Haggai
in een
Stellingwarver vertaeling
Et boek Haggai is et tiende boek van de verzaemeling
van de zonuumde Twaelf Profeten. Disse verzaemeling
van profeteboeken is vermoedelik in de vierde of dadde ieuw v.Chr. tot staand kommen. Et boek is nuumd naor een profeet die neffens
et inleidende vas 1:1 in et jaor 520 v.Chr. warkzem
was in Jeruzalem. In die tied hadden de Perzen de macht overneumen van de
Babyloniërs en was een pat van de Judese ballings uut Babylonië weerommekommen.
Pattie nemen an dat et boek in zien vorm van vandaege-de-dag niet vule laeter,
nao een lichte redaktionele bewarking tot staand is kommen. Buten dit boek wodt
de profeet Haggai, tegere mit Zacharia, nuumd in Ezra 5-6.
Et boek Haggai bestaot uut profetieën, die inbedded
binnen in een stark verhaelend raemwark, zodat et boek et kerakter het van een
historisch verslag van et profetisch optreden van Haggai. Deur et vule bruken
van de profetische formule "zegt de Heer (van de hemelse machten)"
wodt benaodrokt dat de profetieën God zien woorden binnen. Et centraole thema
van et boek is een oproep van God om de tempel in Jeruzalem te opni'j bouwen.
De tempel was in 586 v.Chr. verwoest bi'j de
verovering van Jeruzalem deur de Babyloniërs onder leiding van Nebukadnessar.
De desolaote toestaand van et laand vandaege-de-dag wodt in verbaand brocht mit
et uutblieven van de herbouw van de tempel. De oproep is tot de gouverneur
Zerubbabel en de hogepriester Jozua richt, mar ok tot et volk.
In et boek Haggai bin twie patten te onderscheiden.
In kepittel 1 klinkt et verwiet dat de tempel nog niet opni'j bouwd is, en wodt
verteld hoe et volk mit de herbouw een begin maekt. In kepittel 2 volgt een anvietering
om deur te gaon. Opni'j wodt wezen op de ellende in de tied veur et begin van
de herbouw, mar d'r is ok een belofte van veurspoed.
Vertaeling van de Biebel (NBG 2004)
deur Piet Bult uut Ni’jberkoop
Haggai
1
Over de herbouw van de
tempel
01 In et twiede
regeringsjaor van keuning Darius, op de eerste dag van de zesde maond, richtte
de Heer deur de mond van de profeet Haggai tot Zerubbabel, zeune van Sealtiël
en gouverneur van Juda, en tot Jozua, zeune van Josadak en hogepriester:
02 "Dit zegt de Heer
van de hemelse machten: Dit volk beweert dat et nog gien tied is om de tempel
van de Heer weer op te bouwen.
03 Mar," zo zee de Heer
deur de mond van de profeet Haggai,
04 "as et dan wel tied
om zels in mooi ofwarkte huzen te wonen? En dat wiels mien
huus nog in puun ligt!
05 Now dan – dit zegt de
Heer van de hemelse machten: Wat weg bi'j'm insleugen? Daenke toch nao!
06 Jim hebben een protte
zi'jd mar weinig oogst; jim eten mar raeken gienertied
zae, jim drinken mar nooit is et genoeg, jim strupen kleren an mar kriegen et
mar niet waarm; de dagloner krigt zien geld mar et verdwient in een knippe vol
gatten.
07 Dit zegt de Heer van de
hemelse machten: Wat weg bi'j'm eins insleugen?
08 Gao naor de bargen, hael
daor hoolt en bouwe mien huus weer op. Mit bliedschop
za'k et anveerden en d'r mi'j in al mien luuster tonen
– zegt de Heer.
09 Jim hebben een protte
verwaacht, mar hoe'n betien is et wodden, en waj'm wél binnenhaelden, is deur mien aosem verdistreweerd. En waoromme? – zegt
de Heer van de hemelse machten. Omreden mien huus nog
de hieltied in puun ligt, wiels iederiene van jim him uutslooft veur zien eigen
huus.
10 Daorom onthoolt de hemel jim zien dauw en brengt de eerde niks meer op.
11 Ik hebbe et laand en de
bargen, et koren, de wien en de eulie, al wat de eerde
opbrengt, ieder meenske en ieder dier, en alles waj'm muuizem tot staand brocht
hebben, mit dreugte troffen."
12 Zerubbabel, zeune van
Sealtiël, en Jozua, zeune van Josadak en hogepriester, en wie d'r van et volk
nog over weren, luusterden naor de oproep die de Heer, heur
God, daon had; ze luusterden naor de woorden van de profeet Haggai, die deur de
Heer, heur God, stuurd was. En et volk raekte vol van aangst veur de Heer.
13 Mar Haggai, de bosschopper
van de Heer, zee in opdracht van de Heer tegen et volk: "Ik bin bi'j jim – zegt de Heer."
