01 Van Paulus, Silvanus en Timoteüs. An de gemiente in Tessalonica, die toeheurt an God, de Heit, en de Heer Jezus Christus. Genaode en vrede is mit jim.

02 Wi'j daanken God de hieltied veur jim allemaole: wi'j numen jim onophooldelik in oonze gebeden

03 en gedaenken dan veur oonze God en Heit hoevule jim geleuf tot staand brengt, hoe krachtig jim liefde is en hoe staandvaastig jim hopen blieven op de komst van Jezus Christus, oonze Heer.

04 God het jim lief, breurs en zusters. Wi'j weten dat hi'j jim uutkeuzen het:

05 oonze verkondiging an jim overtuugde ommes niet allienig deur oonze woorden, mar ok deur de overweldigende kracht van de heilige Geest. Jim weten hoevule we veur jim betekend hebben doe we bi'j jim weren.

06 Jim hebben oons naovolgd, en daormit de Heer: onder zwaore beproevings hebben jim et woord ontvongen mit de vreugde van de heilige Geest.

07 Zo bin jim een veurbield veur alle geleuvigen in Macedonië en Achaje wodden.

08 Want et woord van de Heer het heur vanuut jim gemiente niet allienig in Macedonië en Achaje verspreided, jim geleuf in God vint ok weerklank buten die kontreinen. Wi'j hoeven daorover niks te zeggen;

09 iederiene praot d'r over hoe wi'j deur jim ontvongen binnen en hoe jim jim van de ofgoden ofkeerd hebben om jim tot God te keren – om him, de levendige en waore God, te dienen

10 en om zien Zeune uut de hemel te verwaachten: Jezus, die hi'j uut de dood opstaon laoten het en die oons redden zal van et kommende oordiel.

1 Tessalonicenzen 2.

Bezuuk an Tessalonica.

01 Jim weten zels, breurs en zusters, dat oons bezuuk an jim niet ommenocht west het.

02 Ondaanks de mishaandelings en beledigingen die wi'j, zoas jim bekend is, in Filippi te verneren hadden, vunnen we in vertrouwen op oonze God de moed om jim bekend te maeken mit zien evangelie. Daorveur hewwe oons tot et uterste inspand.

03 Oonze oproep berust niet op een dwaling, op oneerlikhied of bedrog.

04 Wi'j praoten allienig omreden God oons daortoe weerdig keurd het en oons et evangelie toevertrouwd het – niet om meensken te behaegen, mar God, die de meensken deurgrondt.

05 Jim weten dawwe jim nooit naor de mond praot hebben en dat oonze woorden nooit een dekmaantel veur hebzucht weren. God is oonze getuge.

06 We hebben ok niet perbeerd om de geunst van meensken of te dwingen, niet bi'j jim en niet bi'j aanderen.

07 Hoewel we oons as apostels van Christus gellen laoten kunnen hadden, biwwe jim integen kommen mit de tederheid van een voedster die heur kiender koestert.

08 In die gezindheid, vol liefde veur jim, weren we niet allienig bereid om jim dielen te laoten in God zien evangelie, mar ok in oons eigen leven. Zo dierber weren jim oons wodden.

09 Jim herinneren jim, breurs en zusters, hoe we oons inzet en inspand hebben, hoe we dag en naacht warkt hebben om gieniene van jim tot last te wezen. Op die meniere hewwe jim et evangelie van God verkondigd.

10 Jim kun getugen, en God zels, hoe toewijded, hoe oprecht en zuver we bi'j jim, die tot geleuf kommen binnen, leefd hebben.

11 Jim weten dawwe veur iederiene van jim weren as een heit veur zien kiender.

12 We hebben jim anvieterd en bemoedigd en jim op et hatte drokt om zo te leven dat jim God ere bewiezen. Hi'j ropt jim tot zien keuninkriek en luuster.

13 Wi'j daanken God dan ok onophooldelik dat jim zien woord, dat jim van oons ontvongen hebben, niet anneumen hebben as een bosschop van meensken, mar as wat et warkelik is: as et woord van God dat ok warkzem is in jim, die geleuven.

14 Et is jim vergaon, breurs en zusters, as God zien gemienten in Judea die Christus Jezus toebeheuren. Jim hebben lieke zwaor onder jim stadsgenoten leden as zi'j onder de Joden.

15 Die hebben de Heer Jezus en de profeten ommebrocht en oons tot et uterste vervolgd. Zi'j mishaegen God en bin alle meensken vi'janig zind,

16 omreden zi'j oons beletten om aandere volken te vertellen hoe ze redded wodden kunnen. De maote van heur zunden raekt now vol, en God zien veroordieling is te volle over heur henne kommen.

