2 Petrus
in een
Stellingwarver vertaeling
Hoewel 2 Petrus net als 1 Petrus een brief genoemd wordt, heeft 2 Petrus niet de kenmerken van een persoonlijke brief. Weliswaar begint het boek met een begroeting, maar er worden geen specifieke geadresseerden genoemd en aan het slot staat geen persoonlijke mededeling of groet, maar een vermaning en een lofprijzing. Het geschrift behoort veel eerder tot het genre 'testament': de aankondiging van de spoedige ddod van de schrijver, de voorspelling van toekomstige gebeurtenissen, en een aansporing tot de juiste levenswandel. In de Grieks-Romeinse tijd was dit genre in joodse en christelijke kring populair. Als schrijver van 2 Petrus wordt in de tekst de apostel Petrus genoemd. Toch menen veel uitleggers dat Petrus niet de auteur van het boek is. Het toeschrijven van een 'testament' aan een gezaghebbend persoon was niet ongebruikelijk. Het feit dat een verzameling van brieven van Paulus (3:15-16) genoemd wordt, lijkt erop te wijzen dat deze inmiddels enige autoriteit in de kerk hebben gekregen. Ook is er een duidelijke verwantschap tussen 2 Petrus en de brief van Judas, en vaak wordt aangenomen dat de schrijver van 2 Petrus de brief van Judas heeft gekend en gebruikt. Daarom betogen uitleggers wel dat de brief vrij laat zou zijn ontstaan, mogelijk pas in de eerste helft van de tweede eeuw.
Het boek is in een verzorgde stijl geschreven; er worden relatief veel woorden gebruikt die elders in het Nieuwe Testament niet voorkomen. De auteur herinnert zijn lezers aan hun roeping en aan wat hun in het geloof is geschonken. In hoofdstuk 2 volgt een scherpe uitval tegen dwaalleraren; deze polemiek vertoont grote overeenkomsten met de brief van Judas. In hoofdstuk 3 herinnert de schrijver de lezers aan de ernst van de belofte dat Jezus spoedig zal komen, en wil hij iedere twijfel hierover bij hen wegnemen.
Vertaeling van de Biebel (NBG 2004)
deur Piet Bult uut Ni’jberkoop
2 Petrus 1.
De twiede brief van Petrus.
01 Van Simeon Petrus, knecht en apostel van Jezus Christus. An iederiene die deur toedoen van de rechtveerdighied van oonze God en van oonze redder Jezus Christus etzelde kostbere geleuf kregen hebben as wi'j.
02 Genaode is veur jim en vrede, in overvloed, deur de kennis van God en van Jezus, oonze Heer.
Maeke jim roeping waor.
03 Zien goddelike macht het oons alles geven wat neudig is veur een vroom leven, deur de kennis van him die oons reupen het deur zien majesteit en biesterbaorlike kracht.
04 Hiermit bin oons kostbere, rieke beloften daon, zodat jim ontkommen zollen an et verdarf dat de wereld doende hoolt as gevolg van de begeerte, en zodat jim pat kriegen zollen an de goddelike netuur.
05 Span daorom al jim krachten in om jim geleuf te verrieken mit deugdzemhied, jim deugdzemhied mit kennis,
06 jim kennis mit zelsbeheersing, jim zelsbeheersing mit volhadding, jim volhadding mit vroomhied,
07 jim vroomhied mit liefde veur jim breurs en zusters, en jim liefde veur jim breurs en zusters mit liefde veur iederiene.
08 As jim disse eigenschoppen in overvloed hebben, is jim kennis van oonze Heer Jezus Christus niet van onnut mar vruchtber.
09 Wie ze niet het is kotzichtig, ja bliend, en verget dat hi'j van zien vroegere zunden schonemaekt is.
10 Span jim daorom des te meer in om jim roeping en uutverkiezing waor te maeken, breurs en zusters. Aj'm dit alles doen, kommen jim in gienertied te vale
11 en zal jim onbelemmerd toegang verliend wodden tot et iewige keuninkriek van oonze Heer en redder Jezus Christus.
Waorschouwing tegen dwaeling.
12 Daorom zal ik jim hieran heugen blieven, hoewel jim dit alles wel weten en grondvest binnen in de waorhied die jim kennen leren hebben.
13 Mar et liekt mi'j goed toe om jim wakker te holen deur et iederkeer opni'j onder jim andacht te brengen zolange ik in disse tente bin.
14 Ik weet dat mien tente bi'jkotten ofbreuken wodden zal – dat het oonze Heer Jezus Christus mi'j te kennen geven –,
15 en ik doe d'r mien uterste best veur dat jim jim dit alles ok nao mien hennegaon de hieltied weer veur de geest haelen kunnen zullen.
