Nahum

in een

Stellingwarver vertaeling

Et boek Nahum is et zeuvende boek van de verzaemeling van de zonuumde Twaelf Profeten. Disse verzaemeling van profeteboeken is vermoedelik in de vierde of dadde ieuw v.Chr. tot staand kommen. Et boek is nuumd naor Nahum uut Elkos, een veerder niet bekende profeet uut de zeuvende ieuw v.Chr. Et het een profetie over de ondergang van Nineve, de heufdstad van et machtige Assyrische riek. Vanof 616 v.Chr. het Nineve anvalen van de Miedden en de Babyloniërs te verneren. De stad vaalt uutaendelik in 612 v.Chr. Over de datering van et boek in zien vorm van vandaege-de-dag lopen de mienings stark utenneer: goenend plakken et in de twiede helte van de zeuvende ieuw, aanderen vule laeter, in de vuufde of vierde ieuw.

Et boek Nahum het verschillende soorten profetische teksten, zoas een profetie tegen vremde volken, een heilsprofetie en een wee-roep. In kepittel 1 staot een hymnische stokkien. De tekst is schreven in een now en dan biezunder levendige poëtische stiel. Et heufdthema is de macht van God, die deur toedoen van de vi'janen van Nineve de ondergang van de slechte mar uutaendelik onmachtige stad bewarkstelligen zal. De profeet wil mit zien woorden de Judeeërs moed inpraoten tiedens de zwaore onderdrokking en et uutzoegen deur de Assyriërs.

Et boek Nahum begint mit een pat waorin de macht van God et heufdthema is (1:2-2:3). Et twiede gedielte gaot over de ondergang van de stad Nineve (2:4-3:19).

Vertaeling van de Biebel (NBG 2004)

deur Piet Bult uut Ni’jberkoop

Nahum 1

01 Profetie over Nineve. Boek van et visioen van Nahum uut Elkos.

02 De Heer is een wrekende God,

hi'j duldt gieniene naost him.

De Heer is een woedende wreker,

de Heer wreekt him op zien tegenstaanders,

hi'j richt zien argernis op zien vi'janen.

03 De Heer is geduldig, mar slim stark,

hi'j lat gienertied wat ongestraft.

De Heer gaot zien weg deur storm en wiendeldore,

wolken bin et stof van zien voeten.

04 Hi'j verheft zien stemme tegen de zee en legt heur dreuge,

de revieren lat hi'j verdreugen.

Verwelkt bin Basan en Karmel,

ok Libanon zien blossem – verwelkt.

05 Bargen beven veur him,

heuvels waankelen,

de eerde riest veur him op,

de wereld mit al heur bewoners.

06 Wie hoolt him staonde in zien argernis?

Wie hoolt staand in de gloed van zien lelkens?

Zien lelkens is as een laaiend vuur,

rotsen spatteren veur him utenneer.

07 De Heer is goed,

een vesting in tieden van nood,

hi'j kent wie bi'j him schoelen.

08 Mar zien vi'janen jacht hi'j et duuster in,

mit een vloedgolf verwoest hi'j heur stad.

09 Wat daenken ze tegen him te ondernemen?

De Heer veurkomt heur plan,

Juda wodt gien twiede keer bedriegd.

10 Al sluten zi'j heur anien as een stiekelhede,

al bin ze overmoedig deur de draank,

ze wodden as dreuge stoppels verbraand.

11 Uut heur is iene votkommen

vol kwaode gedaachten tegen de Heer,

vol heilloze plannen.

12 Dit zegt de Heer:

Al bin ze op volle starkte en slim talriek,

toch wodden ze daele mi'jd, et is mit heur daon!

Ik hebbe je kweld, Juda,

mar ik zal je niet meer kwellen,

13 want now breek ik zien jok dat op je schoolders ligt,

en je riemen trek ik los.

14 Over him het de Heer dit beslist:

Jow naeme zal niet naoschaaien,

in je tempels vernietig ik de godebeelden.

Ik zal een graf veur je greven, verachtelik bin ie.

Nahum 2

01 Daor, over de bargen,

lopt een bosschopper hadde.

Hi'j kondigt vrede an.

Vier de feesten, Juda,

los je geloften in,

want gienertied trekken schurken weer deur je laand,

ze bin hielendal uutroeid.

02 D'r is iene tegen heur opstaon

die heur utenneer drieven zal.

Bewaeke je vesting, Nineve!

Kiek uut over de weg!

Bevaeme je heupen!

Verzaemel al je kracht!

03 De Heer herstelt et anzien van Jakob, van Israël,

deur uutroepelers verinneweerd,

die zien ranken verwoestten.

Ondergang van Nineve

04 De schilden van zien helden bin rood kleurd,

zien soldaoten gaon in purperen kleraosie.

De waegens die hi'j opstelt bin vlammend paanserd,

de laansen wodden richt.

