Jozua
in een
Stellingwarver vertaeling
Et
boek Jozua het de naeme kregen van de heufdpersoon Jozua, de opvolger van
Mozes. Et boek slöt vot-en-daolik an bi'j de verhaelende stokken in
Deuteronomium. In de Hebreeuwse biebel heurt Jozua mit Rechters, Samuël en
Keunings tot de boeken van de Vroege Profeten. Daorin wodt verteld hoe de
Israëlieten et laand Kanaän in bezit nemen en d'r een bestaon opbouwen.
Profeten treden op om et volk te herinneren an de wet van Mozes en te
waorschouwen tegen et overtreden van de geboden. Op grond van de
geschiedkundige inhoold wodt Jozua ok wel tot de historische boeken rekend. Et boek
vormt saemen mit de verhaelende stokken in Genesis, Exodus, Leviticus, Numeri,
Deuteronomium, Rechters, Samuël en Keunings een min of meer deurlopende
geschiedenis. Vandaege-de-dag nemen pattie an dat disse boeken in disse vorm et
risseltaot binnen van een langdurig perces van overleveren en redigeren. Et
redaksieperces is al in de tied van de keunings van Israël en Juda begonnen
(ongeveer 1000-586 v.Chr.) en wodde eerst ofsleuten nao de Babylonische
ballingschop, in de Joodse gemienschop in de tied van de twiede tempel (na 515
v.Chr.).
Et
boek Jozua is te beschouwen as verkondigende geschiedschrieving in verhaelende
vorm. De lezer wodt niet alliend infermeerd over de verdieling van et laand
onder de Israëlitische stammen, mar ok opreupen om te leven neffens de wet van
Mozes en trouw te blieven an de ienigste God, de God van Israël. Et centraole
thema is de verovering van Kanaän en de verdieling van et grondgebied onder de
stammen van Israël. Hiermit gaot God zien toezegging an de veuroolden in vervulling.
De stiel van et boek is beheurlik briedvoerig, liekegoed in de verhaelende
stokken as in de meer zaekelik opstelde liesten mit opsommings van overwunnen
keunings en an de verschillende stammen toewezen steden en gebieden.
In
et boek Jozua bin drie patten te onderscheiden. In et eerste pat (1-12) wodt
verteld hoe de Israëlieten onder leiding van Jozua de Jordaan overstikken, en
hoe mit God zien hulpe et laand Kanaän stokkien veur stokkien veroverd wodt. In
kepittel 12 staot een liest van versleugen keunings. In et twiede pat (13-21)
wodt et laand onder de stammen verpat. Et dadde pat (22-24) gript weeromme op
et begin: de oostelike stammen gaon weeromme naor et heur toewezen grondgebied
(vergeliek 1:12-15 en 22:1-34). In twie toespraoken nemt Jozua dan ofscheid van
et volk. Hi'j wist d'r op dat God zien toezeggings vervuld binnen en dot een
beroep op et volk om gien aandere goden te dienen. Et boek slöt of mit een tal
mitdielings, onder aandere et bericht van de dood van Jozua.
Vertaeling van de Biebel (NBV 2004)
deur Piet Bult uut Ni’jberkoop
Jozua 1
Kommedaosie
van de Heer an Jozua
01 Nao de dood van Mozes, de knecht van de Heer, zee
de Heer tegen Jozua, de zeune van Nun en de rechterhaand van Mozes:
02 "Now mien knecht Mozes wegraekt is, moet ie je
klaormaeken om mit dit hiele volk de Jordaan over te stikken. Gao naor et laand
dat ik et volk van Israël geven zal.
03 Ieder stok grond daj'm betreden zullen geef ik jim,
zoas ik Mozes toezegd hebbe.
04 Jim gebied zal him uutstrekken van de woestijn tot
an de Libanon, en van de grote revier, de Eufraat, mit et laand van de
Hethieten, tot an de Grote Zee in et westen.
05 Zolange ie leven zal gieniene tegen jow staandholen
kunnen. Zoas ik Mozes hulpen hebbe, zo zal ik jow ok bi'jstaon. Ik zal niet van
je ziede wieken en je niet verlaoten.
06 Wees vastberaoden en staandvaastig, want ie moe'n
dit volk leiden as ze et laand veroveren dat ik heur geven zal, zoas ik heur
veuroolden zweerd hebbe.
07 En hool je veur alles vastberaoden en staandvaastig
an de wet waorin mien knecht Mozes je onderwezen het. Hool je daor de hieltied
an en wieke d'r op gien inkelde meniere van of, zodat ie in alles waj' doen
slaegen zullen.
08 Legge dat wetboek gien mement an de kaante en
verdiep je d'r dag en naacht in, zodat ie je an alles holen wat d'r in schreven
staot. Dan zal alles waj' ondernemen veurspoedig verlopen.
09 Ik drege je dus op: wees vastberaoden en
staandvaastig, laot je deur niks weerholen of ontmoedigen, want waoj' ok gaon,
de Heer, je God, staot je bi'j."
10 Jozua gaf doe de schrievers van et volk de
kommedaosie:
11 "Gao et hiele kaamp deur en zegge tegen et
volk dat et veur eteri'je zorgen moet. Et zal over drie daegen de Jordaan overstikken
om et laand in bezit te nemen dat de Heer, heur God, heur geven zal."
12 Tegen de stammen Ruben en Gad en de eerste helte
van de stamme Manasse zee hi'j:
13 "Hool jim an de kommedaosie die Mozes, de
knecht van de Heer, jim geven het. Mozes het zegd: “de Heer, jim God, zal jim
vrede geven en jim dit gebied geven.”
14 En Mozes zee veerder dat jim vrouwluden, kiender en
vee in dit gebied blieven meugen dat hi'j jim an disse kaante van de Jordaan
toewezen het. Mar alle weerbere manluden onder jim moe'n heur breurs in
slagodder veurgaon in de stried om ze te steunen,
15 tot de Heer jim allemaole vrede geft en zi'j et
gebied ok in bezit neumen hebben dat de Heer, jim God, heur geft. Eerst dan
meuj'm weerommegaon en jim eigen gebied in bezit nemen dat Mozes, de knecht van
de Heer, jim an de oostkaante van de Jordaan toewezen het."
16 Zi'j zeden doe tegen Jozua: "We zullen alles
doen wat jow oons opdreugen hebben en rondomme daor henne gaon waor jow oons
henne sturen.
17 Zoas we naor Mozes luusterd hebben, zo zuwwe we
naor jow luusteren. Mag de Heer, jow God, jow bi'jstaon, zoas hi'j Mozes hulpen
het.
18 Alleman die niet naor jow luustert en him tegen jow
kommedaosies verzet, tegen wat bevel dan ok, zal ommebrocht wodden. Wees
vastberaoden en staandvaastig."
Jozua 2
Spionnen in
Jericho
01 Hiernao stuurde Jozua, de zeune van Nun, d'r vanuut
Sittim in et geheim twie spionnen op uut. Hi'j gaf heur de kommedaosie:
"Verken et hiele gebied, mar veural Jericho." De manluden vertrokken.
Doe ze in Jericho kommen weren, vunnen ze onderdak bi'j een hoer, die Rachab
nuumd wodde, bi'j wie ze overnaachten wollen.
02 Mar doe de keuning van Jericho heurde dat d'r die
naacht spionnen van Israël kommen weren,
03 leut hi'j Rachab dit bevel geven: "Lever ze
uut, die manluden die bi'j je binnen, want zi'j bin hier om te spioneren."
04 Mar Rachab – die de twie manluden verburgen hadde –
zee: "Die manluden hebben mi'j inderdaod bezocht, mar ik weet niet waor ze
weg kwammen.
05 Ze bin vertrokken vlak veurdat et duuster wodde en
de poort sleuten wodden zol. Ik hebbe gien idee waor ze henne gaon binnen. Gao
ze vlogge aachternao, dan haelen jow ze nog in."
06 Rachab hadde de manluden naor et dak brocht en ze
daor verstopt onder bundels vlas.
07 Heur aachtervolgers vertrokken drekt in de richting
van de Jordaan, naor de overstikplakken. Zogauw ze de stad verlaoten hadden
wodde de poort sleuten.
08 Rachab gong naor et dak veurdat de manluden in
slaop wezen zollen.
09 "Ik weet," zee ze tegen heur, "dat
de Heer dit laand an jim geven het. Wi'j bin deur aangst overmaand. Alle
inwoners van dit laand bin doodsbenauwd veur jim,
10 want we hebben heurd dat de Heer de Rietzee veur
jim dreugelegd het doej'm uut Iegypte wegtrokken en daj'm Sichon en Og, de twie
keunings van de Amorieten an de oostkaante van de Jordaan, verdistreweerd
hebben.
11 Doe we dat heurden, sleug de aangst oons om et
hatte en wodden we wanhopig. De Heer, jim God, is ommes een God die macht het
in de hemel en op eerde.
12 Zweer mi'j dan bi'j de Heer daj'm mien femilie en
mi'j goed behaandelen zullen. Ik hebbe jim toch ok goed behaandeld? Zweer et
mi'j, geef me de wissighied
13 daj'm mien heit en moeke, mien breurs en zusters en
heur kiender speren zullen. Redde oons van de dood!"
14 De manluden zeden doe tegen heur: "We staon
veur jim borg mit oons leven, op veurweerde daj'm oonze plannen niet verraoden.
As de Heer oons dit laand geven het, zuwwe oonze toezegging naokommen."
15 Rachab woonde in een huus in de stadsmure. Ze leut
de spionnen langs een touw deur et veenster naor beneden zakken.
16 "Perbere in de bargen te kommen," zee ze,
"aanders vienen de aachtervolgers jim. Hool jim daor drie daegen schoel,
tot ze weerommekommen binnen. Gao daornao eerst vot."
17 De manluden zeden: "We bin niet in alle
gevallen bunnen an de eed die ie oons zweren laoten hebben.
18 Awwe dit laand binnentrekken, moet ie dit rooie
kore an et veenster bienen waordeur ie oons zakken laoten hebben. Zorg d'r dan
veur dat je heit en moeke, je breurs en je hiele veerdere femilie bi'j je in
huus binnen.
19 Wie van jim dan naor buten gaot, is zels schuldig
an zien dood. In dat geval biwwe niet an oonze eed bunnen. Mar wodt d'r ok mar
iene kwaod daon die binnen blift, dan bin wi'j schuldig.
20 En we bin ok niet bunnen an de eed die ie oons
zweren laoten hebben aj' oonze plannen verraoden."
21 Rachab stemde hiermit in en leut de manluden gaon.
En ze bun et rooie kore an et veenster.
22 De manluden gongen de bargen in en bleven daor drie
daegen, tot de aachtervolgers weerommekommen weren. Ze hadden rondomme zocht,
mar gieniene vunnen.
23 Doe kwammen de twie manluden de bargen uut, stakken
de Jordaan over en meldden heur bi'j Jozua, de zeune van Nun, an wie ze alles
vertelden wat heur overkommen was.
24 Ze zeden him: "De Heer het oons et hiele laand
in hanen geven, de inwoners bin doodsbenauwd veur oons.
Jozua 3
Overtocht
over de Jordaan
01 De aanderemorgen vroeg trok Jozua mit et hiele volk
vot uut Sittim. Ze kwammen tot an de Jordaan, waor ze drie daegen bleven veur
ze d'r overtrokken.
02 Op de dadde dag gongen de schrievers et kaamp deur
03 om et volk te zeggen: "Aj'm de Levitische
priesters de ark van et verbond mit de Heer, jim God, dregen zien, dan moej'm
et kaamp opbreken en de ark volgen.
04 Mar blief op grote ofstaand, omdebi'j twieduzend
el, kom niet dichterbi'j. Dan kuj'm zien wat weg jim gaon moeten, want jim bin
hier gienertied eerder west."
05 En Jozua zee tegen et volk: "Waske jim, want
morgen zal de Heer midden tussen jim in wonderen doen."
06 De aanderedaegs gaf hi'j de priesters de
kommedaosie: "Gao mit de ark van et verbond veur et volk uut." De
priesters neumen doe de ark van et verbond op en gongen veur et volk uut,
07 en de Heer zee tegen Jozua: "Vandaege za'k d'r
veur zorgen daj' bi'j alle Israëlieten hoge in anzien staon kommen zullen,
zodat ze weten da’k je helpen zal, zoas ik Mozes hulpen hebbe.
08 Zegge tegen de priesters die de ark van et verbond
dregen dat zi'j, zogauw ze bi'j de wal van de Jordaan kommen binnen, in et
waeter staon blieven moeten."
09 Jozua reup doe et volk bi'jenneer en zee:
"Luuster naor de woorden van de Heer, jim God." En hi'j gong deur:
10 "Jim zullen vernemen dat de levendige God in
jim midden is en begriepen dat hi'j et is die de Kanaänieten en de Hethieten,
de Chiwwieten en de Perizzieten, de Girgasieten, de Amorieten en de Jebusieten
veur jim op de vlocht jaegen zal.
11 De ark van et verbond mit de Heer van de hiele
eerde gaot ommes veur jim uut de Jordaan in.
12 Kies now twaelf manluden, iene uut iedere stamme
van Israël.
13 Op et mement dat de priesters die de ark van de
Heer dregen, de Heer van de hiele eerde, de Jordaan in gaon, zal de stroom
opholen en zal et waeter opkommen as een dam."
14 Doe et volk et kaamp opbreuken hadde om de Jordaan
over te trekken, gongen de priesters die de ark van et verbond dreugen veur et
volk uut.
15 Zogauw de priesters bi'j de Jordaan kommen weren en
heur bienen deur et waeter ommespoeld wodden – de Jordaan ston de hiele
oogsttied buten zien wallen –,
16 hul et waeter op te stromen en wodde et een dam,
hiel in de veerte bi'j de stad Adam, die vlak bi'j Saretan ligt. Et waeter dat
naor de Zooltene-zee gong, ofwel de Dooie Zee, stroomde hielendal vot. Et volk
trok over op de hoogte van Jericho.
17 De priesters die de ark van et verbond mit de Heer
dreugen, bleven krek in et midden van de bojem van de Jordaan staon, wiels hiel
Israël overtrok, tot de laeste man.
Jozua 4
01 Naodat et hiele volk de Jordaan overgetrokken was,
zee de Heer tegen Jozua:
02 "Kieze now twaelf manluden, iene uut iedere
stamme,
03 en zegge heur dat ze van et plak waor de priesters
in de Jordaan staon twaelf stienen haelen moeten. Die moe'n ze mitnemen en in
et kaamp leggen waor ze vanof disse naacht verblieven zullen."
04 Jozua leut twaelf manluden anwiezen, iene uut
iedere stamme van Israël, en naodat hi'j heur bi'jenneer reupen hadde,
05 zee hi'j tegen heur: "Gao veur de ark van de
Heer, jim God, de Jordaan in. Jim moe'n allemaole iene stien op jim schoolders
nemen, iene veur iedere stamme van Israël.
06 Ze zullen een gedaenkteken veur jim wezen. As jim
kiender laeter vraogen zullen wat die stienen betekenen,
07 dan moej'm ze vertellen dat et waeter van de
Jordaan tegenholen wodde deur de anwezigens van de ark van et verbond mit de
Heer. Vertel ze dat doe de ark de Jordaan in gong et waeter ofsneden wodde en
dat disse stienen daorvan veur Israël een iewig gedaenkteken binnen."
