Stellingwarver vertaeling
 
 
 
 
 
 
 
 
 
 
 
 
 
 
 
Et boek 2 Keunings slöt vot-en-daolik an op et veurgaonde 1 Keunings. Disse beide boeken bin tegere een deurlopend verhael dat et vervolg is op 1 en 2 Samuël. In biebeluutgiften is et bi'jkaans altied in twiejen splitst. Zoas de titel al angeft, gaon disse boeken over de vier ieuwen dat in Israël en Juda keunings regeerden (van de tiende tot de zesde ieuw v.Chr.). In de Hebreeuwse biebel heurt Keunings saemen mit Jozua, Rechters en Samuël tot de groep boeken van de Vroege Profeten. In disse boeken wodt verteld hoe de Israëlieten et laand Kanaän in bezit nemen en d'r heur bestaon opbouwen. Profeten treden op om et volk te herinneren an de wet van Mozes en te waorschouwen tegen et overtreden van de geboden. De keunings wodden daor in et biezunder op anspreuken.
Op grond van de geschiedkundige inhoold wodden 1 en 2 Keunings ok wel rekend tot de historische boeken. Zi'j vormen saemen mit de verhaelende gedeelten in Genesis, Exodus, Leviticus, Numeri, Deuteronomium, Jozua, Rechters en Samuël een min of meer deurlopende geschiedenis. Tegenworig nemen pattie meensken an dat disse boeken in heur vorm van vandaege-de-dag et risseltaot binnen van een langdurig perces van overleveren en redigeren. Et redaksieperces is al in de tied van de keunings van Israël en Juda begonnen (ongeveer 1000-586 v.Chr.) en wodde eerst ofsleuten nao de Babylonische ballingschop, in de Joodse gemienschop in de tied van de twiede tempel (na 515 v.Chr.).
De verhaelen in 1 en 2 Keunings bin te beschouwen as een mingvorm van vertelkeunst en geschiedschrieving, waormit de lezer toegelieke boeid, infermeerd en opreupen wodt tot de juuste holing tegenover de God van Israël. An de haand van een weerommekieken op de geschiedenis wodt de lezer een les veurhullen: ontrouw an God en et dienen van aandere goden leidet tot rampspoed, berouw en inkeer hebben redding en veurspoed tot gevolg. Disse theologische visie bepaolt et daenken over de ondergang van de keuninkrieken Israël en Juda in 722 respectievelik 586 v.Chr.
Nao de regering van Salomo vaalt et riek in de tiende ieuw v.Chr. uutmekere. Vanof 1 Keunings 12 wodt ofwisselend de geschiedenis van de keuninkrieken Juda en Israël verteld. De verteller treedt now meer naor veuren en verhaelt zonder omhael over zien theologische visie op de geschiedenis. Neffens een vaast stremien wodt veur iedere keuning et begin en de duur van zien regering melded, de stad van waoruut hi'j regeerde, een theologische beoordielinge, een verwiezing naor de kronieken en een mitdieling over zien dood en opvolging. Niettemin kommen in dit pat van Keunings ok levendig vertelde verhaelen en anekdoten veur, bi'jglieks over de profeten Elia (1 Keunings 17-19 en 2 Keunings 1-2) en Elisa (2 Keunings 2-8). De in Keunings vertelde geschiedenis van Juda is in bewarkte vorm opneumen in 2 Kronieken.
1 Keunings 1-2 beschrift et levensaende van keuning David en wodt pattietoeren beschouwd as de ofwikkeling van de verhaellijn in 2 Samuël. In et vervolg van 1 en 2 Keunings onderscheiden we an de haand van hoofdlijnen van de geschiedenis van Israël en Juda drie patten. Et eerste pat (1 Keunings 3-11) beschrift et keuningschop van Salomo. De wieshied van Salomo en de bouw van de tempel kriegen daorin biezundere andacht. Et twiede pat (1 Keunings 12 - 2 Keunings 17) beslat de geschiedenis van de keuninkrieken Israël en Juda vanof de scheuring van et riek tot de verovering van Israël zien heufdstad Samaria, deur de Assyriërs in 722. In 2 Keunings 17 wodt dit pat ofsleuten mit een beschouwend weerommekieken. Et dadde pat (2 Keunings 18-25) giet over et keuninkriek Juda vanof Hizkia tot de verovering van Jeruzalem deur Nebukadnessar in 586. De verwoesting van de tempel in Jeruzalem en de wegvoering van een groot pat van de Judese bevolking naor Babylonië bin een groot keerpunt in de geschiedenis van et volk Israël.
 
 
 
 
 
 
 
 
 
 
 
 
 
 
 
 
 
 
 
 Vertaeling van de Biebel (NBG 2004)

deur Piet Bult uut Ni’jberkoop

01 Nao de dood van Achab kwam Moab tegen Israël in opstaand.
02 Achazja was uut et raem valen van een kaemer op de boververdieping van zien peleis in Samaria, en zwaor gewond raekt. Hi'j stuurde bosschoppers uut mit de opdracht om Baäl-Zebub, de god van Ekron, een vraoge te stellen. "Vraog him a’k mien val overleven zal."
03 Een engel van de Heer zee tegen de Tisbiet Elia: "Gao de bosschoppers van de keuning van Samaria integen en zeg heur: "jim willen Baäl-Zebub, de god van Ekron, vraogen, asof Israël zels gien God het.
04 Daorom – zegt de Heer – zuj' niet meer van je ziekbedde overaende kommen, mar wegraeken."" Elia dee wat him zegd was.
05 Doe de bosschoppers bi'j de keuning weeromme kwammen, vreug disse: "Hoe kan et daj’m now al weeromme binnen?"
06 Zi'j zeden doe: "We kwammen onderwegens iene tegen die zee: "gao weeromme naor de keuning die jim stuurd het en zeg him: "Dit zegt de Heer: Ie laoten Baäl-Zebub, de god van Ekron, vraogen, asof Israël zels gien God het. Daorom zuj' niet meer van je ziekbedde overaende kommen, mar wegraeken."""
07 "Hoe zag hi'j d'r uut, die man die jim integen kwam en dit tegen jim zegd het?" vreug de keuning.
08 "Hi'j was stark behaord," zeden ze, "en hi'j dreug een leren lendedoek." "Dan was et de Tisbiet Elia," zee de keuning.
09 Achazja stuurde een bevelhebber mit vuuftig manluden naor Elia toe. Zi'j troffen Elia bovenop de barg. De bevelhebber zee: "Godsman, de keuning beveelt jow om naor beneden te kommen."
10 Mar Elia zee: "As ik een godsman bin, laot d'r dan vuur uut de hemel kommen om jow en je vuuftig manluden te verteren." Hierop kwam d'r vuur uut de hemel dat de bevelhebber en zien manluden verteerde.
11 Opni'j stuurde de keuning een bevelhebber mit vuuftig manluden naor Elia toe, en die zee tegen Elia: "Godsman, de keuning beveelt jow om vot-en-daolik naor beneden te kommen."
12 En weer zee Elia: "As ik een godsman bin, laot d'r dan vuur uut de hemel kommen om jow en je vuuftig manluden te verteren." Hierop kwam d'r een goddelik vuur uut de hemel dat de bevelhebber en zien manluden verteerde.
13 Veur de dadde maol stuurde de keuning een bevelhebber mit vuuftig manluden. Doe disse dadde bevelhebber bi'j Elia kwam, gong hi'j veur him deur de kni'jen en smeekte: "Godsman, speer mien leven en dat van disse vuuftig manluden asjeblief.
14 Ik weet dat d'r vuur uut de hemel kommen is dat de twie veurige bevelhebbers en heur manluden verteerd het. Mar asjeblief, speer mien leven."
15 Doe zee de engel van de Heer tegen Elia: "Gao mit him mit, ie hoeven niet bange te wezen veur de keuning." Doe gong Elia mit de bevelhebber mit naor de keuning
16 en zee tegen him: "Dit zegt de Heer: Ie hebben bosschoppers stuurd om Baäl-Zebub, de god van Ekron, te vraogen, asof Israël zels gien God het die aj’ vraogen kund hadden. Daorom zuj' niet meer van je ziekbedde overaende kommen, mar wegraeken."
17 Achazja raekte weg, zoas de Heer deur Elia veurzegd hadde. Dit gebeurde in et twiede regeringsjaor van keuning Joram van Juda, de zeune van Josafat. Omreden hi'j gien zeune had, wodde hi'j opvolgd deur zien breur Joram.
18 Veerdere biezunderheden over Achazja bin optekend in de kronieken van de keunings van Israël.
 
 
2 Keunings 2.

01 De tied was niet veer meer dat de Heer Elia in een stormwiend in de hemel opnemen zol. Elia en Elisa stonnen op et punt om uut Gilgal vot te gaon,
02 mar Elia zee tegen Elisa: "Blief ie hier, de Heer wil dat ik naor Betel gao." Elisa zee doe: "Zo waor de Heer leeft, en zo waor as jow leven, d'r is gien daenken an dat ik jow allienig gaon laot." Zo gongen ze tegere op weg naor Betel.
03 De profeten uut Betel kwammen Elisa vanuut de stad integen en zeden tegen him: "Weten jow wel dat de Heer vandaege jow meester van jow wegnemen zal?" "Ja, ik weet et," zee hi'j. "Zeg mar niks meer."
04 Elia zee tegen Elisa: "Blief ie hier, Elisa, de Heer wil dat ik naor Jericho gao." Mar Elisa zee doe: "Zo waor de Heer leeft, en zo waor as jow leven, d'r is gien daenken an dat ik jow allienig gaon laot." Zo gongen ze tegere naor Jericho.
05 De profeten uut Jericho kwammen naor Elisa toe en zeden tegen him: "Weten jow wel dat de Heer vandaege jow meester van jow wegnemen zal?" "Ja, ik weet et," zee Elisa. "Zeg mar niks meer."
06 Elia zee tegen Elisa: "Blief ie hier, de Heer wil dat ik naor de Jordaan gao." Mar Elisa zee doe: "Zo waor de Heer leeft, en zo waor as jow leven, d'r is gien daenken an dat ik jow allienig gaon laot." Zo gongen ze tegere veerder.
07 Op ‘e walkaante van de Jordaan bleven ze staon. Vuuftig profeten die heur volgd weren bleven op een ofstaand staon te kieken.
08 Elia dee zien maantel of en teerde him dubbel. Hi'j sleug d'r mit op et waeter, waorop et waeter naor links en naor rechts votstroomde en zi'j beidend dreuge naor de ginnekaante gaon konnen.
09 Wiels zi'j daor henne leupen vreug Elia an Elisa: "Wat kan ik nog veur je doen veur ik bi’j jow weghaeld wor? Vraog et mar." Elisa zee doe: "Laot mi'j dubbel in jow geest patten."
10 "Ie vraogen wat hiel muuiliks," zee Elia. "Aj' zien hoe ik bi’j jow weghaeld wor, zal je weens waormaekt wodden, mar aj' et niet zien, gebeurt et niet."
11 En wiels ze leupen te praoten, wodden ze opiens uut mekeer dreven deur een waegen van vuur, mit peerden van vuur d'r veur, en Elia wodde in een stormwiend mitneumen naor de hemel.
12 Elisa zag et gebeuren en reup: "Heit, heit! Striedwaegen en peerdevolk van Israël!" Doe hi'j Elia niet meer zien kon, scheurde hi'j zien kleren.
13 Hi'j pakte Elia zien maantel, die ofgleden was, op, en leup weeromme. Bi'j de kaante van de revier bleef hi'j staon.
14 Hi'j sleug mit Elia zien maantel op et waeter en reup: "Waor is de Heer, de God van Elia?" Dus hi'j sleug ok op et waeter en opni'j stroomde et naor links en naor rechts vot, zodat Elisa naor de ginnekaante toe lopen kon.
15 De profeten uut Jericho, die Elisa vanof de overkaante in et oge hullen, zeden tegen mekeer: "De geest van Elia is op Elisa daelekommen." Zi'j gongen him integen, gongen veur him deur de kni'jen
16 en zeden: "We hebben vuuftig keite manluden bi'j oons. Laot die jow meester zuken. Misschien het een geest van de Heer him optild en argens op een barg of in een dal daelesmeten." "Doe dat mar niet," zee Elisa,
17 mar ze drongen zo an dat hi'j aentienbesluut heur anbod annam. Vuuftig manluden wodden d'r op uutstuurd en zochten drie daegen lange, mar ze vunnen Elia niet.
18 Doe ze weeromme kwammen bi'j Elisa, die in Jericho wonen gaon was, zee hi'j tegen heur: "Ik had jim toch zegd dat jim niet zuken gaon mossen?"
Eerste optreden van Elisa.
19 De inwoners van Jericho zeden tegen Elisa: "De ligging van de stad is goed, zoas jow zien, mar et waeter is min en de grond warkt misgeboorten in de haand."
20 Elisa zee: "Breng mi'j een ni'je schaole, mit wat zoolt." Ze brochten him een schaole mit wat zoolt,
21 en Elisa gong naor de bron en stri'jde daor zoolt in wiels hi'j zee: "Dit zegt de Heer: Hierbi'j zuver ik dit waeter. Et zal gien starfgevallen of misgeboorten meer veroorzaeken."
22 En tot op de dag van vandaege is et waeter daor zuver, zoas Elisa zegd het.
23 Van Jericho gong Elisa naor Betel. Doe hi'j naor de stad omhogens leup, leup een koppel kiender hadde op him toe, lachten him uut en raosden: "Kaelkop, kaelkop! Zet 'm op, zet 'm op!"
24 Elisa keek omme, en doe hi'j de kiender zag, vervluukte hi'j ze in de naeme van de Heer. Drekt kwammen d'r twie berinnen uut et bos, die twiejenveertig van de kiender verscheurden.
25 Vanuut Betel trok Elisa naor de Karmel, en daor weg gong hi'j naor Samaria weeromme.
 
 
2 Keunings 3.

01 Joram, de zeune van Achab, wodde keuning van Israël in et achttiende regeringsjaor van keuning Josafat van Juda. Twaelf jaor regeerde hi'j in Samaria.
02 Hi'j dee wat min is in de ogen van de Heer, mar gong daorin niet zo veer as zien heit en moeke. De stien die zien heit veur Baäl daelezet hadde, leut hi'j weghaelen,
03 mar veur et overige hul hi'j vaaste an de zundige praktieken van Jerobeam, de zeune van Nebat, die de Israëlieten tot zunde anzet hadde; daor brak hi'j niet mit.
04 Keuning Mesa van Moab was schaopefokker. Hi'j mos an de keuning van Israël jaorliks honderdduzend laomer ofstaon en honderdduzend rammen die niet scheerd weren.
05 Mar nao de dood van Achab kwam de keuning van Moab tegen de keuning van Israël in opstaand.
06 Daorom rokte keuning Joram vanuut Samaria op, naodat hi'j hiel Israël onder de waopens reupen hadde.
07 An keuning Josafat van Juda leut hi'j disse bosschop overbrengen: "De keuning van Moab is tegen mi'j in opstaand kommen. Willen jow mit mi'j tegen Moab et gevecht angaon?" "Ja, ik gao mit jow mit," was et bescheid. "Jow en ik bin iene; mien leger is jow leger, mien peerden bin jow peerden."
08 Joram vreug an Josafat langs wat pad zi'j et beste oprokken konnen, en die raodede him an om dwas deur de woestijn van Edom te trekken.
09 Saemen mit de keuning van Juda en de keuning van Edom rokte de keuning van Israël op. Mar deurdat ze een omtrekkende beweging maekten, weren ze zeuven daegen onderwegens, en op et laest was d'r gien waeter meer veur de soldaoten en veur et vee dat ze bi'j heur hadden.
10 "Wat biwwe begonnen!" reup de keuning van Israël uut. "Het de Heer disse drie keunings seins bi'j mekeer brocht om ze an Moab uut te leveren?"
11 Mar Josafat vreug: "Is d'r hier gien profeet van de Heer, die veur oons de Heer vraogen kan?" Iene van de knechten van de keuning van Israël zee dat Elisa, de zeune van Safat, bi'j heur was, die de hieltied waeter uutgeut over de hanen van Elia.
12 "As iene oons zeggen kan wat de Heer mit oons veurhet, is hi'j et wel," zee Josafat. De keuning van Israël, Josafat en de keuning van Edom gongen naor Elisa toe,
13 mar Elisa zee tegen de keuning van Israël: "Wat willen jow van mi'j? Gaon jow mar naor de profeten van jow heit en moeke." "Nee," zee Joram, "want et is de Heer die disse drie keunings bi'jmekeer brocht het om ze an Moab uut te leveren."
14 Doe zee Elisa: "Zo waor de Heer leeft, de Heer van de hemelse machten, in wie zien dienst ik stao, et is dat ik zovule aachtinge hebbe veur keuning Josafat van Juda, aanders zo'k jow gien blik weerdig keuren.
15 Mar goed, laot een lierspeler kommen." En wiels de muzikaant op de liere speulde, wodde Elisa grepen deur de haand van de Heer
16 en hi'j zee: "Dit zegt de Heer: Greef rondomme hulten in de wadi.
17 Want dit zegt de Heer: Jim zullen gien wiend vulen en gien regen zien, mar toch zal disse wadi vol mit waeter kommen te staon, zodaj’m te drinken hebben, ok jim vee en lastdieren.
18 En dat is veur de Heer nog mar een kleinigheid: hi'j zal ok de Moabieten an jim uutleveren.
19 Iedere starke vesting en iedere mooie stad zullen jim verwoesten, iedere vruchtboom vellen, iedere waeterputte dichtesmieten en alle vruchtbere akkers volgooien mit stienen."
20 De aanderemorgen, op et ure van et graonoffer, kwam uut de richting van Edom opiens waeter opzetten, en in minder as gien tied ston de vallei hielendal blaank.
21 De Moabieten hadden heurd dat de drie keunings tegen heur optrokken weren, en iederiene die oold genoeg was om de waopens op te nemen wodde opreupen en an de greens opsteld.
22 Doe zi'j diezelde morgen wakker wodden, kleurde et eerste zunnelocht et waeter rood as bloed, en doe de Moabieten dat zaggen
23 reupen zi'j uut: "Mar dat is bloed! De keunings hebben et netuurlik onderling mit mekeer an 'e stok kregen en now hebben ze mekeer ommebrocht. D'r op of, Moab, op naor de buit!"
24 Mar doe de Moabieten bi'j et kaamp van de Israëlieten kwammen, wodden ze overrompeld. De Israëlieten jaegden de Moabieten tot in heur eigen laand aachternao en versleugen heur.
25 Ze verwoestten de steden, gooiden de vruchtbere akkers vol mit stienen, smeten alle waeterputten dichte en hakten alle vruchtbomen omme. Uutaendelik ston allienig Kir-Chareset nog overaende, mar de slingerers omsingelden disse stad ok en begonnen heur te bekoegelen.
26 Doe de keuning van Moab besefte dat hi'j de stried verliezen gong, perbeerde hi'j mit zeuvenhonderd oefende kriegsmannen een uutbraoke te doen naor de keuning van Edom, mar et was ommenocht.
27 Doe nam hi'j zien ooldste zeune, zien troonopvolger, en offerde him as braandoffer op de stadsmure. Dat wekte zoe'n ontzetting bi'j de Israëlieten dat ze de anval staekten en naor heur eigen laand weeromme gongen.
 
