Een eerste vraoge die bi'j et lezen van de brief an de Hebreeën naor veuren komt is as et boek eins wel een brief is. Et het gien begroeting an et begin en et boek liekt meer op een retorisch betoog as een brief, mar toch wodt et beoogde pebliek krek as in de brieven van Paulus anspreuken mit "breurs en zusters" en "geliefden", en et boek besluut mit een slotbegroeting. Uut et boek bliekt in ieder geval dat de schriever et schreven het mit een konkreet, him bekend pebliek veur ogen. De schriever en et plak van ontstaon bin onbekend; et boek moet dateerd wodden in et laeste vorrels van de eerste ieuw. De stijl is verzorgd, d'r is spraoke van een starke retorische opbouw.

Hoewel in et boek zels gien adresseerden nuumd wodden, stiet in de titel "an de Hebreeën". Vermoedelik wodde al vroeg in de overlevering van et boek anneumen dat de auteur een pebliek van Joodse kristenen op et oge hadde omreden d'r in et boek een protte Joodse gebruken an de odder kommen, en vaeke citeerd wodt uut et Oolde Testement. Vandaege-de-dag verschillen uutleggers van miening over de vraoge of et boek allienig de kristenen van Joodse ofkomst op et oge het, of een kristelik pebliek van Joodse en heidense oorsprong.

Uut et boek bliekt dat een pat van et pebliek demotiveerd is en ofvallig driegt te wodden van et kristelik geleuf. Meensken gaon bi'jglieks niet meer naor de saemenkomsten van de gemiente (10:25). Her en der komt naor veuren dat de adresseerden interesse tonen in et jodendom. Mit zien betoog wil de schriever veurkommen dat zien lezers heur geleuf verliezen. Centraol in de brief stiet daorom de vergelieking tussen et jodendom en et christendom. Op grond van passages uut et Oolde Testement wil de schriever antonen dat Jezus de vervulling is van de beloften die vroeger daon binnen, en dat mit him een ni'j tiedpark anbreuken is. God had zien volk ooit beloofd dat hi'j een ni'je regeling treffen zol mit de meensken, een "ni'j verbond". Neffens de schriever van Hebreeën is dat ni'je verbond ingaon mit de komst van Jezus. De schriever impliceert hiermit dat et oolde verbond niet langer geldig is. Op die wieze wil hi'j veur de lezers die et kristelik geleuf driegen valen te laoten, benadrukken dat et christendom de ienige juuste weg tot God is. Een belangriek motief in et boek is et beeld van Jezus as hogepriester in de hemel.

An de haand van et Oolde Testement wodt beschreven hoe et jodendom een hogepriester in de tempel het, die jaorliks een ritueel doen moet om de zunden van et volk te verzoenen. Disse hogepriester komt uut et naogeslaacht van Aäron en het dus een meenselike, eerdse staotus. An de haand van een citaot uut Psalm 110, dat de hieltied weerommekomt in et boek, wil de schriever zien laoten dat Jezus ok een hogepriester is, mar dan van een aander soorte. Jezus is niet tiedelik hogepriester, zoas de Joodse priesters, mar veur iewig; mit zien dood het hi'j veurgoed de zunden wegneumen. Hi'j is gien priester op eerde, mar in de hemel, bi'j God. Ok mit disse rissenaosie perbeert de schriever zien lezers te overtugen van de waorhied van et christendom.

In et eerste pat van et boek, 1:1-4:13, wodt Jezus zien pesisie uutstokt: hi'j is boven Mozes en de engels verheven, mar het him om de meensken bekommerd. Daorom moeten de lezers an zien woorden geheurzemen. In et twiede pat, 4:14-10:18, stiet de verholing tussen et oolde en et ni'je verbond centraol, en de rolle van Jezus as hogepriester in de hemel. Et laeste pat, 10:19-13:25, het anvieterings en vermanings veur de lezers, en besluut mit een slotgroet.

Hebreeën 1.

De brief an de Hebreeën.

01 Op allerhaande menieren en langs allerhaande wegen het God in et verleden tot de veuroolden praot deur de profeten,

02 mar now de tied an 't aende lopt het hi'j tot oons praot deur zien Zeune, die hi'j anwezen het as ienig arfgenaem en deur wie hi'j de wereld maekt het.

03 In him schittert God zien luuster, hi'j is zien weerscheide, hi'j schraegt de schepping mit zien machtig woord; hi'j is, nao dat hi'j daon wark maekt hadde van de reiniging van de zunden, zitten gaon an de rechterhaand van God zien hemelse majesteit,

04 veer verheven boven de engels omreden hi'j een eerbiedwaardiger naeme kregen het as zi'j.

05 Tegen wie van de engels het God ommes ooit zegd: "Ie bin mien zeune, ik hebbe jow vandaege verwekt"? Of: "Ik zal een heit veur him wezen, en hi'j veur mi'j een zeune"?

06 Mar as hi'j de eerstgeborene de wereld weer binnenleidet, zegt hi'j: "Laoten al God zien engels him ere bewiezen."

07 Over de engels zegt hi'j: "Die zien engels inzet as wiendfladden, en zien knechten as een vlammend vuur."

08 Mar tegen de Zeune zegt hi'j:

"God, jow troon hoolt staand tot in alle iewighied,

en de scepter van et recht is de scepter van jow keuningschop.

09 Gerechtighied hebben jow liefhad en onrecht mit de nekke ankeken;

daorom, God, het jow God jow zalfd

mit bliedschopseulie, as gienend van jow geliekesen."

10 En ok:

"In et begin hebben jow, Heer, de eerde grondvest,

en de hemel is et wark van jow hanen.

11 Zi'j zullen vergaon, mar jow holen staand,

zi'j zullen as een klied verslieten,

12 as een maantel zullen jow ze oprollen,

as een klied zullen zi'j verwisseld wodden;

mar jow blieven dezelde, en jow jaoren zullen gien aende nemen."

13 Tegen wie van de engels het hi'j ooit zegd: "Gao zitten an mien rechterhaand, tot ik van je vi'janen een baank veur je voeten maekt hebbe"?

14 Bin zi'j niet allemaole dienende geesten, uutzunnen om heur te helpen die pat kriegen zullen an de redding?

Hebreeën 2.

Jezus en zien breurs en zusters.

01 Daorom moe'n wi'j al oonze andacht richten op wawwe heurd hebben, dan zuwwe niet uut de koers raeken.

02 Want as et deur engels zegd woord al zoe'n protte rechtskracht hadde dat op iedere overtreding en ongeheurzemhied een rechtmaotige straf volgde,

03 hoe zullen wi'j dan an die straf ontkommen awwe gien acht slaon op de zovule meer omvattende redding die begonnen is mit de woorden van de Heer, en die veur oons bevestigd wodde deur heur die disse woorden heurd hebben?