08 De manluden deden wat Jozua heur zegd hadde. Ze
haelden twaelf stienen uut de Jordaan, iene veur iedere stamme, zoas de Heer an
Jozua opdreugen hadde. Ze dreugen de stienen mit heur mit naor heur kaamp en
legden ze daor daele.
09 Jozua zette ok twaelf stienen in et midden van de
Jordaan daele, op et plak waor de priesters stonnen die de ark van et verbond
dreugen. Die stienen staon daor tot op de dag van vandaege.
10 De priesters die de ark dreugen stonnen in et
midden van de Jordaan, tot de kommedaosie die Jozua et volk in naeme van de
Heer geven hadde hielendal uutvoerd was, neffens de kommedaosie die hi'j al van
Mozes kregen hadde. Et volk trok zo vlogge meugelik over,
11 en doe et hielendal an de ginne kaante was gongen
de priesters ok mit de ark van de Heer naor de overkaante en trokken ze
veerder, veur et volk uut.
12 Ok de stammen Ruben en Gad en de eerste helte van
de stamme Manasse trokken in slagodder veur Israël uut, zoas Mozes heur
beveulen hadde.
13 Disse veurhoede van et leger, zoe'n veertigduzend
man, trok nog veur de ark van de Heer uut naor de stried op de vlakte van
Jericho.
14 Op die dag verhoogde de Heer et anzien van Jozua
bi'j de Israëlieten, zodat ze zien leven lange ontzag veur him hadden, zoas ze
ok veur Mozes had hadden.
15 De Heer zee tegen Jozua:
16 "Zegge tegen de priesters die de ark mit de
tekst van et verbond dregen dat ze uut de Jordaan kommen."
17 Jozua gaf heur die kommedaosie,
18 en doe de priesters die de ark van et verbond mit
de Heer dreugen uut de Jordaan kwammen en de wal opkwammen, begon et waeter weer
te stromen en leup et over de wallen, zoas et eerder daon hadde.
19 Et volk beriekte de overkaante van de Jordaan op de
tiende dag van de eerste maond, en et sleug zien kaamp op bi'j Gilgal, dat
oostelik van Jericho ligt.
20 Jozua zette daor de twaelf stienen daele die ze uut
de Jordaan mitneumen hadden.
21 Hi'j zee tegen de Israëlieten: "As jim kiender
laeter vraogen wat disse stienen betekenen,
22 dan moej'm heur dit vertellen: “Israël is de
Jordaan overtrokken, en wel over de dreuge bojem.
23 Want de Heer, jim God, het de Jordaan veur jim dreugelegd
tot jim overtrokken weren, zoas hi'j de Rietzee ok veur oons dreugelegd het tot
we die overtrokken weren.
24 Want alle volken op eerde moe'n weten hoe machtig
de Heer, jim God, is, en jim moe'n de hieltied vol ontzag veur him
wezen.”"
Jozua 5
01 Doe de keunings van de Amorieten an de westkaante
van de Jordaan en de keunings van de Kanaänieten bi'j de zee heurden dat de
Heer de Jordaan dreugelegd hadde, zodat de Israëlieten overstikken konnen,
sleug de aangst veur Israël heur om et hatte en wodden ze deur de ellendige
toestaand overmeesterd.
Besniedenis
en Pesach
02 Nao de overtocht zee de Heer tegen Jozua:
"Maek messen van vuurstien en besniede de Israëlieten opni'j."
03 Jozua maekte die messen en hi'j besneed de
Israëlieten opni'j bi'j de Voorhuidenheuvel.
04 Hi'j besneed heur omreden alle weerbere manluden
die uut Iegypte wegtrokken weren, nao de uuttocht wegraekt weren, onderwegens
in de woestijn.
05 Van et volk dat wegtrokken was weren alle manluden
besneden west, mar de manluden die nao de uuttocht geboren weren, doe et volk
onderwegens was in de woestijn, weren niet besneden.
06 Want Israël trok veertig jaor deur de woestijn, tot
alle weerbere manluden die uut Iegypte wegtrokken weren, wegraekt weren. Ze
hadden niet naor de Heer luusterd, en daoromme hadde de Heer heur zweerd dat
hi'j heur niet et laand zien laoten zol dat hi'j oons geven zol, zoas hi'j
oonze veuroolden toezegd hadde: et laand dat overlopt van melk en hunning.
07 Mar hi'j leut heur zeunen heur plak innemen. Dus
besneed Jozua disse zeunen, omreden dit onderwegens niet daon was.
08 Naodat ze allemaole besneden weren, mossen ze in
heur tenten blieven tot ze genezen weren.
09 En de Heer zee tegen Jozua: "Vandaege he'k de
schaande van Iegypte van jim ofneumen," en Jozua nuumde dat plak Gilgal.
Zo hiet dat plak tot op de dag van vandaege.
10 Doe de Israëlieten in heur kaamp bi'j Gilgal weren,
op de vlakte van Jericho, maekten zi'j in de aovend van de veertiende dag van
die eerste maond et pesachoffer klaor.
11 Al iene dag nao et pesachoffer atten ze ongedesemd
brood en reusterd graon van de opbrengst van et laand.
12 D'r kwam die dag gien manna meer; de Israëlieten
kregen vanof doe gienertied meer manna. Ze atten dat jaor van de opbrengst van
de akkers van Kanaän.
Verinnewaosie
van Jericho
13 Doe Jozua es in de kontreinen van Jericho leup, zag
hi'j opiens een man tegenover him mit een trokken zweerd in de haand. Jozua
gong op him of en vreug: "Heur ie bi'j oons of bi'j de vi'jaand?"
14 De man zee doe: "Bi'j gien van beide, ik bin
de anvoerder van et leger van de Heer. Daoromme bin 'k hier." Jozua vul op
zien kni'jen, beug diepe veurover en vreug him: "Mien heer, ik bin jow
knecht, wat bevelen jow mi'j?"
15 De anvoerder van et leger van de Heer zee tegen
Jozua: "Trekke je sandalen uut, want et plak waorop ie staon is
heilig." Jozua dee wat him opdreugen was.
Jozua 6
01 Jericho was doe al hielemaole ofgrundeld uut aangst
veur de Israëlieten, d'r kon gieniene in of uut.
02 De Heer zee tegen Jozua: "Ik lever Jericho mit
zien keuning en al zien dappere helden an je uut.
03 Jim moe'n om de stad henne trekken; alle weerbere
manluden moe'n ienkeer om de stad henne gaon, en dat zes daegen aachter mekeer.
04 D'r moe'n zeuven priesters mit zeuven ramshoorns
veur de ark van et verbond uut gaon. Mar op de zeuvende dag moej'm zeuvenmaol
om de stad henne trekken. De priesters moe'n op de ramshoorns blaozen,
05 en as et volk die klinken heurt moet et luud
beginnen te raozen. De mure van de stad zal dan instotten en iederiene zal de
stad binnenklimmen vanof et plak waor hi'j dan is."
06 Jozua, de zeune van Nun, leut doe de priesters
kommen en gaf heur de kommedaosie: "Pakke de ark van et verbond op. Zeuven
priesters moe'n mit zeuven ramshoorns veur de ark van de Heer uut gaon."
07 En tegen et volk zee hi'j: "Gao naor de stad,
trekke d'r ommehenne en laot de veurhoede van et leger veur de ark van de Heer
uut gaon."
08 Et gebeurde zoas Jozua et volk opdreugen hadde.
Zeuven priesters gongen mit zeuven ramshoorns veur de Heer uut; ze trokken al
blaozend op de ramshoorns op naor de stad. De ark van et verbond mit de Heer
kwam aachter heur an,
09 de veurhoede gong veur de priesters uut die op de
ramshoorns blaosden en de rest van et volk kwam aachter de ark. De ramshoorns
klonken zonder opholen,
10 mar Jozua hadde striedkreten verbeuden. "Laot
jim stemme niet heuren," hadde hi'j zegd, "slaek gien inkelde galp
tot et mement waorop ik jim dat opdrege om te doen."
11 Jozua leut de ark van de Heer ienkeer om de hiele
stad trekken. Daornao gong et volk weeromme naor et kaamp, waor et
overnaachtte.
12 De aanderedaegs kwam Jozua in alle vroegte in de
bienen. De priesters pakten de ark van de Heer op,
13 de zeuven priesters mit de zeuven ramshoorns
trokken al blaozend op de hoorns veur de ark van de Heer uut, de veurhoede gong
veur heur uut en de rest van et volk kwam aachter de ark van de Heer. Zonder
opholen klonken de ramshoorns.
14 De Israëlieten trokken ok op de twiede dag ienkeer
om de stad henne en gongen daornao weeromme naor et kaamp. Zo deden ze dat zes
daegen.
15 Op de zeuvende dag kwammen ze morgensvroeg in de
bienen en trokken op dezelde meniere zeuvenmaol om de stad henne. Alliend op
disse dag trokken ze zeuvenmaol om de stad henne,
16 en bi'j de zeuvende keer, doe de priesters de
ramshoorns klinken leuten, reup Jozua tegen et volk: "Raos, want de Heer
het jim Jericho in hanen geven!
17 Mar op de stad en alles wat d'r in is rust de ban
van de Heer: zi'j is zonder veurweerde an de Heer wi'jded en moet
verdistreweerd wodden. Alliend de hoer Rachab mag in leven blieven, saemen mit
iederiene die bi'j heur in huus is, want zi'j het oonze verkenners een
verschoel geven.
18 Mar daenke d'r an dat op al et aandere een ban
rust. Dus maek de stad kepot mar maek niks buit, zodat jim niet Israël zien
eigen kaamp an de verinnewaosie priesgeven en Israël in et ongelok stot.
19 Al et zulver en goold en alle veurwarpen van
keuper, broons en iezer bin an de Heer wi'jded; alles gaot naor de schatkaemer
van de Heer."
20 Doe de ramshoorns klonken, begon et volk donderend
te raozen. De mure vul omme en iederiene klom de stad binnen vanof et plak waor
hi'j was. Ze neumen de stad in
21 en maekten alles van kaant wat d'r in was,
liekegoed manluden as vrouwluden, liekegoed kiender as bejaorden, liekegoed
runder en schaopen as ezels.
22 Mar Jozua zee tegen de twie manluden die et gebied
verkend hadden: "Gao naor et huus van die hoer en breng heur mit heur
hiele femilie naor buten, zoas jim heur zweerd hebben."
23 De verkenners brochten Rachab naor buten, saemen
mit heur heit en moeke, breurs en veerdere femilie. Kotomme, ze brochten heur
mit al heur verwaanten naor buten en gavven heur een plak buten et kaamp van
Israël.
24 De Israëlieten leuten de stad mit alles wat d'r in
was in vlammen opgaon; alliend et zulver en goold en de keuperen, broonzen en
iezeren veurwarpen brochten ze in de schatkaemer van et heiligdom van de Heer.
25 Mar de hoer Rachab wodde deur Jozua speerd, saemen
mit iederiene die tot heur femilie heurde. Heur naokommelingen wonen tot op de
dag van vandaege onder de Israëlieten, want Rachab hadde de manluden die in
kommedaosie van Jozua Jericho verkennen mossen een verschoel geven.
26 Jozua leut et volk disse eed zweren: "Wi'j
vervluken tegenover de Heer iedere man die et waogt om disse stad, Jericho,
weer op te bouwen. Hi'j zal de follementen leggen in ’t naodiel van zien
ooldste zeune en de poortdeuren vaastemaeken in ’t naodiel van zien jongste
zeune."
27 En de Heer hulp Jozua en zien roem gong deur et
hiele laand.
Jozua 7
Naoleving van
de ban
01 Mar Israël leefde niet neffens de ban. D'r was een
zekere Achan: hi'j was een zeune van Karmi, die een zeune was van Zabdi, de
zeune van Zerach, en hi'j was ofkomstig uut de stamme Juda. Disse Achan vergreep
him an de spullen die zonder veurweerde an de Heer wi'jded weren. Hierop
ontsteuk de Heer in lelkens tegen et volk van Israël.
02 Jozua stuurde een peer manluden van Jericho naor
Ai, dat bi'j Bet-Awen ligt, an de oostkaante van Betel. Hi'j dreug heur op om
dat gebied te verkennen. De manluden verkenden Ai,
03 en doe ze weerommekommen weren brochten ze repot uut
an Jozua: "Jow hoeven niet et hiele leger naor Ai sturen te laoten. Zoe'n
twie- of drieduzend man is genoeg om de stad te verslaon. Et is echt niet
neudig dat jow et hiele leger mit een veldtocht naor die stad vermuuien, want
Ai het mar weinig inwoners."
04 D'r gongen doe een drieduzend man. Mar ze wodden op
de vlocht jacht deur et leger van Ai,
05 dat heur aachtervolgde vanof de poort tot op de
helling krek veurbi'j de ofgrond. Daor maekten ze zesendattig man van kaant.
Doe sleug de aangst et volk om et hatte en et wodde raodeloos.
06 Jozua en de ooldsten van Israël scheurden heur
kleren, smeten heur veur de ark van de Heer op ‘e grond en gooiden stof over
heur heufd. Zo bleven ze tot de aovend liggen.
07 Jozua reup uut: "Nee, Heer! Nee, mien God!
Waoromme hebben jow dit volk aenlik de Jordaan overtrekken laoten? Alliend om
oons over te leveren an de Amorieten en oons deur heur ommebrengen te laoten?
Weren we mar zo verstaandig west an de ginne kaante van de Jordaan te blieven.
08 Ach Heer, wat kan 'k aanders zeggen now Israël veur
zien vi'janen op de vlocht sleugen is?
09 As de Kanaänieten en alle aandere inwoners van dit
laand et heuren, zullen ze oons van alle kaanten anvalen en oonze naeme van de
eerdbojem wegvaegen. En hoe willen jow dan jow grote naeme overaende
holen?"
10 De Heer zee hierop tegen Jozua: "Kom
overaende! Wat lig ie daor now op de grond!
11 Israël het zundigd. Ze hebben et waogd om de regels
van et verbond te overtreden die ik heur geven hebbe. Ze hebben heur vergrepen
an de spullen waorop mien ban rustte. Zi'j hebben die steulen, en dat ok nog es
perberen te verdoezelen deur ze tussen heur eigen bezittings te verstoppen.
12 Daorom kan et volk van Israël niet staandholen
tegen zien vi'janen. Et zal veur zien vi'janen op de vlocht slaon, omreden et
now zels an de verinnewaosie priesgeven is. Ik zal jim niet meer helpen aj'm
jim niet van et steulen spul ontdoen.
13 Zorge d'r veur dat et volk him reinigt. Geef disse
kommedaosie: “wees morgen rein, want dit zegt de Heer, de God van Israël: jim
hebben spul in jim bezit waorop mien ban rust, Israëlieten. Jim zullen niet
overaende blieven kunnen tegen jim vi'janen tot jim die votdaon hebben.
14 Trede morgenvroeg an neffens jim stammen. De stamme
die de Heer anwist moet neffens de geslachten antreden. En et geslaacht dat de
Heer anwist moet neffens de femilies antreden. En van de femilie die de Heer
anwist moeten de manluden antreden.
15 Dan moe'n degene die as de schuldige anwezen wodt,
verbraand wodden, hi'j en hiel zien femilie, want hi'j het et verbond mit de
Heer schunnen. Wat hi'j daon het is veur et volk van Israël een daod van
schaande.”"
