Lucas

in een

Stellingwarver vertaeling





Et evangelie neffens Lucas is et eerste pat van een twiedielig wark. Et twiede pat is et boek Handelingen van de apostels. Neffens een tredisie, die in elk geval tot et aende van de twiede ieuw weeromme gaot, is Lucas de schriever van beide boeken west. Van disse Lucas weten we weinig. Hi'j was een ontwikkeld man, een dokter, die een hiel schoft et buisien van Paulus west is (vgl. Kolossenzen 4:14, 2 Timoteüs 4:11 en Filemon vas 24). Et evangelie is riekaans omdebi'j 80 nao Christus schreven.

Lucas richt him tot een zekere Teofilus, meugelik een kotleden bekeerde christen, die al et ien en aander over Jezus van Nazaret heurd het. Lucas wil now alles nog es odderlik veur him opschrieven, zodat Teofilus inzien zol hoe betrouwber de dingen binnen waorin hi'j les kregen het (1:3-4). De tied is daorbi'j Lucas zien leidraod: hi'j plaetst Jezus zien optreden in de geschiedenis. De beloften van God waorvan de profeten praot hebben, wodden deur de komst van Jezus vervuld. De heilige Geest, die rustte op Johannes de Doper (1:15), leidt ok Jezus zien leven (4:1; 10:21). Nao de hemelvaort van Jezus warkt disse Geest deur bi'j zien leerlingen, de apostels (24:49).

Vanof et begin wodt et leven van Jezus steld in een wereldwied verbaand: zien stamboom gaot weeromme tot Adam. Bi'j Lucas komt starker as bi'j de aandere evangelisten Jezus zien zorg veur de aarme en uutstoten meensken naor veuren. Lucas het - krek as Matteüs - et medel van et evangelie neffens Marcus. Daornaost bruukte hi'j een verzaemeling uutspraoken van Jezus en aandere berichten over zien woorden en zien warken. An et begin van et evangelie geft Lucas verhaelen over de geboorte, de jonkhied van Johannes de Doper en Jezus, en an et aende schrift hi'j verhaelen toe over verschienings van de Opstaone Heer.





Vertaeling van de Biebel (NBG 2004)

deur Piet Bult uut Ni’jberkoop
Lucas 01.

Proloog.

01 In anmarking neumen dat al een hieleboel meensken heur drok maekt hebben om een verslag te schrieven over de gebeurtenissen die rond oons gebeurd binnen,
02 en die oons verteld binnen deur degenen die van et begin of ooggetugen west binnen en dieners van et Woord wodden binnen,
03 leek et mi'j ok goed toe om alles van et begin of hiel precies nao te gaon en disse gebeurtenissen in odderde vorm veur jow, hoogachte Teofilus, op schrift te stellen,
04 om jow te overtugen van de betrouwberhied van de zaeken waorin jow les kregen hebben.

Ankundiging van de geboorte van Johannes.

05 Doe Herodes keuning van Judea was, leefde d'r een priester die Zacharias hiette en tot de priesterofdieling Abia heurde. Zien vrouw, Elisabet, stamde van Aäron of.
06 Beiden weren vrome en geleuvige meensken, die heur strikt an alle geboden en wetten van de Heer hullen.
07 Ze hadden gien kiender, want Elisabet was onvruchtber, en beiden weren al op leeftied.
08 Doe de ofdieling van Zacharias es an de beurt was om de priesterdienst te doen,
09 wodde d'r neffens et gebruuk van de priesters lottet en wodde Zacharias deur et lot anwezen om et reukoffer op te dregen in et heiligdom van de Heer.
10 De toestroomde mennigte bleef buten staon te bidden wiels et offer brocht wodde.
11 Opiens verscheen him een engel van de Heer, die an de rechterkaante van et reukofferalter ston.
12 Zacharias schrok slim bi'j et zien van de engel en hi'j wodde overvalen deur aangst.
13 Mar de engel zee tegen him: "wees mar niet bange, Zacharias, je gebed is verheurd: je vrouw Elisabet zal een zeune krigen, en ie moe'n him Johannes numen.
14 Vreugde en bliedschop zullen je toekommen, en een protte meensken zullen heur op zien geboorte verheugen.
15 Hi'j zal groot wezen in de ogen van de Heer, en wien en starke draank zal hi'j niet drinken. Hi'j zal vervuld wodden mit de heilige Geest wiels hi'j nog in de schoot van zien moeke is,
16 en hi'j zal een protte meensken uut et volk van Israël tot de Heer, heur God, brengen.
17 As bode zal hi'j veur God uutgaon mit de geest en de kracht van Elia om oolden mit heur kiender te verzoenen en om zundige meensken tot rechtveerdighied te brengen, en zo zal hi'j et volk klaormaeken veur de Heer."
18 Zacharias vreug an de engel: "hoe kan ik weten of dat waor is? Ik bin ommes een oolde man en mien vrouw is ok al op leeftied."
19 De engel zee: "ik bin Gabriël, die de hieltied bi'j God in de buurt is, en ik bin uutzunnen om je dit goeie ni'js te brengen.
20 Mar omreden ie gien geleuf hecht hebben an mien woorden, die op de veurbestemde tied in vervulling gaon zullen, zuj’ stom wezen en niet praoten kunnen tot de dag waorop dit alles gebeuren gaot."
21 De mennigte ston buten op Zacharias te waachten, en de meensken vreugen heur of waorom hi'j zo lang in et heiligdom bleef.
22 Mar doe hi'j naor buten kwam, kon hi'j niks tegen heur zeggen. Ze begrepen dat hi'j in et heiligdom een visioen zien har; hi'j maekte gebaoren tegen heur, mar praoten kon hi'j niet.
23 Doe zien tempeldienst veurbi'j was, gong hi'j weeromme naor huus.
24 Kotte tied laeter wodde zien vrouw Elisabet zwanger. Zi'j leefde vuuf maonden lang in ofzundering en zee bi'j heurzels:
25 De Heer het him mien lot antrokken. Hi'j het dit veur mi'j daon zodat de meensken mi'j niet langer verachten.

Ankundiging van de geboorte van Jezus.

26 In de zesde maond stuurde God de engel Gabriël naor de stad Nazaret in Galilea,
27 naor een maegien dat uuthuwelikt was an een man die Jozef hiette, een ofstammeling van David. Et maegien hiette Maria.
28 Gabriël gong heur huus binnen en zee: "Dag Maria, ie bin uutkeuzen, de Heer staot an jow kaante."
29 Ze schrok allemachtig bi'j et heuren van zien woorden en vreug heur of, wat die begroeting te betekenen hadde.
30 Mar de engel zee tegen heur: "wees mar niet bange, Maria, God het je zien geunst schonken.
31 Luuster, ie zullen zwanger wodden en een zeune kriegen, en ie moe'n him Jezus numen.
32 Hi'j zal een groot man wodden en Zeune van de Allerhoogste nuumd wodden, en God, de Heer, zal him de troon van zien heit David geven.
33 Tot in iewighied zal hi'j keuning wezen over et volk van Jakob, en an zien keuningschop zal gien aende kommen."
34 Maria vreug an de engel: "hoe kan zoks gebeuren? Ik hebbe ommes nog nooit mit een man slaopen."
35 De engel zee doe: "de heilige Geest zal over je kommen en de kracht van de Allerhoogste zal je as een schaad bedekken. Daorom zal et kiend dat geboren wodt, heilig, en Zeune van God nuumd wodden.
36 Luuster, ok je nicht Elisabet is zwanger van een zeune, ondaanks heur hoge leeftied. Zi'j is now, ok al hul men heur veur onvruchtber, in de zesde maond van heur zwangerschop,
37 want veur God is niks onmeugelik."
38 Maria zee: "de Heer wil ik dienen: laot d'r mit mi'j gebeuren wat jow zegd hebben." Doe leut de engel heur weer allienig.

Maria en Elisabet.

39 Kot daornao reisde Maria in zeuven haosten naor et barglaand, naor een stad in Juda,
40 waor ze et huus van Zacharias ingong en Elisabet begroette.
41 Doe Elisabet de groet van Maria heurde, sprong et kiend op in heur schoot; zi'j wodde vervuld mit de heilige Geest
42 en reup luud: "de meerst zegende bin ie van alle vrouwluden, en zegend is de vrucht van je schoot!
43 Wie bin ik dat de moeke van mien Heer naor mi'j toe komt?
44 Doe ik je groet heurde, sprong et kiend van vreugde op in mien schoot.
45 Gelokkig is zi'j die geleufd het dat de woorden van de Heer in vervulling gaon zullen."
46 Maria zee: "mien ziel priest en looft de Heer,
47 mien hatte juicht om God, mien redder:
48 hi'j het oge had veur mi'j, zien meenste dienares. Alle geslachten zullen mi'j van now an priezen,
49 ja, grote dingen het de Machtige veur mi'j daon, heilig is zien naeme.
50 Barmhattig is hi'j, van geslacht op geslacht, veur al wie him vereert.
51 Hi'j toont zien macht en de kracht van zien aarm en drift uutmekere wie heur verheven wanen,
52 heersers stot hi'j van heur troon en wie gering is geft hi'j anzien.
53 Wie honger het overlaedt hi'j mit gaoven, mar rieken stuurt hi'j mit lege hanen vot.
54-55 Hi'j trekt him et lot an van Israël, zien diener, zoas hi'j an oonze veuroolden beloofd het: hi'j herinnert him zien barmhattighied tegenover Abraham en zien naogeslaacht, tot in iewighied."
56 Maria bleef omdebi'j drie maonden bi'j heur, en gong doe weeromme naor huus.

De geboorte van Johannes.

57 Doe de dag van heur bevalling kwam, kreeg Elisabet een zeune.
58 Heur buren en verwaanten heurden hoe barmhattig de Heer veur heur west was, en ze verheugden heur tegere mit heur.
59 Op de achtste dag kwammen ze om et kiend te besnieden, en ze wollen et Zacharias numen, naor zien heit.
60 Mar zien moeke zee: "nee, Johannes zal hi'j hieten!"
61 Ze zeden tegen heur: "mar d'r is gieniene in je femilie die zo hiet."
62 Zi'j beduudden zien heit weten te laoten hoe hi'j et kiend numen wol.
63 Hi'j vreug om een schriefblok en schreef daorop: "Johannes is zien naeme." Iederiene was verbaosd.
64 En drekt wodde de verlamming van zien mond en zien tonge ongedaon maekt, en hi'j begon te praoten en loofde God.
65 Alle omwonenden weren diepe onder de indrok, en in hiel et barglaand van Judea wodden disse gebeurtenissen bespreuken.
66 Iederiene die et heurde bleef d'r over prakkeseren, en vreug him of: Hoe zal et veerder gaon mit dit kiend? Want de machtige haand van de Heer bescharmde him.
67 Zien heit Zacharias wodde vervuld mit de heilige Geest en dee disse profetie:
68 "prezen is de Heer, de God van Israël, hi'j het him om zien volk bekommerd en et verlost.
69 Een reddende kracht het hi'j veur oons opwekt uut et huus van David, zien diener,
70 zoas hi'j van ooldsher beloofd het bi'j monde van zien heilige profeten:
71 bevri'jd zollen we wodden van oonze vi'janen, redded uut de greep van iederiene die oons niet lieden mag.
72 Zo toont hi'j him barmhattig tegenover oonze veuroolden en herinnert hi'j him zien heilig verbond:
73 de eed die hi'j zweerd hadde an Abraham, oonze heit, dawwe,
74 ontkommen an oonze vi'janen, him zonder aangst dienen zollen,
75 toewijded en oprecht, de hieltied levend in zien omgeving.
76 En ie, kiend, ie zullen nuumd wodden: profeet van de Allerhoogste, want ie zullen veur de Heer uutgaon om de weg veur him te baenen,
77 en om zien volk bekend te maeken mit heur redding deur de vergeving van heur zunden.
78 Daankzi'j de liefdevolle barmhattighied van oonze God zal et straolende locht uut de hemel over oons opgaon
79 en verschienen an iederiene die leeft in duusternis en verkeert in et schaad van de dood, zodawwe oonze voeten op de weg van de vrede zetten kunnen."
80 Et kiend gruuide op en wodde starkt deur de Geest. Johannes leefde in de woestijn tot de dag kwam waorop hi'j him kenber maekte an et volk van Israël.



Lucas 02.

De geboorte van Jezus.

01 In die tied leut keizer Augustus een bevel uutgaon mit de bosschop dat alle inwoners van zien riek heur inschrieven laoten mossen.
02 Disse eerste volkstelling was, doe Quirinius et bestuur over Syrië har.
03 Iederiene gong onderweg om him inschrieven te laoten, elk naor zien eigen geboortestee.
04 Jozef gong van de stad Nazaret in Galilea naor Judea, naor de stad van David die Betlehem hiet, omreden hi'j van David ofstamde,
05 om him inschrieven te laoten tegere mit Maria, zien anstaonde vrouw, die al een mooi schoft wat onder de schölk dreug.
06 En wiels zi'j daor weren, raekte ze in de kraom,
07 en ze kreeg een zeune, heur eerste poppien. Ze wikkelde him in een doek en legde him in een voerbak, omreden d'r veur heur nargens aanders plak was.
08 Daor in de buurt weren die naachs hedders in et veld, zi'j hullen waacht bi'j heur kudde.
09 Opiens ston d'r een engel van de Heer bi'j heur en wodden ze omgeven deur et straolende locht van de Heer, zodat ze slim schrokken.
10 De engel zee doe tegen heur: "Wees mar niet bange, want ik kom om jim goed ni'js an te zeggen, dat et hiele volk bliede maeken zal:
11 vandaege is in de stad van David veur jim een redder geboren. Hi'j is de messias, de Heer.
12 Dit zal veur jim et teken wezen: jim zullen een pasgeboren kiend vienen dat in een doek wikkeld in een voerbak ligt."
13 En opiens kwam d’r bi'j de engel een groot hemels leger dat God prees mit de woorden:
14 "Ere veur God in de hoogste hemel en vrede op eerde veur alle meensken waor hi’j van hoolt."
15 Doe de engels naor de hemel weeromme gaon weren, zeden de hedders tegen mekeer: "Lao’we naor Betlehem toe gaon om mit oons eigen ogen te zien wat d'r gebeurd is en wat de Heer oons anzegd het."
16 Ze gongen d’r votdaolik henne, en troffen Maria en Jozef daor, en et poppien dat in de voerbak lag.
17 Doe ze et joongien zaggen, vertelden ze wat heur over him zegd was.
18 Iederiene die et heurde ston versteld over wat de hedders tegen heur zeden,
19 mar Maria beweerde al disse woorden in heur hatte en bleef d'r over deur prakkeseren.
20 De hedders gongen weeromme naor heur schaopen, wiels ze God loofden en prezen om alles wat ze heurd en zien hadden, krek zoas et heur zegd was.
21 Doe d'r acht daegen omme weren en et joongien besneden wodden zol, kreeg hi'j de naeme Jezus, die de engel nuumd hadde, nog veurdat hi'j in de schoot van zien moeke belaand was.

Toewijding van Jezus in de tempel.

22 Doe de tied kommen was dat ze heur neffens de wet van Mozes rein verklaoren laoten mossen, brochten ze him naor Jeruzalem om him an de Heer an te bieden,
23 zoas veurschreven is in de wet van de Heer: "Elke eerstgeboren zeune moet an de Heer toewijded wodden."
24 Ok wollen ze et offer brengen dat de wet van de Heer veurschrift: een spannegien totteldoeven of twie jonge ringeldoeven.
25 D'r woonde doe in Jeruzalem een zekere Simeon. Hi'j was een rechtveerdig en vroom man, die uutzag naor de tied dat God Israël vertroosting schinken zol, en de heilige Geest rustte op him.
26 Et was him deur de heilige Geest eupenbaord dat hi'j niet starven zol veurdat hi'j de messias van de Heer zien hebben zol.
27 Dreven deur de Geest kwam hi'j naor de tempel, en doe Jezus zien oolden heur kiend daor binnenbrochten om mit him te doen wat neffens de wet gebrukelik is,
28 nam hi'j et in zien aarms en loofde hi'j God mit de woorden:
29 "Laot now, Heer, jow diener in vrede hennegaon, zoas jow beloofd hebben.
30 Want mit eigen ogen heb ik de redding zien
31 die jow bewarkt hebben te overstaon van alle volken:
32 een locht dat eupenbaord wodt an de heidenen en dat tot roem strekt van Israël, jow volk."
33 Zien heit en moeke weren verbaosd over wat d'r over him zegd wodde.
34 Simeon zegende heur en zee tegen Maria, zien moeke: "Weet wel dat een hieleboel meensken in Israël deur him stroffelen zullen of krek overaende kommen zullen. Hi'j zal een teken wezen dat betwist wodt,
35 en zels zullen jow as deur een zwaord deursteuken wodden. Zo zal de gezindhied van een hieleboel meensken an et locht kommen."
36 D'r was daor ok een profetes, Hanna, de dochter van Fanuël, uut de stamme van Aser. Zi'j was slim oold; vanof heur huwbere leeftied had zi'j zeuven jaor mit heur man leefd,
37 en ze was now al vierentachtig jaor wedevrouw. Ze was de hieltied in de tempel, waor zi'j God dag en naacht diende mit vaasten en bidden.
38 Op dat mement kwam ze naor heur toe, brocht hulde an God en praotte over et kiend mit iederiene die uutzag naor de bevri'jdinge van Jeruzalem.
39 Doe ze alles overienkomstig de wet van de Heer daon hadden, keerden ze weeromme naor Galilea, naor heur woonstee Nazaret.
40 Et kiend gruuide op, wodde stark en was begiftigd mit wieshied; God zien genade rustte op him.

De twaelfjaorige Jezus in de tempel.

41 Zien oolden gongen jaorliks veur et paoskefeest naor Jeruzalem.
42 Doe hi'j twaelf jaor was, maekten ze weer heur gebrukelike pelgrimstocht.
43 Nao ofloop van et feest gongen ze weer op huus an, mar Jezus bleef in Jeruzalem aachter zonder dat zien oolden et wussen.
44 In de veronderstelling dat hi'j ok bi'j et reisgezelschop was, reisden ze een hiele dag veurdat ze him overal onder heur verwaanten en bekenden begonnen te zuken.
45 Doe ze him niet vunnen, gongen ze weeromme naor Jeruzalem om him daor te zuken.
46 Nao drie daegen vunnen ze him in de tempel, waor hi'j tussen de lerers zat, wiels hi'j naor heur luusterde en heur vraogen stelde.
47 Iederiene die him heurde ston versteld van zien inzicht en zien antwoorden.
48 Doe zien oolden him zaggen, weren ze ontzet, en zien moeke zee tegen him: "Kiend, wat hej' oons andaon? Je heit en ik hebben mit aangst in et hatte naor je zocht."
49 Mar hi'j zee tegen heur: "Waorom hebben jim naor mi'j zocht? Wussen jim niet dat ik in et huus van mien Heit wezen mos?"
50 Mar zi'j begrepen niet wat hi'j tegen heur zee.
51 Hi'j reisde mit heur weeromme naor Nazaret en was heur van now of an geheurzem. Zien moeke sleut alles wat d'r mit him gebeurd was in heur hatte.
52 Jezus gruuide veerder op en zien wieshied nam nog altied toe. Hi'j kwam de hieltied meer in de geunst bi'j God en de meensken.




Lucas 03.

Optreden van Johannes.

01 In et vuuftiende jaor van de regering van keizer Tiberius, doe Pontius Pilatus Judea bestuurde, en Herodes tetrarch was over Galilea, zien breur Filippus over et gebied van Iturea en Trachonitis, en Lysanias over Abilene,
02 en doe Annas en Kajafas hogepriester weren, richtte God him in de woestijn tot Johannes, de zeune van Zacharias.
03 Daor gong Johannes in de kontreinen van de Jordaan verkondigen dat de meensken heur deupen laoten mossen en tot inkeer kommen mossen, om zo vergeving van zunden te kriegen,
04 zoas beschreven staot in et boek mit de uutspraoken van de profeet Jesaja: Luud klinkt een stem in de woestijn: "Baene de weg van de Heer, maek recht zien paeden!
05 Iedere kloof zal dicht wodden, elke barg en heuvel slicht, kroeme wegen recht en hobbelige wegen vlak maekt;
06 en al wat leeft zal zien hoe God redding brengt."
07 Johannes zee tegen de meensken die massaol uutleupen om heur deur him deupen te laoten: "Addergebroed, wie het jim wiesmaekt da'j'm veilig binnen veur et kommende oordiel?
08 Maek vruchten die een ni'j leven weerdig binnen, en zeg niet drekt bi'j jezels: Wi'j hebben Abraham as heit. Want ik zeg jim: God kan uut disse stiender kiender van Abraham maeken!
09 Ja, de biele ligt al an de wottel van de boom: elke boom die gien goeie vruchten dreegt, wodt ommehakt en in et vuur gooid."
10 De meensken vreugen him: "Wat moe'n we dan doen?"
11 Hi'j zee doe: "Wie twie stel onderkleren het, moet patten mit wie d'r gienend het, en wie eten het moet etzelde doen."
12 D'r kwammen ok tolleners om heur deupen te laoten, en die vreugen him: "Meester, wat moe'n wi'j doen?"
13 Hi'j zee tegen heur: "Vodder niet meer as wat jim opdreugen is."
14 Ok soldaoten kwammen him vraogen: "En wi'j, wat moe'n wi'j doen?" Tegen heur zee hi'j: "Jim meugen gieniene uutkniepen en je ok niet ommekopen laoten, neem genoegen mit je loon."
15 Et volk was vol verwaachting, en iederiene vreug him of of Johannes misschien de messias was,
16 mar Johannes zee tegen heur: "Ik deupe jim mit waeter, mar nao mi’j komt d’r iene die meer vermag as ik; ik bin alderdeegst niet goed genoeg om de riem van zien sandalen los te maeken. Hi'j zal jim deupen mit de heilige Geest en mit vuur;
17 hi'j hoolt de wanne in zien haand om de dele te wasken, et koren zal hi'j bi'jmekeer brengen in zien schure en et kaf in onblusber vuur verbranen."
18 Op disse en ere wieze spoorde hi'j de meensken an en verkondigde hi'j heur et goeie ni'js.
19 Mar de tetrarch Herodes, die deur Johannes terechte wezen was in verbaand mit Herodias, de vrouw van zien breur, en vanwegens al zien aandere wandaoden,
20 voegde an alle minne dingen die hi'j daon hadde, nog toe dat hi'j Johannes opsleut in de gevangenis.
21 Et hiele volk leut heur deupen, en doe Jezus ok deupt was en hi'j an et bidden was, wodde de hemel eupend
22 en daelde de heilige Geest in de gedaonte van een doeve op him daele, en d'r klonk een stemme uut de hemel: "Ie bin mien geliefde zeune, in jow vien ik vreugde."

