Ezra
in een
Stellingwarver vertaeling
Ezra
vormt tegere mit Nehemia ien boek dat in biebeluutgiften de hieltied in twienen
splitst is. Et boek Ezra ontlient zien naeme an de priester Ezra, die de
heufdrolle speult in Ezra 7-10 en in Nehemia 8. Disse Ezra kwam in et midden
van de vuufde ieuw v.Chr. mit inkelde duzenden Judeeërs in kommedaosie van de
Perzische keuning naor Jeruzalem om te onderzuken hoe et volk in Juda en
Jeruzalem de wet van Mozes naoleefde. In de Hebreeuwse biebel wodt Ezra mit
Nehemia tot de Ketoeviem, de Geschriften, rekend, en et is dan et laeste of et
veurlaeste boek. In een protte biebeluutgiften geft et volk Ezra en Nehemia
zien de inhoold meerstal een plak onder de historische boeken, nao 2 Kronieken.
Opvalend is dat de beginvassen van Ezra en de slotvassen van 2 Kronieken
ongeveer geliekludend binnen. Op grond daorvan en op grond van inhoold en stiel
wodt pattietoeren verondersteld dat de boeken Ezra en Nehemia ofkomstig binnen
van de schriever die 1 en 2 Kronieken schreven het, of van een geestverwaant.
Meugelik wol disse schriever ien groot geschiedeniswark saemenstellen, dat
begon mit de schepping van de wereld en aendigde mit de herbouw van de tempel
(515 v.Chr.) en et herstel van de muren van de stad Jeruzalem (omstreeks 443
v.Chr.). De boeken wodden in et algemien niet veur et aende van de vuufde ieuw
dateerd.
De
boeken Ezra en Nehemia geven een selektief verslag van de gebeurtenissen uut de
geschiedenis van Israël in de ieuw nao de Babylonische ballingschop. Et is een
min of meer deurlopend verhael waorin teksten uut verschillende bronnen gadderd
binnen en zovule meugelik as ien gehiel prissenteerd binnen. D'r bin brieven en
keuninklike besluten, liesten mit naemen en geslachtsregisters, archiefstokken,
memoires en gebeden. Opvalend is dat pattie teksten niet in et Hebreeuws, mar
in et Aramees schreven binnen (Ezra 4:8-6:18; 7:12-26). Et Aramees was de
officiële bestuurstael in et Perzische riek. De schriever van Ezra en Nehemia
hoolt zien lezers veur dat de gemienschop van de weerommekeerde ballings die
leven neffens de wet van Mozes, een deurgaon is van et volk van Israël uut de
tied van de keunings. Belangrieke onderwarpen bin de herbouw van de tempel in
Jeruzalem en van de muren van de stad, de daorbi'j ondervunnen verzet, de
naoleving van de wet van Mozes en et herstel van de Joodse gemienschop as et
volk van God.
In
et boek Ezra bin twie patten te onderscheiden. Et eerste pat (1-6) is wi'jded
an de wederweerdigheden van Judese ballings die in 538 v.Chr. nao et dekreet
van Cyrus naor Juda teroggekeerd binnen. D'r wodt een protte andacht besteded
an de hervatting van de eredienst nao de muuizeme herbouw van de tempel. De
niet-Joodse laansbevolking onder leiding van de gouverneur van Samaria verzet
him in 't eerst mit sukses tegen de tempelbouw en laeter ok tegen et herstel
van de stadsmure. In et twiede pat (7-10) staon de aktiviteiten van Ezra as
priester en wetgeleerde centraol. Veur de beschrieving van zien optreden wodt
gedieltelik de vorm van een deur himzels schreven verslag keuzen. In dit
persoonlike verslag maekt hi'j onder eren gewag van zien maotregels tegen
huweliken mit vrouwluden van niet-Joodse ofkomst.
Ezra 1
Kommedaosie
tot herbouw van de tempel
01 In et eerste regeringsjaor van Cyrus, de keuning
van Perzië, kwam uut wat de Heer Jeremia ankondigen laoten hadde. Hi'j zette de
keuning d'r toe an om in zien hiele keuninkriek mondeling en ok schriftelik dit
besluut bekend maeken te laoten:
02 "Dit zegt Cyrus, de keuning van Perzië: Alle
keuninkrieken van de eerde het de Heer, de God van de hemel, mi'j geven. Hi'j
het mi'j opdreugen om veur him een tempel te bouwen in Jeruzalem, een stad in
Juda.
03 Laoten al diegenen onder jim die tot zien volk
beheuren, mit de hulpe van heur God naor Jeruzalem in Juda toe kommen om daor
de tempel van de Heer weer op te bouwen, de God van Israël, de God die in
Jeruzalem woont.
04 Iederiene die hier nog as vremde is, waor zi'j ok
wezen meugen, moeten van heur medeburgers ondersteuning kriegen in de vorm van
zulver, goold, spul en vee. Dit komt boven op de vri'jwillige giften veur de
tempel van de God die in Jeruzalem woont."
Weerommekommen
naor Jeruzalem
05 De femilie-ooldsten van de stammen Juda en
Benjamin, de priesters en de Levieten, iederiene die God daortoe anzette,
maekte him klaor om naor Jeruzalem te gaon en uut aende te zetten mit de bouw
van de tempel van de Heer.
06 Al heur buren ondersteunden heur mit veurwarpen van
zulver en goold, mit spul, vee en kostbere kedo's, nog ofzien van wat
vri'jwillig anbeuden wodde.
07 Keuning Cyrus van Perzië gaf de veurwarpen vri'j
die uut de tempel van de Heer ofkomstig weren en die Nebukadnessar uut
Jeruzalem mitneumen hadde en in de tempel van zien eigen god hennezet hadde.
08 Hi'j vertrouwde et weerommegeven toe an Mitredat,
de schatmeester, die ze mit een eventaorisliest an Sesbassar, de leider van
Juda, overdreug.
09 Et betrof dattig goolden schaolen, duzend zulveren
schaolen, negenentwintig messen,
10 dattig goolden bekers, vierhonderdtiene zulveren
bekers van verschillende soorte en duzend aandere veurwarpen,
11 bi'jenneer vuufduzendvierhonderd veurwarpen van
zulver of goold. Dit alles leut Sesbassar mitnemen doe hi'j de ballings uut
Babylonië weerommebrocht naor Jeruzalem.