04 Ok God zels getuugde daorvan, deur tekens en wonderen en verschillende grote daoden te doen, en deur de giften van de heilige Geest overienkomstig zien wil te verpatten.

05 Now dan, de kommende wereld, waorover wi'j hier praoten, het hi'j niet onder et gezag van engels steld.

06 Vule eerder gelt disse getugenis, die ooit es deur iene oflegd is:

"Wat is de meenske dat jow an him daenken,

et meenskekiend dat jow naor him ommekieken?

07 Jow hebben him veur kotte tied leger as de engels plaetst;

jow hebben him mit ere en luuster kroond,

08 alles hebben jow an him onderwurpen."

Deurdat hi'j alles an him onderwurpen het, blift d'r niks over dat niet onder zien gezag steld is. Mar dat alles an him onderwurpen is, zien wi'j now nog niet;

09 wel zien we dat Jezus – die veur kotte tied leger as de engels plaetst was zodat zien dood deur God zien genaode iederiene te goede kommen zol – vanwegens zien lieden en dood now mit ere en luuster kroond is.

10 Want om een protte kiender in zien luuster patten te laoten achtte God, veur wie en deur wie alles bestiet, et passend om de baenemaeker van heur redding deur et lieden naor de uutaendelike volmaekthied te veerden.

11 Hi'j die heiligt en zi'j die heiligd wodden hebben iene en dezelde oorsprong, en daorom schaemt hi'j him d'r niet veur om heur zien breurs en zusters te numen

12 as hi'j zegt: "Ik zal jow naeme uutdregen an mien breurs en zusters, jow eren in de ronte van mien volk."

13 Zo zegt hi'j ok: "Ik zal de hieltied op him vertrouwen," en veerder: "Hier stao ik mit de kiender die God mi'j geven het."

14 Omreden die kiender meensken binnen van vleis en bloed, is de Zeune een meenske wodden, krek as zi'j, om deur zien dood definitief of te rekenen mit de heerser over de dood, de duvel,

15 en zo iederiene te vri'j te maeken die knecht weren van heur levenslange aangst veur de dood.

16 Et mag dudelik wezen: hi'j is niet begaon mit et lot van engels, hi'j is begaon mit et lot van de naokommelingen van Abraham.

17 Daorom mos hi'j in alles geliek wodden an zien breurs en zusters; allienig dan zol hi'j in angelegenheden tussen God en zien volk een baarmhattige en betrouwbere hogepriester wezen, die verzoening bewarkt veur heur zunden.

18 Krek omreden hi'j zels op de proef steld wodde en et lieden volbrocht het, kan hi'j iederiene die uutperbeerd wodt helpen.

Hebreeën 3.

Luusteren naor zien stemme.

01 Jim allemaole, heilige breurs en zusters, die pat hebben an de hemelse roeping, richt jim andacht op Jezus, de apostel en hogepriester van et geleuf dat wi'j belieden,

02 die trouw is an wie him ansteld het, zoas Mozes in hiel God zien huus zien opdracht trouw vervulde.

03 Mar Jezus wodde groter roem weerdig acht as Mozes, zoas de bouwer van een huus meer ere krigt as et huus zels.

04 Ieder huus het zien bouwer, mar God is de bouwer van alles.

05 Mozes vervulde trouw zien opdracht in hiel God zien huus, as knecht die getuugde van de kommende eupenbaorings,

06 mar Christus is trouw as Zeune die over dat huus ansteld is. Wi'j vormen dat huus, mits we groots en zonder schroom vaasteholen an datgene waorop wi'j hopen.

07 De heilige Geest zegt ommes:

"Heuren jim vandaege zien stemme,

08 wees dan niet stiems, krek as tiedens de opstaand,

doe jim mi'j uutperbeerden in de woestijn,

09 waor jim veuroolden mi'j op de proef stelden en tartten

hoewel zi'j mien daoden zien hadden,

10 veertig jaor lange.

Daorom wodde die generaosie deur mien lelkens troffen, ik zee:

"altied weer dwaelt heur hatte,

mien wegen kennen ze niet."

11 En in mien argernis he'k zweerd:

"in giendertied zullen ze binnengaon in mien rust.""

12 Zie d'r dus op toe, breurs en zusters, dat gieniene van jim deur een kwaodwillig, ongeleuvig hatte ofvallig wodt van de levendige God,

13 mar wies mekeer terechte, iedere dag dat dit "vandaege" nog gelt, zodat gieniene van jim stiems wodt omreden hi'j deur zunde verleided wodde.

14 Want allienig awwe tot et aende toe risseluut vaasteholen an oons eerste vertrouwen, blieven we deelgenoten van Christus.

15 As d'r zegd wodt "Heuren jim vandaege zien stemme, wees dan niet stiems, krek as tiedens de opstaand" –

16 wie weren et dan die zien stemme heurden en toch opsternaot wodden? Weren dat niet degenen die onder Mozes zien leiding uut Iegypte wegtrokken weren?

17 Wie wodden veertig jaor lange deur zien lelkens troffen? Weren dat niet degenen die zundigd hadden en van wie de lieken daele vullen in de woestijn?

18 En an wie zweerde hi'j dat zi'j niet binnengaon zollen in zien rust – toch grif an heur die ongeheurzem weren?

19 Zo zie'we dat zi'j d'r niet binnengaon konnen vanwegens heur ongeleuf.

Hebreeën 4.

01 Omdat de belofte om binnen te gaon in God zien rust nog de hieltied van kracht is, moe'we d'r veur waeken dat iene van jim ok mar de schien wekt om disse gelegenhied an him veurbi'j gaon te laoten.

02 Want an oons is et goeie ni'js verkondigd, krek as indertied an heur; mar aanders as veur wie et in geleuf annemen, was et uutdreugen woord veur heur niet heilzem.

03 Mar omreden wi'j geleuven, gao'we binnen in de rust waorvan eerder spraoke was: "In mien argernis he'k zweerd: "in giendertied zullen zi'j binnengaon in mien rust,"" – en dat wiels zien wark toch al mit de grondvesting van de wereld klaor wodde!

04 Over de zeuvende dag wodt ommes argens zegd: "En op de zeuvende dag rustte God uut van al zien wark,"

05 wiels hier zegd wodt: "In gienertied zullen zi'j binnengaon in mien rust."

06 Et stiet dus vaaste dat d'r wel meensken in binnengaon kúnnen. En omreden zi'j an wie vroeger et goeie ni'js verkondigd is, d'r vanwegens heur ongeheurzemhied niet ingaon binnen,

07 legt God now opni'j een dag vaaste, een "vandaege", waorover hi'j, zoas eerder opmurken is, lange tied laeter David zeggen laoten het: "Heuren jim vandaege zien stemme, wees dan niet stiems."