 
2 Keunings 4.

01 Op een keer reup de vrouw van iene van de profeten Elisa zien hulpe in: "Mien man, jow knecht, die zoas jow weten altied groot ontzag veur de Heer hadde, is wegraekt. Now zullen mien schuldeiser wel kommen en mien beide kiender as slaven mitnemen."
02 "Wat kan ik veur jow doen?" vreug Elisa. "Vertel mi'j es, wat hebben jow nog in huus?" "Allienig een krukien mit wat eulie, heer," zee ze, "veerder niks."
03 Doe zee Elisa: "Gao bi'j jow buren kruken en kannen te lien vraogen, lege, zovule aj' mar kriegen kunnen.
04 Aj' weer thuuskommen, doe dan de deure aachter jow en je kiender dichte en giet de eulie diej’ hebben in die kruken en kannen over; iederkeer as d'r iene vol is, pak ie een ni’je kruke."
05 Thuuskommen dee de vrouw de deure aachter heur en de kiender dichte. Wiels heur kiender heur de kannen en kruken iene veur iene angavven, geut ze de eulie over.
06 Doe alle kruken vol weren en zi'j heur zeune vreug heur de volgende an te geven, zee hi'j: "D'r bin gienend meer." Doe hul de eulie op te stromen.
07 De wedevrouw gong weeromme naor de godsman en vertelde him wat d'r gebeurd was. "Die eulie moej' verkopen om je schuld mit te betaelen," zee hi'j. "En van wat d'r overblift, kuj'm leven."
Elisa en de vrouw uut Sunem.
08 Op een dag kwam Elisa deur Sunem. Daor woonde een veurnaeme vrouw die him dringend uutneudigde om eten te kommen. Van doe of an gong hi'j iedere keer as hi'j langs Sunem kwam bi'j heur an om eten.
09 De vrouw zee tegen heur man: "Die godsman die iederkeer bi'j oons over de heerd komt, is beslist heilig.
10 Lao'we op et dak van oons huus een kaemer veur him bouwen en daor een bedde, een taofel, een stoel en een laampe hennezetten, dan kan hi'j him daor weerommetrekken as hi'j bi'j oons komt."
11 Doe Elisa op een dag weer deur Sunem kwam, onderbrak hi'j zien reize en gong rusten in die veur him ingerichte kaemer.
12 Hi'j vreug zien knecht Gechazi om de gaastvrouw te roepen. Doe de vrouw op Gechazi zien vraoge naor boven kommen was
13 zee Elisa tegen Gechazi: "Vraog heur wawwe veur heur doen kunnen in ruil veur alle muuite die zi'j heur veur oons troost het. Kuwwe veur heur bi'j de keuning pleiten, of bi'j de bevelhebber van et leger?" Mar de vrouw zee doe: "Ik leef in 't midden van mien eigen volk."
14 Opni'j vreug Elisa: "Kan ik dan warkelik niks veur heur doen?" en Gechazi zee doe: "Jaowel, zi'j het gien zeune, en heur man is al oold."
15 Doe zee Elisa: "Roep heur binnen." Gechazi reup heur, de vrouw kwam in de deureupening staon
16 en Elisa zee tegen heur: "Vandaege over een jaor zullen jow een zeune in je aarms holen." "Nee, beste godsman," zee ze doe, "spiegelen jow mi'j toch niks veur."
17 Mar de vrouw raekte zwanger en krek een jaor laeter kreeg zi'j een zeune, zoas Elisa veurzegd hadde.
18 Et kiend gruuide op. Op een dag, doe hi'j te kieken gaon was bi'j zien heit, die mit de mi'jers op et laand was,
19 reup hi'j opiens: "Mien heufd! Mien heufd!" De heit gaf opdracht an een knecht om de jonge vlogge naor zien moeke te brengen.
20 De knecht tilde him op en dreug him naor zien moeke. Zi'j hul him op heur schoot, mar tegen et middagure raekte hi'j weg.
21 Doe gong ze naor boven, legde de jonge op et bedde van de godsman en dee de deure van de kaemer dichte. Doe gong zi'j naor buten
22 en reup tegen heur man: "Stuur mi'j iene van de knechten mit een ezelin! Ik wil zo gauw a’k kan naor de godsman, en dan kom ik drekt weeromme."
23 "Waorom zoj' naor de godsman gaon?" vreug hi'j. "Et is toch gien ni'jemaone vandaege, en ok gien sabbat?" "Laot mi'j now mar betiemen," zee ze.
24 Ze zadelde de ezelin en zee tegen de knecht: "Drief de ezelin zonder opholen an, tot ik zegge daj' stoppen kunnen."
25 Zo gong ze op weg naor Elisa, die op de Karmel was. Doe de godsman heur ankommen zag, zee hi'j tegen zien knecht Gechazi: "Kiek, daor hej' de vrouw uut Sunem.
26 Gao heur vlogge integen en vraog hoe et mit heur giet, en mit heur man en heur zeune." De vrouw zee doe dat et goed gong,
27 mar doe ze bi'j de godsman op de barg kwam, greep ze zien voeten vaaste. Gechazi leup op heur toe om heur vot te jaegen, mar de godsman zee: "Laot heur mar, zi'j het verdriet. En ik wus daor niks van, de Heer het et mi'j niet zegd."
28 Doe zee de vrouw: "Heb ik jow seins om een zeune vraogd? He'k jow doe niet zegd daj’ gien valse hope wekken mossen?"
29 Hierop zee Elisa tegen Gechazi: "Neem mien staf en gao d'r zo vlogge meugelik henne. Aj' iene tegenkommen, groet him dan niet. As iene jow groet, zeg dan niks weeromme. Ie moe'n mien staf op de jonge leggen."
30 Mar de moeke van de jonge zee: "Zo waor de Heer leeft, en zo waor as jow leven, ik gao niet zonder jow." Doe kwam Elisa overaende en gong mit heur mit.
31 Gechazi was heur veuruutgaon en had de staf op de jonge legd, mar die had gien teken van leven geven. Hi'j gong weeromme en vertelde Elisa dat de jonge niet wakker wodden was.
32 Doe Elisa zels bi'j et huus ankwam, zag hi'j de jonge dood op zien eigen bedde liggen.
33 Hi'j gong de kaemer binnen en dee de deure aachter him dichte. Doe biddede hi'j tot de Heer.
34 Doe leup hi'j naor et bedde toe en gong boven op et kiend liggen, mit zien mond op zien mond, zien ogen op zien ogen en zien haandpalms op zien haandpalms. Zo bleef hi'j languut over et kiend liggen tot et lichem weer waarm wodde.
35 Doe kwam hi'j overaende, leup deur de kaemer henne-weer-denne, en gong opni'j languut over et kiend henne liggen. Uutaendelik proestte de jonge wel zeuven keer, en dee zien ogen eupen.
36 "Roep de moeke," reup Elisa tegen Gechazi. Gechazi waorschouwde heur, en doe zi'j boven kwam zee Elisa: "Ie kun je zeune mitnemen."
37 De vrouw kwam de kaemer binnen, vul Elisa an zien voeten en beug diepe veurover. Doe nam zi'j heur zeune van et bedde op en gong de kaemer uut.
Et bittere gerecht.
38 Elisa gong weeromme naor Gilgal. D'r was in die tied weer hongersnood in 't laand. Doe hi'j een keer mit de leden van de profetegemienschop bi'jmekeer zat, dreug hi'j zien knecht op om een grote kookpot op et vuur te zetten en waarm eten veur heur klaor te maeken.
39 Iene van de profeten gong naor buten om plaanten diej’ eten kunnen, te zuken. Hi'j vun een wilde kroepplaante, een kolokwint, en plokte daor zovule vruchten van as hi'j in zien klied mitdregen kon. Doe hi'j weerommekwam sneed hi'j de vruchten in stokkies en dee ze deur et eten in de pot; ze wussen jommes niet wat et was.
40 Et gerecht wodde rondpat, en zogauw ze d'r van pruufden raosden ze: "Godsman, de dood zit in de pot!" Ze konnen gien hap deur de keel kriegen.
41 Doe zee Elisa: "Breng mi'j wat mael." Hi'j stri'jde wat mael in de pot en zee: "Schep allemaole opni'j op. Now kun ze d'r van eten." En werachtig, de bittere smaek was hielemaole vot.
Een maol eten veur honderd profeten.
42 Op een keer kwam iene uut Baäl-Salisa om Elisa es op te zuken. Hi'j nam twintig gastebroden veur de godsman mit, bakt van mael uut de ni'je oogst, en een zakkien vas graon. Elisa dreug zien bediende op om dit as etersmaol an de profeten veur te zetten.
43 Doe de bediende protesteerde dat et beslist niet genoeg was veur honderd meensken, zee Elisa opni'j: "Zet et de profeten now mar veur, ze zullen d'r nog een hiel maol an hebben. Want dit zegt de Heer: Zi'j zullen d'r van eten en ok nog van overholen."
44 Doe zette zien bediende et de profeten veur, en zi'j atten d'r van en hullen ok nog over, krek zoas de Heer zegd hadde.
 
 
2 Keunings 5.

01 Naäman, de bevelhebber van et Aramese leger, ston bi'j zien keuning in hoog anzien en wodde slim deur him wardeerd, want de Heer had him veur Aram een grote overwinning behaelen laoten. Mar disse grote kriegsman leed an een huudziekte.
02 Now hadden de Arameeërs op iene van heur streuptochten uut Israël een jong maegien mitneumen, dat as dienstmaegien warkte bi'j de vrouw van Naäman.
03 Zi'j zee tegen heur meesteres: "Och, kon mien meester mar es naor de profeet in Samaria gaon, die zol him wel genezen."
04 Naäman gong naor zien keuning en vertelde him wat et maegien uut Israël zegd hadde.
05 Doe zee de keuning van Aram: "Gao daor henne. Ik zal jow een brief mitgeven veur de keuning van Israël." Naäman gong naor Israël onderwegens, mit tien telent zulver bi'j him, zesduzend sjekel goold en tien stel kleren.
06 In de brief die hi'j an de keuning van Israël gaf, ston: "Mit disse brief stuur ik mien knecht Naäman naor jow toe, om deur jow van zien huudziekte genezen te wodden."
07 Zogauw de keuning van Israël de brief leesd hadde, scheurde hi'j zien kleren en reup: "Bin ik seins een god, dat ik beschikken kan over leven of dood? Hi'j stuurt mi'j disse man om him van zien huudziekte of te helpen. Let op mien woorden: hi'j is uut op een ruzie mit mi'j!"
08 Doe de godsman Elisa heurde dat de keuning van Israël zien kleren scheurd hadde, leut hi'j him vraogen: "Waorom hebben jow je kleren scheurd? Laot die man bi'j mi'j kommen, dan zal hi'j vernemen dat d'r in Israël een echte profeet woont."
09 Naäman ree mit zien striedwaegen naor et huus van Elisa.
10 Elisa stuurde iene naor buten om him te zeggen: "Waske jow zeuven keer in de Jordaan, dan zal jow huud weer gezond wodden en zuj' weer schone wezen."
11 Kwaod gong Naäman vot. "Ik had docht dat hi'j zels naor buten kommen zol," zee hi'j. "En dat hi'j de naeme van de Heer, zien God, anroepen zol en dat hi’j mit zien haand over et antaste plak strieken zol, en zo de huudziekte wegnemen zol.
12 Bin de revieren van Damascus, de Abana en de Parpar, seins niet beter as alle waeters in Israël? Ha’k mi'j daor niet in wasken kund om schone te wodden?" Veraldereerd dri'jde hi'j him omme en gong vot.
13 Mar zien bedienden kwammen him aachternao en zeden: "Mar overste, as de profeet jow een ingewikkelde opdracht geven had, hadden jow die toch ok uutvoerd? Dus now hi'j tegen jow zegt: "waske jow, en jow zullen weer schone wodden," moe'n jow dat grif doen."
14 Doe gong Naäman naor de Jordaan en gong daor zeuven keer koppien-onder, zoas de godsman zegd hadde. Zien huud wodde weer gezond, zo geef as de huud van een kiend, en hi'j was weer schone.
15 Doe gong hi'j mit zien hiele gevolg naor Elisa weeromme, maekte bi'j de godsman zien opwaachting en zee: "Ik wus wel dat d'r behalven in Israël in de hiele wereld gien God is. Asjeblief, nemen jow een kedo van je knecht an."
16 Mar Elisa zee doe: "Zo waor de Heer, in wie zien dienst ik stao, leeft, ik zal niks annemen." En hoe Naäman ok androng, Elisa bleef weigeren.
17 Doe zee Naäman: "As jow warkelik niks van je knecht annemen willen, wees dan zo goed om mi'j twie muildierlasten eerde mit te geven. Ik verzekere jow dat ik gienertied meer offers brengen zal an aandere goden as an de Heer.
18 Mar ik hope dat de Heer mi'j dit vergeven willen zal: as mien vost naor de tempel giet om him veur Rimmon daele te bugen, steunt hi'j de hieltied op mien aarm, zodat ik wel dwongen bin mi'j ok in de tempel van Rimmon daele te bugen. Ik hope dus dat de Heer et mi'j vergeven willen zal as ik mi'j daelebuug in de tempel van Rimmon."
19 Elisa zee doe: "Gao in vrede." Naäman was nog niet zo lange vertrokken,
20 doe Elisa zien knecht Gechazi bedocht: Mien meester het de Arameeër Naäman veur ‘t heufd stoten deur et kedo dat hi'j veur him mitneumen hadde te weigeren. Zo waor de Heer leeft, ik gao him zo vlogge meugelik aachternao om dat van him an te nemen.
21 Gechazi gong Naäman aachternao, en doe Naäman him ankommen zag, sprong hi'j van zien waegen en leup him hadde integen. "Is alles in odder?" vreug hi'j.
22 "Ja heur," zee Gechazi. "Allienig, mien meester lat zeggen dat d'r zokrek twie jongkerels uut et barglaand van Efraïm ankommen binnen, leerlingen van de profetegemienschop, en hi'j vragt jow om heur een telent zulver en twie stellegies kleren te geven."
23 "Mit alle plezier," zee Naäman. "Nemen jow toch twie telent." Hi'j ston d'r op dat Gechazi et kedo annemen zol en hi'j maekte twie pakketten, mit in ieder een telent zulver en een stel kleren, en gaf die an twie van zien knechten om ze veur Gechazi te dregen.
24 Doe zi'j bi'j de stadswal ankwammen, nam Gechazi de pakketten van heur over en stuurde hi'j heur vot. De kedo's verstopte hi'j in zien huus.
25 Doe hi'j him weer bi'j zien meester meldde, vreug Elisa: "Waor hej' west, Gechazi?" "Ik? O, nargens," zee hi'j.
26 Doe zee Elisa: "Docht ie dat et mi'j ontgaon was, dat d'r iene van zien waegen sprongen en jow integen lopen is? Is dit de meniere om an zulver te kommen, an kleren, olijftunen en droevetunen, en an vee en knechten en dienstmaegies?
27 Mag de huudziekte van Naäman veur iewig op jow en je naokommelingen overgaon!" Gechazi gong bi’j zien meester weg, zien huud wodde ruderig en wit as sni'j.
 
 
2 Keunings 6.

01 Op een dag zeden de leden van de profetegemienschop tegen Elisa: "Et gebouw waorin wi'j mit jow wonen is eins te klein veur oons allemaole, zoas jow zien.
02 Lao'we naor de Jordaan gaon en daor boomstammen haelen om een ni'j onderkommen te bouwen." "Gao je gang," zee Elisa.
03 Mar iene van de profeten zee: "Doen jow oons een plezier, heer, en gao mit oons mit." "Goed," zee Elisa
04 en hi'j gong mit heur mit naor de Jordaan, waor zi'j bomen omme begonnen te hakken.
05 Wiels zi'j daormit doende weren, scheut bi'j iene van de profeten et iezeren blad van zien biele los en vul in et waeter. "Wat now, heer!" reup hi'j uut. "Ik had die biele him te lien!"
06 "Waor is hi'j valen?" vreug de godsman. Naodat de man him et plak anwezen hadde, snee Elisa een giepse of en gooide die in et waeter, waornao et iezer boven drieven kwam.
07 "Hael him d'r mar uut," zee hi'j, en de man pakte et blad van de biele uut et waeter.
Elisa zien optreden in de oorlog tegen Aram.
08 De keuning van Aram voerde oorlog tegen Israël. Iederkeer as hi'j in overleg mit zien bevelhebbers besleut om op een bepaold plak zien kaamp op te slaon,
09 leut de godsman Elisa de keuning van Israël waorschouwen dat hi'j uut die streek wegblieven mos omreden de Arameeërs daor risselvaosies veur een anval maekten.
10 De keuning van Israël leut dan de inwoners van et plak dat de godsman nuumd hadde waorschouwen en zorgde d'r veur zels uut de buurt te blieven. Dat gong zo keer op keer,
11 tot grote argewaosie van de keuning van Aram. Hi'j reup zien bevelhebbers bi'j him en vreug heur: "Zeg mi'j: wie van oonze meensken hoolt et mit de keuning van Israël?"
12 Iene van de bevelhebbers zee doe: "Gieniene, mien heer en keuning, mar de profeet Elisa in Israël wet de keuning van Israël alderdeegst te vertellen wat jow in jow slaopkaemer zeggen."
13 Doe zee de keuning: "Zuuk veur mi'j uut waor hi'j is, dan za'k him gevangennemen laoten." Doe him verteld wodde dat Elisa in Dotan was,
14 stuurde hi'j een groot leger mit striedwaegens en peerden op die stad of. De Arameeërs kwammen naachs bi'j Dotan an en omsingelden de stad.
15 Doe de bediende van Elisa de aanderemorgens in de bienen kwam en naor buten gong, zag hi'j dat de stad omsingeld was deur een leger mit striedwaegens en peerden. "Wat moe'we beginnen, heer?" reup hi'j uut.
16 Zien meester zee: "Wees mar niet bange, wi'j bin mit meer as zi'j."
17 En hi'j biddede: "Heer, eupen zien ogen en laot et him zien." De Heer eupende Elisa zien knecht de ogen, en doe zag hi'j dat de heuvels vol stonnen mit peerden en waegens van vuur, die Elisa omringden.
18 Doe de Arameeërs op Elisa ofkwammen, smeekte hi'j de Heer om heur te verblienen. De Heer verbliendde heur, zoas Elisa vraogd hadde,
19 en doe zee Elisa tegen heur: "Jim bin verkeerd. Dit is niet de stad waoj’m wezen moeten. Volge mi'j, dan za’k jim de weg wiezen naor de man diej’m zuken." Hi'j brocht heur naor Samaria,
20 en daor ankommen biddede hi'j: "Heer, eupen heur ogen en laot heur weer zien." De Heer dee heur de ogen eupen, en doe zaggen ze dat ze midden in Samaria weren.
21 Doe de keuning van Israël de Arameeërs zag, vreug hi'j an Elisa: "Wat vienen jow, heit? Za'k ze ommebrengen?"
22 "Nee," zee Elisa, "breng heur niet omme. Hebben jow ze seins mit jow eigen waopens kriegsgevangen maekt, dat jow heur ommebrengen zollen? Zet heur liever wat te eten veur, zodat ze eten en drinken kunnen, en laot ze weeromme gaon naor heur heer."
23 Doe leut de keuning een groot gaastemaol veur heur klaorzetten, en doe ze eten en dronken hadden stuurde hi'j heur weeromme naor heur heer. Van doe of, deden de Aramese benden gien invallen meer in Israël.
Et beleg van Samaria.
24 Een schoft laeter reup keuning Benhadad van Aram zien leger onder de waopens. Hi'j trok op en belegerde Samaria.
25 Et beleg duurde zo lange dat d'r in de stad haost gien eten meer te kriegen was. Veur een ezelskop betaelde et volk uutaendelik tachtig sjekel zulver, en veur een pond doevedrek vuuf sjekel.
26 Doe de keuning van Israël op een keer over de stadsmure leup, galpte een vrouw him toe: "Help mi'j toch, mien heer en keuning!"
27 De keuning zee doe: "As de Heer jow niet helpt, hoe zol ik dat dan kunnen? De döskvloer en de passetonnen bin leeg.
28 Mar wat is d'r dan gaonde?" De vrouw vertelde: "Een vrouw die ik kenne zee tegen mi'j: "kom hier mit je kiend. Vandaege zuwwe jow kiend opeten, en morgen mientes."
29 Doe hewwe mien kiend kookt en opeten. Mar doe ik de aanderedaegs tegen heur zee dat now heur kiend an de beurt was om opeten te wodden, bleek dat zi'j heur kiend votstopt hadde."
30 Bi'j et heuren van dit verhael van de vrouw scheurde de keuning zien kleren, wiels hi'j daor over de stadsmure leup, en de hiele bevolking kon zien dat hi'j onder zien kleren op zien blote lief een boeteklied dreug.
31 De keuning reup uut: "God mag mit mi'j doen wat hi'j wil as et heufd van Elisa, de zeune van Safat, t'aovend nog op zien romp vaaste zit!"
32 Elisa was thuus, en de ooldsten weren bi'j him. De keuning stuurde een bosschopper naor him toe, mar nog veur disse daor was zee Elisa tegen de ooldsten: "Weten jim wel dat die moordenerszeune iene stuurd het om mi'j mien heufd of te slaon? Doe de deure dichte zogauw de bosschopper van de keuning d'r an komt, hool him tegen. Heur, komt zien meester d'r niet vlak aachteran?"
33 Elisa was nog niet uutpraot, of daor kwam de bosschopper van de keuning al an. "De Heer het disse ellende over oons brocht," zee hi'j. "Waorom zol ik mien hope op him dan nog overaende holen?"
 