Ezra 2
Liest van
weerommekommen ballings
01-02 Hier volgt een liest van inwoners van de
perveensie Juda die weerommekeerd binnen uut de ballingschop in Babylonië, waor
zi'j eerder henne wegvoerd weren deur keuning Nebukadnessar. Zi'j bin
weerommekeerd mit Zerubbabel, Jesua, Nechemja, Seraja, Reëlaja, Mordechai,
Bilsan, Mispar, Bigwai, Rechum en Baäna, en vestigden heur in Jeruzalem en
Juda, in heur eigen steden.
De tallen:
Israëlitische manluden:
03 2172 ofstammelingen van Paros
04 372 ofstammelingen van Sefatja
05 775 ofstammelingen van Arach
06 2812 ofstammelingen van Pachat-Moab, en wel de
naokommelingen van Jesua en Joab
07 1254 ofstammelingen van Elam
08 945 ofstammelingen van Zattu
09 760 ofstammelingen van Zakkai
10 642 ofstammelingen van Bani
11 623 ofstammelingen van Bebai
12 1222 ofstammelingen van Azgad
13 666 ofstammelingen van Adonikam
14 2056 ofstammelingen van Bigwai
15 454 ofstammelingen van Adin
16 98 ofstammelingen van Ater, en wel de
naokommelingen van Chizkia
17 323 ofstammelingen van Besai
18 112 ofstammelingen van Jora
19 223 ofstammelingen van Chasum
20 95 ofstammelingen van Gibbar
21 123 inwoners van Betlehem
22 56 inwoners van Netofa
23 128 inwoners van Anatot
24 42 inwoners van Azmawet
25 743 inwoners van Kirjat-Jearim, Kefira en Beërot
26 621 inwoners van Rama en Geba
27 122 inwoners van Michmas
28 223 inwoners van Betel en Ai
29 52 inwoners van Nebo
30 156 ofstammelingen van Magbis
31 1254 ofstammelingen van een aandere Elam
32 320 ofstammelingen van Charim
33 725 inwoners van Lod, Chadid en Ono
34 345 inwoners van Jericho
35 3630 inwoners van Senaä.
36 Priesters:
973 ofstammelingen van Jedaja, en wel et geslacht van
Jesua
37 1052 ofstammelingen van Iewig
38 1247 ofstammelingen van Paschur
39 1017 ofstammelingen van Charim.
40 Levieten:
74 ofstammelingen van Jesua en Kadmiël, en wel de
naokommelingen van Hodawja.
41 Tempelzangers:
128 ofstammelingen van Asaf.
42 Poortwaachters:
in tetaol 139 ofstammelingen
van Sallum, Ater, Talmon, Akkub, Chatita en Sobai.
43 Tempelknechten:
ofstammelingen van Sicha,
Chasufa, Tabbaot,
44 Keros, Siaha, Padon,
45 Lebana, Chagaba, Akkub,
46 Chagab, Salmai, Chanan,
47 Giddel, Gachar, Reaja,
48 Resin, Nekoda, Gazzam,
49 Uzza, Paseach, Besai,
50 Asna, Meünim, Nefusim,
51 Bakbuk, Chakufa, Charchur,
52 Baslut, Mechida, Charsa,
53 Barkos, Sisera, Temach,
54 Nesiach en Chatifa.
55 Ofstammelingen van de knechten van Salomo:
ofstammelingen van Sotai,
Soferet, Peruda,
56 Jaäla, Darkon, Giddel,
57 Sefatja, Chattil, Pocheret-Hassebaïm en Ami,
58 in tetaol 392 tempelknechten en ofstammelingen van
de knechten van Salomo.
59-60 Veerder nog zi'j die kwammen uut Tel-Melach,
Tel-Charsa, Kerub, Addan en Immer, 652 ofstammelingen van Delaja, Tobia en
Nekoda. Mar zi'j konnen niet antonen dat de femilies waortoe zi'j heurden
Israëlitisch weren.
61 Dat gul ok veur de priesterfemilies Chobaja, Hakkos
en Barzillai (zi'j hietten zo sund heur stamheit iene van de dochters van de
Gileadiet Barzillai tot vrouw neumen hadde).
62 Zi'j zochten naor et schriftelike bewies dat ze in
de geslachtsregisters inschreven weren, mar ze vunnen et niet. Op grond daorvan
wodden ze poeterig verklaord en van et priesterschop uutsleuten.
63 De laandvoogd leut heur weten dat ze niet van de
alderheiligste offergaoven eten mochten tot d'r een priester was die mit hulpe
van de oraokelstienen uutspraoke doen kon.
64 De hiele gemienschop telde in tetaol 42.360
meensken.
65 Daorbi'j kwammen nog 7337 knechten en meiden, 200
zangers en zangeressen,
66 736 peerden, 245 muildieren,
67 435 kemelen en 6720 ezels.
68 Doe zi'j bi'j de tempel van de Heer in Jeruzalem
ankwammen, dreug een tal femilie-ooldsten een vri'jwillige bi'jdrege of veur de
herbouw d'r van op et vroegere plak.
69 Zi'j brochten naor vermogen dit kaptaol bi'jenneer:
61.000 goolden drachmen, 5000 zulveren minen en 100 priestergewaden.
70 De priesters, de Levieten en een pat van et volk,
de tempelzangers, de poortwaachters en de tempelknechten vestigden heur in heur
eigen steden, en alle aandere Israëlieten in de overige steden.
Ezra 3
Begin van de
herbouw van de tempel
01 An et begin van de zeuvende maond, doe de
Israëlieten heur in heur steden vestigd hadden, verzaemelde et voltallige volk
him in Jeruzalem.
02 Jesua, de zeune van Josadak, en zien medepriesters,
en Zerubbabel, de zeune van Sealtiël, en zien verwaanten, bouwden et alter van
de God van Israël, om daornao offeren te kunnen zoas veurschreven is in de wet
van Mozes, de godsman.
03 Ondaanks heur aangst veur de bevolking van et laand
richtten ze et alter op zien oolde follementen op en offerden an de Heer. Zi'j
dreugen de braandoffers veur de morgen en de aovend op,
04 en vierden et Loofhuttenfeest neffens de
veurschriften: iedere dag brochten ze et vraogde tal braandoffers, zovule
offers dus as d'r veur iedere dag veurschreven binnen.
05 Van doe of an brochten ze ok et daegelikse offer,
et offer op ni'jemaone en de offers bi'j alle aandere heilige belangrieke
feestdaegen van de Heer, en veerder alle vri'jwillige giften an de Heer.
06 Al vanof de eerste dag van de zeuvende maond
dreugen ze braandoffers op an de Heer, ok al weren de follementen van et
heiligdom van de Heer nog niet legd.
07 De stienhouwers en aandere vaklu wodden uutbetaeld
in zulver; de Sidoniërs en Tyriërs kregen eten, draank en eulie om, mit
toestemming van Cyrus, de keuning van Perzië, cederhoolt over zee van de
Libanon naor Jafo te vervoeren.