08 Was de rust heur al deur Jozua geven, dan zol God daornao niet meer over een aandere dag praot hebben.

09 D'r waacht et volk van God dus nog de hieltied een sabbatsrust.

10 En wie ingaon is in zien rust, vint rust nao zien wark krek zoas God nao zientes.

11 Lao'we dan ok alles op alles zetten om binnengaon te kunnen in die rust, en zo veurkommen dat ok mar iene dit veurbeeld van ongeheurzemhied volgt en verdistreweert.

12 Want levend en krachtig is et woord van God, en scharper as een twiesniedend zweerd: et dringt diepe deur tot waor ziel en geest, bien en murg mekeer raeken, en et is in staot om de opvattings en gedaachten van et hatte te ontleden.

13 Niks van wat maekt is blift veur him verburgen, alles is onverhuld en hielemaole zichtber veur de ogen van him an wie wi'j rekenschop ofleggen moeten.

Trouw blieven an de beliedenis.

14 Now wi'j een hooggeplaetste hogepriester hebben die de hemel deurgaon is, Jezus, de Zeune van God, moe'we vaasteholen an et geleuf dawwe belieden.

15 Want de hogepriester die wi'j hebben is d'r iene die mit oonze zwakheden mitvulen kan, krekt omreden hi'j, krek as wi'j, in ieder opzicht op de proef steld is, mit dit verschil dat hi'j niet vervalen is tot zunde.

16 Lao'we dan ok zonder schroom naoderen tot de troon van de Genaodige, waor we iederkeer awwe hulpe neudig hebben baarmhattighied en genaode vienen.

Hebreeën 5.

01 Wie uut et volk tot hogepriester keuzen wodt, wodt ansteld om tussen God en de meensken te bemiddelen, om giften en offers te brengen veur de zunden.

02 Deurdat hi'jzels an zwakheden te prooi valen kan, is hi'j bi'j machte om begrip op te brengen veur heur die uut onwetendhied dwaelen,

03 en daorom moet hi'j niet allienig offers opdregen veur de zunden van et volk mar ok veur zien eigen zunden.

04 Gieniene kan him die weerdighied toe-eigenen, de meensken wodden daortoe deur God reupen, zoas ok mit Aäron gebeurde.

05 Christus het him de ere hogepriester te wodden liekemin zels verliend, dat dee degene die tegen him zee: "Ie bin mien zeune, ik hebbe je vandaege verwekt."

06 Argens aanders zegt hi'j wat vergeliekbers: "Ie zullen veur iewig priester wezen, zoas ok Melchisedek dat was."

07 Christus het tiedens zien leven op eerde onder traonen en mit lude stemme smeekt en bidden tot him die him redden van de dood kon, en wodde verheurd vanwegens zien diepe ontzag veur God.

08 Hoewel hi'j zien Zeune was, het hi'j lieden moeten, en zo het hi'j geheurzemhied leerd.

09 En doe hi'j naor de uutaendelike volmaekthied voerd was, wodde hi'j veur iederiene die him geheurzemen een bron van iewige redding,

10 omreden God him uutroepen het tot hogepriester zoas Melchisedek dat was.

11 Hierover vaalt nog een protte te zeggen, mar et is muuilik om dat an jim uut te stokken, omreden jim traoge van begrip wodden binnen.

12 Warkelik, jim hadden toch ondertussen allemaole lerer wezen moeten! In plak daorvan hebben jim d'r zels iene neudig om jim opni'j de grondslaegen van et woord van God bi'j te brengen; et is mit jim zo veer kommen dat jim weer anwezen binnen op melk in plak van op vaast eten.

13 Wie melk drinkt is nog een klein kiend en het gien weet van de dreegwiedte van de uutdreugen gerechtighied.

14 Vaast eten is veur volwassenen; heur zintugen bin deur onderviening oefend en ze bin in staot om onderscheid te maeken tussen goed en kwaod.

Hebreeën 6.

01 We moe'n de eerste beginselen van de leer over Christus hier toch mar rusten laoten en oons richten op wat veur volwassenen bedoeld is. We willen niet nog es et follement leggen en praoten over et je ofkeren van daoden die tot de dood leiden, over et geleuf in God,

02 de leer over et deupen en de haandoplegging, en over de opstaanding van de dooien en et laeste oordiel.

03 We maeken disse keuze in et vertrouwen dat God et oons toestaot.

04 Want wie ooit deur et locht beschenen is, pruufd het van de hemelse gaove en pat kregen het an de heilige Geest,

05 wie et weldaodig woord van God en de kracht van de kommende wereld ondervunnen het

06 en doe ofvallig wodden is, kan onmeugelik een twiede keer bekeerd wodden, omreden zoe'n iene veur himzels de Zeune van God opni'j kruisigt en an bespotting blootstelt.

07 Laand dat de overvloedige regen opnemt, en nuttige gewassen oplevert an wie et bewarken, kriegt God zien zegen,

08 mar laand dat stiekels en distels geft, is weerdeloos en riep veur vervluking; et zal uutaendelik in vlammen opgaon.

09 We zeggen dit now wel, geliefde breurs en zusters, mar we bin d'r wisse van dat jim op de goeie weg binnen en dat jim redded wodden zullen.

10 Want God is niet zo onrechtveerdig dat hi'j verget wat jim daon hebben, hoevule liefde jim an zien naeme betoond hebben deur sund jaor en dag steun te geven an de geleuvigen.

11 Et is oonze vurige weens dat ieder van jim tot an et aende toe dezelde iever an de dag leggen blieven, tot alles waorop wi'j hopen verwezelikt wezen zal,

12 en dat jim niet aachterblieven, mar in et spoor treden van heur die deur toedoen van heur staandvaastig geleuf kregen hebben wat heur beloofd was.

13 Doe God an Abraham zien belofte dee, kon hi'j bi'j gieniene zweren die hoger was as hi'jzels, en dus zweerde hi'j bi'j himzels:

14 "Ik zal je riekelik zegenen en je een protte naokommelingen geven."

15 En zo het Abraham, deur toedoen van zien staandvaastig vertrouwen, kregen wat him beloofd was.

16 Meensken zweren altied bi'j iene die hoger is as zi'jzels, en mit heur eed bekrachtigen zi'j de waorhied en maeken zo een aende an iedere twist.

17 Doe God de arfgenaemen van de belofte d'r van deurdringen wol hoe vaaste zien veurnemen was, gaf hi'j him op dezelde meniere zien geraansie deur een eed.

18 Mit disse twie onomkeerbare daoden – die uutsluten dat God liegt – het hi'j oons krachtig moed in praoten willen. Oonze toevlocht is et om vaaste te holen an de hope op wat veur oons in et verschöt ligt.

19 Die hope is as een betrouwber en wis anker veur oonze ziel, en giet oons veur tot veurbi'j et veurhangsel,

20 waor Jezus as veurloper al ingaon is, omwille van oons: hi'j is hogepriester veur iewig, zoas ok Melchisedek dat was.