16 Doe wi'j jim de glorierieke komst van oonze Heer Jezus Christus verkondigden, baseerden wi'j oons niet op vernuftige verzinsels – starker nog, wi'j hebben mit eigen ogen zien groothied zien.
17 Want hi'j kreeg van God, de Heit, ere en luuster, doe de stemme van de majesteitelijke luuster tegen him zee: "Dit is mien geliefde zeune, in him vien ik bliedschop."
18 Die stemme hebben wi'j zels uut de hemel klinken heurd doe wi'j mit him op de heilige barg weren.
19 Oons vertrouwen in de woorden van de profeten is daordeur allienig mar toeneumen. Jim doen d'r goed an om jim andacht de hieltied daorop richt te holen, as op een laampe die in een donkere ruumte schient, tot de dag komt en de morgensteern opgiet in jim hatte.
20 Beseffe daorbi'j veural dat gien inkelde profetie uut de Schrift een eigenmachtige bescheid toelat,
21 want in gienertied is een profetie votkommen uut meenselik initiatief: meensken die naemens God praoten wodden daortoe altied dreven deur de heilige Geest.
2 Petrus 2.
01 Toch bin d'r destieds onder et volk ok valse profeten optreden, en zo zullen d'r ok onder jim dwaellerers verschienen. Zi'j zullen mit verdarfelike ketteri'jen kommen en alderdeegst de meester die heur vri'jkocht het miskennen. Daormit bewarken ze al gauw heur eigen ondergang.
02 Pattie zullen heur losbanig gedrag overnemen en zo de weg van de waorhied in opspraoke brengen.
03 Dreven deur hebzucht zullen zi'j jim bedriegen mit misleidende verhaelen, mar heur vonnis is allange veld, heur ondergang lat niet op him waachten.
04 Ommes, God het alderdeegst engels die zundigd hadden niet speerd mar heur in de Tartarus wurpen. Daor, in de diepste duusternis, blieven ze opsleuten om heur vonnis of te waachten.
05 Liekemin het hi'j de wereld uut de veurtied speerd; allienig Noach, de heraut van de rechtveerdighied, leut hi'j mit zeuven aanderen in leven doe hi'j de waetervloed over die wereld vol zundige meensken kommen leut.
06 Ok Sodom en Gomorra het hi'j tot de verdistrewering veroordield, hi'j het die steden in de aske legd en ze daormit as veurbeeld steld an alle zundige meensken van laetere tieden.
07 Mar Lot, die rechtveerdig was en zwaor leed onder de losbaandige levenswaandel van die wettelozen, reddede hi'j.
08 Disse rechtveerdige woonde midden tussen heur, en dag in dag uut wodde zien rechtschaopen ziel kweld as hi'j heurde en zag hoe ze heur niet an God of an zien geboden stoorden.
09 De Heer bliekt dus vromen uut de beproeving redden te kunnen en onrechtveerdigen gevangen holen te kunnen tot de dag van et oordiel, om heur dan te straffen.
10 Hi'j straft veural diegenen die him, deur onreine verlangsten dreven, overgeven an schaemteloze losbaandighied en et gezag van de Heer verachten.
Overmoedig en eigenwies as ze binnen, schrikken zi'j d'r niet veur weeromme om hemelse machten te lasteren,
11 wiels alderdeegst engels, in kracht en macht toch heur meerderen, et niet andurven om die machten naemens de Heer te beschuldigen en te veroordielen.
12 Mar disse meensken, die krek redeloze dieren binnen, van neture bestemd om vongen en ommebrocht te wodden, lasteren wat ze niet iensen kennen. Zi'j zullen an heur eigen verdarfelike gedregings verdistreweren
13 en onrecht lieden as loon veur heur eigen onrecht. Ze genieten d'r van om heur op klaorlochte dag hielendal gaon te laoten. En as ze tegere mit jow an een feestmaol zitten, bin ze een schaandvlekke veur jow gezelschop, omreden zi'j zwelgen in heur bedrieglik genot.
14 Heur ogen bin alsmar op zuuk naor overspel en ze zundigen onophooldelik, ze verleiden onstandvastige zielen en bin ien en al hebzucht. Vervluukt bin zi'j!
15 Ze bin ofdwaeld, ze hebben de rechte weg verlaoten en treden in de voetsporen van Bileam, de zeune van Bosor, die him mar al te graeg betaelen leut veur onrecht.