08 In et twiede jaor naodat zi'j naor God zien tempel
in Jeruzalem kommen weren, in de twiede maond, begonnen Zerubbabel, de zeune
van Sealtiël, en Jesua, de zeune van Josadak, en de rest van heur breurs –
priesters en Levieten en alleman die uut de ballingschop naor Jeruzalem
weerommekommen weren – mit et anstellen van Levieten van twintig jaor en
oolder, om toezicht te holen op de warkzemheden an de tempel van de Heer.
09 Jesua, zien zeunen en verwaanten, en Kadmiël en
zien zeunen, naokommelingen van Juda, weren mittenneer verantwoordelik veur et
toezicht op et warkvolk die warkten an God zien tempel, mit de zeunen van
Chenadad en heur zeunen en verwaanten, allemaole Levieten.
10 Wiels de bouwers de follementen van et heiligdom
van de Heer legden, stelden de priesters, klieded in ambtsklied, heur op mit
trompetten, en de Levieten, de naokommelingen van Asaf, stelden heur op mit
cimbalen, om de Heer te priezen neffens de anwiezings van David, de keuning van
Israël.
11 Zi'j daankten en prezen de Heer, en ze zongen in
beurtzang: "Hi'j is goed, iewig duurt zien trouw an Israël." Hiel et
volk begon daornao luud te juichen en de Heer te priezen omreden de follementen
van de tempel van de Heer legd wodden.
12 Een protte priesters, Levieten en femilie-ooldsten,
de oolderen die de eerste tempel nog zien hadden, goelden luud doe veur heur
ogen de follementen van de tempel legd wodden, mar een protte aanderen juichten
en jubelden.
13 Juichen en goelen weren niet meer te onderscheiden,
et gejubel was zo stark dat et tot op grote ofstaand te heuren was.
Ezra 4
Ondaanks
verzet wodt de tempel herbouwd
01 De tegenstaanders van Juda en Benjamin heurden dat
de ballings die weerommekommen weren een heiligdom veur de Heer, de God van Israël,
an et bouwen weren.
02 Zi'j gongen naor Zerubbabel en de femilie-ooldsten,
en zeden: "Wi'j willen mithelpen mit de bouw, want ok wi'j vereren jim
God, wi'j offeren al an him sund de dag dat Esarhaddon, de keuning van Assyrië,
oons hierhenne brocht het."
03 Zerubbabel en Jesua en de aandere femilie-ooldsten
van Israël zeden doe tegen heur: "Wi'j meugen niet saemen mit jim een
tempel bouwen veur oonze God. Wi'j alliend zullen die bouwen veur de Heer, de
God van Israël, want alliend an oons het Cyrus, de keuning van Perzië, disse
kommedaosie geven."
04-05 Vanof de tied dat Cyrus, de keuning van Perzië,
regeerde, tot onder de regering van keuning Darius, perbeerde de bevolking van
et laand et moreel van de Judeeërs te verzwakken en heur bange te maeken, om heur
of te holen van de bouw. Ze kochten alderdeegst raodgevers omme zodat die de
plannen van de Judeeërs veurkommen zollen.
06 In et begin van et bestuur van Xerxes wodde een
schriftelike anklacht indiend tegen de inwoners van Juda en Jeruzalem,
07 en laeter, tiedens et keuningschop van Artaxerxes,
schreven Bislam, Mitredat, Tabeël en heur ambtgenoten een brief an de keuning.
Disse brief was in et Aramees schreven, en was vertaeld.
08 Rechum, et heufd van de kaanseleri'je, en Simsai,
de hofschriever, schreven de disse brief an keuning Artaxerxes over Jeruzalem:
09 "Van Rechum, et heufd van de kaanseleri'je, en
van Simsai, de hofschriever, en van heur overige ambtgenoten: rechters,
bosschoppers, baentiesmannen, manluden uut Sippar, Uruk, Babel en Susa (dat bin
Elamieten),
10 en van de aandere volken die de grote en
deurlochtige Asnappar in ballingschop wegvoerd en wonen laoten het in de steden
van Samaria en et overige gebied van de perveensie Trans-Eufraat.
11 (dit is een ofschrift van de deur heur schreven
brief.) An keuning Artaxerxes, van jow knechten, inwoners van de nuumde
perveensie.
12 Et zal de keuning bekend wezen dat de Judeeërs die
bi'j jow votgaon binnen bi'j oons in Jeruzalem ankommen binnen, en dat zi'j
disse opsternaote en slechte stad weer opni'j an et bouwen binnen: ze
herstellen de muren en rippereren de follementen.
13 Et zal de keuning bekend wezen dat as disse stad
herbouwd wezen zal en de muren hersteld wezen zullen, d'r niet langer
belasting, cijns of tol ofdreugen wodden zal, wat de belangen van et
keuninkriek grif gien goed doen zal.
14 Now dan, omreden wi'j oons bunnen weten an et
peleis, en omreden et oons niet past om liedzem toe te kieken hoe de macht van
de keuning uuthold wodt, stellen wi'j jow hiervan op de hoogte,
15 zodat onderzuuk in de boeken mit de gedaenkweerdige
gebeurtenissen van jow veurgangers daon wodden kan. As jow daorin lezen, zullen
jow ontdekken dat disse stad een opsternaote en vanoolds oproerige stad is,
waor de belangen van keunings en perveensies schae lieden. Daorom wodde disse
stad ok verwoest.
16 Wi'j wiezen de keuning d'r op dat as disse stad
herbouwd wezen zal en de muren hersteld zullen binnen, jow de macht over de
perveensie Trans-Eufraat kwiet raeken zullen."
17 De keuning stuurde doe dit bescheid:
"An Rechum, et heufd van
de kaanseleri'je, en an Simsai, de hofschriever, en an heur overige ambtgenoten
die in Samaria wonen en de rest van de perveensie Trans-Eufraat: wi'j weensken
jim vrede!
18 Et schrieven daj'm oons stuurd hebben, is mi'j
woordelik veurlezen.
19 Ik hebbe kommedaosie geven om de zaeke te
onderzuken, en d'r is an et locht kommen dat disse stad him van ooldsher tegen
heur keunings verzet het en dat ze een bron is van opstaand en oproer.
20 D'r blieken in Jeruzalem alderdeegst starke
keunings west te wezen die heur macht gellen laoten hebben in de hiele
perveensie Trans-Eufraat, en an wie belasting, cijns en tol betaeld wodde.