16 De aanderemorgenvroeg leut Jozua Israël antreden
neffens de stammen en de stamme Juda wodde anwezen.
17 Daornao leut Jozua de stamme Juda antreden en de
Heer wees et geslaacht van Zerach an. Daornao leut Jozua van et geslaacht van
Zerach de femilie-ooldsten antreden en Zabdi wodde anwezen.
18 En van zien femilie leut Jozua de manluden antreden
en Achan wodde anwezen: een zeune van Karmi, die een zeune was van Zabdi, de
zeune van Zerach, en ofkomstig uut de stamme Juda.
19 Jozua zee tegen him: "Kom, Achan, eerbiedig de
Heer, de God van Israël, en legge veur him een bekentenis of. Zeg me waj' daon
hebben. Hool et niet veur mi'j verburgen."
20 Achan zee doe: "Ik beken dat ik tegen de Heer,
de God van Israël zundigd hebbe. Dit is wa'k daon hebbe:
21 Ik zag dat d'r onder de buit een prachtige maantel uut
Sinear was en twiehonderd sjekel zulver en een gooldstaef die wel vuuftig
sjekel weug. Ik kon mien ogen d'r niet vanof holen en hebbe et steulen. Et ligt
allemaole in mien tente onder de grond verstopt. Et zulver ligt onder de
maantel."
22 Jozua stuurde een peer manluden, die vlogge naor de
tente gongen en daor de maantel vunnen, mit et zulver d'r onder.
23 Ze neumen et allemaole mit uut de tente, brochten
et naor Jozua en de Israëlieten en spreidden et veur de ark van de Heer op de
grond uut.
24 Hiernao brochten Jozua en de Israëlieten Achan, de
naokommeling van Zerach, naor et Achordal, saemen mit et zulver, de maantel en
de gooldstaef, en mit zien zeunen en dochters, runder en ezels, schaopen en
geiten en zien tente – kotomme, mit alles wat hi'j bezat.
25 Jozua zee: "Ie hebben oons in et ongelok stot!
Daorom zal de Heer jow vandaege in et ongelok stotten." Hi'j en zien hiele
femilie wodde deur hiel Israël stienigd en verbraand.
26 Daornao bestopten ze heur onder een grote bult
stienen. Doe bekoelde de lelkens van de Heer. Disse stienbulte is d'r tot op de
dag van vandaege en dit plak wodt et Achordal nuumd, tot op de dag van
vandaege.
Jozua 8
Verinnewaosie
van Ai
01 De Heer zee tegen Jozua: "Maek je klaor om mit
et voltallige leger tegen Ai de stried an te gaon. Wees niet bange en laot je
deur niks de moed ontnemen. Ik lever de keuning van Ai mit hiel zien leger,
hiel zien stad en hiel zien gebied an je uut.
02 Doe mit Ai en de keuning etzelde as waj' mit
Jericho en de keuning daon hebben. Mar now meugen jim alle spul en et vee veur
jimzels buitmaeken. Laot een troepemacht him verdekt aachter de stad
opstellen."
03 Jozua en et leger maekten heur doe klaor om tegen
Ai op te trekken. Jozua keus dattigduzend soldaoten uut, die hi'j naachs naor
Ai stuurde.
04 "Stelle je verdekt op aachter de stad,"
kommedeerde hi'j heur, "mar niet al te veer d'r bi'j weg. Blief peraot.
05 As ik mit et leger de stad naoder, zullen zi'j krek
as de veurige keer op oons ofkommen. Dan slao'we veur heur op de vlocht.
06 Ze daenken dan netuurlik dawwe krek as de veurige
keer echt de bienen nemen zullen en zullen oons aachternao kommen. We vlochten
krek zo lange tot we ze van de stad weglokt hebben.
07 Dan moe'n jim veur 't locht kommen en heur innemen.
De Heer, jim God, zal jim de stad in hanen geven.
08 Dus neem heur in en stik heur in braand, zoas de
Heer opdreugen het. Dit bin jim odders."
09 Hiernao leut Jozua de manluden votgaon, die him an
de westkaante van Ai, tussen Ai en Betel, verdekt opstelden. Jozua zels sleup
die naacht bi'j et leger.
10 De aanderemorgen vroeg inspekteerde Jozua et leger.
Daornao trok hi'j saemen mit de ooldsten van Israël an et heufd van et leger
veur de stried op naor Ai.
11 Al et kriegsvolk rokte mit him op, en doe ze in de
kontreinen van Ai kommen weren, sleugen zi'j heur kaamp op an de noordkaante
van de stad. Ze wodden alliend van heur scheiden deur een dal.
12 Veerder leut Jozua omdebi'j vuufduzend man an de
westkaante van de stad, tussen Ai en Betel, verdekt opstellen.
13 Daor was dus de aachterhoede van et leger, wiels et
leger zels zien kaamp an de noordkaante van Ai opsleugen hadde.
De naacht daornao trok Jozua mit et leger et dal deur.
14 Doe de keuning van Ai heur ankommen zag, rokte hi'j
vot-en-daolik mit al zien manluden uut om Israël an te valen. Hi'j trok
regelrecht naor et terrein dat uutziet op de Jordaanvallei. Mar hi'j wus niet
dat aachter de stad een troepemacht in 't verschoel zat.
15 Jozua leut him mit hiel Israël weerommedringen. Ze
sleugen op de vlocht in de richting van de woestijn,
16 en de inwoners van Ai zwiepten mekeer op om heur
nao te jaegen, mar deur aachter heur an te gaon wodden ze van de stad weglokt.
17 D'r bleef in Ai en Betel niet iene man over die
niet aachter Israël an gong, mar deur de aachtervolging in te zetten leuten
zi'j de stad onbeschermd aachter.
18 Doe zee de Heer tegen Jozua: "Stik je zweerd
uut naor Ai, want ik geef je de stad in hanen." Jozua stak zien zweerd uut
naor Ai,
19 en op dat teken kwam de achterhoede drekt te
veurschien, stormde de stad binnen, nam heur in en steuk heur in braand.
20 Doe de soldaoten van Ai ommezaggen en zaggen dat
d'r uut de stad rook opsteeg, stonnen ze zo verlamd van schrik dat ze niet in
staot weren om nog te vlochten. Ok wodden ze now bestookt deur et leger van
Israël, dat niet langer naor de woestijn vlochtte.
21 Want doe Jozua en et leger zaggen dat de aachterhoede
de stad inneumen hadde en dat d'r rook uut opsteeg, gongen ze weeromme en
vullen et leger van Ai an.
22 Toegeliekertied wodde et vanuut de stad deur de aachterhoede
anvalen, zodat et deur de Israëlieten omsingeld was. Israël maekte de soldaoten
van Ai van kaant tot d'r gieniene meer over was,
23 mar de keuning van Ai neumen ze levend gevangen en
ze brochten him naor Jozua.
24 Zo brocht Israël alle soldaoten van Ai omme op de
akkers en in de woestijn waor ze Israël aachtervolgd hadden; ze wodden
ommebrocht tot de laeste man. Daornao gong Israël opni'j naor Ai en maekte de
rest van de bevolking van kaant.
25 D'r raekten op die dag twaelfduzend manluden en
vrouwluden uut Ai weg,
26 want Jozua hul zien zweerd uutsteuken tot alle
inwoners van Ai ommebrocht weren.
27 Mar et vee en et spul van die stad maekte Israël
veur himzels buit, zoas de Heer an Jozua opdreugen hadde.
28 Jozua leut Ai in vlammen opgaon en maekte die stad
veur iewig tot een ruïne. Dat is daor zo tot op de dag van vandaege.
29 De keuning van Ai hong hi'j op an een boom en hi'j
leut him hangen tot de aovend. Eerst doe de zunne ondergong gaf Jozua bevel om
et liek van de boom te haelen en et in de stadspoort daele te smieten. Daor bestopten
ze him onder een grote bulte stienen, en die is d'r tot op de dag van vandaege.
Plechtighied
op de Ebal
30 Hiernao bouwde Jozua op de Ebal een alter veur de
Heer, de God van Israël,
31 zoas Mozes, de knecht van de Heer, et volk van
Israël opdreugen hadde. Hi'j bouwde et alter neffens de veurschriften van
Mozes: een alter van roege stienen, die niet mit iezeren ark bewarkt weren. De
Israëlieten brochten daornao braandoffers en vredesoffers veur de Heer.
32 Jozua maekte op stienen een ofschrift van de wet
die Mozes in anwezigens van et volk opschreven hadde.
33 Onderhaand ston Israël, mit alle ooldsten,
griffiers en rechters an weerskaanten van de ark van et verbond mit de Heer,
tegenover de Levitische priesters die de ark dreugen. Liekegoed de geboren
Israëlieten as de vremden die bi'j heur woonden weren d'r bi'j. De iene helte
van et volk keek uut op de Gerizim en de aandere helte keek uut op de Ebal,
zoas Mozes, de knecht van de Heer, opdreugen hadde. Eerst zegende Jozua et volk
van Israël, zoas Mozes opdreugen hadde,
34 en daornao leesde hi'j hiel zien wetboek veur,
woord veur woord, ok alle zegenings en vervlukings die in dat boek opschreven
binnen.
35 D'r was gien veurschrift van Mozes dat Jozua niet
veurleesde an de Israëlieten, die daor allemaole bi'jenneerkommen weren. Ok de
vrouwluden en kiender en de vremden die bi'j heur woonden weren d'r bi'j.
Jozua 9
List van de
Chiwwieten
01-02 Doe de keunings an de westkaante van de Jordaan,
die van et barglaand, et heuvellaand en et hiele kustgebied bi'j de Grote Zee,
tot an de Libanon an toe, van Israël zien zegetocht heurden, sleuten ze een
bondgenootschop. Zi'j, de keunings van de Hethieten, de Amorieten, de
Kanaänieten, de Perizzieten, de Chiwwieten en de Jebusieten, besleuten om
mittenneer tegen Jozua en Israël te vechten.
03 Mar doe de Chiwwieten uut Gibeon te weten kwammen
wat Jozua mit Jericho en Ai daon hadde,
04 neumen ze heur toevlocht tot een list: een tal van
heur gong naor Jozua onder de dekmaantel van een gezaantschop. Ze bepakten heur
ezels mit vodderige zadeltassen en oolde, basten wienzakken
05 en trokken oplapte sandalen en ofdreugen kleraosie
an. Veur de eteri'je onderweg neumen ze alliend uutdreugd en verkrummeld brood
mit.
06 Zo gongen ze naor et kaamp bi'j Gilgal, naor Jozua.
Ze zeden tegen him en de Israëlieten: "We kommen uut een veer laand en
willen een vredesverdrag mit jow sluten."
07 "Dat kuwwe niet zomar doen," zeden de
Israëlieten doe. "Misschien wonen jow wel in dit gebied, hoe kuwwe dan een
overienkomst mit jow sluten?"
08 Doe gongen de Chiwwieten naor Jozua. "We
willen oons wel an jow onderwarpen," zeden ze. Jozua vreug: "Wie
bi'j'm en waor koj'm weg?"
09 "Jow knechten kommen uut een hiel veer
laand," zeden ze doe. "De naeme van de Heer, jow God, het oons hier hennebrocht,
want zien roem is tot bi'j oons deurdrongen. We hebben heurd wat hi'j allemaole
in Iegypte daon het,
10 en ok wat hi'j mit de twie Amoritische keunings an
de oostkaante van de Jordaan daon het: keuning Sichon van Chesbon en keuning Og
van Basan, die in Astarot vestigd was.
11 Oonze ooldsten en alle inwoners van oons laand zeden
oons daoromme om mondveurraod in te
slaon en naor jow op reize te gaon. Bi'j jow ankommen mossen we jow oonze
onderwarping anbieden en jow vraogen om een vredesverdrag mit oons te sluten.
12 Kiek, dit is oons brood. We hebben et op de dag van
oons vertrek as vasse eteri'je uut oonze huzen mitneumen, mar now is et
uutdreugd en verkrummeld.
13 En kieken jow es naor disse wienzakken: ze weren
ni'j doe we ze vol deden, mar now bin ze basten. En dit is oonze kleraosie en
sandalen: jow zien dat ze op oonze lange tocht hielendal vodderige wodden
binnen."
14 De stamooldsten van Israël neumen doe wat van de
eteri'je an, mar ze verkreupen om de Heer om raod te vraogen.
15 Jozua sleut een vredesverdrag mit heur en beloofde
heur dat heur leven speerd wodden zol. De stamooldsten bevestigden dit mit een
eed.
16 Mar drie daegen naodat ze disse overienkomst mit
heur sleuten hadden, vernammen ze dat de Chiwwieten niet veer vot mar krek
dichtebi'j woonden.
17 De Israëlieten weren jommes veerder trokken en nao
drie daegen bi'j heur steden kommen: Gibeon, Kefira, Beërot en Kirjat-Jearim.
18 Mar de Chiwwieten wodden niet deur heur ommebrocht,
omreden de stamooldsten heur dat bi'j de Heer, de God van Israël, zweerd
hadden. De hiele volksvergeerdering beklaegde him hierover bi'j de
stamooldsten,
19 mar die zeden: "We hebben et heur zweerd bi'j
de Heer, de God van Israël, dus we kun ze niks doen.
20 We moe'n oonze eed gestaand doen en heur in leven
laoten, aanders roepen we de lelkens van de Heer over oons of omreden we oonze
eed schunnen hebben.
21 Dus ze moe'n leven blieven." Mar de
stamooldsten zeden d’r nog bi’j: "Mar we kun ze van now of an wel veur
hiel Israël hoolt hakken laoten en waeter putten laoten." En zo wodde
besleuten.
22 Jozua leut heur bi'j him roepen en vreug heur:
"Waoromme hej'm oons bedreugen deur te zeggen daj'm hiel veer van oons weg
wonen, wiels jim in dit gebied wonen?
23 Vervluukt bin jim! Jim zullen veur altied oonze
knechten wezen, hoolthakkers en waeterputters veur et heiligdom van mien
God."
24 De Chiwwieten zeden doe tegen Jozua: "We
heurden de hieltied weer dat de Heer, jow God, zien knecht Mozes opdreugen
hadde om et hiele laand tot jow bezit te maeken en alle inwoners uut te roeien.
We wodden doodsbenauwd veur jow. Daorom hewwe 't daon.
25 Mar now biwwe in jow macht. Doe mit jow knechten
wat naor jow oordiel goed en rechtveerdig is."
26 En Jozua dee dat. Hi'j bescharmde heur tegen de
Israëlieten: hi'j brocht heur niet omme,
27 mar maekte heur op die dag tot hoolthakkers en
waeterputters veur hiel Israël en veur et alter van de Heer, dat op een plak
kommen zol die de Heer kiezen zol. Ze bin dit tot op de dag van vandaege.
Jozua 10
Slag bi'j
Gibeon
01 Doe Adonisedek, de keuning van Jeruzalem, heurde
dat Jozua Ai inneumen hadde en alle inwoners ommebrocht hadde, dat hi'j mit Ai
en de keuning van die stad etzelde daon hadde as mit Jericho en zien keuning,
en dat de inwoners van Gibeon een vredesverdrag mit Israël sleuten hadde en
midden tussen heur woonden,
02 doe wodden hi'j en zien volk doodsbenauwd. Gibeon
was jommes lieke groot as de keuningssteden, alderdeegst nog groter as Ai, en
de manluden die d'r woonden weren butengewoon dapper.