Hebreeën 7.

Priester veur altied.

01 Want disse Melchisedek, keuning van Salem en priester van de allerhoogste God, gong Abraham integen doe disse teroggekeerde van zien overwinning op de keunings, en zegende him,

02 waornao Abraham him een tiende van alle buit gaf. Zien naeme betekent "keuning van de gerechtighied", en veerder is hi'j ok keuning van Salem, dat is "keuning van de vrede".

03 Hi'j het gien heit of moeke, gien stamboom, gien oorsprong of levensaende en liekt op de Zeune van God – hi'j is priester veur altied.

04 Geve jim rekenschop van zien groothied: Abraham, de aartsvader, gaf him een tiende van wat hi'j ofpakt had.

05 De ofstammelingen van Levi die et priesterambt kregen, moe'n neffens de wet tienden heffen van et volk, dat wil zeggen van heur breurs en zusters, die toch ok naokommelingen van Abraham binnen.

06 Mar hoewel hi'j gien femilie van heur was, het Melchisedek tienden ind van Abraham en him zegend an wie de beloften daon binnen.

07 Et stiet buten kief dat de mindere altied zegend wodt deur de meerdere.

08 Butendat wodden in et iene geval tienden ontvongen deur starfelike meensken, in et aandere deur iene van wie getuugd wodt dat hi'j leeft.

09 Zo zollen we dan zeggen kunnen dat ok Levi, de ontvanger van tienden, tienden ofdreugen het, en wel via Abraham,

10 omdat Levi nog in de schoot van zien heit was doe Melchisedek Abraham integen kwam.

11 Had et Levitische priesterschop – dat de grond vormde veur de wet die et volk kreeg – de volmaekthied brocht, dan zol et niet neudig west wezen dat d'r een aandere priester ansteld wodde, die was zoas Melchisedek, en niet zoas Aäron.

12 Mar as de aord van et priesterschop veraandert, veraandert onherroepelik ok de wet.

13 Now dan, degene over wie dit alles zegd wodt, heurt tot een aandere stamme, waorvan gieniene him in dienst van et alter steld het.

14 Et is ommes bi'j iederiene bekend dat oonze Heer votkommen is uut Juda, en disse stamme is deur Mozes in gienertied mit priesters in verbaand brocht.

15 Nog dudeliker wodt et awwe oons bedaenken dat disse ni'je priester, de weerscheide van Melchisedek,

16 gien priester wodden is op grond van de in de wet vereiste meenselike ofstamming, mar deur de kracht van zien onvergaankelik leven.

17 Over him wodt ommes verklaord: "Ie zullen veur iewig priester wezen, zoas Melchisedek dat ok was."

18 Et eerder geven gebod wodt ongeldig verklaord omreden et te beparkt is en niet voldot

19 – de wet het trouwens in gien inkeld opzicht de volmaekthied brocht –, mar de hope op wat beters komt d'r veur in 't plak, waordeur wi'j weer dichter tot God kommen kunnen.

20 Butendat is d'r spraoke van een bekrachtiging onder ede. De Levitische priesters kregen et priesterschop zonder dat et deur een eed bekrachtigd wodde,

21 Jezus daorintegen kreeg et mit een zoksoorte bekrachtiging, doe tegen him zegd wodde: "De Heer het zweerd, en komt op zien eed niet weeromme: "ie bin priester veur iewig.""

22 Daordeur stiet Jezus garant veur een vule beter verbond.

23 Zi'j volgden mekeer generaosies lange op, omreden de dood heur verhinderde om priester te blieven,

24 wiels hi'j priester zonder opvolger is, omreden hi'j tot in iewighied blift.

25 Zo kan hi'j iederiene die deur him tot God komt hielendal redden, omreden hi'j veur altied leeft en zo veur heur pleiten kan.

26 Een hogepriester as hi'j hadden we dan ok neudig, iene die heilig, schuldeloos en zuver is, van de zundige meensken ofscheiden en veer boven de hemel verheven.

27 Hi'j hoeft niet, zoas de aandere hogepriesters, iedere dag eerst offers op te dregen veur zien eigen zunden en dan veur die van et volk; dat het hi'j ommes veur iens en altied daon doe hi'j et offer van zien leven brocht.

28 De wet stelt meensken an as hogepriester, en meensken bin behept mit zwakhied, mar mit de bekrachtiging onder ede die naotied uutspreuken wodde as de wet, is de Zeune ansteld, die veur altied de volmaekthied beriekt het.

Hebreeën 8.

Et eerste verbond en et ni'je verbond.

01 De keern van mien betoog is dawwe een hogepriester hebben die in de hemel zittengaon is an de rechterhaand van de troon van God zien majesteit

02 en die de dienst vervult in et waore heiligdom, de tente die deur de Heer en niet deur meenskehanen opricht is.

03 Iedere hogepriester wodt ansteld om giften en offers op te dregen, en dus het hi'j ok wat neudig dat hi'j opdregen kan.

04 Op eerde zol Jezus gien priester wezen, want daor bin al priesters die offergaoven opdregen zoas de wet dat veurschrift.

05 Zi'j doen heur dienst in wat de ofspiegeling en de voorafschaduwing is van et hemelse heiligdom, zoas dat an Mozes eupenbaord wodde doe hi'j begon mit et oprichten van de tabernakel: "Lette d'r op," stiet d'r ommes, "daj' alles maeken neffens et ontwarp dat je op de barg toond is."

06 Mar Jezus is dus ansteld veur een eerbiedensweerdiger dienst, in die zin dat hi'j bemiddeler is van een beter verbond, dat zien wettelijke grondslag kregen het in betere beloften.

07 Zol et eerste verbond zonder gebreken west wezen, dan zol d'r gien twiede veur in et plak kommen hoefd hebben.

08 Mar God berispt zien volk mit de woorden: "De dag zal kommen - zegt de Heer - dat ik een ni'j verbond mit et volk van Israël en mit et volk van Juda sluten zal.

09 Niet een verbond zoas ik dat sleut mit heur veuroolden doe ik heur bi'j de haand nam om heur vot te leiden uut Iegypte, want an dat verbond bin ze niet trouw bleven. Daorom he'k mien hanen van heur oftrokken - zegt de Heer.

10 Mar dit is et verbond dat ik in de toekomst mit et volk van Israël sluten zal - zegt de Heer: In heur verstaand zal ik mien wetten leggen en in heur hatte zal ik ze daeleschrieven. Dan zal ik heur God wezen en zi'j zullen mien volk wezen.

11 Volksgenoten zullen mekeer niet meer hoeven te onderwiezen, et volk zal mekeer niet meer hoeven te zeggen: "Kenne de Heer!", want alleman zal mi'j kennen, van klein tot groot.

