2 Timoteüs 1.

De twiede brief an Timoteüs.

01 Van Paulus, apostel van Christus Jezus deur de wil van God, stuurd om de belofte uut te dregen van et leven in ienhied mit Christus Jezus.

02 An Timoteüs, mien geliefd kiend. Genaode, baarmhattighied en vrede van God, de Heit, en van Christus Jezus, oonze Heer!

Hool vaaste an et geleuf.

03 Iederkeer as ik je in mien gebeden nume, iedere dag en iedere naacht, daank ik God, die ik krek as mien veuroolden mit een zuver geweten diene.

04 As ik an je traonen daenke, gunter ik d'r naor om je weeromme te zien; dat zal mi'j mit bliedschop vervullen.

05 Ik daenke pattietoeren an et oprechte geleuf dat je grootmoeder Loïs en je moeke Eunike hadden en dat – daorvan bin 'k wis van – ie now ok hebben.

06 Daorom vieter ik je an om et vuur branende te holen van de gaove die God je schonk doe ik je de hanen oplegde.

07 God het oons niet een geest van lafhattighied geven, mar een geest van kracht, liefde en bezunnenhied.

08 Schaeme je d'r dan ok niet veur om van oonze Heer te getugen; schaeme je ok niet veur mi'j, die omwille van him gevangen zit, mar pat in et lieden veur et evangelie, mit de kracht die God je geft.

09 Hi'j het oons redded en oons reupen tot een heilige opdracht, niet op grond van oonze daoden, mar omreden hi'j daortoe uut genaode besleuten hadde. Disse genaode was oons al veur alle tieden geven in Christus Jezus,

10 mar now is ze bekend wodden deurdat oonze redder Christus Jezus verschenen is, die de dood vernietigd het en onvergaankelik leven oplochten laoten het deur et evangelie.

11 Van dit evangelie bin ik verkondiger, apostel en lerer;

12 daorom moet ik dit alles ondergaon. Mar ik schaeme mi'j niet, want ik weet in wie ik mien vertrouwen steld hebbe en bin d'r wis van dat hi'j bi'j machte is om te beweren wat mi'j toevertrouwd is, tot de grote dag komt.

13 Neem as richtsnoer de heilzeme woorden die ie van mi'j heurd hebben, hool vaaste an et geleuf en an de liefde die in Christus Jezus binnen.

14 Beweer deur de heilige Geest, die in oons woont, et goeie dat je toevertrouwd is.

15 Zoas ie weten het iederiene in Asia him van mi'j ofkeerd, ok Fygelus en Hermogenes.

16 Mag de Heer heur ontfarmen over de huusgenoten van Onesiforus, want hi'j het mi'j pattietoeren opgemonterd en him niet veur mien gevangenschop schaemd.

17 Doe hi'j in Rome kwam, is hi'j drekt naor mi'j op zuuk gaon, en hi'j het mi'j ok vunnen.

18 Mag de Heer him op de grote dag over him ontfarmen. En welke diensten hi'j in Efeze verliend het, weet ie zels et beste.

2 Timoteüs 2.

Pat in et lieden.

01 Mien kiend, wees stark deur de genaode van Christus Jezus.

02 Geef waj' in anwezigens van pattie van mi'j heurd hebben, deur an betrouwbere meensken die geschikt binnen om aanderen te onderwiezen.

03 Pat in et lieden as een goed soldaot van Christus Jezus.

04 Iene die in et leger is, lat him niet ofleiden deur et leven daorbuten, want zien bevelhebber moet tevreden over him wezen.

05 Een atleet wodt niet lauwerd as hi'j him niet an de regels hoolt.

06 De boer die et zwaore wark dot, het as eerste recht op de oogst.

07 Daenk nao over wat ik je zegd hebbe; de Heer zal d'r veur zorgen daj' dit alles ok begriepen.

08 Hool Jezus Christus in gedaachten, uut et naogeslaacht van David, die uut de dood opwekt is. Dit he'k verkondigd,

09 daorom he'k een protte te verneren en bin ik alderdeegst as een misdaodiger gevangenzet. Mar et woord van God lat him niet gevangenzetten;

10 daorom verdreeg ik alles omwille van de uutverkorenen, zodat zi'j ok in Christus Jezus redded wodden en iewige luuster kriegen.

