in een

Vertaeling van de Biebel (NBG 2004)

01 Hier kommen de woorden en de visioenen van Amos, een schaopefokker uut Tekoa. Hi'j profeteerde over Israël doe Uzzia in Juda regeerde en Jerobeam, de zeune van Joas, keuning was in Israël, twie jaor veur de eerdbeving.

02 Dit is wat hi'j zee. De Heer brult boven van de Sion of, hi'j gromt uut Jeruzalem, de laanderi'jen van de hedders verdreugen, de toppe van de Karmel die verdreugt hielendal.

Et vonnis van de Heer.

03 Dit zegt de Heer: Misdaod op misdaod het Damascus begaon: ze hebben een spoor van verwoesting trokken deur Gilead. Daorom za’k mien vonnis niet herroepen.

04 Ik zal et peleis van Hazaël deur vlammen verbranen; vuur zal de burchten van Benhadad verteren.

05 Ik zal de poorten van Damascus eupenbeuken, de keuning van Bikat-Awen za'k ommebrengen, en ok de heerser van Bet-Eden breng ik om et leven. Et volk van Aram gaot in ballingschop naor Kir – zegt de Heer.

06 Dit zegt de Heer: Misdaod op misdaod het Gaza begaon: ze hebben een hiel volk in ballingschop dreven en uutleverd an Edom. Daorom za'k mien vonnis niet herroepen.

07 Ik zal de muren van Gaza deur vlammen verbranen; vuur zal zien burchten verteren.

08 De keuning van Asdod za’k ommebrengen, en ok de heerser van Askelon breng ik om et leven. Ik zal mi'j tegen Ekron keren, tot de laeste man zullen de Filistijnen kepot maekt wodden – zegt God, de Heer.

09 Dit zegt de Heer: Misdaod op misdaod het Tyrus begaon: ze hebben een hiel volk as ballingen uutleverd an Edom en heur niet hullen an de overienkomst mit heur breurs. Daorom za’k mien vonnis niet herroepen.

10 Ik zal de muren van Tyrus deur vlammen verbranen; vuur zal zien burchten verteren.

11 Dit zegt de Heer: Misdaod op misdaod het Edom begaon: ze hebben heur breurs mit et zwaord aachtervolgd, zonder ok mar een betien medelieden. Heur woede was onverzaezem, ontember was heur raozerni'je. Daorom za’k mien vonnis niet herroepen.

12 Ik zal Teman deur vlammen verbranen; vuur zal de burchten van Bosra verteren.

13 Dit zegt de Heer: Misdaod op misdaod het Ammon begaon: ze hebben, doe ze heur gebied uutbreiden wollen, de zwangere vrouwluden van Gilead de boek eupensneden. Daorom za’k mien vonnis niet herroepen.

14 Ik zal de muren van Rabba deur vlammen verbranen; vuur zal zien burchten verteren. Op de dag van stried klinkt d'r soldaotegeraos en zal et stormen as in een orkaan.

15 Heur keuning gaot in ballingschop, en de leiders van zien riek gaon mit him – zegt de Heer.

Amos 02.

01 Dit zegt de Heer: Misdaod op misdaod het Moab begaon: ze hebben de bonken van de keuning van Edom verbraand om d'r kalk van te maeken. Daorom za’k mien vonnis niet herroepen.

02 Ik zal Moab deur vlammen verbranen; vuur zal de burchten van Keriot verteren. Moab zal doodgaon deur oorlogsgeweld en soldaotegeraos en onder de driegende klaanken van de ramshoorn.

03 Heur vost breng ik om et leven, en mit him za’k alle aandere leiders van dat riek ok doodmaeken – zegt de Heer.

04 Dit zegt de Heer: Misdaod op misdaod het Juda begaon: ze hebben de wetten van de Heer votsmeten en heur niet hullen an zien geboden; de valse goden waor heur veuroolden al aachteran leupen, hebben heur ok dwaelen laoten. Daorom za’k mien vonnis niet herroepen.