17 Breurs en zusters, now wi'j veur kotte tied bi'j jim weg binnen, bin jim weliswaor uut et oge, mar daorom nog niet uut et hatte, en omreden we zo naor jim verlangden hewwe oons alle muuite troost om jim te zien.

18 We stonnen dan ok meer as iens op et punt om naor jim toe te kommen – ik, Paulus, niet in et laeste plak –, mar Saotan het et oons belet.

19 Want wie is oonze hope en vreugde? Wie is oonze erekraanze awwe veur Jezus, oonze Heer, staon bi'j zien komst? Wie aanders as jim?

20 Ja, jim bin oonze ere en vreugde.

1 Tessalonicenzen 3.

01-02 Omreden we et niet langer uuthullen, besleuten we om Timoteüs naor jim toe te sturen, oonze breur en God zien mitwarker in de verkondiging van et evangelie van Christus. Zels bleven we in Athene aachter. Timoteüs mos jim starken en anmoedigen in jim geleuf,

03 zodat jim jim niet uut et veld slaon laoten zollen deur de tegenspoed die jim ondervienen. Jim weten te langelaeste zels dat wi'j die ondergaon moeten.

04 Doe we bi'j jim weren, hewwe jim al zegd dat oons tegenspoed te waachten ston; die is dan ok kommen, zoas jim ondervunnen hebben.

05 Ik hebbe Timoteüs dus stuurd omreden ik et niet langer uutholen kon. Ik wol weten of jim geleuf staand hul, want ik was bange dat de verleider jim verleided had en oonze inspannings ommenocht west weren.

06 Mar now is Timoteüs weeromme kommen mit et goeie ni'js over jim geleuf en liefde. Hi'j het oons butendat verteld hoe slim jim oons altied as veurbield nemen en hoe jim d'r lieke vurig naor verlangen om oons te zien as wi'j jim.

07 Daordeur, breurs en zusters, biwwe over jim geruststeld. In al oonze nood en ellende vulen we oons starkt deur jim geleuf,

08 want now opni'j bliekt dat de Heer jim follement is, leven we weer op.

09 Kuwwe God ooit genoeg veur jim daanken? Kuwwe him ooit genoeg daanken veur de vreugde die hi'j oons mit jim geven het?

10 Wi'j bidden dag en naacht mit volle overgaove dawwe jim weer zien zullen en anvullen kunnen wat d'r nog an jim geleuf mist.

11 Meugen God, oonze Heit, en oonze Heer Jezus oons pad naor jim leiden.

12 Mag de Heer jim liefde veur mekeer en ieder aander groter maeken, zodat jim liefde lieke overvloedig wodt as oonze liefde veur jim.

13 Mag de Heer jim deur die liefde kracht geven, zodat jim zuver en heilig veur oonze God en Heit staon zullen as oonze Heer Jezus komt mit al zien engels. Amen.

1 Tessalonicenzen 4.

Anvieterings.

01 Breurs en zusters, in naeme van de Heer Jezus vraogen we jim mit klem om te leven zoas wi'j et jim leerd hebben, dus zo dat et God goeddonkt. Jim doen dat al, mar wi'j vieteren jim an om et nog vule meer te doen.

02 Jim kennen de veurschriften die wi'j jim op gezag van de Heer Jezus geven hebben.

03 Et is de wil van God dat jim een heilig leven leiden: dat jim jim ontholen van ontucht,

04 dat ieder van jim zien lichem heiligt en in eerberhied weten te holen

05 en daj'm niet zoas de ongeleuvigen, die God niet kennen, toegeven an jim hatstocht en begeerte.

06 Breng gien schaede toe of bedriege jim breur of zuster in dit opzicht niet, want de Heer vergeldt dit alles, zoas wi'j jim vroeger al naodrokkelik veurhullen hebben.

07 God het oons niet reupen tot zedelooshied, mar tot een heilig leven.

08 Dat, wie disse veurschriften niet naokomt, smiet niet een meenske, mar smiet God weg, die jim zien heilige Geest geft.

09 Over de onderlinge liefde hoeven wi'j jim niks te schrieven, want jim hebben zels van God leerd hoe jim in liefde mit mekeer ommegaon moeten.

