De brief van Jakobus.
01 Van Jakobus, knecht van God en van de Heer Jezus Christus. An de twaelf stammen in de diaspora. Ik groete jim.Geleuf en staandvaastighied.02 Et moet jim tot grote bliedschop stemmen, breurs en zusters, as jim verschillende beproevings ondergaon.
03 Want jim weten: as jim geleuf op de proef steld wodt, leidt dat tot staandvaastighied.
04 As die staandvaastighied dan ok daodwarkelik bliekt, zullen jim volmaekt en volkomen wezen, zonder daj’m nog wat tekotkommen.
05 Komt iene van jim wieshied tekot? Vraoge God d'r omme en hi'j, die an iederiene geft, zonder veurbehoold en zonder verwiet, zal je die wieshied geven.
06 Vraog vol fedusie, zonder ienige twiefel. Wie twiefelt is as een golf in zee, die deur de wiend henne en weer beweugen wodt.
07-08 Wie zo twiefelend en onberekenber is bi'j alles wat hi'j dot, moet niet daenken dat hi'j wat van de Heer kriegen zal.
09 Laot de onanzienlike geleuvige groots wezen op zien hoge weerde,
10 en de rieke op zien nederige staot, want hi'j zal vergaon as een bloeme in et veld.
11 As de zunne branen gaot en et grös deur de hitte verdruugt, vaalt de bloeme of en is et daon mit zien schoonhied. Zo zal et ok de rieke vergaon wiels hi'j volop mit zien zaeken doende is.
12 Gelokkig is de meenske die in de beproeving staonde blift. Want wie de proef deurstaot, kriegt as lauwerkraans et leven, zoas God beloofd het an iederiene die him liefhet.
13 Wie in verleiding komt, moet niet beweren: "Die verleiding komt van God." Want God stelt gieniene an verleiding bloot, zoas hi'j zels ok niet deur, et geft niet wat, in verleiding brocht wodden kan.
14 Iederiene komt in verleiding deur zien eigen begeerte, die him anlokt en mitsleept.
15 Is de begeerte bevrucht, dan ontstaot daor zunde; en is de zunde volgruuid, dan brengt zi'j de dood.
16 Lieve breurs en zusters, verzinne jim niet:
17 elke goeie gaove, ieder volmaekt geschink komt van boven, van de Heit van de hemellochten; bi'j him is nooit ienige veraandering of verduustering te zien.
18 Hi'j wol oons deur de verkondiging van de waorhied tot leven roepen, om oons de eersten te maeken in zien schepping.
Geleuven en doen.
19 Lieve breurs en zusters, onthool dit goed: ieder meenske moet him haosten om te luusteren, mar kalman doen in zien praoten, kalman ok in et kwaod wodden.
20 Want de woede van een meenske brengt niks dat in God zien ogen rechtveerdig is.
21 Wees daorom zaachtmoedig en leg alle verdurvenhied en elk daenkber wangedrag of. En anvere zo de bosschop die in jim plaant is en die jim redden kan.
22 Verzinne jim niet: allienig heuren is niet genoeg, jim moe'n, wat jim heurd hebben, ok doen.
23 Want wie de bosschop heurt mar d'r niks mit dot, is krek as iene die et gezichte waormit hi'j geboren is in de spiegel bekiekt:
24 hi'j zicht himzels, mar zogauw hi'j weglopt is hi'j vergeten hoe hi'j d'r uutzag.
25 Wie him daorintegen spiegelt in de volmaekte wet die vri'jhied brengt, en dat doen blift, niet as iene die heurt en vergeet, mar as iene die d'r naor haandelt - him vaalt gelok te diel, krek om wat hi'j dot.
26 Wie mient dat hi'j God dient, wiels hi'j zien tonge niet beteugelen kan, zit op 'n giebe, en hiel zien godsdienst is vergeefse muuite.
27 Veur God, de Heit, is allienig dit reine, zuvere godsdienst: wedevrouwen en wezen bi'jstaon in heur nood, en je in acht nemen veur de wereld en onberispelik blieven.

Jakobus 2.

