veur disse gelegenhied maekt was. Naost him, an zien rechterhaand, stonnen
Mattitja, Sema, Anaja, Uria, Chilkia en Maäseja, en an zien linkerhaand Pedaja,
Misaël, Malkia, Chasum, Chasbaddana, Zecharja en Mesullam.
05 Ezra ston hoger as et volk, zodat alleman zien kon
hoe hi'j et boek eupendee, en op dat mement gong al et volk staon.
06 Ezra prees de Heer, de grote God, en hiel et volk
antwoordde "Amen, amen," en ze stakken heur hanen op, gongen deur de
kni'jen en beugen diepe veur de Heer.
07 Doe legden de Levieten Jesua, Bani, Serebja, Jamin,
Akkub, Sabbetai, Hodia, Maäseja, Kelita, Azarja, Jozabad, Chanan en Pelaja de
wet uut an et volk, dat weer staon gaon was.
08 De Levieten leesden et boek mit de wet van God
dudelik veur en gavven d'r uutleg bi'j; zo gavven ze inzicht in wat ze lezen
hadden.
09 Nehemia – hi'j was de laandvoogd –, Ezra, de
priester en schriever, en de Levieten die et volk uutleg gavven, zeden tegen
iederiene: "Disse dag is wi'jded an de Heer, jim God; rouwe dus niet, en
goel niet!" Et hiele volk was jommes begonnen te goelen doe et de woorden
van de wet heurde.
10 Ezra zee tegen heur: "Maek een feestmaol klaor
mit lekker eten en drinken, en pat d'r van uut an wie niks het, want disse dag
is wi'jded an oonze Heer. Wees niet bedroefd, want de bliedschop die de Heer
jim geft, is jim kracht."
11 De Levieten maonden et volk om stille te wezen.
Zi'j zeden: "Wees stille, dit is een heilige dag, wees dan ok niet
bedroefd."
12 Doe gong alleman eten en drinken. Ze dielden alles
mittenneer en maekten d'r een groot en vrolik feest van. Ze hadden begrepen wat
heur verteld was.
13 De aanderedaegs kwammen de priesters en de Levieten
en alle femilie-ooldsten van et volk saemen bi'j Ezra, de schriever, om heur te
verdiepen in de bepaolings van de wet.
14 In de wet die de Heer heur oplegd hadde en die ze
deur de mond van Mozes kregen hadden, vunnen ze optekend dat zi'j, de
Israëlieten, tiedens een feest in de zeuvende maond in loofhutten wonen mossen,
15 en dat ze in Jeruzalem en in alle aandere steden dit
bekend maeken mossen: "Gao de bargen in en hael takken van de olijfboom,
de oleaster, de mirte, de palm en aandere loofbomen om d'r loofhutten mit te
maeken, zoas veurschreven is."
16 De meensken gongen op struun om takken te haelen,
en alleman maekte een loofhutte, op zien dak of op zien hiem, en ok in de
veurtunen van de tempel en op de pleinen veur de Waterpoort en de Efraïmpoort.
17 De hiele gemienschop die uut de ballingschop
weerommekommen was maekte loofhutten en gong d'r in wonen. Dat hadden de Israëlieten
vanof de tied van Jozua, de zeune van Nun, tot op disse dag niet meer daon. De
feestvreugde was groot.
18 Iedere dag van et feest, van de eerste dag tot de
laeste, wodde d'r veurlezen uut et boek van de wet van God. Zeuven daegen
vierden ze feest, en op de achtste dag was d'r een feestelike saemenkomst, zoas
veurschreven was.
Nehemia 9
Verni'jing
van et verbond
01 Op de vierentwintigste dag van disse maond kwammen
de Israëlieten weer bi'jenneer. Ze vaastten en dreugen boetekleren, mit stof op
heur heufd.
02 De geboren Israëlieten gongen appat staon van de
vremden, en zi'j beleden schuld veur heur zunden en veur de wandaoden van heur
veuroolden.
03 Zo stonnen ze daor, en een vierde pat van de dag
wodde d'r veurlezen uut et boek van de wet van de Heer, heur God, en nog es een
vierde pat van de dag beleden zi'j schuld en beugen ze heur daele veur de Heer,
heur God.
04 Op de verhoging van de Levieten stonnen Jesua,
Bani, Kadmiël, Sebanja, Bunni, Serebja, Bani en Kenani, en mit lude stemme
reupen zi'j de Heer, heur God, an.
05 De Levieten Jesua, Kadmiël, Bani, Chasabneja,
Serebja, Hodia, Sebanja en Petachja zeden: "Kom overaende, prieze de Heer,
jim God, veur iewig en altied:
“mag
jow luusterrieke naeme, die verheven is boven alle lof en roem, prezen wezen.