05 Ik zal Juda deur vlammen verbranen; vuur zal de burchten van Jeruzalem verteren.

06 Dit zegt de Heer: Misdaod op misdaod het Israël begaon – daorom za’k mien vonnis niet herroepen! Zi'j verkopen de rechtveerdigen veur zulver en de aarme meensken veur een peer sandalen.

07 Ze bin d'r op uut om de zwakken in et stof kroepen te laoten, en de machtelozen dringen ze an de kaante. Een zeune en zien vader kommen bi'j etzelde maegien en maeken zo mien heilige naeme te schaande.

08 Zi'j strekken heur naost de alters uut op kleren die ze in onderpaand hebben, en in et huus van heur God drinken ze wien die as boete ontvongen was.

09 En toch heb ik in jim belang de Amorieten uutroeid, die zo groot weren as ceders en zo stark as iekebomen: mit wottel en takke he’k ze uutroeid.

10 Ik hebbe jim uut Iegypte wegleided, ik hebbe jim veertig jaor lang in de woestijn de weg wezen, zodat jim et laand van de Amorieten in bezit nemen konnen.

11 Goenend van jim maekte ik profeet, aanderen nazireeër – zo is et toch, Israëlieten? – zegt de Heer.

12 Mar jim gavven de nazireeërs wien te drinken, en tegen de profeten hej'm zegd: "Jim meugen niet profeteren."

13 Daorom za’k de grond onder jim voeten kraeken laoten, zoas een karre vol garven kraekt in al zien voegen.

14 De rapste man vlocht dan ommenocht, de starke het niks an zien kracht, de soldaoteheld zal zien leven niet redden,

15 gien boogschutter hoolt staand, gien hadloper ontkomt, gien ruter brengt et d'r levend van of,

16 alderdeegst de dapperste man zal naekend wegvlochten moeten op die dag – zegt de Heer.

Amos 03.

01 Luuster naor de woorden die de Heer tegen jim zegt, Israëlieten, tot hiel et volk dat hi'j wegleided het uut Iegypte:

02 Uut alle volken op eerde heb ik allienig jim uutkeuzen, en daorom za’k jim veur al jim misdaoden straffen.

03 Gaon d'r ooit twie tegere op weg zonder dat ze eerst bi'j mekeer kommen binnen?

04 Brult ooit een leeuw in de struken as hi'j gien prooi het? Gromt ooit een leeuw in zien hol zonder dat hi'j wat vongen het?

05 Duukt ooit een voegel in een flapnet daele as d’r gien aas ligt? Slat ooit een klapnet dichte zonder dat d'r wat te vangen is?

06 Klinkt ooit in een stad de ramshoorn zonder dat heur inwoners bange wodden? En gebeurt d'r ooit onheil in een stad zonder toedoen van de Heer?

07 Zo dot God, de Heer, niks zonder dat hi'j zien plan onthuld het an zien knechten, de profeten.

08 Een leeuw het bruld – wie zol daor niet bange van wodden? God, de Heer, het zegd – wie zol d'r niet profeteren?

09 Dit moej'm bekendmaeken in de burchten van Asdod en in de burchten van Iegypte: "Kom naor de bargen rond Samaria om te zien hoe groot de alteraosie in die stad is, hoe arg de onderdrokking!

10 Tot rechtveerdighied bin ze daor niet in staot – zegt de Heer –, zi'j die heur burchten vullen mit onderdrokking en geweld."

11 Daorom, Samaria, zal je laand deur de vi'jaand omsingeld wodden, zullen je vestingwarken daelehaeld wodden en je burchten plunderd – zegt God, de Heer.

12 Dit zegt de Heer: Zoas een hedder uut de bek van een leeuw niet meer as een peer bonken wet te redden of een stokkien van et oor, zo zal d'r ok gieniene redded wodden van de Israëlieten, die in Samaria mar op heur bedden ommehangen en aachterover leunen op heur divans.