Geslachtslieste van Jezus.

23 Jezus begon zien verkondiging doe hi'j omdebi'j dattig jaor was. Hi'j was, zoas algemien anneumen wodde, de zeune van Jozef, die de zeune van Eli was,
24 de zeune van Mattat, de zeune van Levi, de zeune van Melchi, de zeune van Jannai, de zeune van Josef,
25 de zeune van Mattatias, de zeune van Amos, de zeune van Naüm, de zeune van Hesli, de zeune van Naggai,
26 de zeune van Maät, de zeune van Mattatias, de zeune van Semeïn, de zeune van Josech, de zeune van Joda,
27 de zeune van Joanan, de zeune van Resa, de zeune van Zerubbabel, de zeune van Sealtiël, de zeune van Neri,
28 de zeune van Melchi, de zeune van Addi, de zeune van Kosam, de zeune van Elmadan, de zeune van Er,
29 de zeune van Jozua, de zeune van Eliëzer, de zeune van Jorim, de zeune van Mattat, de zeune van Levi,
30 de zeune van Simeon, de zeune van Juda, de zeune van Josef, de zeune van Jonan, de zeune van Eljakim,
31 de zeune van Melea, de zeune van Menna, de zeune van Mattatta, de zeune van Natan, de zeune van David,
32 de zeune van Isaï, de zeune van Obed, de zeune van Boaz, de zeune van Selach, de zeune van Nachson,
33 de zeune van Amminadab, de zeune van Admin, de zeune van Arni, de zeune van Chesron, de zeune van Peres, de zeune van Juda,
34 de zeune van Jakob, de zeune van Isaak, de zeune van Abraham, de zeune van Terach, de zeune van Nachor,
35 de zeune van Serug, de zeune van Reü, de zeune van Peleg, de zeune van Eber, de zeune van Selach,
36 de zeune van Kenan, de zeune van Arpachsad, de zeune van Sem, de zeune van Noach, de zeune van Lamech,
37 de zeune van Metuselach, de zeune van Henoch, de zeune van Jered, de zeune van Mahalalel, de zeune van Kenan,
38 de zeune van Enos, de zeune van Set, de zeune van Adam, de zeune van God.




Lucas 04.

Jezus wodt deur de duvel op de proef steld.

01 Vervuld van de heilige Geest trok Jezus weg van de Jordaan, en leided deur de Geest zwurf hi'j veertig daegen rond in de woestijn,
02 waor hi'j deur de duvel op de proef steld wodde. Al die tied at hi'j niks, en doe de veertig daegen omme weren, had hi'j een protte honger.
03 De duvel zee tegen him: "As jow God zien Zeune binnen, zeg dan tegen die stien om in een brood te veraanderen."
04 Mar Jezus zee doe: "D'r staot schreven: "De meenske leeft niet van brood allienig."
05 Doe brocht de duvel him naor een hooglegen plak en leut him in ien en etzelde ogenblik alle keuninkrieken van de wereld zien.
06 De duvel zee tegen him: "Ik geef jow de macht over dat alles en ok de roem die d'r bi'j heurd, want ik kan daorover beschikken en ik geef et an wie as ik wil;
07 as jow in anbidding veur mi'j daele valen dan zal dat allemaole van jow wezen."
08 Mar Jezus zee doe: "D'r staot schreven: "Anbidde de Heer, jow God, vereer him allienig."
09 De duvel brocht Jezus naor Jeruzalem en zette him op et hoogste punt van de tempel, en hi'j zee tegen him: "As jow de Zeune van God binnen, spring dan naor beneden.
10 Want d'r staot schreven: "Zien engels zal hi'j opdracht geven om over jow te waeken."
11 En ok: "Op heur hanen zullen zi'j jow dregen, zodat jow je voete niet stoten zullen an een stien."
12 Mar Jezus zee doe: "D'r is ok zegd: Stel de Heer, jow God, niet op de proef."
13 Doe de duvel Jezus an al disse beproevings onderwurpen hadde, gong hi'j veur een schoft bi'j him weg.

Optreden van Jezus in Nazaret.

14 Jezus keerde, starkt deur de Geest, weeromme naor Galilea. Et ni'js over him verspreidde him in de hiele streek.
15 Hi'j gaf les in de synagogen en wodde deur iederiene prezen.
16 Hi'j kwam ok in Nazaret, waor hi'j grootbrocht was, en uut gewoonte gong hi'j op sabbat naor de synagoge. Doe hi'j staon gong om veur te lezen,
17 wodde him de boekerolle van de profeet Jesaja angeven, en hi'j ruulde him of tot et plak waor schreven staot:
18 "De Geest van de Heer rust op mi'j, want hi'j het mi'j zalfd. Om an aarme meensken et goeie ni'js te brengen het hi'j mi'j stuurd, om an gevangenen heur vri'jlaoting bekend te maeken en an blienen et locht in de ogen, om onderdrokten heur vri'jhied te geven,
19 om een genadejaor van de Heer uut te roepen."
20 Hi'j ruulde de boekerolle op, gaf him weeromme an de diener en gong weer zitten; de ogen van alle anwezigen in de synagoge weren op him richt.
21 Hi'j zee tegen heur: "Vandaege hebben jim disse schrifttekst in vervulling gaon heurd."
22 Iederiene betuugde him zien bi'jval en verwonderde him over de genaoderieke woorden die uut zien mond kwammen, en ze zeden: "Dat is toch de zeune van Jozef?"
23 En hi'j zee tegen heur: "Ongetwiefeld zullen jim mi'j dit gezegde veurholen: Geneesheer, genees jowzels. Doe alles waorvan wi'j heurd hebben dat et in Kafarnaüm gebeurd is, ok hier in jow geboortestad."
24 Hi'j gong wieder mit: "Luuster, ik zeg jim dat gien inkelde profeet welkom is in zien geboortestad.
25 Mar ik zeg et jim zoas et is: in de tied van Elia, doe de hemel drie jaor en zes maonden lang sleuten bleef en d'r in et laand een grote hongersnood uutbrak, weren d'r een protte weduwen in Israël.
26 Toch wodde Elia niet naor iene van heur toestuurd, mar naor een wedevrouw in Sarepta bi'j Sidon.
27 En in de tied van de profeet Elisa weren d'r een protte meensken in Israël die leden an een huudziekte, mar gieniene van heur wodde daorvan schone maekt, behalven de Syriër Naäman."
28 Doe de meensken in de synagoge dit heurden, wodden zi’j slim kwaod.
29 Ze sprongen op en dreven him de stad uut, naor de raand van de barg waor heur stad op bouwd was, om him in de ofgrond te gooien.
30 Mar hi'j leup midden tussen heur deur en vertrok.

Optreden van Jezus in Kafarnaüm.

31 Hi'j gong naor Kafarnaüm, een stad in Galilea, waor hi'j de inwoners altied op de sabbat les gaf.
32 Zi'j weren diepe onder de indrok van zien lesgeven, want hi'j sprak mit gezag.
33 D'r was in de synagoge iene die bezeten was deur een geest, een onreine duvel, en disse raosde hiel luud:
34 "Aeh! Wat hebben wi'j mit jow te maeken, Jezus van Nazaret? Bin ie kommen om oons op te rumen? Ik weet wel wie aj' binnen, de heilige van God."
35 Mar Jezus sprak him streng toe en zee: "Zwieg en gao uut him weg!" De duvel smeet de man op de grond en gong uut him weg zonder him zeer te doen.
36 Iederiene ston versteld. Ze besprakken et veurval mit mekeer en zeden: "Wat bin dat veur dingen die hi'j zegt? Hoe komt et dat hi'j et gezag en de macht het om onreine geesten zien bevelen te geven zodat zi'j uut de meensken wegtrekken?"
37 Et ni'js over him verspreidde him rondomme in de streek.
38 Nao et verlaoten van de synagoge gong hi'j naor et huus van Simon. Simon zien schoonmoeke had hoge koorse, en ze vreugen Jezus om heur te helpen.
39 Hi'j beug him over heur henne en sprak de koorse bestraffend toe. De koorse gong vot, en votdaolik kwam ze in de bienen en begon veur heur te zorgen.
40 Doe de zunne ondergaon was, brochten de meensken al heur zieken naor him toe, an wat kwaole ze ok leden. Hi'j legde heur iene veur iene de haand op en geneesde heur.
41 Hi'j dreef ok een protte duvels uut, die raosden: "Ie bin de Zeune van God!" Hi'j sprak heur bestraffend toe en verbeud heur om nog wat te zeggen; ze wussen ommes dat hi'j de messias was.
42 Tegen et morgenlochten vertrok hi'j en gong naor een ienzem plakkien. De meensken zochten him, en doe zi'j him vunnen hadden perbeerden ze him d'r van te weerholen om bi'j heur weg te gaon.
43 Mar hi'j zee tegen heur: "Ok in de aandere steden moet ik et goeie ni'js over et keuninkriek van God brengen, want daorveur bin ik hier henne kommen."
44 En hi'j maekte dat goeie ni'js bekend in de synagogen van Judea.




Lucas 05.

Simon Petrus, Jakobus en Johannes wodden reupen.

01 Doe hi'j es an de kaante van et meer van Gennesaret ston en et volk heur om him henne verdrong om naor et woord van God te luusteren,
02 zag hi'j twie boten an de wal liggen; de viskers weren d'r uut stapt, ze weren doende de netten te spulen.
03 Hi'j stapte in iene van de boten, die van Simon was, en vreug him een aentien van et laand of te veren; hi'j gong zitten en gaf de mennigte les vanuut de boot.
04 Doe hi'j ophullen was mit praoten, zee hi'j tegen Simon: "Veer naor diep waeter en gooi jim netten uut om vis te vangen."
05 Simon zee doe: "Meester, de hiele naacht hewwe in de weer west en hewwe niks vongen. Mar as jow et zeggen, za'k de netten uutzetten."
06 En doe ze dat daon hadden, zwom d'r zoe'n enorme schoele vissen in de netten dat de netten haost scheurden.
07 Ze gebaorden naor de manluden in de ere boot dat die kommen mossen om heur helpen; naodat die mannen bi'j heur kommen weren, vulden ze de beide boten mit zo veul vis dat ze haost zonken.
08 Doe Simon Petrus dat zag, vul hi'j op zien kni'jen veur Jezus daele en zee: "Gao bi'j mi'j weg, Heer, want ik bin een zundig meenske."
09 Hi'j was veraldereerd, krek as iederiene die bi'j him was, over de enorme zooi vis die ze vongen hadden;
10 zo gong et Jakobus en Johannes ok, de zeunen van Zebedeüs, die mit Simon saemenwarkten. Jezus zee tegen Simon: "Wees niet bange, van now of an zuj' meensken vangen."
11 En naodat ze de boten an laand brocht hadden, leuten ze alles aachter en gongen mit him mit.

Genezing van een huudziekte.

12 In iene van de steden waor hi'j kwam, ston d'r opiens een man veur him, die deur een huudziekte tekend was. Doe hi'j Jezus zag, leut hi'j him laankuut op de grond valen en smeekte him om hulpe mit de woorden: "Heer, as jow willen, kun jow mi'j schone maeken."
13 Jezus stak zien haand uut, raekte him an en zee: "Ik wil et, wor schone!" En vot-en-daolik verdween zien huudziekte.
14 Hi'j beval him d'r mit gieniene over te praoten, mar zee: "Laot je an de priester zien en breng een offer veur je reiniging, zoas Mozes veurschreven het, as getugenis veur de meensken."
15 Mar et ni'js over him verspreidde him krek wieder, en grote meenskenmassa's gadderden heur, om naor him te luusteren en heur van heur ziekten genezen te laoten.
16 Hi'jzels trok him geregeld weeromme op ienzeme plakken om daor dan te bidden.

Genezing en vergeving van zunden.

17 Doe hi'j op een dag les gaf, weren d’r onder zien geheur ok Farizeeën en wetgeleerden die uut verschillende plakken in Galilea en Judea en uut Jeruzalem kommen weren. De kracht van de Heer was warkzem in him, zodat hi'j zieken genezen kon.
18 D'r kwammen een peer manluden mit een lamme op een dreegbedde, die ze naor binnen brengen wollen om him veur Jezus daele te leggen.
19 Mar zi'j zaggen gien kaans om deur de mennigte henne te kommen, en dus gongen zi'j et dak op en leuten him op et bedde deur een eupening in et tegeldak naor beneden zakken tot vlak veur Jezus.
20 Doe hi'j heur geleuf zag, zee hi'j tegen him: "Je zunden bin je vergeven."
21 De schriftgeleerden en de Farizeeën begonnen heur of te vraogen: Wie is die man dat hi'j disse godslasterlike tael zegt? Wie aanders as God allienig kan zunden vergeven?
22 Mar Jezus begreep wat ze dochten en zee tegen heur: "Waorom toch al die bedaenkings?
23 Wat is makkeliker om te zeggen: "Je zunden bin je vergeven" of: "Kom overaende en loop"?
24 Ik zal jim zien laoten dat de Meensken-zeune volmacht het om op eerde zunden te vergeven." En hi'j zee tegen de lamme: "Ik zegge je, kom in de bienen, pak je bedde op en gao naor huus."
25 En vot-en-daolik ston hi'j veur de ogen van alle anwezigen op, pakte et bedde op waorop hi'j de hieltied legen hadde en gong naor huus, wiels hi'j God loofde.
26 Iederiene ston versteld en ze loofden God, en zeden, hiel eerbiedig: "Vandaege hewwe wat ongeleufliks zien!"

Jezus bi'j Levi.

27 Doe gong hi'j naor buten en zag hi'j bi'j et tolhuus een tollener zitten die Levi hiette. Hi'j zee tegen him: "Kom mit mi'j!"
28 Levi ston op, leut alles aachter en gong mit him mit.
29 Hi'j richtte in zien huus een groot feest veur him an, waorop een groot tal tolleners en aanderen tegere mit Jezus anwezig weren.
30 De Farizeeën en heur schriftgeleerden zeden nokkig tegen zien leerlingen: "Waorom eten en drinken jim mit tolleners en zundige meensken?"
31 Mar Jezus zee doe: "Gezonde meensken hebben gien dokter neudig, mar wie ziek is wel;
32 ik bin niet kommen om rechtveerdigen te roepen, mar om zundige meensken an te vieteren om een ni'j leven te beginnen."
33 Ze zeden tegen him: "De leerlingen van Johannes vaasten vaeke en zeggen heur gebeden, krek as de leerlingen van de Farizeeën doen, mar die van jow eten en drinken mar."
34 Jezus zee: "Jim kun toch niet verlangen dat de brulloftsgaasten vaasten zolange de bruidegom bi'j heur is?
35 Mar d'r komt een dag dat de bruidegom bi'j heur weghaeld wodt, en dan is et heur tied om te vaasten."
36 Hi'j vertelde heur ok een vergeliek: "Gieniene scheurt een lappe van een ni'je maantel om daormit een oolde maantel te verstellen, want dan scheurt hi'j de ni'je, wiels de lappe niet bi'j de oolde past.
37 En gieniene giet jonge wien in oolde leren zakken, want dan scheuren de zakken deur de jonge wien en wodt de wien verknoeid, wiels de zakken ok verleuren gaon.
38 Jonge wien moet in ni'je zakken daon wodden.
39 Mar gieniene die oolde wien dronken het, wil jonge; hi'j zegt ommes: "De oolde wien is goed!"




Lucas 06.

Jezus en de sabbat.

01 Doe Jezus op sabbat es deur de korenvelden leup, begonnen zien leerlingen aoren te plokken. Ze wreven die stokkend tussen heur hanen en atten d'r van.
02 Inkelde Farizeeën zeden doe: "Waorom doen jim wat, dat op de sabbat niet mag?"
03 Jezus zee doe: "Hebben jim dan niet lezen wat David dee doe hi'j en zien mitgezellen honger hadden,
04 hoe hi'j et huus van God binnen gong, de toonbroden nam, d'r van at en ze verpatte an zien manluden, ok al meugen allienig de priesters van die broden eten?"
05 En hi'j zee d’r nog bi’j: "De Meenske-zeune is heer en meester over de sabbat."
06 Op een aandere sabbat gong hi'j naor de synagoge, waor hi'j les gaf. Daor was ok iene mit een verschrompelde rechterhaand.
07 De schriftgeleerden en de Farizeeën letten op him om te kieken of hi'j op de sabbat iene genezen zol, want dan zollen ze him op grond daorvan anklaegen kunnen.
08 Mar hi'j wus wat ze van doel weren en zee tegen de man mit de verschrompelde haand: "Kom overaende en gao in et midden staon." Dat dee de man.
09 Jezus zee tegen de Farizeeën en schriftgeleerden: "Ik vraog jim aj'm op sabbat goed doen meugen of kwaod, aj'm een leven redden meugen of verleuren gaon laoten moeten."
10 Naodat hi'j heur iene veur iene ankeken hadde, zee hi'j tegen de man: "Stik je haand es uut." Dat dee de man en d'r kwam weer leven in zien haand.
11 De schriftgeleerden en Farizeeën raekten zuver buten zinnen en begonnen onderling te overleggen wat ze mit Jezus doen zollen.

Anstelling van de twaelf apostels.

12 Op iene van die daegen trok Jezus him weeromme op de barg om te bidden. De hiele naacht bleef hi'j tot God bidden.
13 Tegen et morgenlochten, reup hi'j de leerlingen bi'j him en keus twaelf van heur uut, die hi'j apostels nuumde:
14 Simon, die hi'j de naeme Petrus gaf, zien breur Andreas, Jakobus en Johannes, Filippus en Bartolomeüs,
15 Matteüs en Tomas, Jakobus, de zeune van Alfeüs, en Simon, die de Ieverer nuumd wodt,
16 Judas, de zeune van Jakobus, en Judas Iskariot, die laeter een verraoder wodde.

Lesgeven an de leerlingen.

17 Doe hi'j mit heur de barg ofgaon was, bleef hi'j staon op een plak waor et vlak was. Daor had een groot tal van zien leerlingen heur verzaemeld, krek as een mennigte meensken uut hiel Judea en Jeruzalem en uut de kuststreken van Tyrus en Sidon.
18 Zi'j weren kommen om naor him te luusteren en heur van heur ziekten genezen te laoten; ok degenen die kweld wodden deur onreine geesten wodden genezen,
19 en de hiele mennigte perbeerde him an te raeken, want d'r gong een kracht van him uut die iederiene geneesde.
20 Hi'j keek strak naor zien leerlingen en zee: "Gelokkig jim die aarm binnen, want van jim is et keuninkriek van God.
21 Gelokkig jim die honger hebben, want jim zal eten geven wodden. Gelokkig wie now goelt, want die zullen lachen.
22 Gelokkig jim as de meensken an jim een hekel hebben omwille van de Meenske-zeune en butensluten en beschimpen en je naeme deur et sliek haelen.
23 Wees mar bliede as die dag komt, want jim zullen riekelik beloond wodden in de hemel. Vergeet niet dat heur veuroolden de profeten op dezelde wieze behaandeld hebben.
24 Mar wee jim die riek binnen, jim hebben jim pat al had.
25 Wee jim die now zat binnen, want jim zullen verhongeren. Wee jim die now lachen, want jim zullen treuren en goelen.
26 Wee jim as alle meensken lovend over jim praoten, want heur veuroolden hebben de valse profeten op dezelde wieze behaandeld.
27 Tot jim, die naor mi'j luusteren zeg ik: heb je vi'janen lief, wees goed veur die waor aj’m een hekel an hebben,
28 zegen wie jim vervluken, bid veur wie jim min behaandelen.
29 As iene je een klap op je wange geft, biede him dan ok de ere wange an, en weiger iene die je je boverklied ofnemt niet om ok je onderkleed of te nemen.
30 Geef an elk die wat van je vraogt, en eis je bezit niet weeromme as iene et je ofnemt.
31 Behaandel aanderen zoaj' willen dat ze jow behaandelen.
32 Is et een verdienste aj’ van iene holen die van jow hoolt? Want ok de zundige meensken holen van degenen die van heur holen.
33 En is et een verdienste aj’ weldaoden bewiezen an meensken die weldaoden bewiezen an jim? Ok de zundige meensken haandelen zo.
34 En is et een verdienste aj’ geld lienen an meensken van wie jim wat weeromme verwaachten? Ok zundige meensken lienen geld an zundige meensken in de verwaachting alles weeromme te kriegen.
35 Nee, hebbe je vi'janen lief, doe goed en lien geld an ere meensken zonder wat weeromme te verwaachten; dan zuj'm riekelik beloond wodden, en zuj'm kiender van de Allerhoogste wezen, want hi'j is ok goed veur degene die ondaankber en kwaodwillig binnen.
36 Wees barmhattig zoas jim Heit barmhattig is.
37 Oordiel niet, dan zal d'r niet over jow oordield wodden. Veroordiel niet, dan zuj’ niet veroordield wodden. Vergeef, dan zal je vergeven wodden.
38 Geef, dan zal je geven wodden; een goeie, stevig androkte, goed schudde en overvolle maote zal je toebedield wodden. Want de maote die ie veur aanderen bruken, zal ok veur jow bruukt wodden."
39 Hi'j praotte ok in geliekenissen tegen heur: "Kan de iene bliende de aandere bliende leiden? Valen zi'j dan niet beiden in een koele?
40 Een leerling staot niet boven zien leermeester; pas as iene him alles eigen maekt het, zal hi'j de geliekese wezen van zien leermeester.
41 Waorom kiek ie naor et fiekseltien in et oge van je breur of zuster, wiels ie de balke in je eigen oge niet opmarken?
42 Hoe kuj' tegen heur zeggen: "Laot mi'j et fiekseltien uut je oge haelen," wiels ie de balke in je eigen oge niet zien? Huichelaar, hael eerst de balke uut je eigen oge weg, pas dan zuj' scharp genoeg zien om et fieksel uut et oge van je breur of zuster weg te haelen.
43 Een goeie boom brengt gien slechte vruchten, en liekemin brengt een slechte boom goeie vruchten.
44 Elke boom kuj' an zien vruchten kennen, want van distels plok ie gien viegen en van stiekels gien droeven.
45 Een goed meenske brengt uut de goeie schatkaemer van zien hatte et goeie, mar een slecht meenske brengt uut zien slechte schatkaemer et kwaoie; want waor et hatte vol van is daor lopt de mond van over.
46 Waorom roepen jim "Heer, Heer" tegen mi'j, mar doej’m niet wa’k zegge?
47 Ik zal jim vertellen op wie degene liekt die bi'j me komt, naor mien woorden luustert en d'r naor haandelt:
48 hi'j liekt op iene die bi'j et bouwen van zien huus een diep gat greuf en et follement op rotsgrond legde. Doe d'r een overstroming kwam, batste et waeter tegen et huus, mar et vul niet inmekeer omreden et degelik bouwd was.
49 Wie wel naor mien woorden luustert mar niet dot wat ik zeg, liekt op iene die een huus bouwde zonder follement, zodat et drekt inmekeer vul doe et waeter d'r tegen an batste en d'r allienig een bouwval overbleef."




