2 Tessalonicenzen
in een
Stellingwarver vertaeling
De tweede brief aan de gemeente in Tessalonica, de hoofdstad van de Romeinse provincie Mecedonië, staat op naam van de apostel Paulus, die al eerder een brief aan die gemeente gestuurd heeft (1 Tessalonicenzen).
Deze brief vertoont enige verschillen met de eerste brief. Hoewel er veel zinsneden uit de eerste brief gebruikt worden, is er ook een aantal opvallende verschillen: 1 Tessalonicenzen is veel warmer van toon, 2 Tessalonicenzen vertoont meer de stijl van een traktaat; in 1 Tessalonicenzen wordt met de spoedige komst van Christus rekening gehouden, terwijl in 2 Tessalonicenzen met enig uitstel wordt gerekend. Daarom betaan er over de tweede brief twee theoriën.
De eerste is dat deze brief net als 1 Tessalonicenzen door Paulus zelf is geschreven, maar later, aan het eind van zijn leven. De tweede boodschap van zijn eerste brief, dat Christus spoedig zal komen, heeft inmiddels voor zoveel onrust in de gemeente gezorgd dat veel leden hun dagelijks werk beginnen te verwaarlozen. Paulus roept op tot rust en kalmte en spoort de lezers aan om hun taken weer op te nemen. Hij brengt bovendien een corectie aan op zijn eerste brief door erop te wijzen dat, voordat Christus komt, er eerst nog een moeilijke tijd moet aanbreken.
Volgens de tweede theorie is de brief niet door Pualus zelf geschreven, maar door iemand anders, aan het einde van de eerste eeuw. Inmiddels zijn de gemeenten gaan twijfelen aan de komst van Christus. De auteur, die onder de naam van Paulus schrijft maar over wie verder niets bekend is, wil deze twijfel wegnemen, en legt uit dat Christus wel zal komen, maar pas na een periode van verwarring en ellende.
De brief begint met een korte dankbetuiging. Direct daarna wordt de komst van Christus beschreven en het oordeel dat daarmee zal samenvallen. De reden van het uitstel van Christus' komst wordt in hoofdstuk 2 gegeven en in hoofdstuk 3 worden diegenen die hun werk verwaarlozen tot de orde geroepen.
Vertaeling van de Biebel (NBG 2004)
deur Piet Bult uut Ni’jberkoop
2 Tessalonicenzen 1.
De twiede brief an de Tessalonicenzen.
01 Van Paulus, Silvanus en Timoteüs. An de gemiente in Tessalonica, die toeheurt an God, oonze Heit, en de Heer Jezus Christus.
02 Genaode is mit jim en vrede van God, oonze Heit, en de Heer Jezus Christus.
Lieden veur et keuninkriek van God.
03 Breurs en zusters, wi'j moe'n God de hieltied veur jim daanken. Et past oons om dit te doen, omreden jim geleuf stark gruuit en jim liefde veur mekeer groter wodt.
04 Wi'j praoten dan ok in de gemienten van God vol trots over jim staandvaastighied en trouw onder de vervolgings en onderdrokking die jim deurstaon moeten.
05 Zi'j bin et bewies dat God rechtveerdig oordielt deur jim zien keuninkriek, waorveur jim now lieden, weerdig te achten.
06 God is inderdaod rechtveerdig: hi'j zal jim onderdrokkers straffen mit onderdrokking
07-08 en jim, die now onderdrokt wodden, saemen mit oons van alle last vri'j te maeken as Jezus, de Heer, vanuut de hemel komt. Dan komt hi'j in een vlammend vuur en omringd deur engels, deur wie hi'j zien macht manifesteert; dan straft hi'j heur die God niet erkennen en et evangelie van oonze Heer Jezus niet geheurzemen.
09 Zi'j zullen veur iewig verstoten wodden, veer van de Heer en van zien kracht en majesteit.
10 Op die dag komt hi'j om prezen te wodden deur iederiene die van him is, om eerd te wodden deur iederiene die tot geleuf kommen binnen – ok deur jim, want jim hebben oonze getugenis anneumen.
11 Daorom bidden wi'j altied dat oonze God jim disse roeping in ere holen lat, dat hi'j jim deur zien kracht de vaaste wil geft om et goeie te doen en jim deur jim geleuf al et meugelike tot staand brengen lat.
12 Dan zal deur de genaode van oonze God en van de Heer Jezus Christus de naeme van oonze Heer Jezus deur jim prezen wodden, en jim deur him.
2 Tessalonicenzen 2.
Wat veurofgaot an de komst van de Heer.
01 Breurs en zusters, over de komst van oonze Heer Jezus Christus en et tiedstip waorop we mit him verienigd wodden, zeggen we jim:
02 verlies jim verstaand drekt niet en raek niet in paniek as een profetie, een uutspraoke of een brief die deur oons schreven wezen zol, et veurstelt asof de dag van de Heer op et punt stiet te kommen.