13 Luuster naor disse woorden en waorschouw de naokommelingen van Jakob – zegt God, de Heer, de God van de hemelse machten:

14 De dag komt dat ik Israël veur zien misdaoden straffen zal. Mien straf zal dan de alters van Betel treffen, de horens van de alters zullen ofhakt wodden en op de grond valen.

15 Dan za’k de winter- en de zoemerverblieven verwoesten, de elpenbienen peleizen zullen verleuren gaon, en een protte huzen zullen kepot maekt wodden – zegt de Heer.

Amos 04.

01 Vrouwluden, luuster naor disse woorden! Jim bin as vette koenen die de barg van Samaria kaelvreten: jim onderdrokken de zwakken, mishaandelen de aarme meensken en zeggen tegen jim kerels: "Breng oons es wat te drinken!"

02 God, de Heer, zweert bi'j al zien heilighied: Weet dat de daegen niet veer meer weg binnen, dat jim as vissen mit hengels ophaeld wodden, en wie d'r dan nog overblieven mit haoken.

03 Iéne veur iéne wodden jim deur de gatten in de stadsmure naor buten dreven en naor Harmon votslingerd – zegt de Heer.

04 Kom naor Betel en zundig daor mar, kom naor Gilgal en zundig daor nog mar meer. Breng daor morgens je offerdieren, de ankem dag je tienden.

05 Breng d'r een daankoffer mit desemde bolle, en beroem je op je vri'jwillige gaoven – want zo willen jim et toch graeg, Israëlieten? – zegt God, de Heer.

06 Ik was et die jim in elke stad hongerlieden leut en maekte dat d'r in gien inkeld dörp bolle meer te kriegen was: mar jim bin niet naor mi'j weerommekommen – zegt de Heer.

07 Ik was et die jim drie maonden veur de oogst et regenwaeter onthullen hebbe. Op de iene stad leut ik et regenen, op de aandere leut ik et niet regenen; op et iene veld regende et, en et veld waorop et niet regende verschruuide.

08 Twie, drie steden strompelden naor een aandere stad om waeter te drinken, en heur dust wodde niet lest: mar jim bin niet naor mi'j teroggekeerd – zegt de Heer.

09 Ik trof jim mit korenbraand en meeldauw; sprinkhaenen vratten jim tunen en wiengaorden kael, en alle viegen en olijven: mar jim bin niet naor mi'j teroggekeerd – zegt de Heer.

10 Ik stuurde de pest op jim of, zoas ik die ooit op Iegypte ofstuurde; ik brocht jim soldaoten omme liekas de peerden die jim mitneumen hadden, zodat jim de staank van jim eigen legerkamp reuken: mar jim bin niet naor mi'j teroggekeerd – zegt de Heer.

11 Ik maekte jim hielendal kepot, krekliek zoas ik Sodom en Gomorra vernietigd hebbe; jim wodden as een stok zwatblaekerd hoolt dat uut de vlammen weghaeld is: mar jim bin niet naor mi'j teroggekeerd – zegt de Heer.

12 Daorom za’k tegen jim optreden, Israël. Maek je klaor veur de komst van je God, Israël, want ik bin et die tegen jim optreden zal.

13 De maeker van de bargen en de wiend, hi'j die de meenske zien plan onthult, hi'j die et morgenlochten verduustert, hi'j die zien weg vint over de bargtoppen – zien naeme is Heer, God van de hemelse machten.

Amos 05.

01 Luuster naor mien woorden, Israël, luuster naor mien klaegzang over jim:

02 Zi'j is valen, vrouwe Israël, zi'j zal niet meer overaende kommen, stil verlaoten ligt ze op heur laand, en d'r is gieniene die heur op de bienen helpt.