Lucas 07.

Genezing en dodenopwekking.

01 Doe Jezus an et aende kommen was van zien toespraoke veur de mennigte gong hi'j Kafarnaüm in.
02 Een centurio die daor woonde had een slaaf die eernstig ziek was en op starven lag; de centurio was slim op disse slaaf steld.
03 Doe hi'j over Jezus heurde, stuurde hi'j een peer Joodse leiders naor him toe om him te vraogen bi'j him te kommen en zien slaaf van de dood te redden.
04 Doe ze bi'j Jezus kommen weren, drongen zi'j d'r bi'j him op an om mit te gaon. Zi'j zeden: "De man die jow dit vraogt, verdient et dat jow him disse geunst bewiezen.
05 Want hi'j is oons volk goedzind en het veur oons de synagoge bouwen laoten."
06 Jezus gong tegere mit heur onderwegens. Hi'j was al niet veer meer van et huus of, doe de centurio een peer vrunden naor him toe stuurde mit et bescheid: "Heer, speer jow de muuite, want ik bin et niet weerd dat jow onder mien daoke kommen.
07 Daorom achtte ik mi'j ok niet weerdig om zels naor jow toe te gaon. Mar jow hoeven mar ien woord te zeggen en mien knecht zal genezen wezen.
08 Ik bin ok mar iene die onder aandermaans gezag staot en zels weer soldaoten onder him het, en as ik tegen een soldaot zegge: "Gao!" dan gaot hi'j, en tegen een aandere: "Komme!" dan komt hi'j, en as ik tegen mien slaaf zegge: "Doe dit!" dan dot hi'j et."
09 Doe Jezus dit heurde, verbaosde hi'j ‘m over him; hi'j keerde him om naor de mennigte die him volgde en zee: "Ik zegge jim, alderdeegst in Israël hebbe ik niet zoe'n groot geleuf vunnen!"
10 Doe de vrunden van de centurio weeromme gongen naor zien huus, troffen zi'j daor de slaaf in goeie gezondhied an.
11 Een posien laeter gong Jezus naor een stad die Naïn hiet, en zien leerlingen en een grote mennigte gongen mit him mit.
12 Doe hi'j al dichte bi’j de poort van de stad kommen was, wodde d'r krek een overleden meenske naor buten dreugen, de ienige zeune van een wedevrouw. Een groot tal meensken vergezelde heur.
13 Doe de Heer heur zag, wodde hi'j deur medelieden beweugen en zee tegen heur: "Weeklaeg niet meer."
14 Hi'j kwam dichterbi'j, raekte de liekbaar an - de dregers bleven stillestaon - en zee: "Jongeman, ik zegge je: kom overaende!"
15 De overledene kwam overaende en begon te praoten, en Jezus gaf him weeromme an zien moeke.
16 Iederiene wodde vervuld van ontzag en loofde God mit de woorden: "Een groot profeet is onder oons opstaon," en: "God het him om zien volk bekommerd!"
17 Et ni'js over him verspreidde heur in hiel Judea en in de wiede omtrek.

Jezus en Johannes.

18 Johannes kreeg van zien leerlingen bericht over al disse gebeurtenissen. Hi'j reup twie van zien leerlingen bi'j him
19 en stuurde heur naor de Heer, an wie ze vraogen mossen: "Bin jow degene die kommen zol of moe'we nog een aander verwaachten?"
20 Doe de manluden bi'j him kommen weren, zeden ze: "Johannes de Doper het oons naor jow toe stuurd om jow te vraogen: "Bin jow degene die kommen zol of moe'we nog een aander verwaachten?""
21 Hi'j genas doe krek een protte meensken van ziekten en verschillende andoenings en van kwaoie geesten en hi'j gaf tal van blienen et zicht weeromme.
22 Hi'j zee doe: "Zeg mar tegen Johannes wat jim zien en heurd hebben: blienen kun weer kieken, lammen weer lopen, meensken mit huudziekte wodden schone maekt en doven kunnen weer heuren, dooien wodden opwekt, an aarme meensken wodt et goeie ni'js bekendmaekt.
23 Gelokkig is degene die an mi'j gien anstot nemt."
24 Doe de afgezanten van Johannes vertrokken weren, zee hi'j tegen de mennigte over Johannes: "Waor hebben jim in de woestijn naor keken? Naor et wuiven van et riet in de wiend?
25 Wat hebben jim dan zien? Een meenske die mooie kleren an had? Welnee, want wie mooie kleren dreegt en in weelde leeft, woont in een peleis.
26 Wat hebben jim dan wel zien? Een profeet? Jaowis, zeg ik jim, en alderdeegst meer as iene profeet.
27 Hi'j is degene over wie schreven staot: "Let op, ik stuur mien bode veur je uut, hi'j zal een weg veur je baenemaeken."
28 Ik zegge jim: van iederiene die geboren is uut een vrouw is gieniene groter as Johannes, mar in et keuninkriek van God is de kleinste nog groter as hi'j."
29 Alle meensken die dit heurden, de tolleners ok, brochten hulde an God en zien gerechtighied: zi'j hadden heur ommes deur Johannes deupen laoten.
30 Mar de Farizeeën en wetgeleerden verwurpen et plan van God: zi'j hadden heur ommes niet deur him deupen laoten.
31 "Waormit za’k dan de meensken van disse generaosie vergelieken, waor lieken zi'j op?
32 Zi'j lieken op kiender die op et markplein zitten en mekeer toeroepen: "Doe we veur jim op de fluite speulden, wollen jim niet daansen, doe we een klaegzang zongen, wollen jim niet treuren."
33 Want Johannes de Doper is kommen, hi'j eet gien bolle en drinkt gien wien, en jim zeggen: "Hi'j is deur een duvel bezeten."
34 De Meenske-zeune is kommen, hi'j eet en drinkt wel, en jim zeggen: "Kiek, wat een vreetzak, wat een zoeper, die vrund van tolleners en zundige meensken."
35 En toch is de Wieshied deur al heur kiender in et geliek steld."

De liefde van een zundige vrouw.

36 Iene van de Farizeeën neudigde him uut veur et eten, en doe hi'j et huus van de Farizeeër binnen gaon was, gong hi'j an taofel anliggen.
37 Een vrouw die in de stad bekendstond as een zundige vrouw had heurd dat hi'j bi'j de Farizeeër thuus eten zol, en ze gong naor et huus mit een albasten flessien mit lekker roekende eulie.
38 Ze gong aachter Jezus staon, an et voetenaende van et anligbedde; ze goelde en zien voeten wodden nat deur heur traonen. Ze dreugde zien voeten mit heur haor, gaf d'r een tuut op en wreef ze in mit de lekkere eulie.
39 Doe de Farizeeër die him uutneudigd had dit zag, zee hi'j bi'j himzels: As hi'j een profeet was, zol hi'j weten wie de vrouw is die him anraekt en dat ze een zundige vrouw is.
40 Mar Jezus zee tegen him: "Simon, ik hebbe je wat te zeggen." "Meester, zeg et mar!" zee hi'j.
41 "D'r was es een geldschieter die twie schuldeners had: de iene was him vuufhonderd denarie schuldig, de aander vuuftig.
42 Omreden zi'j et geld niet weeromme betaelen konnen, schul hi'j heur beiden heur schuld kwiet. Wie van de twie zal him de meerste liefde tonen?"
43 Simon zee doe: "Ik veronderstelle, degene an wie hi'j et grootste bedrag kwietschullen het." Hi'j zee tegen him: "Dat is juust oordield."
44 Doe dri'jde hi'j him omme naor de vrouw en vreug an Simon: "Ziej' disse vrouw? Ik bin in jow huus te gaaste, en ie hebben mi'j gien waeter veur mien voeten geven; mar zi'j het mit heur traonen mien voeten nat maekt en ze mit heur haor ofdruugd.
45 Ie hebben mi'j niet begroet mit een tuut; mar zi'j het, sund ik hier binnenkwam, onophooldelik mien voeten kust.
46 Ie hebben mien heufd niet mit eulie inwreven; mar zi'j het mit lekker roekende eulie mien voeten inwreven.
47 Daorom zeg ik je: heur zunden bin heur vergeven, al weren et ok hiel vule, want zi'j het een protte liefde toond; mar wie weinig vergeven wodt, betoont ok weinig liefde."
48 Doe zee hi'j tegen heur: "Je zunden bin je vergeven."
49 Zien taofelgenoten dochten bi'j heurzels: Wie is hi'j, dat hi'j alderdeegst zunden vergeft?
50 Hi'j zee tegen de vrouw: "Je geleuf het je redded; gao in vrede."




Lucas 08.

Verkondiging van et keuninkriek van God.

01 Even laeter begon hi'j rond te trekken van stad tot stad en van dörp tot dörp om et goeie ni'js over et keuninkriek van God bekend te maeken. De twaelf gongen mit him mit,
02 en ok een peer vrouwluden die van kwaoie geesten en ziekten genezen weren: Maria uut Magdala, bi'j wie zeuven duvels uutdreven weren,
03 Johanna, de vrouw van Chusas, de rentmeester van Herodes, en Susanna – en nog tal van aanderen, die uut heur eigen middels veur heur zorgden.
04 Doe d'r vanuut de steden meensken naor him toe kommen weren en d'r weer een grote mennigte gadderd was, vertelde hi'j dit vergeliek:
05 "Iene gong es naor zien laand om te zi'jen. Wiels hi'j daormit doende was, vul d'r wat zaod op ‘e weg. Et wodde vertrapt en deur de voegels oppikt.
06 D'r vul ok wat zaod op rotsachtige bojem, mar doe et boven de grond kwam, dreugde et uut deur gebrek an waeter.
07 Aander zaod vul tussen de stiekels, en doe de stiekels gruuiden verstikten zi'j et zaod.
08 Mar d'r vul ok wat zaod in vruchtbere eerde, en dat brocht honderdvooldig vrucht doe et vol tot bluui kwam." Hi'j zee d'r ok nog mit een lude stem bi'j: "Wie oren het om te heuren, moet goed luusteren."
09 Zien leerlingen vreugen him wat dit vergeliek betekende.
10 Hi'j zee doe: "Jim meugen de geheimen van et keuninkriek van God kennen, mar de aanderen kriegen alles in vergeliekings te heuren, zodat zi'j kieken zonder inzicht en heuren zonder wat te begriepen.
11 Dit is de betekenisse van et vergeliek: Et zaod is et woord van God.
12 Et zaod op de weg, dat bin de meensken die luusterd hebben, mar daornao komt de duvel en graait et woord weg uut heur hatte, om et veur te wezen dat zi'j redded wodden deur te geleuven.
13 Et zaod op de rotsachtige bojem, dat bin de meensken die et woord in bliedschop annemen as ze et heuren, mar et schiet gien wottel; zi'j geleuven zolange et heur goed uutkomt, mar as ze op de proef steld wodden, wodden ze ofvallig.
14 Et zaod dat tussen de stiekels vaalt, dat bin de meensken die wel luusterd hebben, mar deur zorgen en riekdom en de geneugten van et leven wodden ze gaondeweg verstikt, zodat ze gien vrucht dregen.
15 Et zaod in de vruchtbere grond, dat bin de meensken die mit een goed en eerlik hatte naor et woord luusterd hebben, et koesteren en deur staandvaastighied vrucht dregen.
16 Wie een laampe ansteuken het, dooft him niet drekt weer deur him te bedekken en zet him ok niet onder een bedde daele, nee, hi'j zet him op een standerd, zodat iederiene die binnenkomt et locht zicht.
17 Want niks dat verburgen is blift geheim; alles wat verburgen is zal bekend wodden en an et locht kommen.
18 Let dus goed op hoe jim luusteren: want wie wat het zal nog meer kriegen; mar wie niks het, him zal alderdeegst wat hi'j daenkt te hebben nog ontneumen wodden."
19 Zien moeke en zien breurs kwammen naor him toe, mar zi'j konnen niet bi'j him kommen vanwegens de mennigte.
20 De meensken die naor him luusterden zeden tegen him: "Jow moeke en jow breurs staon buten, zi'j willen mit jow praoten."
21 Mar hi'j zee doe: "Mien moeke en mien breurs bin degenen die naor et woord van God luusteren en d'r naor haandelen."

Naor de ginne kaante van et meer.

22 Op iene van die daegen stapte hi'j in een boot, tegere mit zien leerlingen, en zee tegen heur: "Lao'we naor de ginne kaante van et meer gaon," en ze veerden et meer op.
23 Onderwegens vul hi'j in slaop. D'r kwam een warvelstorm opzetten, zodat de boot aorig waeter maekte en haost driegde te zinken.
24 Zi'j maekten him wakker en reupen: "Meester, Meester, we vergaon haost!" Hi'j kwam overaende en zee bestraffende woorden tegen de wiend en de golven. Doe gong de wiend liggen en kwam et waeter tot rust.
25 Hi'j vreug heur: "Waor is jim geleuf?" De leerlingen weren schrokken en zeden vol veralteraosie tegen mekeer: "Wie is hi'j toch, dat alderdeegst de wiend en et waeter an zien bevelen geheur geven?"
26 Zi'j veerden wieder naor et gebied van de Gerasenen, dat tegenover Galilea ligt.
27 Doe hi'j an laand stapte, kwam him uut de stad een man integen die deur duvels bezeten was. Disse man dreug al hiel lange gien kleren meer en woonde niet in een huus, mar in de rotsgreven.
28 Doe hi'j Jezus zag, vul hi'j raozend veur him daele en reup luud: "Wat heb ik mit jow te maeken, Jezus, Zeune van de allerhoogste God? Ik smeek je, doe mi'j gien zeer!"
29 Jezus ston naemelik op et punt om de onreine geest te bevelen om uut de man weg te gaon. Want die had him al hiel lang in zien macht, en gewoonlik wodde de man veur de veilighied an hanen en voeten bunnen, mar iederkeer trok hi'j de boeien stokkend en wodde hi'j deur de duvel naor ienzeme plakken dreven.
30 Jezus vreug him: "Hoe hiet ie?" Hi'j zee doe: "Legioen" – want d'r woonden een protte duvels in him.
31 Zi'j smeekten him om heur niet te bevelen naor de onderwereld te gaon.
32 Op de barghelling leup op dat stuit een grote kudde varkens te weiden, en de duvels smeekten Jezus om heur toe te staon heur intrek in de varkens te nemen. Hi'j ston heur dat toe.
33 Doe ze uut de man votgaon weren, trokken ze in de varkens, waorop de kudde de steile helling afstormde, et meer in, en verdronk.
34 Doe de varkenshuders dat zaggen, sleugen zi'j op de vlocht en vertelden in de stad en in de dörpen wat d'r gebeurd was.
35 Een protte meensken gongen d’r henne om mit eigen ogen te zien wat d'r gebeurd was. Doe ze bi'j Jezus kwammen, troffen ze daor de man an uut wie de duvels weggaon weren. Hi'j zat an Jezus zien voeten, in de kleren en bi'j zien volle verstaand, en doe ze dat zaggen, wodden ze van de weerommestuit bevangen.
36 Degenen die alles zien hadden, vertelden heur hoe de bezetene redded was.
37 En de hiele menigte meensken uut et gebied van de Gerasenen vreug him om uut heur gebied weg te gaon, want aangst en ontzetting hadden heur angrepen. Jezus stapte in de boot om weeromme te gaon.
38 De man bi'j wie de duvels uutdreven weren, vreug him mit aandrang bi'j him blieven te meugen. Mar hi'j stuurde him vot mit de woorden:
39 "Gao weeromme naor je huus en vertel alles wat God veur jow daon het." Hi'j gong vot en maekte rondomme in de stad bekend wat Jezus veur him daon hadde.

Genezing en dodenopwekking.

40 Doe Jezus weeromme kwam, wodde hi'j deur de mennigte opwaacht; iederiene ston naor him uut te kieken.
41 D'r was ok een man bi'j die Jaïrus hiette, een leider van een synagoge. Hi'j kwam op Jezus toe, vul an zien voeten daele en smeekte him om mit te gaon naor zien huus,
42 want hi'j had een dochter van omdebi'j twaelf jaor oold, die op starven lag; zi'j was zien ienige kiend. Doe Jezus daor henne gong, begonnen de meensken van alle kaanten te drokken.
43 Een vrouw die al twaelf jaor an bloedverlies leed – en deur gieniene genezen wodden kon, al had zi'j heur hiele kaptaol an dokters uutgeven –
44 kwam van aachteren bi'j him en raekte de zeume van zien boverklied an; op dat stuit hul et bloeden op.
45 Jezus vreug: "Wie het mi'j anraekt?" Iederiene ontkende et anraeken en Petrus zee: "Meester, de meensken om jow henne staon te drokken en te dringen!"
46 Mar Jezus zee: "Iene het mi'j anraekt, want ik hebbe kracht uut mi'j wegstromen vuuld."
47 Doe et de vrouw dudelik wodde dat heur anraeking niet onopmarkt bleven was, kwam ze trillend naor veuren, vul veur him daele en legde tegenover de hiele mennigte uut waoromme zi'j him anraekt hadde en hoe ze drekt genezen was.
48 Hi'j zee tegen heur: "Je geleuf het je redded; gao in vrede."
49 Nog veur hi'j uutpraot was, kwam d'r iene uut et huus van Jaïrus tegen de leider van de synagoge zeggen: "Jow dochter is overleden. Vaal de meester mar niet langer lastig."
50 Mar Jezus heurde et en zee: "Wees niet bange, mar geleuve, dan zal zi'j redded wodden."
51 Doe hi'j bi'j et huus kwam, leut hi'j gieniene toe om mit him naor binnen te gaon behalven Petrus, Johannes en Jakobus, en de heit en de moeke van et maegien.
52 Alle meensken daor, weren an et weeklaegen en sleugen heur van verdriet op de bost. Hi'j zee: "Hool op mit krimmeneren, want zi'j is niet overleden mar ze slaopt."
53 Ze lachten him uut, omreden ze wussen dat ze wel overleden was.
54 Hi'j nam heur haand beet en zee mit lude stemme: "Maegien, kom overaende!"
55 Heur levensaosem keerde weeromme en ze kwam drekt in de bienen. Hi'j gaf opdracht om heur wat te eten te geven.
56 Heur oolden weren veraldereerd; hi'j zee tegen heur om et veurval tegen gieniene te zeggen.




Lucas 09.

De uutzending van de twaelf.

01 Hi'j reup de twaelf bi'j him en gaf heur macht en gezag over alle duvels, en de kracht om ziekten te genezen.
02 Doe stuurde hi'j heur vot om et keuninkriek van God bekend te maeken en zieken te genezen.
03 Hi'j zee tegen heur: "Neme niks mit veur onderwegens, gien stok, gien reistasse, gien bolle en gien geld, en ok gien extra kleren.
04 Blieve in et huus waor aj' onderdak vunnen hebben tot daj' van daor weer wiedergaon.
05 As zi'j jim niet ontvangen willen, schudde dan et stof van je voeten te teken daj' niks meer mit heur te maeken hebben willen."
06 Zi'j gongen vot en trokken van et iene plak naor de aandere, wiels zi'j et goeie ni'js verkondigden en rondomme zieken genazzen.
07 Herodes, de tetrarch, heurde wat d'r allemaole gebeurde en raekte in grote alteraosie omreden goenend zeden dat Johannes uut de dood opstaon was,
08 wiels aanderen beweerden dat Elia verschenen was, en weer aanderen dat iene van de oolde profeten opstaon was.
09 Herodes zee: "Johannes he'k de kop d'r of slaon laoten; wie is dan degene over wie ik disse dingen now heure?" Hi'j zocht naor een gelegenhied om es mit him te praoten.
10 Doe de apostels weeromme kwammen, vertelden ze Jezus alles wat zi'j daon hadden. Hi'j trok him mit heur weeromme in een stad die Betsaïda hiet.
11 Mar de meensken kwammen et te weten en kwammen aachter him an. Hi'j ontvong heur vrundelik en praotte mit heur over et keuninkriek van God, en degenen die genezing vanneuden hadden maekte hi'j weer gezond.
12 In et twielochten kwammen de twaelf bi’j him en zeden: "Stuur de meensken vot, dan kun ze naor de dörpen en gehuchten in disse kontreinen gaon om daor te overnaachten en op zuuk te gaon naor eten, want dit is een ofgelegen oord."
13 Mar hi'j zee tegen heur: "Geven jim heur mar te eten." Zi'j zeden: "We hebben mar vuuf broden en twie vissen. Moe'we dan eten kopen veur al die meensken?"
14 D'r weren omdebi'j vuufduzend meensken bi'jmekeer. Jezus zee tegen zien leerlingen: "Zeg dat ze in koppels van omdebi'j vuuftig meensken bi'j mekeer zitten gaon moeten."
15 Zi'j deden wat Jezus heur zee en leuten iederiene in koppels bi'j mekeer zitten.
16 Jezus nam de vuuf broden en de twie vissen, keek omhogens naor de hemel en zee een zegengebed. Doe brak hi'j et brood en gaf et mit de vissen an zien leerlingen om an de mennigte te verpatten.
17 De meensken atten en iederiene wodde meer as zat; de stokken bolle die overbleven wodden ophaeld, dat twaelf maanden vol.