06 Jow alliend bin de Heer, jow hebben de hemel maekt,
de hoogste hemel en alle hemellichems, de eerde en de zenen mit alles wat daor
in leeft. Jow geven an alles et leven, veur jow bugen de hemelse machten.
07 Jow bin de Heer, de God die Abram uutkeuzen het,
die him uut Ur, de stad van de Chaldeeën, leided het, die zien naeme veraanderd
het in Abraham.
08 Jow hebben zien hoe zien hatte trouw bleef an jow,
jow hebben een verbond mit him sleuten en him toezegd om et laand van de
Kanaänieten, de Hethieten, de Amorieten, de Perizzieten, de Jebusieten en de
Girgasieten an zien naogeslaacht te geven. Jow hebben jow woord hullen, jow bin
rechtveerdig.
09 Jow zaggen de ellende van oonze veuroolden in
Iegypte, bi'j de Rietzee heurden jow heur om hulpe roepen.
10 Doe verrichtten jow tekens en wonderen bi'j de
farao en al zien knechten, bi'j zien hiele volk, omreden jow wussen hoe slecht
zi'j oonze veuroolden behaandelden. Zo vestigden jow jow naeme, die tot op
heden deurleeft.
11 Veur de ogen van de Israëlieten spleten jow de zee,
midden in de zee leupen zi'j op et dreuge. Jow smeten heur aachtervolgers in de
diepte, as een stien in kolkend waeter.
12 Overdag leidden jow heur in een wolkekelom, naachs
in een vuurzuil, zodat d'r locht was op de weg die ze gaon mossen.
13 Jow daelden omlegens op de Sinai, jow praotten mit
heur vanuut de hemel, jow gavven heur goeie rechtsregels, deugdelike wetten en
goeie veurschriften en geboden.
14 Jow maekten jow heilige sabbat an heur bekend, jow
gavven heur jow geboden, veurschriften en wetten deur de mond van jow knecht
Mozes.
15 As zi'j honger hadden gavven jow heur brood uut de
hemel, as ze dust hadden leuten jow waeter veur heur uut een rots stromen. Jow
gavven kommedaosie an heur om et laand binnen te gaon en in bezit te nemen, et
laand dat jow heur onder ede toezegd hadden.
16 Mar oonze veuroolden hebben heur misdreugen; stiems
as ze weren luusterden ze niet naor jow geboden.
17 Zi'j weigerden om te luusteren en ze vergatten de
wonderen die jow veur heur daon hadden. Stiems stelden ze een ni'je leider an,
ze wollen weer knechten wodden in Iegypte. Mar jow bin een God van vergeving,
genaodig en liefdevol, geduldig en slim trouw: jow verleuten heur niet.
18 Zi'j targden jow deur een bollekalf te gieten en te
zeggen: "Dit is je god, die je uut Iegypte leided het!"
19 Mar liefdevol as jow binnen, hebben jow heur
alderdeegst doe, daor in de woestijn, niet verlaoten. Boven heur ston de
hieltied de wolkekelom om heur bi'j dag de weg te wiezen, en naachs was d'r de
vuurzuil die de weg verlochtte waor langes zi'j gaon mossen.
20 Jow gavven heur jow goeie geest, en zo kregen ze
inzicht; jow stilden heur honger mit manna, jow lesten heur dust mit waeter.
21 Veertig jaor lange hebben jow heur onderholen, in
de woestijn ontbrak et heur an niks, heur kleraosie raekte niet versleten en
heur bienen zwölden niet op.
22 Jow gavven heur keuninkrieken en volken, heur
gebied verpatten jow onder heur. Zi'j neumen et laand van Sichon in bezit, et
laand van de keuning van Chesbon en dat van Og, de keuning van Basan.
23 Heur kiender maekten jow zo talriek as de steerns
an de hemel, en jow brochten heur naor et laand waorvan jow heur veuroolden
zegd hadden dat ze et in bezit nemen mossen.
24 Heur kiender kwammen inderdaod om et laand in bezit
te nemen. Veur heur ogen dwongen jow de Kanaänieten, de inwoners van et laand,
op de kni'jen, en jow leverden de keunings en de volken die d'r woonden an heur
uut, zodat zi'j mit heur doen konnen wat ze wollen.
25 Zi'j neumen verstarkte steden in en veroverden vruchtbere
grond, zi'j neumen huzen in bezit, vol mit de mooiste spullen, en ok uuthouwen
putten, droevetunen, olijfbomen en fruitbomen. Zi'j atten, zi'j raekten zae en
wodden vet, ze baodden in weelde deur jow grote goedhied.