03 Keuning Adonisedek stuurde bosschoppers naor Hoham,
de keuning van Hebron, Piram, de keuning van Jarmut, Jafia, de keuning van
Lachis, en Debir, de keuning van Eglon. Hi'j vreug heur:
04 "De inwoners van Gibeon hebben een
vredesverdrag mit Jozua en Israël sleuten. Kom mi'j helpen, dan kuwwe ze saemen
verslaon."
05 De vuuf Amoritische keunings sleuten heur anien.
Zi'j, de keunings van Jeruzalem, Hebron, Jarmut, Lachis en Eglon, trokken mit
heur legers op tegen Gibeon, sleugen et beleg veur die stad en voerden d'r anvalen
op uut.
06 De Gibeonieten stuurden doe een bosschopper naor et
kaamp bi'j Gilgal. Ze smeekten Jozua: "Laot oons niet in de steek, kom
vlogge naor oons toe om oons te helpen. Redde oons, want de Amoritische
keunings uut de bargen hebben heur allemaole tegen oons aniensleuten."
07 Hierop trok Jozua mit zien hiele leger, gien
inkelde soldaot uutzunderd, vanuut Gilgal op om te vechten.
08 De Heer zee tegen him: "Ie hoeven veur die
keunings niet bange te wezen, want ik lever ze an je uut. Gienend van heur zal him
tegen jow staondeholen kunnen."
09 Jozua wus de vi'jaand vanuut Gilgal in iene
naachtelike mars te berieken, en hi'j verraste him in een alderdekselse anval.
10 Doe de soldaoten van de vi'jaand et leger van
Israël ankommen zaggen, zi'jde de Heer paniek onder heur, zodat de Israëlieten
heur bi'j Gibeon een zwaore nederlaoge toebrengen konnen. Ze zatten heur tot an
de pas van Bet-Choron nao, en nog veerder – ja, ze sleugen heur alderdeegst
vlak veur Azeka en Makkeda nog daele.
11 Doe heur vi'janen vanof de pas van Bet-Choron de
bienen nammen, smeet de Heer vanuut de hemel grote haegelstiender op heur, tot
an Azeka toe. D'r raekten meer soldaoten weg deur die haegelstiender as deur de
zweerden van de Israëlieten.
12 Want op die dag, de dag dat de Heer de Amorieten an
Israël overleverde, hadde Jozua bidded tot de Heer. In anwezigens van Israël
zee hi'j:
"Zunne,
stao stille boven Gibeon,
maone,
blief staon boven de vlakte van Ajjalon."
13 En de zunne ston stille
en
de maone bleef staon,
tot
Israël zien vi'janen ofstraft hadde.
Dit
staot optekend in et Boek van de Oprechte. De zunne bleef een volle dag boven
an de hemel staon veurdat ze ondergong.
14 Et is niet veur en niet nao die dag iens weer
veurkommen dat de Heer op die meniere geheur gaf an de bede van een meenske,
mar de Heer vocht dan ok veur Israël.
15 Nao disse overwinning gong Jozua mit et hiele leger
weeromme naor et kaamp bi'j Gilgal.
16 De vuuf keunings hadden de bienen neumen en heur in
een grot bi'j Makkeda verscheulen.
17 Doe Jozua heurde dat ze daor ontdekt weren,
18 gaf hi'j kommedaosie om die grot mit grote stienen
of te sluten en d'r een waachtpost bi'j te zetten.
19 "Mar et leger mag hier niet blieven," zee
hi'j. "Gao de vi'jaand aachternao. Verdistrewere wat d'r nog van over is.
Laot ze niet ontkommen naor heur steden now de Heer, jim God, ze an jim
overleverd het."
20-21 En et leger van Israël gong eerst weeromme naor
Jozua, naor de legerstee bi'j Makkeda, naodat et de vi'jaand moorddaodig
versleugen hadde, tot de laeste man, en naodat de peer vi'janen die d’r nog
vandeur konnen, in heur vestingsteden ontkommen weren. Van Israël was gien iene
soldaot ok mar een haor krinkt.
22 Naodat et leger weerommekommen was, beveelde Jozua:
"Hael die vuuf keunings uut de grot en breng ze bi'j mi'j."
23 Zien bevel wodde uutvoerd, de vuuf keunings wodden
bi'j Jozua brocht: de keunings van Jeruzalem, Hebron, Jarmut, Lachis en Eglon.
24 Jozua leut et hiele leger antreden en reup de
anvoerders naor veuren, de manluden die him in de stried hulpen hadden.
"Zet jim voete op de nekke van die keunings," beveelde hi'j heur.
Naodat ze dit daon hadden,
25 zee hi'j: "Wees niet bange en laot je deur
niks de moed ontnemen, blief rissluut en staandvaastig. De Heer zal mit alle
vi'janen die jim nog bevechten moeten etzelde doen as mit disse keunings."
26 En mit die woorden sleug Jozua de vuuf keunings
dood, waornao hi'j heur an vuuf bomen ophangen leut. Daor hongen ze tot de
aovend.
27 In et twielochten gaf Jozua kommedaosie om heur van
de bomen te haelen, heur in de grot te smieten waorin ze heur verscheulen
hadden en die mit grote stienen of te sluten. Die stienen liggen d'r tot op de
dag van vandaege.
28 Jozua hadde op dezelde dag Makkeda inneumen en de
keuning en alle inwoners ommebrocht. Hi'j brocht alleman die d'r woonde omme,
hi'j leut gien meenske in leven. Mit de keuning van Makkeda dee hi'j etzelde as
hi'j mit de keuning van Jericho daon hadde.
Verovering
van et zuden
29 Doe trok Jozua mit et hiele leger van Makkeda naor
Libna. Hi'j vul Libna an,
30 en de Heer leverde ok die stad en heur keuning an
Israël uut. Jozua brocht alleman die d'r woonde omme, hi'j leut gien meenske in
leven. Mit de keuning van Libna dee hi'j etzelde as hi'j mit de keuning van
Jericho daon hadde.
31 Doe trok Jozua mit et leger van Libna naor Lachis.
Hi'j sleug et beleg veur die stad en vul heur an.
32 De Heer gaf Israël Lachis in hanen; Jozua nam de
stad in op de twiede dag van et beleg en hi'j brocht iederiene die d'r woonde
omme, zoas hi'j in Libna daon hadde.
33 Horam, de keuning van Gezer, kwam Lachis te hulpe,
mar Jozua versleug him. Hi'j maekte him en zien soldaoten van kaant tot d'r
gieniene meer over was.
34 Doe trok Jozua mit et leger van Lachis naor Eglon.
Ze sleugen et beleg veur die stad en vullen heur an.
35 Ze neumen Eglon in iene dag in en brochten alle
inwoners omme. Jozua brocht iederiene die d'r woonde omme, zoas hi'j in Lachis
daon hadde.
36 Doe trok Jozua mit et leger van Eglon naor Hebron.
Ze vullen Hebron an,
37 neumen die stad in en maekten krek as in Eglon de
keuning en alle inwoners van kaant. Jozua leut van de omliggende steden ok gien
meenske in leven, hi'j brocht alleman omme.
38 Op zien weerommereize gong Jozua mit et leger naor
Debir. Hi'j vul die stad an,
39 nam heur in en veroverde ok de omliggende steden.
Hi'j maekte de keuning en alle inwoners van kaant. De Israëlieten brochten
alleman omme, Jozua leut gien meenske in leven. Wat hi'j mit Hebron en Libna en
de keunings d'r van daon hadde, dee hi'j ok mit Debir en zien keuning.
40 Zo veroverde Jozua dit gebied: et barglaand, de
Negev, et heuvellaand en de streek van de rotskleuven. Hi'j leut gien iene
keuning in leven, hi'j brocht alleman die d'r woonde omme, zoas de Heer, de God
van Israël, opdreugen hadde.
41 Jozua trok van Kades-Barnea tot an Gaza en van et
hiele gebied rond Gosen tot an Gibeon, en hi'j brocht daor iederiene omme.
42 Hi'j veroverde de gebieden van al die keunings op
iene veldtocht deurdat de Heer, de God van Israël, veur Israël streed.
43 Daornao gong Jozua mit et leger weeromme naor et
kaamp bi'j Gilgal.
Jozua 11
Verovering
van et noorden
01 Doe Jabin, de keuning van Hasor, van Israël zien
zegetocht heurde, stuurde hi'j bosschoppers naor Jobab, de keuning van Madon,
naor de keunings van Simron en Achsaf
02 en naor de overige keunings van et noorden: et
barglaand, de Jordaanvallei an de zuudkaante van et Meer van Kinneret, et
heuvellaand en et kustgebied van Dor in et westen.
03 Et betrof de keunings van de Kanaänieten in et
oosten en et westen, de Amorieten, de Hethieten, de Perizzieten, de Jebusieten
in et barglaand en de Chiwwieten an de voete van de Hermon, in de streek van
Mispa.
04 Die keunings trokken mit heur legers op: et was een
onofzienbere mennigte soldaoten, zo talriek as zaandkorrels an de zee, mit een
groot tal peerden en striedwaegens.
05 Al die keunings troffen mekeer bi'j de bronnen van
Merom, waor zi'j heur kaamp opsleugen. Daor kwammen ze saemen om de stried an
te gaon tegen Israël.
06 Mar de Heer zee tegen Jozua: "Ie hoeven niet
bange veur ze te wezen. Ik zorge d'r veur daj'm ze morgen om disse tied
allemaole dood op de grond liggen zien. Dan moej' heur peerden de pezen
deursnieden en heur striedwaegens verbranen."
07 Jozua gong doe mit zien leger et gevecht mit heur
an. De Israëlieten verrasten heur in een alderdekselse anval bi'j de bronnen
van Merom,
08 en de Heer leverde heur uut an Israël. Ze brochten
heur een nederlaoge toe en zatten heur nao tot an Groot-Sidon, Misrefot-Maïm en
de Mispevallei in et oosten. Ze brochten heur allemaole omme tot d'r gieniene
meer over was.
09 En Jozua dee wat de Heer him opdreugen hadde: hi'j
leut heur peerden de pezen deursnieden en heur striedwaegens verbranen.
10 Op zien weerommereize gong Jozua naor Hasor. Die
stad was doedertieden de machtigste van al die keuninkrieken en dus nam Jozua
heur in en maekte de keuning van kaant.
11 Hi'j brocht butendat alle inwoners omme. De
Israëlieten brochten iederiene die d'r woonde omme, gien meenske uutzunderd.
Jozua leut Hasor in vlammen opgaon
12 en daornao nam hi'j de steden van de aandere
keunings in. Hi'j nam heur gevangen en brocht heur omme, en maekte ok alle
inwoners van kaant. Hi'j brocht iederiene omme, zoas Mozes, de knecht van de
Heer, opdreugen hadde.
13 Mar Jozua leut alliend Hasor verbranen; alle
aandere, now nog bestaonde steden wodden deur de Israëlieten niet verbraand.
14 Van disse steden maekten zi'j al et spul en et vee
veur heurzels buit, mar ze brochten alle meensken omme. Ze roeiden de inwoners
zonder uutzundering uut.
15 De Heer hadde dit an zien knecht Mozes opdreugen,
en Mozes hadde et an Jozua opdreugen, en Jozua voerde et uut. Hi'j leut niks
aachterwegens van wat de Heer an Mozes opdreugen hadde.
Overzicht van
de veroveringen
16 Zo veroverde Jozua et hiele laand: de bargen van
Juda, de hiele Negev, et hiele gebied rond Gosen, et heuvellaand, de
Jordaanvallei en de bargen van Israël mit heur uutlopers.
17 Dit is et gebied vanof de Kaele Bargen, die oplopen
naor Seïr, tot an Baäl-Gad in de Libanonvallei an de voete van et
Hermongebergte. Jozua nam alle keunings gevangen en brocht heur zonder
uutzundering omme.
18 Hi'j voerde lange tied oorlog tegen die keunings,
19 want d'r was gien iene stad die een vredesverdrag
mit de Israëlieten sleuten hadde, behalven Gibeon, de stad van de Chiwwieten.
D'r vul Israël niks zonder slag of stoot in hanen.
20 De Heer hadde jommes alle volken zo eigenzinnig
maekt dat ze hoe dan ok oorlog tegen Israël voeren wollen. Daorom hoefden de
Israëlieten die volken niet te speren en konnen ze die verdistreweren. Ja, zo
konnen ze die volken uutroeien, zoas de Heer an Mozes opdreugen hadde.
21 Jozua roeide in die tied ok de Enakieten uut die in
de bargen van Juda woonden, in Hebron, Debir en Anab, en in de bargen van
Israël. Hi'j brocht heur omme en leut heur steden an de Heer.
22 D'r bleven in et laand van Israël gien Enakieten
meer over, behalven in Gaza, Gat en Asdod.
23 Naodat Jozua et hiele laand veroverd hadde, zoas de
Heer an Mozes opdreugen hadde, gaf hi'j et Israël as grondgebied neffens de
indielinge in stammen. Hiermit kwam een aende an de oorlog.
Jozua 12
Liest van
versleugen keunings
01 De Israëlieten veroverden eerst et gebied an de
oostkaante van de Jordaan, van et Arnondal tot an et Hermongebergte mit de
oostkaante van de Jordaanvallei. Ze versleugen disse twie keunings:
02 Keuning Sichon van de Amorieten, die in Chesbon
zetelde. Hi'j heerste vanof Aroër an de raand van et Arnondal, beter zegd,
vanof de middenloop van de Arnon, tot an et dal van de Jabbok, dat de greens
mit et laand van de Ammonieten vormde. Zien gebied besleug de iene helte van
Gilead
03 en dat pat van de Jordaanvallei dat him vanof de
oostkaante van et Meer van Kinneret uutstrekte tot an de oostkaante van de
Zooltene-Zee, ofwel de Dooie Zee, tot an Bet-Hajjesimot. Veerder leup et in
zudelike richting tot an de rotskleuven van de Pisga,
04 die een netuurlike greens vormden.
En keuning Og van Basan, die nog van de Refaïeten
ofstamde en in Astarot en Edreï zetelde.
05 Hi'j heerste over et Hermongebergte, Salka en hiel
Basan tot an de gebieden Gesur en Maächa, en veerder over de aandere helte van
Gilead tot an et gebied van keuning Sichon uut Chesbon.
06 De Israëlieten hebben disse twie keunings
versleugen onder anvoering van Mozes, de knecht van de Heer. Mozes gaf heur
gebieden in bezit an de stammen Ruben en Gad en de eerste helte van de stamme
Manasse.
07 Daornao veroverde Israël onder anvoering van Jozua
et gebied an de westkaante van de Jordaan, van Baäl-Gad in de Libanonvallei tot
an de Kaele Bargen, die oplopen naor Seïr. Jozua gaf Israël dit gebied in bezit
neffens de indieling in stammen.
08 Et besleug et barglaand, et heuvellaand, de
westkaante van de Jordaanvallei, de streek van de rotskleuven, de woestijn en
de Negev. Dit weren de gebieden van de Hethieten, de Amorieten, de Kanaänieten,
de Perizzieten, de Chiwwieten en de Jebusieten. Israël versleug disse keunings:
09 die van Jericho, Ai (dat vlak bi'j Betel ligt),
10 Jeruzalem, Hebron,
11 Jarmut, Lachis,
12 Eglon, Gezer,
13 Debir, Geder,
14 Chorma, Arad,
15 Libna, Adullam,
16 Makkeda, Betel,
17 Tappuach, Chefer,
18 Afek en de keuning van de Saronvlakte,
19 die van Madon, Hasor,
20 Simron-Meron, Achsaf,
21 Taänach, Megiddo,
22 Kedes, Jokneam (bij de Karmel),
23 Dor (in et kustgebied van die stad), Goïm (in
Galilea)
24 en Tirsa. In tetaol ienendattig keunings.