 
2 Keunings 7.

01 "Luuster naor wat de Heer te zeggen het," zee Elisa. "Dit zegt de Heer: Morgen om disse tied zal een schepel tarwebloem in de stadspoort van Samaria iene sjekel kosten, en twie schepel gaste ok iene sjekel."
02 De adjudant die de keuning begeleidde nam et woord en zee: "Al zol de Heer alderdeegst de hemelsluzen eupenzetten, wat jow daor zeggen is toch onmeugelik!" Mar Elisa zee: "Jow zullen et mit eigen ogen zien, mar jow zullen de kaans niet kriegen om d'r van te eten."
03 Now weren d'r bi'j de stadspoort vier manluden die an de huudziekte leden. Zi'j zeden tegen mekeer: "Waorom zollen we hier de dood ofwaachten?
04 Awwe de stad ingaon, zuwwe van honger ommekommen. En awwe hier zitten blieven, kommen we ok omme. Lao'we overlopen naor de Arameeërs. As zi'j oons in leven laoten, blieven we leven, en as zi'j oons doodmaeken, dan biwwe ok ommekommen."
05 Onder de aovend gongen ze naor et kaamp van de Arameeërs. Mar doe ze bi'j de raand van et kaamp kwammen, was d'r gieniene te bekennen.
06 De Heer had jommes in et Aramese kaamp et geluud van peerden en waegens klinken laoten, van een groot leger, en de Arameeërs hadden tegen mekeer zegd: "Heur, de keuning van Israël het de keunings van de Hethieten en van Iegypte inhuurd om oons an te valen."
07 Tegen et valen van de aovend weren ze d'r drekt vandeur gaon, en ze hadden heur tenten, peerden en ezels daor aachterlaoten. Zi'j hadden et kaamp hals over kop verlaoten en weren vlocht om et vege lief te redden.
08 Doe de vier manluden bi'j de raand van et kaamp kwammen, gongen zi'j een tente binnen. Ze atten en dronken, en neumen et goold en zulver en de kleraosie en dekens die ze d'r antroffen mit. Naodat ze heur buit votstopt hadden, kwammen ze weeromme en gongen een volgende tente binnen. Wat ze daor vunnen, neumen ze ok mit om et vot te stoppen.
09 Mar uutaenlik zeden ze tegen mekeer: "Wawwe doen is niet goed. D'r is vandaege goed ni'js, en awwe dat veur oons holen tot et locht wodt, raeken we in de perblemen. Lao'we drekt naor et peleis van de keuning gaon om te vertellen wat d'r gebeurd is."
10 Ze gongen weeromme naor de stad, reupen de poortwachter en vertelden: "We bin in et Aramese kaamp west. D'r was daor gien meenske te bekennen. Wel stonnen de peerden en ezels nog vaastebunnen, en de tenten stonnen d'r ok nog, mit alles d'r op en d'r an."
11 De poortwaachters sleugen alarm en gavven et bericht deur an et peleis.
12 Hoewel et midden in de naacht was, kwam de keuning in de bienen. Hi'j zee tegen zien raodsheren: "Ik zaj’m zeggen wat de Arameeërs van doel binnen. Ze weten dawwe honger hebben. Daorom hebben ze heur kaamp verlaoten en heur in et veld verburgen. Zo hopen zi'j om oons de stad uut te lokken, zodat zi'j oons levend gevangen nemen kunnen en de stad innemen kunnen."
13 Iene van de raodsheren stelde veur: "D'r bin nog een peer peerden over – et is mit de peerden in disse stad al krek as mit de tallozen van Israël: d'r is bi'jkaans niks meer van over. Lao'we mit vuuf van die peerden es te kieken gaon wat daor gaonde is."
14 Hierop leut de keuning twie waegens inspannen en gaf hi'j bevel om et Aramese leger aachternao te gaon en uut te zuken wat d'r gaonde was.
15 De bosschoppers volgden et spoor van de Arameeërs tot an de Jordaan. De hiele weg lag bezi'jd mit kleraosie en stokken uutrusting die de Arameeërs in de haost votgooid hadden. Doe de bosschoppers weeromme kommen weren en an de keuning verslag uutbrocht hadden,
16 stroomden de meensken de stad uut om et Aramese kaamp te plunderen. Een schepel tarwebloem kostte now nog mar iene sjekel, en twie schepel gaste ok, zoas de Heer veurzegd hadde.
17 De adjudant van de keuning, die opdracht kregen hadde om toezicht te holen bi'j de stadspoort, waor et spul verhaandeld wodde, wodde daor deur de mennigte vertrapt. Zo raekte hi'j weg, zoas de godsman veurzegd hadde doe de keuning bi'j him kwam.
18 Ommes, doe Elisa tegen de keuning zee: "Morgen om disse tied zal twie schepel gaste in de stadspoort van Samaria iene sjekel kosten, en een schepel tarwebloem ok iene sjekel,"
19 had de adjudant van de keuning as bescheid geven: "Alderdeegst al zol de Heer de hemelsluzen eupenzetten, wat jow daor zeggen is toch onmeugelik!" Doe had Elisa zegd: "Jow zullen et mit eigen ogen zien, mar jow zullen niet de kaans kriegen om d'r van te eten."
20 En zo gebeurde et ok: hi'j wodde deur de mennigte in de stadspoort vertrapt en kwam omme.
 
 
2 Keunings 8.

01 Elisa had de vrouw van wie hi'j et kiend weer tot leven wekt hadde, disse raod geven: "Jow moe'n votgaon en mit jow femilie tiedelik argens aanders wonen gaon, waor jow mar terechte kunnen, want de Heer lat een hongersnood kommen die disse streek grif zeuven jaor in zien greep holen zal."
02 De vrouw was vertrokken, zoas de godsman zegd hadde, en zi'j en heur femilie hadden zeuven jaor as vremden in et laand van de Filistijnen woond.
03 Doe ze nao zeuven jaor weer in heur eigen laand weerommekwam, gong ze naor de keuning om zien hulpe in te roepen om heur huus en heur grond weeromme te kriegen.
04 De keuning was krek in gesprek mit Elisa zien knecht Gechazi, an wie hi'j vraogd had om him over de biezundere daoden van de godsman te vertellen.
05 Krek doe Gechazi an et vertellen was hoe Elisa een dooie tot leven wekt hadde, kwam de moeke van et bewuste kiend de hulpe van de keuning inroepen. "Dit is de vrouw over wie ik et had, mien heer en keuning," zee Gechazi, "en dat is de jonge die Elisa tot leven wekt het."
06 De keuning vreug an de vrouw waor zi'j veur kwam, en doe ze verteld had wat ze wol, stuurde hi'j iene van zien kaemerheren mit heur mit, mit de opdracht: "Zorge d'r veur dat zi'j al heur bezittings weeromme krigt, en ok alles wat heur grond opbrocht het vanof de dag dat ze et laand uutgong tot an now toe."
Elisa in Damascus.
07 Op een keer kwam Elisa naor Damascus, krek doe keuning Benhadad van Aram ziek was. Et volk vertelde de keuning dat de godsman kommen was,
08 en de keuning dreug Hazaël op: "Gao de godsman mit een kedo integen, en vraog him om de Heer te vraogen of ik van disse ziekte genezen zal."
09 Mit veertig kemelen, belaeden mit verschillende kostberheden uut Damascus, gong Hazaël Elisa integen. Hi'j maekte bi'j de godsman zien opwaachting en zee: "Keuning Benhadad van Aram stuurt mi'j naor jow toe, zien raodgever, om te vraogen of hi'j van zien ziekte genezen zal."
10 Elisa zee: "Jow kun tegen de keuning zeggen dat hi'j grif genezen zal, mar de Heer het mi'j weten laoten dat de keuning ok wegraeken zal."
11 De godsman keek Hazaël lange tied strak an en bastte doe in traonen uut.
12 "Waoromme goelen jow, mien heer?" vreug Hazaël, en Elisa zee doe: "Omreden ik weet wat veur ellende jow de Israëlieten andoen zullen. Jow zullen heur verstarkte steden in de aske leggen, heur jongkerels an jow zweerd riegen, heur kiender de schedel inslaon en heur zwangere vrouwluden de boek eupensnieden."
13 Mar Hazaël zee: "Mar heer, hoe zol een niksweerdige hond as ik tot zokke biesterbaorlike daoden in staot wezen?" En Elisa zee doe: "De Heer het mi'j jow toond as keuning van Aram."
14 Hazaël gong weeromme naor zien heer. "Wat het Elisa zegd?" vreug de keuning, en Hazaël zee: "Hi'j zee mi'j dat jow grif wel genezen zullen."
15 De aanderedaegs nam Hazaël een doek, maekte die nat en drokte die over et gezichte van Benhadad, zodat hi'j stikte. Hazaël wodde in zien plak keuning.
Joram, keuning van Juda.
16 Joram, de zeune van Josafat, wodde keuning van Juda in et vuufde regeringsjaor van keuning Joram van Israël, de zeune van Achab, doe Josafat over Juda regeerde.
17 Hi'j was twienendattig jaor oold doe hi'j keuning wodde, en regeerde acht jaor in Jeruzalem.
18 Hi'j volgde et veurbeeld van de keunings van Israël, krek zoas et keuningshuus van Achab dat dee, omreden hi'j mit een vrouw uut de femilie van Achab trouwd was. Hi'j dee wat slecht is in de ogen van de Heer,
19 mar toch wol de Heer Juda niet vernietigen, omwille van zien knecht David, an wie hi'j beloofd hadde dat hi'j et locht van zien keuningshuus veur altied branen laoten zol.
20 Tiedens de regering van Joram kwammen de Edomieten tegen Juda in opstaand en wezen zi'j een eigen keuning an.
21 Joram trok mit al zien striedwaegens naor Saïr op. Mar de Edomieten omsingelden him en de anvoerders van zien striedwaegens. Doe dee hi'j naachs een uutval en versleug de Edomieten, zodat et leger ontkommen kon.
22 Zo maekte Edom him van Juda los, en dat is zo bleven tot op de dag van vandaege. Ok Libna maekte him in die tied los van Juda.
23 Veerdere biezunderheden over Joram bin optekend in de kronieken van de keunings van Juda.
24 Doe hi'j wegraekte, wodde hi'j begreuven bi'j zien veuroolden in de Davidsburcht. Zien zeune Achazja volgde him op.
Achazja, keuning van Juda.
25 Achazja, de zeune van keuning Joram van Juda, wodde keuning in et twaelfde regeringsjaor van keuning Joram van Israël, de zeune van Achab.
26 Hi'j was twienentwintig jaor oold doe hi'j keuning wodde. Ien jaor regeerde hi'j in Jeruzalem. Zien moeke was Atalja, de dochter van keuning Omri van Israël.
27 Hi'j volgde et veurbeeld van et keuningshuus van Achab en dee wat slecht is in de ogen van de Heer, krek zoas de leden van et keuningshuus van Achab, want hi'j had ok een vrouw uut de femilie van Achab trouwd.
28 Achazja gong mit keuning Joram, de zeune van Achab, mit naor Ramot in Gilead om et gevecht an te gaon mit keuning Hazaël van Aram. Mar doe Joram gewond raekte,
29 gong hi'j naor Jizreël weeromme om te herstellen van de verwondings die de Arameeërs him tiedens de slag mit keuning Hazaël van Aram, bi'j Ramot, toebrocht hadden. Achazja, de zeune van Joram en keuning van Juda, gong naor Jizreël om de gewonde keuning Joram van Israël een bezuuk te brengen.
 
 
2 Keunings 9.

01 Ondertussen reup de profeet Elisa iene van de leerlingen van de profetegemienschop bi'j him en dreug him op: "Neem dit krukien mit eulie en gao zo hadde aj' kunnen naor Ramot in Gilead.
02 Daor ankommen moej' Jehu opzuken, de zeune van Josafat, de zeune van Nimsi. Gao naor him toe en neem him appat. Gao mit him naor een appatte kaemer
03 en giet et krukien eulie over zien heufd uut mit de woorden: "dit zegt de Heer: Hierbi'j zalve ik jow tot keuning van Israël." Daornao moej' de kaemer uutgaon en maeken daj' wegkommen."
04 De jonge profeet gong naor Ramot in Gilead.
05 Doe hi'j daor ankwam, zatten de bevelhebbers van et leger bi'j mekeer. "Kan ik even mit jow praoten, overste?" vreug hi'j. "Mit wie van oons wi'j' praoten?" vreug Jehu. "Mit jow, overste," zee hi'j doe.
06 Jehu kwam overaende en gong mit de jonge profeet mit naor binnen. Daor geut de profeet de eulie over Jehu zien heufd uut en zee: "Dit zegt de Heer, de God van Israël: Hierbi'j zalve ik jow tot keuning over Israël, et volk van de Heer.
07 Ruum et keuningshuus van Achab, waorbi'j ie in dienst binnen, uut de weg, want ik wil et bloed wreken van de profeten en van al mien aandere knechten die deur Izebel ommebrocht binnen.
08 Hiel et keuningshuus van Achab zal verinneweren, alle mannelike leden van zien femilie za'k uutroeien, van hoge tot lege.
09 Et zal et keuningshuus van Achab krek zo gaon as et keuningshuus van Jerobeam, de zeune van Nebat, en krek as et keuningshuus van Basa, de zeune van Achia.
10 En Izebel zal op de akkers van Jizreël deur de honnen opvreten wodden, gieniene zal heur begreven." Doe gong de profeet de kaemer uut en maekte dat hi'j votkwam.
11 Doe Jehu weerommekwam bi'j de knechten van zien heer, vreugen ze him: "Is alles in odder? Wat mos die gek van jow?" "Ach, et gewone ge-aemel, jim kennen dat wel," zee Jehu.
12 "Maek dat de katte wies," zeden ze. "Zeg op, wat had hi'j te vertellen?" Doe zee Jehu: "Hi'j het mi'j dit zegd: "dit zegt de Heer: Hierbi'j zalve ik jow tot keuning van Israël.""
13 Vot-en-daolik deden ze allemaole heur maantels of en spreidden die veur him as loper over de traptreden uut. Doe blaosden ze op de ramshoorn en reupen: "Jehu is keuning!"
De dood van Joram en Achazja.
14 Jehu, de zeune van Josafat, de zeune van Nimsi, beraomde een komplot tegen keuning Joram. Die had mit hiel et leger van Israël Ramot in Gilead verdedigd tegen keuning Hazaël van Aram,
15 mar was naor Jizreël weerommegaon om beter te wodden van de verwondings die de Arameeërs him tiedens de slag mit keuning Hazaël van Aram toebrocht hadden. "Aj’m‘t d'r mit iens binnen," zee Jehu tegen de aandere bevelhebbers, "lao'we d'r dan veur zorgen dat gieniene uut de stad ontsnapt om in Jizreël te vertellen wat hier gebeurd is."
16 Doe ree hi'jzels naor Jizreël, waor Joram gewond op bedde lag. Keuning Achazja van Juda was ok naor Jizreël kommen om Joram op te zuken.
17 Doe de waachtpost op de toren van Jizreël Jehu en zien gevolg in et oge kreeg, meldde hi'j dat d'r een hiele optocht ankwam. Joram beveelde dat heur een ruter integen mos gaon om te vraogen of alles in odder was.
18 De ruter gong heur integen en zee: "De keuning lat vraogen of alles in odder is." "Dat giet je niks an," zee Jehu doe. "Volge mi'j." De waachtpost meldde dat de bosschopper de optocht beriekt had en mar niet weerommekwam.
19 Joram stuurde een twiede ruter, en doe disse bi'j Jehu kwam zee hi'j: "De keuning lat vraogen of alles in odder is." "Dat giet je niks an," zee Jehu opni'j. "Volge mi'j."
20 De waachtpost meldde dat de bosschopper de optocht beriekt had mar niet weerommekwam. En hi'j zee d'r bi'j: "An zien rieden te zien is et Jehu, de zeune van Nimsi, die de stad naodert, want hi'j ridt as een gek."
21 Doe beveelde Joram om zien waegen in te spannen. De waegen wodde inspand en keuning Joram van Israël en keuning Achazja van Juda reden uut, ieder in zien eigen waegen, Jehu integen. Op de akker van de Jizreëliet Nabot troffen zi'j mekeer.
22 Doe Joram Jehu zag, vreug hi'j: "Is alles in odder, Jehu?" Jehu zee: "Hoe kan alles in odder wezen zolange de losbaandige praktieken en de toverkeunsten van jow moeke Izebel mar deurgaon?"
23 Joram keerde de teugels en vlochtte vot, wiels hi'j Achazja toereup: "Verraod, Achazja!"
24 Mar Jehu greep vlogge zien boge en trof Joram tussen zien schoolderblaeden. De pielke gong dwas deur zien hatte en Joram zakte in zien waegen in mekeer.
25 Jehu zee tegen zien adjudant Bidkar: "Pak him op en smiet him op 'e akker van de Jizreëliet Nabot. Jow herinneren jow vaaste nog wel hoe wi'j twienen naost mekeer aachter zien heit Achab an reden doe de Heer neffens de profetie over him zee:
26 "zo waor ik gister et bloed van Nabot en zien zeunen stromen zien hebbe – zo zegt de Heer –, zo waor zal ik et jow op disse akker vergellen – zo zegt de Heer." Dus pak him op en gooi him op de akker, zoas de Heer zegd het."
27 Keuning Achazja van Juda, die zag wat d'r gebeurde, nam de bienen naor Bet-Haggan. Mar Jehu zette de aachtervolging in en reup: "Breng him ok omme!" Achazja wodde troffen wiels hi'j in zien waegen de pas van Gur bi'j Jibleam opree. Hi'j wus te ontkommen naor Megiddo, en daor is hi'j wegraekt.
28 Zien knechten brochten zien lichem op een waegen over naor Jeruzalem, waor ze him begreuven bi'j zien veuroolden in de Davidsburcht.
29 Achazja was keuning van Juda wodden in et elfde regeringsjaor van Joram, de zeune van Achab.
De dood van Izebel.
30 Doe Izebel heurde dat Jehu onderwegens was naor Jizreël, maekte zi'j heur een betien op, kamde heur haor en gong bi'j ‘t raem op de uutkiek staon.
31 Doe Jehu bi'j de stadspoort kwam verwelkomde zi'j him mit de woorden: "Giet et goed mit je, Zimri de Keuningsmoordener?"
32 Jehu keek omhogens en vreug: "Is daor iene die an mien kaante stiet? Gieniene?" Twie, drie eunuchen verschenen an ‘t raem
33 en Jehu beveelde heur: "Gooi heur et raem uut!" Ze gooiden heur naor beneden, zodat heur bloed tegen de stadsmure en tegen de peerden opspatterde. Jehu vertrapte heur lichem.
34 Doe trok hi'j de stad binnen en leut him wat te eten veurzetten. Doe hi'j eten en dronken had zee hi'j: "Gao es naor die vervluukte vrouw kieken en begreef heur, uutaenlik is zi'j wel een keuningsdochter."
35 Mar de manluden die heur begreven gongen vunnen allienig nog heur schedel, heur voeten en heur hanen.
36 Doe zi'j weerommekwammen om et an Jehu te vertellen zee disse: "Zo voldee de Heer an wat hi’j deur de Tisbiet Elia veurzegd hadde: "de honnen zullen et lichem van Izebel op de akkers van Jizreël opvreten.
37 Et liek van Izebel zal as een hoop dong op et laand liggen, op de akkers van Jizreël, en gieniene zal zeggen kunnen: "Dit was Izebel."""
 
