Het gebed van Manasse

Et gebed van Manasse is een kot gebed dat toeschreven wodt an Manasse, keuning van Juda in de zeuvende ieuw v.Chr. (zie 2 Keunings 21; 2 Kronieken 33). Manasse wodt daor beschreven as ofgodediener, mar neffens Kronieken bekeert hi'j him naodat hi'j een ofstraffing had het van de Assyriërs. Hi'j biddet tot God, en wodt verheurd. In Kronieken wodt et gebed zels niet nuumd. Een laetere schriever het dat feit angrepen om asnog een gebed te schrieven waorin de spreker zien ellende an eigen falen toeschrift, schuld bekent en om vergeving vragt. Dit gebed is dus grif niet weeromme te voeren op keuning Manasse zels. Et boek is riekaans oorspronkelik in et Grieks schreven. Wanneer et schreven is, is niet bekend. Et boek wodt kenmarkt deur een vlotte stiel en een rieke woordenschat.

Manasse 1

Et gebed van Manasse

01 Almachtige Heer,

God van oonze veuroolden Abraham, Isaak en Jakob

en van heur rechtveerdig naogeslaacht,

02 jow hebben hemel en eerde maekt in al heur riekdom,

03 de zee onverbrekelik verbunnen mit jow machtig woord,

de oervloed sleuten en verzegeld mit jow ontzagwekkende naeme;

04 alles siddert en beeft veur jow macht.

05 Gieniene kan jow luuster verdregen

of de argernis weerstaon waormit jow zundige meensken bedriegen.

06 De baarmhattighied die jow beloven

kan gieniene meten of begriepen.

07 Jow bin de hoogste Heer,

vol medelieden, geduldig en trouw,

en vergevingsgezind as meensken kwaod doen.

08 Heer, jow die God binnen van de rechtveerdigen,

jow vraogen gien berouw van de rechtveerdigen,

van Abraham, Isaak en Jakob, die niet tegen jow zundigd hebben,

mar van mi'j, van een zundig persoon, vraogen jow berouw.

09 Want mien zunden bin talrieker as zaandkorrels an de zee,

de hieltied meer overtredings begong ik, Heer, de hieltied zwaordere;

ik bin et niet weerd op te kieken naor de hoge hemel,

zo groot is et onrecht da'k begaon hebbe.

10 Een zwaore ketten van iezer drokt mi'j daele,

en ik buug et heufd om mien zunden;

veur mi'j bestaot gien vergeving.

Ik hebbe ommes om jow lelkens vraogd

en daon wat slecht is in jow ogen:

ofgodsbeelden opricht en zunde nao zunde begaon.

11 Mar now buug ik mi'j daele en bidde om jow goedhied.

12 Ik hebbe zundigd, Heer, ik hebbe zundigd,

ik erken mien overtredings.

13 Ik bidde jow: vergeef mi'j, Heer, vergeef mi'j.

Laot mi'j niet versoepen mit mien zunden,

staepel jow straffen niet op tegen mi'j,

koester jow wrok niet veur iewig,

verban mi'j niet naor et diepste van de eerde.

Jow, Heer, bin toch de God van iederiene die berouw toont!

14 Ok mi'j zullen jow jow goedhied tonen,

jow grote baarmhattighied zal mi'j redden,

hoe onweerdig ik ok bin.

15 Ik zal jow alsmar priezen, alle daegen van mien leven,

want alle hemelse machten bezingen jow,

en jow roem is iewig.

Amen.