26 Toch kwammen ze in opstaand; ze rebelleerden en
traden jow wetten mit voeten. Ze vermoordden jow profeten, dezelde profeten die
heur naor jow weerommebrengen wollen en heur daoromme waorschouwd hadden, en ze
lasterden jow.
27 Daorom leverden jow heur uut an heur onderdrokkers.
As
ze onderdrokt wodden reupen ze jow an, en jow, vanuut de hemel, verheurden
heur. In jow grote liefde stuurden jow bevri'jders naor heur toe, en iederkeer
weer redden die heur van heur onderdrokkers.
28 Mar zogauw zi'j weer rust hadden deden ze weer wat
slecht is in jow ogen. Dan leverden jow heur an heur vi'janen uut, die heur dan
weer overheersten, en dan reupen zi'j jow opni'j an, en vanuut de hemel
verheurden jow heur weer. Liefdevol as jow binnen, reddeden jow heur een protte
keren.
29 Jow waorschouwden heur, om heur weeromme te brengen
naor jow wet, mar zi'j misdreugen heur, ze luusterden niet naor jow geboden en
ze overtraden jow rechtsregels – wiels iederiene die ze naokomt, leven zal!
Zi'j weerden heur uut alle macht en weigerden hadnekkig te luusteren.
30 Jow hadden een protte jaoren geduld mit heur, jow
waorschouwden heur deur jow geest, deur de mond van jow profeten, mar zi'j
luusterden niet, en daoromme leverden jow heur uut an de volken om heur henne.
31 Mar in jow grote liefde hebben jow heur niet veur
altied verdistreweerd. Jow hebben heur niet verlaoten, want jow bin een genaodige
en liefdevolle God.
32 En now, oe God, grote, starke en ontzagwekkende
God, jow die him trouw holen an et verbond, wees niet onverschillig veur de
rampspoed die oons troffen het, oons en oonze keunings, oonze vosten, oonze
priesters en oonze profeten, oonze veuroolden en hiel jow volk, vanof de tied
van de Assyrische keunings tot op de dag van vandaege.
33 Jow haandelden rechtveerdig bi'j alles wat oons
overkommen is, jow bin betrouwber en wi'j bin et die verkeerd haandelden.
34 Oonze keunings, oonze vosten, oonze priesters en
oonze veuroolden hullen heur niet an jow wet. Zi'j sleugen gien acht op de
geboden en veurschriften die jow heur geven hebben.
35 Zi'j hadden heur eigen keuninkriek – in jow grote
goedhied deur jow an heur geven –, mar in dat roeme en vruchtbere laand, et
laand dat jow heur geven hadden, hebben zi'j jow niet diend. Heur onfesoen
hebben ze niet opgeven.
36 Kieke naor oons: now biwwe knechten! In et laand
dat jow oonze veuroolden geven hebben om d'r te eten van de vruchten en van al
et goeie dat et opbrengt, in dat laand biwwe knechten.
37 Omreden wi'j zundigd hebben, vaalt alle rieke oogst
toe an de keunings die jow over oons ansteld hebben, die over oons lichem
regeren en die mit oons vee doen wat ze willen. Wi'j leven in grote ellende.”
Nehemia 10
01 Op grond van dit alles gao'we een verbientenisse an
en stellen die op schrift. Onder de oorkonde staon de naemen van oonze leiders,
van de Levieten en van de priesters.