Jozua 13
Nog te
veroveren gebieden
01 Doe Jozua op hoge leeftied kommen was, zee de Heer
tegen him: "Ie bin now oold, mar d'r waacht nog een hiele protte laand dat
veroverd wodden moet.
02 Dit bin de overbleven gebieden: Aldereerst alle
streken waor de Filistijnen en de Gesurieten wonen,
03 vanof de wadi die de oostgreens van Iegypte vormt
tot an Ekron in et noorden. Dit hiele gebied wodt tot Kanaän rekend. Et wodt
regeerd deur de vuuf stadsvosten van de Filistijnen: die van Gaza, Asdod,
Askelon, Gat en Ekron. Ok de Awwieten wonen daor,
04 an de zuudkaante van de Filistijnen. Veerder is d'r
et hiele gebied van de Kanaänieten vanof Ara, een stad van de Sidoniërs, tot an
Afek op de greens mit et laand van de Amorieten.
05 D'r is butendat et laand van de Giblieten en, an de
oostkaante daorvan, de hiele Libanon vanof Baäl-Gad an de voete van de Hermon
tot an Lebo-Hamat;
06 kotomme, et hiele barggebied van de Libanon tot an
Misrefot-Maïm, dus mit inbegrip van de streek waor de Sidoniërs wonen. Ik zal
al die volken zels veur Israël verdrieven. Ie hoeven et laand alliend mar deur
lotting onder de Israëlieten te verpatten, zoas ik je opdreugen hebbe.
07 Verpatte et daorom in gebieden veur de negen
overbleven stammen en de twiede helte van de stamme Manasse."
Verdieling
van et laand an de oostkaante van de Jordaan
08 De stammen Ruben en Gad en de eerste helte van de
stamme Manasse hadden al et grondgebied kregen dat Mozes, de knecht van de
Heer, heur an de oostkaante van de Jordaan toewezen hadde.
09-10 Et leup vanof de stad Aroër an de raand van et
Arnondal, beter zegd, vanof de stad die in et dal zels ligt, tot an et laand
van de Ammonieten en besleug de hiele hoogvlakte van Medeba tot Dibon, mit alle
steden van keuning Sichon van de Amorieten, die in Chesbon heerste.
11 Veerder besleug et Gilead en de
gebieden Gesur en Maächa, et hiele Hermongebergte en hiel Basan tot an Salka;
12 kotomme, et hiele riek van keuning Og uut Basan,
die in Astarot en Edreï heerste en nog van de Refaïeten ofstamde. Mozes hadde
de Amorieten versleugen en uutroeid.
13 Mar Israël roeide de Gesurieten en de Maächatieten
niet uut, zodat disse volken tussen heur in wonen bleven, tot op de dag van
vandaege.
14 Mozes hadde de Levieten gien grondgebied toewezen.
Zi'j zollen patten meugen in de offergaoven an de Heer, de God van Israël, zoas
hi'j heur toezegd hadde.
Et
grondgebied van de stamme Ruben
15 Mozes hadde an de femilies van de stamme Ruben dit
grondgebied toewezen:
16 Et begon bi'j de stad Aroër an de raand van et
Arnondal, beter zegd, bi'j de stad die in et dal zels ligt, en besleug veerder
de hiele hoogvlakte tot an Medeba,
17 dat wil zeggen Chesbon mit de omliggende steden;
veerder Dibon, Bamot-Baäl, Bet-Baäl-Meon,
18 Jahas, Kedemot, Mefaät,
19 Kirjataïm, Sibma en Seret-Hassachar, dat in de
uutlopers van de bargen ligt.
20 En veerder nog Bet-Peor, de rotskleuven van de
Pisga en Bet-Hajjesimot.
21 Kotomme, alle steden op de hoogvlakte, ofwel et
hiele riek van Sichon, de keuning van de Amorieten, die in Chesbon heerste en
deur Mozes versleugen was. (Mozes versleug toegelieke de Midjanitische
stamooldsten Ewi, Rekem, Sur, Chur en Reba, die in Sichon zien riek woonden en
zien legeranvoerders weren.
22 Butendat hadden de Israëlieten de waorzegger
Bileam, de zeune van Beor, ommebrocht.)
23 Dit was et gebied dat mit alle steden en dörpen
toebeheurde an de femilies van de stamme Ruben. De netuurlike greens wodde
vormd deur de Jordaan.
Et
grondgebied van de stamme Gad
24 Mozes hadde an de stamme Gad, an de femilies van
die stamme, dit grondgebied toewezen:
25-26 Et begon even boven Chesbon en strekte him uut
tot an Ramat-Hammispe en Betonim, en vanof Machanaïm tot an et gebied rond
Lo-Debar. Et besleug Jazer, alle steden van Gilead en de helte van et laand van
de Ammonieten tot an Aroër bi'j Rabba.
27 Et besleug butendat een tal steden in de
Jordaanvallei: Bet-Haram, Bet-Nimra, Sukkot en Safon. Kotomme, de rest van et
riek van Sichon, de keuning van Chesbon, an de oostkaante van de Jordaan.
Hierbi'j vormde de Jordaan de netuurlike greens, krek tot de zuudkaante van et
Meer van Kinneret.
28 Dit was et gebied dat mit alle steden en dörpen
toebeheurde an de femilies van de stamme Gad.
Et
grondgebied van de eerste helte van de stamme Manasse
29 Mozes hadde an de femilies van de eerste helte van
de stamme Manasse dit grondgebied toewezen:
30 Et strekte him uut an de noordkaante van Machanaïm
en besleug hiel Basan, dus et hiele riek van keuning Og, mit inbegrip van alle
dörpen van Jaïr, zoe'n zestig nederzettings.
31 Veerder besleug et de helte van Gilead en de beide
keuningssteden die Og in Basan hadde: Astarot en Edreï.
Dit
was et gebied dat toebeheurde an de eerste helte van de femilies die van
Manasses zeune Machir ofstamden.
32 Tot zoveer de gebieden die Mozes op de vlakte van
Moab, an de oostkaante van de Jordaan en Jericho, verpat hadde.
33 Mar hi'j wees de stamme van de Levieten gien
grondgebied toe. Zi'j zollen bestaon meugen van de dienst an de Heer, de God
van Israël, zoas hi'j heur toezegd hadde.
Jozua 14
Verdieling
van et laand an de westkaante van de Jordaan
01-02 Dan volgen now de gebieden die de Israëlieten in
Kanaän in bezit kregen en die deur de priester Eleazar, deur Jozua, de zeune
van Nun, en deur de stamooldsten van Israël deur lotting toewezen wodden an de
twiede helte van de stamme Manasse en an de negen aandere stammen, zoas de Heer
heur deur de mond van Mozes opdreugen hadde.
03-04 D'r weren nog negeneneenhalve stamme overbleven.
Dit kwam deurdat Mozes an de eerste helte van Manasse en an Ruben en Gad al een
gebied toewezen hadde an de oostkaante van de Jordaan, deurdat Jozef zien
naokommelingen twie stammen vormden, Manasse en Efraïm, en deurdat de Levieten
nargens grondgebied kregen, mar alliend steden om in te wonen en weidegronden
veur heur vee.
05 Kotomme, de Israëlieten gongen bi'j de verdieling
van et laand krek zo te wark as de Heer an Mozes opdreugen hadde.
Toewiezing
van Hebron an Kaleb
06 D'r kwammen een peer manluden van de stamme Juda
bi'j Jozua in Gilgal. Iene van heur was Kaleb, een Kenizziet, een zeune van
Jefunne. Hi'j zee tegen Jozua: "Jow weten wat de Heer an Mozes, de
godsman, in Kades-Barnea over oons beiden zegd het.
07 Ik was veertig jaor oold doe Mozes, de knecht van
de Heer, mi'j d'r vanuut Kades-Barnea op uutstuurde om dit laand te verkennen.
Ik brocht him naor ere en geweten verslag uut.
08 Mien mitreizigers jaegden oons volk de schrik op et
lief, mar ik bleef hielendal op de Heer, mien God, vertrouwen.
09 Mozes beloofde mi'j doe: “omdat ie op de Heer, mien
God, vertrouwen blieven binnen, zweer ik je dat de hiele streek die ie verkend
hebben veur altied et grondgebied van jow en je naogeslaacht wezen zal.”
10 Now dan, de Heer het mien leven speerd, zoas hi'j
toezegd hadde. Et is now vuvenveertig jaor leden dat hi'j Mozes die toezegging
gaf, doe Israël nog deur de woestijn trok. Ik bin now vuventachtig jaor oold,
11 mar nog altied lieke stark as op de dag dat Mozes
mi'j op verkenning stuurde. Ik bin nog lieke goed as doe in staot om te vechten
en et bevel te voeren.
12 Geef mi'j dus dit barglaand dat de Heer mi'j destieds
toezegd het. Jow hebben doe toch heurd dat d'r Enakieten wonen, in grote en
verstarkte steden? Mar as de Heer mi'j helpt za'k ze wel meester wodden, zoas
hi'j toezegd het."
13 Naodat Kaleb dit zegd hadde, zegende Jozua him en
gaf him Hebron as grondgebied.
14-15 Hebron hiette destieds Kirjat-Arba, naor Arba,
de grootste reus onder de Enakieten. Omreden Kaleb, een Kenizziet, een zeune
van Jefunne, op de Heer, de God van Israël, vertrouwen bleven was, kregen hi'j
en zien naogeslaacht Hebron as grondgebied, tot op de dag van vandaege. Hiermit
kwam d'r een aende an de oorlog.
Jozua 15
Et
grondgebied van de stamme Juda
01 Et grondgebied dat deur lotting an de femilies van
de stamme Juda toewezen wodde, lag in et uterste zuden. Et strekte him uut tot
in de woestijn van Sin, waor de greens mit Edom leup.
02 De zuudgreens begon bi'j et zudelikste punt van de
Zooltene-Zee,
03 leup dan zudelik langs de Schorpioenenpas, gong
veerder naor Sin en leup daornao an de zuudkaante van Kades-Barnea omhogens.
Dan leup de greens naor Chesron en gong hi'j veerder omhogens naor Addar. Hi'j
beug of naor Karka,
04 gong naor Asmon en kwam bi'j de wadi die de greens
mit Iegypte vormde. Van daor leup hi'j rechtstreeks naor de zee. (disse greens
moet veur hiel Israël de zuudgreens wezen.)
05 De oostgreens wodde vormd deur de Zooltene-Zee tot
an de monding van de Jordaan.
De noordgreens begon bi'j de noordkaante van de
Zooltene-Zee, bi'j de monding van de Jordaan.
06 Hi'j leup naor Bet-Chogla, gong Bet-Araba veurbi'j an
de noordkaante en gong omhogens de kaante van de rots van Bohan uut. (Bohan was
een naokommeling van Ruben.)
07 Dan leup hi'j vanuut et Achordal omhogens naor
Debir en beug in noordelike richting of naor Gilgal, dat tegenover de
Adummimpas ligt, an de zuudkaante van de wadi. Hi'j gong naor de Semesbron en
van daor rechtstreeks naor de Rogelbron.
08 Veerder leup de greens via et Ben-Hinnomdal om et
zuden van de heuvelrogge waorop Jebus lag (et Jeruzalem van vandaege-de-dag).
Daornao gong hi'j omhogens naor de top van de barg die westelik van et
Hinnomdal en noordelik van de vallei van Refaïm ligt.
09 Van daor leup hi'j in een lichte bocht naor de bron
van Me-Neftoach, daornao naor Ijjim in et berggebied van Efron, en deur in een
lichte bocht naor Baäla (et Kirjat-jearim van now).
10 Bi'j Baäla beug de greens of naor et westen, naor
de bargen van Seïr. Veerder gong hi'j langs de noordkaante van de heuvelrogge mit
bospollen waorop Kesalon ligt, daelde naor Bet-Semes en leup deur naor Timna.
11 Hi'j gong langs de noordkaante van de heuvelrogge
van Ekron, maekte een lichte bocht naor Sikkaron en leup via de barg van Baäla
naor Jabneël en van daor rechtstreeks naor de zee.
12 De westgreens wodde op netuurlike wieze vormd deur
de Grote Zee.
Dit
weren de greenzen van et grondgebied van de femilies van de stamme Juda.
13 Jozua wees, zoas de Heer him opdreugen hadde, een
pat van Juda zien grondgebied toe an Kaleb, de zeune van Jefunne: hi'j kreeg
Hebron, dat doe nog Kirjat-Arba hiette, naor Arba, de heit van Enak.
14 Kaleb verdreef daor de drie zeunen van Enak: Sesai,
Achiman en Talmai;
15 en daornao trok hi'j op op tegen Debir, dat doe nog
Kirjat-Sefer hiette.
16 Kaleb beloofde: "Wie Kirjat-Sefer verovert
za'k mien dochter Achsa as vrouw geven."
17 Otniël, een zeune van Kaleb zien breur Kenaz,
veroverde de stad en kreeg Achsa as vrouw.
18 Bi'j heur ankomst vieterde Achsa him an om an heur
heit om een stok vruchtber laand te vraogen. Doe zi'j van heur ezel ofkommen was,
vreug Kaleb heur wat zi'j langde.
19 "Geef mi'j toch een geschink wao'k wat an
hebbe," zee ze doe. "Jow hebben mi'j dit dreuge stok laand geven,
geef mi'j dan ok bronnen." Hierop gaf Kaleb heur liekegoed de bronnen die hoge
liggen as de bronnen die wat leger liggen.
20 Dit was et grondgebied van de femilies van de
stamme Juda.
De steden van
de stamme Juda
21 In et gebied van de stamme Juda laggen disse
steden:
In
et uterste zuden bi'j de greens mit Edom, dus in de Negev: Kabseël, Eder,
Jagur,
22 Kina, Dimona, Adada,
23 Kedes, Hasor, Jitnan,
24 Zif, Telem, Bealot,
25 Chasor-Chadatta, Keriot-Chesron (dat ok wel Hasor
nuumd wodt),
26 Amam, Sema, Molada,
27 Chasar-Gadda, Chesmon, Bet-Pelet,
28 Chasar-Sual, Berseba mit de omliggende dörpen,
29 Baäla, Ijjim, Esem,
30 Eltolad, Kesil, Chorma,
31 Siklag, Madmanna, Sansanna,
32 Lebaot, Silchim, Aïn en Rimmon. In tetaol
negenentwintig steden mit de omliggende dörpen.
33 In et heuvellaand: Estaol, Sora, Asna,
34 Zanoach, En-Gannim, Tappuach, Enam,
35 Jarmut, Adullam, Socho, Azeka,
36 Saäraïm, Aditaïm, Gedera en Gederotaïm. Veertien
steden mit de omliggende dörpen.
37 Veerder Senan, Chadasa, Migdal-Gad,
38 Dilan, Mispe, Jokteël,
39 Lachis, Boskat, Eglon,
40 Kabbon, Lachmas, Kitlis,
41 Gederot, Bet-Dagon, Naäma en Makkeda. Zestien
steden mit de omliggende dörpen.