12 Ik zal heur wandaoden vergeven en an heur zunden zal ik niet meer daenken."

13 Op et mement dat hi'j praot over een ni'j verbond het hi'j et eerste al as veroolderd bestempeld. Now dan, wat veroolderd is en versleten, is de teloorgang omdebi'j.

Hebreeën 9.

01 Et eerste verbond kende bepaolings veur de rituelen van de dienst en et eerdse heiligdom.

02 De veurste tente, die inricht is mit de laampestander en de taofel veur de toonbroden, wodt et heilige nuumd.

03 Aachter et twiede veurhangsel is de tente die et allerheiligste nuumd wodt.

04 Daor staon et vergulde roekofferalter en de ark van et verbond, die langs alle kaanten mit goold overtrokken is en waorin de vergulde kruke mit et manna stiet, Aäron zien staf die bluuid het en de plaeten mit de verbondstekst bin;

05 daornao staon de cherubs as teken van God zien majesteit, zi'j bedekken de verzoeningsplaete mit heur schaad. Op dit alles kuwwe now niet tot in detail ingaon.

06 In et zo ingerichte heiligdom gaon de priesters alsmar de veurste tente binnen om heur dienst te doen,

07 mar in de twiede tente giet allienig de hogepriester binnen, mar ienkeer per jaor en nooit zonder et bloed dat hi'j offert veur himzels en veur de zunden die et volk uut onwetendhied begaon het.

08 Hiermit maekt de heilige Geest dudelik dat de weg naor et hemelse heiligdom niet zichtber is zolange de eerste tente nog dienst dot.

09 Dit alles is een zinnebeeld veur de tied van vandaege-de-dag: d'r wodden daor giften en offers brocht die et geweten van degenen die ze opdregen niet tot volmaekte zuverhied brengen kunnen;

10 et giet allienig om eten, draank en rituele wassingen, om bepaolings over uuterlikheden die allienig mar gellen tot an de ni'je odder.

11 Christus daorintegen is antreden as hogepriester van al et goeie dat oons toedocht is: hi'j is deur een indrokwekkender en volmaektere tente – die niet deur meenskehanen maekt is en niet beheurt tot oonze schepping –

12 veur iens en veur altied et hemelse heiligdom ingaon, en dan niet mit bloed van bokken en jonge bollen mar mit zien eigen bloed. Zo het hi'j een iewige verlossing verwurven.

13 Want as et lichem van wie onrein is al schonemaekt en heiligd wodt as et besprenkeld wodt mit et bloed van bokken en bollen of bestri'jd mit de aske van een jonge koe,

14 hoevule te meer zal dan niet et bloed van Christus, die deur toedoen van de iewige Geest himzels opdregen kund het as offer zonder smet, oons geweten wasken van daoden die tot de dood leiden, en et heiligen veur de dienst an de levendige God?

15 Zo is hi'j dan bemiddeler van een ni'j verbond; hi'j is ommes wegraekt om oons te verlossen van de overtredings tegen et eerste verbond. Now kan iederiene die reupen binnen et beloofde iewige arfdiel ontvangen.

16 Bi'j een testement is et neudig dat de dood van de erflater vaastesteld wodt.

17 Een testement is ommes eerst geldig nao et wegraeken, et het gien rechtskracht as de erflater nog leeft.

18 Daorom is ok et eerste verbond niet zonder bloed inwijded.

19 Want naodat Mozes alle veurschriften van de wet an hiel et volk veurlezen hadde, nam hi'j et bloed van jonge bollen en bokken, waeter, karmozienrooie wolle en majoraan, en besprenkelde liekegoed et boek zels as et hiele volk,

20 en verklaorde: "Dit is et bloed van et verbond dat God an jim oplegd het."

21 Daornao besprenkelde hi'j op dezelde meniere de tabernakel en alle veur de eredienst beneudigde veurwarpen mit et bloed.

22 Neffens de wet wodt inderdaod vri'jwel alles mit bloed schonemaekt, want as d'r gien bloed uutgeuten wodt, is d'r gien vergeving.

23 As et dus neudig is dat de ofbelings van wat in de hemel is op die meniere schonemaekt wodden, dan moet wat in de hemel zels is mit vule betere offergaoven schonemaekt wodden.

24 Christus is ommes niet ingaon in een heiligdom dat deur meenskehanen maekt is, in de veurofbeelding van et hemelse heiligdom, mar in de hemel zels, waor hi'j now bi'j God veur oons pleit.

25 Hi'j brengt daor niet iederkeer opni'j et offer van zien leven; hi'j is dus niet te vergelieken mit de hogepriester die ieder jaor et heiligdom binnengaot, en dat mit bloed dat niet et zienes is,

26 want dan zol hi'j sund de grondvesting van de wereld iederkeer opni'j lieden moeten hebben. Nee, hi'j het him bi'j de voltooiing van de tieden ienkeer eupenbaord, om mit zien offer de zunde teniet te doen.

27 Iens moe'n meensken starven en daornao volgt et oordiel.

28 Krek zo wis is et dat Christus, die ienkeer offerd is om de zunden van pattie te dregen, veur een twiede maol verschienen zal om te redden wie him verwaachten, mar dan giet et niet meer om de zunde.

Hebreeën 10.

01 Omreden de wet allienig mar een voorafschaduwing toont van al et goeie dat nog kommen moet en daorvan niet de gestalte zels zien lat, het hi'j ok niet de kracht om degenen die jaor in jaor uut mit de hieltied dezelde offers an de dienst dielnemen ooit tot volmaekthied te brengen.

02 Aanders zollen die offers allange niet meer brocht wodden; degenen die an de dienst dielnemen, zollen ommes as ze ienkeer schonemaekt binnen gien inkeld zondebesef meer hebben.

03 Mar et tegendeel is waor: ieder jaor wodden mit dezelde offers de zunden weer in heugenschop reupen –

04 bloed van bollen en bokken kan meensken onmeugelik van heur zunden vri'jmaeken.

05 Daorom zegt Christus bi'j zien komst in de wereld:

"Offers en giften hebben jim niet verlangd,

mar jim hebben mi'j een lichem geven;

06 braand- en reinigingsoffers behaagden jim niet.

07 Doe he'k zegd: "hier bin ik,"

want dit stiet in de boekerolle over mi'j schreven:

"ik bin kommen, God, om jow wil te doen.""

08 Eerst zegt hi'j: "Offers en giften hebben jim niet verlangd, braand- en reinigingsoffers behaagden jim niet" – daormit bedoelt hi'j de offers die neffens de wet brocht wodden.

09 Dan zegt hi'j: "Hier bin ik, ik bin kommen om jow wil te doen," waormit hi'j et eerste opheft om et twiede van kracht laoten te wezen.