02 Dit bin degenen die heur zegel zetten:
Laandvoogd
Nehemia, de zeune van Chachalja, Sidkia,
03 en de priesters Seraja, Azarja, Jirmeja,
04 Paschur, Amarja, Malkia,
05 Chattus, Sebanja, Malluch,
06 Charim, Meremot, Obadja,
07 Daniël, Ginneton, Baruch,
08 Mesullam, Abia, Miamin,
09 Maäzja, Bilgai en Semaja.
10 Dan de Levieten:
Jesua,
de zeune van Azanja, Binnuï en Kadmiël, een zeune van Chenadad,
11 mit heur verwaanten Sebanja, Hodia, Kelita, Pelaja,
Chanan,
12 Micha, Rechob, Chasabja,
13 Zakkur, Serebja, Sebanja,
14 Hodia, Bani en Beninu.
15 Dan de leiders van et volk:
Paros,
Pachat-Moab, Elam, Zattu, Bani,
16 Bunni, Azgad, Bebai,
17 Adonia, Bigwai, Adin,
18 Ater, Chizkia, Azzur,
19 Hodia, Chasum, Besai,
20 Charif, Anatot, Nebai,
21 Magpias, Mesullam, Chezir,
22 Mesezabel, Sadok, Jaddua,
23 Pelatja, Chanan, Anaja,
24 Hosea, Chananja, Chassub,
25 Halloches, Pilcha, Sobek,
26 Rechum, Chasabna, Maäseja,
27 Achia, Chanan, Anan,
28 Malluch, Charim en Baäna.
29-30 De rest van oons volk slöt him bi'j disse
veuranstaonde volksgenoten an. De priesters, de Levieten, de poortwaachters, de
zangers, de tempelknechten en alle aanderen die ofstaand neumen hebben van de
bevolking van et laand en heur op de wet van God richt hebben, verplichten heur
onder zelsvervluking en onder ede om te leven neffens de wet van God, die deur
Mozes, God zien knecht, geven is, en om alle geboden, rechtsregels en
veurschriften van de Heer, oonze Heer, te onderholen en nao te leven. Dit gelt
ok veur heur vrouwluden, heur zeunen en dochters, en veur iederiene die ze
begriepen kan.
31 En veerder verplichten wi'j oons om oonze dochters
niet an de bevolking van et laand uut te huweliken, en heur dochters niet veur
oonze zeunen nemen te zullen.
32 Ok zuwwe de negosie en de verschillende
graonsoorten die de bevolking van et laand oons op sabbat te koop anbödt niet
van heur kopen, niet op sabbat en niet op feestdaegen, en ieder zeuvende jaor
zuwwe et laand braok liggen laoten en alle schulden kwietschellen.
33 Ok nemen wi'j as verplichting op oons om ieder jaor
een dadde sjekel bi'j te dregen an de dienst in de tempel van oonze God,
34 en wel veur et toonbrood, de daegelikse graon- en
braandoffers, veur de offers op sabbat, et feest van de ni'je maone en de biezundere
feestdaegen, en veur de heilige giften, de offers om verzoening veur Israël te
bewarken, en veur de overige diensten in de tempel van oonze God.
35 Wi'j hebben deur lotting bepaold wanneer de
priesters, de Levieten en et volk, indield naor femilie, braandhoolt leveren moeten
veur et alter van de Heer, oonze God, in zien tempel. Dit dient op vaaste tieden
te gebeuren, ieder jaor opni'j, zoas in de wet veurschreven is.
36 Veerder zuwwe de eerste opbrengst van oonze akkers
en de eerste vruchten van alle fruitbomen naor de tempel van oonze God brengen,
ieder jaor opni'j,
37 en ok zuwwe, zoas in de wet veurschreven is, oonze
eerstgeboren zeunen, en van oons vee de eerstgeboren runder, schaopen en
geiten, naor de tempel van oonze God brengen, naor de priesters die daor dienst
doen.
38 Ok et eerste deeg zuwwe naor de priesters brengen,
naor de veurraodkaemers van de tempel van oonze God, krek as wat wi'j ofdregen
moeten van et fruit van de appelhoven, de wien en de eulie. Een tiende van de
opbrengst van 't laand is veur de Levieten. Zi'j meugen zels in alle gebieden
waor wi'j warken tienden heffen;
39 ze zullen daorbi'j deur een priester, een
ofstammeling van Aäron, vergezeld wodden. De Levieten moe'n dan een tiende van
die tienden naor de veurraodkaemers van de tempel van oonze God brengen.
40 Daor moe'n de Israëlieten en de Levieten heur
bi'jdregen in graon, wien en eulie hennebrengen. Daor is et tempelgerei ok, en
daor bin de dienstdoende priesters, de poortwaachters en de zangers. Gienertied
zuwwe de tempel van oonze God versloeren."
Nehemia 11
De inwoners
van Jeruzalem en aandere steden
01 De leiders van et volk gongen in Jeruzalem wonen,
en de rest van et volk gooide et lot, want iene op de tien femilies mos in
Jeruzalem, de heilige stad, wonen gaon, en de negen aandere in een aandere
stad.
02 As femilies heur vri'jwillig in Jeruzalem vestigen
wollen wodde dat algemien toejuicht.
03 Hier volgen de femilie-ooldsten uut de perveensie
die heur in Jeruzalem vestigden. Hoewel een protte Israëlieten, priesters,
Levieten, tempelknechten en naokommelingen van de knechten van Salomo in de
aandere steden van Juda wonen gongen, op heur eigen grond in heur eigen stad,
04 weren d'r toch ok Judeeërs en Benjaminieten die
heur in Jeruzalem vestigden.