21 Geef daorom de manluden kommedaosie om mit et wark
op te holen, want disse stad mag niet herbouwd wodden tot ik daortoe
kommedaosie geve.
22 Hude jim in dissen veur verzuum, zodat et
keuninkriek gien grote schae lieden zal."
23 Doe et ofschrift van et schrieven van keuning
Artaxerxes veurlezen was an Rechum, an de hofschriever Simsai en an heur
ambtgenoten, gongen zi'j zo vlogge meugelik naor de Judeeërs in Jeruzalem, en
mit geweld dwongen zi'j heur om mit heur wark op te holen.
24 Et wark an de tempel van God in Jeruzalem wodde
stillelegd, en daorin kwam gien veraandering tot et twiede regeringsjaor van
keuning Darius van Perzië.
Ezra 5
01 Doe begonnen de profeten Haggai en Zacharia, de
kleinzeune van Iddo, in kommedaosie van de God van Israël te profeteren tegen
de Judeeërs die in Juda en in Jeruzalem woonden.
02 Daornao begonnen Zerubbabel, de zeune van Sealtiël,
en Jesua, de zeune van Josadak, opni'j mit de bouw van de tempel van God in
Jeruzalem. Ze kregen daorbi'j de steun van God zien profeten.
03 Kot daornao kwammen Tattenai, de gouverneur van de
perveensie Trans-Eufraat, en Setar-Boznai mit heur ambtgenoten naor heur toe,
en vreugen: "Wie het jim bevel geven om disse tempel opni'j te bouwen, dit
heiligdom of te maeken?"
04 Ok vreugen ze: "Hoe hieten de manluden die
hier an et bouwen binnen?"
05 Mar heur God waekte over de ooldsten van de
Judeeërs: zi'j wodden niet dwongen om et wark stille te leggen veurdat d'r an
Darius rappeteerd wezen zol en d'r een schriftelik bescheid weerommekregen
wezen zol.
06 Ofschrift van de brief die Tattenai, de gouverneur
van de perveensie Trans-Eufraat, en Setar-Boznai, en zien ambtgenoten,
bestuurders van de nuumde perveensie, an keuning Darius stuurd hebben.
07 Et bericht an him ludede zo:
"An Darius, de keuning:
alle goeds!
08 Et is de keuning bekend dat wi'j naor de perveensie
Juda gaon binnen, naor de tempel van de grote God. Die tempel wodt optrokken
van stienblokken, en in de muren wodden balkens legd. Et wark wodt hiel percies
uutvoerd en et voddert staorig.
09 Wi'j hebben de ooldsten vraogd wie heur et bevel
hadde geven tot de bouw van de tempel en et wark an et heiligdom ofmaeken.
10 Ok hebben wi'j heur naemen vraogd, zodawwe, veur
jow infermaosie, de naemen van de leiders schriftelik vaasteleggen konnen.
11 Dit was heur bescheid: “wi'j bin knechten van de
God van de hemel en de eerde, en wi'j rippereren de tempel die al een protte
jaoren leden bouwd wodde; een groot keuning van Israël het de bouw d'r van
destieds ofmaekt.
12 Mar omreden oonze veuroolden de God van de hemel
lelk maekt hebben, het hi'j heur an de keuning van Babylonië, de Chaldeeër
Nebukadnessar, uutleverd. Hi'j het disse tempel verdistreweerd en et volk in
ballingschop naor Babylonië wegbrocht.
13 Mar keuning Cyrus van Babylonië het in zien eerste
regeringsjaor kommedaosie geven om de tempel van God te opni'j te bouwen.
14 Ok de goolden en zulveren veurwarpen die
Nebukadnessar uut God zien heiligdom in Jeruzalem votneumen hadde en naor et
heiligdom in Babel brocht hadde, bin deur keuning Cyrus daor weer weghaeld en
an een zekere Sesbassar geven, die deur him ansteld was as gouverneur.
15 Hi'j zee tegen him: "Neem disse veurwarpen en
zet ze weeromme in et heiligdom van Jeruzalem. Zorge d'r veur dat God zien
tempel op zien vroegere plak opni'j bouwd wodt."
16 Die nuumde Sesbassar is hier kommen en het de
follementen legd van God zien tempel in Jeruzalem, en van doe of an tot now an
toe is d'r an bouwd, mar hi'j is nog niet klaor.”
17 Now dan, as et de keuning goeddonkt, laot hi'j dan
in Babylonië een onderzuuk instellen in de keuninklike archieven naor de vraoge
as et warkelik zo is dat keuning Cyrus kommedaosie geven het om disse tempel
van God in Jeruzalem op te bouwen. Laot hi'j oons dan op de hoogte brengen van
zien wil in dissen."
Ezra 6
01 Doe gaf keuning Darius kommedaosie om een onderzuuk
in te stellen in de Babylonische archieven, waor de schatten beweerd wodden.
02 In de burcht van Ekbatana, in de perveensie Medië,
vunnen ze een rolle waorin disse gedaenkweerdige gebeurtenis beschreven was:
03 "In zien eerste regeringsjaor het keuning
Cyrus dit bevel geven angaonde de tempel van God in Jeruzalem: De tempel moet
herbouwd wodden, op et plak waor offerd wodt. De follementen moe'n dezelde
blieven, en hi'j moet zestig elle hoge wodden en zestig elle bried.
04 Hi'j moet bestaon uut drie laogen stienblokken en
iene laoge hoolt, en de kosten moe'n betaeld wodden uut de keuninklike
schatkiste.
05 Ok moe'n de goolden en zulveren veurwarpen uut God
zien tempel, die Nebukadnessar uut et heiligdom in Jeruzalem haeld het en naor
Babel brocht het, weerommegeven wodden en overbrocht wodden naor et heiligdom
in Jeruzalem, waor ze heuren, en daor daelezet wodden, in de tempel van
God."
06 "Wat jow vraoge angaot, Tattenai, gouverneur
van de perveensie Trans-Eufraat, en Setar-Boznai en jow ambtgenoten,
bestuurders van de nuumde perveensie: laot de bouw ongemuuid.
07 Laot et wark an de tempel van God kalmpies deurgaon.
De gouverneur en de ooldsten van de Judeeërs meugen de tempel opni'j bouwen op
zien vroeger plak.
08 En ik hebbe kommedaosie geven dat jow de ooldsten
van de Judeeërs steunen moeten bi'j de bouw van de tempel van God: zi'j moe'n
de kosten de hieltied hielendal vergoed kriegen uut de keuninklike schatkiste,
uut de belastingopbrengst van de perveensie Trans-Eufraat, zolange as neudig
is.