10 Op grond van die wil bin wi'j veur iens en altied heiligd, deur et offer van et lichem van Jezus Christus.

11 De priesters blieven daegeliks heur dienst doen en de hieltied opni'j dezelde offers opdregen die de zunden in gienertied teniet doen kunnen zullen,

12 wiels hi'j, nao zien ienmaolig offer veur de zunden, veurgoed zien plak an God zien rechterhaand inneumen het,

13 waor hi'j waacht op et mement dat zien vi'janen veur him tot een baank veur zien voeten maekt binnen.

14 Deur disse iene offergaove het hi'j heur die heur deur him heiligen laoten veurgoed tot volmaekthied brocht.

15 Hiervan legt ok de heilige Geest veur oons getugenis of, want eerst stiet d'r:

16 "Dit is et verbond dat ik nao die tied mit et volk van Israël sluten zal – zegt de Heer: In heur hatte zal ik mien wetten leggen, in heur verstaand zal ik ze daeleschrieven,"

17 en even veerder stiet d'r: "An heur zunden en heur wettelooshied za'k niet meer daenken."

18 Waor dat alles vergeven is, daor is gien offer veur de zunde meer neudig.

Geleuf en volhadding.

19 Breurs en zusters, deur toedoen van et bloed van Jezus kuwwe zonder schroom binnengaon in et heiligdom,

20 omreden hi'j veur oons mit zien lichem een weg naor een ni'j leven baend het, deur et veurhangsel henne.

21 We hebben now een hogepriester die dienst dot in et huus van God;

22 lao'we God dan integenkommen mit een oprecht hatte en een vaast geleuf, now oons hatte schonemaekt is, wi'j van een slecht geweten vri'jmaekt binnen en oons lichem mit zuver waeter wusken is.

23 Lao'we zonder te waankelen datgene belieden blieven waorop we hopen, want hi'j die de belofte daon het is trouw.

24 Lao'we allat blieven en mekeer d'r toe anvieteren om lief te hebben en goed te doen,

25 en in plak van vot te blieven van oonze saemenkomsten, zoas goenend doen, mekeer juust bemoedigen, en dat des te meer naor maote jim de dag van zien komst naoderen zien.

26 Awwe willens en wetens zundigen blieven naodawwe de waorhied kennen leerd hebben, is d'r gien inkeld offer veur de zunden meer meugelik,

27 en kuwwe niet aanders as huverend waachten op et oordiel en op et vuur dat de tegenstaanders gruusaordig verslinden zal.

28 Veur wie de wet van Mozes naost him daelelegt is d'r gien pardon; as d'r temeenste twie getugen een verklaoring tegen him ofleggen, moet hi'j starven.

29 Hoevule zwaorder zal dan de straf niet wezen, daenken jim, veur wie de Zeune van God vertrapt, et bloed van et verbond ontheiligt – wiels hi'j d'r deur heiligd is – en de Geest van de genaode veracht?

30 We kennen ommes degene die zegd het: "Et is an mi'j om te wreken, ik zal vergellen," en ok: "De Heer zal oordielen over zien volk."

31 Huveringwekkend is et om in de hanen van de levendige God te valen!

32 Herinner jim de daegen van vroeger, doe jim, deur et locht beschenen, in een muuizeme vechtperti'j mit et lieden staandholen hebben:

33 an de iene kaante kregen jim pebliekelik belediging en beproevings te verneren, an de aandere kaante weren jim solidair mit heur die etzelde deurmaeken mossen.

34 Jim hebben mitleefd mit de gevangenen onder jim, en doe jim van jim bezittings beroofd wodden, hebben jim dat in bliedschop anveerd, in de wetenschop daj'm wat beters hebben, een blievend bezit veur jimzels.

35 Legge die verlegenhied dus of, jim zullen d'r roem veur beloond wodden.

36 Blieve juust volhadden, want as jim de wil van God doen, zullen jim kriegen wat jim beloofd is.

37 Ommes: "Nog een hiel kotte tied, dan komt hi'j die kommen zal, hi'j blift niet lange meer vot,

38 en dan zullen mien rechtveerdigen leven deur heur geleuf," mar ok: "Wie teroggedeinst bin ik niet langer welgezind."

39 Mar wi'j heuren niet tot degenen die teroggedeinzen en verdistreweren, mar tot heur die deur heur geleuf beholen blieven.

Hebreeën 11.

Veurbeeldig geleuf.

01 Et geleuf legt de grondslag veur alles waorop we hopen, et overtuugt oons van de waorhied van wawwe niet zien.

02 Om heur geleuf wodden de meensken uut vroeger tieden prezen.

03 Deur geleuf kommen we tot et inzicht dat de wereld deur et woord van God op regel is, dat dus et zichtbere ontstaon is uut et niet-zichtbere.

04 Deur zien geleuf had et offer dat Abel an God brocht meer weerde as dat van Kaïn. Over Abel wodt dan ok lovend praot as over een rechtveerdige – God zels leut him priezende uut over zien giften –, en deur zien geleuf klinkt zien stemme nog de hieltied, ok al is hi'j wegraekt.

05 Deur zien geleuf wodde Henoch naor argens aanders overbrocht, om niet wegraeken te hoeven; hi'j wodde niet meer vunnen, omreden God him votneumen hadde. Hi'j ston ommes al veur zien opneming bekend as iene in wie God bliedschop vun.

06 Zonder geleuf is et onmeugelik om God bliedschop te geven; wie him naoderen wil moet ommes geleuven dat hi'j bestiet, en wie him zuukt zal deur him beloond wodden.

07 Deur zien geleuf bouwde Noach, doe him te kennen geven was wat d'r gebeuren zol, nog veurdat dit veur iene zichtber was, geheurzem een ark om daormit zien huusgenoten te redden. Zo veroordielde hi'j de wereld en kreeg hi'j de gerechtighied die votkomt uut et geleuf.

08 Deur zien geleuf gong Abraham, doe hi'j reupen wodde, geheurzem op weg naor een plak dat hi'j in bezit kriegen zol, en hi'j gong op weg zonder te weten waorhenne.

09 Deur zien geleuf trok hi'j naor et laand dat him beloofd was mar him nog niet toebeheurde. Tegere mit Isaak en Jakob, mede-erfgenamen van de belofte, woonde hi'j daor in tenten

10 omreden hi'j uutzag naor een stad mit follementen, deur God zels ontwurpen en bouwd.

11 Deur heur geleuf kreeg ok Sara, hoewel zi'j onvruchtber bleven was en niet meer in de bluui van heur leven was, de kracht om een kiend te kriegen, en wel omreden zi'j vertrouwde op degene die de belofte daon hadde.

12 Zo brocht iene man, wie zien kracht al wegraekt was, zovule naokommelingen vot as dat d'r steerns an de hemel staon, ontelber as zaandkorrels op et straand langs de zee.