03 Dit zegt God, de Heer, over Israël: De stad die mit duzend man te striede trekt hoolt mar honderd over; de stad die mit honderd man d’r op uut trekt mar tiene.

04 Dit zegt de Heer tegen Israël: Zuuk mi'j en leef!

05 Gao niet naor Betel, kom niet in Gilgal, trek niet naor Berseba; Gilgal gaot in ballingschop en Betel wodt een plak van onheil.

06 Zuuk de Heer en leef. Aanders zal hi'j as een vuur woeden in et laand van Jozef, de vlammen zullen Betel verteren, en d'r zal gieniene wezen om et vuur te blussen.

07 Want jim veraanderen et recht op alsem en vertrappen de gerechtighied.

08 De maeker van de Plejaden en van Orion, hi'j die de diepe duusternis in morgenlocht veraandert en de dag tot naacht verduustert, hi'j die et waeter van de zee bi'j mekeer ropt en et uutstot over de eerde – zien naeme is Heer.

09 Mit zien verwoestende bliksem treft hi'j de starken, heur vestings wodden vernietigd.

10 Jim hebben een hekel an meensken die in de poort et recht verdedigen, jim hebben een hekel an meensken die de waorhied zeggen.

11 Jim vertrappen de zwakken en eisen een pat van heur koren op. Daorom: huzen van stiender hej’m bouwd, mar jim zullen d'r niet in wonen; prachtige wiengaorden hebben jim plaant, mar jim zullen d'r gien wien van drinken.

12 Want ik weet hoevule misdaoden jim begaon hebben, hoevule zunde jim daon hebben: jim keren jim tegen de onschuldigen, jim kriegen steekpennings, jim ontnemen de aarme meensken in de poort heur rechten.

13 Wie verstaandig is hoolt him stille in disse tied, want et is gien beste tied.

14 Zuuk et goeie, niet et kwaoie. Dan zuj’m leven, en dan zal de Heer, de God van de hemelse machten, bi’j jim wezen, zoas jim de hieltied zeggen.

15 Heb een hekel an et kwaoie, heb et goeie lief en zorg dat d'r recht daon wodt in de poort. Altemet zal dan de Heer, de God van de hemelse machten, genade schinken an wie d'r overbleven binnen van Jozef zien volk.

16 Daorom – zegt de Heer, de God van de hemelse machten, de Heer – zal d'r op alle pleinen rouwd wodden, in alle straoten jammerd; boeren wodden opreupen om te weeklaegen, klaegzangers om te rouwen,

17 en ok in alle wiengaorden zal d'r rouwd wodden wanneer ikzels in jim midden rondgao – zegt de Heer.

18 Wee degenen die verlangen naor de dag van de Heer! Wat zal hi'j jim brengen, de dag van de Heer? Duusternis, gien locht.

19 Zoas wanneer iene die wegvlocht veur een leeuw, anvalen wodt deur een beer, en dan, as hi'j een huus ingaot en mit zien haand tegen de mure leunt, beten wodt deur een slange.

20 De dag van de Heer zal pikkedonker wezen, gien locht zal d’r wezen; eerdeduuster, zonder glaans.

21 Ik heb een hekel an jim feesten, ik wies ze of, jim geerkomsten verdreeg ik niet.

22 Ik schep gien behaegen in de brand- en graonoffers die jim mi'j brengen; de vetmeste beesten van jim vredeoffers keur ik gien blik weerdig.

23 Bespeer mi'j et geluud van jim vassies; de klaank van jim harpen wi'k niet heuren.

24 Laot liever et recht stromen as waeter, en de gerechtighied as een altied deurstromende laek.

25 Israëlieten, hebben jim mi'j die veertig jaor in de woestijn ooit zokke offers en giften brocht?

26 Now zullen jim de bielden die jim zels maekt hebben – je keuning Sakkut en je steernegod Kewan – mit jim mit dregen moeten,

27 want ik zal jim in ballingschop voeren, tot veurbi'j Damascus. Dit zegt de Heer, zien naeme is: God van de hemelse machten.