10 Jim doen dat al mit alle geleuvigen in hiel Macedonië, mar, breurs en zusters, wi'j vieteren jim an om et nog vule meer te doen

11 en d'r een ere in te stellen om in alle rust jim eigen zaeken te behattigen en jim eigen bolle te verdienen. Dat hebben wi'j jim opdreugen,

12 zodat jim een eerzem leven leiden zullen in de ogen van heur die niet tot de gemiente heuren, en jim van gieniene ofhankelik binnen.

13 Breurs en zusters, wi'j willen jim niet in et ongewisse laoten over de dooien, zodat jim niet hoeven te treuren, zoas zi'j die gien hope hebben.

14 Want as wi'j geleuven dat Jezus sturven is en opstaon is, moe'we ok geleuven dat God deur Jezus de dooien naor him toe leiden zal, tegere mit Jezus zels.

15 Wi'j zeggen jim mit een woord van de Heer: wi'j, die in leven blieven tot de komst van de Heer, zullen de dooien in gien geval veurgaon.

16 As et signaol geven wodt, de aartsengel zien stemme verheft en de bazuin van God klinkt, dan zal de Heer zels uut de hemel daelekommen. Dan zullen eerst de dooien die Christus toeheuren opstaon,

17 en daornao zullen wi'j, die nog in leven binnen, tegere mit heur wegvoerd wodden op de wolken en gaon we de Heer in de locht integen. Dan zuwwe altied bi'j him wezen.

18 Troost mekeer mit disse woorden.

1 Tessalonicenzen 5.

01 Breurs en zusters, ik hoef jim niet te schrieven over et mement waorop dit gebeuren zal,

02 want jim weten zels mar al te goed dat de dag van de Heer komt krek as een dief in de naacht.

03 As de meensken zeggen dat d'r vrede en veilighied is, wodden ze opiens troffen deur de ondergaank, zoas een zwangere vrouw deur barensweeën. Vlochten is dan onmeugelik.

04 Mar jim, breurs en zusters, jim leven niet in et duuster, zodat de dag van de Heer jim overvalen kunnen zol as een dief,

05 want jim bin allemaole kiender van et locht en van de dag. Wi'j beheuren niet toe an de naacht en et duuster,

06 dus lao'we niet slaopen, zoas aanderen, mar wakker blieven en op oonze hoede wezen.

07 Wie slaopt, slapt naachs, en wie him bedrinkt, is naachs dronkend;

08 mar laoten wi'j, die toeheuren an de dag, op oonze hoede wezen, omgord mit et harnas van geleuf en liefde, en tooid mit de helm van de hope op redding.

09 Want God zien bedoeling mit oons is niet dat wi'j veroordield wodden, mar dat wi'j redded wodden deur oonze Heer Jezus Christus.

10 Hi'j is veur oons wegraekt zodat wi'j, of we now op eerde binnen of sturven binnen, tegere mit him leven zullen.

11 Dus troost mekeer en wees mekeer tot veurbield, zoas jim trouwens al doen.

12 Wi'j vraogen jim, breurs en zusters, diegenen onder jim te erkennen die him op gezag van de Heer d'r veur inzetten om jim te leiden en terechte te wiezen.

13 Jim moe'n heur om heur wark een protte liefde en respekt betonen. Leef in vrede mit mekeer.

14 Wi'j vieteren jim an, breurs en zusters, iederiene die zien daegeliks wark verwaarloost terechte te wiezen, de moedelozen hope te geven, op te kommen veur de zwakken, mit iederiene geduld te hebben.

15 Zie d'r op toe dat gieniene kwaod mit kwaod vergeldt en streef de hieltied naor et goeie, liekegoed veur mekeer as veur ieder aander.

16 Wees de hieltied verhoopt,

17 bidde onophooldelik,

18 daank God onder alle omstaandigheden, want dat is wat hi'j van jim, die iene binnen mit Christus Jezus, verlangt.

19 Doof de Geest niet uut

20 en veracht de profetieën niet die hi'j jim ingeft.

21 Onderzuuk alles, behoold et goeie

22 en vermijd ieder kwaod, in welke vorm et him ok veurdot.

23 Mag de God van de vrede zels jim leven in alle opzichten heiligen, en meugen hiel jim geest, ziel en lichem zuver beweerd wezen bi'j de komst van oonze Heer Jezus Christus.

24 Hi'j die jim roept is trouw en dot zien belofte gestand.

25 Breurs en zusters, bidde ok veur oons

26 en groet mekeer mit een heilige tuut.

27 In de naeme van de Heer vraog ik jim dringend om disse brief veur te lezen an alle breurs en zusters.

28 De genaode van oonze Heer Jezus Christus is mit jim.