13 Zi'j allemaole bin in geleuf wegraekt; wat heur beloofd was zaggen ze gien warkelikhied wodden, ze hebben d'r allienig mar een glimp van zien, en ze zeden van heurzels dat zi'j op eerde leefden as vremden en gaasten.

14 Deur zo te praoten leuten ze blieken op deurreize te wezen naor een vaderlaand.

15 En daormit bedoelden zi'j niet et vaderlaand waoruut ze wegtrokken weren, aanders weren ze daor wel weerommegaon.

16 Nee, zi'j keken reikhalzend uut naor een beter vaderlaand: et hemelse. Daorom schaemt God him d'r niet veur heur God nuumd te wodden en het hi'j veur heur een stad klaormaekt.

17 Deur zien geleuf kon Abraham, doe hi'j op de proef steld wodde, Isaak as offer opdregen. Hi'j die de beloften ontvongen hadde, was d'r klaor veur om zien ienige zeune te offeren.

18 Wiels d'r tegen him zegd was: "Allienig deur Isaak zul ie naogeslaacht kriegen,"

19 zee hi'j bi'j himzels dat et veur God meugelik wezen mos om iene uut de dood op te wekken, en daorom kreeg hi'j him ok weeromme, bi'j wieze van veurofbeelding.

20 Deur zien geleuf zegende Isaak Jakob en Esau, en hi'j docht daorbi'j an wat d'r in de toekomst gebeuren zol.

21 Deur zien geleuf kon Jakob op zien starfbedde de beide zeunen van Jozef zegenen; daornao knielde hi'j daele, steunend op de greep van zien stok.

22 Deur zien geleuf praotte Jozef an et aende van zien leven al over de uuttocht van et volk van Israël en gaf hi'j opdracht om zien bonkerak dan mit te nemen.

23 Deur heur geleuf konnen Mozes zien oolden him nao zien geboorte drie maonden verburgen holen. Zi'j vunnen heur kiend gloepend mooi en weren niet bange veur et bevel van de keuning.

24 Deur zien geleuf weigerde Mozes, doe hi'j volwassen wodde, anspreuken te wodden as zeune van een dochter van de farao.

25 Liever wodde hi'j lieke min behaandeld as et volk van God as dat hi'j vlochtig veurdiel hadde bi'j de zunde;

26 omreden hi'j uutzag naor de beloning wardeerde hi'j de belediging van Christus hoger as de schatten van Iegypte.

27 Deur zien geleuf verleut hi'j Iegypte zonder aangst veur de lelkens van de keuning; hi'j volhadde, as zag hi'j de Onzienlijke.

28 Deur zien geleuf leut hi'j et pesachfeest vieren, en de deurposten mit bloed besprenkelen zodat de doodsengel heur eerstgeborenen gien haor krenken zol.

29 Deur et geleuf kon et volk deur de Rooie Zee trekken krek as over dreug laand; doe de Iegypteners dat ok perbeerden wodden zi'j verzwolgen.

30 Deur dat geleuf vullen de muren van Jericho doe et volk d'r zeuven daegen lange omhenne trokken was.

31 Deur heur geleuf kreeg de hoer Rachab de verkenners gaastvri'j in heur huus en is ze niet mit de ongeheurzeme bewoners van heur stad ommekommen.

32 Wat vaalt hier nog an toe te voegen? De tied ontbrekt mi'j om te vertellen over Gideon en Barak, Simson en Jefta, David en Samuël, en over de profeten,

33 die deur heur geleuf keuninkrieken overwunnen, gerechtighied gellen leuten, en kregen wat heur beloofd was; die leeuwen de bek toeklemden,

34 an vuur de laaiende kracht ontnammen en ontkwammen an de slag van et zweerd; die heur zwakhied krachtig overwunnen, in de oorlog machtige helden wodden en vi'jaandelike legers op de vlocht jaegden.

35 Vrouwluden kregen heur dooien weeromme deurdat die uut de dood opstonden. Aanderen wodden matteld tot de dood d'r op volgde en wollen van gien vri'jlaoting weten, omreden zi'j uutzaggen naor een betere opstaanding.

36 Weer aanderen kregen te maeken mit bespotting en gieseling, alderdeegst mit arrestaosie en gevangenschop.

37 Zi'j wodden stienigd of deurdemidden zaegd, of raekten weg deur een moordend zweerd. Zi'j zwurven rond in schaopevluzen of geitenvellen, berooid, vernederd en mishaandeld.

38 Zi'j doolden deur verlaoten oorden en barggebieden en verschoelden heur in grotten en hollen onder de grond. Zi'j weren veur de wereld te goed.

39 Al disse meensken, die van ooldsher om heur geleuf prezen wodden, hebben de belofte niet in vervulling gaon zien

40 omreden God veur oons wat beters veurzien hadde, en hi'j heur niet zonder oons de volmaekthied berieken laoten wol.

Hebreeën 12.

01 Now wi'j deur zoe'n mennigte geloofsgetugen omringd binnen, moe'n wi'j ok de last van de zunde, waorin we de hieltied weer vertiest raeken, van oons ofwarpen en vastberaoden de wedstried lopen die veur oons ligt.

02 Lao'we daorbi'j de blik richt holen op Jezus, de grondlegger en voltooier van oons geleuf: daenkend an de bliedschop die veur him in et verschöt lag, leut hi'j him niet ofschrikken deur de schaande van et kruus. Hi'j hul staand en nam plak an de rechterhaand van de troon van God.

03 Laot tot jim deurdringen hoe hi'j staandhul doe de zundige meensken heur zo tegen him verzetten, zodat jim niet de moed verliezen en et opgeven.

04 Jim hebben in jim stried tegen de zunde jim leven nog niet op et spul zet.

05 Kennelik bin jim de bemoediging vergeten die tot jim as tot kiender richt wodt: "Mien zeune, ie meugen een vermaening van de Heer nooit appat schoeven en in gienertied opgeven aj' deur him terechtewezen wodden,

06 want de Heer berispt wie hi'j liefhet, straft iedere zeune van wie hi'j hoolt."

07 Hool vol, et giet hier ommes om een leerschoele, God behaandelt jim as zien kiender. Wat kiend wodt niet deur zien heit berispt?

08 Mar as jim die leerschoele niet deurlopen zoas alle aanderen veur jim, dan bin jim gien kiender, mar bastaards.

09 Daor komt nog bi'j dawwe veur oonze eerdse heiten, deur wie we grootbrocht wodden, respekt hadden; hoevule te meer zuwwe oons dan niet onderwarpen an et gezag van de Heit van alle geesten, en dan leven?

10 Oonze eerdse heiten berispten oons mar veur kotte tied en naor eigen goeddonken, mar hi'j berispt oons veur oonze eigen bestwil, om oons patten te laoten in zien heilighied.

11 Een vermaening liekt op et stuit zels gien bliedschop te brengen, allienig mar verdriet, mar op den duur plokt wie d'r deur vormd is daor de vruchten van: een leven in vrede en gerechtighied.