De Judeeërs: Ataja, de zeune van Uzzia, die de zeune
was van Zecharja, de zeune van Amarja, de zeune van Sefatja, de zeune van
Mahalalel, uut de femilie van Peres,
05 en Maäseja, de zeune van Baruch, die de zeune was
van Kolchoze, de zeune van Chazaja, de zeune van Adaja, de zeune van Jojarib, de
zeune van Zecharja, de zeune van de Siloniet.
06 In tetaol woonden d'r vierhonderdachtenzestig
ofstammelings van Peres in Jeruzalem, allemaol weerbere manluden.
07 De Benjaminieten: Sallu, de zeune van Mesullam, die
de zeune was van Joëd, de zeune van Pedaja, de zeune van Kolaja, de zeune van
Maäseja, de zeune van Itiël, de zeune van Jesaja;
08 en veerder Gabbai en Sallai, bi'j mekeer
negenhonderdachtentwintig meensken.
09 Joël, de zeune van Zichri, was heur leider, en
Jehuda, de zeune van Hassenua, was de onderkommedaant van de stad.
10 De priesters: Jedaja, de zeune van Jojarib, Jachin,
11 en Seraja, die de zeune was van Chilkia, de zeune
van Mesullam, de zeune van Sadok, de zeune van Merajot, de zeune van Achitub,
die in de tempel de leiding hadde,
12 saemen mit heur verwaanten die dienst deden in de
tempel, achthonderdtwienentwintig in tetaol; en veerder Adaja, die de zeune was
van Jerocham, de zeune van Pelalja, de zeune van Amsi, de zeune van Zecharja,
de zeune van Paschur, de zeune van Malkia,
13 en zien verwaanten, femilie-ooldsten,
tweehonderdtwienenveertig in tetaol; en Amassai, die de zeune was van Azarel,
de zeune van Achzai, de zeune van Mesillemot, de zeune van Immer,
14 en heur verwaanten, honderdachtentwintig weerbere
manluden. Heur leider was Zabdiël, de zeune van Gedolim.
15 De Levieten: Semaja, de zeune van Chassub, die de
zeune was van Azrikam, de zeune van Chasabja, de zeune van Bunni.
16 Sabbetai en Jozabad, heufden van de Levieten, weren
verantwoordelik veur et wark dat buten de tempel daon wodde.
17 Mattanja, die de zeune was van Micha, de zeune van
Zabdi, de zeune van Asaf, was de veurzinger die de lofpriezinge bi'j et gebed
inzet, en veerder weren d'r Bakbukja, zien plaetsvervanger, en Abda, de zeune
van Sammua, de zeune van Galal, de zeune van Jedutun.
18 In tetaol woonden d'r twiehonderdvierentachtig
Levieten in de heilige stad.
19 De poortwaachters: Akkub, Talmon en heur
verwaanten, in tetaol honderdtwienenzeuventig manluden die in de poorten de
waacht hullen.
20 De overige Israëlieten, onder wie priesters en
Levieten, woonden in de aandere steden van Juda, iederiene op zien eigen grond.
21 De tempelknechten woonden op de Ofel; heur leiders
weren Sicha en Gispa.
22 Uzzi, de zeune van Bani, die de zeune was van
Chasabja, de zeune van Mattanja, de zeune van Micha, was de leider van de
Levieten in Jeruzalem. Hi'j was iene van de ofstammelings van Asaf, die tiedens
de eredienst in de tempel as tempelzangers optraden.
23 D'r beston jommes een keuninklike veroddering
waorin de daegelikse diensten van de tempelzangers regeld weren.
24 Petachja, de zeune van Mesezabel, iene van de
ofstammelings van Zerach, de zeune van Juda, was de adviseur van de keuning in
alle zaeken die et volk angongen.
25 Over de dörpies op et plattelaand ditte: d'r woonden
Judeeërs in Kirjat-Arba en de omliggende dörpen, in Dibon en de omliggende
dörpen, in Jekabseël en de bi'jheurende dörpies,
26 in Jesua, Molada en Bet-Pelet,
27 in Chasar-Sual en Berseba en de omliggende dörpen,
28 in Siklag en Mechona en de omliggende dörpen,
29 in En-Rimmon, Sora en Jarmut,
30 in Zanoach en Adullam en de bi'jheurende dörpies,
in Lachis en zien velden, en in Azeka en de omliggende dörpen. Zi'j vestigden
heur van Berseba tot an et Hinnomdal.
31 De Benjaminieten gongen wonen in Geba, Michmas en
Ajja, in Betel en de omliggende dörpen,
32 in Anatot, Nob en Ananja,
33 in Hasor, Rama en Gittaïm,
34 in Chadid, Seboïm en Neballat,
35 in Lod, Ono en et Handwerkersdal.