11 Disse bosschop is betrouwber:

As wi'j mit him wegraekt binnen,

zuwwe ok mit him leven;

12 as wi'j volhadden,

zuwwe ok mit him heersen;

as wi'j him miskennen,

zal hi'j oons ok miskennen;

13 as wi'j him ontrouw binnnen,

blift hi'j oons trouw,

want himzels miskennen kan hi'j niet.

Anwiezings veur de ommegaank mit dwaellerers.

14 Blief dit de geleuvigen veurholen en roep heur tegenover van God dringend op om niet te redetwisten. Dat het gien inkeld nut en leidet d'r allienig mar toe dat de toeheurders verdistreweren.

15 Span je in om veur God te staon as iene die betrouwber is. Zorg daj' je niet veur je wark hoeven te schaemen en zeg regelrecht de waorhied.

16 Luuster niet naor onnut en leeg gezwets, want et voert de hieltied veerder van God vot.

17 Wat dwaellerers vertellen, woekert deur as een gezwöl. Ok Hymeneüs en Filetus

18 bin van de waorhied ofdwaeld deur te beweren dat de opstaanding al west het. Daormit verzwakken zi'j et geleuf van aanderen.

19 Mar et follement dat God legd het, ligt onwrikber vaaste en dreegt et opschrift: "De Heer wet wie him toebeheuren" en "Laot iederiene die de naeme van de Heer nuumt, onrecht uut de weg gaon".

20 In een groot huus bin d'r niet allienig veurwarpen van goold en zulver, mar ok van hoolt en diggelgoed. De eerste bin veur biezundere gelegenheden, de laeste veur daegeliks gebruuk.

21 As iene him van alle kwaod schone maekt het, wodt hi'j een biezunder en heiligd veurwarp, dat zien eigener een protte diensten bewiezen kan en geschikt is veur ieder goed doel.

22 Gao de begeerten van de jeugd uut de weg, streef naor rechtveerdighied, geleuf, liefde en vrede mit heur die de Heer mit een zuver hatte anroepen.

23 Verwarp dwaeze en onzinnige spekelaosies; ie weten dat ze tot ruzie leiden.

24 Een knecht van de Heer moet gien ruzie maeken, mar veur iederiene vrundelik wezen; hi'j moet een goeie lerer wezen en een verdreegzem meenske,

25 en zien tegenstaanders zaachtmoedig terechtewiezen. Dan brengt de Heer heur altemet tot inkeer, zodat zi'j de waorhied kennen leren

26 en ontkommen uut de valstrik van de duvel, die heur levend gevangen neumen het en heur dwingt om zien wil te doen.

2 Timoteüs 3.

01 Weet dat de laeste daegen zwaor wezen zullen.

02 De meensken zullen egoïstisch wezen, geldzuchtig, zelfingeneumen en eigenwies. Ze zullen God lasteren, gien ontzag tonen veur heur oolden, ondaankber wezen en niks heilig achten.

03 Zi'j zullen hatteloos wezen, onverzoenlik, lasterziek, onbeheerst en wried. Zi'j zullen et goeie haten

04 en onbetrouwber, roekeloos en verbliend wezen. Et genot zullen ze meer liefhebben as God,

05 ze zullen de schien van vroomhied opholen, mar de kracht d'r van miskennen. Keer je of van zokke meensken.

06 Goenend van heur dringen heur op an hiele femilies en kriegen dan vrouwluden in heur macht die mit zunde belaeden binnen en deur verschillende begeerten dreven wodden,

07 die alsmar willen leren mar in gienertied in staot wezen zullen om de waorhied te kennen.

08 Zoas Jannes en Jambres heur tegen Mozes verzet hebben, zo verzetten disse dwaellerers heur tegen de waorhied. Et bin meensken mit een zieke geest en een onbetrouwber geleuf.

09 Mar zi'j zullen niet vule berieken, want iederiene zal heur dwaeshied al vlogge deurzien, zoas ok mit Jannes en Jambres gebeurde.