09 Alles wat de priesters in Jeruzalem neudig hebben,
moet heur daegeliks vri’juut geven wodden: jonge bollen en rammen en laomer om
te offeren an de God van de hemel, en weite, zoolt, wien en eulie,
10 zodat zi'j offergaoven an de God van de hemel
brengen kunnen, en bidden zullen veur et leven van de keuning en zien zeunen.
11 Ok he'k et bevel geven dat d'r bi'j alleman die dit
besluut overtreedt een balke uut zien huus sloopt wodden moet, waoran hi'j dan
rechtop vaastespiekerd wodden zal. Zien huus moet mit de grond geliek maekt wodden.
12 Mag de God die zien naeme in disse tempel wonen
lat, de tempel van God in Jeruzalem, alle keunings en volken daeleslaon die
perberen om dit besluut te overtreden deur de tempel te verwoesten. Ik, Darius,
hebbe dit bevel geven, en et moet hiel precies uutvoerd wodden."
13 Tattenai, de gouverneur van de perveensie
Trans-Eufraat, Setar-Boznai en heur ambtgenoten voerden hiel percies uut waor
keuning Darius kommedaosie toe geven hadde.
14 De ooldsten van de Judeeërs vodderden staorig mit
de bouw, deur toedoen van et optreden van de profeet Haggai en van Zacharia, de
kleinzeune van Iddo. Zi'j maekten daon wark mit de tempelbouw zoas de God van
Israël en de Perzische keunings Cyrus, Darius en Artaxerxes beveulen hadden.
15 In et zesde regeringsjaor van keuning Darius, op de
dadde dag van de maond adar, was de tempel klaor.
16 De Israëlieten, de priesters, de Levieten en de
annderen van de ballings die weerommekommen weren, vierden de inwi'jding van de
tempel van God mit bliedschop,
17 en daorveur brochten zi'j disse offers: honderd
bollen, twiehonderd rammen en vierhonderd laomer. Daornaost offerden zi'j nog
twaelf geitebokken as reinigingsoffer veur hiel Israël, iene veur ieder van de
twaelf stammen.
18 Ok wodden de priesters indield in heur klassen en
de Levieten in heur ofdielings, veur de dienst van God in Jeruzalem, neffens de
veurschriften in et boek van Mozes.
19 De weerommekeerde ballings vierden Pesach op de
veertiende dag van de eerste maond.
20 De priesters en de Levieten hadden heur allemaole
wusken, zi'j weren allemaole rein. Ze slaachtten et paoskelaom veur alle
ballings, veur heur medepriesters, en veur heurzels.
21 De Israëlieten die weerommekeerd weren uut de
ballingschop atten et paoskelaom, en ok alleman die heur ofkeerd hadden van de
poeterighied van de plaetselike bevolking en him bi'j de Israëlieten ansleuten
hadden om de Heer, de God van Israël, te vereren.
22 Ze vierden vrolik et feest van et Ongezoerde brood,
zeuven daegen lange, want de Heer had heur mit bliedschop vervuld: hi'j had de
keuning van Assyrië op aandere gedaachten tegenover heur brocht, zodat de
keuning heur krachtig steunde bi'j et wark an de tempel van God, de God van
Israël.
Ezra 7
Ezra gaot
naor Jeruzalem
01-06 Laeter, tiedens de regering van Artaxerxes, de
keuning van Perzië, vertrok een zekere Ezra uut Babylonië. Hi'j was de zeune
van Seraja, de zeune van Azarja, de zeune van Chilkia, de zeune van Sallum, de
zeune van Sadok, de zeune van Achitub, de zeune van Amarja, de zeune van
Azarja, de zeune van Merajot, de zeune van Zerachja, de zeune van Uzzi, de
zeune van Bukki, de zeune van Abisua, de zeune van Pinechas, de zeune van
Eleazar, de zeune van Aäron, de eerste priester. Disse Ezra was een schriever,
goed onderlegd in de wet van Mozes, de wet die de Heer, de God van Israël,
geven het, en hi'j wodde deur de Heer, zien God, bescharmd, waordeur de keuning
him alles toeston wat hi'j wol.
07 Een tal priesters, Levieten, tempelzangers,
poortwaachters, tempelknechten en aandere Israëlieten reisde mit him mit naor
Jeruzalem. Et was in et zeuvende regeringsjaor van keuning Artaxerxes,
08 en ze kwammen an in de vuufde maond van dat jaor.
09 Ezra was neffens plan uut Babylonië vertrokken op
de eerste dag van de eerste maond, en op de eerste dag van de vuufde maond kwam
hi'j in Jeruzalem an, want God beud him onderwegens bescharming.
10 Hi'j was d'r jommes mit hiel zien hatte op richt om
de wet van de Heer te onderzuken, die nao te leven, en de Israëlieten te leren
wat heur wetten en regels binnen.
11 Dit is een ofschrift van de brief die keuning
Artaxerxes an Ezra mitgaf, de priester en schriever die een groot kenner was op
et gebied van de geboden en de wetten van de Heer mit betrekking tot Israël:
12 "Artaxerxes, de keuning van de keunings, an de
priester Ezra, groot kenner van de wet van de God van de hemel: alle goeds weenskt!
13 Hierbi'j bepaol ik dat iedere priester, Leviet of
aandere Israëliet in mien keuninkriek die him veurneumen het om mit jow naor
Jeruzalem te gaon, vri'j is om zoks te doen.
14 Jow wodden jommes vanwegens de keuning en zien
zeuven raodgevers naor Juda en Jeruzalem toestuurd om daor een onderzuuk in te
stellen naor de naoleving van de wet van jow God, waorover jow beschikken.
15 Ok moe'n jow d'r et zulver en goold brengen dat de
keuning en zien raodgevers vri'jwillig an de God van Israël die in Jeruzalem
woont schonken hebben,
16 krek as et zulver en goold dat jow in de hiele
perveensie Babylonië kriegen zullen, en veerder de vri'jwillige giften die et
volk en de priesters schinken zullen veur de tempel van heur God in Jeruzalem.
17 Daornao moeten jow dat geld hiel percies besteden
om bollen, rammen en laomer te kopen, en de daorbi'j veurschreven hoeveulheden
graon en wien, die jow as offer opdregen moeten op et alter in de tempel van
jow God in Jeruzalem.
18 De rest van et zulver en et goold kun jow en jow
breurs naor eigen inzicht besteden, mits dat akkedeert mit de wil van jow God.
19 Lever ok et tempelgerei of dat jow kregen hebben
veur de dienst in de tempel van jow God.
20 Wat d'r veerder neudig is veur de tempel van jow
God en veur jow rekinge kommen zollen, kun jow bekostigen uut de keuninklike
schatkiste.