36 Ok ofdielings van de Levieten uut Juda kwammen in
Benjamin wonen.
Nehemia 12
Liest van
priesters en Levieten
01 Hier volgt een liest van de priesters en de
Levieten die mit Zerubbabel, de zeune van Sealtiël, en mit Jesua weerommekommen
binnen:
Seraja,
Jirmeja, Ezra,
02 Amarja, Malluch, Chattus,
03 Sechanja, Rechum, Meremot,
04 Iddo, Ginnetoi, Abia,
05 Miamin, Maädja, Bilga,
06 Semaja, Jojarib, Jedaja,
07 Sallu, Amok, Chilkia, Jedaja.
Zi'j
weren in de tied van Jesua de leiders van de priesters en heur ambtgenoten.
08 De Levieten: Jesua, Binnuï, Kadmiël, Serebja,
Jehuda en Mattanja, die mit zien breurs ansteld was om de daanklieten te
zingen.
09 Bakbukja en Unni en heur verwaanten stonnen tiedens
de diensten tegenover heur opsteld.
10 En Jesua verwekte Jojakim, Jojakim verwekte
Eljasib, Eljasib verwekte Jojada,
11 Jojada verwekte Jonatan, en Jonatan verwekte
Jaddua.
12 In de tied van Jojakim weren de heufden van de
priesterlike femilies:
van
de femilie van Seraja: Meraja; van Jirmeja: Chananja;
13 van Ezra: Mesullam; van Amarja: Jochanan;
14 van Melichu: Jonatan; van Sebanja: Josef;
15 van Charim: Adna; van Merajot: Chelkai;
16 van Iddo: Zecharja; van Ginneton: Mesullam;
17 van Abia: Zichri; van Minjamin, van Moadja: Piltai;
18 van Bilga: Sammua; van Semaja: Jonatan;
19 van Jojarib: Mattenai; van Jedaja: Uzzi;
20 van Sallai: Kallai; van Amok: Eber;
21 van Chilkia: Chasabja; van Jedaja: Netanel.
22 Inschreven wodden de femilie-ooldsten van de
Levieten in de tied van Eljasib, Jojada, Jochanan en Jaddua, krek as zi'j die
tot de priesterfemilies heurden tiedens de regering van de Perzische keuning
Darius.
23 Zi'j wodden inschreven in de kronieken, tot an de
tied van Jochanan, de zeune van Eljasib.
24 Et weren: Chasabja, Serebja en Jesua, de zeune van
Kadmiël. Dit weren heur verwaanten, die ofdieling bi'j ofdieling tegenover heur
opsteld stonnen bi'j et zingen van de lof- en daanklieten, naor et veurschrift
van David, de godsman:
25 Mattanja, Bakbukja en Obadja. De poortwaachters die
de waacht hullen bi'j de veurraodkaemers in de poortgebouwen weren Mesullam,
Talmon en Akkub.
26 Zi'j weren allemaole tiedgenoten van Jojakim, de
zeune van Jesua, de zeune van Josadak, van Nehemia, de gouverneur, en van Ezra,
de priester en schriever.
Inwi'jding
van de stadsmure
27 Doe de mure van Jeruzalem inwijded wodden zol,
wodden de Levieten in al heur woonplakken opspeurd en naor Jeruzalem brocht om
feestelik de inwi'jding te vieren, mit lofzang en lieten, onder begeleiding van
cimbalen, harpen en lieren.
28 De tempelzangers wodden bi'jenneer reupen vanuut de
streek rondom Jeruzalem en vanuut de nederzettings bi'j Netofa,
29 en vanuut Bet-Haggilgal en et gebied van Geba en
Azmawet, vanuut de nederzettings dus die de tempelzangers in de buurt van
Jeruzalem veur heurzels bouwd hadden.
30 De priesters en de Levieten reinigden niet alliend
heurzels, mar ok et volk, de poorten en de mure.
31 Ik leut de leiders van Juda de mure opgaon. Ik
stelde twie grote koren op; iene daorvan trok in processie naor et zuden over
de mure, in de richting van de Mestpoort.
32 Hosaja volgde heur mit de helte van de leiders van
Juda,
33 en mit Azarja, Ezra, Mesullam,
34 Jehuda, Benjamin, Semaja en Jirmeja.
35 Daornao een tal priesters mit trompetten: Zecharja,
de zeune van Jonatan, die de zeune was van Semaja, de zeune van Mattanja, de
zeune van Micha, de zeune van Zakkur, de zeune van Asaf,
36 mit zien verwaanten Semaja, Azarel, Milalai,
Gilalai, Maäi, Netanel, Jehuda en Chanani, die de meziekinstermenten van David,
de godsman, bi'j heur hadden. Ezra, de schriever, gong veurop.