 
2 Keunings 10.

01 In Samaria woonden nog zeuventig zeunen van Achab. Jehu stelde brieven op die hi'j naor Samaria stuurde, naor de bevelhebbers van Jizreël, de ooldsten en de voogden die Achab ansteld hadde. In disse brieven ston schreven:
02 "De zeunen van jow heer wonen bi'j jow en jow beschikken over peerden en striedwaegens, een verstarkte stad en waopens. Now dan, as jow disse brief kriegen,
03 kies dan de meerst geschikte zeune van de keuning, zet him op zien heiten troon en wees d'r klaor veur om et keuningshuus van jow heer te verdedigen."
04 De ontvangers van disse brieven wodden verschrikkelik bange en zeden: "Twie keunings hebben et al tegen him oflegd. Hoe zollen wi'j dan staandholen?"
05 De peleis- en de stadskommendaanten, de ooldsten en de voogden van de keuningszeunen stuurden Jehu daorom dit bericht: "Wi'j bin jow knechten, heer. We zullen alles doen wat jow oons opdregen. Wi'j zullen gieniene as keuning anwiezen. Doen jow mar wat jow et beste toeliekt."
06 Hierop schreef Jehu heur een twiede brief, waorin hi'j zee: "Aj’m op mien haand binnen en mi'j geheurzem wezen willen, ontheufde dan alle zeunen van jim heer en melde je morgen om disse tied bi'j mi'j in Jizreël." D'r weren zeuventig keuningszeunen, die deur veurnaeme inwoners van de stad grootbrocht wodden.
07 Nao ontvangst van de twiede brief wodden alle zeuventig keuningszeunen gevangenneumen en ommebrocht. Heur heufden wodden in maanden daon, die naor Jehu in Jizreël stuurd wodden.
08 Doe een bosschopper meldde dat de heufden van de keuningszeunen brocht weren, beveelde Jehu ze in twie hopen bi'j de ingaank van de stadspoort te leggen en ze daor tot de aanderedaegs liggen te laoten.
09 De aanderemorgens kwam hi'j naor buten en zee tegen de bevolking: "Oordielen jim zels: Ik hebbe tegen mien heer een saemenzwering smeded en him vermoord. Mar deur wie bin disse keuningszeunen ommebrocht?
10 Beseffe goed dat an alles wat de Heer tegen et keuningshuus van Achab uutspreuken het, voldaon wodden zal. De Heer dot wat hi'j deur zien knecht Elia veurzegd het."
11 En Jehu leut alle femilieleden van Achab die nog in Jizreël weren ommebrengen, en ok al zien ambtners, vertrouwelingen en priesters; niet iene bleef in leven.
12 Doe vertrok Jehu naor Samaria. Doe hi'j onderwegens deur Bet-Eked kwam, een trefpunt van hedders,
13 kwam hi'j daor de breurs van keuning Achazja van Juda tegen. "Wie bin jim?" vreug hi'j, en zi'j zeden: "Wi'j bin breurs van Achazja. We bin onderwegens om de keuningszeunen en de zeunen van de keuningin-moeke een bezuuk te brengen."
14 "Griep ze levend!" beveelde Jehu, en de breurs van Achazja wodden grepen en bi'j de putte van Bet-Eked ommebrocht. Ze weren mit twienenveertig man, en niet iene bleef in leven.
15 Jehu gong veerder en kwam even laeter tegenover Jonadab, de zeune van Rechab, te staon. Hi'j begroette him en zee: "Hebben jow et goed mit mi'j veur, zoas ik mit jow?" "Jaowel," zee Jonadab, "geef mi'j jow haand." Jehu gaf him de haand en vreug him om op zien waegen zitten te gaon.
16 "Gao mit mi'j mit," zee hi'j, "dan kuj' zien hoe ik mi'j veur de Heer in 't zwiet wark." Zo ree Jonadab mit Jehu mit.
17 Doe Jehu in Samaria kwam, doodde hi'j daor iederiene die nog over was van et hof van Achab, tot hi'j et hiele keuningshuus van Achab uutroeid hadde, zoas de Heer an Elia veurzegd hadde.
18 Daornao leut hi'j de bevolking van de stad bi'j mekeer kommen en zee: "Achab het Baäl mar een betien vereerd; Jehu zal him beter dienen.
19 Laot alle profeten van Baäl hier kommen, al zien knechten en al zien priesters, niet iene mag dit missen. Ik wil jommes een plechtige offerdienst veur Baäl holen, en wie d'r niet is zal dat mit de dood bekopen." Dit was een list van Jehu om de knechten van Baäl omme te brengen.
20 "Kondig een feestelike saemenkomst of te ere van Baäl," beveelde Jehu, en zo gebeurde et.
21 Jehu stuurde bosschoppers deur hiel Israël en van alle kaanten kwammen de knechten van Baäl naor Samaria, gienend van heur bleef weg. Ze verzaemelden heur in de tempel van Baäl, en doe de tempel hielendal vol ston,
22 gaf Jehu de beheerder van de priesterkleren opdracht om alle knechten van Baäl feestkleren te geven. Doe dat gebeurd was
23 gong Jehu mit Jonadab, de zeune van Rechab, naor de tempel van Baäl en zee tegen de anwezigen: "Kiek goed om jim henne of d'r onder jim gien knechten van de Heer binnen. Disse plechtighied is allienig bestemd veur de knechten van Baäl."
24 Jehu en Jonadab gongen de tempel binnen om vrede-offers en braandoffers te brengen, wiels buten tachtig man op waacht stonnen die Jehu daor hennezet hadde. "Jim bin verantwoordelik," had hi'j zegd. "Wie ok mar iene ontkommen lat, zal dat mit zien eigen leven bekopen."
25 Doe Jehu mit et braandoffer klaor was, beveelde hi'j zien liefwaachten en zien adjudanten: "Veuruut, maek ze dood! Laot niet iene van heur ontkommen." Ze doodden de knechten van Baäl tot de laeste man en leuten de lieken liggen. Doe drongen ze et verstarkte pat van de tempel van Baäl binnen,
26 haelden de gewi’jde stienen d'r uut en gooiden die in et vuur.
27 Ze sleugen de an Baäl gewi’jde stien an stokken en haelden de tempel van Baäl omveer. Sund die tied dot et tempelterrein dienst as dongbulte, tot op de dag van vandaege.
28 Jehu maekte dus een aende an de Baälsdienst in Israël,
29 mar hi'j brak niet mit de zundige praktieken van Jerobeam, de zeune van Nebat, die de Israëlieten tot zunde anzet hadde, want de goolden stierebeelden in Betel en Dan leut hi'j mit rust.
30 De Heer zee tegen Jehu: "Ie hebben goed wark daon, deur te doen wat goed is in mien ogen: ie hebben mien veurnemens mit et keuningshuus van Achab hielendal uutvoerd. Daorom zullen jow naokommelingen tot in de vierde generaosie op de troon van Israël zitten."
31 Mar Jehu nam de wetten van de Heer, de God van Israël, niet mit vaosie an. Hi'j brak niet mit de zundige praktieken van Jerobeam, die de Israëlieten tot zunde anzet hadde.
32 In disse tied begon de Heer et grondgebied van Israël in te dammen. Hazaël veroverde op de Israëlieten et hiele gebied
33 an de oostkaante van de Jordaan: hiel Gilead, et stamgebied van Gad, Ruben en Manasse, vanof Aroër an de Arnon, en behalven Gilead ok Basan.
34 Veerdere biezunderheden over Jehu en over de overwinnings die hi'j behaelde bin optekend in de kronieken van de keunings van Israël.
35 Doe Jehu bi'j zien veuroolden te ruste gong, wodde hi'j begreuven in Samaria. Zien zeune Joachaz volgde him op.
36 Achtentwintig jaor had Jehu Israël vanuut Samaria regeerd.
 
 
2 Keunings 11.

01 Doe Atalja, de moeke van Achazja, heurde dat heur zeune dood was, besleut zi'j om alle kiender van de keuninklike femilie omme te brengen.
02 Mar Jehoseba, de dochter van keuning Joram en de zuster van Achazja, haelde iene van Achazja zien zeunen, Joas, stiekem weg uut de groep van keuningskiender die ommebrocht wodden zollen en verstopte him mit zien min in de linnekaemer. Ze wussen him veur Atalja votstopt te holen, en zo ontsnapte hi'j an de dood.
03 Zes jaor zat hi'j bi'j zien mujke in de tempel van de Heer verburgen, wiels Atalja et laand regeerde.
04 In et zeuvende regeringsjaor van Atalja reup Jojada, die doe hogepriester was, de bevelhebbers van de Kariërs en van de keuninklike keurtroepen bi'j him in de tempel van de Heer. Daor sleut hi'j een verbond mit heur en leut hi'j heur trouw zweren. Doe stelde hi'j de keuning zien zeune an heur veur.
05 Daornao dreug hi'j heur dit op: "Dit is waj’m doen moeten: Splits de ienhied die disse weke dienst het in drie groepen. Laot de eerste ploeg de waacht holen bi'j et keuninklik peleis,
06 de twiede in de Surpoort en de dadde in de poort aachter de kaemer van de keuninklike keurtroepen, zodaj'm et peleis van alle kaanten in de gaten holen kunnen.
07 De twie ienheden die disse weke gien dienst hebben, moe'n de waacht holen bi'j de tempel en de keuning bescharmen.
08 Laot iederiene zien waopens in de anslag holen en vorm een sleuten kring rond de keuning. Verlies him gien mement uut et oge en breng iederiene omme die deur et kordon perbeert te breken."
09 De bevelhebbers deden krek wat de hogepriester Jojada beveulen had. Iederiene meldde him mit zien ienhied van honderd man bi'j Jojada, liekegoed degenen die as die weke dienst hadden as degenen die die weke vri'j van dienst weren.
10 Jojada gaf de bevelhebbers de speren en schilden uut de tempel van de Heer, die nog van keuning David west weren.
11 De leden van de keurtroepen stelden heur, iederiene mit zien waopen in de anslag, veur de tempel op, over de volle brette van et plein en vanof de ingang van de tempel tot an et alter, om de keuning te bescharmen.
12 Doe leidde de hogepriester de keuning zien zeune naor buten, zette him de heufdbaand op en gaf him de kroningsakte. Zo wodde hi'j tot keuning uutroepen en zalfd, wiels iederiene die daorbi'j was, in de hanen klapte en reup: "Leve de keuning!"
13 Doe Atalja de keuninklike keurtroepen en et volk juichen heurde, begaf zi'j heur in de mennigte die him veur de tempel verzaemeld hadde.
14 Daor zag ze de keuning, die him neffens et gebruuk op et podium opsteld hadde, mit de bevelhebbers en de trompetblaozers naost him. De hiele bevolking was in feeststemming en et volk blaosde op de trompetten, mar Atalja scheurde heur kleren en reup: "Verraod! Verraod!"
15 De hogepriester Jojada dreug de bevelhebbers, de anvoerders van et leger, op: "Leide heur onder bewaeking vot; wie heur volgt, moet ommebrocht wodden." Hi'j zee d'r mit naodrok bi'j dat ze niet op et tempelterrein ommebrocht wodden moch.
16 Atalja wodde wegleided en deur de Peerdepoort naor et peleis voerd, waor ze ommebrocht wodde.
17 Jojada bekrachtigde et verbond tussen de Heer en de keuning en et volk, zodat zi'j de Heer weer toebeheuren zollen, en ok et verbond tussen de keuning en et volk.
18 De meensken, die uut hiel Juda toestroomd weren, haelden de tempel van Baäl omveer en verinneweerden de alters en beelden die veur him opricht weren. De Baälspriester Mattan wodde veur de alters ommebrocht. Naodat Jojada waachters anwezen hadde om de tempel van de Heer te bewaeken,
19 begeleidde hi'j de keuning mit de bevelhebbers, de Kariërs, de keuninklike keurtroepen en hiel et volk van de tempel via de Gardepoort naor et peleis, waor hi'j him zitten gaon leut op de keuningstroon.
20 Et hiele volk hadde et naor ‘t zin, en hoewel Atalja in et keuninklik peleis ommebrocht was, bleef et rustig in de stad.
 
 
2 Keunings 12.

01 Joas was zeuven jaor oold doe hi'j keuning wodde,
02 in et zeuvende regeringsjaor van Jehu. Veertig jaor regeerde hi'j in Jeruzalem. Zien moeke hiette Sibja en kwam uut Berseba.
03 Zien leven lange dee Joas wat goed is in de ogen van de Heer, zoas de hogepriester Jojada him dat leerd hadde.
04 Toch bleven de offerplakken bestaon, en bleven de Judeeërs daor offers brengen en wierook branen.
05-06 Joas dreug de priesters dit op: "De priesters meugen al et zulver dat as wi’jgeschenk veur de tempel van de Heer ofdreugen wodt veur heurzels holen, ieder wat hi'j persoonlik krigt. Dat gelt niet allienig veur et zulver dat betaeld wodden moet as et volk bi'j een volkstelling riggestreerd wodt en et zulver dat neffens tarief betaeld wodden moet om iene vri'j te kopen, mar ok al et zulver dat vri'jwillig an de tempel van de Heer geven wodt. Zi'j moe'n d'r dan wel veur zorgen dat de tempel van de Heer overal waor neudig hersteld wodt."
07 Mar in Joas zien drienentwintigste regeringsjaor weren de priesters nog de hieltied niet an et herstel van de tempel begonnen.
08 Daorom leut de keuning de hogepriester Jojada en de aandere priesters bi'j him kommen en vreug: "Waorom doen jim niks om de tempel te herstellen? Van now an meugen jim et zulver dat ieder van jim krigt niet meer veur jimzels holen, mar moe'n jim et vot-en-daolik ofdregen veur et herstel van de tempel."
09 De priesters stemden d'r mit in dat zi'j gien zulver van et volk meer annemen zollen, mar dan ok gien verantwoordelikhied dregen zollen veur et herstel van de tempel.
10 De hogepriester Jojada nam een kiste, boorde een gat in et deksel en zette de kiste bi'j et alter, rechts bi'j de ingang van de tempel. Daorin deden de priesters die de ingang bewaekten al et zulver dat veur de tempel van de Heer ofdreugen wodde.
11 As ze zaggen dat d'r een protte zulver in de kiste lag, leuten zi'j de hofschriever en de hogepriester kommen om et zulver dat in de tempel was in zakkies over te doen en die te tellen.
12-13 Et zulver wodde in ofweugen patten an de bouwmeesters geven die mit et herstel van de tempel belast weren. De bouwmeesters betaelden de timmerluden, metselers, stienhouwers en aandere warkvolk die an de tempel warkten, zodat zi'j balkens en stienen anschaffen konnen om de bouwvallige stokken van de tempel te herstellen, en betaelden veerder ok alles wat d'r veur et wark neudig was.
14 Et zulver dat veur de tempel van de Heer ofdreugen wodde, wodde niet bruukt om zulveren schottels, messen, offerschaolen, trompetten of aandere zulveren of goolden veurwarpen an te schaffen;
15 alles wodde an de bouwmeesters geven om et herstelwark d'r mit te bestuveren.
16 De bouwmeesters die et zulver an et warkvolk geven mossen hoefden gien rekentien of te geven, want zi'j weren deur en deur betrouwber.
17 Zulver veur hersteloffers en reinigingsoffers wodde niet veur de tempel van de Heer bestemd; dat bleef veur de priesters.
18 In die tied rokte keuning Hazaël van Aram op tegen Gat. Hi'j belegerde de stad en nam heur in. Even laeter nam hi'j him veur om tegen Jeruzalem op te trekken.
19 Keuning Joas van Juda verzaemelde alle goold en zulver dat zien veuroolden Josafat, Joram en Achazja, keunings van Juda, an de tempel geven hadden, en ok zien eigen goold en zulver en de rest van et goold dat nog in de schatkaemers van de tempel en et peleis lag. Dat alles stuurde hi'j naor keuning Hazaël van Aram, die doe van zien veldtocht tegen Jeruzalem ofzag.
20 Veerdere biezunderheden over Joas bin optekend in de kronieken van de keunings van Juda.
21 Zien dienstvolk kwam in opstaand en zweerde tegen him saemen. Zi'j brochten him omme in Bet-Millo, an de weg naor Silla.
22 Hi'j wodde vermoord deur zien knechten Jozachar, de zeune van Simat, en Jozabad, de zeune van Somer. Nao zien dood wodde hi'j begreuven bi'j zien veuroolden in de Davidsburcht. Zien zeune Amasja volgde him op.
 