Amos 06.

01 Wee jim, zorgelozen in Sion, argelozen op de barg van Samaria, leiders van dit uutverkoren volk, tot wie de Israëlieten heur keren!

02 Trek naor Kalne en bekiek et goed; gao van daor naor et grote Hamat, gao dan weeromme naor Gat waor de Filistijnen wonen – bin jim starker as die keuninkrieken of is heur gebied krek groter dan dat van jim?

03 Wee jim die daenken dat de onheilsdag nog veer vot is en die zels de heerschoppi'je van et geweld dichterbi'j brengen.

04 Jim liggen mar op je ivoren bedden, hangen mar op je divans, eten laomer uut de kudde en kalver uut de stal.

05 Luudkeels zingen jim bi'j de harp, en jim daenken te speulen as David zels.

06 Uut grote schaolen drinken jim wien, en mit de beste eulie wrieven jim jim in, mar jim lieden d'r niet onder dat Jozef zien volk votkwient.

07 Daorom gaon jim now as eersten in ballingschop; et gefeest en geluier is veurbi'j.

08 Dit zweert God, de Heer, bi'j himzels – zegt de Heer, de God van de hemelse machten: Ik heb een hekel an de hoogmoed van Jakob zien volk, ik heb een ofkeer van zien burchten. Daorom za’k Samaria en al zien inwoners an de vi'jand uutleveren,

09 en as d'r in ién huus nog tien meensken overblieven, zullen zi'j ommekommen.

10 As iene dan et lichem van zien femilie uut dat huus wegdreegt om et te verbranen, zal hi'j vraogen an degene die nog binnen is: "Is daor bi'j jow nog iene over?" "Nee," zal disse dan zeggen, "mar wees toch stille, en nuum de naeme van de Here niet!"

11 De Heer hoeft ommes mar ien bevel te geven, of alle huzen, groot en klein, zullen tot puun sleugen wodden.

12 Vliegen de peerden ooit over rotsen of wodt daor mit runder ploegd? En toch veraanderen jim et recht in vergif, de vruchten van de gerechtighied in alsem.

13 Jim verheugen jim over de verovering van Lo-Debar, en jim zeggen daj’m op eigen kracht Karnaïm inneumen hebben.

14 Mar ik zal een volk op jim afsturen, Israëlieten, – zegt de Heer, de God van de hemelse machten – dat jim in hiel et laand onderdrokken zal, vanof Lebo-Hamat tot an de dreuge revierbedding van de Araba.

Amos 07.

Visioenen.

01 Dit het God, de Heer, mi'j zien laoten: Ik zag hoe hi'j een zwaarm sprinkhaenen maekte krek doe et naogrös opkwam. (dat is et grös dat opkomt naodat d'r veur de keuning al mi'jd is.)

02 En doe de sprinkhaenen ok et laeste gruun van et laand wegvratten, zee ik: "God, mien Heer, vergeef et volk van Jakob toch, hoe zol et dit overleven kunnen? Et is zo klein!"

03 Doe kreeg de Heer medelieden: "Et zal niet gebeuren," zegt de Heer.

04 Dit het God, de Heer, mi'j zien laoten: Ik zag hoe God, de Heer, bevel gaf om et laand mit vuur te straffen. De vlammen verteerden et waeter in de diepte, en doe ze over et laand sleugen

05 zee ik: "God, mien Heer, ik vraoge jow: hool hiermit op! Hoe zol et volk van Jakob dit overleven kunnen? Et is zo klein!"

06 Doe kreeg de Heer medelieden: "Ok dit zal niet gebeuren," zee God, de Heer.

07 Dit het hi'j mi'j zien laoten: Ik zag hoe de Heer op een loden mure ston mit een loden ding in zien haand.

08 En de Heer vreug mi'j: "Wat ziej’, Amos?" Ik zee doe: "Lood." Doe zee de Heer: "Een loden last za’k mien volk Israël opleggen, ik zal et niet langer speren.