03 Laot jim deur gieniene misleiden, op gien inkelde meniere. De dag van de Heer komt niet veurdat een hieleboel heur van et geleuf ofkeerd hebben en de wetteloze meenske verschenen is, hi'j die verleuren gaon zal.
04 Hi'j zal alles wat goddelik en heilig is bestrieden en him d'r boven verheffen, om in God zien tempel zitten te gaon op de troon en him veur te doen as God zels.
05 Herinneren jim jim niet dat ik jim dit al vaeker zegd hebbe doe ik bi'j jim was?
06 Dan weten jim ok wat him nog tegenhoolt en dat hi'j eerst kommen zal op de veur him vaastestelde tied.
07 Hoewel in et verburgene de wettelooshied now al warkzem is, moet eerst degene die him tegenholen verdwienen.
08 Eerst dan komt hi'j – en dan zal de Heer Jezus him ommebrengen mit de aosem van zien mond en verdistreweren deur de anblik van zien komst.
09 De komst van de wetteloze meenske is et wark van Saotan en giet saemen mit groot machtsvertoon en valse tekens en wonderen,
10 en iederiene die verleuren gaon zal, zal hi'j mit zien kwaodaorighied verleiden. Want zi'j hebben de liefde veur de waorhied, die heur redded kund hadde, niet anveerd.
11 Daorom treft God heur mit verbliening, zodat ze dwaelen en de leugen geleuven.
12 Zo zal iederiene die de waorhied niet geleuft mar behaegen schept in onrechte, veroordield wodden.
13 Mar veur jim, breurs en zusters, geliefden van de Heer, moe'n wi'j God de hieltied daanken. Hi'j het jim as eersten uutkeuzen om redded te wodden deur de Geest die heilig maekt en deur et geleuf in de waorhied.
14 Hi'j het jim daortoe reupen deur et evangelie dat wi'j jim verkondigd hebben en waordeur jim patten zullen in de luuster van oonze Heer Jezus Christus.
15 Wees staandvaastig, breurs en zusters, en blief bi'j de tredisie waorin jim deur oons onderwezen binnen, in woord of geschrift.
16 Meugen oonze Heer Jezus Christus en God, oonze Heit, die oons zien liefde toond het en oons deur zien genaode blievende steun en goeie hope geven het,
17 jim anvieteren en starken in al et goeie dat jim doen en zeggen.
2 Tessalonicenzen 3.
Doe jim daegeliks wark.
01 Veur et overige, breurs en zusters, bidde veur oons. Bidde dat et woord van de Heer him argens aanders lieke vlogge verspreided en liekewel prezen wodt as bi'j jim.
02 Bidde ok dat wi'j huded wodden veur slechte en kwaodaorige meensken, want niet iederiene is betrouwber.
03 Mar de Heer is trouw, hi'j zal jim kracht geven en jim tegen et kwaod huden.
04 De Heer geft oons de overtuging dat jim doen wat wi'j van jim vraogen en dat zullen doen blieven.
05 Mag de Heer jim wil en gunteren richten naor de liefde veur God en de staandvastige trouw an Christus.
06 Breurs en zusters, op gezag van oonze Heer Jezus Christus dregen wi'j jim op om jim niet in te laoten mit breurs of zusters die heur wark versloeren en niet leven neffens de tredisie die wi'j deurgeven hebben.
07 Jim weten zels wat et betekent om oons nao te volgen. Doe we bi'j jim weren, hewwe oons daegeliks wark niet verweerloosd
08 en op gieniene zien kosten leefd. Starker nog, we hebben oons inzet en inspand, dag en naacht hewwe warkt om gieniene van jim tot last te wezen.
09 Niet dawwe gien anspraoke maeken konnen op jim ondersteuning, mar we wollen oonszels tot veurbeeld stellen, zodat jim oons naovolgen zollen.
10 Doe we bi'j jim weren, hewwe meer dan iens zegd dat wie niet warken wil, niet eten zal.
11 We heuren dat goenend van jim heur wark wat versloeren, dat ze heur niet nuttig maeken mar heur allienig mar onledig holen mit onnutte bezigheden.
12 In naeme van de Heer Jezus Christus dregen wi'j zoksoorte meensken naodrokkelik op om rustig heur wark te doen en heur eigen stoete te verdienen.
13 Breurs en zusters, doe et goeie, zonder op te geven,
14 en wees op jim hoede veur wie gien geheur geven an wat wi'j in disse brief schrieven. Gao niet mit heur omme, dan zullen zi'j heur schaemen.
15 Behaandel heur mar niet as vi'janen, mar wies heur as jim breurs en zusters terechte.
16 Mag de Heer van de vrede zels jim de hieltied en op iedere wieze vrede geven. De Heer is mit jim allemaole.
17 Ik, Paulus, groete jim in mien eigen haandschrift. Dat is in iedere brief et waorlike dat ik him zels schreven hebbe.
18 De genaode van oonze Heer Jezus Christus is mit jim allemaole.