 
2 Keunings 13.

01 Joachaz, de zeune van Jehu, wodde keuning van Israël in et drienentwintigste regeringsjaor van keuning Joas van Juda, de zeune van Achazja. Zeuventien jaor regeerde hi'j in Samaria.
02 Hi'j dee wat min is in de ogen van de Heer: hi'j volgde et slechte veurbeeld van Jerobeam, de zeune van Nebat, die de Israëlieten tot zunde anzet had, en brak niet mit zien zundige praktieken.
03 Daorom wodde de Heer poerlelk op de Israëlieten en leverde hi'j heur gedurende die hiele tied over an keuning Hazaël van Aram en zien zeune Benhadad.
04 Joachaz perbeerde de Heer mild te stemmen en de Heer gaf him geheur, want hi'j had zien hoe Israël te lieden had onder de onderdrokking deur de keuning van Aram.
05 Hi'j stuurde iene om de Israëlieten vri’j te maeken. Doe zi'j et Aramese jok ofwurpen hadden, konnen zi'j heur gewone leven weer oppakken.
06 Toch brakken ze niet mit de zundige praktieken van et huus van Jerobeam, die heur tot zunde anzet had, mar bleven daorbi'j. Alderdeegst de Asjerapaol in Samaria leuten ze staon.
07 Van et leger van Joachaz was niks meer over, allienig nog vuuftig waegenmenners, tien striedwaegens en tienduzend man voetvolk. De keuning van Aram had vernietigend toesleugen en et leger van Israël hielendal onder de voete lopen.
08 Veerdere biezunderheden over Joachaz en over de overwinnings die hi'j behaelde bin optekend in de kronieken van de keunings van Israël.
09 Doe hi'j bi'j zien veuroolden te ruste gong, wodde hi'j begreuven in Samaria. Zien zeune Joas volgde him op.
Joas, keuning van Israël; de dood van Elisa.
10 Joas, de zeune van Joachaz, wodde keuning van Israël in et zeuvenendattigste regeringsjaor van keuning Joas van Juda. Zestien jaor regeerde hi'j in Samaria.
11 Hi'j dee wat min is in de ogen van de Heer: hi'j brak niet mit de zundige praktieken van Jerobeam, de zeune van Nebat, die de Israëlieten tot zunde anzet had, mar bleef slechte dingen doen.
12 Veerdere biezunderheden over Joas en over de overwinning die hi'j behaelde in de oorlog tegen keuning Amasja van Juda, bin optekend in de kronieken van de keunings van Israël.
13 Doe hi'j bi'j zien veuroolden te ruste gong, volgde Jerobeam him op. Joas wodde begreuven in Samaria, bi'j de keunings van Israël.
14 Doe Elisa ziek wodden was en op starven lag, zocht keuning Joas van Israël him op. Goelend reup hi'j uut: "Heit, heit! Striedwaegen en peerdevolk van Israël!"
15 Elisa zee tegen de keuning: "Hael een boge en pielken." Doe Joas dat daon hadde,
16 zee Elisa: "Span de boge." Joas spande de boge, en Elisa legde zien hanen over de hanen van de keuning henne
17 en zee: "Doe et raem dat uutkikt naor et oosten eupen." Joas dee et raem eupen, en Elisa zee: "Schiet!" De keuning scheut een pielke of, en Elisa zee: "Disse pielke is een overwinningsteken van de Heer. Disse pielke betekent de overwinning op Aram. Bi'j Afek zullen jow Aram vernietigend verslaon."
18 Doe zee Elisa: "Pak jow pielken." Joas nam de pielken in zien haand en Elisa zee tegen de keuning: "Slao mit de pielken op de grond." Joas sleug driemaol mit de pielken op de grond, niet vaeker.
19 Doe reup de godsman poerlelk uut: "Had mar vuuf of zes keer sleugen! Dan zollen jow Aram vernietigend versleugen hebben. Now zullen jow Aram mar drie keer een nederlaoge toebrengen."
20 Elisa raekte weg en wodde begreuven. Et was et seizoen waorin ieder jaor weer Moabitische benden et laand binnenvullen.
21 Doe de plunderers d'r an kwammen, wodde d'r krek iene begreuven. Vlogge gooiden ze de dooie in Elisa zien graf. Zogauw hi'j in et graf in anraeking kwam mit et bonkerak van Elisa, kwam de degene die wegraekt was weer tot leven en kwam overaende.
22 Keuning Hazaël van Aram had Israël gedurende de hiele regeringsperiode van Joachaz onderdrokt.
23 Mar de Heer was de Israëlieten genaodig. Hi'j kreeg medelieden mit heur en was mit heur begaon vanwegens et verbond dat hi'j mit Abraham, Isaak en Jakob sleuten had. Hi'j wol de Israëlieten niet uutroeien en verstootte heur niet, zoas hi'j dat tot op de dag van vandaege niet daon het.
24 Doe keuning Hazaël van Aram wegraekte, volgde zien zeune Benhadad him op.
25 Joas, de zeune van Joachaz, heroverde op Benhadad, de zeune van Hazaël, de steden die de heit van Benhadad in de oorlog op Joachaz veroverd hadde. Driemaol brocht hi'j him een nederlaoge toe en hi'j heroverde de steden veur Israël.
 
 
2 Keunings 14.

01 Amasja, de zeune van Joas, wodde keuning van Juda in et twiede regeringsjaor van keuning Joas van Israël, de zeune van Joachaz.
02 Hi'j was vuventwintig jaor oold doe hi'j keuning wodde. Negenentwintig jaor regeerde hi'j in Jeruzalem. Zien moeke was Jehoaddan, zi'j was ofkomstig uut Jeruzalem.
03 Hi'j dee wat goed is in de ogen van de Heer, al was et niet in die maote as zien veurvader David. Hi'j volgde in alle opzichten et veurbeeld van zien heit Joas,
04 dus bleven de offerplakken bestaon en bleven de Judeeërs daor offers brengen en wierook branen.
05 Doe Amasja de macht ienkeer stevig in hanen had, leut hi'j et dienstvolk die zien heit vermoord hadden ommebrengen.
06 Mar de kiender van de moordeners brocht hi'j niet omme, zoas schreven stiet in et boek mit de wet van Mozes, die deur de Heer oplegd is: "Oolden meugen niet ommebrocht wodden om wat heur kiender misdaon hebben, en kiender niet om de misdaoden van heur oolden; allienig om wat iene zels misdaon het, mag hi'j ommebrocht wodden."
07 In de Zooltvallei versleug Amasja de Edomieten, tienduzend man. Hi'j veroverde Sela en gaf et de naeme Jokteël, en zo hiet et tot op de dag van vandaege.
08 Doe stuurde hi'j gezaanten naor de keuning van Israël, Joas, de zeune van Joachaz, de zeune van Jehu, mit de bosschop: "Lao'we es kieken wie van oons de starkste is."
09 Keuning Joas van Israël leut keuning Amasja van Juda dit bescheid overbrengen: "Op ‘n keer, in de Libanon, vragt de stiekelstruke an de ceder: "geef jow dochter an mien zeune as vrouw." Mar doe kwam d'r een wild dier langes, dat de stiekelstruke vertrapte.
10 Jow hebben Edom versleugen, dat is waor, mar now bin jow overmoedig wodden. Gedreeg je weerdig en blief waoj' binnen. Waorom zollen jow jezels in et ongelok stotten en Juda mitsleuren in jow val?"
11 Mar Amasja luusterde niet. Doe rokte keuning Joas van Israël op, en in Bet-Semes in Juda matten hi'j en keuning Amasja van Juda heur krachten.
12 Juda wodde deur Israël versleugen en alle Judeeërs nammen de bienen.
13 De keuning van Juda, Amasja, de zeune van Joas, de zeune van Achazja, wodde in Bet-Semes deur keuning Joas van Israël gevangenneumen. Doe trok keuning Joas op naor Jeruzalem en sleug een gat van vierhonderd el in de stadsmure, van de Efraïmpoort tot an de Hoekpoort.
14 Doe hi'j naor Samaria weerommegong, nam hi'j al et goold en zulver en alle aandere veurwarpen mit die in de tempel van de Heer en de schatkaemers van et keuninklik peleis weren, en een groep gijzelers.
15 Veerdere biezunderheden over Joas en over de overwinnings die hi'j in zien gevechten tegen keuning Amasja van Juda behaelde, bin optekend in de kronieken van de keunings van Israël.
16 Doe hi'j bi'j zien veuroolden te ruste gong, wodde hi'j begreuven in Samaria, bi'j de keunings van Israël. Zien zeune Jerobeam volgde him op.
17 Nao de dood van keuning Joas van Israël, de zeune van Joachaz, leefde keuning Amasja van Juda, de zeune van Joas, nog vuuftien jaor.
18 Veerdere biezunderheden over Amasja bin optekend in de kronieken van de keunings van Juda.
19 Doe d'r in Jeruzalem tegen him saemenspand wodde, nam hi’j de bienen naor Lachis, mar ze kwammen him aachternao en brochten him daor omme.
20 Hi'j wodde mit peerden overbrocht naor Jeruzalem, waor hi'j begreuven wodde bi'j zien veuroolden in de Davidsburcht.
21 Et volk van Juda reup Amasja zien zestien jaor oolde zeune Azarja tot opvolger van zien heit uut.
22 Et was Azarja die Elat nao de dood van keuning Amasja weer bi'j Juda saemenbrocht en et verstarkte.
Jerobeam, keuning van Israël.
23 Jerobeam, de zeune van Joas, wodde keuning van Israël in et vuuftiende regeringsjaor van keuning Amasja van Juda, de zeune van Joas. Ienenveertig jaor regeerde hi'j in Samaria.
24 Hi'j dee wat min is in de ogen van de Heer: hi'j brak niet mit de zundige praktieken van Jerobeam, de zeune van Nebat, die de Israëlieten tot zunde anzet hadde.
25 Jerobeam rippereerde de greens van Israël, van Lebo-Hamat tot an de Zooltzee, zoas de Heer, de God van Israël, veurzegd had deur zien profeet Jona, de zeune van Amittai, uut Gat-Hachefer.
26 De Heer had jommes zien hoe bitter de Israëlieten, van hoge tot lege, te lieden hadden en dat d'r gieniene was die heur te hulpe kwam.
27 En omreden hi'j besleuten had om de heugenschop an Israël op eerde niet uut te wissen, leut hi'j heur deur Jerobeam, de zeune van Joas, vri'jmaeken.
28 Veerdere biezunderheden over Jerobeam en over de overwinnings die hi'j behaelde doe hi'j Damascus en Hamat, die vroeger an Juda toeheurden, heroverde en weer bi'j Israël saemenvoegde, bin optekend in de kronieken van de keunings van Israël.
29 Doe hi'j bi'j zien veuroolden, de keunings van Israël, te ruste gong, volgde zien zeune Zecharja him op.
 
 
2 Keunings 15.

01 Azarja, de zeune van Amasja, wodde keuning van Juda in et zeuvenentwintigste regeringsjaor van keuning Jerobeam van Israël.
02 Hi'j was zestien jaor doe hi'j keuning wodde. Twienenvuuftig jaor regeerde hi'j in Jeruzalem. Zien moeke was Jecholja, zi'j kwam van Jeruzalem.
03 Hi'j dee wat goed is in de ogen van de Heer, krek zoas zien heit Amasja daon hadde.
04 Toch bleven de offerplakken bestaon en bleven de Judeeërs daor offers brengen en wierook branen.
05 De Heer trof de keuning mit een huudziekte, waor hi'j an leed tot an de dag van zien wegraeken. Al die tied leefde hi'j in ofzundering, wiels zien zeune Jotam de gang van zaeken in et peleis regelde en et laansbestuur ok waornam.
06 Veerdere biezunderheden over Azarja bin optekend in de kronieken van de keunings van Juda.
07 Doe hi'j wegraekte, wodde hi'j begreuven bi'j zien veuroolden in de Davidsburcht. Zien zeune Jotam volgde him op.
Zecharja, keuning van Israël.
08 Zecharja, de zeune van Jerobeam, wodde keuning van Israël in et achtendattigste regeringsjaor van keuning Azarja van Juda. Zes maonden regeerde hi'j in Samaria.
09 Hi'j dee wat min is in de ogen van de Heer: lieke min as zien veurvaders brak hi'j mit de zundige praktieken van Jerobeam, de zeune van Nebat, die de Israëlieten tot zunde anzet hadde.
10 Tegen Zecharja wodde een saemenzwering beraomd deur Sallum, de zeune van Jabes. Disse leut him pebliekelik ommebrengen en wodde keuning in zien plak.
11 Veerdere biezunderheden over Zecharja bin optekend in de kronieken van de keunings van Israël.
12 De Heer had an Jehu veurzegd dat zien naokommelingen tot in de vierde generaosie op de troon van Israël zitten zollen, en zo is et ok gebeurd.
Sallum, keuning van Israël.
13 Sallum, de zeune van Jabes, wodde keuning in et negenendattigste regeringsjaor van keuning Uzzia van Juda. Iene maond regeerde hi'j in Samaria.
14 Menachem, de zeune van Gadi, trok vanuut Tirsa naor Samaria op en versleug Sallum, de zeune van Jabes. Hi'j brocht him omme en wodde keuning in zien plak.
15 Veerdere biezunderheden over Sallum en over de saemenzwering die hi'j beraomde bin optekend in de kronieken van de keunings van Israël.
16 Doe Menachem vanuut Tirsa optrok, brocht hi'j alle inwoners van Tifsach en kontreinen omme. Omreden de stad him gien vri'je deurtocht geven wild hadde, brocht hi'j alle inwoners omme en snee hi'j alle vrouwluden die wat onder de schölk dreugen de boek eupen.
Menachem, keuning van Israël.
17 Menachem, de zeune van Gadi, wodde keuning van Israël in et negenendattigste regeringsjaor van keuning Azarja van Juda. Tien jaor regeerde hi'j in Samaria.
18 Hi'j dee wat min is in de ogen van de Heer: zien leven lange brak hi'j niet mit de zundige praktieken van Jerobeam, de zeune van Nebat, die de Israëlieten tot zunde anzet hadde.
19 In die tied vul keuning Pulle van Assyrië et laand binnen. Menachem gaf Pulle duzend telent zulver om him te verzekeren van zien hulpe bi'j et haandhaven van zien keuningschop.
20 Daortoe legde hi'j de rieke Israëlieten een schatting op van vuuftig sjekel zulver per heufd. Hi'j dreug et zulver over an de keuning van Assyrië, die doe zien troepen weerommetrok en et laand niet bezette.
21 Veerdere biezunderheden over Menachem bin optekend in de kronieken van de keunings van Israël.
22 Doe hi'j wegraekte en bi'j zien veuroolden begreven wodde, volgde zien zeune Pekachja him op.
Pekachja, keuning van Israël.
23 Pekachja, de zeune van Menachem, wodde keuning van Israël in et vuuftigste regeringsjaor van keuning Azarja van Juda. Twie jaor regeerde hi'j in Samaria.
24 Hi'j dee wat min is in de ogen van de Heer: hi'j brak niet mit de zundige praktieken van Jerobeam, de zeune van Nebat, die de Israëlieten tot zunde anzet hadde.
25 Tegen Pekachja wodde een saemenzwering beraomd deur zien adjudant Pekach, de zeune van Remaljahu. Mit de hulpe van vuuftig Gileadieten brocht Pekach de keuning omme, en ok Argob en Arje, in et verstarkte pat van et peleis in Samaria. Hi'j brocht Pekachja omme en wodde keuning in zien plak.
26 Veerdere biezunderheden over Pekachja bin optekend in de kronieken van de keunings van Israël.
Pekach, keuning van Israël.
27 Pekach, de zeune van Remaljahu, wodde keuning van Israël in et twienenvuuftigste regeringsjaor van keuning Azarja van Juda. Twintig jaor regeerde hi'j in Samaria.
28 Hi'j dee wat min is in de ogen van de Heer: hi'j brak niet mit de zundige praktieken van Jerobeam, de zeune van Nebat, die de Israëlieten tot zunde anzet hadde.
29 In de tied van keuning Pekach van Israël vul keuning Tiglatpileser van Assyrië et laand binnen. Hi'j veroverde Ijjon, Abel-Bet-Maächa, Janoach, Kedes en Hasor, Gilead en Galilea en ok et gebied van Naftali, en voerde de inwoners van die steden en gebieden as ballings naor Assyrië of.
30 Tegen Pekach, de zeune van Remaljahu, wodde een saemenzwering beraomd deur Hosea, de zeune van Ela. Et was in et twintigste regeringsjaor van keuning Jotam, de zeune van Uzzia, dat Hosea Pekach ommebrocht en in zien plak keuning wodde.
31 Veerdere biezunderheden over Pekach bin optekend in de kronieken van de keunings van Israël.
Jotam, keuning van Juda.
32 Jotam, de zeune van Uzzia, wodde keuning van Juda in et twiede regeringsjaor van keuning Pekach van Israël, de zeune van Remaljahu.
33 Hi'j was vuventwintig jaor doe hi'j keuning wodde. Zestien jaor regeerde hi'j in Jeruzalem. Zien moeke was Jerusa, de dochter van Sadok.
34 Hi'j dee wat goed is in de ogen van de Heer en volgde in alle opzichten et veurbeeld van zien heit Uzzia.
35 Toch bleven de offerplakken bestaon en bleven de Judeeërs daor offers brengen en wierook branen. Et was Jotam die de Bovenpoort van de tempel van de Heer bouwde.
36 Veerdere biezunderheden over Jotam bin optekend in de kronieken van de keunings van Juda.
37 Et was in die tied dat de Heer veur et eerst keuning Resin van Aram en keuning Pekach van Israël op Juda ofstuurde.
38 Doe Jotam wegraekte, wodde hi'j begreuven bi'j zien veuroolden in de Davidsburcht. Zien zeune Achaz volgde him op.
 