09 De offerhoogten van Isaak zien volk zullen verwoest wodden, de heiligdommen van Israël zullen in puun valen, en ik zal et huus van Jerobeam mit et zwaord treffen."

10 Doe stuurde Amasja, de priester van Betel, disse bosschop an Jerobeam, de keuning van Israël: "Amos hitst de Israëlieten tegen jow op; et volk zal gien weerstaand an zien woorden bieden kunnen.

11 Hi'j zegt dat jow, Jerobeam, deur et zwaord starven zullen en dat Israël van zien grond verbannen wodden zal."

12 Doe zee hi'j tegen Amos: "Ziener, gao vot! Gao naor Juda en verdien daor je brood, gao daor mar profeteren.

13 Hier in Betel maj' niet langer profeteren, want dit is et heiligdom van de keuning, de tempel van et keuninkriek."

14 Mar Amos zee doe tegen Amasja: "Ik bin hielendal gien profeet, en ok gien profetenleerling. Ik bin veeboer en viegeteler.

15 Mar de Heer het mi'j van aachter mien schaopen weghaeld, en et is de Heer die tegen mi'j zegd het: "Gao naor mien volk Israël en profeteer daor."

16 Luuster daorom naor de woorden van de Heer. Ie zeggen dat ik niet profeteren mag in Israël, gien profeet wezen mag zien veur Isaak zien volk.

17 Daorom – zegt de Heer – zal je vrouw in de stad as hoer leven moeten, zullen je zeunen en dochters ommekommen deur et zwaord en zal je laand in stokken verpat wodden. Ie zels zullen op onzuvere grond doodgaon en Israël zal van zien grond wegjaegd wodden."

Amos 08.

01 Dit het God, de Heer, mi'j zien laoten: Ik zag een körf mit riepe vruchten.

02 En de Heer vreug mi'j: "Wat ziej’, Amos?" Ik zee doe: "Een körf mit riepe vruchten." Doe zee de Heer: "Dommiet zal de tied riepe wezen, ik zal mien volk Israël niet langer speren.

03 Op die dag zal d'r in de tempel allienig nog gejammer klinken," – zegt God, de Heer – "rondomme liggen lieken, rondomme bin ze daelegooid. – Wees stille!"

04 Jim die de aarme meensken kwaod doen willen en uut binnen op de ondergaank van de machtelozen van dit laand, luuster!

05 Jim zeggen: "Wanneer is de dag van de ni'jemaone veurbi'j, zodawwe weer koren verkopen kunnen? Wanneer de sabbat, zodawwe weer graon verhaandelen kunnen?" Jim maeken de efa kleinder, jim maeken de sjekel zwaorder en jim knoeien mit de weegschaole.

06 Jim kopen de zwakken veur een haandvol zulver, de aarme meensken veur een peer sandalen, en jim zeggen: "Ok et kaf verkopen we as graon!"

07 Nooit – en dit zweert de Heer op wie Jakob zien volk heur veurstaon lat – za’k iene van jim daoden vergeten.

08 Daorom zal de eerde beven, en al wat d'r op leeft in rouw huld gaon. Zi'j zal in heur gehiel omhogens kommen, zoas de Nijl; zi'j zal kolken en weer wegzinken, zoas de revier van Iegypte.

09 Op die dag – zegt God, de Heer – za’k op et middagure de zunne ondergaon laoten, en et laand verduusteren op klaorlochte dag.

10 Ik zal jim feesten veraanderen in rouw, jim vassies in klaegzangen; jim in rouwkleren lopen laoten, en jim heufden scheer ik kael. Jim zullen treuren as om de dood van een ienig kiend, en die dag zal opholen mit een bittere smaek.