21 Butendat bepaol ik, keuning Artaxerxes, dat alle
schatmeesters in de perveensie Trans-Eufraat vot-en-daolik alles geven moeten
waor Ezra, groot kenner van de wet van de God van de hemel, omme vraogen zal,
22 tot een bedrag van honderd telent zulver en een
hoeveulhied van honderd kor weite, honderd bat wien en honderd bat eulie, en
zoolt in onbeparkte hoeveulheden.
23 Alle veurschriften van de God van de hemel die zien
tempel angaon moe'n hiel percies uutvoerd wodden, zodat zien argernis et riek
van de keuning en zien zeunen niet treffen zal.
24 Ok laot ik jow weten dat et niet toestaon is om
belasting, cijns of schatting op te leggen an de priesters en de Levieten, de
zangers, poortwaachters, tempelknechten of aandere knechten van de tempel.
25 In overienstemming mit de wieshied van jow God
waorover jow beschikken moe'n jow, Ezra, magistraten en rechters anstellen die
rechtspreken over et hiele volk in de perveensie Trans-Eufraat, over alleman
die de wetten van jow God kent, en moe'n jow wie ze niet kent d'r mit bekend
maeken.
26 Over een ieder die de wet van jow God en de wet van
de keuning niet naokomt moet zonder uutstel een oordiel veld wodden. Zoe'niene
moet ommebrocht wodden of tot een liefstraf veroordield wodden, zien bezit moet
verbeurdverklaord wodden, of d'r moet him een gevangenisstraf oplegd
wodden."
27 Loofd is de Heer, de God van oonze veuroolden, die
de keuning et besluut ingeven het om de tempel van de Heer in Jeruzalem van grote
luuster te veurzien,
28 en mi'j verheven het in de geunst van de keuning,
van zien raodgevers, en van al zien machtige hoge omkes. En omreden de Heer,
mien God, mi'j bescharmde, kreeg ik de kracht en brocht de leiders van Israël
bi'jenneer om mit mi'j vot te gaon.
Ezra 8
01 Dit is, mit vermelding van heur geslachtsregisters,
de liest van de heufden van de femilies die mit mi'j uut Babylonië vertrokken
tiedens de regering van keuning Artaxerxes.
02 De femilie van Pinechas mit Gersom, de femilie van
Itamar mit Daniël, de femilie van David mit Chattus,
03 de femilie van Sechanja, de femilie van Paros mit
Zecharja, en honderdvuuftig meensken van et manlik geslacht die mit him in de
registers inschreven weren.
04 De femilie van Pachat-Moab mit Eljoënai, de zeune
van Zerachja, en twiehonderd meensken van et manlik geslacht.
05 De femilie van Sechanja, de zeune van Jachaziël, en
driehonderd meensken van et manlik geslacht.
06 De femilie van Adin mit Ebed, de zeune van Jonatan,
en vuuftig meensken van et manlik geslacht.
07 De femilie van Elam mit Jesaja, de zeune van
Atalja, en zeuventig meensken van et manlik geslacht.
08 De femilie van Sefatja mit Zebadja, de zeune van
Michaël, en tachtig meensken van et manlik geslacht.
09 De femilie van Joab mit Obadja, de zeune van
Jechiël, en tweehonderdachttien meensken van et manlik geslacht.
10 De femilie van Selomit, de zeune van Josifja, en
honderdzestig meensken van et manlik geslacht.
11 De femilie van Bebai mit Zecharja, de zeune van
Bebai, en achtentwintig meensken van et manlik geslacht.
12 De femilie van Azgad mit Jochanan, de zeune van
Hakkatan, en honderdtiene meensken van et manlik geslacht.
13 De laesten van de femilie van Adonikam, jommes
Elifelet, Jeïel en Semaja, en zestig meensken van et manlik geslacht.
14 De femilie van Bigwai mit Utai en Zakkur, en
zeuventig meensken van et manlik geslacht.
15 Ik brocht heur bi'jenneer bi'j et kenaol dat naor
Ahawa lopt, en daor sleugen wi'j veur drie daegen oons kaamp op. Ik stelde
vaaste dat d'r onder et volk en de priesters gien Levieten weren,
16 en ontbeud daorom de leiders Eliëzer, Ariël,
Semaja, Elnatan, Jarib, Elnatan, Natan, Zecharja en Mesullam en de wieze
manluden Jojarib en Elnatan,
17 en gaf heur kommedaosie om naor Iddo te gaon, de
heufdman van et heilige plak Kasifja. Ik zee heur dat ze Iddo, zien breurs en
de tempelknechten van Kasifja vraogen mossen om oons knechten veur de tempel
van oonze God te sturen.
18 Omreden God oons bescharming beud, stuurden zi'j
oons Serebja, een verstaandig man uut de femilie van Machli, een naokommeling
van Levi, de zeune van Israël, saemen mit zien zeunen en verwaanten, achttien
manluden in tetaol.
19 Veerder nog Chasabja en Jesaja uut de femilie van
Merari, en zien breurs en heur zeunen, twintig in tetaol,
20 en twiehonderdtwintig van de tempelknechten, al
deur David en zien raodsheren an de Levieten toewezen om heur te helpen,
alleman bi'j naeme bekend en inschreven.
21 Daor bi'j et Ahawakanaal reup ik op tot een
vaasten, om oons eerzem veur oonze God op te stellen, en him te smeken om een
goeie reize veur oonszels, veur oonze kleine kiender en veur al oonze
bezittings.
22 Ik hadde mi'j d'r jommes veur schaemd om de keuning
om een escorte te vraogen van soldaoten en ruters die oons bescharmen kunnen
zollen tegen vi'janen op oonze weg, want wi'j hadden tegen de keuning zegd:
"Oonze God bödt alleman bescharming die zien hulpe vraogen, mar zien
slimme argernis treft alleman die him van him ofkeren."
23 Daorom vaastten wi'j en vreugen oonze God om hulpe,
en hi'j verheurde oons.
24 Ik keus twaelf van de belangriekste priesters uut,
en Serebja en Chasabja, saemen mit tiene van heur breurs.
25 In heur anwezigens weug ik et zulver, et goold en
et tempelgerei. Dit alles was as bi'jdrege veur de tempel van oonze God
anbeuden deur de keuning en zien raodgevers en rieksgroten, en deur alle
Israëlieten die in Babylonië weren.
26 Zo weug ik zeshonderdvuuftig telent zulver of en
gaf die an heur. En veerder honderd zulveren veurwarpen mit een weerde van twie
telenten, honderd telent goold
27 en twintig goolden schaolen mit een weerde van
duzend darieken. Bi'j slot van zaeke ok nog twie vaeten van prachtig glaanzend
broons, kostber as goold.
