De twiede brief van Johannes
in een
Stellingwarver vertaeling
Et Ni'je Testement kent drie brieven die an Johannes toeschreven wodden. Disse brieven vertonen een grote overienkomst in stijl en gedachtegoed. Et is meugelik dat de auteur van 2 en 3 Johannes dezelde is as die van 1 Johannes, mar et materiaol is te zunig om hierover wissighied te kriegen. In ieder geval is et dudelik dat de brieven ofkomstig binnen uut dezelde ronte.
Al vroeg in de tredisie is de naeme van de evangelist Johannes mit 2 Johannes in verbaand brocht, hoewel in de tekst gien naeme van de schriever stiet. D'r bin grote overienkomsten mit et evangelie, mar d'r bin ok grote verschillen an te wiezen. Een protte onderzukers betogen dat de schriever in ieder geval zocht wodden moet in de schoele van de johanneïsche theologie.
In de brief zels wodt de schriever allienig anduded mit 'ooldste', riekaans niet zozeer de anduding van een karkelik ambt mar eerder een eretitel waormit de schriever bi'j de lezers bekend is. De adresseerde gemiente wodt anduded mit 'de uutverkoren vrouw'. Meugelik is de brief an et begin van de twiede ieuw in Klein-Azië of in Syrië schreven.
Meer as 1 Johannes dreegt 2 Johannes et kerakter van een brief. De schriever herhaelt in et kot de bosschop van 1 Johannes: hi'j waorschouwt tegen de dwaelleer dat Jezus niet echt meenske west wezen zol, en hi'j ropt op tot ienhied in de gemiente en naoleving van de geboden.
Vertaeling van de Biebel (NBG 2004)
deur Piet Bult uut Ni’jberkoop
2 Johannes 1.
01 Van de ooldste. An de uutverkoren vrouw en heur kiender, waor ik warkelik omme geve – en niet allienig ikke, mar iederiene die de waorhied kennen leerd het –
02 op grond van de waorhied die in oons blift en bi'j oons wezen zal tot in iewighied.
03 Genaode, baarmhattighied en vrede zullen bi'j oons wezen, van God, de Heit, en van Jezus Christus, de Zeune van de Heit, in waorhied en liefde.
04 Ik was slim bliede om te vernemen dat pattie van jim kiender de weg van de waorhied volgen, in overienstemming mit et gebod dat de Heit oons geven het.
05 En now he'k een vraoge an jim. Ik hool jim in disse brief gien ni'j gebod veur, mar een gebod dat oons vanof et begin bekend is: lao'we van mekeer holen.
06 Van mekeer holen hoolt in dawwe leven neffens God zien geboden. Neffens dit gebod, dat jim vanof et begin heurd hebben, moej'm leven.
07 D'r bin een protte dwaellerers in de wereld kommen die de komst van Jezus Christus as meenske niet belieden. Dat now is de verleider, de antichrist!
08 Wees op jim hoede en verspeul niet wawwe veur mekeer kregen hebben, mar zorge daj'm et volle loon kriegen.
09 Wie niet bi'j de leer van Christus blift mar veerder gaon wil, het God niet. Wie bi'j die leer blift, het liekegoed de Heit as de Zeune.
10 As d'r iene bi'j jim komt die disse leer niet uutdreegt, laot him dan niet in jow huus toe en groet him niet,
11 want wie zoe'n iene groet, is mit schuldig an zien kwaolike wark.
12 Hoewel ik jim nog vule meer te zeggen hebbe, wi'k dat niet doen mit inkt en pepier. Ik hope naor jim toe te kommen en persoonlik mit jim te praoten; dan zal oonze bliedschop volkomen wezen.
13 De kiender van jim uutverkoren zuster groeten jim.