 
2 Keunings 16.

01 Achaz, de zeune van Jotam, wodde keuning van Juda in et zeuventiende regeringsjaor van keuning Pekach van Israël, de zeune van Remaljahu.
02 Hi'j was twintig jaor doe hi'j keuning wodde. Zestien jaor regeerde hi'j in Jeruzalem. Hi'j dee niet wat goed is in de ogen van de Heer, zoas zien veurvader David,
03 mar volgde et veurbeeld van de keunings van Israël. Hi'j gong alderdeegst zo veer dat hi'j zien zeune as offer verbraande neffens et gruwelike gebruuk van de volken die de Heer veur de Israëlieten verdreven hadde.
04 Hi'j brocht offers en braande wierook op de offerplakken, op de heuvels en onder iedere boom mit een protte blaeder.
05 In die tied gongen keuning Resin van Aram en keuning Pekach van Israël, de zeune van Remaljahu, tegen Jeruzalem de stried an. Ze dreven Achaz in et nauw, mar slaegden d'r niet in om him te overwinnen.
06 Et was in diezelde tied dat keuning Resin van Aram Elat weer bi'j zien riek annekseerde en de Judeeërs daor uut verdreef. De Edomieten trokken Elat binnen, en ze bin daor bleven tot op de dag van vandaege.
07 Achaz stuurde gezaanten naor keuning Tiglatpileser van Assyrië, mit de bosschop: "Ik bin jow knecht en jow zeune. Trek op en maek mi’j vri’j uut de greep van de keuning van Aram en de keuning van Israël, die heur tegen mi'j keerd hebben."
08 Hi'j zette zien vraoge kracht bi'j deur et goold en zulver uut de tempel van de Heer en uut de schatkaemers van et keuninklik peleis an de keuning van Assyrië te geven.
09 De keuning van Assyrië gaf geheur an Achaz zien vraoge. Hi'j trok op tegen Damascus en nam de stad in. De bevolking voerde hi'j as ballings naor Kir, en Resin leut hi'j ommebrengen.
10 Keuning Achaz gong naor Damascus om keuning Tiglatpileser van Assyrië te treffen. Doe hi'j et alter in Damascus zag, stuurde hi'j een medel en een detailleerd bouwplan naor de priester Uria.
11 Nog veurdat Achaz weeromme gong leut Uria et alter naobouwen, krek neffens et ontwarp dat de keuning him vanuut Damascus stuurd hadde.
12 Doe keuning Achaz uut Damascus weerommekwam, nam hi'j et alter in ogenschouw, leup d'r henne en leup de treden naor boven.
13 Hi'j dreug persoonlik verschillende offers op: een braandoffer, een graonoffer en een wienoffer, en geut et bloed van de dieren veur et vredeoffer tegen de ziedkaanten van et alter.
14 Tussen et ni'je alter en de tempel ston et broonzen alter nog te ere van de Heer. Dat leut hi'j weghaelen en an de noordkaante van et ni'je alter weer daelezetten.
15 Hi'j beveelde de priester Uria: "Op dit grote alter moe'n vanof now morgens et braandoffer en aovens et graonoffer opdreugen wodden. Ok et braandoffer en et graonoffer van de keuning moe’n daor opdreugen wodden, krek as de braandoffers, de graon- en de wienoffers van de meensken uut et laand, en et bloed van de offerdieren moet tegen de ziedkaanten van et grote alter geuten wodden. Et broonzen alter bruuk ik van now an zels, a'k een uutspraoke van god kriegen wil."
16 De priester Uria voerde alles krek uut zoas de keuning et him opdreugen hadde.
17 Veerder leut keuning Achaz de spoelbekkens van heur onderstellen haelen en de panelen van de onderstellen slopen. Et grote bekken, de Zee, leut hi'j weghaelen van de broonzen runder waorop et op rustte, en op een stienen follement zetten.
18 Ok leut hi'j et sabbatsbaldakijn dat et volk an de tempel anbouwd hadde en de speciaole opgang veur de keuning verzetten naor de binnerkaante van de tempel, zodat de keuning van Assyrië ze niet te zien kriegen zol.
19 Veerdere biezunderheden over Achaz bin optekend in de kronieken van de keunings van Juda.
20 Doe hi'j wegraekte, wodde hi'j begreuven bi'j zien veuroolden in de Davidsburcht. Zien zeune Hizkia volgde him op.
 
 
2 Keunings 17.

01 Hosea, de zeune van Ela, wodde keuning van Israël in et twaelfde regeringsjaor van keuning Achaz van Juda. Negen jaor regeerde hi'j in Samaria.
02 Hi'j dee wat min is in de ogen van de Heer, mar gong daorin niet zo veer as zien veurgangers.
03 Keuning Salmanassar van Assyrië rokte tegen Hosea op en onderwurp him. Vanof die tied mos Hosea schatting ofdregen an de keuning van Assyrië.
04 Nao verloop van tied vernam Salmanassar dat Hosea tegen him samenspande en bosschoppers stuurd had naor keuning So van Iegypte. Hi’j vergat ok om de jaorlikse schatting of te dregen. Daorom leut de keuning van Assyrië Hosea in de boeien slaon en in de gevangenis opsluten.
05 Hi'j vul et laand binnen, trok op tegen Samaria en belegerde de stad drie jaor lange.
06 In et negende regeringsjaor van Hosea nam de keuning van Assyrië Samaria in. Hi'j voerde de Israëlieten as ballings mit naor Assyrië. Goenend wees hi'j een woonstee an in Chalach, aanderen an de revier de Chabor in Gozan, en weer aanderen in de steden van Medië.
Beschouwing over de ondergang van Israël.
07 Dit alles gebeurde omreden de Israëlieten zundigden tegen de Heer, heur God, die heur vri’jmaekt had uut de hanen van de farao, de keuning van Iegypte, en heur uut Iegypte wegleided hadde. Ze weren aandere goden vereren gaon
08 en volgden de levenswieze van de volken die de Heer veur heur verdreven had en de bepaolings die de keunings van Israël zels uutveerdigden.
09 Zi'j hullen d'r verkeerde idenen over de Heer, heur God, op nao. Rondomme waor ze woonden, van de kleinste waachtpost tot de starkste vestingstad, bouwden ze offerplakken.
10 Op alle hoge heuvels en onder iedere boom mit een protte blaeder zetten ze gewi’jde stienen en Asjerapalen daele
11 en op al die offerhoogten ontsteuken ze offers, naor et veurbeeld van de volken die de Heer van heur wegvoerd had. Mit disse kwaolike praktieken targden zi'j de Heer.
12 Ze dienden ofgoden, hoewel de Heer heur dat naodrokkelik verbeuden hadde.
13 Iederkeer opni'j waorschouwde de Heer Israël en Juda deur de mond van de profeten en de zieners: "Keer weeromme van jim dwaelwegen en hool je an mien geboden en bepaolings, an de wet die ik jim veuroolden oplegd hebbe en die jim deur mien knechten de profeten overleverd is."
14 Mar lieke stiems as heur veuroolden, die gien vertrouwen stelden in de Heer, heur God, weigerden de Israëlieten om te luusteren.
15 Ze trokken heur niks an van zien bepaolings en van et verbond dat hi'j mit heur veuroolden sleuten hadde, en sleugen zien waorschouwings in de wiend. Zi'j leupen aachter onbenullige goden an en wodden zo zels meensken van niks. Ze volgden et veurbeeld van de volken om heur henne, hoewel de Heer heur dat verbeuden had.
16 Ze verweerloosden alle geboden van de Heer, heur God. Ze geuten twie beelden in de vorm van een stierkalf en maekten een Asjerapaol. Ze anbaden de hemellichems en dienden Baäl.
17 Ze verbraanden heur zeunen en dochters as offer, deden an waorzeggeri'je en perbeerden veurtekens te lezen. Zo targden zi'j de Heer deur heur d'r op toe te leggen om te doen wat min is in zien ogen.
18 De Heer wodde poerlelk op de Israëlieten en verstootte heur. Niks bleef d'r van heur over, behalven de stamme Juda.
19 Mar ok de Judeeërs hullen heur niet an de geboden van de Heer, heur God, en volgden de bepaolings die de Israëlieten eigenmachtig uutveerdigd hadden.
20 Daorom wees de Heer alle naokommelingen van Israël of. Hi'j vernederde heur deur heur uut te leveren an plunderers, en uutaendelik verstootte hi'j heur allemaole.
21 Want Israël had him van et keuningshuus van David losscheurd en Jerobeam, de zeune van Nebat, as keuning ansteld. En Jerobeam dreef een wigge tussen Israël en de Heer, deur de Israëlieten an te zetten tot grote zunde.
22 De Israëlieten volgden in alle opzichten et minne veurbeeld van Jerobeam en brakken niet mit zien zundige praktieken.
23 Uutaendelik verstootte de Heer Israël, zoas hi'j deur alle profeten, zien knechten, veurzegd hadde, en de Israëlieten wodden in ballingschop van heur grondgebied wegvoerd naor Assyrië, waor zi'j wonen tot op de dag van vandaege.
24 De keuning van Assyrië stuurde meensken uut Babel, Kuta, Awwa, Hamat en Sefarwaïm naor de steden van Samaria, waor hi'j heur een woonstee toewees in plak van de Israëlieten. Disse meensken neumen Samaria in bezit en gongen daor wonen.
25 De eerste tied dat zi'j daor woonden, vereerden zi'j de Heer niet. Daorom leut de Heer leeuwen op heur los, die een tal van heur verscheurden.
26 Et volk zee tegen de keuning van Assyrië: "De volken die jow naor Samaria overbrocht hebben om in de steden daor wonen te gaon, bin niet op de hoogte van de regels die de God van dat laand steld het. Now het hi'j leeuwen op heur loslaoten omreden de meensken de regels van de God van dat laand niet kennen, en die hebben al een tal van heur ommebrocht."
27 Doe beveelde de keuning van Assyrië: "Stuur iene van de priesters die jim wegvoerd hebben weeromme naor et laand waor hi'j wegkomt. Hi'j moet daor wonen gaon en de meensken de regels van de God van dat laand bi'jbrengen."
28 Zo gong iene van de priesters die wegvoerd weren weeromme naor Samaria en vestigde him in Betel, waor hi'j de meensken leerde hoe ze de Heer vereren mossen.
29 Toch bleven al die volken heur eigen godebeelden maeken, die ze in heur ni'je woonstee hennezetten in de tempels die de Samaritanen op de offerhoogten bouwd hadden.
30 De meensken uut Babel maekten een beeld van Sukkot-Benot, de meensken uut Kuta maekten een beeld van Nergal, de meensken uut Hamat maekten een beeld van Asima,
31 de Awwieten maekten beelden van Nibchaz en Tartak, en de Sefarwieten verbraanden heur kiender as offer veur heur goden Adrammelech en Anammelech.
32 Daornaost vereerden zi'j de Heer en stelden zi'j uut heur eigen midden priesters an om dienst te doen in de tempels op de offerhoogten.
33 Zi'j vereerden de Heer dus wel, mar dienden ok heur eigen goden zoas ze in heur laand waor ze wegkwammen, gewoon west weren.
34 De Israëlieten zels vullen ok iederkeer opni'j in heur oolde gewoonten en doen dat tot op de dag van vandaege: ze vereren de Heer niet en holen heur niet an de veurschriften, regels, wetten en geboden die de Heer oplegd het an de naokommelingen van Jakob, an wie hi'j de naeme Israël geven het.
35 De Heer het mit heur een verbond sleuten en heur opdreugen: "Jim meugen gien aandere goden vereren: niet veur heur deur de kni'jen gaon, heur niet dienen en heur gien offers brengen.
36 Allienig de Heer, die jim mit starke haand en opheven aarm uut Iegypte wegleided het, moej'm vereren, veur him moej'm deur de kni'jen en an him moej'm offers brengen.
37 Jim moej'm de hieltied holen an de veurschriften, regels, wetten en geboden die hi'j vaastelegd het, en gien aandere goden vereren.
38 Jim meugen et verbond dat ik mit jim sleuten hebbe niet vergeten en gien aandere goden vereren;
39 allienig de Heer, jim God, moej'm vereren, dan zal hi'j jim redden uut de greep van al jim vi'janen."
40 Mar ze hebben niet luusterd en holen nog de hieltied vaaste an heur oolde gewoonten.
41 De ni'je bewoners van et laand vereerden de Heer, mar dienden ok heur eigen godebeelden. Heur kiender en kleinkiender volgden et veurbeeld van heur oolden en leven tot op de dag van vandaege op dezelde wieze deur.
 
 
2 Keunings 18.

01 Hizkia, de zeune van Achaz, wodde keuning van Juda in et dadde regeringsjaor van keuning Hosea van Israël, de zeune van Ela.
02 Hi'j was vuventwintig jaor doe hi'j keuning wodde. Negenentwintig jaor regeerde hi'j in Jeruzalem. Zien moeke was Abi, de dochter van Zecharja.
03 Hi'j dee wat goed is in de ogen van de Heer, krek zoas zien veurvader David daon hadde.
04 Hi'j haelde de offerplakken weg, smeet de gewi’jde stienen kepot, haelde de Asjerapaolen omveer en sleug de keuperen slange die Mozes maekt had an stokken. De Israëlieten hadden jommes nog de hieltied de gewoonte om veur disse slange, die Koperslang hiette, wierook te branen.
05 Hizkia stelde zien vertrouwen in de Heer, de God van Israël. Nooit, niet veur en niet nao zien tied, is hi'j evenaord, deur gienend van de keunings van Juda.
06 Hi'j was de Heer toegedaon en het him nooit van him ofkeerd; hi'j hul him an de geboden die de Heer an Mozes geven het.
07 De Heer ston an zien kaante, zodat Hizkia alles wat hi'j ondernam tot een goed aende brocht. Hi'j kwam in opstaand tegen de keuning van Assyrië en weigerde nog langer om zien vazal te wezen.
08 Hi'j was et die ok de Filistijnen weerommesleug en et hiele gebied tot an Gaza en de omliggende dörpen veroverde, van de kleinste waachtpost tot de starkste vestingstad.
09 In et vierde regeringsjaor van keuning Hizkia, dus et zeuvende regeringsjaor van keuning Hosea van Israël, trok keuning Salmanassar van Assyrië tegen Samaria op en belegerde de stad.
10 Nao een beleg van drie jaor, in et zesde regeringsjaor van Hizkia, dus et negende regeringsjaor van keuning Hosea van Israël, wodde Samaria inneumen.
11 De keuning van Assyrië voerde de Israëlieten as ballings mit naor zien laand, waor goenend een woonstee anwezen kregen in Chalach, aanderen an de revier de Chabor in Gozan, en weer aanderen in de steden van Medië.
12 Dit gebeurde omreden de Israëlieten de Heer, heur God, niet geheurzemd hadden. Ze hadden de regels van et verbond overtreden die Mozes, de knecht van de Heer, heur geven had. Ze hadden niet luusterd en niet haandeld naor wat heur veurhullen was.
Jeruzalem wodt deur Sanherib bedriegd.
13 In et veertiende regeringsjaor van keuning Hizkia trok keuning Sanherib van Assyrië op tegen de verstarkte steden van Juda en nam ze in.
14 Keuning Hizkia van Juda stuurde bosschoppers naor de keuning van Assyrië, die doe in Lachis woonde. Heur bosschop was: "Ik bin tegenover jow in gebreke bleven. Hool op mit jow anval. Wat jow mi'j opleggen, zal ik dregen." De keuning van Assyrië eiste van keuning Hizkia van Juda driehonderd telent zulver en dattig telent goold.
15 Hizkia dreug al et zulver of dat in de tempel van de Heer en de schatkaemers van et keuninklik peleis was.
16 Hi’j leut ok et goolden beslag weghaelen dat hi'jzels op de deuren en deurposten van de grote zael van de tempel anbrengen laoten had, en gaf dat an de keuning van Assyrië.
17 De keuning van Assyrië stuurde vanuut Lachis drie blispoters, de tartan, de rabsaris en de rabsake, mit een geweldig leger naor keuning Hizkia in Jeruzalem. Zi'j trokken naor Jeruzalem op. Daor hullen ze hoolderd bi'j de waetertoevoer naor et bovenste waeterbekken, an de straote van de blieke,
18 en vreugen de keuning te praoten. Hofmeester Eljakim, de zeune van Chilkia, hofschriever Sebna en kanselier Joach, de zeune van Asaf, gongen naor heur toe.
19 De rabsake zee tegen heur: "Zeg tegen Hizkia: "dit zegt de grote keuning, de keuning van Assyrië: "Waorop berust toch dat vertrouwen van jim?
20 Jim mienen dat mooie beloften opwegen tegen strategie en militaire macht? En in wie stellen jim zoe'n protte vertrouwen daj’m tegen mi'j in opstaand durven te kommen?
21 In Iegypte, die knakte rietstengel die je haand deurboort aj' perberen om d'r op te leunen! Want meer het de farao, de keuning van Iegypte, niet te betekenen veur degenen die heur vertrouwen in him stellen.""
22 En jim kun mi'j now wel zeggen: "wij stellen oons vertrouwen in de Heer, oonze God," mar was et niet krek die God wie zien offerplakken en alters Hizkia weghaelen laoten het? Hizkia het ommes tegen de bevolking van Juda en Jeruzalem zegd dat ze allienig veur et alter in Jeruzalem deur de kni’jen gaon meugen?
23 Now dan, waog jim kaans mit mien heer, de keuning van Assyrië. Hi'j zal jim twieduzend peerden geven, aj'm in staot binnen om daor ruters veur te leveren.
24 Zolange jim veur striedwaegens en ruters op Iegypte vertrouwen, zuj’m ommes nog niet de ofgeveerdigde van de minste knecht van mien heer weerstaon kunnen.
25 Jim daenken toch niet dat hi'j zonder instemming van de Heer optrokken is om Jeruzalem te vernietigen? De Heer het him zegd: "vaal dit laand an en vernietig et.""
26 Eljakim, Sebna en Joach zeden tegen de rabsake: "Praot asjeblief Aramees mit oons, heer; dat verstaon wi'j. Praot toch gien Judees mit oons, et volk op de mure luustert mit."
27 Mar de rabsake zee: "Dochten jim dat mien heer mi'j stuurd het om et woord allienig tot jim heer en jim te richten? Oonze woorden bin krek zo goed bedoeld veur de meensken daor op de mure, die bi'jkotten krek as jim heur eigen stront eten en heur eigen pis drinken zullen."
28 En hi'j rechtte zien schoolders, begon wat luder te praoten en zee, in et Judees: "Luuster naor wat de grote keuning, de keuning van Assyrië jim te zeggen het!
29 Dit zegt de keuning: "laot jim deur Hizkia gien rad veur ogen dri'jen, hi'j is niet bi’jstaot om jim uut mien greep vri’j te maeken.
30 Laot hi'j jim niet verleiden om jim vertrouwen in de Heer te stellen. As hi'j beweert: "De Heer zal oons wis en werachies redden en disse stad zal niet in hanen valen van de keuning van Assyrië,"
31 luuster dan niet naor him. Want dit zegt de keuning van Assyrië: "Geve jim over en stel jim onder mien hoede, dan kan ieder van jim van zien wienstok en zien viegeboom eten en et waeter uut zien eigen putte drinken,
32 tot ik komme en jim mitneme naor een laand dat niet onderdot veur dat van jim: een laand van graon en wien, van stoete en droevetunen, van eulierieke olijfbomen en hunning. Jim zullen in leven blieven en hoeven niet omme te kommen. Luuster toch niet naor Hizkia, die jim valse hope geft mit zien bewering dat de Heer jim redden zal.
33 Hebben de goden van aandere volken heur laand seins redded uut de hanen van de keuning van Assyrië?
34 Waor bin de goden van Hamat en Arpad bleven, waor weren de goden van Sefarwaïm, Hena en Iwwa? Hebben die Samaria seins uut mien hanen redded?
35 As gien inkelde god in staot bleken is om zien laand uut mien hanen te redden, hoe zol dan de Heer Jeruzalem redden kunnen?"""
36 Mar et volk zweeg en gaf gien bescheid, want zo had de keuning et beveulen.
37 Hofmeester Eljakim, de zeune van Chilkia, hofschriever Sebna en kanselier Joach, de zeune van Asaf, gongen mit scheurde kleren naor Hizkia om him de woorden van de rabsake over te brengen.
 