42 Veerder Libna, Eter, Asan,
43 Jiftach, Asna, Nesib,
44 Keïla, Achzib en Maresa. Negen steden mit de
omliggende dörpen.
45 Veerder Ekron mit de omliggende dörpen en
gehuchten,
46 alle dörpen tussen Ekron en de zee, alle dörpen en
gehuchten rond Asdod,
47 Asdod en Gaza mit de omliggende dörpen en gehuchten
tot an de wadi die de greens mit Iegypte vormde, en veerder tot an de Grote
Zee, die een netuurlike greens vormde.
48 In et barglaand: Samir, Jattir, Socho,
49 Danna, Kirjat-Sefer (et Debir van vandaege-de-dag),
50 Anab, Estemoa, Anim,
51 Gosen, Cholon en Gilo. Elf steden mit de omliggende
dörpen.
52 Veerder Arab, Ruma, Esan,
53 Janum, Bet-Tappuach, Afeka,
54 Chumta, Kirjat-Arba (et Hebron van vandaege-de-dag)
en Sior. Negen steden mit de omliggende dörpen.
55 Veerder Maon, Karmel, Zif, Jutta,
56 Jizreël, Jokdeam, Zanoach,
57 Kaïn, Gibea en Timna. Tien steden mit de omliggende
dörpen.
58 Veerder Chalchul, Bet-Sur, Gedor,
59 Maärat, Bet-Anot en Eltekon. Zes steden mit de
omliggende dörpen.
60 Veerder Kirjat-Baäl (et Kirjat-Jearim van
vandaege-de-dag) en Rabba. Twie steden mit de omliggende dörpen.
61 In de woestijn: Bet-Araba, Middin, Sechacha,
62 Nibsan, Ir-Hammelach en Engedi. Zes steden mit de
omliggende dörpen.
63 Mar de inwoners van Jeruzalem, de Jebusieten,
konnen deur de stamme Juda niet verdreven wodden; zi'j wonen tot op de dag van
vandaege midden tussen de naokommelingen van Juda in Jeruzalem.
Jozua 16
Et
grondgebied van de naokommelingen van Jozef
01 Et lot wees de naokommelingen van Jozef dit grondgebied
toe: de zuudgreens begon bi'j de Jordaan, op de hoogte van Jericho. Hi'j leup
dan oostelik langs de bronnen van Jericho, gong deur de bargen van de woestijn
en kwam bi'j Betel.
02 Van daor leup hi'j naor Luz en dan naor Atarot, dat
in et gebied van de Arkieten ligt.
03 Daornao daelde de greens naor et westen: hi'j leup
eerst deur et gebied van de Jafletieten, daornao deur de streek rond
Laag-Bet-Choron, dan kwam hi'j bi'j Gezer en uutaendelik aendigde hi'j bi'j de
zee.
04 Dit was et grondgebied dat de naokommelingen van
Jozef, de stammen Manasse en Efraïm, in bezit kregen.
Et
grondgebied van de stamme Efraïm
05 De femilies van de stamme Efraïm kregen dit
grondgebied:
De zuudgreens begon an de oostkaante van Atrot-Addar,
leup naor Hoog-Bet-Choron
06 en aendigde bi'j de zee.
De oostgreens begon bi'j Michmetat in et noorden. Hi'j
leup in zuudoostelike richting naor Taänat-Silo, gong die stad an de oostkaante
veurbi'j en leup veerder naor Janoach.
07 Dan daelde hi'j naor Atarot en Naära, gong vlak
langs Jericho en hul bi'j de Jordaan op.
08 De noordgreens leup vanof Tappuach via de wadi Kana
naor et westen. Hi'j aendigde bi'j de zee.
Dit
was et grondgebied van de femilies van de stamme Efraïm.
09 Veerder kregen zi'j nog een stok of wat steden in
et gebied van Manasse, mit de omliggende dörpen.
10 Mar de Kanaänieten uut Gezer konnen ze niet
verdrieven; die bleven midden tussen heur in wonen, tot op de dag van vandaege.
Mar zi'j wodden dwongen tot heredienst.
Jozua 17
Et
grondgebied van de twiede helte van de stamme Manasse
01 Et lot wodde ok wurpen veur de stamme Manasse.
Manasse was Jozef zien ooldste zeune. De ooldste zeune van Manasse zels was
Machir, de heit van Gilead. Omreden Machir een kriegshaftig man was, hadde hi'j
al eerder de streken Gilead en Basan kregen.
02 Et lot wees now ok grondgebied toe an de overige
mannelike naokommelingen van Manasse en heur femilies. Et weren Abiëzer,
Chelek, Asriël, Sechem, Chefer en Semida. Zi'j, de mannelike naokommelingen van
Jozef zien zeune Manasse, bin de stamvaders van de femilies van Manasse.
03 Mar Selofchad, die een zeune was van Chefer, de
zeune van Gilead, de zeune van Machir, de zeune van Manasse – Selofchad hadde
gien zeunen, mar alliend dochters. Heur naemen weren Machla, Noa, Chogla, Milka
en Tirsa.
04 Ze verschenen veur de priester Eleazar, veur Jozua,
de zeune van Nun, en veur de stamooldsten en zeden tegen heur: "Jim bin
toch niet vergeten dat de Heer an Mozes opdreugen het om oons krek as oonze
omkes, een pat van et laand te geven?" Jozua gaf heur doe vanwegens disse
kommedaosie van de Heer een pat van et laand, krek as heur omkes.
05 Zo wodde et grondgebied van Manasse – uutzunderd et
oostelik van de Jordaan legen Gilead en Basan – in tien stokken verpat,
06 want de vrouwluden van die stamme kregen krek as de
manluden een pat van et laand. Mar Gilead was veur de overige naokommelingen
van Manasse.
07 Et grondgebied van Manasse leup van et gebied van
de stamme Aser tot an Michmetat, dat bi'j Sichem ligt. Van daor leup de
zuudgreens naor Jasib en En-Tappuach.
08 De streek bi'j Tappuach heurde an Manasse, mar
Tappuach zels, dat krek op de greens van Manasse lag, heurde an Efraïm.
09-10 De greens daelde dan naor de wadi Kana, leup via
de zuudkaante d'r van veerder en aendigde bi'j de zee. Dus et gebied an de
zuudkaante van de wadi Kana heurde an Efraïm, et gebied an de noordkaante d'r
van an Manasse. Mar d'r laggen tussen de steden van Manasse ok een peer steden
die van Efraïm weren.
Et gebied van Manasse greensde in et westen an de zee,
in et noordwesten an et gebied van Aser en in et noordoosten an dat van
Issachar.
11 Veerder kreeg Manasse in et gebied van Issachar en
Aser een tal steden mit de omliggende dörpen: Bet-San, Jibleam, Dor, mit een
pat van de kust, Endor, Taänach en Megiddo.
12 Mar Manasse kon him gien meester maeken van disse
steden; in dit gebied wussen de Kanaänieten heur staonde te holen.
13 Doe de Israëlieten starker wodden, legden zi'j de
Kanaänieten heredienst op, mar ze konnen heur niet verdrieven.
Efraïm en
Manasse beklaegen heur
14 De naokommelingen van Jozef kwammen heur bi'j Jozua
beklaegen. "Waoromme," vreugen zi'j, "hebben jow veur oons et
lot mar iene keer wurpen en oons alliend mar et gebied van iene stamme
toebedield? Wi'j bin toch mit een hieleboel, omreden de Heer oons tot now toe
de hieltied zegend het?"
15 Jozua zee doe tegen heur: "As et barglaand van
Efraïm te klein veur jim is omreden jim zo manmachtig binnen, gao dan naor de
bossen van de Perizzieten en de Refaïeten. Daor kuj'm veur jimzels laand
ontginnen."
16 Mar de naokommelingen van Jozef zeden: "Ok dan
is et barglaand niet groot genoeg veur oons. En in de leegvlakte wonen de
Kanaänieten. Die hebben allemaole iezeren striedwaegens, liekegoed die uut
Bet-San en de dörpen d'r ommehenne as die in de vallei van Jizreël."
17 Hierop zee Jozua tegen de twie stammen die Jozef as
veurvader hadden, de stammen Efraïm en Manasse: "Jim bin mit zoe'n protte
en zo stark, daj'm jim gebied makkelik uutbreiden kunnen.
18 Jim hebben toch bargen? En die bargen hebben toch
bossen? Rooi die dan eerst! Dan kriej'm ok de uutlopers van et gebargte. En
naoderhaand zuj'm de Kanaänieten ok verdrieven kunnen, ok al hebben die iezeren
striedwaegens en bin ze stark."
Jozua 18
Volksvergeerdering
in Silo
01 De hiele volksvergeerdering van Israël kwam
bi'jenneer in Silo. Daor wodde ok de ontmoetingstente opzet. Et laand was al
veroverd,
02 mar d'r weren zeuven stammen overbleven die heur
grondgebied nog niet verpat hadden.
03 Jozua zee tegen de Israëlieten: "Hoe lange
moet die beslutelooshied nog duren? Wanneer nemen jim now aendelik et laand in
bezit dat de Heer, de God van jim veuroolden, jim geven het?
04 Wieze van iedere stamme drie manluden an. Die za'k
dan naor dat gebied sturen om et te verkennen en te beschrieven, zodat et
verpat wodden kan. As ze bi'j mi'j weerommekommen binnen,
05 moe'n ze et in zeuven gebieden verpatten. Mar et
gebied van Juda in et zuden moet blieven zoas et is, krek as dat van de
naokommelingen van Jozef an de noordkaante daorvan.
06 Daornao moej'm een beschrieving van die zeuven
gebieden maeken en die an mi'j geven. Ik zal dan hier in Silo tegenover de
Heer, oonze God, et lot veur jim warpen.
07 Mar de Levieten zullen niet zoas jim patten in et
laand; heur is et toebedield om priesters van de Heer te wezen. Gad, Ruben en
de eerste helte van Manasse hebben al eerder et grondgebied kregen dat Mozes,
de knecht van de Heer, heur an de oostkaante van de Jordaan toewezen het."
08 Jozua herhaelde disse opdracht tegen de manluden
die et gebied verkennen gongen. Doe zi'j heur reemaekten om te vot te gaon, zee
hi'j tegen heur: "Verkenne et gebied, beschrief et en kom bi'j mi'j
weeromme. Dan zal ik hier in Silo tegenover de Heer et lot veur jim
warpen."
09 De manluden verkenden doe et gebied, maekten een
liest van de steden, verpatten et gebied in zeuven stokken en gongen weeromme
naor et kaamp in Silo, naor Jozua.
10 Disse wurp daor tegenover de Heer et lot en
verpatte et laand onder de Israëlieten neffens de indielinge in stammen.
Et
grondgebied van de stamme Benjamin
11 Et eerste lot vul op de stamme Benjamin. Et
grondgebied dat an de femilies van disse stamme toewezen wodde, lag tussen de
gebieden van Jozef en Juda.
12 De noordgreens begon bi'j de Jordaan. Hi'j gong
langs de noordkaante van de heuvelrogge bi'j Jericho omhogens, leup deur de
bargen naor et westen en kwam uut bi'j de woestijn van Bet-Awen.
13 Hi'j leup dan naor Luz (et Betel van
vandaege-de-dag), gong zudelik langs de barg bi'j die stad, daelde naor
Atrot-Addar en leup veerder over de barg die an de zuudkaante van
Laag-Bet-Choron ligt.
14 Daor maekte hi'j een bocht, waormit hi'j overgong
in de westgreens.
De
westgreens leup vanof de barg die an de zuudkaante van Bet-Choron ligt naor et
zuden tot an de greens mit Kirjat-Baäl (et Kirjat-Jearim van vandaege-de-dag),
een stad die an de stamme Juda toebeheurde. Zo leup de westgreens.
15 De zuudgreens begon boven Kirjat-Jearim en leup van
daor via Ijjim naor de bron van Me-Neftoach.
16 Hi'j daelde naor de voet van de barg die westelik
van et Ben-Hinnomdal en noordelik van de vallei van Refaïm ligt, en daelde dan
veerder naor et Hinnomdal. Via dat dal leup hi'j om et zuden van de heuvelrogge
waorop Jebus lag. Hi'j daelde naor de Rogelbron
17 en leup in een lichte bocht naor et noordoosten.
Daornao gong hi'j in een rechte lijn naor de Semesbron en dan deur naor
Gelilot, dat tegenover de Adummimpas ligt, en daelde of naor de rots van Bohan.
(Bohan was een naokommeling van Ruben.)
18 De greens leup veerder langs de noordkaante van de
heuvelrogge die op de hoogte van Bet-Araba ligt, daelde naor de Jordaanvallei,
19 leup langs de noordkaante van de heuvelrogge die
bi'j Bet-Chogla ligt en gong daornao in zudelike richting veerder tot an de
monding van de Jordaan. Daor, bi'j de noordkaante van de Zooltene-Zee, hul hi'j
op. Zo leup de zuudgreens van de stamme Benjamin.
20 De oostgreens wodde vormd deur de Jordaan.
Dit
weren de greenzen van et grondgebied dat an de femilies van de stamme Benjamin
toebeheurde.
21 In et gebied van de stamme Benjamin laggen disse
steden:
Jericho,
Bet-Chogla, Emek-Kesis,
22 Bet-Araba, Semaraïm, Betel,
23 Awwim, Para, Ofra,
24 Kefar-Haämmoni, Ofni en Geba. Twaelf steden mit de
omliggende dörpen.
25 Veerder Gibeon, Rama, Beërot,
26 Mispa, Kefira, Mosa,
27 Rekem, Jirpeël, Tarala,
28 Sela, Elef en Jebus (et Jeruzalem van
vandaege-de-dag), Gibea en Kirjat-Jearim. Veertien steden mit de omliggende
dörpen.
Dit was et
grondgebied van de femilies van de stamme Benjamin.
Jozua 19
Et
grondgebied van de stamme Simeon
01 Et twiede lot vul op de stamme Simeon. Et
grondgebied dat an de femilies van disse stamme toewezen wodde, lag binnen et
gebied van Juda.
02 Et besleug Berseba, Sema, Molada,
03 Chasar-Sual, Bala, Esem,
04 Eltolad, Betul, Chorma,
05 Siklag, Bet-Hammarkabot, Chasar-Susa,
06 Bet-Lebaot en Saruchen. Dattien steden mit de
omliggende dörpen.
07 En veerder Aïn, Rimmon, Eter en Asan. Vier steden
mit de omliggende dörpen.
08 De dörpen rond al disse steden riekten hielendal
tot an Baälat-Beër en Ramat-Negev.
Dit
was et gebied dat toeheurde an de femilies van de stamme Simeon.
09 Et vormde een ofscheiden pat van et gebied van
Juda, dat veur die stamme te groot was. Daorom kreeg Simeon een gebied binnen
dat van Juda.
Et
grondgebied van de stamme Zebulon
10 Et dadde lot vul op de stamme Zebulon. De zuudgreens
van et grondgebied dat an de femilies van disse stamme toewezen wodde, begon
bi'j Sarid.
11 Hi'j leup dan in westelike richting omhogens naor
Marala, gong vlak langs Dabbeset en kwam krek uut bi'j de wadi die tegenover
Jokneam ligt.
12 De greens leup vanof Sarid in oostelike richting
langs de streek rond Kislot-Tabor, gong rechtstreeks naor Daberat, gong
omhogens naor Jafia
13 en leup van daor veerder naor et oosten. Hi'j gong
bi'j Gat-Hachefer en Et-Kasin langes en leup rechtstreeks naor Rimmon. Dan beug
hi'j of naor Nea.