01 Breurs en zusters, et geleuf in Jezus Christus, oonze glorierieke Heer, staot niet toe dat jim meensken op heur uterlik beoordelen.
02 Stel dat jim geerkomst bezocht wodt deur iene die prachtige kleren en goolden ringen dreegt, en toegeliekertied deur een aarmen iene in vodden.
03 As jim dan de eerste mit alle zorg omringen en tegen him zeggen: "Gaon jow hier mar zitten, hier zitten jow goed," wiels jim tegen de twiede zeggen: "Gao daor mar staon, of gao mar bi'j mien voetebaank op de grond zitten,"
04 maeken jim dan gien ongeoorloofd onderscheid en wodt jim oordiel niet deur verkeerde overwegings bepaold?
05 Luuster, lieve breurs en zusters: het God niet krek heur, die naor wereldse maotstaeven aarm binnen, uutkeuzen om riek te wezen en deur et geleuf pat te kriegen an et keuninkriek dat hi'j beloofd het an wie him liefhet?
06 Mar jim behaandelen aarme meensken mit minachting. Bin et dan niet de rieken die jim onderdrokken en jim veur de rechter slepen?
07 Bin zi'j et niet die jim goeie naeme, deur de modder haelen?
08 Mar as jim et keuninklike gebod volbrengen dat de Schrift geft: "Hebbe jow naoste lief as jowzels," dan haandelen jim goed.
09 Mar as jim op et uterlik ofgaon, begaon jim een zunde en bestempelt de wet jim as overtreders.
10 Wie de hiele wet onderhoolt mar op ien punt stroffelt, blift te anzien van alle geboden in gebreke.
11 Want hi'j die zegd het: "Doe niet an overspel," het ok zegd: "Begao gien moord." As jim gien overspel plegen mar wel een moord, overtreden jim de wet toch.
12 Zorg d'r veur dat jim praoten en jim haandelen de toets deurstaon kan van de wet die vri'jhied brengt.
13 Onbaarmhattig zal et oordiel wezen over wie gien baarmhattighied bewezen het; mar de baarmhattighied overwint et oordiel.
14 Breurs en zusters, wat het et veur nocht as iene zegt te geleuven, mar hi'j haandelt d'r niet naor? Zol dat geleuf him dan soms redden kunnen?
15 As een breur of zuster amper kleren het en elke dag honger het,
16 en iene van jim zegt dan: "Et gao je goed! Struup wat waarms an en eet ze lekker!" zonder de aander de wat van de eerste levensbehoeften te geven - wat het dat dan veur zin?
17 Zo is et ok mit et geleuf: as et him niet daodwarkelik bewiest, is et dood.
18 Mar dan zegt iene: "De iene geleuft, de aander dot." Laot mi'j dan mar es zien daj'm geleuven kunnen zonder daoden; ik zal jim deur mien daoden tonen dat ik geleuve.
19 Jim geleuven dat God de ienige is? Daor doen jim goed an. Mar de demonen geleuven dat ok, en zi'j sidderen.
20 Dwaoze, willen jow et bewies dat geleuf zonder daoden nutteloos is?
21 Wodde et oonze veurvader Abraham niet as een rechtveerdige daod toerekend dat hi'j zien zeune Isaak op et alter offeren wol?
22 Jim zien hoe geleuf en haandelen daor haand in haand gaon, en hoe et geleuf vervolmaekt wodt deur daoden.
23 Zo gong in vervulling wat de Schrift zegt: "Abraham vertrouwde op God, en dat wodde him toerekend as een rechtveerdige daod." Hi'j wodt alderdeegst God zien vrund nuumd.
24 Jim zien dus dat iene rechtveerdig verklaord wodt om wat hi'j dot, en niet allienig om zien geleuf.
25 Wodde ok Rachab, de hoer, niet rechtveerdig verklaord om wat ze dee, doe ze de verkenners over de heerd kreeg en heur langs een aander pad weer vot gaon leut?
26 Zoas et lichem dood is zonder de ziel, zo is ok geleuf dood, zonder daoden.


Jakobus 3.