Lesgeven an de leerlingen.

18 Doe Jezus es an et bidden was en allienig de leerlingen bi'j him weren, stelde hi'j heur de vraoge: "Wie zeggen de meensken dat ik bin?"
19 Zi'j zeden doe: "Johannes de Doper, mar aanderen zeggen Elia, en weer aanderen beweren dat iene van de oolde profeten opstaon is."
20 Hi'j zee tegen heur: "En wie bin ik neffens jim?" Petrus zee doe: "De deur God stuurde messias."
21 Hi'j beval heur op strenge toon om dat tegen gieniene te zeggen.
22 Hi'j zee: "De Meenske-zeune zal slim lieden moeten en deur de ooldsten, de hogepriesters en de schriftgeleerden verwurpen wodden en ommebrocht wodden, mar op de dadde dag zal hi'j uut de dood opwekt wodden."
23 Tegen iederiene zee hi'j: "Wie aachter mi'j an kommen wil, moet himzels miskennen en daegeliks zien kruus op him nemen en aachter mi’j an kommen.
24 Want iederiene die zien leven beholen wil, zal et verliezen; mar wie zien leven verlöst omwille van mi'j, zal et beholen.
25 Wat het een meenske d'r an as hi'j de hiele wereld wint, mar himzels verlöst of schaede toebrengt?
26 Wie him schaemt veur mi'j en mien woorden, zal marken dat de Meenske-zeune him ok veur him schaemt, as hi'j komt in de straolende luuster die himzels, de Heit en de heilige engels omgeft.
27 Ik verzeker jim dat goenend van jim die hier now binnen niet dood gaon zullen veur zi'j et keuninkriek van God zien hebben."
28 Omdebi'j acht daegen naodat hi'j dit zegd had gong hi'j mit Petrus, Johannes en Jakobus de barg op om te bidden.
29 Wiels hi'j an et bidden was, veraanderde de anblik van zien gezichte en wodden zien kleren straolend wit.
30 Opiens stonnen d'r twie manluden mit him te praoten: et weren Mozes en Elia,
31 die in hemelse luuster verschenen weren. Zi'j praoten over et levensaende dat hi'j in Jeruzalem volbrengen zol.
32 Petrus en de beide aanderen weren in een diepe slaop valen; doe ze wakker scheuten, zaggen ze et locht dat Jezus omgaf en de beide manluden die bi'j him stonnen.
33 Doe de manluden heur van him weghaelen wollen, zee Petrus tegen Jezus: "Meester, et is goed dawwe hier binnen, lao'we drie tenten opzetten, iene veur jow, iene veur Mozes en iene veur Elia," mar hi'j wus niet wat hi'j zee.
34 Wiels hi'j nog an et praoten was, kwam d'r een wolke andrieven, die een schaad over heur legde; ze wodden bange doe de wolke om heur henne trok.
35 D'r klonk een stem uut de wolke, die zee: "Dit is mien Zeune, mien uutverkorene, luuster naor him!"
36 Doe de stemme weg was, was Jezus weer allienig. Ze zwegen over et veurval en vertelden in die tied an gieniene wat ze zien hadden.
37 Doe ze de aandere daegs de barg daele gongen, kwam d'r een grote mennigte Jezus integen.
38 Opiens begon een man in de mennigte luud te roepen: "Meester, ik smeek jow, help mien zeune, want hi'j is mien ienig kiend.
39 Iederkeer weer nemt een duvelse geest bezit van him, en dan begint hi'j opiens te raozen en krigt hi'j stoepies en komt et schoem him op de lippen te staon. En de geest wil him pas loslaoten as hi'j him bont en blauw sleugen het.
40 Ik hebbe jow leerlingen smeekt om him uut te drieven, mar dat konnen zi'j niet."
41 Jezus zee: "O, ongeleuvig en dwas volk, hoe lang moet ik bi'j jim blieven en jim nog verdregen? Breng je zeune hier."
42 Wiels de jonge naor him toe leup, gooide de duvelse geest him op de grond en leut him stoeptrekken. Mar Jezus praotte op strenge toon tegen de kwaoie geest, genas de jonge en gaf him weeromme an zien heit.
43 Iederiene was d’r stille van, vanwegens de groothied van God. Wiels iederiene nog onder de indrok was van zien daoden, zee Jezus tegen zien leerlingen:
44 "Onthool wat ik tegen jim zegge: de Meenske-zeune zal an de meensken uutleverd wodden."
45 Mar zi'j begrepen disse uutspraoke niet; de betekenisse bleef veur heur verburgen, en zi'j dusten him niet naor de zin van die uutspraoke te vraogen.
46 Ze begonnen onderling te redetwisten over wie van heur de belangriekste was.
47 Jezus vernam wat heur doende hul en hi'j nam een kiend bi'j him, dat hi'j naost him daele zette.
48 Hi'j zee tegen heur: "Wie dit kiend in mien naeme bi'j him opnemt, nemt mi'j op; en wie mi'j opnemt, nemt him op, die mi'j stuurd het. Want wie de kleinste onder jim iederiene is, die is warkelik groot."
49 Doe zee Johannes: "Meester, we hebben iene zien die in jow naeme duvelse geesten uutdreef en we hebben perbeerd om him dat te beletten, omreden hi'j jow niet saemen mit oons volgt."
50 Jezus zee tegen him: "Verhinder et niet! Want wie niet tegen jim is, is veur jim."

Op weg naor Jeruzalem.

51 Doe de tied dichtebi'j kwam dat Jezus van de eerde wegneumen wodden zol, gong hi'j vastberaoden op weg naor Jeruzalem.
52 Hi'j stuurde boden veur him uut. In een Samaritaans dörp, waor zi'j kwammen om zien komst veur te bereiden,
53 wollen de dorpelingen him niet ontvangen, omreden Jeruzalem et doel van zien reize was.
54 Doe de leerlingen Jakobus en Johannes murken dat Jezus niet welkom was, vreugen zi'j: "Heer, willen jow dat wi'j vuur uut de hemel ofroepen dat heur verteren zal?"
55 Mar hi'j dri'jde him naor heur omme en wees heur streng terechte.
56 Ze gongen veerder naor een aander dörp.
57 Wiels zi'j heur weg vervolgden, zee iene tegen him: "Ik zal jow volgen waor jow ok henne gaon."
58 Jezus zee tegen him: "De vossen hebben hollen en de voegels hebben nusten, mar de Meenske-zeune kan zien heufd nargens te ruste leggen."
59 Tegen een aander zee hi'j: "Volge mi'j!" Mar disse zee: "Heer, stao mi'j toe eerst weeromme te gaon om mien heit te begreven."
60 Jezus zee tegen him: "Laot de dooien heur dooien begreven, mar gao ie op weg om et keuninkriek van God bekend te maeken."
61 Weer een aander zee: "Ik zal jow volgen, Heer, mar stao mi'j toe dat ik eerst ofscheid neme van mien huusgenoten."
62 Jezus zee tegen him: "Wie de haand an de ploeg slaot en aachteromme kieken blift, is niet geschikt veur et keuninkriek van God."




Lucas 10.

Uutzending van de twie-en-zeuventig leerlingen.

01 Daornao stelde de Heer twie-en-zeuventig aanderen an, die hi'j twie an twie veur him uut stuurde naor elke stad en naor elk plak waor hi'j van doel was om henne te gaon.
02 Hi'j zee tegen heur: "De oogst is groot, mar warkvolk is d'r mar weinig; vraog dus de eigener van de oogst of hi'j arbeiders sturen wil om de oogst binnen te haelen.
03 Gao op weg, en bedaenke wel: ik sture jim as laomer naor de wolven.
04 Neem gien geldbuul, gien reistasse en gien sandalen mit, en zeg onderwegens gieniene goeiedag.
05 Aj'm een huus binnengaon, zeg dan eerst: "Vrede veur dit huus!"
06 As d'r een vredelievend meenske woont, zal jim vrede mit him wezen; zo niet, dan zal die vrede bi'j je weeromme kommen.
07 Blief in dat huus, en eet en drink wat ze je geven, want de arbeider is zien loon weerd. Gao niet van et iene huus naor et aandere.
08 En aj'm een stad ingaon en daor welkom binnen, eet dan wat je veurzet wodt,
09 geneze de zieken die d'r binnen en zeg tegen heur: "Et keuninkriek van God het jim is bi’j jim kommen."
10 Mar aj'm een stad ingaon waor aj'm niet welkom binnen, trek dan deur de straoten en zeg:
11 "Alderdeegst et stof van jim stad dat an oonze voeten plakt, vegen we van oons of as anklacht tegen jim; mar bedaenke wel: et keuninkriek van God is dichtebi'j!"
12 Ik zegge jim: et lot van Sodom zal op die dag dreegliker wezen as et lot van die stad.
13 Wee Chorazin, wee Betsaïda, want as in Tyrus en Sidon de wonderen gebeurd weren die bi'j jim gebeurd binnen, zollen de inwoners van die steden heur allange een boeteklied anstruupd hebben en mit stof op et heufd tot inkeer kommen wezen.
14 As et oordiel komt, zal et lot van Tyrus en Sidon dreegliker wezen as dat van jim.
15 En ie, Kafarnaüm, ie daenken toch niet daj' tot in de hemel verheven wodden zullen? In et diepste van et doderiek zuj' terechte kommen!
16 Wie naor jim luustert, luustert naor mi'j, en wie jim ofwiest, wiest mi'j of. En wie mi'j ofwiest, wiest him of die mi'j stuurd het."
17 De twie-en-zeuventig gongen vol vreugde weeromme en zeden: "Heer, alderdeegst de duvels onderwarpen heur an oons bi'j et heuren van jow naeme."
18 Hi'j zee tegen heur: "Ik hebbe Saotan as een lichtflits uut de hemel valen zien!
19 Bedaenke wel: ik hebbe jim de macht geven om slangen en schorpioenen te vertrappen en om de kracht van de vi'jaand te breken, zodat niks jim gebeuren kan.
20 Verheuge je d'r mar niet over dat de geesten heur an jim onderwarpen, mar verheuge je omreden jim naeme in de hemel optekend is."
21 Op dat stuit begon hi'j vervuld van de heilige Geest te juichen en zee: "Ik eer jow, Heit, Heer van hemel en eerde, omreden jow disse dingen veur wiezen en verstaandigen wegstopt hebben, mar ze an ienvooldige meensken wel toont hebben. Ja, Heit, zo hebben jow et wild.
22 Alles is mi'j toevertrouwd deur mien Heit, en gieniene dan de Heit wet wie de Zeune is, en wie de Heit is wet allienig de Zeune en iederiene an wie de Zeune et eupenbaoren wil."
23 Jezus richtte him appat tot de leerlingen en zee tegen heur: "Gelokkig de ogen die zien wat jim zien!
24 Want ik zegge jim dat een protte profeten en keunings wel zien wollen wat jim zien, mar zi'j kregen et niet te zien, en mar wat graeg heuren wollen wat jim heuren, mar zi'j kregen et niet te heuren."

Et ienige wat van belang is.

25 D'r kwam een wetgeleerde die him op de proef stellen wol. Hi'j vreug: "Meester, wat moet ik doen om pat te wodden van et iewige leven?"
26 Jezus zee doe: "Wat staot d'r in de Wet schreven? Wat lezen jow daor?"
27 De wetgeleerde zee: "Hebbe de Heer, jow God, lief mit hiel je hatte en mit hiel je ziel en mit hiel je kracht en mit hiel je verstaand, en je naoste as jezels."
28 "Dat hebben jow goed zegd," zee Jezus tegen him. "Doe dat en jow zullen leven."
29 Mar de wetgeleerde wol him rechtveerdigen en vreug an Jezus: "Wie is mien naoste?"
30 Doe vertelde Jezus him dit verhael: "D'r was es iene die van Jeruzalem naor Jericho reisde en onderwegens overvalen wodde deur rovers, die him zien kleren uuttrokken, him mishaandelden en him doe halfdood liggen leuten.
31 Bi'j toeval kwam d'r een priester langes, mar doe hi'j et slaachtoffer liggen zag, leup hi'j mit een boge om him henne.
32 D'r kwam ok een Leviet langes, mar bi'j et zien van et slaachtoffer leup hi'j ok mit een grote boge om him henne.
33 Doe kwam d'r een Samaritaan langes, die op reize was, en die kreeg medelieden doe hi'j him liggen zag.
34 Hi'j gong naor de gewonde man toe, geut eulie en wien over zien wonden en dee daor een verbaand om henne. Hi'j zette him op zien eigen rijdier en brocht him naor een harbarge, waor hi'j veur him zorgde.
35 De aanderemorgens gaf hi'j twie denarie an de harbargier en zee: "Zorg veur him, en as jow meer kosten maeken moeten, za'k jow die op mien weerommereize terogge betaelen."
36 Wie van disse drieje is neffens jow de naoste wodden van et slaachtoffer van de rovers?"
37 De wetgeleerde zee: "De man die medelieden mit him toond het." Doe zee Jezus tegen him: "Doen jow dan van now of krek zo."
38 Doe ze veerder trokken gong hi'j een dörp in, waor hi'j gastvri'j ontvongen wodde deur een vrouw die Marta hiette.
39 Heur zuster, Maria, gong an de voeten van de Heer zitten en luusterde naor zien woorden.
40 Mar Marta wodde hielendal in beslag neumen deur de zorg veur heur gaasten. Zi'j gong naor Jezus toe en zee: "Heer, kan et jow niks schelen dat mien zuster mi'j al et wark allienig doen laot? Zeg tegen heur dat zi'j mi'j helpen moet."
41 De Heer zee tegen heur: "Marta, Marta, ie bin zo bezorgd en ie maeken je vusen te drok.
42 D'r is mar iene ding echt van belang. Maria het et beste pat keuzen, en dat zal heur niet ontneumen wodden."




Lucas 11.

Et gebed.

01 Op een keer was Jezus an et bidden, en doe hi'j daor klaor mit was, zee iene van zien leerlingen tegen him: "Heer, leer oons et bidden ok, krek as Johannes et zien leerlingen ok leerd het."
02 Hi'j zee tegen heur: "Aj'm bidden, zegge dan: "(Oons) Heit die in de hemel is, laot jow naeme an God wijded wodden en laot jow keuninkriek kommen.
03 Geef oons daegeliks et stokkien bolle dawwe neudig hebben.
04 Vergeef oons oonze zunden, want wi'jzels vergeven iederiene ok die oons wat schuldig is. En help oons as et even tegenzit." (laot daon wodden, wat jow willen, liekewel op de eerde as in de hemel)
05 Doe zee hi'j tegen heur: "Stel dat iene van jim een vrund het en midden in de naacht naor him toe gaot en tegen him zegt: "Wi'j' mi'j even drie broden lienen,
06 want een vrund van mi'j is nao een reize bi'j mi'j kommen en ik hebbe niks om him veur te zetten."
07 En stel now es dat die vrund dan zegt: "Vaal mi'j niet lastig! 'k Hebbe de deure al op slot en mien kiender en ik bin al op bedde. Ik kom now niet overaende om je te geven waj' vraogen."
08 Ik zegge jim, as hi'j al niet in de bienen komt en et him geft omreden et zien vrund is, dan zal hi'j wel overaende kommen omreden zien vrund zo onbeschaemzem andringen blift, en him alles geft wat hi'j vanneuden het.
09 Daorom zeg ik jim: vraoge en d'r zal je geven wodden, zuke en ie zullen vienen, kloppe en d'r zal veur je eupendaon wodden.
10 Want wie vragt die krigt, wie zuukt die vint, en veur wie klopt zal eupendaon wodden.
11 Welke heit onder jim zol zien kiend, as et om een vissien vragt, in stee van een vissien een slange geven?
12 Of een schorpioen, as et om een ei vragt?
13 Aj'm dus, ok al bi'j'm slecht, je kiender al et goeie geven, hoevule te meer zal de Heit in de hemel dan niet de heilige Geest geven an wie d'r omme vraogen."

Toespraoke tot de mennigte.

14 Hi'j dreef een duvel uut bi’j iene die niet praoten kon. Doe de duvel verdreven was, begon de stomme te praoten en de mennigte meensken ston versteld.
15 Mar inkelden van heur zeden: "Daankzi'j Beëlzebul, de keuning van de duvels, kan hi'j duvels uutdrieven."
16 Aanderen wollen een teken van him uut de hemel zien om him op de proef te stellen.
17 Mar hi'j kende heur gedaachten en zee tegen heur: "Elk keuninkriek dat innerlik verpat is wodt verwoest, en huus nao huus stot in.
18 As Saotan ok innerlik niet iene is, hoe kan zien keuninkriek dan staandholen? Jim zeggen toch dat ik daankzi'j Beëlzebul duvels uutdrief!
19 As ik inderdaod daankzi'j Beëlzebul duvels uutdrief, deur wie drieven jim eigen meensken ze dan uut? Zi'j zullen dan ok jim rechters wezen!
20 Mar as ik daankzi'j een kracht die van God komt duvels uutdrief, dan is et keuninkriek van God bi'j jim kommen.
21 As een stark, goed bewaopend man zien domein bewaekt, dan bin zien bezittings veilig.
22 Mar zo gauw iene die starker is him aanvalt en him overwint, dan nemt die starkere him de waopens waor hi'j op vertrouwde of en verpat hi'j de buit.
23 Wie niet mit mi'j is, is tegen mi'j, en wie niet mit mi'j bi'jmekeer brengt, drift uutmekere.
24 As een onreine geest iene verlaot, trekt hi'j deur dorre oorden op zuuk naor een rustplak. Mar as hi'j die niet vint, zegt hi'j: "Ik zal weeromme gaon naor mien huus, da'k eerder verlaoten hebbe."
25 En as hi'j weeromme komt, markt hi'j dat et hemmeld is en op odder brocht.
26 Dan gaot hi'j vot en haelt d'r zeuven aandere duvels bi'j, slechter as hi'jzels, en zi'j trekken daor veur altied bi'j him in. En zo is de meenske bi'j wie de duvel intrekt d'r an ‘t aende vule minder an toe as eerder."
27 Wiels hi'j dit zee, ruurde een vrouw uut de mennigte heur stemme en reup tegen him: "Gelokkig de schoot die jow dreugen het en de bosten waoran jow dronken hebben!"
28 Mar hi'j zee: "Gelokkiger bin de meensken die naor et woord van God luusteren en d'r naor leven."
29 Doe d'r de hieltied meer meensken toestroomden, zee hi'j: "Dit is een verdurven generaosie! Zi'j verlangt een teken, mar zal gien aander teken kriegen as dat van Jona.
30 Zoas Jona een teken was veur de inwoners van Nineve, zo zal de Meenske-zeune een teken veur disse generaosie wezen.
31 Op de dag van et oordiel zal de keuninginne van et Zuden tegere mit de meensken van disse generaosie overaende kommen en heur veroordielen, want zi'j was van et uutaende van de eerde kommen om te luusteren naor de wieshied van Salomo, en hier zien jim iene die meer is as Salomo!
32 Op de dag van et oordiel zullen de Ninevieten tegere mit disse generaosie overaende kommen en heur veroordielen; want zi'j hadden heur bekeerd nao de prediking van Jona, en hier zien jim iene die meer is as Jona!
33 Wie een laampe anstikt, zet him niet in een donkere nisse, mar zet him op de standerd, zodat degenen die binnenkommen et locht zien kunnen.
34 Et oge is de laampe van et lichem. As je oge helder is, is je hiele lichem verlocht. Mar as et troebel is, is je lichem in et duuster.
35 Wees allat of et locht dat in je is, niet uutgaon is.
36 As je hiele lichem verlocht is, zonder dat ok mar een pat in et duuster is, dan is et zo locht as wanneer een laampe je mit zien straolen verlocht."

Konfrontaosie mit Farizeeën en schriftgeleerden.