37 Bi'j de Bronpoort gongen ze rechtdeur, de trappen
van de Davidsburcht op, en over de omhogensgaonde mure klommen ze langs et
peleis van David naor de Waterpoort in et oosten.
38 Et twiede koor gong naor 't noorden. Ik klom mit de
aandere helte van et volk aachter heur an. Zi'j gongen over de mure langs de
Bakoventoren naor de Briede Mure,
39 en via de Efraïmpoort, de Oolde Poort, de Vispoort,
de Chananeltoren en de Honderdtoren leupen ze tot an de Schaapspoort, en bleven
staon bi'j de Gevangenpoort.
40 De twie koren stelden heur op in de tempel, krek as
ikke mit de helte van de bestuurders,
41 en de priesters Eljakim, Maäseja, Minjamin, Micha,
Eljoënai, Zecharja en Chananja, mit heur trompetten.
42 De tempelzingers Maäseja, Semaja, Elazar, Uzzi,
Jochanan, Malkia, Elam en Ezer, onder leiding van Jizrachja, zongen luud.
43 Die dag brochten de Israëlieten een protte offers,
en alleman was vrolik omreden God heur een protte wille beleven leut. Ok de
vrouwluden en de kiender weren bliede; et feestkebaol in Jeruzalem was tot op
grote ofstaand te heuren.
Over et
gebruuk van de tempelruumtes
44 Op die dag wodden d'r manluden ansteld tot
opzichters van de veurraodkaemers waorin de opbrengst van de eerste oogst en de
tienden bi'jenneer brocht wodden, et pat dat jommes neffens de wet an de
priesters en de Levieten toekwam, al naor gelang de opbrengst van de rond de
steden gelegen akkers. Juda schepte jommes bliedschop in de priesters en de
Levieten die dienst deden.
45 Zi'j voldeden trouw an heur verplichtings tegenover
heur God en hullen heur an de reinhiedsveurschriften. Dat deden de zangers en
de poortwaachters ok, overienkomstig de veurschriften van David en zien zeune
Salomo
46 – in de tied van David en Asaf, lange leden, ligt
ommes de oorsprong van de dienst van de zangers die de lofzangen inzetten en
God priezen.
47 In de tied van Zerubbabel en Nehemia gavven de
Israëlieten an de zangers en de poortwaachters wat zi'j daegeliks neudig
hadden, en ze gavven heilige giften an de Levieten, waorin ok de naokommelingen
van Aäron mitpatten.
Nehemia 13
01 In die tied leesden ze et volk veur uut et boek van
Mozes. Daorin bleek optekend te wezen dat Ammonieten en Moabieten gienertied
tot God zien gemienschop toelaoten wodden meugen,
02 omreden ze iens weigerd hadden om de Israëlieten
mit brood en waeter integen te gaon, en omreden ze Bileam ommekocht hadden om
heur te vervluken – een vluuk die deur oonze God veraanderd wodde in een zegen.
03 Naodat disse wettelike bepaolings veurlezen weren,
zette et volk alle vremden appat van de Israëlieten.
04 Eerder al hadde de priester Eljasib, die
verantwoordelik was veur de veurraodkaemers in de tempel van oonze God en nauw
verwaant was mit Tobia,
05 veur disse Tobia een groot vertrek inricht. Et was
et vertrek waor eertieds de graonoffers opsleugen wodden, en ok de wierook en
et tempelgerei; en veerder de tienden van graon, wien en eulie die an de
Levieten, de zangers en de poortwaachters toekwammen, en de bi'jdregen veur de
priesters.
06 Doe dit alles gebeurde was ik niet in Jeruzalem,
want ik was in et twienendattigste jaor van zien regering naor keuning
Artaxerxes van Babylonië gaon. Nao een poze vreug ik de keuning toestemming
07 om naor Jeruzalem weeromme te gaon. Daor ankommen
ontdekte ik et kwaod dat Eljasib anricht hadde deur veur Tobia een vertrek in
te richten in de tempelhoven.
08 Dit leek mi'j niet goed toe, en daorom gooide ik
alle huusraod van Tobia naor buten, et vertrek uut.
09 Ik gaf kommedaosie om de vertrekken schone te
maeken en brocht doe et tempelgerei weeromme, en de graonoffers en de wierook
ok.
10 Ok kwam ik d'r aachter dat de Levieten heur pat
niet kregen, en dat zi'j en de dienstdoende zangers daorom votleupen, weeromme
naor heur akkers.