01 Breurs en zusters, jim moe'n niet allemaole lerer wezen willen. Jim weten dat oons lerers een strenger oordiel te waachten staot.
02 En hoe vaeke stroffelen we allemaole niet es! Wie him nooit verpraot kan himzels een volmaekt meenske numen, die in staot is om alderdeegst et hiele lichem in toom te holen.
03 Peerden doe'we een bit in 'e mond om heur geheurzem wezen te laoten, en deur dat bit kuwwe zien hiele lichem sturen.
04 En kiek es hoe hiele grote schippen, opjaegd deur een hevige wiend, mit een klein roer in de richting stuurd wodt die de stuurman bepaolt.
05 Zo is ok de tonge een klein orgaan, mar wat een grootspraoke kan hi'j teweeg brengen! Bedaenk es hoe een kleine vlam een enorme bosbraand veroorzaeken kan.
06 Oonze tonge is krek zoe’n vlam: een wereld van onrecht, die oonze lichemsdelen in braand stikt. Want hi'j besmet et hiele lichem, hi'j stikt et rad van et leven in braand, mit vuur uut de Gehenna.
07 De meenske het alle meugelike soorten dieren weten te temmen, wilde dieren, voegels, kroepende dieren en zeedieren,
08 mar d'r is gien meenske die de tonge temmen kan, dat onberekenbere kwaod, vol dodelik venien.
09 Mit oonze tonge zegenen we oonze Heer en Heit, en we vervluken d'r meensken mit die God maekt het as zien weerscheide.
10 Uut dezelde mond klinkt zegen en vervluking. Dat kan toch niet goed wezen, breurs en zusters?
11 Laot een bron soms uut eenzelde ader zute en bitter waeter opwellen?
12 Of kan een viegeboom olijven dregen, of een wienstok viegen? Liekemin geft een zilte bron zuut waeter.
13 Wie van jim kan wies en verstaandig nuumd wodden? Laot hi'j et mar bewiezen deur een onberispelik leven en deur wieze zaachtmoedighied.
14 Mar as jim jim beheersen laoten deur bittere jaloezie of egoïsme, kuj'm beter niet zo hoge van de toren blaozen; jim zollen de waorhied geweld andoen.
15 Dat soorte wieshied komt niet van boven; zi'j komt van de van de eerde, ongeestelik, duvels.
16 Waor jaloezie en egoïsme heersen, vieren wanorde en allerhaande kwaod hoogti'j.
17 De wieshied van boven daorintegen is veur alles zuver, en veerder vredelievend, mild en mitgaonde; zi'j is riek an ontfarming en brengt niks dan goeie vruchten, zi'j is onperti'jdig en oprecht.
18 Waor in vrede zi'jd wodt, geft gerechtighied heur vruchten veur heur die vrede stichten.


Jakobus 4.

Onderwarp je an God.

01 Waor komt al die stried, waor kommen al die konflikten bi'j jim toch weg? Bin et niet de hatstochten die stried leveren in jim binnerste?
02 Jim verlangen argens naor, mar kriegen et niet. Jim bin jeloers en moordlustig, mar berieken jim doel niet. Jim bekvechten en maeken ruzie mit mekeer. Jim kriegen niks omreden jim niet bidden.
03 En aj'm bidden kriegen jim niks, omreden jim verkeerd bidden: jim willen allienig jim eigen hatstochten bevredigen.
4 Trouwelozen! Beseffen jim dan niet dat vrundschop mit de wereld, vi'jaandschop tegenover God betekent? Wie vrund wezen wil van de wereld, maekt him tot vi'jaand van God.
05 Daenk toch niet dat dit loze woorden binnen in de Schrift: "Hi'j die oons et leven gaf, maekt d'r vurig anspraoke op;
06 mar de genaode die hi'j geft is nog groter." Daorom staot d'r: "God keert him tegen hoogmoedigen, mar an nederigen geft hi'j zien genaode."
07 Onderwarpe jim dan ok an God, en verzet jim tegen de duvel, dan zal die bi’j jim weg gaon.
08 Komme dichter tot God, dan zal hi'j dichter naor jim toe kommen. Waske jim hanen, zundige meensken; zuver jim hatte, twiefelers.
09 Weeklaeg, wees treurig en laot jim traonen de vri’je loop. Laot jim lachen veraanderen in droefhied en jim vreugde in somberheid.
10 Verneder jim veur de Heer, dan zal hi'j jim verheffen.
11 Praot gien kwaod van mekeer, breurs en zusters. Wie kwaod van een aander praot of een aander veroordeelt, praot kwaod van de wet en veroordeelt de wet. En as jim de wet veroordelen, haandelen jim niet neffens de wet, mar treden jim op as rechter.
12 D'r is mar iene wetgever en rechter: hi'j die bi'j machte is te redden of in et verdarf te stotten. Mar wie bin jim, om jim naoste te veroordielen?
13 Dan nog wat veur jim die zeggen: "Vandaege of morgen gaon wi'j naor die en die stad. Daor blieven we een jaor, we zullen d'r haandel drieven en geld verdienen."
14 Jim weten niet iens hoe jim leven d'r morgen uutzicht. Jim bin ommes mar damp, die hiel even verschient en dan al verdwient.
15 Jim zollen zeggen moeten: "As de Heer et wil, dan biwwe in leven en zuwwe dit of dat doen."
16 Mar jim slaon een hoge toon an en bin daor nog ok nog wies op. Dat soorte van wies wezen is hielemaole ongepast.
17 As iene wet hoe ‘t heurt mar d'r niet naor haandelt, die zundigt.