05 Deur de straoten raozen de waegens,

zi'j jaegen vot over de pleinen,

ze zien d'r uut as fakkels,

as bliksemschichten schieten ze veurbi'j.

06 Hi'j vietert zien bevelhebbers an,

halsoverkop gaon zi'j vot.

Ze gaon hadde naor de stadsmure,

et stormdak wodt opsteld,

07 de sluzen gaon eupen,

et peleis stot inneneer.

08 Daor staot hi'j, hi'j lat de stad naekend ofvoeren.

Heur meiden krimmeneren as doeven,

rouwende slaon zi'j heur op de bost.

09 Nineve!

Een volle viever zolange et beston,

now stroomt hi'j leeg.

Blief staon! Blieve staon!

Mar gieniene die him ommedri'jt.

10 Steel et zulver, pak et goold!

D’r komt gien aende an!

Kostberheden zonder tal!

11 Verdistreweerd, verdistrewaosie, verrinneweerd:

hatten bezwieken, sloppe kni'jen,

heupen trillen, gezichten wodden bliek.

12 Wat is d'r over van et leeuwehol?

Et was een nust vol jonge leeuwen,

de leeuw, de leeuwinne en de welpen

gongen kalmpies heur gaank.

13 De leeuw roofde veur zien welpen,

beet kelen deur veur zien leeuwinnen,

toogde zien hollen vol mit prooi,

zien legers mit buit.

14 Ik zal je straffen – zegt de Heer van de hemelse machten.

Ik laot je striedwaegens opgaon in rook,

et zweerd zal je dappere leeuwen verslienen,

je prooi raeg ik vot van de eerde,

de stemme van je gezaanten wodt niet meer heurd.

Nahum 3

01 Wee de bloedstad,

ien en al leugen,

vol oorlogsbuit,

et roven hoolt niet op.

02 Heur! Knallende zwiepen!

Heur! Daeverende vielen!

Draevende peerden,

daansende waegens,

03 steigerende ruters,

vlammende zweerden,

bliksemende laansen!

Een protte dooien,

een hiel protte lichems,

ontelbere lieken,

ie stroffelen over de lieken.

04 Ie gedregen je as een waegenloops jonk,

een verleidster bi'j', begaon in toveri'je,

ie verkwaanselen volken veur je ontuchtige praktieken,

en stammen veur je toverkunst.

05 Daorom za'k je straffen – zegt de Heer van de hemelse machten.

Ik zal je kleraosie optillen tot over je gezichte,

je naekendhied an alle volken tonen,

je schaemte an alle lanen zien laoten.

06 Ik smiet je onder onhuur,

zal je belachelik maeken,

je te kiek zetten.

07 Dan zal iederiene die je ziet him van je ofkeren

en zeggen: "Nineve is verrinneweerd!"

Wie zal om heur rouwen?

Waor vien ik iene die je troost?

08 Bin ie beter as Thebe,

an de aarme meensken van de Nijl,

omgeven deur waeter,

mit de zee as bescharming,

mit as stadswal de zee?

09 Nubië en Iegypte weren heur de hieltied weer tot steun,

Put en de Libiërs kwammen heur te hulpe.

10 Toch mos zi'j ok in ballingschop,

zi'j wodde ok gevangen en wegvoerd.

Heur poppies wodden ok te pletter sleugen

op iedere hoeke van de straote.

Om heur veurnaemen wurp et volk ok et lot,

heur leiders wodden ok in de boeien sleugen.

11 Ie zullen ok dronken en beneveld raeken,

ie zullen ok veur de vi'jaand de bienen nemen moeten.

12 Je vestingsteden bin as bomen vol riepe viegen:

wodden zi'j schudded, dan valen ze de eter in de mond.

13 Je leger is een stel vrouwluden,

de poorten van je laand staon waegenwied eupen veur je vi'janen,

vuur het je sluutbalken verteerd.

14 Putte mar waeter veur et beleg,

verstark je vestingsteden!

Treed de klei en stamp de liem,

pak de stienvorm!

15 Toch zal et vuur je verteren,

et zweerd je uutroeien.

Et zal je opvreten as een zwaarm gröshippers,

ok al bi'j' nog zo talriek

en vermeerder je as de bidgröshipper.

16 Bi'j jow bin d'r meer haandelers

as steerns an de hemel –

zi'j ontpoppen heur as gröshippers, en vliegen vot.

17 Je leiders bin as bidgröshippers,

je ambteners as een zwaarm vliegen.

Op een koolde dag zitten ze op de muren,

mar zogauw de zunne schient vliegen ze vot,

gieniene wet waorhenne. Waor bin ze?

18 Je hedders slaopen, keuning van Assyrië,

je leiders zitten stille,

je volk is verstri'jd over de bargen

en gieniene brengt et bi’jenneer.

19 D'r is gien verzaachting veur je wonde,

je letsel is niet te genezen.

Wie heurt wat d'r mit jow gebeurt, klapt in zien hanen,

want wie het niet de hieltied onder jow wreedhied leden?