11 Ik maekte de bestuurders verwieten en vreug heur:
"Waoromme wodt de tempel verweerloosd?" Ik leut de Levieten bi'jenneer
kommen en heur plak weer innemen,
12 en alle Judeeërs brochten heur tienden van graon,
wien en eulie naor de veurraodkaemers.
13 Ik belastte de priester Selemja, de schriever Sadok
en de Leviet Pedaja mit et toezicht op de veurraodkaemers, mit Chanan, de zeune
van Zakkur, de zeune van Mattanja, as heur helper, want disse manluden wodden
betrouwber acht. Et was heur taeke om alles onder heur ambtgenoten te
verpatten.
14 Mien God, daenk an alles wat ik daon hebbe; laoten
de goeie daoden die ik daon hebbe veur de tempel van mien God en veur de
eredienst, niet uutwist wodden.
Nehemia
treedt op tegen misstanen
15 In diezelde tied zag ik in Juda op sabbat meensken
droeven in wienpassen treden en garven graon op ezels laeden, en ok wien,
droeven, viegen en verschillende negosie naor Jeruzalem brengen, en dat op
sabbat, en ik waorschouwde heur omreden zi'j op die dag leeftocht verkochten.
16 De Tyriërs die d'r woonden voerden op sabbat vis an
en aandere negosie, die ze verkochten an de Judeeërs, en dat in Jeruzalem!
17 Ik maekte de veuranstaonde burgers van Juda
verwieten, en zee tegen heur: "Wat doen jim veur schandaoligs, jim
ontheiligen de sabbat!
18 Is dat niet etzelde wat jim veuroolden deden, en
waoromme oonze God zovule kwaod over oons en over disse stad brocht het? Deur
de sabbat te ontheiligen roepen jim een nog groter onheil over Israël of."
19 Zogauw et bi'j de poorten van Jeruzalem rustig
wodden was, vlak veur et ingaon van de sabbat, gaf ik kommedaosie dat de
poortdeuren sleuten wodden mossen en eerst weer eupendaon wodden mochten op de
dag nao de sabbat, en ik stelde een tal van mien manluden bi'j de poorten op;
op sabbat kwam d'r gien negosie de stad meer binnen.
20 Haandelers en koopluden overnaachtten doe een peer
keer buten Jeruzalem.
21 Ik waorschouwde heur mit disse woorden:
"Waoromme overnaachten jim bi'j de mure? Aj'm dat nog es doen, laot ik jim
inrekenen!" en vanof die tied kwammen zi'j niet meer op sabbat.
22 Tegen de Levieten zee ik dat ze heurzels wasken
mossen en de poorten bewaeken kommen mossen, zodat de sabbat een heilige dag
blieven zol. Mien God, daenke hieromme ok an mi'j, en wees mit mi'j begaon in
jow grote goedgeunstighied.
23 In diezelde tied kwam ik d'r ok aachter dat d'r
Joden mit vrouwluden uut Asdod, Ammon en Moab trouwd weren,
24 en kiender hadden van wie de helte Asdoditisch of
de tael van een aander volk praotte, mar gien Judees.
25 Ik maekte heur daorover verwieten, ik vervluukte
heur, pattie manluden sleug ik, ik trok de haoren uut heur heufd en ik
bezweerde heur bi'j God: "Waog et niet om je dochters an heur zeunen te
geven of iene van heur dochters veur je zeunen of veur jezels te nemen!
26 Bin dit niet de vergriepen waoran Salomo, de
keuning van Israël, him schuldig maekte? Onder alle volken was d'r gien keuning
zoas hi'j, hi'j was geliefd bi'j zien God, en God stelde him dan ok as keuning
over hiel Israël an, mar alderdeegst hi'j zundigde vanwegens vrouwluden van
butenlaanse komof.
27 En moe'n wi'j now over jim heuren dat jim disse
grote fout ok maeken, daj'm oonze God ontrouw binnen deur mit vremde vrouwluden
te trouwen?"
28 Alderdeegst iene van de zeunen van Jojada, de zeune
van de hogepriester Eljasib, was trouwd mit de dochter van Sanballat uut
Choron, en ik jaegde him van mi'j weg.
29 Vergeet niet, mien God, dat zi'j en de Levieten et
priesterschop en et priesterlik verbond dat jow mit heur sleuten hebben, te
schaande maekt hebben.
30 Doe maekte ik heur schone van alle vremde smetten,
en ik stelde reusters op veur de warkzemheden van de priesters en de Levieten,
naor de aord van heur wark,
31 en ok veur de levering van hoolt op vaaste tieden,
en veur de anvoer van de eerste oogst. Reken et mi'j, mien God, as goed an.