Jakobus 5.

01 En now nog wat veur jim, rieken! Weeklaeg en jammer om de rampspoed die over jim komt.
02 Jim riekdom is verrot en jim kleren is deur de motten anvreten.
03 Jim goold en zulver is verroest, en die roest zal tegen jim getugen en as een vuur dat jim lichems verteert. Jim hebben jim schatkaemers vuld, mar de tied lopt an ‘t aende.
04 Heur de klachten over et loon dat jim et warkvolk, die jim velden mi'jden, niet geven hebben. Et geroep van de mi'jers is tot de Heer van de hemelse machten deurdrongen.
05 Jim hebben op eerde in weelde ommelopen en losbanig leefd, jim hebben jimzels vetmest veur de slachttied.
06 Jim hebben de rechtveerdige veroordield en vermoord, en hi'j het him niet tegen jim verzet.
Bemoediging en raodgevings.
07 Hebbe geduld, breurs en zusters, tot de Heer komt. Daenk es an de boer, die geduldig waachten blift op de kostbere opbrengst van zien laand, tot de regens van et naojaor en et veurjaor valen binnen.
08 Wees krek zo geduldig en hool moed, want de Heer zal gauw kommen.
09 Klaeg niet over mekeer, breurs en zusters, want daormit roepen jim et oordiel over jim of. Bedaenk dat de rechter veur de deure staot.
10 Neem een veurbield an et geduldige lieden van de profeten die uut naeme van de Heer praotten.
11 Degenen die staandhullen priezen we gelokkig! Jim hebben heurd hoe staandvaastig Job was, en jim weten wat uutkomst de Heer gaf; de Heer is ommes liefdevol en baarmhattig.
12 Mar bovenal, breurs en zusters, zweer gien inkelde eed, niet bi'j de hemel, niet bi'j de eerde, nargens bi'j. Laot jim ja ja wezen, en jim nee nee, aanders zullen jim d'r veur straft wodden.
13 As iene van jim et muuilik het, laot hi'j bidden; is hi'j bliede, laot hi'j een loflied zingen.
14 Laot iene die ziek is de ooldsten van de gemiente bi'j him roepen; laoten zi'j veur him bidden en him mit eulie zalven in de naeme van de Heer.
15 Et geleuvige gebed zal de zieke redden, en de Heer zal him staon gaon laoten. As hi'j zundigd het, zal et him vergeven wodden.
16 Beken mekeer jim zunden en bidde veur mekeer, dan zullen jim genezen. Want et gebed van een rechtveerdige is krachtig en mist zien uutwarking niet.
17 Elia was een meenske as wi'j, en naodat hi'j vurig bidded had dat et niet regenen zol, is d'r drieëneenhalf jaor laank gien regen valen op et laand.
18 Doe biddede hi'j opni'j, en de hemel gaf regen, en et laand brocht weer vrucht.
19 Breurs en zusters, as iene van jim ofdwaelt van de waorhied en een aander laot him daorhenne teroggekeren,
20 dan mag hi'j weten: wie een zundig persoon van een giebe weeromme brengt, redt him van de dood en wist tal van zunden uut.