28 Ik zee tegen de manluden: "Jim bin an de Heer
wi'jded en disse veurwarpen bin heilig. Et zulver en et goold bin een
vri'jwillige gaove veur de Heer, de God van jim veuroolden.
29 Bewaeke dit alles hiel percies tot jim et in de
veurraodkaemers van de tempel van de Heer in Jeruzalem ofweugen hebben, in et
bi'jwezen van de heufden van de priesters en de Levieten, en van de
femilie-ooldsten van Israël."
30 De priesters en de Levieten neumen de weugen
hoeveulheden zulver en goold en de aandere veurwarpen in ontvangst, om alles
naor Jeruzalem te brengen, naor de tempel van oonze God.
31 Op de twaelfde van de eerste maond brakken we op
bi'j et Ahawakanaal, en gongen op weg naor Jeruzalem. Oonze God bescharmde
oons, en zo bleven we speerd veur vi'janen en struukrovers.
32 Doe we in Jeruzalem ankommen weren, rustten we drie
daegen.
33 Op de vierde dag wodden et zulver, et goold en de
veurwarpen weugen in de tempel van oonze God en an de priester Meremot geven,
de zeune van Uria, en an Elazar, de zeune van Pinechas, mit in heur gezelschop
de Levieten Jozabad, de zeune van Jesua, en Noadja, de zeune van Binnuï.
34 Doe wodde ieder tal en ieder gewicht ofzunderlik,
en ok et tetaole gewicht, schriftelik vaastelegd.
35 De ballings die uut de gevangenschop kwammen
dreugen offers op an de God van Israël: twaelf bollen veur hiel Israël,
zesennegentig volwassen rammen en zeuvenenzeuventig jonge rammen, en as
reinigingsoffer twaelf geitebokken. Dit alles diende tot een braandoffer veur
de Heer.
36 Zi'j gavven de bevelschriften van de keuning an
zien stadhoolders en gouverneurs in de perveensie Trans-Eufraat, en die
verlienden heur steun an et volk en an de tempel van God.
Ezra 9
De schuld van
et volk
01 Doe disse zaeken ofhaandeld weren, kwammen de
leiders naor mi'j toe en zeden: "Et volk van Israël, de priesters en de
Levieten hebben heur niet ofziedig hullen van de bevolking van et laand en ok
niet van de gruwelike gebruken van de Kanaänieten, Hethieten, Perizzieten,
Jebusieten, Ammonieten, Moabieten, Iegypteners en Amorieten.
02 Zi'j hebben jommes maegies van die volken tot vrouw
neumen, veur heurzels en veur heur zeunen, en zo hebben zi'j, et heilige zaod,
mingd mit de bevolking van et laand. De leiders en bestuurders gongen in disse
ontrouw veurop."
03 Zogauw ik dit heurde, scheurde ik mien kleren en
mien maantel. Ik trok et haor uut mien heufd en mien baord, en gong zitten,
veraldereerd.
04 En alleman die vanwegens de ontrouw van de ballings
bange weren veur de driegende woorden van de God van Israël, kwammen bi'j mi'j.
Zo bleef ik veraldereerd zitten tot et aovendoffer.
05 Doe kwam ik overaende, hul mit mien boetedoening op,
en mit scheurde kleren en maantel vul ik op mien kni'jen en spreidde mien hanen
uut naor de Heer, mien God.
06 Ik zee: "Mien God, ik schaeme mi'j, mien God,
ik bin te beschaemd om mien gezichte naor jow op te heffen, want oonze zunden
rieken tot boven oons heufd en oonze schuld is zo hoge as de hemel.
07 Vanof de daegen van oonze veuroolden tot an disse
dag biwwe slim schuldig tegenover jow, en vanwegens oonze zunden biwwe, oonze
keunings, oonze priesters, overleverd an de macht van de keunings van aandere
lanen, an geweld, an gevangenschop, an uutroepeling, en an eupelike schaande,
zoas now.
08 En toch het de Heer, oonze God, kotleden zien
medelieden toond deur een pat van oons volk ontkommen te laoten, en deur oons
een hoolvaaste te geven in zien heilige plak. Oonze God het oonze ogen
oplochten laoten en oons in oonze slavernij weer wat levensmoed geven.
09 Want wi'j bin knechten, en in oonze slavernij het
oonze God oons niet verlaoten. Hi'j het de keunings van Perzië geunstig stemd
tegenover oons, om oons weer levensmoed te geven zodat wi'j de tempel van oonze
God opriezen laoten kunnen en him uut de puunhopen opni'j opbouwen, en om veur
oons te wezen as een veilige mure in Juda en in Jeruzalem.
10 En wat, oonze God, was doe oons bescheid? Verweerloosd
hewwe jow geboden,
11 die jow oons geven hebben deur de mond van jow
knechten de profeten, die zeden: “et laand daj'm binnengaon en in bezit nemen
is een poeterig maekt laand, bezoedeld deur de bevolking van et laand mit heur
gruwelike gebruken. Zi'j hebben et mit heur poeterighied vuld, van et iene
aende tot et aandere.
12 Geef daorom jim dochters niet an heur zeunen, en
neem heur dochters niet veur jim zeunen as vrouw. Dreeg gienertied bi'j an heur
veurspoed en gelok. Dan zullen jim stark wezen en et goeie van et laand eten,
en et veur altied veur jim kiender in bezit nemen.”
13 Nao alles wat oons overkommen is vanwegens oonze
slechte daoden, vanwegens oonze grote schuld, now jow, oonze God, oons minder
straft hebben awwe verdienden en jow d'r alderdeegst veur zorgd hebben dat d'r
zoe'n protte van oons overbleven binnen –
14 zollen wi'j now opni'j jow geboden mit voeten
treden deur huweliken an te gaon mit disse volken die zokke gruwelike gebruken
kennen? Zollen jow dan niet zodaonig lelk wezen dat jow oons verdistreweren
zollen, en gieniene et overleven zol, gieniene ontkommen zol?
15 Heer, God van Israël, jow bin rechtveerdig, want
wi'j bin ontkommen, wi'j bin overbleven tot op disse dag. Schuldig stao'we hier
veur jow – hoe kuwwe jow zo onder ogen kommen?"
Ezra 10
Butenlaanse
vrouwluden mit heur kiender wegstuurd
01 En wiels Ezra biddede en schuld beleed, en him
goelend daelevalen leut veur God zien tempel, kwam d'r een slim grote kloft
meensken, Israëlitische manluden en vrouwluden en kiender om him henne staon.