37 Doe hi'j uutpraot was, neudigde een Farizeeër him uut om te eten. Hi'j gong naor binnen en gong bi'j de taofel anliggen.
38 Doe de Farizeeër dat zag, verwonderde hi'j him d'r over dat hi'j him veur et eten eerst niet wusken hadde.
39 Mar de Heer zee tegen him: "Ach, jim Farizeeën! De buterkaante van de beker en et paantien wasken jim, mar jim eigen binderkaante is vol hebzucht en aandere minne dingen.
40 Halvewiezen, het hi'j, die de buterkaante maekt het, niet ok de binderkaante maekt?
41 Geef liever de inhoold van de beker en schottel as aolmoes, dan is niks meer onrein veur jim!
42 Mar wee jim Farizeeën, want jim geven tienden van munt, wienruut en aandere kruden, mar gaon veurbi'j an de gerechtighied en de liefde tot God; ie zollen et iene doen moeten zonder et aandere te laoten.
43 Wee jim Farizeeën, want jim zitten graeg op een ereplakkien in de synagoge en wodden graeg begroet op et markplein.
44 Wee jim, want jim bin as ongemarkeerde greven waor de meensken overhenne toffelen zonder et te weten."
45 Doe zee een wetgeleerde tegen him: "Meester, deur die dingen te zeggen beledigen jow oons wel een betien."
46 Mar Jezus zee: "Wee ok jim, wetgeleerden! Want jim leggen de meensken niet te dregen lasten op, mar raeken die zels mit gien vinger an.
47 Wee jim, want jim bouwen graftomben veur de profeten, wiels jim veuroolden heur ommebrocht hebben.
48 Jim bin getugen die instemmen mit et doen en laoten van jim veuroolden, want zi'j hebben heur ommebrocht en jim bouwen de tomben!
49 Daorom het God in zien wieshied zegd: "Ik zal profeten en apostels naor heur toe sturen, mar ze zullen goenend van heur doodmaeken en aanderen vervolgen."
50 Veur et bloed van al de profeten dat sund et leggen van de follementen van de wereld vergeuten is, zal van disse generaosie genoegdoening eist wodden,
51 van et bloed van Abel tot et bloed van Zecharja, die ommekwam tussen et braandofferalter en et heiligdom. Ja, ik zegge jim, van disse generaosie zal genoegdoening eist wodden!
52 Wee jim wetgeleerden, want jim hebben de sleutel tot de kennis wegneumen; zels bin jim niet binnen gaon, en aanderen die wel naor binnen wollen hej'm tegenholen."
53 Doe hi'j uut et huus gong, weren de schriftgeleerden en de Farizeeën buten heurzels van woede; ze begonnen him over van alles uut te vraogen,
54 in een arglistige poging om him op een verkeerde uutspraoke te trapperen.




Lucas 12.

Lesgeven an de leerlingen en de mennigte.

01 Ondertussen was d'r een enorme mennigte meensken bi’jmekeer kommen. De meensken verdrongen mekeer, mar hi'j gong eerst naor zien leerlingen: "Hude je veur et zoerdesem, bi’jgelieks de huichelderi'je van de Farizeeën.
02 Niks is verburgen dat niet an ’t locht kommen zal, en niks is geheim dat niet bekend wodden zal.
03 Alles waj'm in et duuster zeggen, zal in et locht heurd wodden, en waj'm binnenskaemers in iene zien oor fluusteren, zal vanof de daoken raost wodden.
04 Tegen jim, mien vrunden, zeg ik: wees niet bange veur degenen die et lichem doodmaeken kunnen, mar niet tot wat slimmers in staot binnen.
05 Ik zal jim zeggen veur wie aj'm bange wezen moeten. Wees bange veur him die de macht het om iene niet allienig dood te maeken mar ok in de Gehenna te gooien. Ja, ik zegge jim, wees bange veur him!
06 Wat kosten vuuf musken? Haost niks. Toch wodt d'r niet iene deur God vergeten.
07 Alderdeegst de haoren op jim heufd bin allemaole teld. Wees niet bange, jim bin meer weerd as een hiele zwaarm musken.
08 Ik zegge jim: iederiene die mi'j erkent bi'j de meensken, zal ok deur de Meenske-zeune erkend wodden bi'j de engels van God.
09 Mar wie mi'j verloochent bi'j de meensken, zal ontkend wodden bi'j de engels van God.
10 En iederiene die wat te naodiele van de Meenske-zeune zegt, zal vergeven wodden. Mar wie lastertael praot tegen de heilige Geest zal niet vergeven wodden.
11 As ze jim veur de synagogen en de autoriteiten en et gerecht slepen, vraoge je dan niet bezorgd of hoe of waormit aj' je verdedigen moeten of wat aj' zeggen moeten,
12 want de heilige Geest zal jim op dat stuit ingeven wat aj' zeggen moeten."
13 Iene uut de mennigte zee tegen him: "Meester, zeg tegen mien breur dat hi'j de arfenis mit mi'j patten moet!"
14 Mar Jezus zee: "Wie het mi'j as rechter of bemiddeler over jim ansteld?"
15 Hi'j zee tegen heur: "Pas op, hude je veur iedere vorm van hebzucht, want iene zien leven hangt niet of van zien bezittings, alderdeegst niet as hi'j die in overvloed het."
16 En hi'j vertelde heur dit vergeliek: "Et laandgoed van een rieke man had een protte opbrocht,
17 en daorom vreug hi'j him of: Wat moet ik doen? Ik hebbe gien ruumte om mien veurraoden op te slaon.
18 Doe zee hi'j bi'j himzels: Wat ik doen zal is dit: ik breke mien schuren of en bouw grotere, waor ik al mien graon en aander spul in opslaon kan,
19 en dan zal ik tegen mezels zeggen: Ie hebben een protte spul in veurraod, genoeg veur tal van jaoren! Neem rust, eet, drink en vermaeke je een betien.
20 Mar God zee tegen him: "Dwaoze diej' binnen, nog disse naacht zal je leven van je wegneumen wodden. Veur wie bin dan de schatten die aj' opsleugen hebben?"
21 Zo vergaot et iene die schatten gaddert veur himzels, mar niet riek is bi'j God."
22 Hi'j zee tegen zien leerlingen: "Om disse reden zeg ik tegen jim: maek je gien zorgen over jezels en over waj' eten zullen, noch over je lichem en over waj' anstrupen zullen.
23 Want et leven is meer as eten en et lichem meer as kleren.
24 Kiek naor de raeven: zi'j zi'jen niet en oogsten niet, zi'j hebben gien veurraodkaemer en gien schure, et is God die heur te eten geft. Hoevule bin jim niet meer weerd as de voegels!
25 Wie van jim kan, deur him zorgen te maeken iene elle an zien levensduur anhaoken?
26 Aj'm dus alderdeegst et geringste al niet kunnen, waorom maeken jim je dan zorgen over al et aandere?
27 Kiek naor de lelies, zie hoe ze gruuien. Ze warken niet en weven niet. Ik zegge jim: alderdeegst Salomo was in al zien groothied, niet in de kleren zoas iene van heur.
28 As God et gruun dat vandaege nog op et veld staot en morgen in de ovend gooid wodt al mit zo vule zorg kleded, mit hoevule meer zorg zal hi'j jim dan niet kleden, kleingeleuvigen?
29 Ok jim moe'n niet prakkeseren over waj'm eten en drinken zullen, en jim moe'n jim niet deur zorgen kwellen laoten.
30 De volken van disse wereld jaegen die dingen nao, mar jim Heit wet waj'm vanneuden hebben.
31 Zuuk liever zien keuninkriek, en die aandere dingen zullen je d'r bi'j geven wodden.
32 Wees niet bange, kleine kudde, want jim Heit wil jim et keuninkriek geven.
33 Verkope je bezittings en geef wat an de aarme meensken. Maek veur jezels een geldbuul die niet versliet, een schat in de hemel die niet opraekt, waor een dief niet bi'j kan en die deur gien motte anvreten wodden kan.
34 Waor jim schat is, daor zal ok jim hatte wezen.
35 Stao klaor, doe je riem omme en hool de laampen branend,
36 en wees as knechten die heur heer opwaachten as hi'j weeromme komt van een brulloft, zodat ze votdaolik veur him eupendoen as hi'j anklopt.
37 Gelokkig de knechten die de heer bi'j zien komst wakker antreffen. Ik verzeker jim: hi'j zal zien riem ommedoen, heur an taofel uutneudigen en heur bedienen.
38 Gelokkig degenen die hi'j zo antreft, ok al komt hi'j midden in de naacht of kot veur et morgenlochten van de ni’je dag.
39 Beseffe wel: as de heer van et huus weten hadde op wat ure de dief kommen zol, dan zol hi'j niet in zien huus inbreken laoten hebben.
40 Ok jim moe'n klaorstaon, want de Meenske-zeune komt op een tied waor aj' et niet op verwaachten."
41 Petrus vreug: "Heer, is dit vergeliek allienig veur oons bedoeld of veur iederiene?"
42 De Heer zee doe: "Wie is die betrouwbere en verstaandige rentmeester die de heer anstellen zal over zien knechten om heur op tied et eten te geven dat heur toekomt?
43 Gelokkig de knecht die daormit doende is as zien heer komt.
44 Ik verzeker jim: hi'j zal him anstellen over alles wat hi'j bezit.
45 Mar as die knecht bi'j himzels zegt: Mien heer komt mar niet, en as hi'j de knechten en dienstmaegies slaon zal, him volvreet en him bedrinkt,
46 dan komt de heer van die knecht op een dag waorop hi'j et niet verwaacht en op een tied die hi'j niet kent, en dan zal hi'j him zwaor straffen en him et lot van de trouwelozen ondergaon laoten.
47 De knecht die wet wat zien heer wil, mar gien risselvaosies treft en niet overienkomstig zien wil haandelt, zal hiel wat slaegen te verduren kriegen.
48 Mar wie niet wet wat zien heer wil en zo haandelt dat hi'j een pak rammel verdient, zal mar een betien sleugen wodden. Van iederiene an wie een protte geven is, zal een protte vraogd wodden, en hoe meer an iene toevertrouwd is, des te meer zal van him ofneumen wodden.
49 Ik bin kommen om op eerde een vuur an te stikken, en wat zol ik graeg willen dat et al braande!
50 Ik moet een deup ondergaon, en ik wod slim kweld zolange die niet volbrocht is.
51 Daenken jim dat ik kommen bin om vrede te brengen op eerde? Zeker niet, zeg ik jim, ik kom om verdieldhied te brengen.
52 Van now of zullen vieve in ien huus verpat wezen: drieje tegen twieje en twieje tegen drieje.
53 De heit zal tegenover zien zeune staon en de zeune tegenover zien heit, de moeke tegenover heur dochter en de dochter tegenover heur moeke, de schoonmoeke tegenover heur schoondochter en de schoondochter tegenover heur schoonmoeke."
54 Tegen de mennigte zee hi'j: "As jim een wolke opkommen zien in et westen, zeggen jim drekt dat d'r regen op komst is, en dat is vaeks ok zo.
55 En as jim marken dat de wiend uut et zuden komt, zeggen jim dat d'r hitte op komst is, en dat is vaeks ok zo.
56 Huichelders! De anblik van de eerde en de hemel kun jim duden, hoe kan et dan, dat jim disse tied niet duden kunnen?
57 Waorom bepaolen jim niet uut jezels wat goed is en verkeerd?
58 Aj' mit je tegenstaander op weg binnen naor een hoge autoriteit, doe dan muuite om nog onderwegens tot een vergeliek mit him te kommen, aanders sleept hi'j je veur de rechter, en de rechter zal je uutleveren an de gerechtsdiener, en die zal je in de gevangenis smieten.
59 Ik zegge je, dan koj’ niet vri'j veur daj' ok de laeste cent betaeld hebben."




Lucas 13.

01 D'r weren op dat stuit ok een peer meensken bi'j die him vertelden over de Galileeërs van wie Pilatus et bloed mingd had mit heur offers.
02 Hi'j zee tegen heur: "Daenken jim dat die Galileeërs grotere zundige meensken weren as alle aandere Galileeërs, omreden zi'j dat ondergaon hebben?
03 Grif niet, zeg ik jim, mar as jim niet tot inkeer kommen, zuj'm allemaole op dezelde wieze ommekommen.
04 Of die achttien die ommekwammen deurdat de Siloamtoren op heur vul – daenken jim dat zi'j schuldiger weren as alle aandere meensken die in Jeruzalem wonen?
05 Grif niet, zeg ik jim, mar as jim niet tot inkeer kommen, zuj'm allemaole krek zo doodraeken as zi'j."
06 Hi'j vertelde heur dit vergeliek: "Iene had een viegeboom in zien droevetuun plaant en gong henne om te kieken of de boom al vrucht dreug, mar hi'j vun gien viegen.
07 Hi'j zee tegen de wienboer: "Al drie jaor kom ik om te kieken of die viegeboom al vrucht dreegt, mar de hieltied ommenocht. Hak him mar omme, want hi'j dient nargens toe en put allienig de grond mar uut."
08 Mar de wienboer zee: "Heer, laot him dit jaor nog mit rust, tot ik de grond d'r ommehenne ommespit hebbe en him dong geven hebbe,
09 altemet zal hi'j dan et ankem jaor vrucht dregen, en zo niet, dan kun jow him dan nog wel ommehakken."

Genezing op sabbat.

10 Hi'j gaf op sabbat les in een synagoge.
11 D'r was daor ok een vrouw die al achttien jaor bezeten was deur een geest die heur ziek maekte. Zi'j was hielendal briek en kon mit gien meugelikhied rechtop staon.
12 Doe Jezus heur zag, reup hi'j heur bi'j him en zee tegen heur: "Ie bin verlost van je ziekte,"
13 en hi'j legde heur de hanen op. Drekt gong zi'j rechtop staon en loofde God.
14 Mar de leider van de synagoge wodde lelk omreden Jezus op sabbat genas en zee tegen de mennigte: "D'r bin zes daegen om te warken. Kom dus op die daegen om je genezen te laoten en niet as et sabbat is!"
15 Mar de Heer zee: "Huichelders! Maekt elk van jim niet op sabbat zien os of ezel los van de voerbak om him drinken te laoten?
16 Moch disse vrouw, die een dochter is van Abraham en al achttien jaor deur Saotan boeid hullen wodt, moch zi'j op sabbat niet losmaekt wodden uut disse boeien?"
17 Doe hi'j dat zee, stonnen al zien tegenstaanders beschaemzem, mar de hiele mennigte was verhoopt over de machtige daoden die deur him daon wodden.
18 Doe zee hi'j: "Waorop liekt et keuninkriek van God en waormit za’k et vergelieken?
19 Et liekt op een zaotien van de mosterdplaante dat iene mitnam en in zien tuun zi'jde, waornao et gruuide en een grote struke wodde, en de voegels in de takken kwammen te nusselen."
20 En opni'j zee hi'j: "Waormit zal ik et keuninkriek van God vergelieken?
21 Et liekt op zoerdesem die deur een vrouw mit drie zakken mael mingd wodt tot alle mael deurdesemd was."

Veerder naor Jeruzalem.

22 Onderwegens naor Jeruzalem trok hi'j wieder langs steden en dörpen, wiels hi'j les gaf.
23 Iene vreug him: "Heer, bin d'r mar een peer meensken die redded wodden?" Hi'j zee doe:
24 "Doe alle muuite om deur de smalle deure naor binnen te gaon, want een hieleboel, zeg ik jim, zullen perberen naor binnen te gaon, mar dat zal niet lokken.
25 As de heer van et huus ienkeer staon gaon is en de deure sleuten het, en jim staon buten op de deure te kloppen en roepen: "Heer, doe eupen veur oons!", dan zal hi'j zeggen: "Ik kenne jim niet, waor kommen jim weg?"
26 Jim zullen zeggen: "We hebben bi'j jow eten en dronken en jow hebben in oonze straoten lesgeven."
27 Mar hi'j zal tegen jim zeggen: "Ik kenne jim niet, waor kommen jim weg? Vot mit jim, wetsverkrachters!"
28 Dan zuj’m jammeren en mit jim tanen knassen aj' Abraham en Isaak en Jakob en al de profeten in et keuninkriek van God zien, mar zels butensleuten wodden.
29 Uut et oosten en et westen en uut et noorden en et zuden zullen ze kommen, en ze zullen an taofel uutneudigd wodden in et keuninkriek van God.
30 En bedaenke wel: d'r bin laesten die de eersten wezen zullen, en d'r bin eersten die de laesten wezen zullen."
31 Krekt op dat stuit kwammen d'r een stokmennig Farizeeën an die tegen him zeden: "Jow moe’n votgaon, gao hier weg, want Herodes wil jow ommebrengen!"
32 Hi'j zee doe: "Zegge tegen die vos: "Let op, ik drief duvels uut en vandaege en morgen genees ik meensken, en op de dadde dag za'k d'r mit klaor wezen."
33 Mar ik moet vandaege en morgen en de aanderedaegs onderwegens blieven, want et gaot niet an, dat een profeet ommekomt buten Jeruzalem
34 – Jeruzalem, Jeruzalem, dat de profeten doodt, en stienigt wie naor heur toe stuurd binnen! Hoe vaeke hebbe ik je kiender niet bi'jmekeer brengen wild zoas een klokkerd heur kukenties onder heur vleugels hudet, mar jim hebben et niet wild.
35 Jim stad wodt an heur lot overlaoten. Ik verzeker jim: jim zullen mi'j niet meer zien tot de tied komt daj' zeggen zullen: "Zegend is hi'j die komt in de naeme van de Heer!"




Lucas 14.

Een feestmaol op sabbat.

01 Doe hi'j op sabbat naor et huus van een blispoter van de Farizeeërs gong, waor hi'j veur et eten uutneudigd was, hullen ze him scharp in et oge.
02 D'r was daor iene mit waeterzucht.
03 Jezus vreug an de wetgeleerden en Farizeeën: "Is et eins toestaon om him op sabbat beter te maeken of niet?"
04 Mar zi'j zwegen. Hi'j pakte de man bi'j de haand, genas him en stuurde him vot.
05 En tegen de Farizeeën en wetgeleerden zee hi'j: "As jow zeune of jow os in een putte vaalt, dan haelen jow him d'r toch drekt uut, ok al is et sabbat?"
06 Daor hadden zi'j gien bescheid op.
07 Hi'j vertelde de geneudigden een vergeliek, want hi'j had zien hoe ze de ereplakken veur heurzels keuzen. Hi'j zee tegen heur:
08 "Aj' deur iene uutneudigd wodden veur een brulloft, kieze dan niet et ereplak, want altemet is d'r wel iene uutneudigd die veurnaemer is as jow,
09 en dan moet jow gastheer tegen jow zeggen: "Stao jow plak an him of." Dan zuj' beschaemzem et meenste plak innemen moeten.
10 Aj' uutneudigd wodden, kieze dan et meenste plak, zodat jow gastheer tegen jow zeggen zal: "Kom toch dichterbi'j!" Dan wodt jow ere betoond tegenover iederiene die tegere mit jow an taofel anligt.
11 Want wie himzels verhoogt zal vernederd wodden, en wie himzels vernedert zal verhoogd wodden."
12 Hi'j zee ok tegen degene die him uutneudigd hadde: "As jow een etersmaol anbieden of een feestmaol geven, vraog dan niet jow vrunden, jow breurs, jow verwaanten of jow rieke buren, in de verwaachting dat zi'j jow op heur beurt uutneudigen zullen om wat weeromme te doen.
13 Aj' meensken over de heerd hebben willen, neudig dan aarme meensken, kreupelen, lammen en blienen uut.
14 Dan zuj' gelokkig wezen, zi'j kun veur jow dan wel niks terogge doen, mar jow zullen d'r veur beloond wodden bi'j de opstaanding van de rechtveerdigen."
15 Doe iene van de aanderen die an taofel anlaggen dit heurde, zee hi'j tegen him: "Gelokkig al wie mitdoen zal an de maoltied in et keuninkriek van God!"
16 Jezus gong veerder: "Iene wol een groot feestmaol geven en neudigde tal van gaasten uut.
17 Doe et tied was veur et eten, stuurde hi'j zien knecht naor de geneudigden om tegen heur te zeggen: "Kom, want alles is klaor."
18 Mar iene veur iene begonnen ze heur te verontschuldigen. De eerste zee: "Ik hebbe krek een stok grond kocht, da'k beslist bekieken moet. Tot mien spiet kan ik de uutneudiging niet annemen."
19 En een aander zee: "Ik hebbe vuuf span ossen kocht en ik gao ze keuren; tot mien spiet kan ik de uutneudiging niet annemen."
20 Weer een aander zee: "Ik bin krek trouwd en daorom kan'k niet kommen."
21 Doe de knecht weeromme kommen was, brocht hi'j zien heer verslag uut. De heer van et huus wodde slim lelk en zee tegen zien knecht: "Gao vlogge de stad in en breng uut de straoten en stegen de aarme meensken en kreupelen en blienen en verlamden hierhenne."
22 Doe de knecht him melden kwam: "Heer, wat jow opdreugen hebben is gebeurd, en nog is d'r plak,"
23 zee de heer tegen him: "Gao naor de wegen en de akkers buten de stad en neudig iederiene mit klem uut, want mien huus moet vol wezen.
24 Ik zegge jim: gieniene van degenen die eerst uutneudigd weren, zal van mien feestmaol pruven."

Et volgen van Jezus.

25 Grote mennigten meensken trokken mit Jezus mit. Hi'j keek heur an en zee:
26 "Wie mi'j volgt, mar niet brekt mit zien vader en moeke en vrouw en kiender en breurs en zusters, ja alderdeegst mit zien eigen leven, kan niet mien leerling wezen.
27 Wie niet zien kruus dreegt en mi'j op mien weg volgt, kan niet mien leerling wezen.
28 Want wie van jim, die een toren bouwen wil, gaot niet eerst de kosten berekenen om te kieken of hi'j wel genoeg geld veur de bouw het?
29 As hi'j et follement legd het mar de bouw niet daon maeken kan, zal iederiene die dat zicht him uutlachen
30 en zeggen: "Die man begon te bouwen, mar hi'j kon et kerwei niet ofmaeken."
31 En welke keuning die d'r op uuttrekt om mit een aandere keuning oorlog te voeren, zal niet eerst bi'j himzels te raode gaon of hi'j wel mit tienduzend man optrekken kan tegen iene die mit twintigduizend man tegen him op zetten komt?
32 As hi'j dat niet kan, stuurt hi'j eerst, wanneer de troepen nog veer uut mekeer binnen, een gezant om naor de veurweerden veur vrede te vraogen.
33 Zo gelt veur jim etzelde: wie gien ofstaand dot van al zien bezittings, kan mien leerling niet wezen.
34 Zoolt is wat goeds. Mar as et zoolt ok zien smaek verlöst, hoe kuwwe et dan zien kracht weerommegeven?
35 Ok veur de bemesting van de grond is et niet meer bruukber, dus wodt et weggooid. Wie oren het om te heuren, moet goed luusteren!"




Lucas 15.