11 Weet dat de daegen kommen – zegt God, de Heer – dat ik et laand hongeren laoten zal. Et zal gien honger wezen naor bolle of dust naor waeter, mar honger naor de woorden van de Heer.

12 Et volk zal zwalken van de iene zee naor de aandere, en dwaelen van et noorden naor et oosten om de woorden van de Heer te zuken, mar zi'j zullen die niet vienen.

13 Starke jonge vrouwluden en manluden zullen op die dag van de dust omme kommen.

14 Zi'j die zweren bi'j de zunde van Samaria, bi'j de god van Dan en de pelgrimstocht naor Berseba, zi'j zullen valen en niet meer overaende kommen.

Amos 09.

01 Ik zag de Heer bi'j et alter staon, en hi'j zee: "Slao op et kapiteel, laot de drumpels dreunen! Slao de stiender stokkend op de heufden; wie d'r dan nog overblieven, za’k zels doodmaeken mit et zwaord. Gieniene die d’r vandeur gaot zal ontkommen.

02 Al kroepen ze de onderwereld in, ik breng ze naor boven; al klimmen ze de hemel in, ik hael ze naor beneden.

03 Al verschoelen ze heur op de toppe van de Karmel, ik zal ze weten te vienen en ze daor weghaelen; al perberen ze heur veur mi'j vot te stoppen op de bojem van de zee, ik zal de slange daor bevelen om heur te bieten.

04 Al wodden ze deur heur vi'janen gevangen neumen en wegvoerd, dan nog geef ik et zwaord bevel om heur dood te maeken. Ik richt mien ogen op heur te kwaode, niet te goede."

05 De Heer, de God van de hemelse machten, raekt de eerde an en zi'j beeft, al heur bewoners gaon in rouw huld. Zi'j komt omhogens as de Nijl, zinkt weg as de revier van Iegypte.

06 Hi'j die in de hemel zien verheven verblief bouwd het, hi'j die et hemelgewulf op de eerde rusten lat, hi'j die et waeter van de zee bi'jmekeer roept en et uutstot over de eerde – zien naeme is Heer.

07 Bin jim veur mi'j soms meer as de Nubiërs, Israël? – zegt de Heer. Ik heb jim uut Iegypte wegleided, mar ok de Filistijnen uut Kreta en de Arameeërs uut Kir.

08 De ogen van God, de Heer, kieken naor dit zundige keuninkriek. Ik zal et van de eerdbojem wegvaegen, mar ik zal niet et hiele volk van Jakob vernietigen – zegt de Heer.

09 Op mien bevel zullen de Israëlieten deur alle volken henne schudded wodden, as in een zi'je waor niet ien stientien deurhenne vaalt!

10 Alle zundige meensken in mien volk zullen omme kommen deur et zwaord, ok al zeggen ze: "Jow zorgen d'r wel veur dat et kwaod oons niet treft, dat et veer van oons weg blift."

11 Dan za’k et vervalen huus van David opni'j bouwen, ik zal de muren maeken en opbouwen wat daelehaeld is, ik zal et in zien vroegere luuster herstellen.

12 Dan zal Israël in bezit nemen van wat d'r nog rest van Edom en van alle volken die mi'j iens toeheurden – zegt de Heer, die dit alles doen zal.

13 Dan kommen de daegen – zegt de Heer – dat de ploeger de mi'jer tegenkomt en de droevetreder de zi'jer, dat de bargen druppen van de wien en alle heuvels golven van et koren.

14 Ik zal et lot van mien volk Israël de goeie kaante op keren. Zi'j zullen heur verwoeste steden opni'j bouwen en d'r in wonen, ze zullen wiengaorden plaanten en de wien d'r van drinken, ze zullen tunen anleggen en de vruchten d'r van eten.

15 Ik zal heur teroggeplaanten in heur grond, en zi'j zullen niet meer wegrokt wodden uut et laand dat ik heur geven heb – zegt de Heer, jim God.