14 Zo zette de Heer
Zerubbabel, zeune van Sealtiël en gouverneur van Juda, en Jozua, zeune van
Josadak en hogepriester, en wie d'r van et volk nog over weren, d'r toe an om
uut aende te zetten mit et opni'j opbouwen van de tempel van de Heer van de
hemelse machten, heur God.
15 Zi'j gongen an et wark op
de vierentwintigste dag van de zesde maond.
In et twiede regeringsjaor
van keuning Darius,
Haggai 2
01 op de ienentwintigste dag
van de zeuvende maond, praotte de Heer opni'j deur de mond van de profeet
Haggai. Hi'j dreug him op:
02 "Zegge tegen
Zerubbabel, zeune van Sealtiël en gouverneur van Juda, en tegen Jozua, zeune
van Josadak en hogepriester, en tegen wie d'r van et volk nog over binnen:
03 "Wie van jim het disse tempel nog in zien vroegere luuster zien? En
hoe zicht hi'j d'r now uut? Jim daenken grif dat et niks meer wodden kan!"
04 Mar hool vol, Zerubbabel
– zegt de Heer –, hool vol, Jozua, zeune van Josadak en hogepriester; jim allemaole, bewoners van dit laand, hool vol! – zegt de Heer. Wark deur, ik bin bi'j jim
– zegt de Heer van de hemelse machten.
05 Dat he'k jim beloofd doej'm vottrokken uut Iegypte; ik zal de
hieltied in jim midden anwezig wezen, wees dus mar niet bange.
06 Want dit zegt de Heer van
de hemelse machten: Nog een posien, een zwinkien
amper, en ik zal de hemel en de eerde, de zee en et laand beven laoten.
07 Alle volken maek ik overstuur,
heur schatten zullen an mi'j toevalen en mien huus
za'k volzetten mit pracht en riekdom – zegt de Heer van de hemelse machten.
08 Et zulver is veur mi'j en
et goold is veur mi'j – zegt de Heer van de hemelse machten.
09 De luuster van disse
tempel zal groot wezen, nog groter as veurhenne – zegt de Heer van de hemelse
machten –, en van hieruut za'k jim vrede en veurspoed
geven – zegt de Heer van de hemelse machten."
10 Op de vierentwintigste
dag van de negende maond, in et twiede regeringsjaor van Darius, richtte de
Heer him tot de profeet Haggai:
11 "Dit zegt de Heer
van de hemelse machten: Vraog de priesters hierover een uutspraoke te doen:
12 As iene offervleis bi'j
him dreegt in een plooi van zien maantel, en disse plooi komt in anraeking mit
brood of mit kookt eten, mit wien, eulie of mit wat veur eten ok, wodt dat eten
daordeur dan heilig?" "Nee," gavven de priesters as bescheid op disse vraoge.
13 Doe vreug Haggai:
"As iene die poeterig is deurdat hi'j mit een
liek in anraeking west is, zok eten anraekt, wodt et daordeur dan poeterig?"
"Ja," zeden de priesters doe, " daordeur wodt et poeterig."
14 Doe zee Haggai: "Zo
is et ok mit disse meensken – zegt de Heer –, zo is et in mien
ogen steld mit dit hiele volk, en zo is et ok mit de vruchten van heur wark;
alles wat zi'j offeren is poeterig.
15-16 Mar
pas op wat d'r vanof vandaege gebeuren gaot. Hoe was et mit jim
steld veurdat d'r an de herbouw van de tempel van de Heer begonnen wodde? Jim
dochten twintig maoten graon te scheppen, mar de graonbulte bleek amper tien
maoten groot te wezen; jim dochten vuuftig maoten wien
uut de passe te haelen, mar de passetonne bleek amper twintig maoten te
bevatten.
17 De vruchten van jim wark he'k troffen mit korenbraand, maeldauw en haegel,
en toch bi'j'm niet naor mi'j weerommekommen – zegt de Heer.
18 Mar pas op wat d'r gebeuren gaot, vanof vandaege, vanof disse
vierentwintigste dag van de negende maond, vanof de dag dat de tempel van de
Heer grondvest is, pas op!
19 Et is waor dat et zaod
nog ongebruukt in de schure ligt, en ok hebben de wienstok en de viegeboom, de
granaatappel en de olijf nog gien vrucht dreugen, mar vanof vandaege za'k jim mien zegen geven."
20 Op die vierentwintigste
dag van de maond richtte de Heer him opni'j tot Haggai:
21 "Zegge dit tegen
Zerubbabel, de gouverneur van Juda: "Ik zal de hemel en de eerde beven laoten,
22 ik zal alle koningstronen
ommesmieten en de macht van alle volken breken, ik zal de striedwaegens mit heur berieders ommegooien; de peerden zullen valen en de
ruters zullen mekeer ommebrengen.
23 Op die dag – zegt de Heer
van de hemelse machten – za'k jow, Zerubbabel, zeune van Sealtiël en mien knecht, dregen as mien zegelring, want jow he'k
uutkeuzen – zo zegt de Heer van de hemelse machten.""