14 Daornao beug de greens opni'j of an de noordkaante
van Channaton, waornao hi'j uutkwam in de vallei van Jiftach-El.
15 Aandere steden bin Kattat, Nahalal, Simron, Jidala
en Bet-Lechem. Twaelf steden mit de omliggende dörpen.
16 Dit was et gebied dat mit alle steden en dörpen
toeheurde an de femilies van de stamme Zebulon.
Et
grondgebied van de stamme Issachar
17 Et vierde lot wees de femilies van de stamme
Issachar dit grondgebied toe:
18 De steden Jizreël, Kesullot, Sunem,
19 Chafaraïm, Sion, Anacharat,
20 Rabbit, Kisjon, Ebes,
21 Remet, En-Gannim, En-Chadda en Bet-Passes.
22 De greens van heur gebied leup vlak langs de Tabor,
gong doe bi'j Sachasim en Bet-Semes langes, en hul op bi'j de Jordaan. Et besleug
zestien steden mit de omliggende dörpen.
23 Dit was et gebied dat mit alle steden en dörpen
toeheurde an de femilies van de stamme Issachar.
Et
grondgebied van de stamme Aser
24 Et vuufde lot wees de femilies van de stamme Aser
dit grondgebied toe:
25 De steden Chelkat, Chali, Beten, Achsaf,
26 Allammelech, Amad en Misal. De greens van heur
gebied leup hielendal langs de Karmel, via de revier de Libnat, naor de zee.
27 De aandere kaante op, in oostelike richting, leup
hi'j naor Bet-Dagon; daornao vul hi'j even an de noordkaante van et dal van
Jiftach-El saemen mit de greens van Zebulon. Dan gong hi'j in noordelike
richting naor Bet-Haëmek, Neïel en Kabul.
28 Aandere steden daor bin Abdon, Rechob, Chammon,
Kana en Groot-Sidon.
29 Vanof Groot-Sidon leup de greens weeromme in de richting
van Rama, hi'j gong de vestingstad Tyrus veurbi'j, beug of naor Chosa en hul
bi'j slot van zaeke op bi'j de zee. Dit gebied besleug veerder de steden
Machaleb, Achzib,
30 Akko, Afek en Rechob. Twienentwintig steden mit de
omliggende dörpen.
31 Dit was et gebied dat mit alle steden en dörpen
toeheurde an de femilies van de stamme Aser.
Et
grondgebied van de stamme Naftali
32 Et zesde lot wees de femilies van de stamme Naftali
dit grondgebied toe:
33 De zuudgreens leup vanof Chelef, vanof de ekkelboom
in Saänannim, langs Adami-Nekeb en Jabneël naor Lakkum, waornao hi'j ophul bi'j
de Jordaan.
34 De aandere kaante op, in westelike richting, leup
de greens vanof Chelef naor Aznot-Tabor; van daor leup hi'j naor Chukok. Hi'j
vul in et zuden saemen mit de greens van Zebulon, in et westen mit de greens
van Aser, en in et oosten hul hi'j op bi'j de Jordaan, bi'j Jehuda.
35 Dit gebied besleug de vestingsteden Siddim, Ser,
Chammat, Rakkat, Kinneret,
36 Adama, Rama, Hasor,
37 Kedes, Edreï, En-Chasor,
38 Jiron, Migdal-El, Chorem, Bet-Anat en Bet-Semes.
Negentien steden mit de omliggende dörpen.
39 Dit was et gebied dat mit alle steden en dörpen
toeheurde an de femilies van de stamme Naftali.
Et
grondgebied van de stamme Dan
40 Et zeuvende lot wees de femilies van de stamme Dan
dit grondgebied toe:
41 De steden Sora, Estaol, Ir-Semes,
42 Saälabbin, Ajjalon, Jitla,
43 Elon, Timna, Ekron,
44 Elteke, Gibbeton, Baälat,
45 Jehud, Bene-Berak, Gat-Rimmon,
46 Me-Hajjarkon en Rakkon mit et gebied tegenover
Jafo.
47 Mar de Danieten verleuren heur gebied. Zi'j
ondernammen daorom een veldtocht naor Lesem, neumen die stad in en brochten
alleman die daor woonde omme. Ze neumen Lesem in bezit, vestigden heur in die
stad en nuumden heur Dan, naor heur stamheit.
48 Dit was et gebied dat mit alle steden en dörpen
toeheurde an de femilies van de stamme Dan.
Een stad veur
Jozua
49 Doe de Israëlieten et verpatten van et laand klaor
hadden, wezen zi'j ok een gebied toe an Jozua, de zeune van Nun.
50 Overienkomstig de kommedaosie van de Heer gavven ze
him de stad waor hi'j omme vraogd hadde: Timnat-Serach in et barglaand van
Efraïm. Jozua bouwde die stad weer op en gong d'r wonen.
51 Tot zoveer de gebieden die de priester Eleazar,
Jozua, de zeune van Nun, en de stamooldsten van Israël in Silo, veur de ingang
van de ontmoetingstente, tegenover de Heer, deur lotting toewezen hebben.
Daormit was de verdielinge van et laand klaor.
Jozua 20
Ontwiekplakken
01 De Heer zee tegen Jozua:
02 "Zegge tegen et volk van Israël dat et de
ontwiekplakken anwiezen moet waorover ik al deur Mozes mit jim praot hebbe.
03 Iene die per ongelok, zonder ienige opzet, een
aander ommebrocht het, kan daorhenne uutwieken veur de bloedwreker.
04 Hi'j kan naor iene van die steden toe gaon en in de
stadspoort zien zaeke an de ooldsten veurleggen. Zi'j moe'n him in heur stad
opnemen en een plak geven waor hi'j wonen kan.
05 As de bloedwreker him dan aachterhaelt, meugen ze
him niet uutleveren. Langelaeste het hi'j zien slaachtoffer niet wilmoeds
ommebrocht en him gienertied mit de nekke ankeken.
06 Hi'j kan in de stad blieven tot hi'j veur de
volksvergeerdering verschienen moet, en as hi'j vri'jspreuken wodt mag hi'j d'r
wonen blieven tot an de dood van de dan zittende hogepriester. Daornao kan hi'j
rustig op huus an gaon naor de stad waoruut hi'j de wiek neumen hadde."
07 De Israëlieten verklaorden disse steden tot
ontwiek: Kedes in Galilea, in et barglaand van Naftali; Sichem in et barglaand
van Efraïm; Kirjat-Arba (et Hebron van vandaege-de-dag) in et barglaand van Juda;
08 Beser op et onontgonnen pat van de hoogvlakte an de
oostkaante van de Jordaan, op de hoogte van Jericho, op et grondgebied van
Ruben; Ramot in Gilead, op et grondgebied van Gad; en Golan in Basan, op et
grondgebied van Manasse.
09 Dit weren veur alle Israëlieten en veur de vremden
die bi'j heur woonden de anwezen ontwiekplakken, waorhenne alleman vlochten kon
die per ongelok iene ommebrocht hadde. Zo zol hi'j niet deur de bloedwreker van
kaant maekt wodden kunnen veurdat hi'j veur de volksvergeerdering terechtestaon
hadde.
Jozua 21
Steden veur
de Levieten
01 De femilie-ooldsten van de Levieten kwammen in
Silo, in Kanaän, bi'j de priester Eleazar, bi'j Jozua, de zeune van Nun, en
bi'j de stamooldsten van Israël.
02 Ze zeden tegen heur: "De Heer het jim deur
Mozes opdreugen om oons steden te geven om in te wonen en weidegronden veur
oons vee."
03 Hierop stonnen de Israëlieten van heur eigen
grondgebied een riegel steden en weidegronden of an de Levieten, overienkomstig
disse kommedaosie van de Heer.
04 D'r wodden deur lotting eerst steden toewezen an de
Levitische femilies die van Kehat ofstamden. Hiervan kregen de naokommelingen
van de priester Aäron dattien steden; disse kwammen van de stammen Juda, Simeon
en Benjamin.
05 De overige naokommelingen van Kehat kregen deur
lotting tien steden toewezen; disse kwammen van de femilies van de stammen
Efraïm en Dan en van de twiede helte van de stamme Manasse.
06 De naokommelingen van Gerson kregen deur lotting
dattien steden toewezen; disse kwammen van de femilies van de stammen Issachar,
Aser en Naftali en van de eerste helte van de stamme Manasse in Basan.
07 De femilies die van Merari ofstamden kregen twaelf
steden toewezen; disse kwammen van de stammen Ruben, Gad en Zebulon.
08 Zo wezen de Israëlieten deur lotting an de Levieten
een riegel steden en weidegronden toe, zoas de Heer heur deur Mozes opdreugen
hadde.
09-10 Et eerste lot vul op de femilies van de
Kehatieten die naokommelingen weren van Aäron. Disse Levieten kregen disse,
hieronder nuumde steden van de stammen Juda en Simeon:
11 Kirjat-Arba mit de omliggende weidegronden, in et
barglaand van Juda. (Arba was de heit van Enak; Kirjat-Arba is et Hebron van
vandaege-de-dag.)
12 Mar de Israëlieten gavven de akkers rond disse stad
en de omliggende dörpen an Kaleb, de zeune van Jefunne.
13 De naokommelingen van de priester Aäron kregen
behalven Hebron (een ontwiekplak as bescharming tegen bloedwrekers) ok Libna,
14 Jattir, Estemoa,
15 Cholon, Debir,
16 Asan, Jutta en Bet-Semes. Negen steden van de
stammen Juda en Simeon, ieder mit de omliggende weidegronden.
17 En van de stamme Benjamin kregen ze Gibeon, Geba,
18 Anatot en Almon. Vier steden, ieder mit de
omliggende weidegronden.
19 In tetaol kregen de priesters, de naokommelingen
van Aäron, dattien steden mit de omliggende weidegronden.
20 Et lot wees de overige Levitische femilies die van
Kehat ofstamden disse steden van de stamme Efraïm toe:
21 Sichem in et barglaand van Efraïm (een ontwiek as
bescharming tegen bloedwrekers), Gezer,
22 Kibsaïm en Bet-Choron. Vier steden, ieder mit de
omliggende weidegronden.
23 Van de stamme Dan kregen ze Elteke, Gibbeton,
24 Ajjalon en Gat-Rimmon. Vier steden, ieder mit de
omliggende weidegronden.
25 En van de twiede helte van de stamme Manasse kregen
ze Taänach en Jibleam. Twie steden, beide mit de omliggende weidegronden.
26 In tetaol kregen de overige femilies die van Kehat
ofstamden tien steden mit de omliggende weidegronden.
27 De Israëlieten gavven an de Levitische femilies die
van Gerson ofstamden disse steden van de eerste helte van de stamme Manasse:
Golan in Basan (een ontwiek as bescharming tegen bloedwrekers) en Astarot. Twie
steden, beide mit de omliggende weidegronden.
28 Van de stamme Issachar gavven ze Kisjon, Daberat,
29 Jarmut en En-Gannim. Vier steden, ieder mit de
omliggende weidegronden.
30 Veerder Misal, Abdon,
31 Chelkat en Rechob van de stamme Aser. Vier steden,
ieder mit de omliggende weidegronden.
32 En van de stamme Naftali gavven ze Kedes in Galilea
(een ontwiek as bescharming tegen bloedwrekers), Chammot-Dor en Kartan. Drie
steden, ieder mit de omliggende weidegronden.
33 In tetaol kregen de femilies die van Gerson
ofstamden dattien steden mit de omliggende weidegronden.
34 De Israëlieten gavven an de femilies die van Merari
ofstamden, de Levieten die nog overbleven, disse steden van de stamme Zebulon:
Jokneam, Karta,
35 Dimna en Nahalal. Vier steden, ieder mit de
omliggende weidegronden.
38 En van de stamme Gad gavven ze Ramot in Gilead (een
ontwiek as bescharming tegen bloedwrekers), Machanaïm,
39 Chesbon en Jazer. Vier steden, ieder mit de
omliggende weidegronden.
40 In tetaol kregen de femilies die van Merari
ofstamden, de overbleven Levitische femilies, deur lotting twaelf steden
toewezen.
41 Tot zoveer de steden die de Levieten op et grondgebied
van Israël toewezen kregen. In tetaol achtenveertig steden mit de omliggende
weidegronden.
42 Bi'j al disse steden mossen de omliggende
weidegronden mitrekend wodden; dit gul veur iedere stad.
43 Zo gaf de Heer Israël et hiele laand, zoas hi'j
heur veuroolden onder ede toezegd hadde. De Israëlieten neumen et in bezit en
gongen d'r wonen.
44 En de Heer gaf heur vrede an al heur greenzen, krek
zoas hi'j heur veuroolden toezegd hadde. Gienend van heur vi'janen kon him
tegen heur staondeholen, de Heer leverde al heur vi'janen an heur uut.
45 Hi'j breuk niet iene van de toezeggings die hi'j
Israël daon hadde. Hi'j dee ze allemaole gestaand.
Jozua 22
Bouw van een
alter an de Jordaan
01 Jozua leut de stammen Ruben en Gad en de eerste
helte van de stamme Manasse bi'j him kommen.
02 Hi'j zee tegen heur: "Jim hebben alles daon
wat Mozes, de knecht van de Heer, jim opdreugen het en jim bin mi'j ok in alles
geheurzem west.
03 Jim hebben jim breurs al die jaoren gienertied in
de steek laoten, mar de kommedaosie die de Heer, jim God, jim geven het getrouw
uutvoerd, tot op de dag van vandaege.
04 Now het hi'j jim breurs vrede geven, zoas hi'j heur
toezegd het. Gao daorom weeromme naor jim eigen woonplakken, gao naor jim eigen
gebied dat Mozes, de knecht van de Heer, jim toewezen het an de oostkaante van
de Jordaan.
05 Mar hool jim de hieltied an de geboden die hi'j jim
in zien lessen geven het: hebbe de Heer, jim God, lief en volge de weg die hi'j
jim wist, leef zien geboden nao, wees him toegedaon en dien him mit hatte en
ziel."
06 Hiernao zegende Jozua heur en nam ofscheid, waornao
zi'j op huus an gongen.
07 (an de eerste helte van Manasse hadde Mozes al
grondgebied in Basan toewezen. Jozua wees an de twiede helte een grondgebied
toe bi'j dat van de aandere stammen an de westkaante van de Jordaan.) Jozua
zegende heur bi'j et votgaon
08 mit de woorden: "Gao weeromme naor huus,
belaeden mit een protte riekdommen, mit slim vule vee, mit zulver en goold,
keuper, broons en iezer, mit kleraosie in overdaod, en pat disse oorlogsbuit
mit jim stamgenoten."
09 Hierop verleuten de naokommelingen van Ruben en Gad
en de eerste helte van de stamme Manasse de aandere Israëlieten; vanuut Silo in
Kanaän gongen ze weeromme naor Gilead, heur eigen gebied, om heur daor te
vestigen, zoas de Heer heur deur de mond van Mozes opdreugen hadde.
10 Doe ze bi'j de Jordaan kommen weren bouwden ze, nog
op de westelike wal in Kanaän, een opvalend, groot alter.
11 Dit heuren Israëlieten an de aandere kaante. Zi'j
heurden dat Ruben, Gad en half Manasse op de wal van de Jordaan, an de greens
van Kanaän, een alter bouwd hadden.