De zorg om wat verleuren is.

01 Alle tolleners en zundige meensken zochten him op om naor him te luusteren.
02 Mar liekewel de Farizeeën as de schriftgeleerden zeden morrend tegen mekeer: "Die man praot mit zundige meensken en eet mit heur."
03 Jezus vertelde heur doe dit vergeliek:
04 "As iene van jim honderd schaopen het waorvan d'r iene verleuren raekt is, laot hi'j dan niet de negenennegentig aanderen in de woestijn aachter om et verdwaelde dier op te zuken tot hi'j et vunnen het?
05 En as hi'j et vunnen het, legt hi'j et vol vreugde op zien schoolders
06 en gaot hi'j naor huus. Daor roept hi'j zien vrunden en buren bi'jmekeer en zegt tegen heur: "Diel in mien vreugde, want ik heb et schaop vunnen dat verdweeld was."
07 Ik zegge jim, zo zal d'r in de hemel meer vreugde wezen over ién zundig persoon die tot inkeer komt as over negenennegentig rechtveerdigen die gien inkeer vanneuden hebben.
08 En as een vrouw tien drachmen het en d'r iene verlöst, stikt zi'j toch de laampe an, veegt et hiele huus hemmel en zuukt zi'j alles of tot zi'j et muntien vunnen het?
09 En as ze et vunnen het, roept ze heur vrundinnen en buren bi'jmekeer en zegt: "Diel in mien vreugde, want ik hebbe de drachme vunnen die ik kwiet was."
10 Zo, zeg ik jim, zal d'r ok vreugde wezen onder de engels van God over ien zundig persoon die tot inkeer komt."
11 Doe zee hi'j: "D'r was es een heit die twie zeunen had.
12 De jongste van heur zee tegen zien heit: "Heit, geef mi'j et pat van jow bezit waor ik recht op hebbe." En de heit verpatte zien hiele vermogen onder heur beiden.
13 Nao een peer daegen verzulverde de jongste zeune zien bezit en reisd naor een veer en vremd laand, waor hi'j een losbaandig leven leidde en zien centen d’r vlot deur brocht.
14 Doe hi'j alles d'r deur jaegd hadde, wodde dat laand troffen deur een zwaore hongersnood, en kreeg hi'j gebrek an alles.
15 Hi'j vreug om wark bi'j iene van de inwoners van dat laand, die him op et veld zien varkens huden leut.
16 Hi'j had mar wat graeg mit eten willen van de atepoelen die de varkens te eten kregen, mar gieniene gaf ze him.
17 Doe kwam hi'j tot himzels en docht: De knechten van mien heit hebben eten genoeg, en ik kom hier omme van de honger.
18 Ik zal naor mien heit weeromme gaon en tegen him zeggen: "Heit, ik hebbe slim zundigd, liekewel tegen de hemel as tegen jow,
19 ik bin et niet meer weerd om jow zeune nuumd te wodden; behaandel mi'j as iene van jow knechten."
20 Hi'j vertrok drekt en gong onderwegens naor zien oolde thuus. Zien heit zag him in de veerte al ankommen. Hi'j kreeg medelieden en leup vlogge op zien zeune toe, vul him om de hals en gaf him een dikke tuut.
21 "Heit," zee zien zeune tegen him, "ik hebbe slim zundigd, liekewel tegen de hemel as tegen jow, ik bin et niet meer weerd om jow zeune nuumd te wodden."
22 Mar de heit zee tegen zien knechten: "Hael vlogge de mooiste kleren en struup 'm die an, doe him een ring an zien vinger en geef him sandalen.
23 Breng et beste kalf en slaacht et. Lao'we eten, drinken en feestvieren,
24 want disse zeune van mi'j was dood en is weer tot leven kommen, hi'j was verleuren en is weeromme vunnen." En ze begonnen feest te vieren.
25 De ooldste zeune was nog op et veld. Doe hi'j op huus an kwam en al kotbi'j was, heurde hi'j meziek en daansen.
26 Hi'j reup iene van de knechten en vreug wat d'r te redden was.
27 De knecht zee tegen him: "Jow breur is weer thuuskommen, en jow heit het et beste kalf slaachten laoten omreden hi'j him gezond en wel weeromme kregen het."
28 De ooldste zeune wodde poer lelk en wol niet naor binnen gaon, mar zien heit kwam naor buten en perbeerde him te bedaoren.
29 Mar hi'j zee tegen zien heit: "Al jaorenlang wark ik veur jow en nooit bin ik jow ongeheurzem west aj’ mi'j wat vreugen, mar jow hebben mi'j alderdeegst nooit een geitebokkien geven om mit mien vrunden feest te vieren.
30 En now die zeune van jow thuuskommen is die jow vermogen d'r deurjaegd het bi'j de hoeren, hebben jow veur him et beste kalf slaacht."
31 Zien heit zee tegen him: "Mar mien jonge, ie bin de hieltied al bi'j mi'j, en alles wat van mi'j is, is van jow.
32 We konnen toch niet aanders dan feestvieren en bliede wezen, want je breur was dood en is weer tot leven kommen. Hi'j was verleuren en is weeromme vunnen.""




Lucas 16.

Riekdom en gerechtighied.

01 Hi'j gong doe naor zien leerlingen en zee: "D'r was es een riek man die een rentmeester in dienst had en te heuren kreeg dat die rentmeester zien eigendom verkwistte.
02 De rieke man reup de rentmeester bi'j him en zee tegen him: "Wat heur ik over jow? Leg es verantwoording of van je beheer, want ie kun zo niet langer rentmeester blieven."
03 Doe zee de rentmeester bi'j himzels: Wat moet ik doen now mien heer mi'j et beheer van zien bezit ofnemt? Warken op et laand kan ‘k niet, en veur bedelen schaem ik mi'j.
04 Mar ik weet al wat ik doen moet om d'r veur te zorgen dat de meensken, as ik van mien beheerderstaek ontheven bin, mi'j bi'j heur thuus kommen laoten.
05 Iene veur iene reup hi'j de schuldeners van zien heer bi'j him. De eerste vreug hi'j: "Hoevule bin jow mien heer schuldig?"
06 "Honderd vatten olijfeulie," zee de schuldener doe. De rentmeester zee tegen him: "Hier is jow schuldbewies, gao zitten en maek d'r vlogge vuuftig van."
07 Doe vreug hi'j an de volgende schuldener: "En jow, hoevule bin jow schuldig?" "Honderd balen graon," was et bescheid. De rentmeester zee: "Hier is jow schuldbewies, maeke d'r mar tachtig van."
08 En de heer prees de oneerlike rentmeester omreden hi'j liep haandeld had. De kiender van disse wereld gaon ommes lieper mit mekeer om as de kiender van et locht.
09 En ik zegge jim ok: maek vrunden mit behulp van de valse mammon, zodaj'm in de iewige tenten opneumen wodden as de mammon d'r niet meer is.
10 Wie betrouwber is in et geringste, is ok betrouwber as et om de grote dingen gaot, en wie oneerlik is in et geringste is ok oneerlik as et om de grote dingen gaot.
11 Aj'm onbetrouwber blieken te wezen in de ommegaank mit de valse mammon, wie zal jim dan warkelik de belangrieke zaeken toevertrouwen?
12 En aj'm onbetrouwber blieken te wezen mit wat een aander toeheurt, wie zal jim dan geven wat jim zels toekomt?
13 Gien inkelde knecht kan twie heren dienen: hi'j zal de eerste haten en de twiede liefhebben, of hi'j zal krek toewijded wezen an de iene en de aandere verachten. Jim kun niet God dienen én de mammon."
14 De Farizeeën, die geldzuchtig weren, heurden dit alles en zi'j haelden schimpend heur neuze veur him op.
15 Mar Jezus zee tegen heur: "Jim willen bi'j de meensken de hieltied veur rechtveerdig deurgaon, mar God kent jim hatte. Wat bi'j de meensken in hoog anzien staot, is een gruwel in de ogen van God.
16 De Wet en de Profeten gaon tot an Johannes: sund die tied wodt et keuninkriek van God verkondigd, en iederiene wodt mit naodrok uutneudigd om daor binnen te gaon.
17 Mar nog eerder vergaon hemel en eerde as dat d'r ok mar iene tietel van de wet wegvaalt.
18 Wie zien vrouw verstot en mit een aander trouwt, pleegt overspel, en ok wie trouwt mit een vrouw die deur heur man verstoten is, pleegt overspel.
19 D'r was es een riek man die gewoon was om him te klieden in purperen kleren en fien linnen en die daegeliks uutbundig feestvierde.
20 Een bedeler die Lazarus hiette, lag veur de poort van zien huus, overdekt mit zwölderi’je.
21 Hi'j hoopte zien maege te vullen mit wat d'r overscheut van de taofel van de rieke man; mar d'r kwammen allienig honnen anlopen, die zien zweren likten.
22 Op een dag overleed de bedeler, en hi'j wodde deur de engels votdreugen om an Abraham zien hatte te rusten. Ok de rieke man kwam te overlieden en wodde begreuven.
23 Doe hi'j in et doderiek, waor hi'j slim kweld wodde, zien ogen opsleug, zag hi'j in de veerte Abraham mit Lazarus an zien ziede.
24 Hi'j reup: "Heit Abraham, hebbe medelieden mit mi'j en stuur Lazarus naor mi'j toe. Laot him et toppien van zien vinger in wat waeter stikken om mien tonge wat of te koelen, want ik heb zoe’n piene in disse vlammen."
25 Mar Abraham zee: "Kiend, bedaenke wel dat ie je pat van et goeie al tiedens je leven had hebben, wiels Lazarus niks as ongelok kend het; now vint hi'j hier troost, mar ie lieden piene.
26 Butendat ligt d'r een wiede kloof tussen oons en jim, zodat wie van hier naor jim gaon wil dat niet kan, en ok gieniene van jim naor oons overkommen kan."
27 Doe zee de rieke man: "Dan smeek ik jow, heit, dat jow him naor et huus van mien heit sturen,
28 want ik hebbe nog vuuf breurs. Hi'j kan heur dan waorschouwen, zodat zi'j niet krek as ik in dit oord van mattelings terechte kommen."
29 Abraham zee: "Zi'j hebben Mozes en de Profeten: laoten zi'j naor heur luusteren!"
30 De rieke man zee: "Nee, heit Abraham, mar as iene van de dooien naor heur toe komt, zullen zi'j tot inkeer kommen."
31 Mar Abraham zee: "As zi'j niet naor Mozes en de profeten luusteren, zullen ze heur ok niet overtugen laoten as d'r iene uut de dood opstaot."





Lucas 17.

Oproep an de leerlingen.

01 Tegen zien leerlingen zee hi'j: "D'r is niet an te ontkommen dat d'r meensken valen laoten wodden moeten, allienig: wee degene die daorveur verantwoordelik is!
02 Et zol beter veur him wezen as hi'j mit een meulestien om zien hals in zee gooid wodde as dat hi'j ok mar iene van disse ienvooldige meensken valen laoten zol.
03 Let dus goed op jezels! As je breur zundigt, praot dan es eernstig mit him; en as hi'j berouw het, vergeef him.
04 En as hi'j zeuven keer op iene dag tegen je zundigt en zeuven keer naor je toekomt en zegt: "Ik hebbe berouw," dan moej'm him vergeven."
05 Doe zeden de apostels tegen de Heer: "Geef oons meer geleuf!"
06 De Heer zee: "As jim geleuf hadden as een mosterdzaotien, dan zollen jim tegen die moerbeieboom zeggen: "Trek je wottels uut de grond en plaante jezels in de zee!" en hi'j zol jim geheurzem wezen.
07 As iene van jim een knecht hebben zol die ploegt of de kudden weidet, dan zol hi'j, as hi’j thuuskomt van et laand, toch niet tegen him zeggen: "Gao drekt mar an taofel"?
08 Zol hi'j niet vule eerder tegen jim zeggen: "Maeke wat te eten veur me klaor, doe je riem om en bediene mi'j wiels ik eet en drink, en daornao kuj' zels eten en drinken"?
09 Hi'j bedaankt de knecht toch niet omreden die daon het wat him opdreugen is?
10 Etzelde gelt veur jim; as jim alles daon hebben wat jim opdreugen is, zeg dan: "Wi'j bin mar knechten, we hebben inkeld oonze plicht daon."

In et greensgebied van Samaria.

11 Onderwegens naor Jeruzalem trok Jezus deur et greensgebied van Samaria en Galilea.
12 Doe hi'j daor een dörp ingaon wol, kwammen him tien meensken integen die an een huudziekte leden; zi'j bleven op een ofstaand staon.
13 Ze reupen luud: "Jezus, meester, heb medelieden mit oons!"
14 Doe hi'j heur zag, zee hi'j tegen heur: "Laot je an de priesters zien." Wiels ze votleupen wodden ze schone maekt van heur huudziekte.
15 Iene van heur, die zag dat hi'j genezen was, gong weeromme en loofde God mit lude stemme.
16 Hi'j vul daele an Jezus zien voeten om him te bedaanken. Et was een Samaritaan.
17 Doe zee Jezus: "Bin d'r niet tiene schone maekt? Waor bin die negen aanderen?
18 Wol gieniene aanders weerommekommen om God ere te bewiezen as allienig disse iene vremdeling?"
19 Hi'j zee tegen de Samaritaan: "Kom overaende en gao now mar. Je geleuf het je redded."

De komst van de Meenske-zeune.

20 Doe de Farizeeën Jezus vreugen wanneer as et keuninkriek van God kommen zol, zee hi'j tegen heur: "De komst van et keuninkriek van God laot heur niet anwiezen,
21 en gieniene kan niet zeggen: "Kiek, hier is et!" of: "Daor is et!" Mar weet wel: et keuninkriek van God ligt binnen jow haandberiek."
22 Tegen de leerlingen zee hi'j: "D'r komt een tied daj'm d'r naor langeren zullen om iene van de daegen van de Meenske-zeune te zien, mar jim zullen die dag niet mitmaeken.
23 Dan zullen de meensken tegen jim zeggen: "Kiek daor!" of: "Kiek hier!" Mar doe dat niet en schink d'r mar gien andacht an.
24 Want zoas de bliksem locht geft as hi'j van de iene naor de aandere kaante van de hemel flitst, zo zal de Meenske-zeune verschienen.
25 Mar eerst moet hi'j hiel wat lieden en deur disse generaosie verwurpen wodden.
26 En zoas et d'r an toegong in de daegen van Noach, zo zal et ok wezen in de daegen van de Meenske-zeune:
27 zi'j atten, zi'j dronken, zi'j trouwden en zi'j wodden uuthuwelikt, tot an de dag waorop Noach de ark ingong en de vloed kwam en iederiene overspuulde.
28 Of zoas et d'r an toegong in de daegen van Lot: zi'j atten, zi'j dronken, zi'j kochten, zi'j verkochten, zi'j plaantten en zi'j bouwden;
29 mar op de dag doe Lot wegtrok uut Sodom, regende et vuur en zwaovel uut de hemel en kwam iederiene omme.
30 Zo zal et ok gaon op de dag waorop de Meenske-zeune eupenbaord wodt.
31 Wie op die dag op et daoke van zien huus zit moet niet naor beneden gaon om zien bezittings op te haelen, en wie op et laand is moet niet naor huus weeromme willen.
32 Daenke an de vrouw van Lot!
33 Wie perbeert zien leven veilig te stellen zal et verliezen, mar wie et verlöst zal et beholen.
34 Ik zegge jim, die naacht zullen d'r twie in ien bedde liggen: de iene zal mitneumen wodden, de aander zal aachterlaoten wodden.
35 Van twie vrouwluden die tegere an et maelen binnen, zal de iene mitneumen wodden, de aandere zal aachterlaoten wodden."
36 Van twie meensken die tegere op et laand binnen, zal de iene mitneumen wodden en de aander zal aachterlaoten wodden".
37 Ze vreugen him: "Waor, Heer?" Hi'j zee doe: "Waor een liek is, daor zullen de gieren bi’j mekeer kommen."




Lucas 18.

01 Hi'j vertelde heur een vergeliek over de noodzaeke om de hieltied te bidden en niet op te geven:
02 "D'r was es een rechter in een stad, die gien ontzag veur God had en him niks an de meensken gelegen liggen leut.
03 D'r woonde ok een wedevrouw in die stad, die de hieltied weer naor him toe gong mit de vraoge: "Doe mi'j recht in et geschil mit mien tegenstaander."
04 Mar lange tied wol hi'j dat niet doen. Te slotte zee hi'j bi'j himzels: Ok al heb ik gien ontzag veur God en laot ik mi'j niks an de meensken gelegen liggen,
05 toch zal ik die wedevrouw recht geven omreden ze mi'j last bezorgt. Aanders blift ze mi'j mar an de kop zeuren en vligt ze mi'j nog es an."
06 Doe zee de Heer: "Luuster naor wat disse rechter zegt, al minacht hi'j et recht ok.
07 Zal God dan niet grif recht geven an zien uutverkorenen die daegs en naachs tot him roepen? Of twiefelt hi'j?
08 Ik zegge jim dat hi'j heur gauw recht geven zal. Mar as de Meenske-zeune komt, zal hi'j dan geleuf op eerde vienen?"

De arfgenaemen van et keuninkriek van God.

09 Mit et oge op goenend die heurzels rechtveerdig vienen en aanderen minachten, vertelde hi'j dit vergeliek.
10 "Twie meensken gongen naor de tempel om te bidden, de iene was een Farizeeër en de aander een tollener.
11 De Farizeeër ston daor rechtop en bidde bi'j himzels: "God, ik daank jow dat ik niet bin as de aandere meensken, die roofzuchtig of onrechtveerdig of overspeulig binnen, en dat ik ok niet bin liek as die tollener.
12 Ik vaaste twiemaol in de weke en dreeg een tiende van al mien inkomsten of."
13 De tollener bleef mar op een ofstaand staon en dust niet iens naor de hemel op te kieken. In plak daorvan sleug hi'j him op de bost en zee: "God, wees mi'j, dit zundig persoon genaodig."
14 Ik zegge jim, hi'j gong naor huus as iene die rechtveerdig is in de ogen van God, mar die aander niet. Want wie himzels verhoogt zal vernederd wodden, mar wie himzels vernedert die zal verhoogd wodden."
15 De meensken perbeerden ok kleine kiender bi'j him te brengen om ze deur him anraeken te laoten. Doe de leerlingen dat zaggen, zeden zi’j, dat ze dat niet doen mossen.
16 Mar Jezus reup de kiender bi'j him en zee: "Laot de kiender toch bi'j mi'j kommen, hool ze niet tegen, want et keuninkriek van God heurt toe an wie is zoas zi'j binnen.
17 Ik verzekere jim, wie niet as een kiend eupenstaot veur et keuninkriek van God, zal d'r grif niet binnengaon!"
18 Een hoogplaetst persoon vreug him: "Goeie meester, wat moet ik doen om pat te wodden van et iewige leven?"
19 Jezus zee doe: "Waorom numen jow mi'j goed? Gieniene is goed, allienig God.
20 Jow kennen de geboden: pleeg gien overspel, pleeg gien moord, steel niet, leg gien valse getugenis of, toon eerbied veur je vader en je moeke."
21 De man zee: "An alles waj’ zeggen he’k mi'j sund mien jonkhied hullen."
22 Doe Jezus dat heurde, zee hi'j: "Nog iene ding ontbrekt jow. Verkoop alles waj' hebben en verpatte de opbrengst onder de aarme meensken, dan zullen jow een schat in de hemel hebben. Kom dan weeromme en volge mi'j!"
23 Doe de man dat heurde, wodde hi'j diepe bedroefd. Want hi'j was slim riek.
24 Doe Jezus zag dat de man zo bedroefd wodde, zee hi'j: "Wat is et muuilik veur rieken om et keuninkriek van God binnen te gaon.
25 Et is makkeliker veur een kemeel om deur et oge van een naalde te gaon dan veur een riek man om et keuninkriek van God binnen te gaon."
26 Doe zeden zien toeheurders: "Wie kan d'r dan nog redded wodden?"
27 Jezus zee: "Wat bi'j de meensken onmeugelik is, is meugelik bi'j God."
28 Doe zee Petrus: "Mar wi'j hebben alles wawwe hadden aachterlaoten om jow te volgen."
29 Jezus zee tegen heur: "Ik verzeker jim, iederiene die huus of vrouw, breurs of zusters, oolden of kiender aachterlaoten het omwille van et keuninkriek van God,
30 zal in disse tied al et veulvooldige kriegen en in de tied die komt et iewige leven."

Optreden in Jericho.

31 Hi'j nam de twaelf appat en zee tegen heur: "We bin now onderweg naor Jeruzalem, en alles wat deur de profeten schreven is zal de Meenske-zeune andaon wodden.
32 Want hi'j zal uutleverd wodden an de heidenen en bespot wodden en mishaandeld en bespi'jd.
33 En naodat hi'j gieseld is, zal hi'j ommebrocht wodden, mar op de dadde dag zal hi'j weer overaende kommen."
34 De leerlingen snapten d'r niks van. De betekenis van Jezus zien woorden bleef veur heur verburgen, en ze konnen mar niet bevatten wat hi'j zegd had.
35 Doe hi'j in de streek van Jericho kwam, zat d'r langs de weg een bliende man te bedelen.
36 Doe de bliende een mennigte ankommen heurde, vreug hi'j wat d'r te redden was.
37 Zi'j zeden tegen him: "Jezus uut Nazaret komt hier langes."
38 Doe reup de bliende: "Jezus, Zeune van David, hebbe medelieden mit mi'j!"
39 Degenen die veurop leupen, snauwden him toe dat hi'j him stille holen mos, mar hi'j galpte des te hadder: "Zeune van David, hebbe medelieden mit mi'j!"
40 Jezus bleef staon en zee dat ze de bliende bi'j him brengen mossen. Doe disse veur him ston, vreug hi'j him:
41 "Wat wil ie da'k veur je doe?" De bliende zee doe: "Heer, zorg da'k weer kieken kan."
42 Jezus zee: "Kiek dan weer! Je geleuf het je redded."
43 Votdaolik kon hi'j weer zien en hi'j volgde him wiels hi'j God loofde. Alle meensken die getuge west weren van dit veurval brochten hulde an God.