10 Ie daorintegen bin mi'j trouw volgd in mien leer, mien levenswieze, streven, geleuf, geduld, liefde, volhadding,

11 en ie hebben etzelde lieden en dezelde vervolgings ondergaon die mi'j in Antiochië, Ikonium en Lystra troffen hebben. Ik hebbe ze allemaole deurstaon, de Heer het mi'j de hieltied weer redded.

12 Iederiene die vroom en in ienhied mit Christus Jezus leven willen, zullen vervolgd wodden.

13 Slechte meensken en oplichters zullen van kwaod tot arger vervalen; et bin bedriegers die zels bedreugen wodden.

14 Mar ie, blief bi'j alles waj' leerd hebben en mit overtuging anneumen hebben. Ie weten wie je lerers weren

15 en bin van kiendsbien of vertrouwd mit de heilige geschriften die je wieshied geven kunnen, zodat ie redded wodden deur et geleuf in Christus Jezus.

16 Iedere schrifttekst is deur God inspireerd en kan bruukt wodden om les te geven, om dwaelings en fouten te weerleggen, en om op te voeden tot een deugdzem leven,

17 zodat een knecht van God veur zien opdracht berekend is en veur ieder goed doel hielendal toerust is.

2 Timoteüs 4.

01 Ik roepe je dringend op, om tegenover God en Christus Jezus, die zal oordielen over de levenden en de dooien, ik bezweer je bi'j zien komst en heerschoppi'je:

02 Dreeg de bosschop uut, blief andringen, of et now uutkomt of niet, wies terechte, straf en vermaan mit alle geduld dat et lesgeven vereist.

03 Want d'r komt een tied dat de meensken de heilzeme leer niet meer verdregen, mar lerers om heur henne verzaemelen die an heur verlangsten antegen kommen en heur naor de mond praoten.

04 Zi'j zullen niet meer naor de waorhied luusteren, mar naor verzinsels.

05 Mar ie moe'n in alles nochteren wezen, je lieden anveerden, je wark as verkondiger van et evangelie doen, je dienende opdracht vervullen.

06 Mien bloed wodt al as een offer uutgeuten, et mement waorop ik hennegao komt dichtebi'j.

07 Mar ik hebbe de goeie stried streden, de wedloop an 't aende brocht, et geleuf beholen.

08 Now waacht mi'j de kraanze van de gerechtighied die de Heer, de rechtveerdige rechter, an mi'j geven zal op de grote dag; en niet allienig an mi'j, mar an iederiene die naor zien komst uutzien hebben.

Laeste anwiezings.

09 Kom zo vlogge meugelik naor mi'j toe,

10 want Demas is bi'j mi'j votgaon; hi'j het disse wereld lief kregen en is naor Tessalonica vertrokken. Crescens is naor Galatië gaon, Titus naor Dalmatië.

11 Allienig Lucas is bi'j mi'j bleven. Hael Marcus op en neem him mit je mit, want hi'j kan mi'j goeie diensten bewiezen.

12 Tychikus he'k naor Efeze stuurd.

13 Aj' kommen, neem dan de maantel mit die ik in Troas bi'j Karpus liggen laoten hebbe, en ok de boeken, veural die van perkament.

14 Alexander, de keupersmid, het mi'j een protte kwaod daon; de Heer zal him zien verdiende loon geven.

15 Ok ie moe'n veur him oppassen, hi'j het oonze verkondiging stark tegenwarkt.

16 Bi'j mien eerste verdediging het gieniene mi'j hulpen, zi'j hebben mi'j allemaole in de steek laoten. Mag et heur niet anrekend wodden.

17 Mar de Heer het mi'j hulpen en mi'j kracht geven, zodat ik de verkondiging tot een goed aende brocht hebbe en alle volken de bosschop heurd hebben. Ik bin redded uut de bek van de leeuw.

18 De Heer zal mi'j van alle kwaod redden en mi'j veilig naor zien hemels keuninkriek brengen. Him komt de ere toe tot in alle iewighied. Amen.

19 Groet Prisca en Aquila, en de huusgenoten van Onesiforus.

20 Erastus is in Korinte bleven, Trofimus he'k ziek in Milete aachterlaoten.

21 Perbeer veur de winter te kommen. Eubulus, Pudens, Linus, Claudia en alle aandere breurs en zusters laoten je groeten.

22 De Heer is mit je. Genaode is mit jim.