12 De volksvergeerdering wodde bi'jenneer reupen in
Silo en d'r wodde besleuten om tegen Ruben, Gad en half Manasse de stried an te
gaon.
13 Mar de Israëlieten stuurden eerst een ofveerdiging
naor heur toe. Disse beston uut Pinechas, de zeune van de priester Eleazar,
14 en tien veuranstaonde Israëlieten: femilie-ooldsten
die ok an et heufd van een stamme stonnen.
15 Doe zi'j in Gilead ankommen weren, bi'j de
naokommelingen van Ruben en Gad en de eerste helte van de stamme Manasse, zeden
ze tegen heur:
16 "Wi'j praoten naemens et volk van de Heer. De
volksvergeerdering wil weten waoromme jim de God van Israël ontrouw wodden
binnen deur dat alter te bouwen. Vanwaor disse ontrouw waormit jim jim van de
Heer ofkeerd hebben en tegen him in opstaand kommen binnen?
17 Weren de wandaoden bi'j de Peor nog niet rampzalig
genoeg veur oons? Daor hewwe oons tot op de dag van vandaege nog niet van
schonemaekt, en et volk van de Heer het d'r zwaor onder te lieden had.
18 En now willen jim jim opni'j van de Heer ofkeren?
Zogauw jim tegen him in opstaand kommen, treft zien lelkens vot-en-daolik et
hiele volk.
19 Is jim eigen laand seins poeterig? Kom dan naor et
laand van de Heer, waor hi'j zien tabbernakel het; kom bi'j oons wonen. Mar kom
niet in opstaand tegen de Heer; en kom ok niet in opstaand tegen oons deur nog
een twiede alter te bouwen, naost et alter van de Heer, oonze God.
20 Het Achan, de naokommeling van Zerach, him seins
niet vergrepen an spul waorop de ban van de Heer rustte? Trof de lelkens van de
Heer doe et hiele volk niet? Achan was niet de ienigste die om die misdaod
wegraekte."
21 De stammen Ruben en Gad en de eerste helte van de
stamme Manasse zeden doe tegen de stamooldsten van Israël:
22 "Mar de God van de goden, de Heer, wet toch
... En ok Israël moet weten dat wi'j beslist niet tegen him in opstaand kommen
binnen en him niet ontrouw west binnen. As 't wel zo is ... Heer, God van de
goden, trekke dan vot-en-daolik jow hanen van oons of.
23 Awwe dit alter inderdaod bouwd hebben zollen om
oons van de Heer of te keren, om d'r braand- of graonoffers op te brengen of vredesoffers,
dan mag de Heer oons daorveur boeten laoten.
24 We hebben et alliend mar uut veurzorg daon. We
wollen veurkommen dat jow naokommelingen tegen die van oons zeggen zollen: “wat
hebben jim aenliks mit de Heer, de God van Israël, te maeken?
25 De Heer het ommes tussen jim, naokommelingen van
Ruben en Gad, en oons de Jordaan as greens steld. Jim heuren hielendal niet
bi'j de Heer.” Kotomme, we weren bange dat jim naokommelingen die van oons
beletten zollen om de Heer te dienen.
26 Daoromme zeden we tegen mekeer: “laowe een eigen
alter bouwen.” Et is gien alter veur braandoffers en vredesoffers,
27 mar een alter dat getugen kan van de ofspraoke
tussen jim en oons en oonze naokommelingen. Want ok wi'j willen de Heer dienen
bi'j zien tabbernakel en him daor oonze braandoffers en vredesoffers brengen.
Dan kun jim naokommelingen gienertied tegen die van oons zeggen dat zi'j niet
bi'j de Heer heuren.
28 En as ze dat laeter toch zeggen, dan kun die van
oons heur as bescheid geven: “kiek, hier staot een kopie van et alter van de
Heer dat oonze veuroolden bouwd hebben. Et dient niet veur braandoffers en vredesoffers,
mar getuugt van de ofspraoke tussen jim en oons.”
29 Warkelik, et is vere van oons om tegen de Heer in
opstaand te kommen en oons now van him of te keren deur nog een twiede alter
veur braand- en graonoffers en vredesoffers te bouwen, naost et alter van de
Heer, oonze God, dat veur zien tabbernakel staot."
30 Disse verklaoring van Ruben, Gad en half Manasse
stelde de priester Pinechas en de heufden van de volksvergeerdering, de
stamooldsten van Israël, gerust.
31 Pinechas, de zeune van de priester Eleazar, zee tegen
heur: "Now wee'we dat de Heer in oons midden is, want jim bin him niet
ontrouw west. Mit disse verklaoring hebben jim et volk van Israël veur zien
ingriepen huded."
32 Hierop neumen Pinechas, de zeune van de priester
Eleazar, en de stamooldsten ofscheid van de Rubenieten en Gadieten en gongen
van Gilead weeromme naor Kanaän, naor et volk van Israël. Ze brochten verslag
uut,
33 en de Israëlieten weren ok geruststeld. Zi'j prezen
God en zaggen d'r van of om tegen de Rubenieten en Gadieten de stried an te gaon
en om heur gebied te verdistreweren.
34 De Rubenieten en Gadieten nuumden et alter
"Getuge". "Want," zeden ze, "et getuugt d'r veur jim
en veur oons van dat de Heer oonze God is."
Jozua 23
Ofscheidsrede
van Jozua
01-02 De Heer hadde Israël an alle greenzen rust geven
deur et hielendal van zien vi'janen vri'j te maeken. Een protte jaoren laeter
reup Jozua, die doe op hoge leeftied kommen was, hiel Israël, de ooldsten,
stamooldsten, rechters en griffiers bi'jenneer. Hi'j zee tegen heur: "Ik hebbe
niet lange meer te leven.
03 Jim hebben zels zien kund wat de Heer, jim God, mit
al die volken daon het. Hi'j was et ommes die veur jim streed.
04 Ik hebbe veur jim stammen deur lotting et laand
verpat van de volken die ik uutroeid hebbe, van de Jordaan tot an de Grote Zee
in et westen; en ok et laand van de volken die nog overbleven binnen.
05 Die zal de Heer, jim God, zels veur jim verdrieven
en uutroeien. Dan kun jim heur laand in bezit nemen, zoas hi'j toezegd het.
06 Wees daorom slim staandvaastig mit betrekking tot
de veurschriften van Mozes. Wiek daor op gien inkelde meniere van of.
07 Ming jim niet mit die vremde volken die nog bi'j
jim overbleven binnen. Neem de naeme van heur goden niet in de mond en zweer
d'r gienertied bi'j, dien die niet en buug jim gienertied veur ze daele.
08 Jim moe'n alliend de Heer, jim God, toegedaon
wezen, zoaj'm dat tot now toe west binnen.
09 De Heer roeide grote en machtige volken veur jim
uut, gieniene kon tegen jim staandholen, tot op de dag van vandaege.
10 Hoe pattietoeren kwam et niet veur dat alliend mar
iene van jim wel duzend man aachtervolgde? Dat kwam deurdat et de Heer was, jim
God, die veur jim streed, zoas hi'j toezegd hadde.
11 Daorom is et veur jim van levensbelang om van him
te holen.
12-13 Weet dat aj'm jim van him ofkeren en bevrund
raeken mit die volken die nog bi'j jim overbleven binnen, aj'm jim daormit
vermengen deur huweliken mit ze an te gaon, dan zal de Heer, jim God, die
volken niet meer veur jim uutroeien. Dan wodden ze veur jim een flappersnet en
een valstrik, een zwiepe die jim gieselt en een stiekeltakke die jim de ogen
uutstikt, krek zolange tot jim allemaole wegvaegd binnen uut dit goeie laand
dat de Heer, jim God, jim het geven.
14 Luuster. Now ik de weg gaon moet die ieder meenske
waacht, moej'm goed begriepen dat de Heer, jim God, gienend van de toezeggings
breuken het die hi'j jim daon het. Hi'j het ze allemaole gestaand daon, hi'j
het d'r niet iene breuken.
15-16 Mar zoas hi'j jim de veurspoed geven het die
hi'j toezegd hadde, zo zal hi'j ieder meugelik onheil over jim brengen aj'm de
regels van et verbond overtreden die hi'j jim oplegd het. Aj'm aandere goden
dienen gaon en jim veur ze daelebugen, zal hi'j jim wegvaegen uut dit goeie
laand dat hi'j jim het geven. Dan zal zien lelkens tegen jim inbranen en zuj'm
hiel hadde wegvaegd wodden uut dit goeie laand, dat jim van him kregen
hebben."
Jozua 24
Volksvergeerdering
in Sichem
01 Jozua reup alle stammen van Israël bi'jenneer in
Sichem. Naodat hi'j de ooldsten, stamooldsten, rechters en griffiers heur
tegenover God opstellen laoten hadde,
02 zee hi'j tegen et volk: "Dit zegt de Heer, de
God van Israël: Jim veuroolden woonden lange leden an de oostkaante van de
Eufraat. Et weren Terach en zien zeunen Abraham en Nachor. Zi'j dienden aandere
goden.
03 Mar ik hebbe jim stamheit Abraham daor weghaeld en
him deur hiel Kanaän trekken laoten. Ik gaf him een protte naokommelingen. Ik
gaf him Isaak as zeune
04 en Isaak gaf ik Jakob en Esau. Esau kreeg van mi'j
et Seïrgebargte in bezit, mar Jakob en zien zeunen trokken naor Iegypte.
05 Ik stuurde Mozes en Aäron, teisterde Iegypte, jim
weten hoe, en leidde jim et laand uut.
06 Ik hebbe jim veuroolden uut Iegypte vri'jmaekt.
Zi'j kwammen bi'j de Rietzee, wiels de Iegypteners heur naozatten mit striedwaegens
en ruters.
07 Doe reupen ze mi'j, de Heer, om hulpe, en ik
scheidde heur van de Iegypteners deur een zwaore duusternis en leut de
Iegypteners deur de zee opnemen. Jim hebben mit eigen ogen zien wa'k mit heur
daon hebbe. Daornao bleven jim jaorenlaank in de woestijn,
08 tot ik jim naor et laand van de Amorieten brocht,
die an de oostkaante van de Jordaan woonden. Zi'j neumen de waopens tegen jim
op, mar ik leverde heur an jim uut en verdistreweerde heur, en jim neumen heur
laand in bezit.
09 Daornao verscheen keuning Balak van Moab, de zeune
van Sippor, om de stried tegen jim an te gaon. Hi'j leut Bileam, de zeune van
Beor, kommen; die mos jim vervluken,
10 mar ik gaf him gien geheur. Ik bescharmde jim tegen
him; meer nog, hi'j zegende jim alderdeegst.
11 Daornao trokken jim de Jordaan over en kwammen jim
bi'j Jericho. De inwoners van Jericho verdedigden heur tegen jim, krek as de
Amorieten, Perizzieten, Kanaänieten, Hethieten, Girgasieten, Chiwwieten en
Jebusieten, mar ik leverde ze allemaole an jim uut.
12 Ik stuurde een zwaarm bremzen veur jim uut die ze
op de vlocht jaegde, zoas eerder de twie keunings van de Amorieten op de vlocht
jaegd wodden. Jim zweerden en bogen hoefden d'r niet an te pas te kommen.
13 Ik hebbe jim een laand geven waorveur jim niks daon
hebben hoeven, steden die jim niet bouwd hebben en waorin jim zomar wonen gaon
konnen, droevetunen en olijfbomen die jim niet plaant hebben en waorvan jim
zomar eten kunnen.
14 Now dan," gong Jozua deur, "eerbiedig de
Heer, dien him mit onveurweerdelike trouw en doe de goden vot die jim
veuroolden an de oostkaante van de Eufraat en in Iegypte diend hebben. Dien
alliend de Heer.
15 Aj'm daor niet toe bereid binnen, kies dan now wie
jim wel dienen willen: de goden van jim veuroolden an de oostkaante van de
Eufraat of de goden van de Amorieten, van wie jim now et laand bewonen. In
ieder geval zullen ik en mien femilie de Heer dienen."
16 Hierop zee et volk doe: "Et is vere van oons
de Heer te verlaoten om aandere goden te dienen.
17 Hi'j is et, de Heer, oonze God, die oons en oonze
veuroolden uut de slavernij in Iegypte vri'jmaekt het. Hi'j het grote wonderen
veur oons daon; dat hewwe mit eigen ogen zien. Hi'j het oons op oonze hiele
tocht bescharmd tegen alle volken waorvan we et gebied deurtrokken.
18 De Heer het ze allemaole veur oons verdreven, en ok
de Amorieten, die eertieds in dit laand woonden. Netuurlik zullen wi'j de Heer
dienen, want hi'j is oonze God."
19 Mar Jozua zee doe tegen et volk: "Jim zullen
niet in staot wezen om de Heer te dienen, want hi'j is een heilige God, hi'j
duldt gieniene naost him, hi'j zal jim jim overtredings en zunden niet
vergeven.
20 Aj'm de Heer verlaoten en aandere goden dienen
gaon, zal hi'j him tegen jim keren. Dan zal hi'j jim niet langer weldaoden
bewiezen, mar jim kwaod doen en jim verdistreweren."
21 Mar et volk zee opni'j: "Wees d'r van
verzekerd dawwe de Heer dienen zullen."
22 "In dat geval," zee Jozua doe,
"bi'j'm zels de getugen van jim keuze om him, de Heer, te dienen."
"Ja, dat biwwe," bevestigde et volk,
23 waorop Jozua zee: "Doe dan die vremde goden
vot en richt jim hielendal op de Heer, de God van Israël."
24 En et volk beloofde: "We zullen de Heer, oonze
God, dienen en geheurzem wezen."
25 Zo legde Jozua et volk die dag in Sichem disse
verplichting op en hi'j gaf et wetten en regels,
26 die hi'j in et wetboek van God opschreef. Ok
richtte hi'j een grote stien op onder de terebint bi'j et heiligdom van de
Heer.
27 "Disse stien," zee hi'j tegen et volk,
"is getuge, want hi'j het alles heurd wat de Heer tegen oons zegd het.
Hi'j is dus getuge zodat jim jim God niet ofvallig wodden."
28 Daornao leut Jozua et volk votgaon, iederiene gong
naor zien eigen grondgebied.
Dood van
Jozua en Eleazar
29 Kotte tied laeter raekte Jozua weg, de zeune van
Nun, de knecht van de Heer, op de leeftied van honderdtien jaor.
30 Hi'j wodde begreuven in et gebied dat him toewezen
was: in Timnat-Serach in et barglaand van Efraïm, an de noordkaante van de
Gaäs.
31 Zolange Jozua leefde diende et volk de Heer. Ok nao
zien wegraeken bleven ze de Heer dienen zolange de stammen anvoerd wodden deur
Jozua zien leeftiedsgenoten, die getuge west weren van de grootse daoden die de
Heer veur Israël daon hadde.
32 Et bonkerak van Jozef, dat et volk van Israël uut
Iegypte mitneumen hadde, wodden begreuven in Sichem, op et stok laand dat Jakob
veur honderd qesita kocht hadde van de zeunen van Chamor, onder wie Sichem. De
naokommelingen van Jozef kregen dit stok laand in bezit.
33 Ok Eleazar, de zeune van Aäron, raekte weg. Hi'j
wodde begreuven in et barglaand van Efraïm op de heuvel die zien zeune Pinechas
toewezen was.