Lucas 19.

01 Jezus gong Jericho in en trok deur de stad.
02 Daor was een man die Zacheüs hiette, een rieke heufdtollener.
03 Hi'j wol Jezus zien, om te weten te kommen wat veur iene et was, mar dat lokte him niet vanwegens de mennigte, want hi'j was klein van stok.
04 Daorom leup hi'j vlogge veuruut en klom in een viegeboom om Jezus zien te kunnen as hi'j langes kwam.
05 Doe Jezus langs de viegeboom kwam, keek hi'j naor boven en zee: "Zacheüs, kom vlogge naor beneden, want vandaege moet ik in jow huus wezen."
06 Zacheüs kwam drekt naor beneden en Jezus kwam vol vreugde bi'j him thuus.
07 Iederiene die dit zag, zee morrend tegen een aander: "Hi'j is et huus van een zundig meenske ingaon om onderdak te vienen veur de naacht."
08 Mar Zacheüs was staon gaon en zee tegen de Heer: "Kiek, Heer, de helte van mien bezittings geef ik an de aarme meensken, en as ik iene wat tevule ofneumen hebbe, vergoede ik et viervooldig."
09 Jezus zee tegen him: "Vandaege is in dit huus redding kommen, want hi'j is ok een zeune van Abraham.
10 De Meenske-zeune is kommen om te zuken en te redden wat verleuren was."

Et vergeliek van de keuning en de drachmen.

11 An de meensken die stonnen te luusteren, vertelde hi'j nog een vergeliek, omreden hi'j now dichte bi'j Jeruzalem was en zi'j dochten dat et keuninkriek van God now gauw kommen zol.
12 Hi'j zee: "Een man van veurnaeme komof gong op reize naor een veer laand om et keuningschop te kriegen en dan weeromme te gaon.
13 Hi'j reup tiene van zien knechten bi'j him, gaf elk van heur honderd drachme en zee tegen heur: "Gao daormit haandel drieven wiels ik vot bin."
14 Mar zien laandgenoten haatten him en stuurden ofveerdigden aachter him an mit de bosschop: "We willen niet dat die man keuning over oons wodt!"
15 Bi'j zien teroggekommen, doe hi'j et keuningschop kregen hadde, leut hi'j de knechten an wie hi'j et geld geven had bi'j him roepen om te vernemen wat ze mit heur haandeldrieven verdiend hadden.
16 De eerste kwam en zee: "Heer, jow geld het et tienvooldige opleverd."
17 Zien meester zee: "Goed daon, ie bin een goeie knecht. Omreden ie betrouwber west binnen in wat slim gerings, verlien ik je et bestuur over tien steden."
18 De twiede kwam zeggen: "Jow geld, heer, het et vuufvooldige opbrocht."
19 Tegen him zee hi'j: "Ie kriegen et bestuur over vuuf steden."
20 Doe kwam de dadde knecht, die zee: "Heer, hier is jow geld weeromme, ik hebbe et in een oolde sokke veur je beweerd.
21 Ik was bange veur jow, omreden jow een strenge man binnen die terogge voddert wat hi'j niet stot het en oogst wat hi'j niet zi'jd het."
22 Zien meester zee tegen him: "Ie bin een minne knecht, mit je eigen woorden za'k je veroordielen! Ie wussen da'k een strenge man bin en weeromme vodder wa'k niet stot hebbe en oogst wa'k niet zi'jd hebbe?
23 Waoromme hej' mien geld dan niet bi'j de baank in bewering geven? Dan ha'k et bi'j mien weeromme kommen nog mit rente vodderen kund."
24 En tegen degenen die d'r bi'j stonnen zee hi'j: "Neem him de honderd drachme of en geef ze an de knecht die et tienvooldige d'r van maekt het."
25 Ze zeden tegen him: "Heer, hi'j het al et tienvooldige!"
26 "Ik zegge jim: wie het zal nog meer kriegen; mar wie niks het, him zal alderdeegst wat hi'j het nog ontneumen wodden.
27 En die vi'janen van mi'j die niet wollen dat ik keuning over heur wodde, breng heur hier en breng ze omme veur mien ogen."
28 Nao disse woorden trok Jezus wieder, op weg naor Jeruzalem.

Intocht in Jeruzalem.

29 Doe hi'j dichtebi’j Betfage en Betanië bi'j de Olijfbarg kwam, stuurde hi'j twie van zien leerlingen veuruut
30 en zee tegen heur: "Gao naor et dörp daorginderd. Daor zullen jim een vaastebunnen vool vienen, dat nog nooit deur iene bereden is. Maek et los en breng et hier.
31 As iene jim vragt: "Waoromme maeken jim dat vool los?" moe'n jim zeggen: "De Heer het et vanneuden."
32 De beide leerlingen gongen op pad en vunnen et vool, krekt zoas Jezus zegd had.
33 Doe ze et dier losmaekten, vreugen de eigeners heur: "Waorom maeken jim dat vool los?"
34 Zi'j zeden doe: "De Heer het et vanneuden."
35 Doe brochten zi'j et vool naor Jezus. Ze legden heur maantels over et dier en leuten Jezus d'r op zitten.
36 Onderwegens spreidden de leerlingen heur maantels veur him op de grond uut.
37 Doe hi'j op et punt ston de Olijfbarg of te daelen, begon de hiele klofte leerlingen vol vreugde en mit lude stemme God te priezen om alle wonderdaoden die ze zien hadden.
38 Ze reupen: "Zegend wie komt as keuning, in de naeme van de Heer! Vrede in de hemel en ere an de Allerhoogste!"
39 Inkelde Farizeeën in de mennigte zeden tegen Jezus: "Meester, berispe jow leerlingen toch."
40 Mar hi'j zee doe: "Ik zegge jim: as zi'j zwiegen zollen, dan zollen de stienen et uutraozen."
41 Doe hi'j Jeruzalem veur him liggen zag, begon hi'j te goelen over et lot van de stad.
42 Hi'j zee: "Had ie ok op disse dag mar weten wat vrede brengen kan! Mar dat blift veur je verburgen, now ok.
43 Want d'r zal een tied kommen dat je vi'janen belegeringswarken tegen je opzetten zullen, je omsingelen en je van alle kaanten insluten.
44 Zi'j zullen je mit de grond geliek maeken en je kiender verdelgen, en ze zullen gien iene stien op de aandere staon laoten, omreden ie de tied van God zien ontfarming niet herkend hebben."
45 Hi'j gong naor de tempel, waor hi'j de haandelers vot begon te jaegen,
46 wiels hi'j tegen heur zee: "D'r staot schreven: "Mien huus moet een huus van gebed wezen," mar jim hebben d'r een rovershol van maekt!"
47 Daegeliks gaf hi'j les in de tempel. De hogepriesters, de schriftgeleerden en de leiders van et volk wollen him eins wel uut de weg rumen,
48 mar ze wussen niet hoe ze dat anpakken mossen, want et hiele volk hong an zien lippen.




Lucas 20.

Jezus in de tempel belaogd.

01 Op iene van die daegen dat Jezus et volk in de tempel les gaf en daor et goeie ni'js verkondigde, kwammen opiens de hogepriesters en de schriftgeleerden, tegere mit de ooldsten, op him of
02 en vreugen him: "Op grond van wat bevoegdhied doen jow de dingen? En wie het jow die bevoegdhied geven? Zeg oons dat es."
03 Jezus zee doe: "Ik zal jim ok es wat vraogen waorop jim mar es bescheid geven moeten:
04 Deupte Johannes in opdracht van de hemel of van meensken?"
05 Zi'j overlegden mit mekeer: "Awwe zeggen: "Van de hemel," zal hi'j vraogen: "Waorom hebben jim him dan niet geleufd?"
06 Mar awwe zeggen: "Van meensken," dan zal et volk oons wel stienigen willen, omreden iederiene d'r van overtuugd is dat Johannes een profeet was."
07 Dus zeden ze dat ze et niet wussen.
08 Doe zee Jezus tegen heur: "Dan zeg ik jim ok niet op grond van welke bevoegdhied ik de dingen doe."
09 Hi'j vertelde de mennigte dit vergeliek: "Een man legde een droevetuun an en verpachtte die an wienbouwers, waornao hi'j veur lange tied op reize gong.
10 Nao verloop van tied stuurde hi'j een knecht naor de wienbouwers, die et pat van de oogst dat de eigener toekwam in ontvangst nemen mos. Mar de wienbouwers gavven him een pak rammel en stuurden him mit lege hanen weer vot.
11 Doe stuurde hi'j een aandere knecht. Die wodde ok ofbuisd, en naodat zi'j him vernederd hadden stuurden zi'j him ok mit lege hanen weer vot.
12 De eigener stuurde doe een dadde knecht, mar die wodde ok oftuugd en de droevetuun uutgooid.
13 Doe zee de eigener van de droevetuun: "Wat moet ik doen? Ik zal mien liefste zeune naor heur toe sturen, veur him zullen ze toch wel ontzag hebben."
14 Doe de wienbouwers him zaggen, overlegden zi'j mit mekeer en zeden: "Dat is de arfgenaeme! Lao'we him ommebrengen, dan is de arfenis veur oons."
15 En ze gooiden him de droevetuun uut en brochten him om et leven. Wat zal de eigener van de droevetuun now mit heur doen?
16 Hi'j komt zels, maekt de wienbouwers dood en geft de droevetuun an aanderen." Doe de meensken dit heurden, zeden ze: "Dat nooit!"
17 Mar hi'j keek heur an en vreug: "Wat betekent dan wat d'r schreven staot: "De stien die de bouwluden ofkeurden is de hoekstien wodden"?
18 Iederiene die over die stien stroffelt zal breuken wodden, en iederiene op wie die stien vaalt zal verpletterd wodden."
19 De schriftgeleerden en hogepriesters, die wussen dat Jezus dit vergeliek mit et oge op heur verteld had, wollen him op dat stuit wel griepen laoten, mar zi'j weren bange veur de reaktie van et volk.
20 Zi'j hullen him mar in de gaten en stuurden d'r spionnen op uut die him as rechtveerdigen veurdoen mossen, in de hope him op een onwettige uutspraoke te trapperen, zodat ze him uutleveren konnen an de overhied, an et gezag van de prefekt.
21 Zi'j vreugen him dit: "Meester, we weten dat wat jow zeggen en leren goed is en dat jow praoten zonder anzien des persoons, en dat jow in alle oprechthied lesgeven over de weg van God.
22 Wel now, is et goed dawwe belasting betaelen an de keizer of niet?"
23 Mar Jezus deurzag heur slimme opzet en zee doe:
24 "Laot mi'j es een denarie zien. Van wie is de ofbelinge en et opschrift op disse munt?" "Van de keizer," zeden ze.
25 Doe zee hi'j tegen heur: "Geve wat van de keizer is an de keizer, en geve an God wat God toeheurt."
26 Zi'j slaegden d'r dus niet in om him tegenover et volk te trapperen op een onwettige uutspraoke, en omreden zi'j gien raod wussen mit zien bescheid, deden ze d'r et zwiegen mar toe.

Lesgeven in de tempel.

27 Inkelde Sadduceeërs, die ontkenden dat d'r een opstaanding is, kwammen naor him toe en vreugen him:
28 "Meester, Mozes het oons dit veurschreven: as een trouwd man wegraekt zonder dat zien vrouw kiender brocht het, moet zien breur mit die vrouw trouwen en naokommelingen verwekken veur zien breur.
29 Now weren d'r zeuven breurs. De eerste was trouwd en raekte weg zonder kiender;
30 doe trouwde de twiede breur mit dezelde vrouw
31 en doe de dadde, en naotied ok de aandere breurs, mar alle zeuven weren ze zonder kiender bleven doe zi'j wegraekten.
32 Te slotte overleed de vrouw ok.
33 Wie zien vrouw zal zi'j dan wezen bi'j de opstaanding? Alle zeuven bin ze ommes mit heur trouwd west."
34 Jezus zee tegen heur: "De kiender van disse wereld trouwen en wodden uuthuwelikt,
35 mar wie weerdig bevunnen is om pat te wodden an de kommende wereld en an de opstaanding van de dooien, trouwen niet en wodden ok niet uuthuwelikt.
36 Zi'j kun ok niet meer starven, want ze bin as engels en ze bin kiender van God omreden zi'j pat uutmaeken van de opstaanding.
37 Dat de dooien opwekt wodden, dat het Mozes ok al dudelik maekt in de tekst over de doornstruke, waor hi'j praot over de Heer as de God van Abraham en de God van Isaak en de God van Jakob.
38 Hi'j is gien God van dooien, mar van levenden, want veur him is iederiene in leven."
39 Inkelde schriftgeleerden zeden: "Meester, wat jow zeggen is waor."
40 En gieniene dust him nog een vraoge te stellen.
41 Hi'j zee tegen heur: "Hoe kan men zeggen dat de messias een zeune van David is?
42 Want David zels zegt in et boek van de Psalms: "De Heer zee tegen mien Heer: "Gao an mien rechterhaand zitten,
43 tot ik van jow vi'janen een baank veur jow voeten maekt hebbe."
44 David nuumt him dus Heer, hoe kan hi'j dan zien zeune wezen?"
45 Wiels de mennigte luusterde, zee hi'j tegen zien leerlingen:
46 "Pas op veur de schriftgeleerden die zo graeg in dure kleren omme lopen en op et markplein eerbiedig begroet wodden willen, en een ereplak verlangen in de synagogen en bi'j feestmaolen:
47 zi'j verbruken de huzen van de wedevrouwen en zeggen veur et oge lange gebeden op. Over heur zal strenger oordield wodden as over aanderen!"




Lucas 21.

01 Doe hi'j opkeek, zag hi'j hoe rieke meensken heur giften in de offerkiste gooiden.
02 Hi'j zag ok dat een aarme wedevrouw d'r twie munties in gooide,
03 en hi'j zee: "Ik verzeker jim: disse aarme wedevrouw het meer geven as alle aanderen.
04 Want de aanderen hebben van heur overvloed offerd, mar zi'j het van heur aarmoede alles geven van wat zi'j neudig had veur heur levensonderhoold."

De komst van de Meenske-zeune.

05 Doe d'r praot wodde over de tempel, over de mooie stiender en et goold en zulver waormit hi'j versierd was, zee hi'j:
06 "Wat jim hier zien – d'r zal een dag kommen waorop gien stien op de aandere blieven zal; alles zal ofbreuken wodden."
07 Zi'j stelden him doe de vraoge: "Meester, wanneer zal dat allemaole gebeuren en an welk teken kuwwe dat herkennen?"
08 Jezus zee: "Let op, laot je niet misleiden. Want d'r zullen een hieleboel meensken kommen die mien naeme bruken zullen en zeggen: "Ik bin et," of: "De tied is kommen." Volge heur niet!
09 As jim berichten heuren over oorlog en opstaand, raek dan niet in paniek. Die dingen moe'n eerst gebeuren, mar dat is drekt nog niet et aende."
10 Hi'j gong deur en zee: "Et iene volk zal tegen et aandere volk optrekken en et iene keuninkriek zal et gevecht angaon mit et aandere,
11 d'r zullen zwaore eerdebevings kommen en hongersnoden en epidemieën rondomme, en d'r zullen an de hemel grote en verschrikkelike tekens verschienen.
12 Mar eerst zullen jim mishaandeld wodden en vervolgd en uutleverd an de synagogen, jim zullen opsleuten wodden in de gevangenis en veurleided wodden an keunings en stadhoolders omwille van mien naeme.
13 Dan zullen jim getugen moeten.
14 Bedaenke wel dat jim je verdediging niet veurbereiden moeten.
15 Want ik zal jim woorden van wieshied geven die deur gieniene van je tegenstaanders weerstaon of weerlegd wodden kunnen.
16 Alderdeegst je oolden en breurs, verwaanten en vrunden zullen je uutleveren, goenend van jim zullen terechte steld wodden,
17 en jim zullen deur iederiene mit de nekke ankeken wodden omwille van mien naeme.
18 Mar gien haor van je heufd zal verleuren gaon.
19 Redde je leven deur staandvaastighied!
20 Wanneer jim zien dat Jeruzalem deur legertroepen omsingeld is, weet dan dat de verwoesting van de stad niet lang meer op him waachten laoten zal.
21 Wie in Judea is moet dan de bargen in vlochten, wie in Jeruzalem is moet daor weggaon, en wie op et laand is moet niet naor de stad gaon,
22 want in die daegen wodt de straf voltrokken, waordeur alles wat schreven staot, gebeuren zal.
23 Wat zal et rampzaelig wezen veur de vrouwluden die in die tied zwanger binnen of een kiend an de bost hebben! Want d'r zal ontzaglik een protte leed wezen in et laand, en een zwaor vonnis zal de bevolking treffen.
24 De inwoners zullen ommekommen deur et zwaord of in gevangenschop wegvoerd wodden en onder alle volken verstri'jd wodden, wiels Jeruzalem vertrapt wodden zal deur heidenen, tot de tied van de heidenen veurbi'j is.
25 Dan zullen d'r tekens wezen an de zunne en de maone en de steerns, en op eerde zullen de volken sidderen van aangst veur et gebulder en et geweld van de zee;
26 de meensken wodden onmachtig van aangst veur wat d'r mit de wereld gebeuren zal, want de hemelse machten zullen waankelen.
27 Mar dan zullen ze op een wolke de Meenske-zeune an kommen zien, in de kleren van macht en grote luuster.
28 As dat alles staot te gebeuren, kom dan overaende en rechte je rogge, want jim verlossing is dan dichtebi'j!"
29 Hi'j vertelde heur ok een vergeliek: "Kiek naor de viegeboom en al de aandere bomen.
30 Aj' zien dat ze uutlopen, weej' dat de zoemer d'r an komt.
31 Zo moej'm ok weten, as jim die dingen gebeuren zien, dat et keuninkriek van God d'r an komt.
32 Ik verzeker jim: disse generaosie zal grif niet vot wezen as dit alles gebeurt.
33 Hemel en eerde zullen wegraeken, mar mien woorden zullen nooit weg blieven.
34 Pas op dat jim hatte niet ofstompt raekt deur de roes en de dronkenschop en de zorgen van et daegeliks leven, zodat die dag jim overvaalt,
35 onveurspelber as een valle die dichte klapt. Want opiens zal hi'j kommen over iederiene die waor dan ok op de eerde wonen.
36 Wees allat en bidde zonder op te holen, om te ontkommen an de dingen die gebeuren gaon en om veur de Meenske-zeune verschienen te kunnen."
37 Daegs gaf hi'j les in de tempel, mar aovends vertrok hi'j om de naacht deur te brengen op de Olijfbarg.
38 En elke morgen kwam et hiele volk al vroeg naor de tempel om naor him te luusteren.




Lucas 22.

Et paoskemaol.

01 Et was haost et feest van et Ongezoerde brood, dat Paosken nuumd wodt.
02 De hogepriesters en schriftgeleerden zochten naor een meugelikhied om him uut de weg te rumen, mar dan stiekem, bange as ze weren veur de reaktie van et volk.
03 Doe kwam Saotan in Judas, die ok wel Iskariot nuumd wodde, iene van de twaelf.
04 Hi'j gong naor de hogepriesters en tempelwachters en besprak mit heur hoe hi'j Jezus an heur uutleveren kunnen zol.
05 Zi'j weren slim bliede en praoten of dat zi'j him veur zien diensten betaelen zollen.
06 Judas nam heur anbod an en zocht een geunstige gelegenhied om Jezus an heur uut te leveren, zonder dat et volk et marken zol.
07 De dag van et Ongezoerde brood begon waorop et paoskelaom slaacht wodden mos.
08 Jezus stuurde Petrus en Johannes op pad mit de woorden: "Gao veur oons et paoskemaol klaor zetten, zodawwe et eten kunnen."
09 Zi'j vreugen him: "Waor willen jow dawwe et klaor zetten?"
10 Hi'j zee doe: "Let op, as jim de stad in gaon, zal jim een man integen kommen die een kruke waeter dreegt. Gao aachter him an naor et huus waor hi'j naor binnengaot,
11 en zeg tegen de heer van dat huus: "De Meester vragt jow: "Waor is et gastenvertrek waor ik mit mien leerlingen et paoskemaol eten kan?"
12 Hi'j zal jim een grote boverzael wiezen die al inricht is; maek et daor klaor."
13 Zi'j gongen op weg en alles gebeurde krek zoas hi'j zegd had, en ze zetten daor et paoskemaol klaor.
14 Doe et zoveer was, gong hi'j tegere mit de apostels anliggen veur et eten.
15 Hi'j zee tegen heur: "Ik hebbe d'r slim naor langerd om dit paoskemaol mit jim te eten veur de tied van mien lieden komt.
16 Want ik zegge jim: ik zal gien paoskemaol meer eten veurdat et zien vervulling vunnen het in et keuninkriek van God."
17 Hi'j nam een beker, zee doe et daankgebed mit de woorden: "Neem disse beker en geef him an mekeer deur.
18 Want ik zegge jim: van now of zal ik niet meer drinken van de vruchten van de wienstok tot et keuninkriek van God kommen is."
19 En hi'j nam een hiempe bolle, zee et daankgebed, brak de bolle, verpatte dat en zee: "Dit is mien lichem dat veur jim geven wodt. Doe dit, iederkeer opni'j, om mi'j te gedaenken."
20 Zo nam hi'j nao et eten ok de beker, en zee: "Disse beker, die veur jim uutgeuten wodt, is et ni'je verbond dat deur mien bloed sleuten wodt.
21 Mar weet wel dat degene die mi'j uutleveren zal tegere mit mi'j an disse taofel anligt.
22 Want de Meenske-zeune moet hennegaon zoas et veur him bepaold is, mar wee de meenske die him uutleveren zal."
23 Zi'j vreugen heur onder mekeer of wie van heur zoks doen kunnen zol.
24 Doe kwam d'r onienighied onder heur over de vraoge wie van heur de belangriekste was.
25 Jezus zee tegen heur: "Vosten oefenen heerschoppi'je uut over de an heur onderwurpen volken, en wie macht het lat him weldoener numen.
26 Laot dat bi'j jim niet zo wezen! De belangriekste van jim moet de meenste wodden en de leider de knecht.
27 Want wie is belangrieker, degene die anligt om te eten of degene die bedient? Is et niet degene die anligt? Mar ik bin in jim midden as iene die dient.
28 Jim bin in al mien beproevings de hieltied bi'j mi'j bleven.
29 Ik bestem jim veur et keuningschop zoas mien Heit mi'j veur et keuningschop bestemd het:
30 jim zullen in mien keuninkriek eten en drinken an mien taofel, en zitten op een troon om recht te doen over de twaelf stammen van Israël.
31 Simon, Simon, weet dat Saotan jim veur him opeist het om jim as graon zeven te meugen.
32 Mar ik hebbe veur je beden zodat je geleuf niet bezwieken zol. En as ie ienkeer tot inkeer kommen binnen, moet ie je breurs starken."
33 Simon zee doe: "Heer, ik bin alderdeegst klaor om mit jow de gevangenis in te gaon en te starven."
34 Mar Jezus zee: "Ik zegge je, Petrus, disse naacht zal de haene niet kri'jen veurdat ie drie keer zegd hebben daj' mi'j kennen."
35 Doe zee hi'j tegen heur: "Doe ik jim vot stuurde zonder geldbuul, reistasse en sandalen, bin jim doe wat te kot kommen?" "Nee, niks!" zeden ze.
36 Hi'j zee: "Mar wie now een geldbuul het, moet die mitnemen, krek as zien reistasse, en wie gienend het moet zien maantel verkopen en him een zwaord antugen.
37 Want ik zegge jim: wat schreven staot, moet in mi'j tot vervulling kommen, naemelik: "Hi'j wodde rekend tot de wettelozen." Inderdaod, now wodt daon wat d'r over mi'j zegd is."
38 Zi'j zeden: "Kiek Heer, hier bin twie zwaorden." Mar hi'j zee tegen heur: "Genoeg hierover!"