 
2 Keunings 19.

01 Zogauw keuning Hizkia de bosschop heurde, scheurde hi'j zien kleren, trok een boeteklied an en gong naor de tempel van de Heer.
02 Hofmeester Eljakim, hofschriever Sebna en de ooldsten van de priesters stuurde hi'j, ok in boetekleren, naor de profeet Jesaja, de zeune van Amos.
03 Zi'j zeden tegen him: "Dit zegt Hizkia: "disse dag is iene van aangst, straf en vernedering: et is krek as bi'j een geboorte waorbi'j de baormoeder welliswaor ontsleuten is mar de kracht om et kiend te kriegen ontbrekt.
04 Mar misschien slat de Heer, jow God, acht op wat de rabsake zegd het, die deur zien heer, de keuning van Assyrië, hierhenne stuurd is om de levendige God te hunen, en misschien zal hi'j die belediging vergellen. Bidde daorom veur degenen van oons volk die d'r nog over binnen.""
05 Zo kwammen et dienstvolk van keuning Hizkia bi'j Jesaja,
06 en Jesaja zee doe tegen heur: "Zeg tegen jim keuning: "dit zegt de Heer: Laot je niet ontmoedigen deur de woorden waormit de knechten van de keuning van Assyrië mi'j bespot hebben.
07 Ik zal him een geest sturen en him een gerucht inschunen laoten waordeur hi'j naor zien eigen laand weeromme giet, en daor za'k him een gewelddaodige dood starven laoten.""
08 Ondertussen was de rabsake weer naor zien keuning toe gaon, die, zoas hi'j verneumen hadde, zien kaamp bi'j Lachis opbreuken had en now de anval op Libna eupend hadde.
09 Mar doe Sanherib et gerucht opvong dat keuning Tirhaka van Nubië uuttrokken was om et gevecht mit him an te gaon, stuurde hi'j opni'j gezaanten naor Hizkia, mit de opdracht:
10 "Zeg tegen keuning Hizkia van Juda: "laat jow niet misleiden deur de Heer, jow God, in wie jow jow vertrouwen steld hebben omreden hi'j jow toezegd het dat Jeruzalem niet in hanen valen zal van de keuning van Assyrië.
11 Jow hebben toch zels heurd hoe de keunings van Assyrië alle lanen die ze binnenvullen vernietigd hebben. Zollen jow dan redded wodden?
12 Gozan, Charan, Resef en de inwoners van Eden in Telassar, die deur mien veuroolden uutroeid wodden, bin toch ok niet deur heur goden redded?
13 En wat is d'r van de keunings van Hamat en Arpad wodden, en van de keunings van de stad Sefarwaïm en van Hena en Iwwa?""
14 Doe Hizkia de brief leesd hadde die de bosschoppers him brocht hadden, gong hi'j naor de tempel van de Heer en legde de brief daor eupen veur him daele.
15 En hi'j biddede tot de Heer: "Heer, God van Israël, jow die op de cherubs tronen, jow allienig bin God van alle keuninkrieken op eerde, jow hebben de hemel en de eerde maekt.
16 Lien mi'j jow oor, Heer, en luuster, eupen jow ogen en zie toe. Heur mit welke woorden Sanherib de levendige God huunt.
17 Et is waor, Heer, de keunings van Assyrië hebben aandere volken en heur lanen verwoest
18 en heur goden in 't vuur smeten. Dat weren dan ok gien goden, et weren allienig mar maeksels van meenskehanen, beelden van hoolt en stien, die ze kepot smeten hebben.
19 Ik vraoge jow, Heer, oonze God: redde oons uut zien hanen, zodat alle keuninkrieken op eerde begriepen zullen dat jow, Heer, de ienige God binnen."
20 Jesaja, de zeune van Amos, leut Hizkia weten: "Dit zegt de Heer, de God van Israël: Ik hebbe je gebed over keuning Sanherib van Assyrië heurd,
21 en dit is wat ik, de Heer, over him zegge:
Vrouwe Sion minacht je, zi'j lacht je uut,
meewaorig schuddet Jeruzalem zien heufd.
22 Weet wie aj' beledigd en bespot hebben,
wie aj’ uutjouwd, uutdaegend ankeken hebben:
et was de Heilige van Israël!
23 Deur de mond van je bosschoppers hej' de Heer huund. Ie zeden:
"mijn striedwaegens brochten mi'j tot op de hoogste bargen,
tot in de veerste hoeken van de Libanon.
Zien hoogste ceders velde ik, zien machtigste cipressen.
Ik drong deur tot in zien veerste hoeke van verschoel, tot in zien diepste woold.
24 Ik hebbe greuven en vremd waeter dronken,
de stromen van Iegypte mit mien bienen druge legd."
25 Hej' dan niet heurd dat ik dit beschikt hebbe?
In lang vervleugen tieden nam ik et mi'j veur,
now is de tied kommen da'k et ok doe.
Onneembere steden wodden in puun smeten,
26 heur inwoners staon machteloos en wodden rood van schaemte.
Zi'j bin as jonge scheuten op de akker, pril gruun in de woestijn,
tere sprieties op et daoke: verschruuid nog veur ze opkommen binnen.
27 Mar ik kenne je, ik bin op de hoogte van je doen en laoten,
ik weet hiel goed hoe ie tekeergaon tegen mi'j;
28 ik zie je zelfgenoegzemhied,
je raozerni'je is tot mien oren deurdrongen.
Ik slao mien haoke deur je neuze en legge je mien bit in de mond
en voer je op je eigen voetstappen weeromme.
29 Jow, Hizkia, kondig ik dit an: dit jaor zuj' eten wat d'r nao de oogst toevallig nog opkomt, ankem jaor wat d'r vanzels gruuit, mar et jaor daornao kuj' zi'jen en oogsten, droevetunen plaanten en van de opbrengst eten.
30 De Judeeërs die ontkommen en et overleven, zullen wottel schieten en vrucht dregen,
31 want wie et overleven en ontkommen, zullen heur vanuut Jeruzalem, vanof de Sion verspreiden. De Heer zal him daorveur inzetten.
32 Daorom – zegt de Heer dit over de keuning van Assyrië: Hi'j zal disse stad niet te nao kommen. Hi'j zal d'r gien pielke op ofschieten, gien schilde tegen opstikken en gien wal tegen opsmieten.
33 Hi'j zal op zien voetstappen weeromme gaon en disse stad niet te nao kommen – zegt de Heer.
34 Omwille van mi'jzels en omwille van mien knecht David zal ik disse stad bescharmen en heur vri'jmaeken."
35 Diezelde naacht gong een engel van de Heer et gevecht an en brocht in et kaamp van de Assyriërs honderdvuventachtigduzend man omme. De aanderemorgens zag et volk niks as lieken liggen.
36 Keuning Sanherib van Assyrië brak et beleg op en gong veurgoed weeromme naor zien woonstee Nineve.
37 Daor wodde hi'j, wiels hi'j deur de kni'jen gong in de tempel van zien god Nisroch, vermoord deur Adrammelech en Sareser, die doe naor Ararat wussen te ontkommen. Zien zeune Esarhaddon volgde him op.
 
 
2 Keunings 20.

01 Omdebi'j dezelde tied wodde Hizkia dodelik ziek. De profeet Jesaja, de zeune van Amos, kwam naor him toe en zee: "Dit zegt de Heer: Maek je laeste wilsbeschikking op, want ie zullen wegraeken. Ie zullen niet meer beter wodden."
02 Hizkia dri'jde zien gezichte naor de mure en biddede tot de Heer:
03 "Heer, ik smeek jow, neem toch in anmarking dat ik mi'j altied oprecht en mit hiel mien hatte naor jow wil richt hebbe en de hieltied daon hebbe wat goed is in jow ogen." Daorbi'j goelde hi'j bittere traonen.
04 Doe richtte de Heer him opni'j tot Jesaja, die nog in de binnerste tuun was, en zee:
05 "Gao weer naor binnen en zegge tegen Hizkia, de keuning van mien volk: "dit zegt de Heer, de God van je veurvader David: Ik hebbe je gebed heurd en je traonen zien. Now dan, ik zal je genezen. Over drie daegen zuj' in staot wezen om naor mien tempel te gaon.
06 Ik geef je nog vuuftien jaor te leven, en ik zal jow en disse stad redden uut de hanen van de keuning van Assyrië. Omwille van mi'jzels en omwille van mien knecht David za'k disse stad bescharmen.""
07 Jesaja beveelde de knechten van de keuning om een plakke dreugde viegen te pakken. Dat deden ze, en ze legden de viegen op et ontsteuken plak, waorop Hizkia ni'je krachten kreeg.
08 Hi'j vreug an Jesaja: "Krieg ik van de Heer ok een teken dat hi'j mi'j genezen zal en ik over drie daegen naor de tempel gaon kunnen zal?"
09 "Ja," zee Jesaja doe, "de Heer zal jow een teken geven dat hi'j zien belofte naokommen zal. Wat daenken jow, zal et schaad tien graoden veuruutgaon of tien graoden aachteruut?"
10 "Tien graoden veuruut zol niks biezunders wezen," zee Hizkia, "mar tien aachteruut wel."
11 Doe reup de profeet Jesaja de Heer an, en disse leut et schaad op de zunnewiezer van Achaz tien graoden aachteruutgaon.
12 In die tied stuurde keuning Berodach-Baladan van Babylonië, de zeune van Baladan, die verneumen hadde dat Hizkia ziek was, gezaanten mit brieven en een kedo naor him toe.
13 Hizkia nam heur bosschop an en leut heur al zien schatkaemers zien: et zulver, et goold, et roekersgoed, de kostbere eulies, en ok zien waopenverzaemeling en alles wat in zien magezienen was. D'r was niks in zien peleis of in zien riek dat Hizkia heur niet zien leut.
14 De profeet Jesaja gong naor keuning Hizkia toe en vreug him: "Wat hebben disse manluden tegen jow zegd? Waor kwammen zi'j weg?" "Uut een veer laand," zee Hizkia, "uut Babylonië."
15 "Wat hebben ze in jow peleis te zien kregen?" vreug Jesaja, en Hizkia zee: "Ze hebben alles zien wat d’r in mien peleis te zien is. D'r is niks in mien magezienen dat ik heur niet zien laoten hebbe."
16 Hierop zee Jesaja tegen Hizkia: "Luuster naor wat de Heer te zeggen het.
17 Et duurt niet lange meer, of alles wat in jow peleis is, alles wat jow veuroolden tot now toe gadderd hebben, zal naor Babel votsleept wodden. D'r blift niks van over – zegt de Heer.
18 Ok een tal van jow zeunen, et naogeslaacht dat jow verwekt hebben, zal wegvoerd wodden om dienst te doen in et peleis van de keuning van Babylonië."
19 Hizkia zee doe: "Et is goed, wat jow naemens de Heer tegen mi'j zegd hebben." Want hi'j docht bi'j himzels: Dat betekent dat d'r zolange ik leef, rust en vrede wezen zal.
20 Veerdere biezunderheden over Hizkia, over de protte overwinnings die hi'j behaelde en over de waeterveurraod die hi'j anleggen laoten het en de tunnel waordeur et waeter naor de stad leided wodt, bin optekend in de kronieken van de keunings van Juda.
21 Doe hi'j wegraekte en bi'j zien veuroolden begreven wodde, volgde zien zeune Manasse him op.
 
 
2 Keunings 21.

01 Manasse was twaelf jaor doe hi'j keuning wodde. Vuvenvuuftig jaor regeerde hi'j in Jeruzalem. Zien moeke was Chefsiba.
02 Hi'j dee wat min is in de ogen van de Heer: hi'j hul him doende mit de verfoeilike praktieken van de volken die de Heer veur de Israëlieten verdreven had.
03 Hi'j rippereerde de offerplakken die zien heit Hizkia weghaeld hadde, richtte ni'je alters op veur Baäl en maekte een ni'je Asjerapaol, naor et veurbeeld van keuning Achab van Israël. Hi'j anbad de hemellichems en diende die.
04 Hi'j richtte alters op in de tempel van de Heer, waorvan de Heer zegd had: "In Jeruzalem zal ik mien naeme wonen laoten,"
05 en zette op de beide veurtunen van de tempel alters veur de hemellichems.
06 Hi'j verbraande zien zeune as offer en leut him in mit wolkeschouweri'je, wicheleri'je, geestebezwering en waorzeggeri'je. Hi'j tergde de Heer deur alsmar te doen wat min is in zien ogen.
07 Zo leut hi'j bi'jglieks een beeld van de godin Asjera maeken, dat hi'j een plak gaf in de tempel waorvan de Heer tegen David en zien zeune Salomo zegd hadde: "In disse tempel, in Jeruzalem, dat ik uut alle steden van Israël zien stammen uutkeuzen hebbe, zal ik veur altied mien naeme wonen laoten.
08 Ik zal d'r veur zorgen dat de Israëlieten in gienertied meer weg hoeven te trekken uut et laand dat ik heur veuroolden geven hebbe, mar dan moe'n zi'j heur wel holen an alles wat ik heur opdreugen hebbe, an de wet die mien knecht Mozes heur oplegd het."
09 Mar zi'j luusterden niet en leuten heur deur Manasse verleiden om nog meer kwaod te doen dan de volken die de Heer veur heur uutroeid hadde.
10 Daorom zee de Heer deur zien knechten, de profeten:
11 "Keuning Manasse van Juda het him doende holen mit verfoeilike praktieken, slimmer nog as die van de Amorieten die hier vroeger woonden, en hi'j het daorbi'j de Judeeërs ok mit zien ofgoden tot zunde anzet.
12 Daorom - zegt de Heer, de God van Israël: Ik zal over Jeruzalem en Juda onheil brengen waorvan iederiene zo opheuren zal dat zien beide oren d’r van toeten.
13 Ik zal over Jeruzalem et meetlint van Samaria leggen en et schietlood van et keuningshuus van Achab. Ik zal Jeruzalem schoonvegen zoaj' een bruukte schaole schoonvegen en daornao ondersteboven wegzetten.
14 Wie d'r van mien volk nog overblieven za'k an heur lot overlaoten. Ik zal ze an heur vi'janen uutleveren, zodat heur vi'janen ze plunderen en beroven kunnen.
15 Dit za'k allemaole doen omreden zi'j daon hebben wat min is in mien ogen en mi'j plaogd hebben vanof de dag dat ze uut Iegypte vertrokken tot now an toe."
16 Behalven dat Manasse zundigde deur de Judeeërs tot zunde an te zetten, zodat zi'j deden wat min is in de ogen van de Heer, vergeut hi'j ok onschuldig bloed, en wel zoe'n protte dat Jeruzalem d'r van overleup.
17 Veerdere biezunderheden over Manasse en zien zundige praktieken bin optekend in de kronieken van de keunings van Juda.
18 Doe hi'j wegraekte, wodde hi'j bi'j zien veuroolden begreuven in de tuun van zien peleis, de tuun van Uzza. Zien zeune Amon volgde him op.
Amon, keuning van Juda.
19 Amon was twienentwintig jaor doe hi'j keuning wodde. Twie jaor regeerde hi'j in Jeruzalem. Zien moeke was Mesullemet, de dochter van Charus, uut Jotba.
20 Krek as zien heit Manasse dee hi'j wat min is in de ogen van de Heer.
21 Hi'j volgde in alles et veurbeeld van zien heit, diende dezelde ofgoden as hi'j en gong veur heur deur de kni'jen.
22 Hi'j keerde him of van de Heer, de God van zien veuroolden, en geheurzemde him niet.
23 De knechten van Amon beraomden een anslag op de keuning en vermoordden him in zien peleis.
24 Mar et volk brocht iederiene omme die tegen keuning Amon saemenspand hadden en reup zien zeune Josia tot zien opvolger uut.
25 Veerdere biezunderheden over Amon bin optekend in de kronieken van de keunings van Juda.
26 Hi'j wodde begreuven in de tuun van Uzza; zien zeune Josia volgde him op.
 
 
2 Keunings 22.

01 Josia was acht jaor doe hi'j keuning wodde. Ienendattig jaor regeerde hi'j in Jeruzalem. Zien moeke was Jedida, de dochter van Adaja, uut Boskat.
02 Hi'j volgde in alle opzichten et veurbeeld van zien veurvader David en hul him daoran: hi'j dee wat goed is in de ogen van de Heer.
03 In et achttiende jaor van zien regering stuurde keuning Josia zien hofschriever Safan, de zeune van Asaljahu, de zeune van Mesullam, mit disse opdracht naor de tempel van de Heer:
04 "Gao naor de hogepriester Chilkia en laot him et zulver klaorleggen dat deur et volk veur de tempel ofdreugen is en deur de priesters die de ingang bewaeken in ontvangst neumen is.
05 Dat zulver moet an de bouwmeesters die mit et wark an de tempel belast binnen geven wodden, en die moe'n et weer an de meensken geven die doende binnen om de bouwvallige gedeelten van de tempel te herstellen,
06 et haandwarkersvolk, bouwers en metselers, zodat zi'j balkens en uuthouwde stien anschaffen kunnen om de tempel te rippereren.
07 Zi'j hoeven gien rekentien of te geven veur et zulver dat ze kriegen, want ze bin deur en deur betrouwber."
08 De hogepriester Chilkia zee tegen hofschriever Safan: "Ik hebbe hier in de tempel van de Heer een boekerolle vunnen mit de tekst van de wet." Safan nam et boek an en leesde et.
09 Doe gong hi'j weeromme naor de keuning om verslag uut te brengen. Hi'j zee: "Jow knechten hebben et zulver dat in de tempel beweerd wodt, te veurschien haeld en an de bouwmeesters geven die belast binnen mit et herstelwark an de tempel van de Heer."
10 Doe vertelde hi'j dat de priester Chilkia him een boekerolle geven hadde, en hi'j begon de keuning d'r uut veur te lezen.
11 Bi'j et heuren van de tekst van et wetboek scheurde de keuning zien kleren.
12 Hi'j beveelde de priester Chilkia, Achikam, de zeune van Safan, Achbor, de zeune van Micha, de hofschriever Safan en zien persoonlike knecht Asaja:
13 "Gao veur mi’j en hiel et volk van Juda de Heer vraogen over de inhoold van de boekerolle die we vunnen hebben, want et kan niet aanders of de Heer is slim lelk wodden omreden oonze veuroolden heur niet hullen hebben an wat d'r in dit boek stiet en niet daon hebben wat oons veurschreven is."
14 De priester Chilkia, Achikam, Achbor, Safan en Asaja gongen naor de profete Chulda, de vrouw van Sallum. Sallum was de zeune van Tikwa, de zeune van Charchas; hi'j beheerde de priesterkleren. Chulda woonde in et ni'je stadsdeel van Jeruzalem. Doe ze heur alles verteld hadden,
15 zee Chulda tegen heur: "Dit zegt de Heer, de God van Israël: Zeg tegen degene die jim naor mi'j toestuurd het:
16 "dit zegt de Heer: Ik zal onheil brengen over disse stad en heur bewoners, krek zoas beschreven stiet in et boek dat de keuning van Juda leesd het.
17 Dat doe ik omreden zi'j heur van mi'j ofkeerd hebben, offers ontsteuken hebben veur aandere goden en mi'j plaogd hebben mit de beelden die zi'j maekt hebben. Mien argernis tegen disse stad is hoge oplopen en zal niet minder wodden."
18-19 En tegen de keuning van Juda persoonlik, die jim stuurd het om de Heer te vraogen, moe'n jim zeggen: "dit zegt de Heer, de God van Israël: Ie hebben je hatte eupensteld veur de woorden diej’ heurd hebben. Ie hebben je bescheiden opsteld doe ie heurden wat ik over disse stad en heur inwoners zegd hebbe, jommes dat ze as vluuk en schrikbeeld gellen zollen. Ie hebben je kleren scheurd en veur mi'j goeld. Daorom he'k ok naor jow luusterd – zegt de Heer.
20 Ie zullen in vrede wegraeken en bi'j je veuroolden begreuven wodden. Ie zullen niet mit eigen ogen an hoeven te zien hoe ik onheil breng over disse stad.""
Dit bescheid brochten ze an de keuning over.
 