Zi'j goelden pienlik.
02 Doe nam Sechanja, de zeune van Jechiël, iene van de
zeunen van Elam, et woord. Hi'j zee tegen Ezra: "Wi'j bin oonze God
ontrouw west, wi'j bin trouwd mit butenlaanse vrouwluden, ofkomstig uut de
bevolking van et laand. En toch, ondaanks dat, is d'r hope veur Israël.
03 Laot oons daoromme tegenover oonze God de
verplichting angaon dawwe al die vrouwluden en alle kiender die zi'j kregen
hebben votsturen, zoas jow, heer, oons dat anraoden, en op anraoden van heur
die ontzag hebben veur de geboden van oonze God, zodat de wet naoleefd wodt.
04 Kom overaende, Ezra, et is an jow om dit of te
haandelen. Wi'j staon aachter jow. Wees stark en doe wat!"
05 Ezra kwam in de bienen om de leiders van de
priesters, van de Levieten en van hiel Israël zweren te laoten om dat te doen
waortoe Sechanja opreup, en zi'j zweerden disse eed.
06 Ezra gong bi'j God zien tempel weg en trok him
weeromme in et vertrek van Jochanan, de zeune van Eljasib. Hi'j at gien brood
en dronk gien waeter, want hi'j rouwde om de ontrouw van de weerommekommen
ballings.
07 Et volk leut een oproep uutgaon naor alle
weerommekommen ballings in Juda en Jeruzalem om heur in Jeruzalem te
verzaemelen.
08 Op veurstel van de leiders en de ooldsten zol
alleman die niet binnen drie daegen verscheen uutsleuten wodden van de
gemienschop van de ballings, en zol zien goed verbeurdverklaord wodden.
09 Binnen drie daegen verzaemelden alle manluden van
Juda en Benjamin heur dan ok in Jeruzalem, en et hiele volk gong op et plein
veur de tempel van God zitten; ze trilden van aangst veur wat d'r gebeuren zol,
en vanwegens de stotbujjen. Et was de twintigste dag van de negende maond.
10 Ezra, de priester, gong staon en zee: "Jim bin
ontrouw west, jim bin mit butenlaanse vrouwluden trouwd en daordeur hej'm de
schuld van Israël vergroot.
11 Legge daorom een bekentenis of veur de Heer, de God
van jim veuroolden, en doe wat hi'j van jim vragt: hool jim ofziedig van de
bevolking van et laand en van butenlaanse vrouwluden."
12 De hiele gemienschop zee doe luud: "Wi'j
zullen doen wat jow oons zegd hebben.
13 Mar wi'j, et volk, wi'j bin mit een hiele protte,
en et is regentied. We kun niet lange buten staon blieven; in ien of twie
daegen hewwe disse zaeke niet ofhaandeld, want we hebben op grote schaole
fouten begaon.
14 Laot oonze leiders daoromme naemens de hiele
gemienschop optreden, en laot alleman die in iene van oonze steden mit een butenlaanse
vrouw trouwd is op een vaastestelde tied hierhenne kommen, saemen mit de
ooldsten en de rechters van die stad, zodat we de branende argernis van oonze
God hierover van oons ofkeren kunnen."
15 Alliend Jonatan, de zeune van Asaël, en Jachzeja,
de zeune van Tikwa, verzetten heur hiertegen. Zi'j wodden steund deur Mesullam
en de Leviet Sabbetai.
16 De aandere weerommekommen ballings wollen wel doen
wat veursteld was. Ezra wees een tal manluden an, per femilie een femilieheufd,
van wie de naemen opschreven wodden en die de zaek onderzuken mossen. Zi'j
hullen de eerste zitting op de eerste dag van de tiende maond,
17 en op de eerste dag van de eerste maond sleuten ze
et onderzuuk of naor alle manluden die mit butenlaanse vrouwluden trouwd weren.
18 De priesters die mit butenlaanse vrouwluden trouwd
weren, weren:
Uut de femilie van Jesua, de
zeune van Josadak, en uut die van zien breurs: Maäseja, Eliëzer, Jarib en
Gedalja.
19 Zi'j gavven heur haand d'r op dat ze heur
vrouwluden votsturen zollen, en ze offerden een ram uut heur kudde as
verbeteringsoffer veur heur schuld.
20 Uut de femilie van Immer: Chanani en Zebadja.
21 Uut de femilie van Charim: Maäseja, Elia, Semaja,
Jechiël en Uzzia.
22 Uut de femilie van Paschur: Eljoënai, Maäseja,
Jismaël, Netanel, Jozabad en Elasa.
23 Van de Levieten: Jozabad, Simi, Kelaja (beter
bekend as Kelita), Petachja, Jehuda en Eliëzer.
24 Van de tempelzangers: Eljasib.
Van de poortwaachters:
Sallum, Telem en Uri.
25 Van et volk:
Uut de femilie van Paros: Ramja, Jizzia, Malkia,
Miamin, Elazar, Malkia en Benaja.
26 Uut de femilie van Elam: Mattanja, Zecharja,
Jechiël, Abdi, Jeremot en Elia.
27 Uut de femilie van Zattu: Eljoënai, Eljasib,
Mattanja, Jeremot, Zabad en Aziza.
28 Uut de femilie van Bebai: Jochanan, Chananja,
Zabbai en Atlai.
29 Uut de femilie van Bani: Mesullam, Malluch, Adaja,
Jasub, Seal en Jeramot.
30 Uut de femilie van Pachat-Moab: Adna, Kelal,
Benaja, Maäseja, Besaleël, Binnuï en Manasse.
31 Uut de femilie van Charim: Eliëzer, Jissia, Malkia,
Semaja, Simeon,
32 Benjamin, Malluch en Semarja.
33 Uut de femilie van Chasum: Mattenai, Mattatta,
Zabad, Elifelet, Jeremai, Manasse en Simi.
34 Uut de femilie van Bani: Maädai, Amram, Uël,
35 Benaja, Bedeja, Keluhu,
36 Wanja, Meremot, Eljasib,
37 Mattanja, Mattenai, Jaäsai,
38 Bani, Binnuï, Simi,
39 Selemja, Natan, Adaja,
40 Machnadbai, Sasai, Sarai,
41 Azarel, Selemja, Semarja,
42 Sallum, Amarja en Josef.
43 Uut de femilie van Nebo: Jeïel, Mattitja, Zabad,
Zebina, Jaddai, Joël en Benaja.
44 Ieder van heur was mit een butenlaanse vrouw
trouwd, en goenend hadden bi'j die vrouw kiender kregen.