Filemon
in een
Stellingwarver vertaeling
De brief an Filemon is richt an Filemon en an de gemiente die bi'j him thuus bi'jmekeer kommen. Paulus zit op et mement waorop hi'j de brief schrift gevangen. Riekaans het hi'j de brief in Efeze schreven, rond et jaor 55. De stijl verschilt niet een protte van de aandere brieven van Paulus; de brief begint mit een hattelike begroeting en het een persoonlike toon.
In disse slim kotte brief vragt Paulus an Filemon of disse zien weglopen knecht Onesimus weer weeromme nemen wil. Onesimus is naor Paulus toe vlocht en het him ondertussen bi'j de kristelike gemiente ansleuten. Paulus dot een beroep op Filemon zien liefde en de trouw in et geleuf, en dot zien vraoge op grond van zien verbunnenhied mit Christus, en zien baand mit Onesimus. Over de reden van Onesimus zien vlocht naor Paulus bestaon verschillende opvattings. Meugelik wol Onesimus gebruuk maeken van een riegel uut et Romeinse recht: een knecht die een vergriep pleegd hadde kon een dadde perti'j om hulpe vraogen. Die dadde kon dan as advekaot van de knecht optreden. De riegel was d'r om et veur te wezen dat meesters heur knechten om et minste of geringste ofraanselen konnen. Et was niet de bedoeling van de knecht om veurgoed an zien meester te ontkommen, mar om laeter, as de zaeke in goeie harmonie regeld was, weer weeromme te kommen. Uut vas 18 en 19 zol opmaekt wodden kunnen dat Onesimus geld steulen had van Filemon; mar et is ok meugelik dat Paulus de financiële begrippen in overdrachtelike betekenis bruukt.
Vertaeling van de Biebel (NBG 2004)
deur Piet Bult uut Ni’jberkoop
Filemon 1.
De brief an Filemon.
01 Van Paulus, gevangene omwille van Christus Jezus, en van oonze breur Timoteüs. An oonze geliefde mitwarker Filemon,
02 an oonze zuster Apfia en oonze mitvechter Archippus, en an de gemiente die bi'j jim thuus saemenkommen.
03 Genaode veur jow en vrede van God, oonze Heit, en van de Heer Jezus Christus.
04 Ik daank mien God de hieltied a'k jow in mien gebeden nume,
05 want ik heur pattietoeren over de liefde en de trouw die jow de Heer Jezus en alle heiligen toedregen.
06 Ik bidde dat et geleuf dat jow mit oons patten jow een dieper inzicht geft in al et goeie dat oons naoder tot Christus brengt.
07 Jow liefde het mi'j een protte bliedschop en troost geven, breur, want jow hebben de heiligen starkt.
08 In mien verbunnenhied mit Christus he'k et volste recht om jow te zeggen wat jow doen moeten,
09 mar vanwegens jow liefde doe ik je liever een verzuuk – ik, Paulus, een man van respektaobele leeftied, die gevangen zit omwille van Christus Jezus.
10 Ik zol jow om een geunst vraogen willen veur Onesimus, die tiedens mien gevangenschop mien kiend wodden is.
11 Hi'j was jow destieds niet van nut; mar now kan hi'j niet allienig mi'j, mar ok jow goeie diensten bewiezen.
12 Ik stuur him naor jow weeromme, hoewel hi'j mi'j nao an et hatte ligt
13 en ik him graeg bi'j mi'j hullen hadde. Dan had hi'j naemens jow veur mi'j zorgen kund now ik omwille van et evangelie gevangen zitte.
14 Mar ik hebbe zonder jow weten niks ondernemen willen, want jow moe'n mi'j niet een geunst verlienen omreden ik jow onder drok zet, mar omreden jow et zels willen.
15 Misschien hebben jow him kotte tied missen moeten om him veur altied weeromme te kriegen,
16 niet meer as een knecht, mar vule meer as dat, as een geliefde breur. Veur mi'j is hi'j dat al, hoevule te meer moet hi'j et dus veur jow wezen, liekegoed in et daegeliks leven as in et geleuf in de Heer.
17 Dus, as jow mit mi'j verbunnen binnen, ontvang him dan zoas jow mi'j ontvangen zollen.
18 En moch hi'j jow benaodield hebben of jow wat schuldig wezen, breng et mi'j dan in rekening.
19 Ik, Paulus, schrief hier eigenhaandig daele dat ik jow betaelen zal. Ik gao d'r dan mar an veurbi'j dat jow mi'j jow eigen leven schuldig binnen.
20 Kom, breur, bewies mi'j disse dienst omwille van de Heer, stel mi'j omwille van Christus gerust.
21 Ik hebbe jow schreven in et volste vertrouwen dat jow mien vraoge inwilligen zullen, ik weet dat jow alderdeegst meer doen zullen as dat.
22 Te slotte: maek veur mi'j een kaemer in odder, want ik hebbe goeie hope da'k deur toedoen van de gebeden van jim allemaole an jow weeromme geven wodde.
23 Epafras, die tegere mit mi'j omwille van Christus Jezus gevangen zit, lat jow groeten,
24 krek as mien mitwarkers Marcus, Aristarchus, Demas en Lucas.
25 De genaode van de Heer Jezus Christus is mit jow.