 
2 Keunings 23.

01 De keuning leut de ooldsten van Juda en Jeruzalem bi'j him kommen.
02 Mit alle inwoners van Juda en Jeruzalem, de priesters en de profeten, kotomme, de hiele bevolking, van hoge tot lege, gong hi'j naor de tempel van de Heer. Daor leesde hi'j heur de hiele tekst veur van et verbondsboek dat in de tempel vunnen was.
03 Staonde op et podium bekrachtigde hi'j tegenover de Heer et verbond. Hi'j zweerde dat hi'j de Heer volgen zol en him hielemaole holen zol an zien geboden, veurschriften en bepaolings, om zo et verbond dat in disse boekerolle vaastelegd was, mit hatte en ziel nao te leven. Et hiele volk sleut him hierbi'j an.
04 Doe beveelde de keuning dat de hogepriester Chilkia mit zien plakvervangers en de priesters die an et heufd van de tempelwaacht stonnen, alle veurwarpen uut de tempel van de Heer haelen mossen die veur Baäl, Asjera en de hemellichems maekt weren. Disse veurwarpen verbraande hi'j buten de stad, op et braoklaand bi'j de Kidron, en de aske leut hi'j naor Betel ofvoeren.
05 Hi'j ontsleug de ofgodepriesters die deur de keunings van Juda ansteld weren om offers te branen op de offerplakken in de steden van Juda en in de kontreinen van Jeruzalem, en stuurde de priesters vot die de offers braandden veur Baäl en veur de zunne, de maone en de steerns, veur alle hemellichems.
06 Hi'j leut de Asjerapaol uut de tempel van de Heer weghaelen en buten de stad brengen, naor de bedding van de Kidron. Daor wodde hi'j verbraand, en de resten wodden verpulverd en over et begreefplak van 't gewone volk uutstri'jd.
07 Hi'j leut de vertrekken ofbreken waor manluden an tempelprostitutie deden en waor vrouwluden kleraosie weefden veur Asjera.
08 Alle priesters uut de steden van Juda leut hi'j naor Jeruzalem toe kommen. In et hiele laand, van Geba tot Berseba, leut hi'j de offerplakken ontwi’jden waor de priesters offers braand hadden. Ok de offerplakken links van de stadspoort, bi'j de ingang van de poort van stadskommedaant Josua, haelde hi'j daele.
09 De priesters van de offerplakken mochten niet bi’j et alter van de Heer in Jeruzalem kommen; wel mochten ze tegere mit heur ambtgenoten van de ongezoerde stoete eten.
10 Veerder leut Josia et offerplak Tofet in et Hinnomdal ontwi’jden, zodat gieniene zien zeune of dochter daor nog as offer veur Moloch verbranen kon.
11 Hi'j leut de peerden weghaelen die de keunings van Juda te ere van de zunne opsteld hadden vanof de ingang van et tempelterrein tot an et vertrek van de kaemerheer Netanmelech, en de zunnewaegens leut hi'j verbranen.
12 Hi'j leut de alters ofbreken die de keunings van Juda op et dak van et boververtrek van Achaz daelezet hadden, en ok de alters die Manasse in de beide veurtunen van de tempel maeken laoten hadde. Et puun leut hi'j zo vlogge meugelik ofvoeren en in de bedding van de Kidron smieten.
13 De offerplakken buten de stad, an de zuudkaante van de Barg van et verdarf, die keuning Salomo van Israël oprichten laoten hadde veur Astarte, de gruwelike godin van de Sidoniërs, Kemos, de gruwelike god van Moab, en Milkom, de gruwzeme god van Ammon, wodden deur de keuning ontheiligd:
14 hi'j sleug de gewi’jde stienen an stokken, hakte de Asjerapaolen omme en leut de gatten opvullen mit bonken van meensken.
15 Ok et alter en de offerhoogte in Betel brak hi'j of. Dat offerplak was anlegd deur Jerobeam, de zeune van Nebat, die de Israëlieten tot zunde anzet hadde. Josia steuk et offerplak in ‘e braand, verpulverde de resten en leut de Asjerapaol in vlammen opgaon.
16 Zien oge vul op et begreefplak daor op de heuvel, en hi'j gaf bevel om de bonkerakken uut de greven te haelen. Die verbraande hi'j op et alter, dat hi'j op die meniere ontwi'jdde. Zo gong de profetie van de Heer in vervulling die uutspreuken was deur de godsman die dit alles veurzegd hadde.
17 Josia vreug: "Wat is dat daor veur een stien?" "Dat is et graf van de godsman uut Juda," zeden de meensken doe, die daor woonden. "Alles wat jow mit et alter van Betel daon hebben, is deur him veurzegd."
18 Doe zee Josia: "Laot him mit rust. Zien biender meugen deur gieniene anraekt wodden." Dus leuten zi'j zien bonkerak mit rust, krek as et bonkerak van de profeet uut Samaria.
19 Josia leut ok de heiligdommen ofbreken die de keunings van Israël op de offerhoogten in Samaria bouwd hadden om de Heer te treiteren. Hi'j dee daor etzelde mit as hi'j in Betel daon hadde.
20 Op de alters in Samaria brocht hi'j de priesters van de offerplakken as offer en hi'j verbraande daor de bonken van meensken. Weeromme in Jeruzalem
21 beveelde de keuning et volk: "Vier Pesach te ere van de Heer, jim God, zoas et hier in et boek van et verbond beschreven stiet."
22 Sund de tied dat de rechters Israël bestuurden was Pesach jommes niet meer op die meniere vierd, ok niet in de tied van de keunings van Israël en Juda.
23 Eerst in et achttiende regeringsjaor van keuning Josia wodde in Jeruzalem weer op de juuste wieze Pesach vierd te ere van de Heer.
24 Ok zuverde Josia et laand van geestebezweerders, waorzeggers, huusgoden, ofgoden, kotomme, van alle schandaolige praktieken die in Juda en Jeruzalem veurkwammen. Zo kwam hi'j nao, wat beschreven ston in et wetboek dat de priester Chilkia in de tempel van de Heer vunnen hadde.
25 Mit hatte en ziel en mit inzet van al zien krachten perbeerde hi'j de wetten van Mozes strikt nao te leven en weeromme te gaon naor de Heer, zoas gienend van zien veurgangers of opvolgers ooit daon het.
26 Toch leut de Heer zien argernis tegen Juda, waorin hi'j ontbraand was deurdat Manasse him tot et uterste plaogd hadde, niet veren.
27 Hi'j zee: "Zoa'k Israël verstoten hebbe, zo za'k Juda ok verstoten. En Jeruzalem, de stad die ik uutkeuzen hadde, za'k ofwiezen, krek as de tempel waorvan ik zegd hebbe dat daor mien naeme wonen zol."
28 Veerdere biezunderheden over Josia bin optekend in de kronieken van de keunings van Juda.
29 Tiedens de regering van Josia trok farao Necho van Iegypte naor de Eufraat op om him bi'j de keuning van Assur an te sluten. Keuning Josia gong de farao integen, mar wodde bi'j et eerste treffen, in Megiddo, deur him ommebrocht.
30 Zien knechten brochten zien lichem op een waegen van Megiddo naor Jeruzalem, waor ze him begreuven in zien eigen graf. Josia zien zeune Joachaz wodde deur et volk tot opvolger van zien heit uutroepen en tot keuning zalfd.
Joachaz, keuning van Juda.
31 Joachaz was drienentwintig jaor doe hi'j keuning wodde. Drie maonden regeerde hi'j in Jeruzalem. Zien moeke was Chamutal, de dochter van Jirmeja, uut Libna.
32 Hi'j dee wat min is in de ogen van de Heer, krek zoas zien veuroolden.
33 Hi'j wodde deur farao Necho gevangenzet in Ribla in Hamat, zodat hi'j et keuningschop niet uutoefenen kon. De farao legde et laand een belasting op van honderd telent zulver en iene telent goold.
34 Hi'j stelde Eljakim, een aandere zeune van Josia, as opvolger van zien heit an en veraanderde zien naeme in Jojakim. Joachaz wodde deur de farao mitneumen naor Iegypte, en daor is hi'j ok wegraekt.
35 Jojakim betaelde de farao et zulver en 't goold. Om de vaastestelde schatting te betaelen, legde hi'j et laand een belasting op. Iederiene wodde naor vermogen ansleugen; zo wodde et zulver en 't goold veur farao Necho bi'j mekeer brocht.
Jojakim, keuning van Juda.
36 Jojakim was vuventwintig jaor doe hi'j keuning wodde. Elf jaor regeerde hi'j in Jeruzalem. Zien moeke was Zebudda, de dochter van Pedaja, uut Ruma.
37 Hi'j dee wat min is in de ogen van de Heer, krek zoas zien veuroolden.
 
 
2 Keunings 24.

01 Tiedens de regering van Jojakim vul keuning Nebukadnessar van Babylonië et laand binnen en maekte hi'j Jojakim tot zien vazal. En doe Jojakim nao drie jaor rebelleerde en tegen Nebukadnessar in opstaand kwam,
02 stuurde de Heer benden Chaldeeën, Arameeërs, Moabieten en Ammonieten op him of, die hi'j Juda binnenvalen leut om et te vernietigen, zoas hi'j deur zien knechten, de profeten, veurzegd hadde.
03 Dit overkwam Juda omreden de Heer et zels zo beschikt hadde; hi'j verstootte et vanwegens alle zunden die Manasse begaon hadde.
04 Wat de Heer him veural niet vergaf, was dat hi'j onschuldig bloed vergeuten had - hi'j had Jeruzalem mit onschuldig bloed vuld.
05 Veerdere biezunderheden over Jojakim bin optekend in de kronieken van de keunings van Juda.
06 Doe hi'j bi'j zien veuroolden te ruste gong, volgde zien zeune Jojachin him op.
07 De keuning van Iegypte ondernam gien veldtochten meer buten zien eigen laand, want de keuning van Babylonië had hiel et gebied dat an de keuning van Iegypte toeheurde inneumen, vanof de wadi die de greens mit Iegypte was tot an de Eufraat.
Jojachin, keuning van Juda.
08 Jojachin was achttien jaor doe hi'j keuning wodde. Drie maonden regeerde hi'j in Jeruzalem. Zien moeke was Nechusta, de dochter van Elnatan, uut Jeruzalem.
09 Hi'j dee wat min is in de ogen van de Heer, krek zoas zien heit.
10 Et was in die tied dat veldheren van keuning Nebukadnessar van Babylonië tegen Jeruzalem optrokken en de stad belegerd wodde.
11 Doe keuning Nebukadnessar zels veur de omsingelde stad verscheen,
12 gaf keuning Jojachin van Juda him tegere mit zien moeke, zien dienstvolk, zien legeranvoerders en zien kaemerheren an de keuning van Babylonië over; disse nam him gevangen in et achtste jaor van zien regering.
13 Nebukadnessar haelde alle schatten uut de tempel van de Heer en et keuninklik peleis weg en haelde alle goolden versierings los die keuning Salomo van Israël in de grote zael van de tempel anbrocht had, zoas de Heer veurzegd hadde.
14 Hiel Jeruzalem wodde in ballingschop wegvoerd: alle legeranvoerders en alle soldaoten, tienduzend man, en alle haandwarkersvolk en smeden; allienig et gewone volk bleef aachter.
15 Keuning Jojachin wodde as balling mitneumen naor Babel, tegere mit zien moeke, zien vrouwluden, zien kaemerheren en de notabelen.
16 Ok zeuvenduzend militairen en duzend man haandwarkersvolk en smeden, iederiene die bi'j et kriegsbedrief betrokken was, wodden deur de keuning van Babylonië in ballingschop wegvoerd.
17 Hi'j stelde Mattanja, een omke van Jojachin, in zien plak as keuning an en veraanderde zien naeme in Sedekia.
Sedekia, keuning van Juda; de verwoesting van Jeruzalem.
18 Sedekia was ienentwintig jaor doe hi'j keuning wodde. Elf jaor regeerde hi'j in Jeruzalem. Zien moeke was Chamutal, de dochter van Jirmeja, uut Libna.
19 Hi'j dee wat min is in de ogen van de Heer, krek zoas Jojakim.
20 De Heer was zo poerlelk op Jeruzalem en Juda dat hi'j ze uutaendelik verstootte. Sedekia kwam tegen de keuning van Babylonië in opstaand.
 
 
2 Keunings 25.

01 In et negende jaor van zien regering, op de tiende dag van de tiende maond, kwam Nebukadnessar, de keuning van Babylonië, mit zien hiele leger bi'j Jeruzalem an. Hi'j sleug daor zien kaamp op en maekte een wal rondom de stad toe.
02 Et beleg van de stad duurde tot in et elfde regeringsjaor van keuning Sedekia.
03 Op de negende dag van de maond – de hongersnood in de stad was ondreeglik wodden, d'r was veur de bevolking niks meer te eten –
04 wodde d'r een gat in de stadsmure sleugen. Hoewel de Chaldeeën rondom de stad toe laggen, wussen alle soldaoten naachs te ontkommen deur de poort tussen de beide stadsmuren die uutkwammen op de tuun van de keuning. De keuning vlochtte in de richting van de Jordaanvallei,
05 mar et Chaldese leger zette de aachtervolging in en haelde him op de vlakte van Jericho in. Hiel zien leger wodde uutmekeer sleugen
06 en de keuning zels neumen ze gevangen. Ze brochten him naor Ribla, naor de keuning van Babylonië, en daor wodde hi'j berecht.
07 Eerst wodden zien zeunen veur zien ogen ofslacht en doe wodden him de ogen uutsteuken. Daornao wodde hi'j naor Babel ofvoerd, boeid mit broonzen kettens.
08 Op de zeuvende dag van de vuufde maond, in et negentiende regeringsjaor van keuning Nebukadnessar van Babylonië, trok zien knecht Nebuzaradan, de kommedaant van zien liefwacht, Jeruzalem binnen.
09 Hi'j steuk de tempel van de Heer in braand, en et keuninklik peleis en alle aandere huzen van Jeruzalem ok; alle huzen van de rieken gongen in vlammen op.
10 Et Chaldese leger, dat onder zien bevel ston, haelde de stadsmuren van Jeruzalem daele.
11 De meensken die nog in de stad over weren, wodden deur kommedaant Nebuzaradan as ballings wegvoerd, krek as degenen die naor de keuning van Babylonië overlopen weren, kotomme, iederiene die nog over was.
12 Allienig de alderaarmsten leut hi'j aachter om veur de droevetunen en de akkers te zorgen.
13 De broonzen pilaoren bi'j de tempel van de Heer, de verriedbere onderstellen van de spuulbekkens en et grote broonzen bekken, de Zee, wodden deur de Chaldeeën uut mekeer haeld; et broons neumen ze mit naor Babel.
14 Ok de vuurbekkens, vuurscheppen, messen, koemen en et aandere keuperen tempelgerei neumen ze mit.
15 Veerder nam kommedaant Nebuzaradan alles mit wat mar van goold of zulver was, zoas de vuurbakken en de offerschaolen.
16 De twie pilaoren, de Zee, waorvan d'r mar iene was, en de verriedbere onderstellen die Salomo veur de tempel van de Heer maeken laoten hadde, bevatten saemen een niet te wegen massa broons.
17 De pilaoren weren ieder achttien el hoge en bekroond mit een broonzen kapiteel van drie el. Daor omhenne zat een keuperen vlechtwark, versierd mit grenaatappels.
18 De hogepriester Seraja, zien plaetsvervanger Sefanja en de drie priesters die an et heufd van de tempelwaacht stonnen, wodden deur Nebuzaradan, de kommedaant van de liefwacht, gevangenneumen.
19 En uut de stad haelde hi'j de raodsman die belast was mit oorlogszaken, vieve van de vertrouwelingen die vri'j toegang hadden tot de keuning, de siktaoris van de opperbevelhebber die tot opdracht had om et volk onder de waopens te roepen, en zestig grootgrondbezitters.
20 Disse meensken wodden deur Nebuzaradan gevangenneumen en naor Ribla overbrocht, naor de keuning van Babylonië.
21 De keuning van Babylonië leut heur in Ribla, in et gebied van Hamat, ommebrengen. Zo wodde Juda uut zien laand wegvoerd in ballingsschop.
22 Over et pat van 't volk dat van keuning Nebukadnessar van Babylonië in Juda blieven moch, stelde hi'j Gedalja, de zeune van Achikam, de zeune van Safan, as gouverneur an.
23 Doe de bevelhebbers van et leger en heur manschoppen daorvan heurden, zochten zi'j Gedalja in Mispa op: Jismaël, de zeune van Netanja, Jochanan, de zeune van Kareach, Seraja, de zeune van Tanchumet uut Netofa, en Jaäzanja, de zeune van iene uut Maächa, allemaole mit heur manluden.
24 Gedalja bezweerde de bevelhebbers en heur manluden: "Veur de Chaldese ambteners hoeven jim niet bange te wezen. Jim kun in et laand wonen blieven, en zolange aj’m de keuning van Babylonië dienen zal et jim goed gaon."
25 Mar in de zeuvende maond van dat jaor kwam Jismaël, de zeune van Netanja, de zeune van Elisama, die tot de keuninklike femilie heurde, mit tien manluden naor Mispa. Zi'j maekten Gedalja en de Judeeërs en Chaldeeën die bi'j him weren van kaant.
26 Uut aangst veur de Chaldeeën nam doe hiel et volk, van hoge tot lege, mit de bevelhebbers van et leger de vlocht naor Iegypte.

27 In et zeuvenendattigste jaor van de ballingschop van keuning Jojachin van Juda, op de zeuvenentwintigste dag van de twaelfde maond, verliende keuning Ewil-Merodach van Babylonië him bi'j gelegenhied van zien troonsbestieging graosie en ontsleug hi'j him uut de gevangenis.
28 Keuning Ewil-Merodach verzekerde him van zien welwillendhied en beveurrechtte him boven de aandere keunings die dwongen in Babel verbleven.
29 Jojachin hoefde niet langer gevangeniskleren te dregen en wodde veur de rest van zien leven an 't hof opneumen.
30 In zien daegeliks onderhoold wodde van now an deur de keuning veurzien, zien leven lange.