16 Mar hi'j wodde veur zien vergriep terechtewezen: een stomme ezel, dat mit de stemme van een meenske praotte, maekte een aende an de grote onzin van die profeet.
17 Drugestaonde bronnen bin et, mistfladden die deur een wiendeldore votjaegd wodden. De diepste duusternis waacht heur,
18 want mit loos gebral en schaemteloze uutspattings verleiden zi'j heur die heur nog mar krek losmaekt hebben van degenen die dwaelen.
19 Zi'j beloven vri'jhied, mar bin zels knechten van et verdarf, want waor et volk deur beheerst wodt, daorvan is et volk knecht.
20 En as zi'j die heur deur heur kennis van oonze Heer en redder Jezus Christus losmaekt hebben van de smerigte van de wereld, daor weer in vertiest raeken en d'r opni'j deur beheerst wodden, bin ze d'r slimmer an toe as veurhenne.
21 Et was beter veur heur west de weg van de rechtveerdighied nooit kend te hebben as die weg wel te kennen, en heur dan of te keren van et heilige gebod dat heur overleverd is.
22 Op heur is et spreekwoord "Een hond keert weeromme naor zien eigen spi'je" hielendal van toepassing, of "Een wusken zeug rolt al vlogge weer deur de modder".
2 Petrus 3.
De dag van de Heer.
01 Geliefde breurs en zusters, dit is al de twiede brief die ik jim schrieve. Mit beide wi'k jim tot een helder inzicht brengen,
02 en wel deur jim te heugen an de woorden die de heilige profeten destieds zegd hebben en an et gebod van oonze Heer en redder dat jim apostels an jim deurgeven hebben.
03 Vergeet veural niet dat d'r an et aende van de tied spotters kommen zullen, die heur eigen begeerte volgen en smeels
04 vraogen: "Waor blift hi'j now? Hi'j had toch beloofd om te kommen? De generaosie veur oons is al wegraekt, mar alles is nog de hieltied zoas et sund et begin van de schepping west is."
05 Zi'j gaon d'r dan willens en wetens an veurbi'j dat d'r in et begin al es een hemel en een eerde west is die deur God zien woord vormd was uut waeter en deur middel van waeter,
06 en dat de wereld van doedestieds vergaon is doe zi'j deur et waeter overspoeld wodde.
07 Mar de hemel en eerde van vandaege-de-dag wodden deur datzelde woord beweerd om op de dag van et oordiel, waorop de goddelozen te verdistreweren, priesgeven te wodden an et vuur.
08 Ién ding meuj'm niet over et heufd zien, geliefde breurs en zusters: veur de Heer is iene dag as duzend jaor en duzend jaor as iene dag.
09 De Heer is niet tessel mit et naokommen van zien belofte, zoas goenend mienen; hi'j het allienig mar geduld mit jim, omreden hi'j wil dat iederiene tot inkeer komt en gieniene verleuren giet.
10 De dag van de Heer zal kommen as een dief. De hemelsferen zullen die dag mit luud gedreun vergaon, de elementen gaon in vlammen op, de eerde wodt blootlegd en alles wat daorop daon is komt an et locht.
11 As dit allemaole op die meniere kepot giet, hoe heilig en vroom moe'n jim dan wel niet leven,
12 jim die uutkieken naor de dag van God en et anbreken daorvan bespoedigt! Die dag gaon de hemelsferen in vlammen op, en de elementen vatten vlamme en smulten vot.
13 Mar wi'j vertrouwen op God zien belofte en kieken uut naor een ni'je hemel en een ni'je eerde, waor gerechtighied woont.
14 Omreden jim hiernaor uutkieken, geliefde breurs en zusters, moej'm jim inspannen om smetteloos, onberispelik en in vrede deur him antroffen te wodden.
15 Bedaenke dat et geduld van oonze Heer jim redding is. Dat het ok oonze geliefde breur Paulus jim schreven mit de wieshied die him geven is.
16 Hi'j schrift dit trouwens in alle brieven waorin hi'j dit onderwarp te spraoke brengt. Daorin stiet ien en aander dat muuilik te begriepen is en dat deur onwetende en onstandvastige meensken, tot heur eigen ondergang, verdri'jd wodt; dat doen ze trouwens ok mit de overige geschriften.
17 Geliefde breurs en zusters, jim weten van teveuren wat d'r kommen giet. Wees daorom allat en laot jim niet mittogen op de dwaelwegen van wettelozen. Laot jim staandvaastighied niet veren,
18 mar gruui in de genaode en in de kennis van oonze Heer en redder Jezus Christus. Him komt de ere toe, now en in iewighied. Amen.