Jezus gevangenneumen en ontkend.

39 Hi'j vertrok en gong neffens zien gewoonte naor de Olijfbarg. De leerlingen volgden him.
40 Doe hi'j daor ankommen was, zee hi'j tegen heur: "Bidde dat jim niet zwichten aj'm uutperbeerd wodden."
41 En hi'j leup bi'j heur weg, tot omdebi'j een stienworp veer, gong daor deur de kni'jen om te bidden. Hi'j biddede:
42 "Heit, as jow et willen, neem dan disse beker van mi'j weg. Mar laot niet gebeuren wat ik wil, mar wat jow willen."
43 Uut de hemel verscheen him doe een engel om him kracht te geven.
44 Hi'j wodde overvalen deur doodsangst, mar hi'j bleef bidden; zien zwiet vul in grote brobbels as bloed op de grond.
45 Doe hi'j nao zien gebed weer overaende kwam en weeromme leup naor de leerlingen, zag hi'j dat ze van verdriet in slaop valen weren,
46 en hi'j zee tegen heur: "Waoromme slaopen jim? Kom in bienen en bidde, zodaj'm niet zwichten aj'm uutperbeerd wodden."
47 Wiels hi'j nog praotte, kwam d'r opiens een hiele protte meensken an. Veurop leup de man die Judas hiette, iene van de twaelf; hi'j gong naor Jezus toe om him een tuut te geven.
48 Mar Jezus zee tegen him: "Judas, lever ie de Meenske-zeune uut mit een tuut?"
49 Doe degenen die bi'j him stonnen zaggen wat d'r gebeurde, vreugen zi'j: "Heer, zuwwe d'r mit et zwaord op los houwen?"
50 En iene van heur sleug in op de knecht van de hogepriester en hakte him zien rechteroor of.
51 Mar Jezus zee: "Hool daormit op. Zo is et genoeg!" Hi'j raekte et oor an en genas de man.
52 Tegen de hogepriesters en tempelwachters en de ooldsten van et volk die op him ofkommen weren, zee hi'j: "Jim bin kommen mit zwaorden en knuppels krek as of ik een oproerkri'jer bin?
53 Daegeliks was ik bi'j jim in de tempel en doe hebben jim gien vinger naor mi'j uutsteuken, mar dit is jim ure, et ure van de macht van de duusternis."
54 Zi'j grepen him beet, voerden him weg, en brochten him naor et huus van de hogepriester. Petrus volgde heur op een ofstaand.
55 Ze stakken een vuur an midden op de binderplaetse en gongen d'r omhenne zitten; Petrus gong bi'j heur zitten.
56 Een dienstmaegien zag him bi'j et vuur zitten, keek him strak an en zee: "Die man heurde d'r toch ok bi'j!"
57 Mar hi'j ontkende dat en zee: "Ik kenne him niet iens!"
58 Even naotied murk een aander him op en zee: "Ie bin toch ok iene van heur!" Mar Petrus zee: "Welnee man, hielendal niet."
59 En omdebi'j een ure laeter zee nog iene mit grote stellighied: "Ja wis, die man was ok in zien gezelschop, hi'j komt ommes ok uut Galilea."
60 Mar Petrus zee: "Ik weet niet waor aj' et over hebben." En op datzelde stuit, wiels hi'j nog praotte, kri'jde d'r een haene.
61 De Heer dri'jde him omme en keek Petrus an, en doe herinnerde Petrus him de woorden van de Heer: "Nog veur d'r vannaacht een haene kri'jd het zuj’drie keer zegd hebben daj’mi’j niet kennen."
62 Hi'j gong naor buten en goelde.
63 De manluden die Jezus gevangen hullen, dreven de spot mit him en gieselden him.
64 Zi'j deden him een bliendoek veur en zeden: "Profeteer now mar, wie is et die je sleugen het?"
65 En ze zeden nog tal van aandere lasterlike dingen tegen him.

Et verheur.

66 Doe et dag wodde, kwam de raod van ooldsten van et volk bi'jmekeer, hogepriesters liekegoed as schriftgeleerden, en ze leidden him veur in heur raodszitting.
67 Zi'j zeden: "As jow de messias binnen, zeg et oons dan." Mar Jezus zee: "As ik et jim zegge, geleuven jim mi'j toch niet.
68 En as ik een vraoge stelle, geven jim toch gien bescheid.
69 Mar vanof now zal de Meenske-zeune zitten an de rechterhaand van de Almachtige."
70 Doe zee iederiene: "Jow bin dus de Zeune van God?" Hi'j zee doe: "Jim zeggen dat ik et bin."
71 Zi'j zeden: "Waorveur hebben we nog getugeverklaorings vanneuden? We hebben et ommes zels uut zien eigen mond heurd!"




Lucas 23.

01 Ze gongen allemaole staon en brochten him veur bi’j Pilatus.
02 Daor brochten zi'j disse beschuldigings tegen him in: "We hebben vaastesteld dat disse man oons volk van et rechte pad ofbrengt en de meensken d'r van weerhoolt om belastings an de keizer te betaelen en dat hi'j van himzels zegt de messiaanse keuning te wezen."
03 Pilatus vreug him: "Bin jow de keuning van de Joden?" Jezus zee doe: "Jow zeggen et."
04 Doe zee Pilatus tegen de hogepriesters en de mennigte die daor kommen was: "Ik vien niks waor disse man an schuldig is."
05 Mar zi'j bleven stief volholen: "In hiel Judea ruit hi'j mit zien lesgeven et volk op, van Galilea tot hier an toe!"
06 Doe Pilatus dit heurde, vreug hi'j an Jezus of hi'j uut Galilea kwam,
07 en doe hi'j besefte dat hi'j onder Herodes zien gezag vul, stuurde hi'j him naor Herodes toe, die op dat stuit in Jeruzalem was.
08 Herodes was biezunder bliede doe hi'j Jezus zag, want hi'j wol him al hiel lang es tegenkommen omreden hi'j hiel wat over him heurd had. Ok hoopte hi'j dat hi’j een wonder te zien kreeg.
09 Hi'j ondervreug him uutvoerig, mar Jezus gaf him niet ien keer bescheid.
10 De hogepriesters en de schriftgeleerden die d'r bi'j stonnen, brochten zwaore beschuldigings tegen him in.
11 Hierop begonnen Herodes en zien soldaoten Jezus te hunen, en ze dreven de spot mit him deur him pronkkleren an te strupen. Zo stuurde hi'j him weeromme naor Pilatus.
12 Op die dag wodden Herodes en Pilatus vrunden, wiels zi'j de hieltied mekeers vi'janen west weren.
13 Pilatus reup de hogepriesters en de leiders en et volk bi'j him
14 en zee tegen heur: "Jim hebben die man veur mi'j brocht as iene die et volk van et rechte pad ofbrengt, mar jim weten dat ik him, doe ik him in jim anwezigens verheurd hebbe, an gien iene van de zaeken waorvan jim him betichten schuldig vunnen hebbe.
15 En Herodes liekemin, hi'j het him ommes naor oons weerommestuurd; hi'j het niks daon waor de doodstraf op staot.
16 Dus za’k him vri'jlaoten, nao dat ik him gieselen laoten hebbe."
(17 Hi'j was verplicht om op elk paoskefeest een gevangene vri'j te laoten".)
18 Mar zi'j begonnen mit zien allen luud te raozen: "Vot mit him! Laot Barabbas mar vri'j!"
19 Disse laeste was gevangenzet vanwege een oproer in de stad en vanwege een moord.
20 Pilatus praotte opni'j op heur in, omreden hi'j liever Jezus vri'jlaoten wol.
21 Mar ze raosden et uut: "Kruseg him, kruseg him!"
22 Veur de dadde keer zee hi'j tegen heur: "Wat veur kwaod het de man dan daon? Ik hebbe niks vunnen waor hi'j de doodstraf veur verdient. Dus za’k him vri'jlaoten, naodat ik him gieselen laoten hebbe."
23 Mar ze bleven luud andringen dat hi'j krusegd wodden zol, en mit heur geraos wunnen ze et pleit:
24 Pilatus besleut heur eis in te willigen.
25 Hi'j leut de man gaon die vanwege oproer en moord gevangen zet was en om wie zien vri'jlaoting ze vraogd hadden, en leverde Jezus uut an heur willekeur.

Kruseging en graflegging.

26 Doe Jezus wegleided wodde, hullen de soldaoten een zekere Simon van Cyrene an, die krek de stad binnenkwam. Zi'j legden et kruus op zien rogge en leuten et him aachter Jezus an dregen.
27 Een grote volksmennigte kwam aachter Jezus an, krek as een peer vrouwluden die heur op de bost sleugen en over him weeklaegden.
28 Jezus keerde him mar naor heur omme en zee: "Dochters van Jeruzalem, goel niet om mi'j. Goel liever om jezels en om je kiender,
29 want weet, de tied zal kommen dat de meensken zeggen zullen: "Gelokkig wie onvruchtber is, gelokkig de moekeschoot die niks brocht het en de bost an gien kiend geven het."
30 Dan zullen de meensken tegen de bargen zeggen: "Vaal op oons daele!" en tegen de heuvels: "Bedekke oons!"
31 Want as dit gebeurt mit et jonge hoolt, wat zal et verdreugde hoolt dan niet te waachten staon?"
32 Tegere mit Jezus wodden nog twie aanderen, beiden misdaodigers, wegleided om terechte steld te wodden.
33 Bi'j et plak ankommen die et Schedelplak hiet, wodde hi'j an et kruus hongen, tegere mit de beide misdaodigers, de iene rechts van him, de aander links.
34 Jezus zee: "Heit, vergeef heur, want zi'j weten niet wat ze doen." De soldaoten verpatten zien kleren onder mekeer deur d'r omme te dobbelen.
35 Et volk ston d’r bi’j toe te kieken. De leiders hoonden him en zeden: "Aanderen het hi'j redded; laot hi'j now himzels redden as hi'j de messias van God is, zien uutverkorene!"
36 De soldaoten dreven ok de spot mit him, zi'j gongen veur him staon en beuden him zoere wien an,
37 wiels ze zeden: "As ie de keuning van de Joden binnen, redde jezels dan!"
38 Boven him was een opschrift anbrocht: "Dit is de keuning van de Joden".
39 Iene van de krusegde misdaodigers zee spottend tegen him: "Ie bin toch de messias? Red jezels dan en oons ok!"
40 Mar de aander wees him terechte mit de woorden: "Heb ie dan alderdeegst gien ontzag veur God now ie dezelde straf ondergaon?
41 Wi'j hebben oonze straf verdiend en wodden beloond naor oonze daoden. Mar die man het niks onwettigs daon."
42 En hi'j zee: "Jezus, daenk an mi'j as jow in jow keuninkriek kommen."
43 Jezus zee doe: "Ik verzeker je, nog vandaege zul ie mit mi'j in et parredies wezen."
44-45 Rond et middagure wodde et slim duuster in et hiele laand omreden de zunne verduusterde. Et duuster duurde drie uren. Doe scheurde et veurhangsel van de tempel deurmidden.
46 En Jezus reup mit lude stemme: "Heit, in jow hanen leg ik mien leven." Doe hi'j dat zegd had, blaosde hi'j zien laeste aosem uut.
47 De centurio zag wat d'r gebeurd was en loofde God mit de woorden: "Warkelik, disse meenske was een rechtveerdige!"
48 De meensken die veur et schouwspel bi'jmekeer kommen weren en zien hadden wat daor gebeurde, gongen weeromme naor huus, wiels zi'j heur op de bost sleugen.
49 Alle meensken die Jezus kend hadden weren op een ofstaand staon bleven, ok de vrouwluden die him vanuut Galilea volgd weren en alles gebeuren zien hadden.
50-51 D'r was ok een man die Jozef hiette en uut de Joodse stad Arimatea kwam. Hi'j was een raodsman, een goed en rechtveerdig meenske, die de komst van et keuninkriek van God verwachtte en niet instemd had mit et besluut en de handelswieze van de raod.
52 Hi'j gong naor Pilatus en vreug him om et lichem van Jezus.
53 Naodat hi'j et lichem van et kruus haeld had, wikkelde hi'j et in linnen en legde et in een rotsgraf dat nog nooit bruukt was.
54 Et was de veurbereidingsdag, de sabbat was al haost begonnen.
55 De vrouwluden die mit Jezus mitreisd weren uut Galilea, volgden Jozef naor et graf om et te bekieken en om te zien hoe Jezus zien lichem daor daelelegd wodde.
56 Doe gongen zi'j naor huus en maekten ze lekker roekende eulie en balsem. Op sabbat neumen zi'j de veurschreven rust in acht.




Lucas 24.

Et lege graf.

01 Op de eerste dag van de weke gongen ze bi'j et eerste morgenlocht naor et graf mit de lekker roekende eulie die ze klaormaekt hadden.
02 Bi'j et graf kommen, zaggen ze dat de stien veur et graf wegruuld was,
03 en doe ze naor binnen gongen, vunnen zi'j et lichem van de Heer Jezus niet.
04 Hierdeur raekten ze hielendal van streek. Opiens stonnen d'r twie manluden in straolende kleren bi'j heur.
05 Zi'j schrokken allemachtig en sleugen de hanen veur heur ogen. De manluden zeden tegen heur: "Waoromme zuken jim de levendige onder de dooien?
06 Hi'j is hier niet, hi'j is uut de dood opwekt. Herinnere jim wat hi'j jim zegd het doe hi'j nog in Galilea was:
07 de Meenske-zeune mos uutleverd wodden an zundige meensken en mos krusegd wodden en op de dadde dag zol hi'j weer opstaon."
08 Doe herinnerden zi'j heur zien woorden.
09 Ze gongen bi'j et graf weg en gongen tegen de elf en an alle aanderen vertellen wat d'r gebeurd was.
10 De vrouwluden die et graf bezochten, weren Maria uut Magdala, Johanna, Maria de moeke van Jakobus, en nog een peer aandere vrouwluden die bi'j heur weren. Zi'j vertelden de apostels wat d'r gebeurd was,
11 mar die vunnen et mar kletspraot en geleufden heur niet.
12 Mar Petrus kwam in de bienen en leup in zeuven haosten naor et graf. Hi'j gong veurover staon om goed te kieken, mar zag allienig de linnen doeken liggen. Doe gong hi'j weeromme, hielendal veraldereerd over wat d'r gebeurd was.

Verschienings en hemelvaort.

13 Diezelde daegs gongen twie van de leerlingen onderweg naor een dörp dat Emmaüs hiet en zestig stadie (1 stadie = 192 meter) van Jeruzalem weg ligt.
14 Ze praoten mit mekeer over alles wat d'r veurvalen was.
15 Wiels zi'j zo mit mekeer praoten, kwam Jezus zels naor heur toe en leup mit heur mit,
16 mar heur zicht wodde vertroebeld, zodat zi'j him niet herkenden.
17 Hi'j vreug heur: "Waor lopen jim toch over te praoten?" Doe bleven ze somber stemd staon.
18 Iene van heur, die Kleopas hiette, zee doe: "Bin jow dan de ienige vremdeling in Jeruzalem die niet wet wat daor disse daegen gebeurd is?"
19 Jezus vreug heur: "Wat dan?" Zi'j zeden doe: "Wat d'r gebeurd is mit Jezus uut Nazaret, een machtig profeet in woord en daod in de ogen van God en van et hiele volk.
20 Oonze hogepriesters en leiders hebben him tot de dood laoten veroordielen en him krusegen laoten.
21 Wi'j leefden in de hope dat hi'j degene was die Israël vri'j maeken zol, mar ondertussen is et de dadde dag sund dit alles gebeurd is.
22 Butendat hebben een peer vrouwluden uut oons midden oons in alteraosie brocht. Doe zi'j vandemorgen vroeg naor et graf gongen,
23 vunnen zi'j zien lichem daor niet en ze kwammen oons zeggen dat d'r engels an heur verschenen weren. De engels zeden dat hi'j niet dood is mar leeft.
24 Een peer van oons bin doe ok naor et graf west te kieken en troffen et an zoas de vrouwluden zegd hadden, mar ze zaggen Jezus niet."
25 Doe zee hi'j tegen heur: "Hebben jim dan zo weinig verstaand en bin jim zo traoge van begrip dat jim niet geleuven in alles wat de profeten zegd hebben?
26 Mos de messias al dat lieden niet ondergaon om zien glorie binnen te gaon?"
27 Doe verklaorde hi'j heur wat d'r in al de Schriften over him schreven ston, en hi'j begon bi'j Mozes en de Profeten.
28 Ze kwammen in de buurt van et dörp waor ze henne zollen. Jezus dee asof hi'j veerder reizen wol.
29 Mar ze drongen d'r stark bi'j him op an om dat niet te doen en zeden: "Blief bi'j oons, want de dag lopt an ‘t aende et is al twielochten." Hi'j gong mit et dörp in en bleef bi'j heur.
30 Doe hi'j mit heur an taofel anlag, nam hi'j de bolle, zee et zegengebed, brak et en gaf et heur.
31 Now wodden heur ogen eupend en herkenden ze him. Mar hi'j verdween uut heur zicht.
32 Doe zeden ze tegen mekeer: "Braande oons hatte niet doe hi'j onderwegens mit oons praotte en de Schriften veur oons uutstokte?"
33 Ze kwammen overaende en gongen drekt weeromme naor Jeruzalem, waor ze de elf en de aanderen antroffen,
34 die tegen heur zeden: "De Heer is warkelik uut de dood opwekt en hi'j is an Simon verschenen!"
35 De twie leerlingen vertelden wat d'r onderwegens gebeurd was en hoe hi'j him an heur kenber maekt had deur et breken van de bolle.
36 Wiels ze nog an et vertellen weren, kwam Jezus zels in heur midden staon en zee: "Vrede zal mit jim wezen."
37 Veraldereerd en deur aangst overmaand, mienden zi'j een geestverschiening te zien.
38 Mar hi'j zee tegen heur: "Waoromme bin jim zo ontzet en waoromme bin jim te prooi valen an twiefel?
39 Kiek naor mien hanen en voeten, ik bin et zels! Raek mi'j mar an en kiek goed, want een geest het gien vleis en gien bonkerak zoas jim zien dat ik dat wel hebbe."
40 Doe leut hi'j heur zien hanen en voeten zien.
41 Omreden zi'j et van bliedschop nog niet geleuven konnen en stomverbaosd weren, vreug hi'j heur: "Hej’m hier ok wat te eten?"
42 Ze gavven him een stok reusterde vis.
43 Hi'j nam et an en at et veur heur ogen op.
44 Hi'j zee tegen heur: "Doe ik nog bi'j jim was, heb ik tegen jim zegd dat alles wat in de Wet van Mozes, bi'j de Profeten en in de Psalms over mi'j schreven staot in vervulling gaon mos."
45 Doe maekte hi'j heur verstaand ontvankelik veur et begriepen van de Schriften.
46 Hi'j zee tegen heur: "D'r staot schreven dat de messias lieden en starven zal, mar dat hi'j de dadde daegs opstaon zal uut de dood,
47-48 en dat in zien naeme alle volken opreupen wodden zullen om tot inkeer te kommen, zodat heur zunden vergeven wodden. Jim zullen hiervan getugenis ofleggen, te beginnen in Jeruzalem.
49 Ik zal d'r veur zorgen dat de belofte van mien Heit an jim inlost wodt. Blief in de stad tot jim mit kracht uut de hemel beklieded binnen."
50 Hi'j nam heur mit de stad uut, tot bi'j Betanië. Daor stak hi'j zien hanen op en zegende heur.
51 Wiels hi'j heur zegende, gong hi'j bi’j heur weg en wodde in de hemel opneumen.
52 Ze brochten him hulde en gongen in grote vreugde weeromme naor Jeruzalem,
53 waor ze de hieltied in de tempel bleven en God loofden.