12 Stik daorom jim sloppe hanen op, strek jim knikkende kni'jen,

13 en kies rechte paeden, zodat een voete die kneusd is niet veerder ontwricht raekt, mar juust geneest.

Anvieterings en groetnis.

14 Streef d'r naor om in vrede te leven mit iederiene en leid een heilig leven; wie dat niet dot zal de Heer niet zien.

15 Zorge d'r veur dat gieniene him de genaode van God ontgaon lat, dat d'r gien giftige kiem opschöt die onrust veroorzaekt en mit zien bitterhied pattie besmet,

16 en dat gieniene overspel begiet of et heilige zo slim minacht as Esau, die veur ien inkeld bod eten zien eerstgeboorterecht verkocht.

17 Jim weten ommes dat hi'j daornao, doe hi'j asnog de zegen kriegen wol, ofwezen wodde; hi'j kreeg gien kaans meer om et goed te maeken, ok al smeekte hi'j d'r in traonen om.

18 Jim hebben niet, zoas et volk destieds, veur een laaiend en alles verzengend vuur staon, of in driegende duusternis en woeste wiend,

19 ok niet middenin et bazuingeschal en stemgedonder. Et volk dat dit alles ondergong smeekte dan ok dat d'r gien woord meer tot heur zegd wodden zol,

20 omreden wat heur opdreugen wodde ondreeglik was: "Alderdeegst een dier dat de barg anraekt, moet stienigd wodden!"

21 Zo schrikbaorend was de verschiening dat Mozes uutreup: "Ik trille van aangst!"

22 Nee, jim staon veur de Sionsberg, veur de stad van de levendige God, et hemelse Jeruzalem, en veur duzenden engels die in bliedschop bi'jmekeer binnen,

23 veur de gemienschop van eerstgeborenen, die in de hemel inschreven binnen, veur God, de rechter van iederiene, en veur de geesten van de rechtveerdigen, die tot volmaekthied kommen binnen,

24 veur de bemiddeler van een ni'j verbond, Jezus, en veur et gesprenkelde bloed dat meer zegt as dat van Abel.

25 Let op daj'm him die praot niet ofwiezen. Want as zi'j al niet ontkommen binnen doe ze degene ofwezen die heur op eerde les gaf, dan kun wi'j, awwe oons ofkeren van degene die dat vanuut de hemel dot, hielendal niet ontkommen.

26 Destieds dee zien stemme de eerde beven, now het hi'j disse belofte daon: "Nog ienkeer zal ik de eerde beven laoten, en mit de eerde ok de hemel."

27 Mit dat "nog ienkeer" wodt bedoeld dat wat maekt is, waankelt en verdwient, zodat allienig blift wat onwaankelber is.

28 Lao'we daorom et onwankelbere keuninkriek in daankberhied anveerden, om God zo te dienen dat hi'j d'r behaegen in schept, mit eerbied en ontzag.

29 Oonze God is een verterend vuur!

Hebreeën 13.

01 Hool de onderlinge liefde in staand

02 en hool de gaastvri'jhied in ere, want zo hebben goenend zonder et te weten engels ontvongen.

03 Bekommer jim om de gevangenen asof jim saemen mit heur gevangen zatten, en om de mishaandelden as om meensken die krek zoe'n lichem hebben as jim.

04 Hool et huwelik in ere, in alle omstanigheden, en hool et echtelik bedde zuver, want overspeuligen en echtbrekers zal God veroordielen.

05 Laot jim leven niet beheersen deur geldzucht, neem genoegen mit waj' hebben. Hi'j het ommes zels zegd: "In gienertied zal ik jim ofvalen, nooit zal ik jim verlaoten,"

06 zodawwe vol vertrouwen zeggen kunnen: "De Heer is mien helper, ik hof nargens bange veur te wezen. Wat zollen de meensken mi'j doen kunnen?"

07 Daenk an jim leiders, die et woord van God an jim verkondigd hebben, neem een veurbeeld an heur geleuf en kiek veural goed hoe heur levenswaandel aendigt.

08 Jezus Christus blift dezelde, gisteren, vandaege en tot in iewighied!

09 Laot jim niet misleiden deur verschillende vremdsoortige leerstellings; we doen d'r goed an om oons starken te laoten deur genaode, niet deur eteri'je waor de anhangers van die stellings in et gehiel gien baot bi'j hadden.

10 Wi'j hebben een alter waorvan zi'j die in de tente dienst doen niet eten meugen.

11 Et bloed dat bestemd is veur et reinigingsoffer wodt deur de hogepriester et heiligdom binnendreugen, de kedavers van de offerdieren wodden buten et kaamp verbraand.

12 Daorom het Jezus ok, om mit zien eigen bloed et volk te heiligen, buten de stadspoort leden.

13 Lao'we dus et kaamp verlaoten, oons bi'j him ansluten en patten in zien vernedering.

14 Oonze stad is ommes niet blievend, wi'j kieken juust gunterende uut naor de stad die komt.

15 Lao'we mit Jezus zien tussenkomst een daankoffer brengen an God: et huldebetoon van lippen die zien naeme priezen, ononderbreuken.

16 En hool de liefdaodighied en de onderlinge solidariteit in ere, want dat bin offers waorin God behaegen schept.

17 Geheurzem jim leiders en schik jim naor heur, want zi'j waeken over jim leven en zullen daorvan ok rekenschop ofleggen moeten. Zorge d'r veur dat zi'j heur opdracht mit bliedschop doen kunnen, zodat ze gien reden tot klaegen hebben: dat zol jim grif niet te goeie kommen.

18 Bidde veur oons. We bin d'r weliswaor wis van dat oons geweten zuver is, omreden we daor op ieder terrein naor streven om et goeie te doen,

19 mar toch vraog ik naodrokkeliker as ooit om jim gebed, zodat ik des te eerder bi'j jim weerommebrocht wodden zal.

20 Mag de God van de vrede, die oonze Heer Jezus, de machtige hedder van de schaopen, deur et bloed van et iewig verbond uut de wereld van de dooien wegleided het,

21 jim toerusten mit al et goeie, zodat jim zien wil doen kunnen. Mag hi'j in oons datgene tot staand brengen wat him goeddonkt, deur Jezus Christus, an wie de ere toekomt, tot in alle iewighied. Amen.

22 Ik vraoge jim naodrokkelik, breurs en zusters, ontvankelik te wezen veur disse woorden van bemoediging, ok al he'k jim mar beknopt schreven.

23 Wusten jim dat oonze breur Timoteüs vri'jlaoten is? As hi'j vlogge genoeg komt, zuwwe jim saemen bezuken kunnen.

24 Groet al jim leiders en alle heiligen. De geleuvigen uut Italië laoten jim groeten.

25 Genaode is mit jim allemaole.